Read Southern Kisi Lɛ̄vi̍ti̍kɔ̍ɔ̄ 13 Bible Online

Lɛ̄vi̍ti̍kɔ̍ɔ̄ 13 - Southern Kisi bible

Lɛ̄vi̍ti̍kɔ̍ɔ̄ 13

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ chɔ᷅m Mūu̍sē nda̍ E̍lɔ̄ŋ sāwāla̍ŋ nda᷅ŋ, mbo̍ dīmūl nda̍ āā,

²“Tē hīndɔ̄ɔ̍ ō cha᷄l wāŋndo̍ pɛ̍, ɔ̄ɔ̄ tɛ̄ɛ̄ŋndo̍, kɛ̄lɛ̄ŋgāā mī nyɔ̄ɔ̍ ō fūla̍ ndu̍ o̍ ŋ̄dīāl māā kāwa̍, ndu̍yɛ̍ mbō sīmnu᷄ŋ na̍a̍ ta᷅ŋ wa̍nā pɛ̍, wānā ko̍ŋ ā nɔ̄ mā hīŋ a̍ ndu̍ o̍ E̍lɔ̄ŋ ndo̍, wānā so̍līāā lāsa̍lāa̍, ɔ̄ɔ̄ mā kūɛ̄ a̍ ndu̍ o̍ pūa̍a̍ E̍lɔ̄ŋ nda̍ ō pīlɛ̍ lo̍, a̍ cho̍ wānāā sōlīāā lāsa̍lāa̍ wa̍.

³Tē ā kūɛ̄ a̍ wānā ko̍ŋ o̍ wānāā sōlīāā lāsa̍lāa̍ ha̍ā o̍ pīlɛ̍ lo̍ pɛ̍, wānā so̍līāā lāsa̍lā kōŋ ō mɛ̄ɛ̄ndi̍a̍ŋ wa̍nā ko̍ŋ pāū kōŋ nyɛ̄ kɛ̄ndɛ̄ kɛ̍ndɛ̄. Tē ō chē pɛ̍ mī yīīŋnde̍ o̍ pāū wānā ko̍ŋ ī yɔ̄nu̍ŋ i̍ hu̍mbū, ndu̍yɛ̍ mī pāūwo̍ ho̍ō ō yīŋgi̍la̍ ti᷄ŋ pɛ̍ mɛ̄ɛ̍ nāa̍ ta᷅ŋ wa̍nā wo̍ wānā ko̍ŋ ō sɔ̄la̍ ko̍ŋ ni̍. Wānā so̍līāā lāsa̍lāa̍ ō nɔ̄ mbō dīmu̍l wāŋnda̍ māā wānā ko̍ŋ ō chō ō nɔ̄ɔ̄lɛ̍i̍ ya̍ Mɛ̍lɛ̄ka̍ o̍ hɔ̄l.

⁴Kɛ̍ tē ō wa̍ pɛ̍, mī nyɔ̄ɔ̍ kīla̍ŋ wa᷅ŋndo̍ o̍ ŋ̄dīāl, mī fo̍ndā kōŋ ō wa̍ ō hūmbū māā kāwa̍, ndu̍yɛ̍ mī pāu̍ de̍l wānā ko̍ŋ ndo̍ ō ve̍ o̍ yi̍ŋgīlāā ti᷄ŋ te̍, ndu̍yɛ̍ vɛ̍lɛ̄ mī yīīŋīi̍ ba̍lu̍ fo̍ndāŋ kāwa̍ kōŋ nde̍ ī ve̍ i̍ hu̍mbū le̍, wānā so̍līāā lāsa̍lāa̍ ō nɔ̄ mbō sōli̍ wānā ko̍ŋ wāŋnda̍ tɛ̄ɛ̄ŋ mbō kɔ̍ wa᷅ nāa̍ yo̍lo̍līa̍a̍ ndu̍ pīlɛ̍ le̍ pālɛ̍i̍ ī ŋɔ᷄mmɛ̍ū.

⁵O̍ pāa̍le̍ ŋɔ̍mmɛ̍ūle̍ŋ chōo̍, wānā so̍līāā lāsa̍lāa̍ ō mɛ̄ɛ̄ndi̍a̍ŋ vɛ̍lɛ̄ wānā ko̍ŋ fo̍ndā kōŋ. Tē ō chē pɛ̍ māā pāū kōŋ mɛ̄ɛ̍ o̍ wa̍ kpɛ̍i̍ yɛ̍ ko̍ni̍ o̍ cho̍ wɔ̄ ni̍, ō hīu̍ la̍chi̍ le̍ pɛ̍, wānā so̍līāā lāsa̍lāa̍ ō kɛ̄si̍ ndu̍ vɛ̄lɛ̄ nāa̍ yo̍lo̍līa̍a̍ kāŋ ndu̍ pīlɛ̍ kpe̍ le̍ pālɛ̍i̍ ī ŋɔ᷄mmɛ̍ū.

