Read Southern Kisi Āīsa̍yā 62 Bible Online

Āīsa̍yā 62 - Southern Kisi bible

Āīsa̍yā 62

¹Le̍ Sa̍a̍yɔ̄ŋ ndu̍, I̍ cho̍ hīōūwɔ̄ɔ̄ lāchī a̍ sūɛ̍i̍ le̍ ndu̍. Le̍ sa̍bu̍ Chūlu̍sɛ̄lɛ̄m ndo̍, I̍ cho̍ me̍ī le̍, I̍ cho̍ lō sūɛ̍i̍ ha̍a̍a̍ mbō lo̍ o̍ ko̍ŋ mbō sɔ̍la̍ bāŋa᷄ŋndo̍, ndu̍yɛ̍ mī kpāāya̍ ndɔ̍ o̍ ya᷅m ni̍ŋ ya̍a̍mɔ̍ɔ̍wa̍ wo̍ ō chɔ̄mnu̍ŋ mɛ̄ɛ̍ nyɛ̄ wa̍wo̍ŋndo̍ ō dīāndū nu̍a̍ā o̍ nyūmnda̍ŋ ni᷄ŋ yɛ̍. I̍ cho̍ me̍ī le̍, ha̍a̍a̍ mɛ̄ɛ̍ mbō sɔ̄la̍ bāŋa᷄ŋndo̍, mɛ̄ɛ̍ la̍mbūi̍yo̍ ō yɔ̄ŋgū nu̍a̍ā nyɛ̄ wa̍wo̍ŋndo̍ yɛ̍.

²Chūlu̍sɛ̄lɛ̄m, lɛ̄ŋnde̍ ī chō hūnɔ̄ɔ̄ kpāāyā nu̍m bɛ̄ndū ŋ̄ yām ni̍ŋ ya̍a̍mɔ̍ɔ̍wa̍ wo̍ chɔ̄, ndu̍yɛ̍ mī māsāā bɛ̍ndūa̍a̍ kpo̍u̍ a̍ che᷅ nāŋɔ̄ɔ̄ nūm bɛ̍ndōo̍. Wāŋndā ā chō nu̍m hūnɔ̄ɔ̄ dīōlā sɛ̄nɛ̄īla̍ŋ vēēlū, dīōlā Mɛ̍lɛ̄ka̍ Ya̍a̍wɛ̄ɛ̄ pi̍la̍ o̍ ke᷅ ni̍ŋ nu̍m nda̍ŋ.

³Ā wā ni̍ŋ Mɛ̍lɛ̄ka̍ Ya̍a̍wɛ̄ɛ̄ o̍ bā, mɛ̄ɛ̍ mɔ̍si̍l lēbɛ̄ɛ̄ kɛ̍ndɛ̄ bɛ̄ndōo̍ ō wā nu̍a̍ā māsāa̍ o̍ bā yɛ̍. Ndu̍yɛ̍ ā wā ni̍ŋ Mɛ̄lɛ̄ka̍ nūmndo̍ o̍ bā māā mɔ̍si̍l lēmāsā kɛ̄ndɛ̄ kɛ̍ndɔ̄ɔ̍.

⁴Fɛ̍ɛ̍ŋ a̍ fɛ̍ɛ̍ŋ, wāŋnda̍ ā ve̍e̍lū lɛ̍ nu̍m āā, “Chi̍e̍e̍ Mɛ̄lɛ̄ka̍ ō kɛ̄ɛ̍ wo̍,” le̍, kɛ̄lɛ̄ŋgāāle̍ mā vēēlu̍ lɛ̄ŋndē nūmnde̍ŋ āā, “Lɛ̄ŋndē Mɛ̄lɛ̄ka̍ tɛ̄ɛ̄mbu̍u̍ le̍ŋ.” Wāŋnda̍ chō nu̍m dīōlā sɛ̄nɛ̄īla̍ŋ kē āā, “Mɛ̄lɛ̄ka̍ hīni̍ kɔ̄l a̍ ndu̍,” ndu̍yɛ̍ mā ke̍ lɛ̄ŋndē nūmnde̍ŋ dīōla̍ŋ āā, “Ō cha᷄l o̍ nɔ̄ɔ̍ a̍ kɔ̍l kɛ̄ndɛ̄.” Kāni̍ fo̍ndōle̍, Mɛ̄lɛ̄ka̍ Ya̍a̍wɛ̄ɛ̄ o̍ hi̍nī ni̍ŋ kɔ᷅l a̍ nūm, ndu̍yɛ̍ mī lɛ̄ŋndē nūmnde̍ŋ lē wa̍ le̍ ndu̍, mɛ̄ɛ̍ wānā la̍nɔ̍ɔ̍ ō wā nu̍a̍ā o̍ nɔ̄ɔ̍ yɛ̍.

