Read Southern Kisi Lɛ̄vi̍ti̍kɔ̍ɔ̄ 10 Bible Online

Lɛ̄vi̍ti̍kɔ̍ɔ̄ 10 - Southern Kisi bible

Lɛ̄vi̍ti̍kɔ̍ɔ̄ 10

¹O̍ ko̍ŋ kɔ̍ɔ̍lī, mi̍ pūa̍a̍ E̍lɔ̄ŋ nda̍ ā pīli̍a̍a̍, Na̍da̍bī nda̍ Ābi̍hū a̍ chu̍ā hɛ̄ŋgɛ̍i̍la̍ ndāla̍ nda̍ lūām nyɛ᷅m chūŋ kɛ̄ndɔ᷄ŋ lēni᷄ŋ nda̍ŋ, ma̍ dūāū yīŋnde̍ŋ lēni᷄ŋ, o̍ ko̍ŋ kɔ̍ɔ̍lī, ma̍ dūāū nyɛ̄m chūŋ kɛ̄ndɔ᷄ŋ lēchōo̍ ma̍ lūām, a̍ te̍le̍ŋ nda̍ a̍a̍ nɔ̍ mī nda̍ a̍a̍ lo᷅m mu̍ŋ te̍ wo̍ŋ. Mɛ̄ɛ̍ o̍ nɛ̄īyo̍ ho̍ō ni᷄ŋ ma̍ sōlī Mɛ̄lɛ̄ka̍ dīōm, kāni̍ fo̍ndōle̍, ma̍ lūām nyɛ̄m chūŋ kɛ̄ndɛ̄ŋ te̍ŋge̍le̍ŋ ndo̍ŋ o̍ Mɛ̄lɛ̄ka̍ Ya̍a̍wɛ̄ɛ̄ lo̍, ŋ̄ ndu̍ Mɛ̄lɛ̄ka̍ pi̍la̍ ndu̍ o̍o̍ tu̍u̍ le̍ mā lōm te̍ wo̍ŋ.

²Le̍ he̍ī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ yɔ᷅ŋ yīŋnde̍ŋ mi̍ lē hu᷄ŋ lo᷅m nda̍, nda̍ ŋi̍ɔ̍ɔ̍ŋ ma̍ wū Mɛ̄lɛ̄ka̍ o̍ hɔ̄l lo̍ŋ.

³Mi̍ Mūu̍sē o̍ lo᷅ o̍ ko̍ŋ mbo̍ dīmūl E̍lɔ̄ŋ āā, “Nyɛ̍ yɔ̍nu̍ŋ ho̍ō wo̍, nyɛ̄ Mɛ̄lɛ̄ka̍ Ya̍a̍wɛ̄ɛ̄ ndu̍ o̍o̍ yi̍ya̍ŋ māā ō chō hūnɔ̄ɔ̄ yɔ̄nɔ᷄ŋ ndo̍ ndu̍ pe̍e̍lu̍ŋ ho̍ō hāū la̍so̍ndō ni̍. Mbo̍ dīmī āā, ‘Wānā o̍ wāna̍ sɔ̍ɔ̍ŋgu̍u̍ ya̍ Mɛ̍lɛ̍ka̍ īkɛ̄i̍ pɛ̍, mɛ̄ɛ̍ mbō chu̍a̍ ya̍ māā Mɛ̄lɛ̄ka̍ dīāndāa̍ ya̍ I̍ cho̍ ni̍. Ndu̍yɛ̍ mī wāŋnda̍ kpo̍u̍ ā ke̍ ya̍ bɛ̄ɛ̄le̍ŋ māā ya̍ cho̍ Mɛ̄lɛ̄ka̍ ni̍.’ ” Kɛ̍ a̍ nyɛ̍ yɔ̄nu᷄ŋ ho̍ō wo̍ kpo̍u̍, E̍lɔ̄ŋ o̍ su̍u̍ nyɛ᷅ o̍ nyɛ̄ le̍.

