Read Southern Kisi Āīsa̍yā 66 Bible Online

Āīsa̍yā 66 - Southern Kisi bible

Āīsa̍yā 66

¹Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Ɛ̄chɛ̍nɛ̄, lo̍ŋ kpe̍ŋgbe̍i̍ ni̍ lēmāsāa̍ ō chō ni̍. Chi̍e̍ēŋndo̍ ndu̍ cho̍ māchūāā nāa̍ nīāā kɛ̍sīāā ŋ̄pēlū. Tē o̍ wa̍ yɛ̄ le̍nde̍ pɛ̍, chīɛ̄ī māāvɛ̄ɛ̍nɛ̍ nya̍ tāŋgūl lɛ̍ mbo̍ wa̍ lētūu̍ le̍ ya̍? Ɔ̍ɔ̄ fo̍nda̍ wa᷅ le̍tu̍u̍, le̍ ya̍ mī cha̍l lo̍ŋ ndo̍?

²Ō cho̍ a̍ bālā nīla̍ŋ te̍ ya̍ to̍o̍si̍a̍a̍ ɛ̄chɛ̍nɛ̄ a̍ chi̍e̍ēŋndo̍ le̍? Ya̍ Mɛ̍lɛ̄ka̍, wānāā ya̍ I̍ hi̍ni̍ kɔ̄l a̍ nda̍ wa̍ nda̍ cho̍ ha̍ā ni̍, wānāa̍ tu̍si̍ŋ to̍o̍lō, ndu̍yɛ̍ mi̍ nyīɛ̍ɛ̍ye̍ wā nda̍ le̍ nyɛ̄ nda̍ tōsa̍ wo̍ wa̍, ndu̍yɛ̍, ma̍ nɔ̄ sīōōŋīī nīi̍, mā tōsā nyɛ᷅ ya̍ I̍ di̍mūl nda̍ wo̍ wa̍.

³“Wāŋnda̍ ma᷄l nɛ̄i̍ nūu̍, ma̍ wā hɛ̄na᷄ŋ ndāa̍ tōsāa̍, mā nāŋ kɔ̍l le̍ sɔ̄ɔ̍ŋ wɔ̍ɔ̍ŋ ya̍ Mɛ̄lɛ̄ka̍ tu᷄l yɛ̄le̍ŋ tūl bɛ̍ndōo̍ wo̍ŋ tōsāa̍. Tē wāŋndo̍ dīī nāūwo̍ mbō sōli̍ ndu̍ sa̍lāa̍ o̍ ya̍ lo̍ pɛ̍, ō mūli̍ŋ vɛ̍lɛ̄ ō kɔ̍ di̍ī wāna̍ chi̍e̍e̍ ō so̍lī ndu̍ sa̍lāa̍. Tē ō sōli̍ sāa̍ sa̍lāa̍ o̍ ya̍ lo̍ pɛ̍, ō mūli̍ŋ vɛ̍lɛ̄ ō kɔ̍ yo᷅m tūŋndo̍ kɛ̄se̍i̍ ō sōli̍ ndu̍ sa̍lāa̍. Tē ō sōli̍ sa̍lā tɔ̄lɔ̄ɔ̄ ku̍llo̍ o̍ ya̍ lo̍ pɛ̍, ō mūli̍ŋ vɛ̍lɛ̄ ō kɔ̍ so̍lī kōo̍ma̍ pēūwo̍ sa̍lāa̍. Tē ō lōm nyɛ̄m chūŋ kɛ̄ndɔ᷄ŋ o̍ ya̍ lo̍ pɛ̍, ō mūli̍ŋ vɛ̍lɛ̄ ō kɔ̍ so̍o̍lūū nyɛ̄m chēle̍ŋndo̍ŋ.

⁴Le̍ he̍ī, I̍ cho̍ dɛ̍nɛ̍ pa̍lāa̍ nūūwā o̍ bɛ̍nda̍ le̍ nda̍ wo̍, mī tu̍si̍ ndu̍ nda̍ chōo̍. Dɛ̍nɛ̍ pa̍lāā nda̍ wo̍ wō bɛ̄ndōo̍ māā ō tu̍āl nda̍ chōo̍ le̍ wo̍, ndu̍ kpe̍e̍kpe̍i̍ ya̍ I̍ cho̍ nda̍ tūsī chōo̍ ni̍. Kāni̍ fo̍ndōle̍, I̍ ve̍e̍lu̍ nda̍, kɛ̍ ā mūli̍ le̍. Mi̍ su̍a̍ā nāa̍ nda̍ chūā kɛ̍ ā ye᷄ŋ ya̍ lānī le̍. Sɔ̄ɔ̍ŋ ya̍ Mɛ̍lɛ̄ka̍ chūa̍ māā sɔ̄ɔ̍ŋ dɛ̍nɛ̍ wɔ̍ɔ̍ŋndo̍ŋ ndo̍ŋ, mu̍ŋ ko̍ni̍ nda̍ hīāū lāchī a̍ tōsāa̍ ni̍, o̍ ko̍ŋ kɔ̍ɔ̍lī, mā tōsā sɔ̍ɔ̍ŋ ya̍ hi̍nī kɔ᷅l te̍ wo̍ŋ.”