⁵Mɛ̄ɛ̍ Chūāāmbɔ̄ pīāāndōo̍ ō chūā nu̍a̍ā yūfu̍a̍a̍nɔ̍ɔ̍ o̍ nɔ̄ɔ̍ ni᷄ŋ yɛ̍, le̍nde̍ wānāā nūmnda̍ ā chūā ni̍ŋ nu̍m ni̍. Mɛ̄ɛ̍ wāŋndo̍ ō sɔ̄lā nu̍a̍ā la̍nɔ̍ɔ̍ sɛ̍nɛ̄ī mbō wa̍ nya̍a̍le̍ ko̍ŋ yɛ̍, le̍nde̍ Mɛ̄lɛ̄ka̍ nūmndo̍ ō wā ni̍ŋ a̍ nya̍a̍lo̍o̍ le̍ nūm ni̍.

⁶Chūlu̍sɛ̄lɛ̄m, I̍ kɛ̍si̍ wānāā mɛ̄ŋgɛ̄lāa̍ o̍ sāāsāla̍ nu̍mnda̍ŋ chōo̍ le̍ mā wa̍ mɛ̄ŋgɛ̄lāa̍. Ndu̍yɛ̍ wānāa̍ mɛ̄ŋgɛ̄lāa̍ ha̍ā le̍ īdīi̍ a̍ īchɔ̄l ā nɔ̍ mā mēi̍ le̍, ā nɔ̄ mā wa̍ yōndāa̍. Nya̍ cho̍ Mɛ̄lɛ̄ka̍ Ya̍a̍wɛ̄ɛ̄ pīɛ̄īyo̍, mī lā yīyālāŋ ndu̍ a̍ būŋgāŋ o̍ chu̍a̍ wo̍ŋ nda̍, lā me̍ī le̍, lā hīo̍u̍ la̍chi̍ a̍ ndu̍ pīɛ̄īyo̍ kpe̍e̍kpe̍i̍.

⁷Lā me̍ī le̍, lā hīo̍u̍ la̍chi̍ a̍ ndu̍ pīɛ̄īyo̍, ha̍a̍a̍ mbō lo̍ o̍ ko̍ŋ, mbō mīŋgi̍ Chūlu̍sɛ̄lɛ̄m tāŋgūl, ndu̍yɛ̍ mbō mīŋgi̍ ndu̍ chi̍e̍e̍ wāŋnda̍ o̍ chi̍e̍ēŋndo̍ kpo̍u̍ a̍ cha᷅, mā sāŋgāla̍ Mɛ̄lɛ̄ka̍ wo̍.

⁸Mɛ̄lɛ̄ka̍ Ya̍a̍wɛ̄ɛ̄ he̍e̍lu̍ bā ndɔ̄ kɛ̍ndɔ̄ɔ̍, mbo̍ mēna᷄ŋ. Ndu̍yɛ̍ ō chō tōsā a̍ kpāāya̍ ndɔ̄ɔ̍ mbō tōsa̍ nyɛ̄ o̍ di̍mi̍ wo̍. Mbo̍ dīmī āā, “Fɛ̍ɛ̍ŋ a̍ fɛ̍ɛ̍ŋ, I̍ to̍sā lɛ̍ mī ya̍a̍mɔ̍ɔ̍wa̍a̍ nyāa̍ ā hu᷄ŋ po̍o̍ndīāā nya̍ nyɛ̄ dīāā nyāa̍ o̍ lābā le̍. Wānāā lēkāa̍wa̍, ā ko᷅l lɛ̍ mūɛ̄īmā nyā ma̍ mākīle̍pīi̍ma̍ nya̍ fāfa̍la̍, mi̍ lā tōōsīāā wa̍ŋ te̍.

