Read Southern Kisi Āīsa̍yā 65 Bible Online

Āīsa̍yā 65 - Southern Kisi bible

Āīsa̍yā 65

¹Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “I̍ wa̍ ō bɛ̄ɛ̄ndīa̍ŋ māā tē nda̍ a̍a̍ nyu̍na̍ ya̍ dīōm pɛ̍, ya̍ i̍i̍ mu̍li̍ nda̍ dīōm, kɛ̍ ā nyu̍na̍ ya̍ le̍. I̍ wa̍ ō bɛ̄ɛ̄ndīa̍ŋ māā tē nda̍ a̍a̍ nu̍u̍va̍ ya̍ pɛ̍, nda̍ a̍a̍ sa̍a̍lu̍ŋ ya̍, kɛ̍ ā nūūwa̍ ya̍ le̍. Wānāa̍ kɛ̍ɛ̍ ha̍ā le̍ ya̍ pīɛ̄īyo̍ wa̍, mi̍ di̍mūl nda̍ ma̍a̍, tē lā yēēma̍ le̍ ya̍ sāālɔ᷄ŋndo̍ pɛ̍, mi̍ lā chē ya̍. Mi̍ lā chē ya̍.

²Le̍ te̍le̍ŋ o̍ te̍le̍ŋ I̍ wa̍ ō bɛ̄ɛ̄ndīa̍ŋ le̍ wāŋnda̍ ha̍ā chɛ̄lɔ̄ɔ̍ māā wānāā ni̍, wānāa̍ si̍mu̍l la̍ ha̍ā, ma̍ wā sɔ̄ɔ̍ŋ bɛ̍nda̍ le̍ wo̍ŋ tōsāa̍, nyɛ̄ nda̍ yēēmā le̍ tōsāa̍ wo̍ ko̍ni̍ nda̍ tōsā ni̍ wa̍.

³Ya̍ o̍ hɔ̄l kpe̍e̍kpe̍i̍ nda̍ hūŋ sɔ̍ɔ̍ŋ bɛ̍nda̍ le̍ wo̍ŋ tōsāa̍ ni̍, sɔ̄ɔ̍ŋ to̍sā mī ya̍ Mɛ̍lɛ̄ka̍ dɔ̄ɔ̄nu᷄ŋ tu̍mbe̍ a̍ nda̍ wo̍ŋ. O̍ kpe̍le̍la̍ ndāla̍ŋ ni᷄ŋ nda̍ kūā sa̍lāla̍ŋ sōlīo̍o̍ o̍ mɛ̄lɛ̄ka̍a̍ ndāa̍ lo̍ ni̍, ndu̍yɛ̍ mā lūām nyɛ᷅m chūŋ kɛ̄ndɔ᷄ŋ o̍ mɛ̄lɛ̄ka̍a̍ ndāa̍ lo̍, o̍ ma̍āŋndā nda̍ tōōsīāā a̍ kpi̍līki̍o̍ŋ nda̍ŋ chōo̍.

⁴O̍ sɛ̄īla̍ŋ tɛ̄ɛ̄ŋ, a̍ o̍ fo̍ndāŋnda̍ cho̍ nu̍a̍ā yo̍lo̍lɛ̄la̍ŋ, nda̍ kūā cha̍lle̍ īchɔ̄l ni̍. Mā lɔ᷄l īchāli̍ lo̍ŋ pi̍i̍, le̍ sūɛ̍i̍ nāa̍ wāŋ vīlɛ̍i̍ya̍ chūā. Vīsīŋ pēūwo̍ŋ bɛ̍ɛ̍ mā dē. Ndu̍yɛ̍, vīsi᷄ŋ bɛ̍nda̍ ya̍ Mɛ̍lɛ̄ka̍ o̍ hɔ̄l le̍ di̍o̍ le̍ wo̍ŋ, mu̍ŋ nda̍ yāū mbo̍ōya̍la̍ŋ ni̍, mā kōlī kōlī.