⁴O̍ ko̍ŋ kɔ̍ɔ̍lī, mi̍ Mūu̍sē yɔ᷅ŋ le̍ pūa̍a̍ U̍sɛ̄ɛ̄l wa̍, E̍lɔ̄ŋ bōm ndɔ̄. Nda̍ yɔ̍nūŋ ni̍ māā Mɛ̍si̍a̍kī nda̍ Ɛ̄līsa̍fāŋ. Mbo̍ dīmūl nda̍ āā, “Lā hu᷄ŋ mī lā hu̍ŋ chu̍ā tōōŋgo̍o̍wa̍a̍ nyāā vi̍lɛ̍i̍ ya̍ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ chō a̍ nya̍ la̍tu̍lu̍ wo̍ ni᷄ŋ, mī lā sōli̍ nda̍ o̍ dɔ̍ɔ̍ŋgɔ̍ɔ̍ ho̍ō ni᷄ŋ.”

⁵O̍ ko̍ŋ, mi̍ Mɛ̍si̍a̍kī nda̍ Ɛ̄līsa̍pāŋ a̍ hu̍ŋ sa̍ā wānāā vīlɛ̍i̍ya̍ ha̍ā dōmāla̍ŋ, ma̍ chūā nda̍ ma̍ sōlī nda̍ o̍ dɔ̍ɔ̍ŋgɔ̍ɔ̍ ni᷄ŋ, mɛ̄ɛ̍ Mūu̍sē di̍mu̍l nda̍ yɛ̍.

⁶Mi̍ Mūu̍sē di̍mūl E̍lɔ̄ŋ nda̍ pūa̍a̍ ndūa̍a̍ ā pīli̍a̍a̍, nda̍ yɔ̍nūŋ ni̍ māā Ɛ̄li̍a̍a̍sā nda̍ I̍ta̍māā āā, “Tē lā wa̍ pūa̍a̍ ha̍ā cha᷄ŋ pɛ̍, lā sɛ̍ɛ̍sīa̍ŋ la̍nyɛ̍ lēkɔ̄ɔ̍ mī lā kɛ̄ɛ̍ īyīīŋ sāāndīāā le̍. Tē lā tōsa̍ le̍nde̍ pɛ̍, mɛ̄ɛ̍ nya̍ bɛ̍ɛ̍ lā chō pīɔ̍mndo̍ sɔ̄lā, ndu̍yɛ̍ mī Mɛ̄lɛ̄ka̍ Ya̍a̍wɛ̄ɛ̄ o̍ dɔ̍u̍nu᷄ŋ tu̍mbe̍ a̍ wānāā tūa̍a̍ kpo̍u̍. Wānāya᷅ŋ nyāa̍ŋ, wāŋnda̍ I̍sɔ̄lūɛ̄ī, nda̍ nda̍ ā chāŋ pu̍a̍a̍ ha̍ā le̍nde̍, pūa̍a̍ Mɛ̄lɛ̄ka̍ Ya̍a̍wɛ̄ɛ̄ pi̍la̍ o̍ tɛ̍ɛ̍mbu̍u̍ ha̍ā a̍ yīŋnde̍ŋ nda̍.

⁷Kɛ̍ nya̍ nya̍ lā nɔ̍ bɛ̍ɛ̍ mī lā fāŋa̍ŋ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ la̍tu̍lu̍ wo̍ sōndōo̍ le̍ pūa̍a̍ ha̍ā cha᷄ŋ te̍. Tē lā fāŋa̍ŋ lo̍ŋ pɛ̍, lā chō pīɔ̍mndo̍ sɔ̄lā. Kāni̍ fo̍ndōle̍, ā tāla̍ nya̍ chūɛ̄īma̍ Mɛ̄lɛ̄ka̍ Ya̍a̍wɛ̄ɛ̄ wa̍ŋ o̍ lēbōl, mi̍ lā wā ā hɛ̄līāā le̍ wa̍li̍ ndɔ̄ɔ̍.” O̍ ko̍ŋ, E̍lɔ̄ŋ ni̍, Ɛ̄li̍a̍a̍sā ni̍, a̍ I̍ta̍māā ma̍ tōsā mɛ̄ɛ̍ Mūu̍sē o̍ di̍mu̍l nda̍ yɛ̍.