⁵Lā ya᷄ŋ ni᷅la̍ŋ mī lā tūēī nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍, nya̍ nɔ̍ sīōōŋīi̍ Mɛ̄lɛ̄kɛ̍i̍, mī lā tōsā nyɛ᷅ o̍ di̍mī wo̍ wa̍. Ō dīmi̍ āā, “Le̍ mɛ̄ɛ̍ nya̍ tōl nɛ̄i̍ nūu̍ kɔ̄ɔ̄lī, mī lā tōsā nyɛ᷅ ya̍ I̍ di̍mūl nya̍ le̍ tōsāa̍ wo̍ yɛ̍, wānāya᷅ŋ nyāa̍ŋ kpe̍e̍kpe̍i̍, ma̍ lo̍ o̍ ko̍ŋ ma̍ tūl nya̍ yɛ̄le̍ŋ, ā chi̍ɛ̍ɛ̄li̍āŋ bɛ̍ɛ̍ a̍ nya̍ le̍. Ā chō nya̍ māmɔ̄ɔ̍, mā dīmūl nya̍ āā, ‘Mɛ̄lɛ̄ka̍ Ya̍a̍wɛ̄ɛ̄ o̍ chɔ̍m ndɔ̍ ni̍ko̍ kpa̍āya̍ ndɔ̄ bɛ̍ndōo̍, mbō chīīndi̍a̍a̍ nya̍, na̍a̍ kpo̍u̍ mī ŋ̄ chē nya̍ mī lā dɔ̄ɔ̄nu᷄ŋ nya̍a̍le̍.’ Kɛ̍ wānāa̍ cho̍ nya̍ ha̍ā māmɔ̄ɔ̍ wa̍, si̍ɔ̍mbu̍la̍ŋ lā chō nda̍ hūnɔ̄ɔ̄ bīyɔ̄ɔ̄.

⁶Lā ya᷄ŋ ndɔ̍ ni᷅la̍ŋ, mī lā tūēī bɔ̄ɔ̄lūū bɛ̄ndu̍ cho̍ sūɛ̍i̍ o̍ chi̍e̍e̍ bɛ̍ndōo̍ ni᷄ŋ ndo̍. Lā tūe̍i̍ yɔ̍ bɔ̍ɔ̍lūu̍ cho̍ sūɛ̍i̍ o̍ chīɛ̍i̍ Mɛ̄lɛ̄ka̍a̍ ni᷄ŋ ndo̍. Mɛ̄lɛ̄ka̍ Ya̍a̍wɛ̄ɛ̄ cho̍ ya̍a̍mɔ̍ɔ̍wa̍a̍ ndūa̍a̍ nyɛ̄ pālāa̍ tūsīo̍o̍ ni̍.

⁷“Ī yɔ̄nu̍ŋ ko̍ a̍ Chūlu̍sɛ̄lɛ̄m, mɛ̄ɛ̍ wāna̍ yo᷄llo̍ te̍le̍ŋ ndɔ̄ vi̍a̍lāa̍ ō fūūlūū nu̍a̍ā, pūli̍i̍ nɛ̍ī ndu̍ le̍, mbō vēlū le̍nde̍ yɔ̍kɔ̄bɔ̄ yɛ̍.

