Read Southern Kisi Āīsa̍yā 60 Bible Online

Āīsa̍yā 60 - Southern Kisi bible

Āīsa̍yā 60

¹Chɔ̍ŋ Chūlu̍sɛ̄lɛ̄m, chɔ̍ŋ mā dēndū, kāni̍ nyɛ̄ nūm wa̍wo̍ŋndo̍ ō hīŋ. Ndu̍yɛ̍ nāŋɔ̄ɔ̄ bɛ̄ndu̍ Mɛ̄lɛ̄ka̍ Ya̍a̍wɛ̄ɛ̄ wo̍ ō chō nu̍m dīōndɔ̄ɔ̍ chōo̍.

²Nyūmnda̍ŋ mā chō mā tūālāā o̍ chi̍e̍ēŋndo̍ ni᷄ŋ kpo̍u̍. Wāŋnda̍ kpo̍u̍ ā chō o̍ nyūmmā tīŋgīsi̍ma̍ bɛ̍ndūa̍ŋ ni᷄ŋ. Kɛ̍ nūm nūm, pa̍ŋgēle̍ Mɛ̄lɛ̄ka̍ Ya̍a̍wɛ̄ɛ̄ wo̍, ō chō nu̍m dīōndɔ̄ɔ̍ chōo̍. Nāŋɔ̄ɔ̍ Mɛ̄lɛ̄ka̍ Ya̍a̍wɛ̄ɛ̄ wo̍ ō chō nu̍m dīōndɔ̄ɔ̍ chōo̍.

³Wāŋnda̍ o̍ lɛ̄ŋnde̍ ni᷄ŋ kpo̍u̍, ā chō hūnɔ̄ɔ̄ o̍ nyɛ̄ nūm wa̍wo̍ŋndo̍. Māsāā bɛ̍ndūa̍a̍ ā hūŋ ni̍ŋ o̍ pa̍ŋgēle̍ nu̍m cho̍ māā lēpāa̍ wo̍ ni᷄ŋ.

⁴Chūlu̍sɛ̄lɛ̄m, chu̍a̍ wɔ̍ hɔ᷅lla̍ chōo̍ mā mɛ̍ɛ̍nda̍ŋ nu̍m o̍ bālāā, mā chē nyɛ᷄ cho̍ yɔ̄nɔ᷄ŋndo̍ wo̍. Wānāā nūmnda̍ chō chūūŋgi̍āŋndo̍ ma̍ wa̍ hūnɔ̄ɔ̄ nāa̍ nūm chu̍a̍. Pūa̍a̍ nu̍mnda̍ ā fūlā ni̍ŋ o̍ fo̍ndāŋndā lēvīlta̍ŋ mā hīŋ. Chūāūwāā nūm a̍ la̍a̍ndūa̍a̍, mɛ̄ɛ̍ nda̍ bīī nu̍a̍ā chɛ̄lɛ̄kpi̍a̍a̍ o̍ lābā mā kūɛ̄ a̍ nda̍ yɛ̍, le̍nde̍ nda̍ chūū ni̍ŋ nu̍m nda̍ ni̍.

⁵Tē a̍ hu̍ŋ chɔ᷅ nyɛ̍ wa᷅ ni̍ŋ yɔ̍nɔ᷄ŋndo̍ wo̍ pɛ̍, ā chō kɔ̄l nāŋɔ̄ɔ̄ ta̍u̍ ta̍u̍. Kɔ̄l nūmndo̍ chō nāŋɔ̄ɔ̄, ndu̍yɛ̍ mā dɔ̄ɔ̄nu᷄ŋ nya̍a̍le̍ ta̍u̍ ta̍u̍. Lɛ̄ŋīi̍ cho̍ o̍ pēēla̍ mɛ̄ŋmā īhɛ᷄lla̍ŋ lēe̍lo̍ō ve̍, sūltā ndāla̍ŋ kpo̍u̍, ā chō la̍ŋ chūā mā chūū nu̍m. Sūlta̍ŋ o̍ lɛ̄ŋnde̍ ni᷄ŋ kpo̍u̍, lā chō hūnɔ̄ɔ̄ o̍ nūmndo̍.

