Read Southern Kisi Āīsa̍yā 7 Bible Online

Āīsa̍yā 7 - Southern Kisi bible

Āīsa̍yā 7

¹Te̍le̍ŋ E̍ha̍a̍sī, po̍ Cho̍tāmndo̍ ō wa̍ māsā bɛ̍ndōo̍ Chu̍dā wo̍, ndu̍ yɔ̍nūŋ māā po̍ ma᷅ma̍ Yūsa̍yā wo̍ ni̍, mi̍ Lu̍ɛ̍sīŋ, o̍ wa̍ māsā bɛ̍ndōo̍ Si̍i̍līāā wo̍, nda̍ Pɛ̍kā, po̍ Lūɛ̄ma̍līāā wo̍, ma̍ kɔ̍ de᷅l Chūlu̍sɛ̄lɛ̄m chōo̍ a̍ sɔ̍ŋgɔ̄ɔ̍. Kɛ̍, ā nɔ̍la̍ Chūlu̍sɛ̄lɛ̄m bīyɔ̄ɔ̄ le̍.

²Mɛ̄ɛ̍ māsāa̍ Chu̍dā o̍ tu̍e̍ī māā, pūa̍a̍ chɔ̄ūwa̍ Si̍i̍līāā, a̍ ha̍ā I̍sɔ̄lūɛ̄ī, a̍ dɔ̍u̍nu᷄ŋ na̍a̍ pi᷅lɛ̍ le̍ nda̍ hūnɔ̄ɔ̍ dēlɔ̄ɔ̍ chōo̍, ndu̍ ni̍, a̍ wānāā ndūa̍a̍ mi̍ sīōōŋīī bɛ̄ndūe̍i̍ ī bīī nda̍, ma̍ nyīīyā kpa᷅ kpā. Mɛ̄ɛ̍ yɔ̄mndo̍ ō wā nu̍a̍ā hīīlɔ᷄ŋndo̍, tē hūēīye̍ ī wa̍ hɔ̄ŋndo̍ pɛ̍ yɛ̍.

³O̍ ko̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Āīsa̍yā āā, “Nūm ni̍, Sīāāka̍a̍sī Cha̍si̍u̍bī po̍ nu̍m ni̍, lā chɔ᷄ŋ mī lā kūɛ̄ nāa̍ Māsāa̍ E̍ha̍a̍sī chu̍a̍ a̍ yōōŋgōo̍ ho̍ō. Lā chō ndu̍ kōmāl o̍ fo̍ndā nda̍ tōōsi̍a̍a̍ le̍ mɛ̄ŋnda̍ŋ kēēkōo̍ lo̍ŋ mī mā kūā o̍ fo̍ndāŋ māmɛ̄ŋndo̍ mālūāŋ ndo̍, o̍ nɛ̄i̍ wāŋnda̍ ā kēēkū le̍ kɔ̄la̍ŋ o̍ fo̍ndā tōōsīāā lākōlāa̍ wo̍.

⁴Tē lā kūɛ̄ pɛ̍ lā dīmu̍l ndu̍ māā ō mānda̍ŋ. Ō sīmu̍l kɔ᷅llo̍ yi̍. Sīōōŋīī bi̍ī ndu̍ mī kɔ̄l ndɔ̄ɔ̍ ō hīīlu̍ŋ le̍ Māsāā ŋi̍ɔ̍ɔ̍ŋnda̍ ha̍ā le̍. Māsāa̍ Lu̍ɛ̍sīŋ ni̍, pūa̍a̍ Si̍i̍līāā ni̍, a̍ Māsāa̍ Pɛ̍kā, tu̍mbe̍ nda̍ dɔ̄ɔ̄nu᷄ŋ ndo̍, ō chō māchūāā mɛ̄ɛ̍ kīlīo̍ŋ ŋ̄ wā nu̍a̍ā o̍ yīŋ ŋ̄mūu̍ŋ mī ŋ̄ hīŋ ni̍ŋ le̍ chūwɔ̄ɔ̍ ŋɔ̄ɔ̍ yɛ̍.

⁵Tōnya̍ kpe̍e̍kpe̍i̍ i̍ cho̍ ni̍, māā wāŋnda̍ ha̍ā ā yīi̍ nya̍ de̍fo̍o̍ le̍ nya̍ dēlɔ̄ɔ̍ chōo̍.

