Read Southern Kisi Āīsa̍yā 63 Bible Online

Āīsa̍yā 63 - Southern Kisi bible

Āīsa̍yā 63

¹Ō nɛ̄ɛ̍nɛ̍ cho̍ yɛ̄ ho̍ō chɔ̄nɔ᷄ŋndo̍ Bɔ̍si̍lūā chi̍e̍e̍, o̍ lɛ̄ŋndē I̍dɔ̄mnde̍ŋ ni᷄ŋ, mbo̍ wā hūnɔ̄ɔ̍ ō dōvīa̍ŋ o̍ nyɛ̄lā sīāŋā la̍ŋ ni᷄ŋ? Ō nɛ̄ɛ̍nɛ̍ cho̍ yɛ̄ ho̍ō hūnɔ̄ɔ̍ ō dōvīa̍ŋ o̍ nyɛ̄lā kɛ̄ndɛ̄ kɛ̍ndɛ̄la̍ŋ ni᷄ŋ, mbo̍ wā hūnɔ̄ɔ̍ a̍ nɛ̄īyo̍ a̍ kpāāyā bɛ̍ndōo̍. Mi̍ Mɛ̄lɛ̄ka̍ mūlī āā, “Ya̍ Mɛ̍lɛ̄ka̍ Ya̍a̍wɛ̄ɛ̄ cho̍ hu̍nɔ̄ɔ̍ ni̍, le̍ mī yōnda̍ a̍ kpāāya̍ ni̍ ya̍ I̍ ya᷅m ndo̍ o̍kɔ̄ɔ̄. Ya̍ Mɛ̍lɛ̄ka̍ Ya̍a̍wɛ̄ɛ̄ nɔ̍ kpāāyāa̍ le̍ wāŋnda̍ chīīndīa̍a̍ wo̍ cho̍ hūnɔ̄ɔ̍ ni̍.”

²Mi̍ Āīsa̍yā nyu̍nā āā, “Vɛ᷅ mi̍ nyɛ̄la̍ nu̍m lēkɔ̄ɔ̍ lā wā nu̍a̍ā lā dīūwāā wa᷅ŋ, mɛ̄ɛ̍ wānā yɔ᷅ŋ ko̍ āā kīle̍pīi̍ya̍ŋ ŋ̄ wa̍ nīɔ̄ūwo̍ le̍ mūɛ̄īya̍ŋ tōōsi̍a̍a̍ ni̍?”

³Mi̍ Mɛ̄lɛ̄ka̍ Ya̍a̍wɛ̄ɛ̄ o̍ lo᷅ o̍ ko̍ŋ mbo̍ mūlī āā, “Lɛ̄ŋnde̍ ya̍ I̍ wa̍ nīɔ̄ūwo̍ ni̍, mɛ̄ɛ̍ wāŋnda̍ nīɔ̄ū nu̍a̍ā kīle̍pīi̍ya̍ŋ le̍ mūɛ̄īya̍ŋ tōōsi̍a̍a̍ yɛ̍. Ndu̍yɛ̍ o̍ lɛ̄ŋnde̍ ni᷄ŋ ki̍nɛ̍i̍, wānā o̍ wānā fu̍la̍ mbō māla̍ ya̍ le̍, ya̍ pīlɛ̍ kpe̍ ni̍ɔ̍u̍ ndi̍ ni̍. I̍ dɔ̍ɔ̍nu̍ŋ tu̍mbe̍ a̍ wāŋnda̍ o̍ lɛ̄ŋnde̍ ni᷄ŋ, mi̍ ni̍ɔ̍u̍ nīɔ̄ū nda̍ mɛ̄ɛ̍ nda̍ nīɔ̄ū nu̍a̍ā kīle̍pīi̍ya̍ŋ le̍ mūɛ̄īya̍ŋ tōōsi̍a̍a̍ yɛ̍. Wānāā ya̍ I̍ ni̍ɔ̍u̍ ka̍ŋ nda̍ kōo̍ma̍ ndāa̍ŋ ma̍ fa̍sa̍ŋi̍a̍ŋ o̍ nyɛ̄lā nīla̍ŋ ni̍, mi̍ lā līnda᷄ŋ kpo̍u̍.

⁴Bōōndi̍i̍ ya̍ i̍i̍ kɛ̍ɛ̍si̍a̍a̍ o̍ kɔ̄l nūu̍ ni᷄ŋ le̍ wāŋnda̍ māā mīŋgūllo̍ ve̍, ndi̍ fu̍u̍lu̍u̍ ni̍. Ndu̍yɛ̍ te̍le̍ŋndo̍ ō fūūlu̍u̍, le̍ mī pi̍ŋi̍ wānāā nīa̍a̍.

