Read Southern Kisi Āīsa̍yā 8 Bible Online

Āīsa̍yā 8 - Southern Kisi bible

Āīsa̍yā 8

¹Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl la̍ āā, “Chu̍a̍ nyɛ᷅ bānā bānā nda̍ pōōnyīāā cho̍o̍ wo̍ mā po̍o̍nyi̍a̍a̍ dīōla̍ŋ ndāŋ lēchōo̍, pōōnyīa̍a̍ la̍ŋ do̍kōlō dōkōlō āā, Māhɛ̄ɛ̄-sīālāl-hāsība̍sī.”

²O̍ ko̍ŋ, mi̍ ve̍e̍lū wāŋnda̍ ā ŋīɔ̍ɔ̍ŋ, wānāā wānā nɔ̍lā mā ti̍i̍nda̍ŋ, nda̍ yɔ̍nūŋ ni̍ māā Yūla̍yā, wānā so̍līāā lāsa̍lāa̍ nda̍ Sɛ̄kāla̍yā, po̍ Chɛ̄bɛ̄lu̍ɛ̍chīāā wo̍, le̍ mā wa̍ yā īkɛ̄i̍ māā lāse̍ī, o̍ dīōla̍ŋ nda᷅ŋ pōōnyīa̍a̍ ni᷄ŋ.

³Mɛ̄ɛ̍ te̍le̍ŋ ti̍ŋ hīōū, mi̍ la̍a̍ nūu̍ chūā yo᷄llo̍. O̍ ko̍ŋ kɔ̍ɔ̍lī, mbo̍ vīālū wānā pɔ̍nɔ̍ɔ̍. Mɛ̄ɛ̍ o̍ ve̍lū, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl la̍ āā, “Ke̍ chɛ̄lɛ̄kpɔ̍ɔ̍ ho̍ō dīōla̍ŋ āā, ‘Māhɛ̄ɛ̄-sīālāl-hāsība̍sī.’

⁴Lɔ̍ɔ̍ pa̍ mī pōo̍mbɔ̄ɔ̍ ho̍ō ō sūl mbo̍ chāā ndēla̍ŋ a̍ kɛ̄kɛ̍la̍ŋ vēēlōo̍, sūl o̍ sūl cho̍ Dāma̍si̍kɔ̍ɔ̄ chi̍e̍e̍, ndu̍yɛ̍ a̍ nyɛ̄ o̍ nyɛ̍ cho̍ Sāme̍e̍līāā, Māsāa̍ Āsi̍i̍līāā o̍ cho̍ hūnɔ̄ɔ̄ lākɔ̄ŋnɔ᷄ŋ a̍ mu̍ŋ kpo̍u̍.”

⁵O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā vɛ̄lɛ̄ nāa̍ ya̍ chu̍a̍.

⁶Mbo̍ dīmūl la̍ āā, “Tē ō wa̍ māā īsɔ̄ɔ̍ pɛ̍, mɛ̄ɛ̍ mɛ̄ŋnda̍ŋ Sīlo̍wā o̍ pēēlo̍ ma̍ hi̍a̍ū nu̍a̍ā bɛ̍ɛ̍ŋ bɛ̍ɛ̍ŋ yɛ̍, le̍nde̍ ya̍ I̍ cho̍ wāŋnda̍ ha̍ā māndāa̍ ni̍. Kɛ̍ ma̍ lō o̍ ko̍ŋ ma̍ kɛ̄ɛ̄ māndā ya̍ I̍ cho̍ nda̍ wo̍, ma̍ dūāūnu̍ŋ si̍o̍o̍ŋīī bɛ̄ndūe̍i̍ le̍ Māsāa̍ Lu̍ɛ̍sīŋ, nda̍ Māsāa̍ Pɛ̍kā, mā nyīīyā kpa᷅kpā a̍ sīōōŋīī ndɛ̄i̍.