⁵O̍ ko̍ŋ kɔ̍ɔ̍lī, mā dīmūl wa᷅ŋnda̍ āā, ‘Lā sɔ̍ɔ̍ŋgūū na̍a̍ īkɛ̄i̍ le̍, wānāa̍ cho̍ ā hɛ̄līa̍ŋ te̍ŋge̍le̍ŋ le̍ Mɛ̄lɛ̄ka̍ wa̍ na̍a̍ ŋ̄ chō ni̍. Le̍la̍ŋ lā pi̍la̍ŋ na̍a̍ le̍.’ Wāŋnda̍ ha̍ā, mɛ̄ɛ̍ ni᷄ŋndo̍ ō pīā nu̍a̍ā wānā a̍ ku᷄mnde̍ yɛ̍, le̍nde̍ ni᷄ŋndo̍ pɛ̄ ya̍ a̍ sūɛ̍i̍ ndɛ̄i̍ ni̍. Tu̍mbe̍ ya̍ I̍ dɔ̍ɔ̍nu᷄ŋ a̍ nda̍ wo̍, ō chō māchūāā mɛ̄ɛ̍ yīŋnde̍ŋ lē wā nu̍a̍ā lē nyu᷅m kpo̍so̍ŋ te̍ yɛ̍.

⁶“Wāŋnda̍ ha̍ā, ī chō ni᷅ŋ ī pōōnyīāā māā ā nɔ̄ mā sɔ̄la̍ dɛ̍nɛ̍ pa̍lāa̍. Ndu̍yɛ̍ I̍ me̍ī a̍ ndi̍ le̍. Nyɛ̄ o̍ nyɛ̄ nda̍ tōsa̍, ā chō pāāwāa̍ sɔ̄lā le̍ ndu̍ ō pīāā cha̍. I̍ cho̍ nda̍ nyɛ̄ pālāa̍ tūsī chōo̍, le̍ yɔ̄ŋ wɔ̄ɔ̍ŋ o̍ yɔ̄ŋ wɔ̄ɔ̍ŋ nda̍ tōsa̍,

⁷yɔ̄ŋndā wɔ̄ɔ̍ŋndā nda̍ pi̍la̍ ā tōsa̍ la̍ŋ ni̍, a̍ yɔ̄ŋndā wɔ̄ɔ̍ŋndā fi̍nyāā ndāā ma̍māa̍ ā tōsa̍ la̍ŋ. I̍ cho̍ nda̍ nyɛ̄ pālāa̍ tūsī chōo̍, Kāni̍ fo̍ndōle̍, le̍ mɛ̄ɛ̍ nda̍ wa̍ nyɛ̄m chūŋ kɛ̄ndɔ᷄ŋ lōmɔ̄ɔ̍ o̍ lūāŋūŋ bɛ̄ndo᷄ŋ chōo̍ o̍ mɛ̄lɛ̄ka̍a̍ chēle̍ŋnda̍ lo̍, ndu̍yɛ̍ ma̍ tɛ̄ɛ̄mbūū ya̍ Mɛ̍lɛ̄ka̍ bɛ̄ɛ̄la̍ŋ o̍ pēmbo᷄ŋ chōo̍ yɛ̍. Le̍ he̍ī, nyɛ̄ o̍ nyɛ̄ nda̍ tōsa̍, ā chō pāāwāa̍ sɔ̄lā le̍ ndu̍ o̍ pi̍a̍ā cha̍.”

⁸Mɛ̄lɛ̄ka̍ Ya̍a̍wɛ̄ɛ̄ di̍mi̍ āā, “Mɛ̄ɛ̍ wāŋndo̍ wā nu̍a̍ā kpɔ̄ŋnjɔ̍ mākīle̍pīi̍ wɔ̍ɔ̍ŋndo̍ vīōūwɔ̄ɔ̍, mbō sāālu̍ŋ ma̍ kɛ̍ndīa̍ŋ mā ti᷄ŋ lēni᷄ŋ, mā o̍ sɔ̍lā wɔ̍ tɔ̄nɔ̄ pɔ̍mbɔ̄ lēni᷄ŋ nda̍ŋ, ō vi̍ū ma̍ŋ te̍ yɛ̍, le̍nde̍ ya̍ I̍ to̍sā ni̍ŋ a̍ bu̍ɛ̍i̍yāā nīa̍a̍ ni̍. I̍ tɛ̍ɛ̍mbūū ni̍ŋ nda̍ kpo̍u̍ le̍, I̍ cho̍ ā ti᷄ŋ chīīndīāā.