⁸Kāni̍ bɛ̍ɛ̍, ō nɛ̄ɛ̍nɛ̍ tu̍e̍ī yɛ̄ ni᷅ŋ mi̍ ī wāā le̍nde̍ i̍ yɔ̄nu᷄ŋ? Ō nɛ̄ɛ̍nɛ̍ che᷅ yɛ̄ ni̍ŋ mi̍ ī wāā le̍nde̍ i̍ yɔ̄nu᷄ŋ? Kāni̍ bɛ̍ɛ̍, lɛ̄ŋnde̍ŋ lē kāndu̍ŋ ni᷅ŋ, o̍ pāa̍le̍ŋ lēpīlɛ̍ ni᷄ŋ, mi̍ lē sīmnu᷄ŋ lɛ᷅ŋnde̍ŋ a̍ bā ndɔ̍? Kāni̍ bɛ̍ɛ̍, wānā tu̍e̍ī ni᷅ŋ mi̍ lɛ̄ŋnde̍ŋ lē kāndu̍ŋ mi̍ lē sīmnu᷄ŋ bɛ̍ɛ̍ le̍lɛ᷅ŋ o̍ te̍le̍ŋ bi̍ŋgī bɛ̄ŋgu̍? Sāko̍. Kɛ̍ Sa̍a̍yɔ̄ŋ ndu̍ ndu̍, ī chō yɔ̄nɔ᷄ŋ le̍nde̍ a̍ ndu̍. Ō sa̍ŋgā ni̍ŋ mɛ̄ɛ̍ wānā la̍nɔ̍ɔ̍ ō sāŋgā nu̍a̍ā o̍ vīōlɔ̄ɔ̍ ni᷄ŋ yɛ̍ le̍.

⁹Lā yīya̍ŋ, māā tē lɛ̄ŋnde̍ŋ nde᷅ŋ lē hīŋ le̍ vīōlɔ᷄ŋndo̍ pɛ̍, I̍ ku̍u̍nā le̍ŋ māā lē vi̍a̍lu᷄ŋ te̍? I̍ to̍sā ke̍ŋ te̍.” Nyɛ̄ Mɛ̄lɛ̄ka̍ nyāa̍ ō dīmi̍ wo̍ ndu̍ cho̍ ko̍ŋ ni̍.

¹⁰Nya̍ kpo̍u̍, nya̍ ka̍a̍la̍ Chūlu̍sɛ̄lɛ̄m nda̍, lā dɔ̄ɔ̄nu᷄ŋ nya̍a̍le̍ a̍ Chūlu̍sɛ̄lɛ̄m la̍tu̍lu̍, ndu̍yɛ̍ mī lā tōsa̍ kɔ̄l kɛ̄ndɔ̄ɔ̍ a̍ ndu̍ la̍tu̍lu̍. Lā dɔ̄ɔ̄nu̍ŋ nya̍a̍le̍ a̍ ndu̍ la̍tu̍lu̍, nya̍ wānāa̍ bi̍ī mɔ̍nɛ̍i̍ o̍ kɔ̄ltā nyāla̍ŋ ni᷄ŋ le̍ ndu̍ wa̍ kpo̍u̍.

¹¹Chūlu̍sɛ̄lɛ̄m o̍ cho̍ nya̍ kɔ̄lta̍ŋ nyɔ̄ɔ̄lū, mbō tōsa̍ mī lā hīni̍ kɔ̄l. Ō bīī ni̍ŋ nya̍ ko̍, mɛ̄ɛ̍ kāla̍ chūa̍a̍ ō bīī nu̍a̍ā chɛ̄lɛ̄kpɛ̍ ndɔ̄ɔ̍ yɛ̍. Lā chō hūnɔ̄ɔ̄ nyɛ̄m ndɔ̄ɔ̍ŋ kɛ̍ndɔ᷄ŋ sɔ̄lā, ndu̍yɛ̍ mī lā dē sūl ndɔ̄ɔ̍ tɔ̄nɔ̄.

¹²Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ cho̍ ho̍ō ni̍. Ō dīmi̍ āā, “I̍ cho̍ tōsā mī kɔ̄l nyūlū fɛ̍ɛ̍ŋ a̍ fɛ̍ɛ̍ŋ ndo̍ ō wa̍ Chūlu̍sɛ̄lɛ̄m, mɛ̄ɛ̍ pīo̍o̍ ō wā nu̍a̍ā ō ve̍lā le̍ yɛ̍. Sūlta̍ŋ o̍ lɛ̄ŋnde̍ ni᷄ŋ, lā wā ni̍ŋ mɛ̄ɛ̍ pīo̍o̍ ō hīāū nu̍a̍ā ō ki̍o̍lū kɔ̍ɔ̍lī le̍ yɛ̍. Mɛ̄ɛ̍ kāla̍ chūa̍a̍ ō bīī nu̍a̍ā chūā ndɔ̄ɔ̍, wɛ̄sīo̍o̍ ndu̍, mbō bīī ndu̍ o̍ chōŋgu̍, tē ko̍ŋ te̍, ō kɛ̄si̍ŋ ndu̍ o̍ bɛ̄ŋgu̍ yɛ̍, le̍nde̍ ya̍ I̍ bi̍ī ni̍ŋ nya̍ ni̍.