⁶Ā bīī ma̍ dīmu̍la᷅ŋ māā, lā ŋ̄ kɔ̄nu᷅ŋ mī ŋ̄ kɔ̍ de᷅l lɛ̄ŋndē Chu̍dāle̍ŋ chōo̍. Ŋ̄ kɔ̍ to̍sāŋ mī sīōōŋīī bɛ̄ndūe̍i̍ bīī wāŋnda̍ Chu̍dā, mī ŋ̄ yēm lɛ̄ŋndē Chu̍dāle̍ŋ mī lē wa̍ le̍ na̍a̍. O̍ ko̍ŋ, mī ŋ̄ hɛ̄li̍ po̍ Ta̍bīī wo̍ mī ŋ̄ kɛ̄si̍ ndu̍ Māsāa̍ lo̍ŋ.

⁷“Kɛ̍ nyɛ̄ ya̍ Mɛ̄lɛ̄ka̍ Ya̍a̍wɛ̄ɛ̄ di̍mi̍ wo̍ cho̍ ho̍ō ni̍. Nyɛ̄ o̍ nyɛ̄, wāŋnda̍ ha̍ā ā kɛ̄ɛ̄si̍a̍a̍ ō si᷅m te̍. Ndu̍yɛ̍ ō yɔ̍nūŋ te̍.

⁸Kāni̍ fo̍ndōle̍, lɛ̄ŋndē Si̍i̍lūīāle̍ŋ kpo̍u̍ kpāāya̍ ndɔ̄ɔ̍ ko̍ cho̍ Dāma̍si̍kɔ̍ɔ̄ ni̍, o̍ cho̍ chi̍e̍e̍ le̍bo᷅llo̍ wo̍. Dāma̍si̍kɔ̍ɔ̄ yɛ̍, kpāāya̍ ndɔ̄ɔ̍ ko̍ni̍ cho̍ Māsāa̍ Lu̍ɛ̍sīŋ ni̍. I̍sɔ̄lūɛ̄ī yɛ̍, o̍ wɔ̄sīla̍ŋ be̍le̍ ŋɔ̍mpu᷅m a̍ lā ŋūɛ̍ɛ̍nu̍ bɛ̍ŋgu̍, ō chō hūnɔ̄ɔ̄ wā ō tɛ̄ɛ̄mbāā kpo̍u̍, ō ve᷅ lɛ̍ lēlɛ̄ŋ te̍.

⁹I̍sɔ̄lūɛ̄ī kpāāya̍ ndɔ̄ɔ̍ kpo̍u̍ ko̍ni̍ cho̍ Sāme̍e̍līāā ni̍, o̍ cho̍ chi̍e̍e̍ le̍bo᷅llo̍ wo̍. Sāme̍e̍līāā yɛ̍, kpāāya̍ ndɔ̄ɔ̍ ko̍ni̍ cho̍ Māsāa̍ Pɛ̍kā ni̍. “Tē lā dōu̍ tīīnda᷄ŋ nyāa̍ ō kālā ka̍lā o̍ ya̍ ni̍ŋ te̍, lā cho̍ nɔ̍lā mī lā si᷄m te̍.”

¹⁰O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ yɔ᷅ŋ yōōŋgū chēle̍ŋ nāa̍ Māsāa̍ E̍ha̍a̍sī chu̍a̍, sa̍na̍a̍ a̍ wāna̍ su̍a̍ā le̍ Mɛ̄lɛ̄ka̍ wo̍. Mbo̍ dīmūl E̍ha̍a̍sī āā,

¹¹“Nyu̍na̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nūmndo̍ mbō chɔ᷄m nu̍m tāāmāsi̍o̍o̍ a̍ sɔ̄ɔ̍ŋ mu᷅ŋ o̍kɔ̄ɔ̄. Ā yɔ̍ŋ bɛ̍ɛ̍ māā tāāmāsi̍ o̍ cho̍ nu̍m chɔ̄m ndo̍, māā sūɛ̍i̍ nɔ̍ mī ī yɔ̄nu̍ŋ o̍ fo̍ndāŋ yīŋgi̍lɛ̍i̍ bɛ̍ndōo̍ o̍ wāŋ vīlɛ̍i̍ya̍ lo̍ chi̍e̍e̍ ni̍, ɔ̄ɔ̄ sūɛ̍i̍ nɔ̍ mī ī yɔ̄nu̍ŋ o̍ fo̍nda᷄ŋ Mɛ̄lɛ̄ka̍a̍ chōo̍ cho̍o̍ ni̍, nyu̍na̍ ndu̍ mbō chɔ᷄m nu̍m.”