⁶Wāŋnda̍ ā wā ni̍ŋ hu̍nɔ̄ɔ̍ a̍ nyɔ̍mi̍a̍a̍ ku̍ndālā bɛ̄ndūla̍ŋ, ndu̍yɛ̍ a̍ nyɔ̍mi̍a̍a̍ fɔ̍ŋndu̍a̍a̍, fūlāa̍ a̍ nda̍ o̍ lɛ̄ŋndē Mi̍dīāŋnde̍ŋ ni᷄ŋ, a̍ lɛ̄ŋndē Ɛ̍fāāle̍ŋ, mā pɛ̄ o̍ lɛ̄ŋndē nūmnde̍ŋ ni᷄ŋ cha̍. Wāŋnda̍ ā chāŋ ni̍ŋ o̍ lɛ̄ŋndē Si̍ɛ̍bā le̍ŋ ni᷄ŋ, mā chūū nu̍m ko̍o̍līi̍yo̍ŋ, a̍ nyɛ̄m chūŋ kɛ̄ndɔ᷄ŋ, ndu̍yɛ̍ mā sāŋga̍la̍ Mɛ̄lɛ̄ka̍ Ya̍a̍wɛ̄ɛ̄ le̍ nyɛ̄ o̍ to̍sa̍ wo̍.

⁷Sāa̍ kpo̍u̍ o̍ lɛ̄ŋndē Kɛ̍dāāle̍ŋ ni᷄ŋ, ā chō nda̍ chu̍u̍ŋgi̍a̍a̍ mā chūu̍ nu̍m, ndu̍yɛ̍, mā chūu̍ nu̍m vɛ̄lɛ̄ sāā fɔ̍ŋndu̍a̍a̍ Nɛ̄ba̍wɔ̍tī le̍ sa̍lāla̍ŋ sōlīo̍o̍ o̍ Mɛ̄lɛ̄ka̍ lo̍. Ndu̍yɛ̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍nī ni̍ŋ kɔ᷅l a̍ sa̍lālā chɔ̄lūa̍a̍ ha̍ā, mbō tōsa̍ mī chīɛ̄ī ndɔ̍ lēbīɔ̍ɔ̍ ō chɔ̄ɔ̄lu̍ bɛ̄ɛ̄le̍ŋ sɔ̄lā, mbō hīōū māā pāāndū.

⁸Wāŋnda̍ ā chō wā hūnɔ̄ɔ̍ īkpɔ̄lɔ̄ kpɔ̄lūɛ̍i̍ ku̍ndāla̍ŋ, le̍ mīīŋgōo̍ nāa̍ nūm chu̍a̍, mɛ̄ɛ̍ ha̍la̍ hūmbōo̍ ō hīāū nu̍a̍ā chōo̍ cho̍o̍ yɛ̍. Mɛ̄ɛ̍ pīīnda̍ ā wā nu̍a̍ā mīīŋgōo̍ ku̍ndāla̍ŋ o̍ wāa̍ŋīī ndɛ̄i̍ ni᷄ŋ yɛ̍, le̍nde̍ nda̍ chō hūnɔ̄ɔ̍ ni̍.

⁹Wānāa̍ cho̍ o̍ lɛ̄ŋīī lēvīlle̍ ni᷄ŋ nda̍, ā chō Mɛ̄lɛ̄ka̍ chūmndo̍ le̍ nda̍ mīŋgīo̍o̍. Ndu̍yɛ̍ dɛ̄ndɛ̄la̍ bɛ̍ndūlā ku̍ā o̍ mɛ̄ŋnda̍ŋ chōo̍ la̍ŋ, la̍ŋ fɛ̍lɛ̍ŋ la̍ cho̍ hūnɔ̄ɔ̄. Lā chō hūnɔ̄ɔ̄ a̍ chūāūwāā nūm a̍a̍ pi̍a̍a̍ndūa̍a̍, fūlāa̍ a̍ nda̍ o̍ lɛ̄ŋīī lēvīlle̍ ni᷄ŋ, ndu̍yɛ̍ mā hīŋ a̍ ka̍ni̍ŋ hu̍mbo᷄ŋ, a̍ ko̍o̍līi̍yo̍ŋ. Ko̍ŋ cho̍ tōsā ni̍ mī Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō sɔ̄la̍ bɛ̄ɛ̄le̍ŋ, ndu̍ yɔ̍nūŋ ni̍ māā I̍sɔ̄lūɛ̍i̍ya̍ Mɛ̄lɛ̄ka̍ ndā kāsīo̍o̍, o̍ to̍sa̍ mi̍ nya̍ I̍sɔ̄lūɛ̍i̍ya̍ lā sɔ̄lā bɛ̄ɛ̄le̍ bɛ̍ndūle̍ŋ ndo̍.