¹³Mɛ̄ɛ̍ kāla̍ chūa̍a̍ ō dɛ̄ɛ̄nīāā nu̍a̍ā chɛ̄lɛ̄kpɛ̍ ndɔ̄ɔ̍ yɛ̍, le̍nde̍ ya̍ I̍ dɛ̄ɛ̄ni̍a̍a̍ ni̍ŋ nya̍ ni̍. Nya̍ wāŋnda̍ Chūlu̍sɛ̄lɛ̄m, I̍ cho̍ nya̍ kɔ̄lta̍ŋ dɛ̄ɛ̄nīāā.

¹⁴Ndu̍yɛ̍ lā chō sɔ̄ɔ̍ŋ mu᷅ŋ chɔ̄ mī ŋ̄ yɔ̄nu̍ŋ, o̍ ko̍ŋ mī lā na᷄ŋ kɔ̄l. Sɔ̄ɔ̍ŋ mu᷅ŋ chō tōsā mī lā sɔ̄la̍ dīāllūŋ kāla᷄ŋ, ndu̍yɛ̍ mī lā sɔ̄lā kɛ̍ndi̍a̍a̍. Wānā o̍ wānā cho̍ hūnɔ̄ɔ̄ chɔ̄, māā ya̍ Mɛ̍lɛ̄ka̍ Ya̍a̍wɛ̄ɛ̄, bā nūu̍ chō nya̍ bu̍ɛ̍i̍yāā nīa̍a̍ chōo̍, kɛ̍ ya̍a̍mɔ̍ɔ̍wa̍a̍ nīa̍a̍ nda̍ nda̍, mi̍ wa᷅ a̍ tu̍mbe̍ bɛ̍ndo̍o̍ a̍ nda̍.”

¹⁵Mɛ̄lɛ̄ka̍ Ya̍a̍wɛ̄ɛ̄ o̍ cho̍ hūnɔ̄ɔ̄ a̍ yīŋnde̍ŋ. Ō wā ni̍ŋ hu̍nɔ̄ɔ̍ a̍ nyɛ̄lā su̍a̍a̍ ā nāŋ nda̍ŋ, mɛ̄ɛ̍ hūēīyīī tɔ̍ɔ̍mɛ̍i̍ bɛ̄ndūe̍i̍ ī wā nu̍a̍ā hūnɔ̄ɔ̍ a̍ kpāāyā bɛ̍ndo̍o̍ yɛ̍. Ō chō hūnɔ̄ɔ̄ tu̍mbe̍ dɔ̍ɔ̍nɔ᷄ŋ a̍ ya̍a̍mɔ̍ɔ̍wa̍a̍ ndūa̍a̍, mbō tūsi̍ nda̍ nyɛ̄ pālāa̍ chōo̍. Ō chō nda̍ hūnɔ̄ɔ̄ nyɛ̄ pālāa̍ tūsī chōo̍ a̍ yīŋndē wūle̍ wu᷅le̍ le̍ŋ.

¹⁶Mɛ̄lɛ̄ka̍ Ya̍a̍wɛ̄ɛ̄ o̍ cho̍ hūnɔ̄ɔ̄ wāŋnda̍ kpo̍u̍ nyɛ᷅ pālāa̍ tūsī chōo̍ a̍ yīŋnde̍ŋ, ndu̍yɛ̍ a̍ mūɛ̄ī ndūɛ̍i̍ fāŋnde̍. Ō chō hūnɔ̄ɔ̄ wāŋnda̍ dīū ta̍u̍ ta̍u̍.

¹⁷Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Mɛ̄ɛ̄lu̍la̍ŋ lā chō fūūlūū le̍ wāŋnda̍ ha̍ā, wānāa̍ di̍ndī ha̍ā nda̍ pi̍la̍ le̍ nyɛ̄m chēle̍ŋndo̍ŋ sōōlūūwo̍ māā mɛ̄lɛ̄ka̍ā ndā wa̍. Wāŋnda̍ ha̍ā, ā chō kɔ̄la̍ŋ īkpɔ̄lɔ̄ kpɔ̄lūɛ̍i̍ o̍ kpe̍le̍la̍ ndāla̍ŋ ni᷄ŋ, kpe̍le̍la̍ nda̍ hɛ̄li̍ mi̍ lā wā te̍ŋge̍le̍ŋ le̍ kɔ̄la̍ŋ sōōlu̍u̍la̍ŋ lo̍ŋ, ndu̍yɛ̍ mā dīā vi̍sīŋ pēūwo̍ŋ, a̍ bɛ̄lla̍, o̍ ko̍ŋ kɔ̍ɔ̍lī, a̍ nyɛ̄m chēle̍ŋndo̍ŋ, ŋ̄ ya̍ I̍ di̍mi̍ māā ŋ̄ bɛ̄nda̍ le̍ di̍o̍ le̍ wo̍ŋ.