⁸O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl E̍lɔ̄ŋ āā,

⁹“Nūm ni̍, pūa̍a̍ nu̍mnda̍ ni̍, tē lā wa̍ lūɛ̄īyɔ̄ɔ̍ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ la̍tu̍lu̍ wo̍ ni᷄ŋ pɛ̍, lā nɔ̍ mī lā ko᷄l māmūɛ̄ī, kɛ̄lɛ̄ŋgāā mī lā ko᷄l mūɛ̄īmā kālā ka̍lā le̍. Tē lā tōsa̍ ke̍ŋ pɛ̍, lā chō pīɔ̍mndo̍ sɔ̄lā. Ndu̍yɛ̍ sāwāa̍ ho̍ō ō cho̍ ko̍ le̍ nya̍ le̍, ō chō le̍ yu̍ŋgu̍la̍ fu̍lā ni̍ŋ o̍ nya̍ ni᷄ŋ nda̍ŋ, mbō kūɛ̄ le̍nde̍ a̍ lāchī kɛ᷅.

¹⁰Nya̍ nɔ̍ ni̍ mī lā chɔ᷄m yɛ̍ yi̍ɔ̍ɔ̍ nyɛ̍ cho̍ ō yɔ̄ŋa᷄ŋ o̍ ya̍ Mɛ̍lɛ̄ka̍ lo̍ wo̍ tɛ̄ɛ̄ŋ a̍ nyɛ̍ cho̍ o̍ yɔ̍ŋga᷄ŋ o̍ ya̍ lo̍ le̍ wo̍, ndu̍yɛ̍ mī lā chɔ᷄m yɛ̍ yi̍ɔ̍ɔ̍ nyɛ̍ cho̍ ō dīāndāā ya̍ Mɛ̍lɛ̄ka̍ o̍ hɔ̄l lo̍ tɛ̄ɛ̄ŋ, a̍ nyɛ̍ cho̍ o̍ di̍a̍ndāā ya̍ o̍ hɔ̄l te̍ wo̍.

¹¹O̍ ko̍ŋ kɔ̍ɔ̍lī, mī lā pɛ̄ɛ̄ku̍ wāŋnda̍ I̍sɔ̄lūɛ̍i̍, sāwāla̍ ya̍ Mɛ̍lɛ̄ka̍ ke̍ Mūu̍sē le̍ nda̍ la̍ŋ kpo̍u̍.”

¹²O̍ ko̍ŋ kɔ̍ɔ̍lī, mi̍ Mūu̍sē o̍ di̍mūl E̍lɔ̄ŋ nda̍ pūa̍a̍ ndūa̍a̍ lo̍ yōōmū wa̍, nda̍ yɔ̍nūŋ ni̍ māā Ɛ̄li̍a̍a̍sā nda̍ I̍ta̍māā āā, “Sa̍lā nyɛ̄ dīāā ku̍lu̍ lo̍mnu᷄ŋ o̍ ma̍āŋndo̍ chōo̍ ō ti᷄ŋ o̍ Mɛ̄lɛ̄ka̍ Ya̍a̍wɛ̄ɛ̄ lo̍ wo̍, lā chu̍a̍ o̍ tɔ̍ lo̍ wo̍ mī lā bɛ̄ɛ̄ndi̍a̍a̍ mī lā dē ndu̍ o̍ ma̍āŋndo̍ īkɛ̄i̍. Kɛ̍ lā du̍a̍ū yi̍i̍sīi̍ o̍ yi̍i̍sīi̍ le̍ni̍ŋ te̍, kāni̍ fo̍ndōle̍, nyɛ̄ dīa̍a̍ cho̍ ō dīāndāā mbo̍ hīāū kpo̍u̍ wo̍ o̍ cho̍ ni̍.