⁹I̍ cho̍ wāŋnda̍ I̍sɔ̄lūɛ̄ī, a̍ wānāa̍ fu̍la̍ o̍ pūlāle̍ Chu̍dāle̍ŋ chōo̍ wa̍ sa̍la̍ dɔ̄wɔ̄ɔ̄. Wāŋnda̍ ha̍ā le̍ nda̍ lɛ̄ŋndē nīle̍ ŋ̄pēmbūle̍ŋ lē wā ni̍ŋ ni̍. Wāŋnda̍ ha̍ā, wānāā nīa̍a̍ ya̍ I̍ hɛ̍li̍ wa̍ nda̍ chō ni̍. Nda̍ cha᷅l ni̍ŋ o̍ fo̍ndāa̍ ho̍ō ni̍, ndu̍yɛ̍ mā sāāŋgi̍a̍l la̍.

¹⁰Wānāā nīa̍a̍ ha̍ā, ya̍ Mɛ̍lɛ̄ka̍ nda̍ wā ni̍ŋ sōōlūūwo̍ ni̍. Ndu̍yɛ̍, lɛ̄ŋndē dɛ̍ŋgbɛ̍le̍ŋ o̍ pēmbo᷄ŋ tɛ̍ɛ̄ŋ Si̍a̍lɔ̄ŋ, le̍ si̍mnūŋ ni̍ŋ nāa̍ sāa̍ ndāa̍ ā kūā di̍o̍la̍ŋ nda̍, o̍ ko̍ŋ kɔ̍ɔ̍lī, mī lɛ̄ŋndē dɛ̍ŋgbɛ̍le̍ŋ o̍ pēmbo᷄ŋ A̍kɔ̍ɔ̄ le̍ si̍mnu᷄ŋ nāa̍ nāūwāā ndāa̍ ā kūā pɛ̍ŋgīo̍o̍ wa̍.

¹¹“Kɛ̍ nya̍ kɛ̍ɛ̍ ya̍ Mɛ̍lɛ̄ka̍ Ya̍a̍wɛ̄ɛ̄ wa̍ ki̍nɛ̍i̍, nya̍ kɛ̍ɛ̄ ha̍ā Pēmbīī Sa̍a̍yɔ̄ŋnde̍, pēmbīī nīī kāsīe̍i̍, ndu̍yɛ̍ mi̍ lā mūli᷄ŋ Ka̍a̍dī, a̍ Mɛ̍nī, mɛ̄lɛ̄ka̍ā kāŋ sōōlūūwo̍, le̍ dɛ̍nɛ̍ kɛ̍ndɔ̄ɔ̍ ndu̍yɛ̍ a̍ le̍ tɔ̍ɔ̍ sɔ̄lāa̍ wa̍, ī ve᷅ ni̍ŋ le̍nde̍ a̍ nya̍ le̍.

¹²Nya̍ nya̍ I̍ chi̍i̍ ni᷅ŋ kɛ̄ɛ̄sīāā, le̍ mī lā sɔ̄la̍ pīɔ̍mndo̍ a̍ mūɛ̄ī fāŋnde̍. Nya̍ kpo̍u̍ ā chō nya̍ hūnɔ̄ɔ̄ dīū. Kāni̍ fo̍ndōle̍, I̍ ve̍e̍lu̍ nya̍ kɛ̍ lā mūli̍ ya̍ dīōm te̍. Mi̍ su̍a̍ā nāa̍ nya̍ chūā, kɛ̍ lā ye᷄ŋ ya̍ lānī le̍. Sɔ̄ɔ̍ŋ ya̍ Mɛ̍lɛ̄ka̍ chūa̍ māā sɔ̄ɔ̍ŋ wɔ̍ɔ̍ŋndo̍ŋ ndo̍ŋ, mu̍ŋ ko̍ni̍ nya̍ chō hīōūwɔ̄ɔ̄ lāchī a̍ tōsāa̍ ni̍, mī lā tōsā sɔ̍ɔ̍ŋ ya̍ Mɛ̄lɛ̄ka̍ hi̍nī kɔ᷅l te̍ wo̍ŋ.”

