Read Southern Kisi Āīsa̍yā 59 Bible Online

Āīsa̍yā 59 - Southern Kisi bible

Āīsa̍yā 59

¹Mī di̍mu̍l nya̍ wāŋnda̍ I̍sɔ̄lūɛ̄ī, lā yi̍ya᷄ŋ nu̍a̍ā māā Mɛ̄lɛ̄ka̍ Ya̍a̍wɛ̄ɛ̄ o̍ nɔ̍ kpāāyā le̍ nya̍ chīīndi̍a̍a̍ le̍ le̍, ɔ̄ɔ̄, mī lā yīya̍ŋ māā nīla̍ŋ la̍ ba̍ŋu̍l ndu̍ ni̍, māā nyɛ̄ kōŋ o̍ tu̍i̍ī pi̍ɛ̍i̍lē nyāle̍ŋ te̍ ni̍.

²Sɔ̄ɔ̍ŋ wɔ̍ɔ̍ŋ nya̍ chō tōsāa̍ wo̍ŋ, mu̍ŋ fa̍ŋa̍ nya̍ Mɛ̄lɛ̄ka̍ īkɛ̄i̍ ni̍. Yɔ̄ŋndā nyāla̍ wɔ̍ɔ̍ŋnda̍ŋ la̍ to̍sa̍ ni̍, mbo̍ fāŋā hɔ̄lāā ndūa̍a̍ o̍ nya̍ lo̍, lā pīɛ̍i̍ ndu̍ bɛ̍ɛ̍ ō tu̍i̍ī pi̍ɛ̍i̍lē nyāle̍ŋ te̍.

³Bālā nyāla̍ŋ lā chō lā nɔ̄ɔ̄lɛ̍i̍ Mɛ̄lɛ̄ka̍ o̍ hɔ̄l, a̍ kōo̍ma̍ wānāā nya̍ dīu̍ wa̍, ndu̍yɛ̍ o̍ ko̍ŋ kɔ̍ɔ̍lī, sōōŋ nyāa̍ŋ kpo̍u̍ mi̍ ŋ̄ wā ŋ̄ nɔ̄ɔ̄lɛ̍i̍ a̍ sɔ̄ɔ̍ŋ wɔ̍ɔ̍ŋ nya̍ tōsa̍ wo̍ŋ. Nyɛ̄ o̍ nyɛ̍ fu̍lā nya̍ o̍ lāsōndō, chōōla̍ŋ kpo̍sōŋ, ndu̍yɛ̍ mī dīɔ̄ɔ̄mūīī nyɛ̍i̍ ī sūāā sɔ̍ɔ̍ŋ dɛ̍nɛ̍ wɔ̍ɔ̍ŋndo̍ŋ.

⁴Lā nɔ᷅ di̍ a̍ wāŋnda̍ o̍ sɔ̄ɔ̍ŋ ni᷄ŋ te̍, mī lā kūā a̍ nda̍ o̍ ko̍tīi̍la̍ŋ ni᷄ŋ. Kɔ̍ɔ̍sɔ̍la̍ lāchōōwāla̍ŋ, la̍ŋ nya̍ tīīndāŋ ni̍, le̍ nya̍ di̍la̍ŋ kīo̍o̍ o̍ ko̍tīi̍la̍ŋ ni᷄ŋ. Sɔ̄ɔ̍ŋ wɔ̍ɔ̍ŋndo̍ŋ tūūnɔ᷄ŋndo̍ o̍ lākɔ̄l a̍ wāŋnda̍, mī lā tūsī nda̍ nyɛ̄ pālāa̍ chōo̍.