¹²Kɛ̍ mi̍ E̍ha̍a̍sī di̍mī āā, “I̍ cho̍ nyu̍nā le̍ tāāmāsi̍ le̍. I̍ ye̍e̍ma̍ mī tɔ̍ɔ̍nda̍ŋ Mɛ̄lɛ̄ka̍ Ya̍a̍wɛ̄ɛ̄ le̍.”

¹³Mi̍ Āīsa̍yā lo᷅ o̍ ko̍ŋ mbo̍ dīmūl ndu̍ āā, “E̍ha̍a̍sī, lā ya᷄ŋ ni᷅la̍ŋ mī lā tūēī, nya̍ fu̍la̍ ha̍ā o̍ pūlāle̍ Dēēve̍le̍ŋ chōo̍ wa̍. Lā tōsa̍ mi̍ wāŋndā chīe̍e̍ya̍ ā sāŋgā a̍ bīūwɔ᷄ŋndo̍. Bāā lā yēēma̍ mī lā tōsa̍ mī Mɛ̄lɛ̄ka̍ nūu̍ bɛ̍ɛ̍ ndu̍ sa̍ŋga̍ vɛ̄lɛ̄ a̍ bīūwɔ᷄ŋndo̍?

¹⁴Mɛ̄ɛ̍ ŋ̄ dīmi̍ māā a̍ cho̍ Mɛ̍lɛ̄ka̍ nyūnā le̍ tāāmāsi̍ le̍ yɛ̍, mɛ̄ɛ̍ Māsānɔ̄ɔ̍ Mɛ̄lɛ̄ka̍ pi̍la̍ o̍ cho̍ nu̍m tāāmāsi̍o̍o̍ chɔ̄m. Tāāmāsi̍ ko̍ŋ cho̍ ho̍ō ni̍. Wānā la̍nɔ̍ si̍nā wɔ̍ su̍ɛ̍i̍ wānā pɔ̍nɔ̍ le̍ wo̍, ō chō yo᷄llo̍ chūā mbō vēlū pōo̍. Po̍ o̍ cho̍ ko̍ŋ vi̍o̍lɔ̄ɔ̄ wo̍ ā chō ndu̍ dīōla̍ŋ kē āā, Īma̍a̍nūɛ̄l.

¹⁵Bōōndi̍i̍ pōo̍mbɔ̄ɔ̍ ho̍ō chō hūnɔ̄ɔ̄ sūlɔ̄ɔ̄ mbō sīna̍ ni᷅ŋ īkɛ̄ndɛ̄i̍ a̍ īwɔ̄ɔ̍ŋnde̍ ve̍, nyɛ̄ ndɔ̄ dīa̍a̍ wa᷅ ni̍ŋ mɛ̍ɛ̍mā nāūwa̍ŋ a̍ līa̍a̍ŋ ni̍.

¹⁶Kɛ̍ lɔ̍ɔ̍pa̍ mī pōo̍mbɔ̄ɔ̍ ho̍ō ō hu᷄ŋ su᷅l, mbō sīna̍ īkɛ̄ndɛ̄i̍ a̍ īwɔ̄ɔ̍ŋnde̍, māsāā ŋi̍ɔ̍ɔ̍ŋāā nya̍ chō ha̍ā sīōōŋnde̍ le̍ nda̍ wa̍, lɛ̄ŋīī ndɛ̄i̍ ī chō wā ī tɛ̄ɛ̄mbāā kpo̍u̍ mī ī sīmnu᷄ŋ pɔ᷅mnda̍ŋ.