⁹Wāŋnda̍ to̍sā ni̍ŋ chīɔ̄ɔ̄ŋ ndāa̍ŋ, ndu̍yɛ̍ mā dē nyɛ̄ dīāā nda̍ sa̍ŋgā ko̍ŋ le̍ ndu̍ wo̍, o̍ ko̍ŋ, mā sāŋgāla̍ ya̍ Mɛ̍lɛ̄ka̍ Ya̍a̍wɛ̄ɛ̄. Wāŋnda̍ to̍sā ni̍ŋ kpe̍le̍la̍ mākīle̍pīi̍la̍ŋ, ndu̍yɛ̍ mā tōōsi̍a̍a̍ mūɛ̄īmā mākīle̍pīi̍ya̍ŋ, mā hu᷄ŋ ko᷅l ma̍ŋ o̍ la̍ūla̍ ba̍lu̍ chīɛ̄ī nūu̍ la̍ŋ.”

¹⁰Wāŋnda̍ Chūlu̍sɛ̄lɛ̄m, lā kēēku̍ o̍ dīōlā sāāsāla̍ŋ Chūlu̍sɛ̄lɛ̄m mī lā fūla̍. La̍ fūla̍ mī lā kɔ̍ bɛ̍ɛ̍ndīāā nɛ̄īyo̍ le̍ wānāā nyāa̍ cho̍ mīīŋgōo̍ Chūlu̍sɛ̄lɛ̄m nda̍. Lā tōōsi̍a̍a̍ nɛ̍ī bɛ̍ndōo̍, ndu̍yɛ̍ mī lā bɛ̄ɛ̄ndi̍a̍a̍ ndu̍ nyɛ̄ kɛ̄ndɛ̍ī. Lā fa̍a̍ŋi̍a̍a̍ po̍ūta̍ŋ kpo̍u̍ o̍ nɛ̄ī. Lā hāndu̍ tāāmāsi̍o̍o̍, le̍ mī lɛ̄ŋnde̍ ī chē.

¹¹Mɛ̄lɛ̄ka̍ Ya̍a̍wɛ̄ɛ̄ o̍ yɔ̍ŋgu̍ yōndāa̍ o̍ lɛ̄ŋīī lēvīlle̍ ni᷄ŋ kpo̍u̍. Ō dīmu̍l lɛ̄ŋnde̍ he̍ī āā, “Lā di̍mu̍l wa᷅ŋnda̍ I̍sɔ̄lūɛ̍i̍, māā wāna̍ ndā pi̍ŋīa̍a̍ ō chō hūnɔ̄ɔ̍. Ndu̍yɛ̍ māā ō chō hūnɔ̄ɔ̍ a̍ pāāwā o̍ nɔ̍ le̍ nda̍ wo̍ o̍ bā.”

¹²Wāŋnda̍ I̍sɔ̄lūɛ̄ī, ā vēēlū ni̍ŋ nya̍ āā, “Wānāā kāsīa̍a̍ Mɛ̄lɛ̄ka̍a̍.” Ā vēēlū ni̍ŋ nya̍ vɛ̄lɛ̄ āā, “Wānāā Mɛ̄lɛ̄ka̍ Ya̍a̍wɛ̄ɛ̄ o̍ chi̍i̍ndi̍a̍a̍ wa̍.” Ā vēēlū ni̍ŋ Chūlu̍sɛ̄lɛ̄m āā, “Chi̍e̍e̍ wāŋnda̍ nyēēma̍ cha᷄lle̍ wo̍,” ndu̍yɛ̍ mā vēēlu̍ ndu̍ vɛ̄lɛ̄ āā, “Chi̍e̍e̍ Mɛ̄lɛ̄ka̍ ō kɛ̄ɛ̍ le̍ wo̍.”