⁷Le̍ he̍ī, I̍ cho̍ tōsā mī Māsāa̍ Āsi̍i̍līāā nda̍ pūa̍a̍ ndūa̍a̍ chɔ̄ūwāā kpāāyāā bɛ̍ndūa̍a̍ ā hu᷄ŋ de᷅l nda̍ chōo̍. Mɛ̄ɛ̍ mɛ̄ŋmā hūna᷄ŋ mā chāŋ nu̍a̍ā o̍ Pēē Bɛ̍ndōo̍ Yūfi̍lu̍a̍tīī mī mā hīŋ a̍ kpāāyā bɛ̍ndōo̍ yɛ̍, le̍nde̍ nda̍ hūŋ ni̍ŋ ni̍. Mɛ̄ɛ̍ mɛ̄ŋnda̍ŋ mā hūŋ nu̍a̍ā hūnɔ̄ɔ̄ bɛ̄ndōo̍ o̍ pēēlo̍, mī mā tīu̍ a̍ o̍ kɔ̄ŋgɔ̍la̍ŋ kpo̍u̍ yɛ̍, le̍nde̍ pūa̍a̍ chɔ̄ūwa̍ Āsi̍i̍līāā a̍ hu᷅ŋ ni̍ŋ ni̍, mā tīu̍ bā o̍ bā fe̍e̍.

⁸Ā chō hūnɔ̄ɔ̄ mā hu᷄ŋ mi̍ōl lɛ̄ŋndē Chu̍dāle̍ŋ chɔ̍ŋgɔ̍mu̍, mɛ̄ɛ̍ mɛ̄ŋmā hūna᷄ŋ mā chūā nu̍a̍ā fo̍ndāa̍, mī mā lo̍ hūnɔ̄ɔ̍ mī mā bīī wāŋnda̍ o̍ bo̍lōla̍ŋ kpe̍ŋ yɛ̍.” Ō nda̍ vēēlū āā Īma̍a̍nūɛ̄l wo̍, ya̍a̍mɔ̍ɔ̍wa̍ ha̍ā ā chō hūnɔ̄ɔ̄ lɛ̄ŋndē ndɔ̄le̍ŋ chūā kpo̍u̍, chɔ̍ŋ kpe̍ŋgēi̍ pīlɛ̍i̍ mbō kūɛ̄ kpēŋgēi̍ pīlɛ̍i̍.

⁹Nya̍ wāŋnda̍ o̍ lɛ̄ŋnde̍ ni᷄ŋ, mɛ̄ɛ̍ o̍ mɛ̄ɛ̍ nya̍ yēēma̍ le̍ bɛ̄ɛ̄ndīa̍ŋndo̍ pɛ̍, lā bɛ̄ɛ̄ndi̍a̍ŋ le̍ sɔ̍ŋgɔ̄ɔ̍. Kɛ̍ lā sīna̍ māā lā chō hūnɔ̄ɔ̄ wā ā tɛ̄ɛ̄mbāā kpo̍u̍. Lā ya᷄ŋ ni᷅la̍ŋ, nya̍ wāŋnda̍ o̍ lɛ̄ŋīī lēvīlle̍ ni᷄ŋ kpo̍u̍ mī lā tūēī. Lā bɛ̄ɛ̄ndi̍a̍ŋ kpe̍e̍kpe̍i̍ le̍ sɔ̍ŋgɔ̄ɔ̍. Kɛ̄ ndu̍yɛ̍ mɛ̄ɛ̍ o̍ mɛ̄ɛ̍ nya̍ bɛ̄ɛ̄ndi̍a̍ŋ, lā chō hūnɔ̄ɔ̄ wā ā tɛ̄ɛ̄mbāā. Lā bɛ̄ɛ̄ndi̍a̍ŋ kpe̍e̍kpe̍i̍, kɛ̄ lā sīna̍ māā lā chō wā ā tɛ̄ɛ̄mbāā kpo̍u̍.

¹⁰Lā cha᷄l mī lā tūu̍ nyɛ̄ kɛ̄ndɛ̍ī. Kɛ̄ ndu̍yɛ̍ nyɛ̄ o̍ nyɛ̄ nya̍ tūu̍, fo̍ndō fu̍u̍ ko̍ni̍, lā cho̍ ba̍ tīū le̍. Kɛ̄ɛ̄sīāā o̍ kɛ̄ɛ̄sīāā nya̍ nɔ̄ pɛ̍, lā kɛ̄ɛ̄si̍a̍a̍. Kɛ̄ lā sīna̍ māā nyɛ̄ o̍ nyɛ̄ nya̍ kɛ̄ɛ̄si̍a̍a̍ ō cho̍ la̍si̍si̍ le̍, fo̍ndōle̍, Mɛ̄lɛ̄ka̍ chō a̍ na̍a̍ lātūlu̍.

