Read Southern Kisi Āīsa̍yā 6 Bible Online

Āīsa̍yā 6 - Southern Kisi bible

Āīsa̍yā 6

¹Wɔ̄sī Māsāa̍ Yūsa̍yā o̍ vi᷅ wo̍, mi̍ Mɛ̄lɛ̄ka̍ ō chɔ̄m ya̍ yi̍lāŋndo̍. O̍ yi̍lāŋndo̍ ho̍ō ni᷄ŋ, mi̍ cha᷅ Mɛ̄lɛ̄ka̍ Ya̍a̍wɛ̄ɛ̄ īchāli̍ o̍ kpe̍ŋgbe̍i̍ ndɔ̍ lēmāsāa̍ chōo̍, o̍ fo̍ndā vīlɛ̄ī bɛ̄ndōo̍ chōo̍ cho̍o̍, ō wa̍ ō hēēlāā te̍mā. Dōma̍ vi̍lɛ̄ī bɛ̄ndōo̍ ō wa̍ ndu̍ lēkɔ̄ɔ̍. Dōmāa̍ ho̍ō ō wa̍ ō tīūwāā o̍ chīɛ̍i̍ Mɛ̄lɛ̄ka̍a̍ ni̍ŋ mbo̍ pīā chīɛ̄īyo̍ cha̍.

²Nyāā yōōmāā lākūmba᷅ŋnda̍ ā wa̍ ndu̍ bālɔ̄ɔ̍ chōo̍. Nyāā yōōmāā ha̍ā, ō kɛ᷅ o̍ kɛ᷅ ndu̍ o̍o̍ nɔ̍ kūmba᷅ŋnda̍ŋ lā ŋɔ᷄mpu᷅m. Ndu̍yɛ̍ ō kɛ᷅ o̍ kɛ᷅, kūmba᷅ŋndā ndɔ̄la̍ ŋɔ̍mpu᷅mnda̍ŋ nda᷅ŋ, mɛ̄ɛ̍ o̍ ku̍mbū hɔ̄lla̍ a̍ kūmba᷅ŋnda̍ŋ lā tīɔ̍ɔ̍ŋ, mbo̍ kūmbū pēlūŋ ndɔ̄ɔ̍ŋ a̍ kūmba᷅ŋnda̍ŋ lā tīɔ̍ɔ̍ŋ, o̍ ko̍ŋ kɔ̍ɔ̍lī, mbo̍ wā bālɔ̄ɔ̍ chōo̍ cho̍o̍ a̍ kūmba᷅ŋndā tīɔ̍ɔ̍ŋnda̍ŋ lā pīlɛ̍ la̍ŋ.

³Mi̍ tu̍ɛ̍ī mi̍ nyāā yōōmāa̍ ha̍ā ā wā dīmu̍la᷅ŋndo̍ chōo̍ cho̍o̍ āā, “Mɛ̄lɛ̄ka̍ kāsīo̍o̍, Mɛ̄lɛ̄ka̍ kāsīo̍o̍, Mɛ̄lɛ̄ka̍ kāsīo̍o̍. Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ ndu̍ cho̍ Mɛ̄lɛ̄ka̍ dīāndāa̍ ni̍. Nāŋɔ̄ɔ̄ ndɔ̄ bɛ̍ndōo̍ ō tīu̍ o̍ chi̍e̍ēŋndo̍ ni᷄ŋ kpo̍u̍.”

⁴Sūɛ̍i̍ nyāā yōōmāa̍ ha̍ā ā wa̍ nu̍a̍ā ve̍, chīyīī chīɛ̍i̍ Mɛ̄lɛ̄ka̍a̍ kpo̍u̍ mi̍ ī hīīlu᷄ŋ a̍ da̍kpe̍ŋnda̍ wa̍ o̍ dīōla̍ŋ nda̍ŋ lātūlu̍ kpo̍u̍. O̍ ko̍ŋ kɔ̍ɔ̍lī, mi̍ cha᷅ mi̍ kūmi̍i̍ bɛ̍ndūe̍i̍ ī pīā chīɛ̄īyo̍ ho̍ō ni᷄ŋ cha̍.

