Read Southern Kisi Āīsa̍yā 61 Bible Online

Āīsa̍yā 61 - Southern Kisi bible

Āīsa̍yā 61

¹“Mɛ̄lɛ̄ka̍ Ya̍a̍wɛ̄ɛ̍ kpu̍lu̍ŋgūma̍ bɛ̄ndōo̍ ō hɛ̄li̍ ya̍. Le̍ he̍ī, Nyi̍nā ndɔ̄ɔ̍ ō chō ya̍ kɔ̄ɔ̄lī. He̍ī yɔ̄nu̍ŋ le̍ mī di̍mu̍l wānāa̍ cho̍ o̍ kūɛ̍i̍ ni᷄ŋ nda̍ yōōŋgū kɛ̄ndɛ̍ Mɛ̄lɛ̄ka̍a̍. Ō vēm ya̍ le̍ mī nyɔ̍ɔ̍lu̍ wānāa̍ cho̍ a̍ kɔ̄ltā tāmbɛ̍i̍la̍ŋ nda̍ kɔ̄lta̍ŋ, ndu̍yɛ̍ mī yo̍nda̍ māā, wānāa̍ cho̍ o̍ bīyɔ̄ɔ̍ ni᷄ŋ nda̍ ā chō mālɔ̄ɔ̍ sɔ̄lā. Ō vēm ya̍ le̍ mī to̍sa̍ mī wānāā nda̍ chō kīndīlāa̍ wa̍ ā sɔ̄la̍ bāŋa᷄ŋndo̍,

²ndu̍yɛ̍, mī yo̍nda̍ māā wɔ̄sīī ndu̍ Mɛ̍lɛ̄ka̍ Ya̍a̍wɛ̄ɛ̄ o̍ cho̍ wāŋnda̍ kɛ̄ndɛ̄i̍ ndūɛ̍i̍ tōsāl, mbō mīŋgu̍l ya̍a̍mɔ̍ɔ̍wa̍a̍ ndūa̍a̍ māa̍ ve̍ ī fūūlu̍u̍. Ō vēm ya̍ le̍ mī nyɔ̍ɔ̍lu̍ wānāā cho̍ cha᷄ŋnda̍ŋ nda̍ kɔ̄lta̍ŋ,

³ndu̍yɛ̍ mī ma̍la̍ wānāā kɔ̄ltā ndāla̍ŋ lā chō mɔ̍nɛ̍i̍ bīyɔ̄ɔ̍ Sa̍a̍yɔ̄ŋ chi̍e̍e̍ wa̍. Wānāa̍ cho̍ cha᷄ŋnda̍ŋ nda̍, I̍ cho̍ tōsā mā dɔ̄ɔ̄nu᷄ŋ nya̍a̍le̍, ndu̍yɛ̍ mā na᷄ŋ kɔ̄l sɔ̍ŋgɔ̍ ko̍ŋ. Wānāa̍ cho̍ cha᷄ŋnda̍ īmɔ̍nɛ̍la̍ŋ nda̍, ā sōlī ni̍ŋ cho̍ndu̍ŋ kɔ̄l kɛ̄ndɔ᷄ŋ. Kɔ̄l ndā ta̍mbɛ̍i̍yo̍ ō chō chūwɔ̄ɔ̄, mā mūli̍ŋ Mɛ̍lɛ̄ka̍ sāŋgālāa̍ o̍ chōndo̍ŋ ni᷄ŋ. Ā wā ni̍ŋ ma̍wa̍ā māā yɔ̄mīī tūālāā, ndu̍yɛ̍ ā wā ni̍ŋ wa̍nāā sa̍kpō, wānāā Mɛ̄lɛ̄ka̍ Ya̍a̍wɛ̄ɛ̄ pi̍la̍ o̍ tɔ᷅l le̍ mbō chɔ᷄m nāŋɔ̄ɔ̄ ndɔ̄ɔ̍ o̍ nda̍ ni̍ŋ sa̍na̍a̍ wa̍.

⁴Wāŋnda̍ ha̍ā nda̍ cho̍ hūnɔ̄ɔ̄ pɔ̄mndā māsīndɛ̄ la̍ŋ mīŋgī tāŋgūl ni̍. Fo̍ndāŋndā ya̍a̍mɔ̍ɔ̍wa̍ ā tɛ̄ɛ̄mbu̍u̍ sīndɛ̄ la̍ŋ, nda̍ cho̍ la̍ŋ mīŋgī bɛ̄ɛ̄ndīāā ni̍. Chi̍e̍e̍ŋ ya̍a̍mɔ̍ɔ̍wa̍ ā pēsi̍ sīndɛ̄ ma̍ mīŋgī mu̍ŋ pɔ̄mnda̍ŋ ndo̍ŋ, nda̍ cho̍ hūnɔ̄ɔ̄ chi̍e̍e̍ŋ mu̍ŋ mīŋgī tāŋgūl ni̍.”

⁵“Wānāā nīa̍a̍, wānāā lēkāa̍wa̍ ā hūŋ ni̍ŋ mā hu᷄ŋ ma̍ndāl nya̍ Sāa̍ nyāa̍, ndu̍yɛ̍ mā tōsa̍l nya̍ chīɔ̄ɔ̄ŋ nyāa̍ŋ, a̍ kpe̍le̍la̍ nyāla̍ mākīle̍pīi̍ la̍ŋ.

