Read Southern Kisi Āīsa̍yā 58 Bible Online

Āīsa̍yā 58 - Southern Kisi bible

Āīsa̍yā 58

¹Mi̍ Mɛ̄lɛ̄ka̍ Ya̍a̍wɛ̄ɛ̄ o̍ lo᷅ o̍ ko̍ŋ mbo̍ dīmī āā, “Yo̍nda̍ cho̍o̍ cho̍o̍ a̍ kpāāyā nu̍mndo̍ kpo̍u̍. Yo̍nda̍ mī dīōm nūmndo̍ kūɛ̄ mɛ̄ɛ̍ nda̍ hɔ̄ŋ nu̍a̍ā pūtɛ̍nɛ̍i̍yo̍ yɛ̍. Di̍mu̍l yu̍ŋgu̍ Che̍kɔ̍pū wo̍ a̍ yɔ̄ŋndā ndāla̍ wɔ̍ɔ̍ŋnda̍ŋ o̍kɔ̄ɔ̄, nda̍ yɔ̍nūŋ ni̍ māā wānāā nīa̍a̍ I̍sɔ̄lūɛ̄ī.

²Wāŋnda̍ ha̍ā, lēpāa̍ o̍ lēpāa̍ ā chō ya̍ sōōlūūwo̍. Ā chō chɔ̄mndo̍ māā ā nɔ̄ yēēmɛ̍i̍ kpe̍e̍kpe̍i̍ le̍ mā tōl nɛ̄i̍ nūu̍ kɔ̄ɔ̄lī, ndu̍yɛ̍ mā chūa̍ sāwāla̍ nīla̍ŋ. Ā chō chɔ̄mndo̍ o̍ lāhɔ̄l māā ā chō kāa̍le̍ to̍sā sɔ̍ɔ̍ŋ sa̍kpō Mɛ̄lɛ̄ka̍ o̍ hɔ̍l, māā ā cho̍ bɛ̍ɛ̍ wa̍nāa̍ kɛ̍ɛ̍ le̍ sāwāla̍ ya̍ Mɛ̄lɛ̄ka̍ ndāa̍ chūā le̍. Ā chō ya̍ Mɛ̄lɛ̄ka̍ nyūnāa̍ le̍ mī kīlu̍l nda̍ yāma᷅ŋ kɛ̄ndɔ᷄ŋ, ndu̍yɛ̍ ma̍ wā chɔ̄mndo̍ o̍ lāhɔ̄l māā ā nɔ̄ yēēmɛ̍i̍ kpe̍e̍kpe̍i̍ le̍ mī ya̍ Mɛ̍lɛ̄ka̍ wa̍ a̍ nda̍ kpɛ̍ɛ̍lūŋ.”

³Ā chō ya̍ nyūnāa̍ āā, “Vɛ᷅ mi̍ ŋ̄ bīī su᷅mndo̍ le̍ nu̍m dīōmndo̍ nyūnāa̍, a̍ to̍fa̍ na̍a̍ bɛ̍ɛ̍ le̍? Vɛ᷅ mi̍ ŋ̄ tūsī na̍a̍ pi̍la̍ tōōlō o̍ nūmndo̍, a̍ sa̍a̍la̍ŋ na̍a̍ kpo̍sōŋ te̍?” Kɛ̍ nyɛ̄ ya̍ Mɛ̄lɛ̄ka̍ Ya̍a̍wɛ̄ɛ̄ di̍mi̍ wo̍ cho̍ ho̍ō ni̍. Su᷅mndā nyāla̍ nya̍ chō bīyɔ̄ɔ̍ la̍ŋ, ō cho̍ le̍ ya̍ le̍ nya̍ chō la̍ŋ bīyɔ̄ɔ̍ le̍. Pāa̍le̍ nya̍ bīī su᷅mndo̍ le̍ŋ bɛ̍ɛ̍, le̍ dɛ̍nɛ̍ nyā kɛ̍ndɔ̄ɔ̍ ko̍ni̍, ndu̍yɛ̍, wānāa̍ cho̍ nya̍ wa̍lta̍ŋ o̍ lābā wa̍, mī lā tūsī nda̍ nyɛ̄ pālāa̍ chōo̍.