⁵De̍fe̍la̍ wɔ̍ɔ̍ŋndā nya̍ yīī wa᷅ŋnda̍ la̍ŋ, mɛ̄ɛ̍ pēltā kɛ̄ū wɔ̄ɔ̍ŋ wɔ̄ɔ̍ŋndo̍ la̍ wā nu̍a̍ā yɛ̍, le̍nde̍ la̍ wɔ̍u̍ ni̍. Pēltā kɛ̄ū wɔ̄ɔ̍ŋndo̍, tē ā dē la̍ŋ pɛ̍, ā vī. Tē ā pɛ̄l lēpīlɛ̍ pɛ̍, kɛ̄ū wɔ̄ɔ̍ŋ wɔ̍ɔ̍ŋ lɔ̍wā wa̍nā a̍ che᷅ŋ te̍ wo̍ ō fūla̍ lēni᷄ŋ. Kɛ̍ ndu̍yɛ̍ nyɛ̄ o̍ nyɛ̄ nya̍ chō tōsāa̍, fo̍ndō fu̍u̍ ko̍ni̍ o̍ cho̍ ni̍, ō cho̍ nya̍ mālā le̍, ō chō māchūāā mɛ̄ɛ̍ wāŋndo̍ ō dīmī nu̍a̍ā māā ō chō kōlāa̍ lɔ̄ a̍ kɔ̄mi̍i̍ so̍o̍ŋtɛ̍ndɛ̄i̍ yɛ̍.

⁶

⁷Le̍ wāŋndo̍ dɛ̍nɛ̍ wɔ̍ɔ̍ŋndo̍ tōsāllo̍, a̍ kīlta̍ŋ nya̍ kūā ni̍. Ndu̍yɛ̍ le̍ te̍le̍ŋ o̍ te̍le̍ŋ lā chō ā bɛ̄ɛ̄ndīa̍ŋ, le̍ wānāa̍ tɛ̍ɛ̍mbūū i̍sɔ̍ɔ̍ o̍ īsɔ̄ɔ̍ le̍ wa̍ dīūwo̍. Yi̍ya᷄ŋnda̍ dɛ̍nɛ̍ wɔ̍ɔ̍ŋnda̍ŋ, la̍ŋ ko̍ni̍ la̍ hu᷅ŋ nya̍ o̍ lākɔ̄l le̍ te̍le̍ŋ o̍ te̍le̍ŋ ni̍. Bā o̍ bā nya̍ kɔ̍, pɔ̄mnda̍ŋ nya̍ mɛ̄ī ni̍, ndu̍yɛ̍ a̍ dɛ̍nɛ̍ ta̍mbɛ̍i̍yo̍.

⁸Lā si̍nā lɛ̍ bɛ̍ɛ̍ nyɛ̍ cho̍ wāa̍ a̍ kɔ̄l nyūlū a̍ wāŋnda̍ wo̍ le̍, kɛ̄lɛ̄ŋgāāle̍ mī lā sīna̍ nyɛ̍ cho̍ wāa̍ sa̍kpō wo̍. Kēlālā nyāla̍ŋ kpo̍u̍, lā tūūndu̍ɛ̍i̍. Wānā o̍ wāna̍ to᷅l ka̍ālā nyāla̍ŋ kɔ̄ɔ̄lī pɛ̍, ō sɔ̍lā kɔ᷅l nyūlōo̍ o̍ yōōmū ndɔ̄ɔ̍ ni᷄ŋ te̍.

⁹Mi̍ wāŋnda̍ lō o̍ ko̍ŋ ma̍ dīmī āā, “Nyɛ̄ ko̍ŋ bɛ̍ɛ̍ Mɛ̄lɛ̄ka̍ kɛ̄ɛ̍ su̍ŋgū le̍ na̍a̍, mbō sōli̍ na̍a̍ wānāa̍ cho̍ na̍a̍ nyɛ̄ pālāa̍ tūsīo̍o̍ chōo̍ wa̍ o̍ bā ni̍. Ndu̍yɛ̍, nyɛ̄ kōŋ bɛ̍ɛ̍ Mɛ̄lɛ̄ka̍ ō to̍sāl na̍a̍ kɛ̄ndɛ̄i̍ ndūɛ̍i̍ le̍ ni̍. Ŋ̄ wa̍ chūmndo̍ māā ŋ̄ chō nyɛ̄ wa̍wo̍ŋndo̍ sɔ̄lā, kɛ̍ mi̍ ŋ̄ hīāū lāchī a̍ wāa̍ o̍ nyūmmā tīŋgīsi̍a̍ŋ ni᷄ŋ. Ŋ̍ wa̍ kɔ̄l māā nyɛ̄ wa̍wo̍ŋndo̍ ndu̍ o̍o̍ di̍a̍ndū ni̍ŋ na̍a̍ chōo̍ wa̍ke̍e̍ bɛ̍ndū, kɛ̍ nyūmmā tīŋgīsi̍ma̍ bɛ̍ndūa̍ŋ ko̍ni̍ na̍a̍ ŋ̄ hīāū la̍chi̍ a̍ wāa̍ lēni᷄ŋ ni̍.