⁵I̍ wa̍ mɛ̄ɛ̄nda᷄ŋndo̍ le̍ wāna̍ ma̍lā ya̍ wo̍, kɛ̍ wānā bɛ̍ɛ̍ I̍ sɔ̍la̍ le̍. Mɛ̄ɛ̍ ya̍ I̍ che᷅ māā wānā o̍ wānā cho̍ mbō sɔ̄ɔ̄ŋgu̍u̍ lābā le̍ ya̍ mālā le̍, mi̍ kɔ̄ndɔ̄fi̍llo̍ bīī ya̍. O̍ ko̍ŋ, mi̍ chɔ᷅m kpāāya̍ nūu̍, ndu̍yɛ̍ mi̍ ya᷅m. Mɛ̄ɛ̍ ya̍ I̍ dɔ̍ɔ̍nu̍ŋ tu̍mbe̍, mi̍ tu̍mbe̍ nī ko̍ŋ ō tōsā mi̍ sɔ̍lā kpāāyāa̍ mi̍ ya᷅m.

⁶Mi̍ du̍a̍u̍nu᷄ŋ tu̍mbe̍ a̍ lɛ̄ŋnde̍, ndu̍yɛ̍ mi̍ nīɔ̄ū nīɔ̄ū ndi̍ a̍ bɛ̄ŋgu̍, ndu̍yɛ̍ mi̍ tɛ̍ɛ̍mbūū ndi̍. Mi̍ to̍sā mi̍ kōo̍ma̍ wāŋnda̍ o̍ lɛ̄ŋīī kēŋ ni᷄ŋ mā tāālīāā lɛ̄ŋ.”

⁷I̍ cho̍ wāŋnda̍ chɔ̄m a̍ kāālā fɛ̍ɛ̍ŋ a̍ fɛ̍ɛ̍ŋ Mɛ̄lɛ̄ka̍ Ya̍a̍wɛ̄ɛ̄ o̍ ka̍a̍la̍ na̍a̍ wo̍, ndu̍yɛ̍ mī sa̍ŋga̍la̍ ndu̍ le̍ nyɛ̄ o̍ nyɛ̄ o̍ to̍sa̍l na̍a̍. I̍ cho̍ Mɛ̄lɛ̄ka̍ Ya̍a̍wɛ̄ɛ̄ sāŋgālā le̍ sɔ̄ɔ̍ŋ dɛ̍nɛ̍ kɛ̍ndɛ̄ŋ bɛ̄ndūŋ o̍ to̍sa̍l na̍a̍ I̍sɔ̄lūɛ̍i̍ya̍ wo̍ŋ, ndu̍yɛ̍ a̍ kɛ̄ndɛ̄ī bɛ̍ndūēī o̍ to̍sa̍l na̍a̍ ve̍. Ō tūīīnu̍ŋ na̍a̍ īnyīɛ̍ɛ̍, ndu̍yɛ̍ mbo̍ chɔ̄m na̍a̍ kāālā ndɔ̍ cho̍ le̍ fɛ̍ɛ̍ŋ a̍ fɛ̍ɛ̍ŋ ndo̍.

⁸Mi̍ Mɛ̄lɛ̄ka̍ Ya̍a̍wɛ̄ɛ̄ o̍ lo᷅ o̍ ko̍ŋ mbo̍ dīmī a̍ wāŋnda̍ I̍sɔ̄lūɛ̄ī o̍kɔ̄ɔ̄ āā, “Wānāā nīa̍a̍ kpe̍e̍kpe̍i̍ wāŋnda̍ ha̍ā ā chō ni̍. Ā cho᷄ chu̍a̍u̍wāā hu̍i̍ ya̍ le̍.” O̍ ko̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ chi̍i̍ndīāā nda̍.