¹¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā nāa̍ ya̍ chu̍a̍ ā kpāāya̍ ndɔ̄ bɛ̍ndōo̍, mbo̍ sīlā ya̍ māā ya̍ I̍ tu̍āl nɛ̄i̍ wāŋnda̍ ā pīli̍a̍a̍ ā chō chōo̍ wo̍ kɔ̄ɔ̄lī le̍. Mbo̍ dīmūl la̍ āā,

¹²“Nyɛ̄ o̍ nyɛ̄ wāŋnda̍ ha̍ā ā chūa̍ pɛ̍ māā de̍fe̍ yi̍yāā, nūm chu̍ā ndu̍ māā de̍fe̍ yi̍yāā le̍. Nyɛ̄ o̍ nyɛ̄ sīōōŋnde̍ wa̍ nda̍ pɛ̍ le̍ ndu̍, nūm sīōōŋīī bi̍ī nu̍m le̍ ndu̍ le̍. Sɔ̄ɔ̍ŋ nda̍ wo̍ wo̍ bɛ̄ndōo̍ pɛ̍, nūm wo᷅ mu̍ŋ te̍.

¹³Lo̍o̍nu̍ŋ māā ya̍ Mɛ̄lɛ̄ka̍ Ya̍a̍wɛ̄ɛ̄ nɔ̍ kpāāyāa̍ kpo̍u̍ wo̍, māā Mɛ̄lɛ̄ka̍ dīāndāa̍ ya̍ I̍ cho̍ ni̍. Ya̍ ŋ̄ nɔ̄ ni̍ mā wo̍. Le̍ ya̍ sīōōŋīī bɛ̄ndūe̍i̍ nɔ̄ ni̍ mī ī wa̍ nu̍m.

¹⁴O̍ ko̍ŋ, mī ya̍ Mɛ̄lɛ̄ka̍ mānda̍ nu̍m. Kɛ̍ wānāā ku̍ndālā tīɔ̍ɔ̍ŋnda̍ ha̍ā, nda̍ yɔ̍nūŋ ni̍ māā I̍sɔ̄lūɛ̄ī a̍ Chu̍dā, I̍ wa᷅ ni̍ŋ ma̍wa̍ā a̍ nda̍ mɛ̄ɛ̍ pōū wāŋnda̍ ā kēī ho̍ō bōŋīla̍ŋ le̍ te̍le̍ŋ o̍ te̍le̍ŋ ndo̍ ō chō yɛ̍.

¹⁵Mɛ̄ɛ̍ pōūwo̍ ō wā nu̍a̍ā le̍ te̍le̍ŋ o̍ te̍le̍ŋ wāŋnda̍ chō ndu̍ kēīyo̍ kōōnda᷅ŋndo̍ mā dēlī yɛ̍, le̍nde̍ ya̍ I̍ wa᷅ ni̍ŋ a̍ nda̍ ni̍. I̍ wa᷅ ni̍ŋ ma̍wa̍ā yāŋɔ̄ɔ̄le̍ŋ le̍ wāŋnda̍ Chūlu̍sɛ̄lɛ̄m. Ndu̍yɛ̍ wāŋnda̍ Chūlu̍sɛ̄lɛ̄m a̍ cho̍ hāū o̍ yāŋɔ̄ɔ̄le̍ŋ nde᷅ŋ.”

¹⁶Nya̍ bu̍ɛ̍īyāā nīa̍a̍, nya̍ nɔ̍ ni̍ mī lā mānda̍ yōōŋgūlā Mɛ̄lɛ̄ka̍ ke̍ nya̍ la᷅ŋ nda᷅ŋ nyɛ̄ kɛ̄ndɛ̄ kpi̍ŋ. Ndu̍yɛ̍, pɛ̄ɛ̄kūla̍ŋ nda᷅ŋ lā wa̍ nya̍ tɛ̄ɛ̄ŋ lɔ̍ɔ̍ o̍ lɔ̍ɔ̍.

¹⁷Mi̍ chē bɛ̍ɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ fa̍ŋā hɔ̄lāā ndūa̍a̍ o̍ yu̍ŋgu̍ Che̍kɔ̍pū wo̍ ni̍, kɛ̍ I̍ cho̍ tōfā nāa̍ ndu̍ chu̍a̍. I̍ cho̍ tīīnda᷄ŋ nūu̍ dɔ̄wɔ̄ɔ̄ o̍ ndu̍ ni̍ŋ.