¹⁰Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Chūlu̍sɛ̄lɛ̄m, wānāā lēkāa̍wa̍ nda̍ cho̍ sāāsāla̍ ba̍lu̍ nu̍mnda̍ŋ mīŋgī tāŋgūl ni̍. Ndu̍yɛ̍, māsāa̍ ndāā bɛ̍ndūa̍a̍ ā chō nu̍m hūnɔ̄ɔ̄ sāāŋgīāl. Ya̍ i̍i̍ dɔ̍ɔ̍nu̍ŋ tu̍mbe̍ a̍ nūm, mi̍ tu̍sī nu̍m nyɛ̄ pālāa̍ chōo̍, kɛ̍ I̍ cho̍ nu̍m īnyīɛ̍ɛ̍ tūīīnɔ᷄ŋ, mī che᷅ nu̍m nyīnā.

¹¹Dīōlā sāāsāla̍ nu̍mnda̍ŋ lā wā ni̍ŋ la̍ ku̍mbīāā le̍ te̍le̍ŋ o̍ te̍le̍ŋ. Īdīi̍ a̍ īchɔ̄l lā ve᷅ ni̍ŋ la̍ ki̍ndāā le̍. Lɛ̄ŋnde̍ ī wa̍ hūnɔ̄ɔ̍ a̍ sūltā ndāla̍ŋ o̍ nūmndo̍, ndu̍yɛ̍, māsāa̍ ndāā bɛ̍ndūa̍a̍ nda̍ si᷅m ni̍ŋ wāŋnda̍ lāchī le̍ hūnɔ̄ɔ̍ a̍ sūlta̍ŋ nda᷅ŋ ni̍.”

¹²Lēlɛ̄ŋ o̍ lēlɛ̄ŋ kɛ̄lɛ̄ŋgāā lēmāsā o̍ lēmāsa̍ le̍ kɛ̍ɛ̍ le̍ nu̍m sāāŋgīāllo̍ pɛ̍, lē chō wā lē tɛ̄ɛ̄mbāā.

¹³“Yɔ̄mīī kɛ̄ndɛ̄ kɛ̍ndɛ̄ī tāŋgūlɛ̄i̍ Le̍ba̍nɔ̄ŋ, yɔ̄mīī pa̍īŋnde̍, a̍ yɔ̄mīī chu̍ni̍pāve̍, a̍ yɔ̄mīī sa̍i̍pu̍lūɛ̄ɛ̄ve̍, ndi̍ nda̍ hūŋ ni̍ŋ ni̍, le̍ nūm Chūlu̍sɛ̄lɛ̄m mīŋgīo̍o̍ tāŋgūllo̍. A̍ ndi̍ nda̍ chō chīɛ̄ī nūu̍ bɛ̄ɛ̄ndīāā ni̍, mā tōsa̍ mbō na᷄ŋ ta̍u̍ ta̍u̍. Ndu̍yɛ̍ I̍ to̍sā ni̍ŋ mī fo̍ndāa̍ ho̍ō, ō sɔ̄la̍ bɛ̄ɛ̄le̍ŋ ta̍u̍ ta̍u̍, ndu̍ yɔ̍nūŋ ni̍ māā fo̍ndā nī kɛ̍sīāā ŋ̄pēlōo̍ ho̍ō.

¹⁴Wānāa̍ tu̍si̍ nu̍m nyɛ̄ pālāa̍ chōo̍ wa̍, chūāūwāā ndāa̍ ā chō hūnɔ̄ɔ̄ tūndɔ᷄ŋ nu̍m o̍ lābɛ̄ŋgu̍ ni̍ŋ le̍ nu̍m bɛ̄ɛ̄le̍ŋ kīo̍o̍. Wānā o̍ wāna̍ ndu̍ o̍o̍ tu̍l nu̍m yɛ̄le̍ŋ, nda̍ kpo̍u̍ ā chō hūnɔ̄ɔ̄ tūndɔ᷄ŋ nu̍m o̍ lābɛ̄ŋgu̍ ni̍ŋ.” Ā chō nu̍m hūnɔ̄ɔ̄ vēēlū āā, “Sa̍a̍yɔ̄ŋ, Mɛ̄lɛ̄ka̍ Ya̍a̍wɛ̄ɛ̄, I̍sɔ̄lūɛ̍i̍ya̍ Mɛ̄lɛ̄ka̍ ndā kāsīo̍o̍ chi̍e̍e̍ ndɔ̄ɔ̍.”

¹⁵“Te̍le̍ŋ pu̍m wa̍, mi̍ wāŋnda̍ kɛ̄ɛ̍ nu̍m, ma̍ tūl nu̍m yɛ̄le̍ŋ, wānā o̍ wānā o̍ chɛ᷅l lɛ̍ bɛ̍ɛ̍ mbō kēēku̍ o̍ nūm ni̍ŋ mbō hīōū le̍. Kɛ̍ I̍ cho̍ to̍sā mā sīmnu᷄ŋ chi̍e̍e̍ kpāāyā bɛ̍ndū, ndu̍yɛ̍ mā wa̍ chi̍e̍e̍ wāŋnda̍ a̍ wā ni̍ŋ a̍ nya̍a̍lo̍o̍ le̍ fɛ̍ɛ̍ŋ a̍ fɛ̍ɛ̍ŋ ndo̍.