¹⁷“Nūm ni̍, wānāā nūmnda̍ ni̍, a̍ wānāa̍ fu̍la̍ o̍ yu̍ŋgu̍ lēmāsāa̍ chōo̍ wa̍ ki̍nɛ̍i̍, Mɛ̄lɛ̄ka̍ Ya̍a̍wɛ̄ɛ̄ o̍ cho̍ nya̍ hūnɔ̄ɔ̄ nyɛ̄ pālāā bɛ̄ndōo̍ tūsī chōo̍. Nyɛ̄ pālāā Mɛ̄lɛ̄ka̍ tūsī ni̍ŋ nya̍ chōo̍ wo̍, chɔ̍ŋ a̍ te̍le̍ŋ lɛ̄ŋndē I̍sɔ̄lūɛ̍i̍le̍ŋ lē pīɔ̄ūwa᷅ŋ tɛ̍ɛ̄ŋ mi̍ lē sīmnu᷄ŋ lɛ᷅ŋnde̍ ī ŋīi̍ŋ, I̍sɔ̄lūɛ̄ī a̍ Chu̍dā wo̍, mbo̍ bīya᷅ŋ a̍ te̍le̍ŋndo̍ ho̍ō, dɛ̍nɛ̍ pa̍lāā wāā le̍nde̍ o̍ tu̍l lɔ̍ le̍lɛ᷅ŋ o̍ lēlɛ̄ŋ chōo̍ le̍. Mɛ̄lɛ̄ka̍ Ya̍a̍wɛ̄ɛ̄ o̍ cho̍ tōsā mī Māsāa̍ Āsi̍i̍līāā o̍ hi᷅ŋ a̍ pūa̍a̍ ndūa̍a̍ chɔ̄ūwa̍ mbō hu᷄ŋ chi᷅ŋa̍la᷅ŋ nya̍ a̍ sɔ̍ŋgɔ̍ɔ̍.

¹⁸“Tē te̍le̍ŋ ko̍ŋ ō fūūlu̍u̍ pɛ̍, Mɛ̄lɛ̄ka̍ Ya̍a̍wɛ̄ɛ̄ o̍ cho̍ pūa̍a̍ chɔ̄ūwa̍ I̍chi̍pi̍ vēēlū o̍ hūēīye̍ ni᷄ŋ, a̍ cho̍ ha̍ā māā pēŋgi̍a̍a̍ ku̍ndāā bɛ̄ndū wa̍, mā chɛ᷄ŋ nāa̍ nda̍ chō o̍ pēēla̍ le̍vi̍lta̍ŋ kɔ̄ŋgɔ̍ I̍chi̍pī wa̍ mā hīŋ. O̍ ko̍ŋ kɔ̍ɔ̍lī, ō chō pūa̍a̍ chɔ̄ūwa̍ Āsi̍i̍līāā vēēlū, pūa̍a̍ cho̍ māā līāā ku̍ndāā bɛ̄ndū wa̍ mā hīŋ.

¹⁹Nda̍ kpo̍u̍ ā chō hūnɔ̄ɔ̄ mā hu᷄ŋ ti̍ū o̍ dɛ̍ŋgbɛ̍la̍ cho̍ o̍ pēmbo᷄ŋ tɛ̄ɛ̄ŋ nda̍ŋ ni᷄ŋ, a̍ o̍ būūlūla̍ cho̍ o̍ pōūta̍ŋ tɛ̄ɛ̄ŋ nda̍ŋ ni᷄ŋ, o̍ ko̍ŋ kɔ̍ɔ̍lī, a̍ o̍ fo̍ndāŋnda̍ ŋ̄yɔ̄la̍ŋ, ndu̍yɛ̍ a̍ o̍ fo̍ndāŋndā chɔ̄lūa̍a̍ ā kūā di̍o̍la̍ŋ nda̍ŋ kpo̍u̍.

²⁰“Tē te̍le̍ŋ ko̍ŋ ō fūūlu̍u̍ pɛ̍, Māsānɔ̄ɔ̍ Mɛ̄lɛ̄ka̍ chō Māsāa̍ Āsi̍i̍līāā hīōūwɔ̄ɔ̄ kɔ̄ɔ̄lī mbō chūa̍ ndu̍ o̍ Pēē Bɛ̍ndōo̍ Yūfi̍lu̍a̍tīī le̍kɔ̍ɔ̍lī, mbō hīŋ a̍ ndu̍, mbō sīīŋgu̍u̍ ndu̍ māā wānā se̍ndīāā, le̍ nya̍ nyɛ̄ pālāā tūsīo̍o̍ chōo̍. Ō chō nya̍ hūnɔ̄ɔ̄ yu̍ŋgu̍lta̍ŋ sēndī, mbō sēndi̍ nya̍ sīɛ̍i̍yo̍ŋ, o̍ ko̍ŋ kɔ̍ɔ̍lī, yīīŋndo̍ŋ nya̍ lēkɔ̄ɔ̍ kpo̍u̍ mbō sēndi̍, le̍ nya̍ bɛ̄ɛ̄la̍ŋ tɛ̄ɛ̄mbūūwo̍.