⁴Su᷅m nyāa̍, mɛ̄ɛ̄lu̍la̍ŋ a̍ sɛ̄ɛ̄ŋgi̍āŋ nda̍ŋ, ndu̍yɛ̍ a̍ sɔ̍ŋgɔ̄la̍ŋ, mī lā sāāna᷅ŋ a̍ lābā mī lā de᷄l ki̍līŋ. Lā nɔ̄ o̍ kɔ̄l tē lā wa̍ su᷅mndā wāā le̍nde̍ bīyɔ̄ɔ̍ pɛ̍, ya̍ Mɛ̄lɛ̄ka̍ tūēī pīɛ̄īlē nyāle̍ŋ nāa̍ ya̍ cho̍ o̍ fo̍ndā nūu̍ chōo̍ cho̍o̍ wa̍? Sāko̍.

⁵Lā nɔ̄ o̍ kɔ̄l māā tē lā tūsi̍ŋ tu̍si᷄ŋ kɔ̍l chōo̍ wa̍ā le̍nde̍ pɛ̍, o̍ su᷅mndo̍ bīyɔ̄ɔ̍ ni᷄ŋ, māā su᷅m wāā le̍nde̍ ya̍ Mɛ̍lɛ̄ka̍ yēēma̍ ni̍? Tē lā cha᷄l pɛ̍ mī lā tūndu᷄ŋ bo᷅lle̍ o̍ lābɛ̄ŋgu̍ ni̍ŋ a̍ mɔ̍nɛ̍i̍ bɛ̍ndūe̍i̍, mī lā wōōnu̍ŋ nyɛ̍lā lābɛ̍kīla̍ŋ, ndu̍yɛ̍ mī lā hīni̍ o̍ pūlta̍ŋ ni᷄ŋ, le̍ kɔ̄ltā nyāla̍ ta̍mbɛ̍i̍la̍ŋ chɔ̄mndo̍, mɛ̄ɛ̍ ko̍ŋ cho̍ su᷅m tōnya̍a̍ ni̍? Su᷅m wāā le̍nde̍ ya̍ Mɛ̍lɛ̄ka̍ Ya̍a̍wɛ̄ɛ̄ hi̍nī kɔ᷅l ni̍? Ō cho̍ su᷅m wāā le̍nde̍ le̍.

⁶Su᷅m ya̍ Mɛ̍lɛ̄ka̍ chūa̍ māā su᷅m tōnya̍a̍ wo̍ cho̍ ho̍ō ni̍. Wānāā nya̍ chō yīīyo̍ o̍ ka̍fāla̍ŋ chōo̍ wa̍, lā tīīmbu̍u̍ nda̍, ndu̍yɛ̍ mī lā ma᷄l nda̍ mā kūɛ̄nu᷄ŋ. O̍ ko̍ŋ kɔ̍ɔ̍lī, wānāa̍ cho̍ nya̍ o̍ lābā mi̍ lā wā nda̍ nyɛ̄ kīndīlāa̍ hāndɔ̄ɔ̍ chōo̍ wa̍, mī lā fāŋa̍ nda̍ ndu̍ chōo̍, ndu̍yɛ̍ mī lā ma᷄l nda̍ mā kūɛ̄nu᷄ŋ.

⁷O̍ ko̍ŋ kɔ̍ɔ̍lī, tē lā chē wāŋndo̍ a̍ yīa̍a̍ŋ pɛ̍, lā ke̍ ndu̍ nyɛ̄ dīa̍a̍. Tē lā chē wānā ta̍mbɛ̍i̍yo̍ pɛ̍, o̍ nɔ̍ fo̍ndā lɔ̄lāā le̍ wo̍, lā ke̍ ndu̍ nāa̍ lɔ̍lāa̍. Tē lā chē wāŋndo̍ a̍ fɛ̍li̍o̍o̍ pɛ̍, lā ke̍ ndu̍ nyɛ̄ chūɛ̄ɛ̄na᷄ŋndo̍, ndu̍yɛ̍ tē lā chē wānāya᷅ŋ nyāa̍ŋ a̍ bālā ha̍vɛ̍i̍la̍ŋ pɛ̍, la̍ māla̍ nda̍.