¹⁶Lɛ̄ŋnde̍ o̍ chi̍e̍ēŋndo̍ ni᷄ŋ, ndu̍yɛ̍ a̍ māsāā bɛ̍ndūa̍a̍ nda̍ wa̍ ni̍ŋ nu̍m māndāa̍ ni̍, mā bīī nu̍m mɛ̄ɛ̍ kāla̍ chūāā ō bīī nu̍a̍ā chɛ̄lɛ̄kpɛ̍ ndɔ̄ɔ̍, mbō kē ndu̍ mɛ̄ɛ̄ya̍ŋ le̍ te̍le̍ŋ o̍ te̍le̍ŋ yɛ̍. O̍ ko̍ŋ ŋ̄ chō sīnā ni̍ māā ya̍ Mɛ̍lɛ̄ka̍ Ya̍a̍wɛ̄ɛ̄, māā ya̍ cho̍ wāna̍ chi̍i̍ndīāā nu̍m ndo̍ ni̍, māā ya̍ Mɛ̍lɛ̄ka̍ kpāāyā bɛ̍ndo̍o̍ I̍sɔ̄lūɛ̄ī, māā ya̍ cho̍ wāna̍ ba̍ŋā nu̍m ndo̍ ni̍.”

¹⁷“I̍ cho̍ nyɛ̄ o̍ nyɛ̄ sīŋgāfīlā le̍ nūm. Ko̍o̍līi̍yo̍ŋ, mu̍ŋ ya̍ I̍ ke᷅ ni̍ŋ nu̍m sɔ̍ŋgɔ̍ chīli̍ŋu̍ŋ būlɔ̍ŋsīi̍yo̍ŋ ni̍, ndu̍yɛ̍ mī ke̍ nu̍m ka̍ni̍ŋ hu̍mbo᷄ŋ, sɔ̍ŋgɔ̍ chīli̍ŋndo̍ŋ. Chīli̍ŋu̍ŋ būlɔ̍ŋsīi̍yo̍ŋ, mu̍ŋ wa᷅ ni̍ŋ sɔ̍ŋgɔ̍ yɔ̄mnde̍ ni̍, ndu̍yɛ̍, mī chīli̍ŋndo̍ŋ ŋ̄ wa̍ sɔ̍ŋgɔ̍ pōūta̍ŋ. I̍ cho̍ tōsā, wānāa̍ cho̍ nu̍m chīla̍ŋ nda̍ ā tu̍sī lɛ̍ ni̍ŋ nu̍m nyɛ̄ pālāa̍ cho̍o̍ fɛ̍ɛ̍ŋ a̍ fɛ̍ɛ̍ŋ te̍. I̍ cho̍ tōsā mā bīī nu̍m o̍ nɛ̄ī sa̍kpōo̍ chōo̍, ndu̍yɛ̍ mā bīī vɛ̄lɛ̄ nu̍m o̍ nɛ̄i̍ kɔ̄l nyūlū ni᷄ŋ.

¹⁸I̍ cho̍ tōsā, wānā tu̍i̍ī lɛ̍ ni̍ŋ a̍ sɔ̍ŋgɔ̄ o̍ sɔ̍ŋgɔ̄ o̍kɔ̄ɔ̄ o̍ lɛ̄ŋndē nūmnde̍ŋ ni᷄ŋ te̍. Ya̍a̍mɔ̍ɔ̍wa̍ ā tɛ̄ɛ̄mbūū lɛ̍ lɛ̄ŋndē nūmnde̍ŋ te̍, ā mi̍ŋgī lɛ̍ le̍ŋ pɔ̄m te̍. I̍ cho̍ nu̍m chīīndīāā ya̍a̍mɔ̍ɔ̍wa̍ o̍ bā, mɛ̄ɛ̍ sāāsa̍ chi̍o̍o̍ ō chīīndīāā nu̍a̍ā chi̍o̍o̍ yɛ̍, ndu̍yɛ̍ wāŋnda̍ ā wā ni̍ŋ ke̍e̍kōo̍ o̍ dīōlā sāāsāla̍ nu̍mnda̍ŋ, mā lūɛ̄ī a̍ ya̍ Mɛ̍lɛ̄ka̍ sāŋgālāa̍.”