⁵Mɛ̄ɛ̍ ya̍ i̍ che̍ sɔ̄ɔ̍ŋ mu̍ŋ, mi̍ di̍mī a̍a̍, “Mbɔ̄ ya̍ I̍ chu̍ū fɔ̍. Kpūndɛ̍ bɛ̄ndōo̍ ō kōma̍l la̍. Ya̍ cho̍ ho̍ō, nyɛ̄ o̍ nyɛ̄ fu̍lā ya̍ o̍ sōndō ō cho̍ o̍ di̍a̍ndāā le̍, ndu̍yɛ̍ wānāā ya̍ I̍ cho̍ tɛ̄ɛ̄ŋ nda̍ bɛ̍ɛ̍, nyɛ̍ fu̍lā nda̍ o̍ lāsōndō wo̍ ō cho̍ o̍ di̍a̍ndāā le̍, ya̍ cha᷅ Ma̍sā bɛ̍ndōo̍, Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ ni̍?”

⁶O̍ ko̍ŋ, mi̍ cha᷅ mi̍ nyāā yōōmāa̍ ha̍ā ō pīlɛ̍ ō hūŋ nāa̍ ya̍ chu̍a̍. Dɛ̄ŋgūltē o̍ chu̍a̍ o̍ ma̍āŋndo̍ chōo̍ a̍ kpānya̍a̍ le̍ŋ lē wa̍ ndu̍ o̍ bā.

⁷O̍ ko̍ŋ kɔ̍ɔ̍lī, mbo̍ pīlā ya̍ dɛ̄ŋgūltē lēŋ o̍ chɔ̄chɔ᷄ŋ. Mbo̍ lō o̍ ko̍ŋ mbo̍ dīmu̍l la̍ āā, “Dɛ̄ŋgūltē ya̍ I̍ pi̍la̍ nu̍m nde᷅ŋ o̍ chɔ̄chɔ᷄ŋ nde̍ŋ, lē chɔ᷄m māā nyɛ̄ o̍ nyɛ̄ wɔ̄ɔ̍ŋ nūm o̍o̍ to̍sā ō chō ō wɔ̄ɔ̄sāā kpo̍u̍. Yɔ̄ŋndā nūmnda̍ wɔ̍ɔ̍ŋnda̍ŋ lā chō lā mālna᷄ŋ.”

⁸O̍ ko̍ŋ kɔ̍ɔ̍lī, mi̍ tu̍ɛ̍ī mi̍ Māsānɔ̄ɔ̍ Mɛ̄lɛ̄ka̍ nyūnā āā, “Ō nɛ̄ɛ̍nɛ̍ ya̍ I̍ vi̍o̍m yɛ̍ kpe̍e̍kpe̍i̍? Ō nɛ̄ɛ̍nɛ̍ cho̍ yɛ̄ lākɔ̄ māā ki̍i̍la̍nɔ̍ nāa̍?” Mi̍ di̍mī a̍a̍, “Ā chē ya̍. Vi̍o̍m ya̍.”

⁹Mbo̍ lō o̍ ko̍ŋ mbo̍ dīmūl la̍ āā, “Kɔ̍ mā kɔ̍ di̍mūl wāŋnda̍ yōōŋgōo̍ ho̍ō. Di̍mu̍l nda̍ āā, ‘Lā yāŋ ni̍ŋ ni᷅la̍ŋ, mī lā ya᷄ŋ, kɛ̍ lā si̍nā ni̍ŋ nyɛ̍ wa᷅ ni̍ŋ di̍mi᷄ŋndo̍ wo̍ pɛ̄ŋgu̍ le̍. Lā tōfā ni̍ŋ, mī lā tōfa̍, kɛ̄ lā chi᷅ ni̍ŋ nyɛ᷅ wa᷅ ni̍ŋ yɔ̍nɔ᷄ŋndo̍ wo̍ le̍.’ ”