⁹Sāŋgā o̍ sāŋga̍ ke̍e̍ku̍ nda̍ chōo̍, ō me᷄l nda̍ lēni᷄ŋ te̍, mbo̍ chɛ̄l ma̍ sāŋgā nda̍ nda̍ā lātūlu̍. Mi̍ ki̍i̍la̍nɔ̍ ndɔ̍ chɔ᷅m māā ndu̍ Mɛ̍lɛ̄ka̍ chō a̍ wāŋnda̍ lātūlu̍ wo̍ ō chīīndīāā nda̍. Mbo̍ chɔ̄m nda̍ kāālāa̍, ndu̍yɛ̍ mbo̍ tūīīnu᷄ŋ nda̍ īnyīɛ̍ɛ̍, mbo̍ chīīndīāā nda̍. Mbo̍ lō nda̍ māndāa̍ wɔ̄sīla̍ŋ nda᷅ŋ kpo̍u̍, chɔ̍ŋ a̍ pālɛ̍i̍ māsīndɛ̄i̍.

¹⁰Kɛ̍ ma̍ lō o̍ ko̍ŋ ma̍ sīmūl Mɛ̄lɛ̄ka̍ ma̍ tōsā mi̍ Nyi̍na̍ Mɛ̍lɛ̄ka̍a̍ ō tāmbū kɔ̄l ta̍u̍ ta̍u̍ a̍ nda̍. O̍ ko̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ si̍mnu᷄ŋ ya̍a̍mɔ̍ɔ̍nɔ̍ nda̍, ndu̍yɛ̍ mbo̍ sɔ̄ŋgā a̍ nda̍.

¹¹Kɛ̍ mi̍ Mɛ̄lɛ̄ka̍ yīyāla᷄ŋ wānāā ndūa̍a̍ ha̍ā, ā nyɛ̍ yɔ̍nu̍ŋ si̍ndɛ̄ a̍ te̍le̍ŋ Mūu̍sē bu̍ɛ̍ī ndɔ̄ wo̍. O̍ ko̍ŋ, ma̍ nyūnā āā, “Mɛ̄ɛ̍ ɔ̍ɔ̄ Mɛ̄lɛ̄ka̍ Ya̍a̍wɛ̄ɛ̄ chi̍i̍ndi̍a̍a̍ ni᷅ŋ sīndɛ̄ wāŋnda̍ I̍sɔ̄lūɛ̄ī o̍ pēe̍ mɛ̄ŋmā īhɛ᷄llo̍, lātūlu̍ nda̍ wānāa̍ wa̍ nda̍ chīla̍ŋ nda̍ wo̍? Ɔ̍ɔ̄ Mɛ̄lɛ̄ka̍ yɔ̍ŋ ko̍ŋ Nyi̍nā ndɔ̄ɔ̍, mi̍ Nyi̍nā ndɔ̄ ko̍ŋ ō wā wānāā ndūa̍a̍ tɛ̄ɛ̄ŋ ndo̍?

¹²Kūɛ̍ɛ̍nɛ̍ Mɛ̄lɛ̄ka̍ kōŋ ō chō yɛ̄, o̍ ke̍ ko̍ŋ Mūu̍sē kpāāya̍ ndɔ̄ kɔ̄ndɔ̄fi̍li̍ bɛ̄ndōo̍, mbo̍ pīɔ̄ū mɛ̄ŋnda̍ŋ tɛ̄ɛ̄ŋ, le̍ mī I̍sɔ̄lūɛ̍i̍ya̍ ā ta᷄ŋ, o̍ ko̍ŋ mī ndu̍ Mɛ̄lɛ̄ka̍ ō sīmnu᷄ŋ wa᷅na̍ tɔ̍ɔ̍ le̍ fɛ̍ɛ̍ŋ a̍ fɛ̍ɛ̍ŋ ndo̍?

¹³O̍ to̍sa̍ ko̍ŋ, mi̍ wāŋnda̍ ā kēēkū o̍ fo̍ndāŋ yīŋgi̍lɛ̍i̍ bɛ̍ndōo̍ o̍ Pēe̍ Mɛ̄ŋmā Īhɛ᷄llo̍ ni᷄ŋ ma̍ tāŋ ndo̍? “Mbo̍ tōsā mi̍ wāŋnda̍ ā kēēkū o̍ pīo̍o̍ tɛ̄ɛ̄ŋ, mɛ̄ɛ̍ so̍o̍ ō wā nu̍a̍ā kɔ̄la̍ŋ o̍ po̍llo̍ ni᷄ŋ yɛ̍, ma̍ tāŋnu᷄ŋ. Wāŋndo̍ ō pīlɛ̍ bɛ̍ɛ̍ o̍ bo̍ŋ mbō de᷄l te̍.