⁸Tē lā tōsa̍ mu᷅ŋ pɛ̍, nyɛ̄ nī wa̍wo̍ŋndo̍ ō dīāndū ni̍ŋ nya̍ chōo̍ mɛ̄ɛ̍ yɛ̄ŋndē īdīi̍le̍ŋ lē dīāndū nu̍a̍ā yɛ̍, ndu̍yɛ̍ o̍ ko̍ŋ kɔ̍ɔ̍lī, bōōlɔ᷄ŋnda̍ cho̍ nya̍ la̍ŋ, mī ī si̍ŋgi̍ la̍ŋ chɔ̍chɔ̍. Bā o̍ bā nya̍ wa̍ kɔ̄la̍ŋ pɛ̍, ya̍ Mɛ̍lɛ̄ka̍ nyāa̍, ya̍ si᷅m ni̍ŋ nya̍ lāchī ni̍ mī ku̍ɛ̄ a̍ nya̍, ndu̍yɛ̍, mī nāŋɔ̄ɔ̄ ni̍ chɔ᷅m māā ya̍ Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ wo̍ ō si᷄m nya̍ a̍ mākɔ̄ɔ̄, le̍ nya̍ māndāa̍.

⁹A̍ te̍le̍ŋ ko̍ŋ, lā nɔ̄lā ni̍ŋ mī lā pīɛ̍i̍ ya̍ Mɛ̍lɛ̄ka̍ Ya̍a̍wɛ̄ɛ̄, ndu̍yɛ̍ mī mu̍li̍ nya̍ dīōm. O̍ ko̍ŋ kɔ̍ɔ̍lī, mī lā kōŋu̍l nāa̍ ya̍ chu̍a̍ le̍ mālāa̍, ndu̍yɛ̍ mī tu̍e̍ī nya̍ dīōm. Tē lā pɛ̄ŋgi̍ wāŋnda̍ nyɛ̄ kīndīlāa̍ hāndɔ̄ɔ̍ chōo̍ pɛ̍, o̍ ko̍ŋ kɔ̍ɔ̍lī, mī lā pɛ̄ŋgi̍ wāŋnda̍ dīōmndā wɔ̄ɔ̍ŋnda̍ŋ dīmūllo̍, a̍ nda̍ sōo̍ŋ yūlūllo̍,

¹⁰o̍ ko̍ŋ kɔ̍ɔ̍lī, mī lā chē wāŋnda̍ a̍ yīa̍a̍ŋ mī lā ke̍ nda̍ nyɛ̄ ndīa̍a̍, ndu̍yɛ̍ wānāa̍ cho̍ o̍ nyɛ̄ pālāa̍ ni᷄ŋ nda̍, mī lā māla̍ nda̍ o̍ bālā ndāla̍ ha̍vɛ̍i̍la̍ŋ ni᷄ŋ pɛ̍, nyɛ̄ wa̍wo̍ŋndo̍ chō nya̍ dīōndɔ̄ɔ̍ chōo̍, mī nyūmmā tīŋgīsi̍ma̍ nyāa̍ŋ mā sīmnūŋ nyɛ᷅ wa̍wo̍ŋ pāa̍le̍ ka̍lāa̍.

¹¹Ya̍ Mɛ̍lɛ̄ka̍ Ya̍a̍wɛ̄ɛ̄, I̍ wa᷅ ni̍ŋ nya̍ nɛ̄i̍ nya̍ wā ni̍ŋ cho̍o̍ wo̍ chɔ̄mndo̍ le̍ te̍le̍ŋ o̍ te̍le̍ŋ, ndu̍yɛ̍ mī ke̍ nya̍ nyɛ̄m kɛ̄ndɛ̄ kɛ̍ndɛ̄ŋ nya̍ yēēma̍ wo̍ŋ, mī to̍sa̍ mī lā hīni̍ kɔ̄l. I̍ cho̍ tōsā mī lā sɔ̄la̍ dīāllūŋ kāla᷄ŋ, ndu̍yɛ̍ mī lā wānu̍ŋ kɛ̍ndi̍a̍a̍ che̍che̍ŋ. Lā wā ni̍ŋ ma̍wa̍ā mɛ̄ɛ̍ kpe̍le̍ nda̍ pɔ̄ɔ̄lā ho̍ō le̍ te̍le̍ŋ o̍ te̍le̍ŋ ndo̍ ō wā nu̍a̍ā yɛ̍. Mɛ̄ɛ̍ pēē pɔ̍mbɔ̄ɔ̍ ō wā nu̍a̍ā ō ve̍lā le̍ yɛ̍, le̍nde̍ nya̍ wā ni̍ŋ ni̍.