¹³Lā nɔ̄ mī lā dē nyɛ̄ dīa̍a̍ ho̍ō o̍ fo̍ndā nī dīāndāa̍. Kāni̍ fo̍ndōle̍, te̍le̍ŋ o̍ te̍le̍ŋ nya̍ sōli̍ nyɛ̄ dīāā wāā nu̍a̍ā sa̍lā lūāmāa̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ pɛ̍, nyɛ̄ dīāā tɔ̍ lo᷅ wo̍, nūm nya̍ pūa̍a̍ nu̍mnda̍, nya̍ nɔ̍ ko̍ŋ ni̍. Nyɛ̄ Mɛ̄lɛ̄ka̍ Ya̍a̍wɛ̄ɛ̄ dīmi̍ māā ya̍ I̍ di̍mu̍l nya̍ wo̍ ndu̍ cho̍ ko̍ŋ ni̍.

¹⁴O̍ ko̍ŋ kɔ̍ɔ̍lī, chɔ̄lū ŋ̄ dīī ko̍ŋ ndo̍, mɛ̄ɛ̄mā ndɔ̄ ma̍ ŋ̄ hēēlu̍ o̍ bāla̍ŋ chōo̍ Mɛ̄lɛ̄ka̍ lāchī le̍ sa̍lā kɔ̄l nyūlōo̍ wa̍ŋ, a̍ lɔ̄lū ndɔ̍ ŋ̄ yɔ̄ŋgu̍ māā kē kpe̍e̍kpe̍i̍ o̍ Mɛ̄lɛ̄ka̍ lo̍ wo̍, lā dīā ko̍ŋ o̍ fo̍nda̍ o̍ fo̍nda̍ cho̍ ō dīāndāā Mɛ̄lɛ̄ka̍ o̍ hɔ̄l. Te̍le̍ŋ o̍ te̍le̍ŋ, tē wāŋnda̍ I̍sɔ̄lūɛ̄ī a̍ so̍li̍ sa̍lā kɔ̄l nyūlū wāā nu̍a̍ā o̍ Mɛ̄lɛ̄ka̍ lo̍ pɛ̍, nūm ni̍, a̍ chūāūwāā nūm a̍a̍ pi̍a̍a̍ndūa̍a̍, a̍ chūāūwāā nūm a̍a̍ la̍a̍ndūa̍a̍, o̍ nya̍ nya̍ nɔ̄ wo̍ ndu̍ cho̍ ko̍ŋ ni̍.

¹⁵Te̍le̍ŋ o̍ te̍le̍ŋ chɔ̄lōo̍ ō dīīnu᷄ŋ le̍ sa̍lā wāā nu̍a̍ā sōlīo̍o̍ pɛ̍, lɔ̄lōo̍ ni̍, a̍ mɛ̄ɛ̄mā ndūa̍ŋ, lā nɔ̄ mī lā hīŋ a̍ mu̍ŋ te̍le̍ŋ nda̍ chō wā chūɛ̄īmā chɔ̄lōo̍ ho̍ō lōmɔ̄ɔ̍ māā sa̍lā o̍ Mɛ̄lɛ̄ka̍ lo̍ wo̍, mī lā hēēlu̍ mu̍ŋ o̍ bāla̍ŋ chōo̍ māā sa̍lā kɔ̄l nyūlū o̍ Mɛ̄lɛ̄ka̍ Ya̍a̍wɛ̄ɛ̄ lo̍. Kɛ̍, mɛ̄ɛ̄mā chɔ̄lōo̍ ho̍ō a̍ lɔ̄lū ndɔ̄ɔ̍, nūm ni̍ a̍ chūāūwāā nūmnda̍, o̍ nya̍a̍ cho̍ ko̍ŋ ni̍ le̍ fɛ̍ɛ̍ŋ a̍ fɛ̍ɛ̍ŋ, mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ di̍mi̍ yɛ̍.”