¹³Le̍la̍ŋ nyɛ̄ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̍ndōo̍ ō dīmi̍ wo̍ cho̍ ho̍ō ni̍. Ō dīmi̍ āā, “Bu̍ɛ̍i̍yāā nīa̍a̍ ā wā ni̍ŋ nyɛ̄ dīa̍a̍ dīo̍o̍, kɛ̍ mī yīa̍a̍ŋ mā nɛ̄ī nya̍ wānāā dɛ̍nɛ̍ wɔ̍ɔ̍ŋnda̍. Bu̍ɛ̍i̍yāā nīa̍a̍ ā wā ni̍ŋ ko̍lɔ̄ɔ̍, kɛ̍ mī nya̍ wa̍ a̍ bo̍lōlā vēsɛ̍i̍la̍ŋ. Nda̍ wā ni̍ŋ a̍ nya̍a̍lo̍o̍, kɛ̍ mī nya̍ wā a̍ si̍ɔ̍mbu̍la̍ŋ.

¹⁴Bu̍ɛ̍i̍yāā nīa̍a̍ ā wā ni̍ŋ cho̍ndo̍ŋ a̍ kɔ̄l kɛ̄ndɛ̄ nda̍ nɔ̄ ni̍ŋ ndo̍, kɛ̍ mī nya̍ chāŋ a̍ kɔ̄ltā tāmbɛ̍i̍la̍ ko̍māl ni̍ŋ nya̍ la̍ŋ. Lā wā ni̍ŋ ko̍ŋu̍llo̍ chōo̍ cho̍o̍ kpe̍le̍ŋ, a̍ kɔ̄l tāmbɛ̍i̍ bɛ̍ndu̍ ko̍māl ni̍ŋ nya̍ wo̍.

¹⁵Dīōlā nyāla̍ŋ, la̍ŋ wānāā nīa̍a̍ ā chūā ni̍ŋ ni̍ māā tāāmāsi̍, le̍ wāŋnda̍ sēndi̍la̍ŋ hāndɔ̄ɔ̍ chōo̍. Ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, I̍ chō nya̍ dīū kpo̍u̍. Kɛ̍ bu̍ɛ̍i̍yāā nīa̍a̍ nda̍, mī ke̍ nda̍ dīōlā sɛ̄nɛ̄īlā chēle̍ŋ.

¹⁶Wānā o̍ wāna̍ cho̍ o̍ lɛ̄ŋnde̍ŋ nde᷅ŋ ni᷄ŋ mbō hu᷄ŋ ye̍e̍mā sa̍lāa̍ pɛ̍, ya̍ Mɛ̍lɛ̄ka̍ Ya̍a̍wɛ̄ɛ̄ wāna̍ tōnya̍a̍, ya̍ wānā ko̍ŋ ō nyūnā ni̍ŋ ni̍, le̍ mī dɔ̍ū ndu̍ sa̍lā. Ndu̍yɛ̍ tē wānā o̍ wāna̍ o̍ wa̍ bu̍ŋgɛ̄i̍ chūa̍a̍ o̍ lɛ̄ŋnde̍ŋ nde᷅ŋ ni᷄ŋ pɛ̍, le̍ nyɛ̄ o̍ nyɛ̄ tōsāa̍, o̍ ya̍ Mɛ̍lɛ̄ka̍ tōnya̍a̍ wānā ko̍ŋ ō mēnāŋ ni̍ŋ ni̍. Kāni̍ fo̍ndōle̍, dɛ̍nɛ̍la̍ pa̍lāāla̍ ko̍ma̍l wāŋnda̍ o̍ pāāndōo̍ ni̍ŋ nda̍ŋ ki̍nɛ̍i̍, ā chō hūnɔ̄ɔ̄ pūɛ̄ɛ̄nɔ᷄ŋ a̍ la̍ŋ pɔ̍lī. Kāni̍, I̍ cho̍ tōsā mī dɛ̍nɛ̍la̍ pa̍lāālā lāŋ lā fāŋa̍ŋ kpo̍u̍.”