¹⁸Mi̍ che᷄ŋ ya̍ na̍a̍ chūāūwāā Mɛ̄lɛ̄ka̍ ke̍ ya̍ wa̍. Mɛ̄lɛ̄ka̍ Ya̍a̍wɛ̄ɛ̄, o̍ nɔ̍ kpāāyāa̍ kpo̍u̍, mbo̍ wā īchāli̍ o̍ kpe̍ŋgbe̍i̍ ndɔ̍ lēmāsāa̍ chōo̍ o̍ Pēmbīī Sa̍a̍yɔ̄ŋnde̍ chōo̍ wo̍, ō yɔ᷄ŋ na̍a̍ le̍ mī ŋ̄ wa̍ nāa̍ wāŋnda̍ I̍sɔ̄lūɛ̄ī chu̍a̍ māā tāāmāsi̍la̍ ndɔ̄.

¹⁹Kɛ̍ tē wāŋnda̍ bīī pɛ̍, ā dīmu̍l nya̍ māā nya̍ nyūna̍ wa̍nāā vīāmāā lāyāwāa̍, a̍ wānāā ŋ̄wāŋ vīlɛ̍i̍ya̍, a̍ māndi̍a̍a̍, le̍ mā dīmu̍l nya̍ yōōŋgūla̍ŋ. Vɛ᷅ wāŋnda̍ ā nyu̍nā Mɛ̄lɛ̄ka̍ ndāa̍ dīōm te̍? Vɛ᷅ mā kūɛ̄ wāŋ vīlɛ̍i̍ya̍ dīōmndo̍ nyūnāa̍ le̍ wānāa̍ cho̍ yōōmū wa̍?

²⁰Lā chu̍a̍ pɛ̍ɛ̍kūla̍ Mɛ̄lɛ̄ka̍ Ya̍a̍wɛ̄ɛ̄ la̍ŋ, ndu̍yɛ̍ mī lā wa̍ o̍ chɛ̄la᷅ŋ o̍ to̍sa̍ a̍ nya̍ wo̍ chōo̍. Lā ya᷅ŋ nīla̍ŋ o̍ nyɛ̄ wānāā ŋ̄wāŋ vīlɛ̍i̍ya̍ a̍ nyɛ̄ wānāā vīāmāā lāyāwāa̍ ā dīmūl nya̍ wo̍ le̍, fo̍ndōle̍, nyɛ̄ o̍ nyɛ̄ nda̍ dīmu̍l nya̍, ō fe̍ŋa̍ nya̍ dɛ̍nɛ̍ pa̍lāa̍ chōo̍ le̍.

²¹Te̍le̍ŋ cho̍ fūūlūū, kɔ̄lta̍ŋ lā chō hūnɔ̄ɔ̄ wāŋnda̍ tāmbu̍, ndu̍yɛ̍ mī yīmā bɛ̄ndūa̍ŋ mā bīī wāŋnda̍. Wāŋnda̍ wā ni̍ŋ he̍e̍lōo̍ mā tūūsū o̍ lɛ̄ŋnde̍ŋ nde᷅ŋ ni᷄ŋ. Yīa̍a̍ŋ mā wā ni̍ŋ nda̍ kīndīlāa̍, o̍ ko̍ŋ kɔ̍ɔ̍lī, mā dɔ̄ɔ̄nu̍ŋ tu̍mbe̍, mā yēi̍ Māsa̍ ndā bɛ̍ndōo̍ a̍ Mɛ̄lɛ̄ka̍ ndāa̍. Ā hēēlū ni̍ŋ hɔ᷅lla̍ chōo̍

²²mā tūsi̍ lɛ̄ŋ, kɛ̍ ā sɔ̍lā ni̍ŋ pɛ̍ŋgī o̍ pɛ̄ŋgī le̍. Sɔ̄ɔ̍ŋ dɛ̍nɛ̍ pa̍la̍ŋ, a̍ sɔ̄ɔ̍ŋ kɔ̄l tāmbɛ̍i̍ yo̍ŋ, o̍ ko̍ŋ kɔ̍ɔ̍lī a̍ sɔ̄ɔ̍ŋ kpūndɛ᷅ŋ bɛ̄ndo᷄ŋ, mu̍ŋ ko̍ni̍ ŋ̍ wa᷅ ni̍ŋ nda̍ ŋ̄ bālāā ni̍. Ā chō hūnɔ̄ɔ̄ wā ā nyīndāā o̍ nyūmmā tīŋgīsi̍ma̍ bɛ̍ndūa̍ŋ ni᷄ŋ.