¹⁰Mɛ̄ɛ̍ wānāā sūmɛ̍i̍ya̍ ā bālu̍ nu̍a̍ā a̍ bāla̍ŋ kēēlīa̍a̍ yɛ̍, le̍nde̍ na̍a̍ ŋ̄ bālu̍ ītāmu̍ ta᷅mu̍e̍i̍ ni̍. Īpāla̍ de̍ŋ mī ŋ̄ bōŋi̍ mī ŋ̄ de᷄l, mɛ̄ɛ̍ wāŋndo̍ ō wā nu̍a̍ā kɔ̄la̍ŋ o̍ nyūmnda̍ŋ ni᷄ŋ yɛ̍. Ŋ̄ chō māchūāā māā wānāā vīlɛ̍i̍, wa̍nāā kīyɛ̍i̍ya̍ tɛ̄ɛ̄ŋ.

¹¹Mɛ̄ɛ̍ vīsīāā bīyāa̍ ā kōŋūl nu̍a̍ā yōndōla̍ŋ ni᷄ŋ yɛ̍, le̍nde̍ na̍a̍ ŋ̄ kōŋūl a̍ nyɛ̄ pālāa̍ ni̍. Mī ŋ̄ cha᷄ŋ cha᷄ŋ īmɔ̍nɔ̍ɔ̍ pīla̍, mɛ̄ɛ̍ pīīŋndo̍ ō chāŋ nu̍a̍ā yɛ̍. Mī ŋ̄ wa̍ yāmɛ̍i̍ le̍ mī Mɛ̄lɛ̄ka̍ ō kīlu̍l na̍a̍ yāmɛ̍i̍ sa̍kpūe̍i̍, kɛ̍ wānā bɛ̍ɛ̍ ŋ̄ sɔ̍lā le̍. Mī ŋ̄ yēēma̍ le̍ mī wānā hīŋ mbō hu᷄ŋ chi̍i̍ndīāā na̍a̍, kɛ̍ ŋ̄ sɔ̍lā wa̍nā le̍.

¹²“Mɛ̄lɛ̄ka̍ Ya̍a̍wɛ̄ɛ̄, yɔ̄ŋndā wɔ̄ɔ̍ŋndā na̍a̍ ŋ̄ tōsa̍ a̍ nūm nda̍ŋ lā chō lā bɔ̄ɔ̍. Yɔ̄ŋndā nāāla̍ wɔ̍ɔ̍ŋnda̍ŋ lā nɔ̄lā mī lā kīlu̍l na̍a̍ yāmɛ̍i̍ māā ŋ̄ chō wānāā wɔ̄ɔ̍ŋ. Ŋ̄ sīnā kɛ̍sɛ̍ kɛ̍sɛ̍ māā ŋ̄ sōli̍ nu̍m dīōm Mɛ̄lɛ̄ka̍. Na̍a̍ pi̍la̍ bɛ̍ɛ̍ ŋ̄ sīnā yɔ᷅ŋndā wɔ̄ɔ̍ŋndā na̍a̍ ŋ̄ tōsa̍ a̍ nūm ki̍nɛ̍i̍ la̍ŋ.

¹³Ŋ̄ lo̍ o̍ ko̍ŋ mi̍ ŋ̄ tōsā yɔ̄ŋndā wɔ̄ɔ̍ŋnda̍ŋ a̍ nūm, ndu̍yɛ̍ mi̍ ŋ̄ kɛ̄ɛ̄ nūm Mɛ̄lɛ̄ka̍ Ya̍a̍wɛ̄ɛ̄. O̍ ko̍ŋ kɔ̍ɔ̍lī, mi̍ ŋ̄ fāŋa᷄ŋ o̍ nɛ̄ī nu̍mndo̍ chōo̍, nūm Mɛ̄lɛ̄ka̍ nāa̍, ndu̍yɛ̍ mi̍ ŋ̄ lō o̍ ko̍ŋ, mi̍ ŋ̄ tūsī wāŋnda̍ nyɛ̄ pālāa̍ chōo̍. Yīya᷄ŋnda̍ nāāla̍ŋ kpo̍u̍, yīya᷄ŋnda̍ lāchōōwāla̍ŋ ko̍ni̍ la̍ cho̍ ni̍. O̍ ko̍ŋ kɔ̍ɔ̍lī, nyɛ̄ o̍ nyɛ̍ fu̍lā na̍a̍ o̍ lāsōndō chōōla̍ŋ kpo̍sōŋ.