¹⁷Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “I̍ cho̍ fo̍ndāŋ ndā sɛ̄nɛ̄īla̍ŋ to̍o̍sīāā o̍ ha̍la̍a̍ ni᷄ŋ chōo̍ cho̍o̍, a̍ chi̍e̍ēŋ sɛ̄nɛ̄īyo̍. Sɔ̄ɔ̍ŋ yɔ̍nu̍ŋ o̍ pāāndōo̍ ni᷄ŋ ndo̍ŋ ki̍nɛ̍i̍, wāŋnda̍ chō hūnɔ̄ɔ̄ pūɛ̄ɛ̄nɔ᷄ŋ a̍ mu̍ŋ o̍kɔ̄ɔ̄, wānā o̍ wānā yi̍yāŋ ndɛ̍ ni̍ŋ a̍ mu̍ŋ o̍kɔ̄ɔ̄ le̍.

¹⁸Lā wa̍ a̍ kɔ̄l kɛ̄ndɛ̄, ndu̍yɛ̍ mī lā ndɔ̄ɔ̄nu᷄ŋ nya̍a̍le̍ le̍ te̍le̍ŋ o̍ te̍le̍ŋ, a̍ nyɛ̄ ya̍ I̍ to̍sa̍ wo̍. I̍ to̍sa̍ Chūlu̍sɛ̄lɛ̄m chi̍e̍e̍ kɔ̄l kɛ̄ndɛ̄ bɛ̄ndōo̍, ndu̍yɛ̍ wānāā ndūa̍a̍ ā chō a̍ nya̍a̍lo̍o̍.

¹⁹Ya̍ Mɛ̍lɛ̄ka̍ pīla̍ bɛ̍ɛ̍ I̍ cho̍ hūnɔ̄ɔ̄ kɔ̄l nāŋɔ̄ɔ̄ a̍ Chūlu̍sɛ̄lɛ̄m, ndu̍yɛ̍ a̍ wānāā ndūa̍a̍. Cha᷄ŋ o̍ cha̍ŋ o̍ ve᷅ lɛ̍ ni̍ŋ lo̍ŋ te̍, ndu̍yɛ̍ kɔ̄l tāmbɛ̍i̍ ve᷅ ni̍ŋ vɛ̍lɛ̄ lo̍ŋ te̍.

²⁰Chɛ̄lɛ̄kpɛ̍ o̍ chɛ̄lɛ̄kpɛ̍ vi̍lūŋ ndɛ̍ ni̍ŋ Chūlu̍sɛ̄lɛ̄m, mbō vī ō lēndē le̍. Ndu̍yɛ̍ wānā o̍ wānā o̍ ke̍lēŋā ni̍ŋ wu̍ le̍, mɛ̄ɛ̍ mbō chīŋa̍ wɔ̄sīlā ndɔ̄la̍ŋ sɔ̍dɔ̍. Wāŋndo̍ ō chīī ni̍ŋ wɔ̍sīla̍ŋ kɛ̄mɛ̄, mbō wānu̍ŋ ndɔ̍ che̍che̍ŋ. Tē wāŋndo̍ ō chīŋa̍ wɔ̍sīla̍ŋ kɛ̄mɛ̄ le̍ mbō vī, mɛ̄ɛ̍ yɔ̄ŋ wɔ̄ɔ̍ŋndo̍ o̍ to̍sa̍ ni̍, nyɛ̄ kōŋ ya̍ I̍ chu̍a̍ yōōmū ndɔ̄ɔ̍ ni̍.

²¹Wāŋnda̍ ā tāŋgūl ni̍ŋ chi̍ɛ̍īlā ndāla̍ŋ Chūlu̍sɛ̄lɛ̄m mī nda̍ pi̍la̍ ā wānu̍ŋ o̍ chīɛ̄īlā ndāla̍ŋ ni᷄ŋ. Ā tōsā ni̍ŋ kpe̍le̍la̍ ndāla̍ mākīle̍pīi̍la̍ŋ, mā dē kīle̍pīi̍ma̍ nda᷄ŋ.