¹⁶O̍ ko̍ŋ kɔ̍ɔ̍lī, mi̍ Mūu̍sē nyu̍nā le̍ chūīŋ nda̍ a̍a̍ nɔ̍ le̍ sa̍la̍ fa̍ŋā yɔ᷅ŋ wɔ̄ɔ̍ŋndo̍ wo̍ sōlīo̍o̍ wo̍. Kɛ̍ ma̍ dīmūl ndu̍ māā ā chīi̍ ni᷅ŋ chūīŋ kōŋ sa̍lāa̍ lōmɔ̄ɔ̄. Le̍ he̍ī, mi̍ Mūu̍sē du̍a̍u̍nu᷄ŋ tu̍mbe̍ a̍ Ɛ̄li̍a̍a̍sā nda̍ I̍ta̍māā, pūa̍a̍ E̍lɔ̄ŋ nda̍, ā nda̍ a̍a̍ lo̍ yōōmū wa̍. Mi̍ Mūu̍sē o̍ nyu̍nā nda̍ āā,

¹⁷“Vɛ᷅ lā di̍ sa̍la̍ fa̍ŋā ho̍ō yɔ̄ŋ wɔ̄ɔ̍ŋndo̍ wo̍ o̍ fo̍ndāŋ ba̍lu̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ la̍tu̍lu̍ wo̍ le̍? Kāni̍, sa̍lā dīāndāa̍ hi̍o̍ū kpo̍u̍ wo̍ o̍ cho̍ ni̍. Ndu̍yɛ̍ nya̍ Mɛ̄lɛ̄ka̍ Ya̍a̍wɛ̄ɛ̄ o̍ ke̍ sa̍lāa̍ ho̍ō ni̍, le̍ mbō tōsa̍ wāŋnda̍ I̍sɔ̄lūɛ̄ī a̍ ve᷅ lɛ̍ ā yāālāā ndu̍ Mɛ̍lɛ̍ka̍ o̍ hɔ̄l le̍ dɛ̍nɛ̍ pālāā sɔ̄lā le̍, ndu̍yɛ̍ mbō ma᷄l nda̍ le̍ yɔ̄ŋ ndā wɔ̍ɔ̍ŋndo̍.

¹⁸Nya̍a̍ nɔ̍ mī nya̍a̍ de᷅ vīsīŋ chūīŋndo̍ ho̍ō. Kāni̍, mi̍ di̍mu̍l nya̍ māā tē lā dīī chɔ̄lōo̍ le̍ sa̍lāa̍ sōlīo̍o̍ pɛ̍, kɛ̍ mī lā hi᷄ŋ a̍ kōo̍ma̍ ndūa̍ŋ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ wo̍ ni᷄ŋ te̍, māā lā di̍o̍ vi̍sīŋ ndɔ᷄ŋ o̍ fo̍nda᷄ŋ ba̍lu̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ la̍tu̍lu̍ wo̍, mɛ̄ɛ̍ ya̍ di̍mu̍l nya̍ yɛ̍.”

¹⁹O̍ ko̍ŋ, mi̍ E̍lɔ̄ŋ mu̍lī Mūu̍sē dīōm le̍ pūa̍a̍ ndūa̍a̍, mbo̍ dīmī āā, “Pūa̍a̍ nīa̍a̍ lo̍ ha̍ā yōōmū wa̍ ā sōli̍ hāū sa̍lā fa̍ŋā yɔ̄ŋ wɔ̄ɔ̍ŋndo̍ wo̍, a̍ sa̍lā lūāmāa̍ o̍ Mɛ̄lɛ̄ka̍ Ya̍a̍wɛ̄ɛ̄ lo̍, to̍fa̍ wɔ̍ nyɛ᷅ yɔ̍nu̍ŋndo̍. Tē ndu̍ o̍o̍ wa̍ pɛ̍ māā ya̍ i̍i̍ de᷅ sa̍la̍ fa̍ŋa̍ ho̍ō yɔ̄ŋ wɔ̄ɔ̍ŋndo̍ wo̍ a̍ nda̍ lātūlu̍, I̍ la̍a̍la̍ŋ ī ve᷄ wa᷅ ī kɛ̄ndɛ̄ a̍ Mɛ̄lɛ̄ka̍ le̍.”

²⁰Mɛ̄ɛ̍ Mūu̍sē o̍ tu̍e̍ī mɛ̄ɛ̍ E̍lɔ̄ŋ o̍ mu̍li̍ yɛ̍, mbo̍ hīnī kɔ̄l.