¹⁴Sa̍kpōyɛ̍i̍ ndi̍ ndi̍, mi̍ ī kūānu᷄ŋ la̍nda̍ŋ a̍ na̍a̍. Ndu̍yɛ̍, tōnya̍ o̍ tōnya̍ ō cho̍ lɛ̍ na̍a̍ tɛ̄ɛ̄ŋ te̍. Nāa̍ wāŋnda̍ chūūŋgīāŋ le̍ sɔ̄ɔ̍ŋ dīmīo̍o̍ la̍ŋ bɛ̍ɛ̍, tōnya̍ cho̍ lɛ̍ dīmi᷄ŋ te̍. Sa̍kpōyɛ̍i̍ ndi̍ lu̍e̍ī lɛ̍ chi̍o̍o̍ ho̍ō ni᷄ŋ te̍.

¹⁵Wānā se̍e̍lūŋ ndɛ̍ tōnya̍a̍ bā o̍ bā wāŋnda̍ tɛ̄ɛ̄ŋ te̍. Wānāa̍ kɛ̍ɛ̄ le̍ dɛ̍nɛ̍ wɔ̍ɔ̍ŋndo̍ tōsāa̍ wa̍, le̍ te̍le̍ŋ o̍ te̍le̍ŋ ā chō o̍ dɛ̍nɛ̍ pa̍lāa̍ ni᷄ŋ.” Mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ che᷅ māā sa̍kpōyɛ̍i̍ ī cho̍ lɛ̍ wāŋndā chīe̍e̍ya̍ tɛ̄ɛ̄ŋ te̍, mbo̍ tāmbū kɔ̄l.

¹⁶Mɛ̄ɛ̍ o̍ sa̍a̍lu̍ŋ māā wānā o̍ wānā cho̍ mbō māla̍ wāŋnda̍ le̍, mi̍ kɔ̄ndɔ̄fi̍llo̍ bīī ndu̍. O̍ ko̍ŋ, mbo̍ tōsā a̍ kpāāya̍ ndɔ̄ɔ̍, ndu̍yɛ̍ a̍ sa̍kpōyɛ̍i̍ ndūɛ̍i̍, mbo̍ chīīndīāā wānāā ndūa̍a̍. Ndu̍yɛ̍ le̍ sa̍kpōyɛ̍i̍ ndūɛ̍i̍, mbo̍ lō o̍ kpāāya̍ ndɔ̄ɔ̍ chōo̍.

¹⁷Mbo̍ chūā tōnya̍a̍ māā dōma̍ ndɔ̍ chɔ̄ū le̍ wōōnɔ᷄ŋndo̍. Kpāāya̍ ndɔ̍ o̍ pi̍ŋi̍ wāŋnda̍ wo̍, ndu̍ wa̍ mɔ̍si̍l chɔ̄ū o̍ wo̍u̍nu̍ŋ ndo̍ ni̍. Ya̍a̍mɔ̍ɔ̍wa̍ māa̍ mīŋgūllo̍, ndu̍ wa̍ nyɛ̄ ndɔ̄ chu̍ɛ̍i̍ya᷄ŋndo̍ le̍ wōūnɔ᷄ŋndo̍ ni̍. Ndu̍yɛ̍, tu̍mbo̍o̍ dɔ̄ɔ̄nɔ᷄ŋndo̍ a̍ ya̍a̍mɔ̍ɔ̍wa̍a̍ ndūa̍a̍, ndu̍ wa̍ dōma̍ ndɔ̄ le̍cho̍o̍ wo̍ ni̍.