¹⁸I̍ si̍nā nyɛ᷅ nda̍ chō tōsāa̍ wo̍, ndu̍yɛ̍ I̍ si̍nā yi̍ya᷄ŋnda̍ ndāla̍ŋ. I̍ cho̍ hūnɔ̄ɔ̄ lɛ̄ŋnde̍ kpo̍u̍, ndu̍yɛ̍ a̍ wāŋnda̍ su̍u̍ o̍ su̍u̍ chu̍u̍ŋgīāā nāa̍ pi᷅lɛ̍. Nda̍ kpo̍u̍ ā chō chūūŋgi̍āŋ na̍a̍ pi᷅lɛ̍, mā hu᷄ŋ chɔ᷅ nāŋɔ̄ɔ̄ nī bɛ̍ndōo̍.

¹⁹I̍ cho̍ nda̍ tāāmāsi̍o̍o̍ chɔ̄m. “Wānāa̍ lo᷅ ni᷅ŋ yōōmū wa̍, I̍ cho̍ ā ti᷄ŋ yɔ̄ŋ o̍ lɛ̄ŋnde̍ ni᷄ŋ, ndi̍ yɔ̍nūŋ ni̍ māā Sīpe᷅ŋ, a̍ Li̍bīāā, a̍ Li̍dīāā, lɛ̄ŋnde̍ nɔ̍ wānāa̍ cha̍ā sɔ̍ŋgɔ̍ɔ̍ a̍ chīɔ̄ūla̍ŋ chāā bɛ̄ndōo̍ wa̍, a̍ Tu̍bāā, a̍ Ki̍li̍i̍sī, o̍ ko̍ŋ kɔ̍ɔ̍lī, a̍ lɛ̄ŋīī lēvīlle̍ kpo̍u̍. Wāŋnda̍ o̍ lɛ̄ŋnde̍ he̍ī ni̍ŋ, nda̍ tu̍i̍i̍ yɔ̍ a̍ sɔ̄ɔ̍ŋ bɛ̍ndūŋ ya̍ I̍ to̍sa̍ wo̍ŋ o̍kɔ̄ɔ̄ le̍, kɛ̄lɛ̄ŋgāā ni᷅ŋ te̍ mā chē nāŋɔ̄ɔ̄ nī bɛ̍ndōo̍. Wānāa̍ lo᷅ ni̍ŋ ha̍ā yōōmū mī yɔ̍ŋ nda̍ o̍ lɛ̄ŋnde̍ he̍ī ni᷄ŋ nda̍, nda̍ chō lākɔ̄ wāŋnda̍ o̍ lɛ̄ŋīī kēŋ ni᷄ŋ di̍mūl a̍ ya̍ o̍kɔ̄ɔ̄ ni̍.

²⁰Chāāŋāā nyāā I̍sɔ̄lūɛ̍i̍ya̍a̍ lo̍ yōōmū, ma̍ wā o̍ lɛ̄ŋnde̍ he̍ī ni᷄ŋ nda̍, wāŋnda̍ ha̍ā cho̍ hūnɔ̄ɔ̄ a̍ nda̍ o̍ pēmbīī nīī kāsīe̍i̍ chōo̍ Chūlu̍sɛ̄lɛ̄m ni̍. Chāāŋāā nyāā I̍sɔ̄lūɛ̍i̍ya̍, ā ti᷄ŋ ā wā ni̍ŋ hu̍nɔ̄ɔ̍ o̍ su̍a̍a̍ chōo̍, mī ha̍ā hīŋ o̍ chɔ̄lūāā yɛ̄yi̍i̍ mu̍ūli̍āŋnda̍ chōo̍, a̍ o̍ nyɔ̍mi̍a̍a̍ chōo̍. O̍ ko̍ŋ kɔ̍ɔ̍lī, ā ti᷄ŋ ā hūŋ ni̍ŋ o̍ nyɛ̄lā su̍a̍a̍ ā nāŋ nda̍ŋ ni᷄ŋ, a̍ o̍ nyɛ̄lā nyāāna᷄ŋ nda̍ŋ lā pīlɛ̍ la̍ŋ ni᷄ŋ. Mɛ̄ɛ̍ nya̍ I̍sɔ̄lūɛ̍i̍ya̍ hūŋ nu̍a̍ā, a̍ tɔ̄lɔ̄ɔ̄lā nyāla̍ŋ o̍ nyɛ̄m lāāndu᷄ŋ cho̍ ŋ̄ dīāndāā ya̍ o̍ hɔ̄l lo̍ŋ ni᷄ŋ, le̍ la̍ŋ yɔ̄ŋgōo̍ o̍ ya̍ lo̍ māā lākē yɛ̍, le̍nde̍ nda̍ hūŋ ni̍ŋ a̍ chāāŋāā nyāā I̍sɔ̄lūɛ̍i̍ya̍ ha̍ā ni̍.