²²Wānā o̍ wānā o̍ te̍ŋgūl lɛ̍ ni̍ŋ chi̍ɛ̍ī ndɔ̄ɔ̍, mī wānā che᷅le̍ŋ ndo̍ hu̍ŋ chu̍ā chīɛ̄ī kōŋ mbō wa̍ lēni᷄ŋ te̍. Wānā o̍ wānā o̍ to̍sā lɛ̍ ni̍ŋ kpe̍le̍ ndɔ̄ɔ̍, mī wānā che᷅le̍ŋ ndo̍ hu̍ŋ di̍ō le̍. I̍ cho̍ tōsā mī wānāā nīa̍a̍ ā vīōū yōōmū, to̍fa̍ wɔ̍ ko̍, mɛ̄ɛ̍ yɔ̄mnde̍ ī vīāū nu̍a̍ā īsīsi̍ yɛ̍. Wānāā nīa̍a̍ ya̍ I̍ hɛ̍li̍ wa̍, ā wānūŋ ni̍ŋ ndo̍ŋ, ndu̍yɛ̍ mā dē wa̍lta̍ ndāla̍ nda̍ tōsa̍ la̍ŋ tɔ̄nɔ̄, le̍ te̍le̍ŋ vi̍lɛ̄ī.

²³Wa̍li̍ o̍ wa̍li̍ nda̍ tōsā ni̍ŋ a̍ bālā ndāla̍ŋ, ō ve᷅ ni̍ŋ sa̍ŋgā fo̍ndō le̍. Ndu̍yɛ̍ chūāūwāā ndāa̍ nda̍ vīālū ni̍ŋ nda̍ bɛ̍ɛ̍, dɛ̍nɛ̍ pa̍lāā ō ko̍māl ni̍ŋ o̍ pi̍lɛ̍ le̍. Kāni̍ fo̍ndōle̍, wānāā ya̍ Mɛ̍lɛ̄ka̍ Ya̍a̍wɛ̄ɛ̄ du̍a̍ū sa̍lā wa̍, chūāūwāā ndāa̍ nda̍ wā ni̍ŋ ni̍.

²⁴Lɔ̍ɔ̍pa̍ bɛ̍ɛ̍ mā nyūna̍ ya̍ dīōm le̍ nyɛ̄ o̍ nyɛ̍ nda̍ hāu̍ bā, I̍ chi̍ī ni̍ŋ nda̍ kē. Tē ā wa̍ ya̍ pīɛ̄īle̍ŋ le̍ nda̍ mālāa̍ pɛ̍, ā cho̍ chi̍ī pīɛ̄īle̍ŋ te̍ mī mu̍li̍ nda̍ dīōm.

²⁵Vīsīāā bīyāa̍ nda̍ sāā fɔ̍ŋndu̍a̍a̍, ā wānūŋ ni̍ŋ di̍o̍la̍ŋ nāa̍ pi᷅lɛ̍, ndu̍yɛ̍, mī kpɔ̍kūŋnda̍ ā wa̍ bīllo̍ dīo̍o̍ mɛ̄ɛ̍ nāūwa̍ ā dīā nu̍a̍ā yɛ̍. Kɛ̄ūwa̍ nyɛ̄ ndā di̍a̍a̍, ndu̍ wa᷅ ni̍ŋ chu̍ndo̍o̍ ni̍, ā yɔ᷅ŋ ni̍ŋ wa̍nā nyɛ᷅ o̍ nyɛ̄ le̍. O̍ pēmbīī kāsīe̍i̍ Sa̍a̍yɔ̄ŋ cho̍o̍ kpo̍u̍, nyɛ̄ o̍ nyɛ̄ ve᷅ ni̍ŋ lo̍ŋ, mbō yɔ᷄ŋ chāa̍ŋ ndɔ̍ nyɛ̄ le̍, kɛ̄lɛ̄ŋgāā ni᷅ŋ te̍, mī nyɛ̄ o̍ nyɛ̄ tɛ̄ɛ̄mbu̍u̍ chāa̍ŋ ndɔ̄.”