¹⁸Ō chō hūnɔ̄ɔ̄ ya̍a̍mɔ̍ɔ̍wa̍a̍ ndūa̍a̍ māa̍ mīŋgūl mbō tūsi̍ nda̍ nyɛ̄ pālāa̍ chōo̍, mɛ̄ɛ̍ kūɛ̍ɛ̍la̍ ndāla̍ŋ lā chō yɛ̍. Wānāa̍ si̍mu̍l ndu̍ wa̍, ō chō hūnɔ̄ɔ̄ tu̍mbe̍ dɔ̍ɔ̍nɔ᷄ŋ a̍ nda̍. Ya̍a̍mɔ̍ɔ̍wa̍a̍ ndūa̍a̍ cho̍ o̍ lɛ̄ŋīī lēvīlle̍ ni᷄ŋ nda̍, ō chō nda̍ hūnɔ̄ɔ̄ nyɛ̄ pālāa̍ tūsī chōo̍ le̍ nyɛ̄ nda̍ tōsa̍ wo̍.

¹⁹Wāŋnda̍ kpo̍u̍, chɔ̍ŋ ba᷅ pāa̍le̍ŋ lē chāŋndo̍, mbō kūɛ̄ bā pāa̍le̍ŋ lē dēl lo̍, sīōōŋīi̍ Mɛ̄lɛ̄ka̍ Ya̍a̍wɛ̄ɛ̄ ve̍ ī chō nda̍ bīyɔ̄ɔ̄, ndu̍yɛ̍ mī sīōōŋnde̍ bīī nda̍ le̍ kpāāya̍ ndɔ̄ bɛ̍ndōo̍. Mɛ̄lɛ̄ka̍ Ya̍a̍wɛ̄ɛ̄ o̍ cho̍ hūnɔ̄ɔ̄ mɛ̄ɛ̍ mɛ̄ŋnda̍ŋ mā hūŋ nu̍a̍ā a̍ kpāāyā bɛ̍ndo̍o̍ yɛ̍. Mɛ̄ɛ̍ hūēīyīī kpāāyɛ̄ī bɛ̍ndūe̍i̍ ī hūŋ nu̍a̍ā yɛ̍, le̍nde̍ o̍ hu᷅ŋ ni̍ŋ ni̍.

²⁰Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “I̍ cho̍ hūnɔ̄ɔ̄ Chūlu̍sɛ̄lɛ̄m, mī hu̍ŋ pi̍ŋī ndu̍, ndu̍yɛ̍, mī chi̍i̍ndi̍a̍a̍ nya̍ yu̍ŋgu̍ Che̍kɔ̍pū wo̍, nya̍ chɛ̍l mi̍ lā māl yɔ̄ŋndā nyāla̍ wɔ̍ɔ̍ŋnda̍ŋ nda̍.

²¹Ndu̍yɛ̍ kpe̍ma̍ ya̍ I̍ yi̍i̍ a̍ nya̍ wo̍ ndu̍ cho̍ ho̍ō ni̍. I̍ to̍sa̍ mi̍ nyi̍nā nūu̍ ō tūāl nya̍ kɔ̄ɔ̄lī, ndu̍yɛ̍ mi̍ du̍a̍ū nya̍ dīōmndā nīla̍ŋ o̍ sōndō le̍ fɛ̍ɛ̍ŋ a̍ fɛ̍ɛ̍ŋ. Chɔ̍ŋ a̍ nya̍ pi̍la̍, mbō kūɛ̄ a̍ chūāūwāā nyāa̍, ndu̍yɛ̍ mbō kūɛ̄ a̍ chūāūwāā nyāā ka̍ŋ chūāūwāā ndāa̍, nyi̍nā nūu̍ ō wā ni̍ŋ nya̍ kɔ̄ɔ̄lī, ndu̍yɛ̍ dīōmndā nīla̍ŋ bɛ̍ɛ̍ lā wā ni̍ŋ nya̍ o̍ sōndō, mī lā dīmūl wa᷅ŋnda̍ la̍ŋ. Chɔ̍ŋ a̍ hāū, le̍ fɛ̍ɛ̍ŋ a̍ fɛ̍ɛ̍ŋ he̍ī chō wā yɔ̄nɔ᷄ŋ ndo̍.”