²¹“A̍ te̍le̍ŋ ko̍ŋ, wāŋndo̍ mɛ̄ɛ̍ le̍ nāū fɔ̍ŋndɔ̍ɔ̍ ō pīlɛ̍ a̍ sāa̍ a̍ ŋīɔ̍ɔ̍ŋ mā lo̍ ndu̍ o̍ bā.

²²Kɛ̍ chɔ̄lūa̍a̍ lo᷅ ndu̍ ni̍ŋ ka̍ŋ o̍ bā wa̍, mɛ̄ɛ̄mā chɔ̄lūāā mā o̍ sɔ̍lā ni̍ŋ o̍ ndā ni᷄ŋ le̍ wāa̍ māā nyɛ̄ ndɔ̄ di̍a̍ā wa̍ŋ, mā wā ni̍ŋ ha̍a̍a̍, o̍ he̍ū ni̍ŋ ba̍ le̍ mɛ̄ɛ̄mā chɔ̄lū o̍ mɛ̄ɛ̄mā chɔ̄lū mā chēle̍ŋ te̍. Wānā o̍ wānā lo᷅ ni̍ŋ o̍ lɛ̄ŋnde̍ŋ nde᷅ŋ ni᷄ŋ, nda̍ kpo̍u̍ nyɛ̄ ndā di̍a̍a̍ ndu̍ wa᷅ ni̍ŋ mɛ̍ɛ̍mā chɔ̄lūa̍ŋ a̍ līa̍a̍ŋ ni̍.

²³“Tē te̍le̍ŋ ko̍ŋ fūūlu̍u̍ pɛ̍, kpe̍le̍la̍ mākīle̍pīi̍la̍ kɛ̍ndɛ̄ kɛ̍ndɛ̄la̍ŋ kpo̍u̍, lā chō hūnɔ̄ɔ̄ tāmbu̍. Kpe̍le̍ nɔ̍ ni̍ŋ kīle̍pīi̍ye̍ bɛ̄ŋgu̍la̍ŋ wāa̍ ō pīlɛ̍ lēni᷄ŋ, mbō sōlī ka̍ni̍ŋ hu̍mbu᷄ŋ wāa̍ o̍ pi᷅lɛ̍ wo̍, ō chō hūnɔ̄ɔ̄ tāmbu̍, mbō sīmnu᷄ŋ fo̍ndāŋ ŋ̄yɔ̄ɔ̍ kpo̍so̍ŋ.

²⁴Ō chō sīmnɔ᷄ŋ fo̍ndāŋ dōōsūa̍a̍ ā kūā dōōsūle̍ŋ a̍ chīɔ̄ūlā ndāla̍ŋ, ndu̍yɛ̍ a̍ chīŋɔ̍ma̍ nda̍ŋ ndo̍. Lɛ̄ŋnde̍ŋ nde᷅ŋ kpo̍u̍, lē chō hūnɔ̄ɔ̄ tāmbu̍, mī lē sīmnu᷄ŋ fo̍ndāŋndā ŋ̄yɔ̄la̍ŋ kpo̍so̍ŋ.

²⁵Pēmbūŋ wāŋnda̍ nda̍ a̍a̍ to̍sā wa̍lta̍ ŋ̄chīɛ̄ɛ̄la̍ŋ lēcho̍ō wo̍ŋ kpo̍u̍, ŋ̄ chō hūnɔ̄ɔ̄ sīmnɔ᷄ŋ fo̍ndāŋndā ŋ̄yɔ̄la̍ŋ, nāa̍ wānā ku̍ē lɛ̍ bɛ̍ɛ̍ le̍ wa̍. Ŋ̄ chō hūnɔ̄ɔ̄ sīmnɔ᷄ŋ nāa̍ nāūwa̍ a̍ sāa̍ ā kūā di̍o̍la̍ŋ nda̍.”