¹⁹“A̍ nɔ᷅ ni̍ŋ bu̍u̍la᷄ŋ o̍ būūla᷄ŋ a̍ pāa̍le̍ŋ le̍ nu̍m nyɛ̄ wa̍wo̍ŋ ke᷅ īpāla̍ le̍, kɛ̄lɛ̄ŋgāāle̍ mā nɔ̄ būūla᷄ŋ a̍ pāŋge̍i̍ le̍ nu̍m nyɛ̄ wa̍wo̍ŋ ke᷅ īchɔ̄l. Kāni̍ fo̍ndōle̍, ya̍ Mɛ̍lɛ̄ka̍ Ya̍a̍wɛ̄ɛ̄ ya̍ wa᷅ ni̍ŋ nyɛ᷅ nūm wa̍wo̍ŋndo̍ le̍ fɛ̍ɛ̍ŋ a̍ fɛ̍ɛ̍ŋ ni̍. Ya̍ Mɛ̍lɛ̄ka̍ nūmndo̍, nāŋɔ̄ɔ̄ nūu̍ ndu̍ wa᷅ ni̍ŋ nu̍m nyɛ̄ wa̍wo̍ŋndo̍ yɔ̄ŋgōo̍ ni̍.

²⁰Nūm nūm, pāa̍le̍ nu̍mnde̍ wa᷅ ni̍ŋ nu̍m nyɛ̄ wa̍wo̍ŋndo̍ yɔ̄ŋgōo̍ le̍ŋ, le̍ fɛ̍ɛ̍ŋ a̍ fɛ̍ɛ̍ŋ lē nyu᷅m te̍. Pāŋgi̍i̍ nu̍mnde̍ bɛ̍ɛ̍ ī nyu᷅m le̍ fɛ̍ɛ̍ŋ a̍ fɛ̍ɛ̍ŋ te̍. Kāni̍ fo̍ndōle̍, ya̍ Mɛ̍lɛ̄ka̍ Ya̍a̍wɛ̄ɛ̄, ya̍ wa᷅ ni̍ŋ nyɛ᷅ nūm wa̍wo̍ŋndo̍ le̍ fɛ̍ɛ̍ŋ a̍ fɛ̍ɛ̍ŋ ni̍. Ndu̍yɛ̍ pālɛ̍i̍ nu̍m kɔ̄l tāmbɛ̍i̍ye̍, ī chō hūnɔ̄ɔ̄ mɛ̄ɛ̄lū.

²¹Wānāā nūmnda̍ kpo̍u̍, ā chō hūnɔ̄ɔ̄ sīmnɔ᷄ŋ wa̍nāā sa̍kpō. Lɛ̄ŋnde̍ŋ nde᷅ŋ lē wā ni̍ŋ le̍ nda̍, le̍ fɛ̍ɛ̍ŋ a̍ fɛ̍ɛ̍ŋ. Mɛ̄ɛ̍ nda̍ tūāl nu̍a̍ā tɔ̄lɔ̄ɔ̍ yɛ̍, le̍nde̍ ya̍ I̍ kɛ̍si̍ ni̍ŋ nda̍ o̍ lɛ̄ŋnde̍ŋ nde᷅ŋ ni᷄ŋ le̍ fɛ̍ɛ̍ŋ a̍ fɛ̍ɛ̍ŋ ni̍. Ya̍ to̍o̍si̍a̍a̍ nda̍ a̍ bālā nīla̍ŋ ni̍, le̍ mī lo̍ o̍ ko̍ŋ mī chɔ̍m kpāāya̍ nī bɛ̍ndo̍o̍ o̍ nda̍ ni̍ŋ.

²²Yu̍ŋgu̍ cho̍ bɛ̍ɛ̍ yu̍ŋgu̍ pɔ᷅mbu̍i̍i̍na̍a̍ wo̍ o̍ yu̍ŋgu̍la̍ nu̍mnda̍ŋ tɛ̄ɛ̄ŋ ndo̍, I̍ cho̍ tōsā mbō sīmnu᷄ŋ ka̍a̍le̍ŋ, ndu̍yɛ̍ o̍ cho̍ ō mɛ̄sɛ̍lɛ̍i̍ yo̍, mbō sīmnu᷄ŋ lɛ᷅ŋndē kpāāyāle̍ bɛ̍ndū. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍. Tē te̍le̍ŋ ko̍ŋ ō fūūlu̍u̍ pɛ̍, I̍ cho̍ tōsā mī he̍ī ī yɔ̄nu᷄ŋ o̍ te̍le̍ŋ bi̍ŋgī bɛ̄ŋgu̍.”