¹⁰Mi̍ Mɛ̄lɛ̄ka̍ hīāū lāchī a̍ sūɛ̍i̍ mbo̍ dīmūl la̍ āā, “Kɔ̍ mā kɔ̍ to̍sā, mī wāŋnda̍ ha̍ā kɔ̄ltā ndāla̍ŋ lā kēndū ā ye᷅ŋ ya̍ lānī le̍. Ndu̍yɛ̍ mā tōsa̍ mī nīlā nda̍la̍ŋ lā kīnda̍ŋ ā nɔ̍lā mā tūēī ya̍ dīōm te̍. O̍ ko̍ŋ kɔ̍ɔ̍lī, mā to̍sa̍ mā sīmnu᷄ŋ māā wānāā sūmɛ̍i̍ ā nɔ̍lā mā chē tōnya̍a̍ le̍. Yɔ̄ŋi̍ nda̍ nɔ̄la̍ mā chē tōnya̍a̍, ndu̍yɛ̍ mā tūēī ya̍ dīōm, o̍ ko̍ŋ kɔ̍ɔ̍lī, mā sīna̍ nyɛ̄ cho̍ dīmi᷄ŋndo̍ wo̍ pɛ̍ŋgu̍ mā mīīŋgu̍ ya̍ o̍ ībūŋ mā sɔ̄la̍ sīōŋgɔ̄ɔ̍.”

¹¹Mi̍ nyu̍nā ndu̍ a̍a̍, “Māsānɔ̄ɔ̍, le̍ te̍le̍ŋnda̍ŋ vɛ̄ɛ̍nɛ̍ kpɛ̍ he̍ī ī chō yɛ̄ yɔ̄nɔ᷄ŋ?” Mbo̍ dīmūl la̍ āā, “He̍ī ī chō lō yɔ̄nɔ᷄ŋndo̍ ha̍a̍a̍ mbō lo̍ o̍ ko̍ŋ, mī chi̍o̍o̍ŋ kpo̍u̍ ŋ̍ pi̍ɔ̍l, mī ŋ̄ sīmnu᷄ŋ pɔ᷅mnda̍ŋ, nāa̍ wāna̍ chi̍e̍e̍ o̍ wāna̍ chi̍e̍e̍ o̍ che᷅l lɛ̍ le̍ wa̍. Ndu̍yɛ̍, chīɛ̄īla̍ŋ kpo̍u̍ mī lā sīmnu᷄ŋ fo̍ndō fōndo̍ la̍ŋ, o̍ ko̍ŋ kɔ̍ɔ̍lī, lɛ̄ŋnde̍ŋ kpo̍u̍ mī lē wa̍ lē tɛ̄ɛ̄mbāā mī lē lo̍ fo̍ndō.”

¹²Wānā o̍ wāna̍ cho̍ o̍ lɛ̄ŋnde̍ŋ nde᷅ŋ ni᷄ŋ, I̍ cho̍ tōsā mā kūɛ̄ a̍ nda̍ o̍ lɛ̄ŋndē lēvīlte̍ŋ ni᷄ŋ pɔ̍, mī to̍sa̍ mī lɛ̄ŋnde̍ŋ nde᷅ŋ kpo̍u̍ mī lē lo̍ fo̍ndō.

¹³Ndu̍yɛ̍ ā yɔ᷄ŋ bɛ̍ɛ̍ māā, o̍ ŋ̄wāŋ tɔ̍ o̍ ŋ̄wāŋ tɔ̍ cho̍o̍, mī wāŋndo̍ ō pīlɛ̍ ō lo᷄ o̍ lɛ̄ŋnde̍ŋ nde᷅ŋ ni᷄ŋ, ā lo᷅ ka̍ŋ nda̍ bɛ̍ɛ̍, tɛ̄ɛ̄mbūūwo̍ ya̍ I̍ tɛ̍ɛ̍mbūū nda̍ ni̍. Kɛ̍ ā chu̍ū ni̍ŋ tɛ̍ɛ̍mbūū kpe̍de̍ le̍. Ndu̍yɛ̍ a̍ lo᷅ ni̍ŋ ka̍ŋ nda̍, mɛ̄ɛ̍ nda̍ kīālū nu̍a̍ā yɔ̄m ɔ̍kū wo̍ mī chīīye̍ lo̍ yɛ̍, le̍nde̍ nda̍ lō ni̍ŋ ni̍. A̍ lo᷅ ni̍ŋ ka̍ŋ māā chīyīī yɔ̄m nda̍, nda̍ cho̍ vɛ̄lɛ̄ kūī ni̍, mā sīmnu᷄ŋ ku̍ndā bɛ̄ndōo̍.