¹²Wānāā nyāa̍ ā mīŋgī ni̍ŋ chi̍e̍e̍ŋ lāpɔ̄m māsīndɛ̄ si̍ndɔ᷄ŋ tāŋgūl, mā mīŋgi̍ mu̍ŋ sīmī o̍ chīīyūŋ pāāndo᷄ŋ chōo̍. Wāŋnda̍ ā sīnā ni̍ŋ nya̍, māā nya̍ cho̍ wānāa̍ mi̍ŋgi̍ sāāsāla̍ŋ tāŋgūl la̍ ni̍, māā nya̍ cho̍ wānāa̍ mi̍ŋgi̍ bɛ̍ɛ̄la̍ŋ, a̍ fo̍ndāŋndā chālāā la̍ŋ bɛ̄ɛ̄ndīāā wa̍ ni̍.

¹³Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Lā ke̍ pa̍a̍le̍ nīle̍ pɛ̍ŋgīāāle̍ŋ bɛ̄ɛ̄le̍ŋ. Lā to̍sā nyɛ̄ o̍ nyɛ̄ o̍ pāa̍le̍ŋ nde᷅ŋ chōo̍ le̍ yēēmɛ̍i̍ nyɛ̄i̍ le̍. Lā chūa̍ pāa̍le̍ŋ nde᷅ŋ māā pāa̍le̍ kɔ̄l kɛ̄ndɛ̄, ndu̍yɛ̍ mī lā ke̍ le̍ŋ bɛ̄ɛ̄le̍ŋ, māā pāa̍le̍ kāsīle̍ ya̍ Mɛ̍lɛ̄ka̍ Ya̍a̍wɛ̄ɛ̄ le̍ŋ le̍ cho̍ ni̍. Lā ke̍ le̍ŋ bɛ̄ɛ̄le̍ŋ. Lā ke̍lā o̍ pāa̍le̍ŋ nde᷅ŋ chōo̍ le̍, lā to̍sa̍ wa̍li̍ o̍ wa̍li̍ le̍cho̍ō le̍, kɛ̄lɛ̄ŋgāā mī lā dīmi̍ dīōmnda̍ wɔ̄ɔ̍ŋ o̍ pāa̍le̍ŋ nde᷅ŋ chōo̍. Tē lā tōsa̍ nyɛ̄ ya̍ I̍ di̍mu̍l nya̍ le̍ tōsāa̍ a̍ pāa̍le̍ŋ nde᷅ŋ o̍kɔ̄ɔ̄ wo̍ pɛ̍,

¹⁴tōsāa̍ ya̍ Mɛ̍lɛ̄ka̍ Ya̍a̍wɛ̄ɛ̄ to̍sā ni̍ mī lā dɔ̄ɔ̄nu᷄ŋ nya̍a̍le̍ ta̍u̍ ta̍u̍, ndu̍yɛ̍ mī to̍sa̍ mī lā sɔ̄la̍ fo̍ndāŋndā lēbɛ̄ɛ̄lā bɛ̄ndūla̍ŋ o̍ chi̍e̍ēŋndo̍ ni᷄ŋ, o̍ ko̍ŋ kɔ̍ɔ̍lī, lɛ̄ŋndē ya̍ I̍ ke̍ le᷅ŋ Che̍kɔ̍pū fi̍nyā nyā ma̍ma̍ le̍ŋ, mī to̍sa̍ mī lā dē le̍ŋ tɔ̄nɔ̄. Ya̍ Mɛ̍lɛ̄ka̍ Ya̍a̍wɛ̄ɛ̄ ya̍ so̍ō ni̍.”