²¹Ndu̍yɛ̍ wānāa̍ mi̍i̍ŋgū ni̍ŋ ha̍ā wa̍, I̍ cho̍ ā ti᷄ŋ sīīŋgūū wānāā nīāā so̍līāā lāsa̍lā, mī si̍i̍ŋgu̍u̍ ā ti᷄ŋ Li̍va̍īya̍.”

²²Mi̍ Mɛ̄lɛ̄ka̍ Ya̍a̍wɛ̄ɛ̄ hi̍a̍ū lāchī a̍ sūɛ̍i̍ mbo̍ dīmī āā, “Mɛ̄ɛ̍ fo̍ndāŋndā sɛ̄nɛ̄īla̍ŋ chōo̍ cho̍o̍, a̍ chi̍e̍ēŋ sɛ̄nɛ̄ī ya̍ I̍ to̍o̍sīāā ni̍ŋ ndo̍ lā wā ni̍ŋ le̍ fɛ̍ɛ̍ŋ a̍ fɛ̍ɛ̍ŋ yɛ̍, le̍nde̍ wānāa̍ fu̍lā ni̍ŋ o̍ pūlālē nyāle̍ŋ chōo̍ wa̍ ā wā ni̍ŋ wa̍nāā nī le̍ fɛ̍ɛ̍ŋ a̍ fɛ̍ɛ̍ŋ ni̍, ndu̍yɛ̍ mī dīōlā nyāla̍ŋ bɛ̍ɛ̍ la̍ wa̍ o̍ chi̍e̍ēŋndo̍ chōo̍ le̍ fɛ̍ɛ̍ŋ a̍ fɛ̍ɛ̍ŋ.

²³Bɔ̄ŋa᷅ŋndā pāŋgi̍i̍ sɛ̍nɛ̄īla̍ŋ ni̍, bɔ̄ŋa᷅ŋndā pālɛ̍i̍ nīī pɛ̍ŋgīɛ̍i̍ ni̍, tē pālɛ̍i̍ ke̍ŋ ī fūūlu̍u̍ pɛ̍, wāŋnda̍ kpo̍u̍, a̍ wā ni̍ŋ hu̍nɔ̄ɔ̍ Chūlu̍sɛ̄lɛ̄m na̍nu̍ŋ le̍ ya̍ sōōlūūwo̍, nyɛ̄ ya̍ Mɛ̄lɛ̄ka̍ Ya̍a̍wɛ̄ɛ̄ di̍mi̍ wo̍ cho̍ ko̍ŋ ni̍.

²⁴Tē ā chīi̍ pɛ̍ mā wa̍ mīīŋgōo̍, ā kūā ni̍ŋ ma̍ chē wānāa̍ si̍mūl la̍ ha̍ā wā īhīni̍ a̍ vi̍lɛ̍i̍ya̍. Dōndo̍po᷅llāa̍ di̍ā ni̍ŋ wa᷅ŋnda̍ ha̍ā wa̍, ā vi᷅ le̍, yīŋnde̍ lu̍ām ni̍ŋ nda̍ le̍ŋ bɛ̍ɛ̍, lē nyu᷅m kpo̍so̍ŋ te̍. Ndu̍yɛ̍, wānā o̍ wānā wa᷅ ni̍ŋ hi̍ōūwɔ̄ɔ̍, ā ye̍e̍mā ni̍ŋ le̍ wānāa̍ si̍mu̍l la̍ ha̍ā wa̍ chɔ̄ɔ̍ ā vīlɛ̍i̍ya̍ le̍.”