¹⁴Mɛ̄ɛ̍ nda̍ kūā nu̍a̍ā a̍ nāūwa̍ o̍ lɛ̄ŋndē dɛ̍ŋgbɛ̍le̍ŋ o̍ pēmbo᷄ŋ tɛ̄ɛ̄ŋ yɛ̍, le̍nde̍ Nyi̍na̍ Mɛ̄lɛ̄ka̍ Ya̍a̍wɛ̄ɛ̄ wo̍ ō kūɛ̄ a̍ wāŋnda̍ ni̍, mbo̍ kē nda̍ pɛ̄ŋgīo̍o̍. Nu̍a̍ā ŋ̄ kūɛ̄ a̍ wānāā nūmnda̍ ni̍ Mɛ̄lɛ̄ka̍, le̍ ma̍ tōsā mī dīōlā nūmnda̍ŋ lā sɔ̄lā bɛ̄ɛ̄le̍ bɛ̍ndūle̍ŋ.”

¹⁵Mɛ̄lɛ̄ka̍, lo̍ ɛ̄chɛ̍nɛ̄ o̍ fo̍ndā nu̍m kāsī lēbɛ̄ɛ̄ bɛ̄ndōo̍ mā to̍fa̍ lɛ̄ŋ na̍nu᷄ŋ, mā chē dɛ̍nɛ̍ nāā pa̍lāa̍. Vɛ᷅ ni᷅ŋ a̍ bu̍u̍la̍ŋ ndɛ̍ a̍ na̍a̍, ndu̍yɛ̍ mā chɔ̍m kpāāyā nu̍mndo̍ le̍? Vɛ᷅ a̍ chɔ᷅m ndɛ̍ na̍a̍ kāālāa̍, ndu̍yɛ̍ mā nɔ̄ nyīɛ̍ɛ̍ye̍ le̍ na̍a̍ le̍?

¹⁶Mɛ̄lɛ̄ka̍, nu̍m cho̍ fi̍nyā nāa̍ ni̍. E̍bīlāha᷅m o̍ si̍nā na̍a̍ māā chūāūwāā ndɔ̄ le̍. Che̍kɔ̍pū, ndu̍ yɔ̍nūŋ māā I̍sɔ̄lūɛ̄ī ni̍, ndu̍ bɛ̍ɛ̍ ō si̍nā na̍a̍ le̍. Kɛ̍ nūm nūm Mɛ̄lɛ̄ka̍ Ya̍a̍wɛ̄ɛ̄, nu̍m cho̍ fi̍nyā nāa̍ ni̍. Nu̍m cho̍ wānā na̍a̍ pīŋīa̍a̍ kāni̍ ma̍si̍ndɛ̄ ni̍.

¹⁷Mɛ̄lɛ̄ka̍, vɛ᷅ ma̍ chɛ̄l mi̍ ŋ̄ fāŋa᷄ŋ o̍ nɛ̄ī nu̍mndo̍ chōo̍? Vɛ᷅ ma̍ tōsā mi̍ ŋ̄ nɔ̄ bōllē kālālē wāā nu̍a̍ā, ŋ̄ nɔ̍ lɛ̍ īsīōōŋ le̍ nūm te̍? Yāndi̍i̍ Mɛ̄lɛ̄ka̍, mi̍ŋgi̍ hɔ᷅lla̍ o̍ na̍a̍ lo̍ mā ma̍la̍ na̍a̍, fo̍ndōle̍, bu̍ɛ̍i̍yāā nūmnda̍ na̍a̍ ŋ̄ chō ni̍, yu̍ŋgu̍la̍ cho̍ māā nyɛ̄m nu̍m ŋ̄kɛ᷅ la̍ŋ na̍a̍ ŋ̄ chō ni̍.

¹⁸Chīɛ̄ī nūmndo̍, le̍ te̍le̍ŋ bi̍ŋgi̍i̍ni̍i̍ ko̍ni̍ o̍ wa̍ le̍ wānāā nūm a̍ kāsīa̍a̍ ni̍. Mi̍ ya̍a̍mɔ̍ɔ̍wa̍ ā hu᷄ŋ de᷅l ndu̍ chōo̍ ma̍ pīāl ndu̍ wɔ̍ wɔ̍.

¹⁹Mɛ̄lɛ̄ka̍, ā bīī na̍a̍ ko̍, nu̍a̍ā ŋ̄ chā āā ŋ̄ cho̍ bɛ̍ɛ̍ wa̍nāā ŋ̄ wa̍ māsā chōo̍ pa̍a̍ndū le̍, nu̍a̍ā ŋ̍ chā āā ŋ̄ cho̍ bɛ̍ɛ̍ wa̍nāā nūm te̍.