⁶Wāŋnda̍ ā vēēlū ni̍ŋ nya̍, āā wānāā sōlīāā lāsa̍lāa̍ Mɛ̄lɛ̄ka̍ Ya̍a̍wɛ̄ɛ̄ wa̍. Ā kē ni̍ŋ nya̍ di̍ōla̍ŋ āā bu̍ɛ̍i̍yāa̍ Mɛ̄lɛ̄ka̍ nāa̍. Lā chō hūnɔ̄ɔ̄ sūlta̍ŋ o̍ chi̍e̍ēŋndo̍ ni᷄ŋ tɔ̍nɔ̄ di̍o̍, ndu̍yɛ̍ mī lā kēlū yōŋgāa̍ a̍ la̍ŋ.

⁷Si̍ɔ̍mbu̍la̍ nyāla̍ŋ lā chō fāŋa᷄ŋ, ndu̍yɛ̍ mī bɛ̄ɛ̄la̍ nyāla̍ ta̍mbɛ̍i̍ la̍ŋ lā chūū. Lā chō kɔ̄l nāŋɔ̄ɔ̄ ta̍u̍, kāni̍ fo̍ndōle̍, le̍ dɛ̍nɛ̍ kɛ̍ndɛ̄ nya̍ sɔ̄lā ni̍ŋ ndo̍. Lā chō sūllo̍ sɔ̄lā o̍ lɛ̄ŋnde̍ŋ nde᷅ŋ ni᷄ŋ, mbō chūa̍ sūl nya̍ a̍a̍ nɔ̍ wo̍ lēdīi̍ŋ. Ndu̍yɛ̍ kɔ̄l nyā kɛ̍ndɔ̄ɔ̍ ō wā ni̍ŋ le̍ fɛ̍ɛ̍ŋ a̍ fɛ̍ɛ̍ŋ.”

⁸Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Ya̍ Mɛ̍lɛ̄ka̍, sa̍kpōyɛ̍i̍ ya̍ I̍ ka̍a̍la̍ ni̍, ndu̍yɛ̍ mi̍ tu᷅l ka̍fāla̍ŋ a̍ yɔ̄ŋ wɔ̄ɔ̍ŋndo̍ lēyɛ̄. I̍ cho̍ lō o̍ dīōmndē nīle̍ŋ chōo̍, mī ke̍ wānāā nīa̍a̍ fāndā nda̍ nɔ̄ le̍ sɔ̄lāa̍ wo̍, ndu̍yɛ̍ mī yi̍i̍ kpe̍ma̍ fɛ̍ɛ̍ŋ a̍ fɛ̍ɛ̍ŋ ndo̍ a̍ nda̍.

⁹Wānāa̍ fu̍lā ni̍ŋ o̍ pūlālē ndāle̍ŋ chōo̍ wa̍, lēlɛ̄ŋ o̍ lēlɛ̄ŋ nda̍ kɔ̍, wāŋnda̍ ā sīnā ni̍ŋ nda̍, ndu̍yɛ̍ mā ke̍ nda̍ bɛ̄ɛ̄le̍ŋ. Wānā o̍ wānā che᷅ nda̍ bā o̍ bā pɛ̍, ā chō nda̍ sīnā māā wānāā ya̍ Mɛ̍lɛ̄ka̍ Ya̍a̍wɛ̄ɛ̄ dɔ̍ū sa̍lā wa̍ nda̍ chō ni̍.”

¹⁰Mɛ̄lɛ̄ka̍ Ya̍a̍wɛ̄ɛ̄ o̍ to̍sa̍ mi̍ du̍a̍u̍nu᷄ŋ nya̍a̍le̍ ta̍u̍ ta̍u̍. Nyi̍nā nūu̍ ō na᷄ŋ kɔ̄l ta̍u̍ le̍ nyɛ̄ Mɛ̄lɛ̄ka̍ nūu̍ ō tōsa̍l la̍ wo̍. Mɛ̄ɛ̍ nda̍ dōvī nu̍a̍ā wānā la̍nɔ̍ɔ̍, mā bɛ̄ɛ̄ndi̍a̍a̍ ndu̍ nyɛ̄ kɛ̄ndɛ̄ kɛ̍ndɛ̄, le̍ mā cha᷄l o̍ nɔ̄ɔ̍ ni᷄ŋ nda̍ pɔ̍nɔ̍ ndɔ̄ yɛ̍, le̍nde̍ Mɛ̄lɛ̄ka̍ bɛ̄ɛ̄ndi̍a̍a̍ ya̍ ni̍. Pīŋī o̍ pi̍ŋi̍ ya̍ wo̍, ndu̍ cho̍ nyɛ̄lā chūɛ̄ɛ̄na᷄ŋ nda̍ o̍ wo̍u̍ ya̍ la̍ŋ ni̍. O̍ ko̍ŋ kɔ̍ɔ̍lī, mbo̍ chɔ̄m māā i̍ cho̍ sa̍kpō, sa̍kpōyɛ̍i̍ kēŋ, ndu̍ cho̍ māā dōmā vīlɛ̄ī o̍ wo̍u̍ ya̍ wo̍ ni̍.

¹¹Mɛ̄ɛ̍ lɛ̄ŋnde̍ŋ lē tōsā nu̍a̍ā mī tɔ̄lɔ̄ɔ̍ ō vīl lɛ̍, ndu̍yɛ̍ mī kpe̍lo̍o̍ tōsa̍ mī tɔ̄lɔ̄ɔ̄ nda̍ tɔ̄l lēni᷄ŋ ndo̍ ō hīndū yɛ̍, le̍nde̍ Māsānɔ̄ɔ̍ Mɛ̄lɛ̄ka̍ tōsā ni̍ŋ ni̍, mī sa̍kpōyɛ̍i̍ ī wa̍ o̍ lɛ̄ŋnde̍ ni᷄ŋ kpo̍u̍, ndu̍yɛ̍ mbō tōsa̍ a̍ sa̍bū mī lɛ̄ŋnde̍ kpo̍u̍ i̍ sa̍ŋga̍la̍ ndu̍.