⁶Tē pālɛ̍i̍ ī hīōū vɛ̄lɛ̄ pɛ̍ i̍ ŋɔ̍mmɛ̍ū, ō kɔ̍ mɛ̄ɛ̄nda̍ŋ vɛ̍lɛ̄ wānā ko̍ŋ. Tē ō sāālu̍ŋ pɛ̍ māā pāūwo̍ ō kāndu̍ sīōŋgɔ̄ɔ̍, ndu̍yɛ̍ ō hīu̍ lɛ̍ lāchī a̍ dīōnɔ᷄ŋndo̍ le̍ pɛ̍, wānā so̍līāā lāsa̍lāa̍ ō nɔ̄ mbō dīmu̍l wāŋnda̍ māā wānā ko̍ŋ ō chō ni᷅ŋ ō dīāndāā ya̍ Mɛ̍lɛ̄ka̍ o̍ hɔ̄l. Māā tɛ̄ɛ̄ŋndo̍ ko̍ni̍ ndu̍ o̍o̍ cha̍l wānā ko̍ŋ o̍ ŋ̄dīāl ni̍. Wānā ko̍ŋ ō nɔ̄ mbō tɔ̄ɔ̄ nyɛ̄la̍ wa᷅ ndu̍ lēkɔ̄ɔ̍ la̍ŋ fo̍, mbō mīīŋgu̍ wāŋnda̍ chōo̍ ō dīāndāā ya̍ Mɛ̍lɛ̄ka̍ o̍ hɔ̄l.

⁷Kɛ̍ tē wānā so̍līāā lāsa̍lāa̍ ō mɛ̄ɛ̄ndi̍a̍ŋ wa̍nā ko̍ŋ pɛ̍, mbō dīmu̍l wāŋnda̍ māā wānā ko̍ŋ ō chō ni᷅ŋ ō dīāndāā ya̍ Mɛ̍lɛ̄ka̍ o̍ hɔ̄l pɛ̍, mī wānā ko̍ŋ ō mīīŋgu̍, kɛ̍ mī fo̍ndāŋ nyɔ̄ɔ̍ chō ko̍ŋ māā kāwa̍ wo̍ ō mi̍i̍ŋgu̍ vɛ̄lɛ̄ ndu̍, mbō kūā a̍ dīōnɔ᷄ŋndo̍ pɛ̍, mɛ̄ɛ̍ wānā ko̍ŋ ō nɔ̄ mbō mīīŋgu̍ pi̍la̍ nāa̍ wānā so̍līāā lāsa̍lāa̍ chūā.

⁸Tē ō mīīŋgu̍ pɛ̍, wānā so̍līāā lāsa̍lāa̍ ō nɔ̄ mbō mɛ̄ɛ̄ndi̍a̍ŋ ndu̍. Te̍ ō chē pɛ̍, māā fo̍ndāŋ kāwa̍ kōŋ ō chō hīōūwɔ̄ɔ̍ lāchī a̍ dīōnɔ᷄ŋndo̍ pɛ̍, wānā so̍līāā lāsa̍lāa̍ ō nɔ̄ mbō dīmu̍l wāŋnda̍ māā wānā ko̍ŋ ō chō ō nɔ̄ɔ̄lɛ̍i̍ ya̍ Mɛ̍lɛ̄ka̍ o̍ hɔ̄l. Māā nāā wɔ̄ɔ̍ŋ ta᷅ŋ wa̍nā wo̍ ō pu᷄m, ndu̍ cho̍ ko̍ŋ wānā ko̍ŋ lēkɔ̄ɔ̍ ni̍.

⁹“Tē wāŋndo̍ ō nɔ̄ nāā wɔ̄ɔ̍ŋ ta᷅ŋ wa̍nā wo̍ lēkɔ̄ɔ̍ pɛ̍, wānā ko̍ŋ ā nɔ̄ mā hīŋ a̍ ndu̍ o̍ wānā so̍līāā lāsa̍lāa̍ lo̍.

¹⁰Tē ā hīŋ a̍ ndu̍ lo̍ŋ pɛ̍, wānā so̍līāā lāsa̍lāa̍ ō mɛ̄ɛ̄ndi̍a̍ŋ wa̍nā ko̍ŋ. Tē ō sāālu̍ŋ pɛ̍ māā fo̍ndā nāā kōŋ ō chō ko̍ŋ wa᷅ŋndo̍ wo̍, māā yīīŋīi̍ ba̍lu̍ fo̍ndāŋ kōŋ nde̍ ī yɔ̍nu̍ŋ i̍ hu̍mbū pɛ̍, ndu̍yɛ̍ mi̍ pāūwo̍ ō dēl o̍ fo̍ndāŋ kōŋ,

¹¹mɛ̄ɛ̍ nāā wɔ̄ɔ̍ŋ ta᷅ŋ wa̍nā wo̍ ō pūm, ndu̍ wānā ko̍ŋ ō sɔ̄la̍ ko̍ŋ ni̍. O̍ ko̍ŋ, wāna̍ so̍līāā lāsa̍lāa̍ ō nɔ̄ mbō dīmu̍l wāŋnda̍ māā wānā ko̍ŋ ō chō ō nɔ̄ɔ̄lɛ̍i̍ ya̍ Mɛ̍lɛ̄ka̍ o̍ hɔ̄l. Wānā so̍līāā lāsa̍lāa̍ ō nɔ̍ lɛ̍ mbō kɛ̄si̍ wānā ko̍ŋ nāa̍ yo̍lo̍līa̍a̍ le̍ ndu̍ mɛ̍ɛ̍ndīa̍ŋ te̍. Kāni̍ fo̍ndōle̍ ī wā ni᷅ŋ kpe̍nde̍ke̍le̍ māā nāā wɔ̄ɔ̍ŋ ta᷅ŋ wa̍nā wo̍ ō pūm wānā ko̍ŋ ō nɔ̄ ko̍ŋ le̍kɔ̍ɔ̍ ni̍.

¹²Kɛ̍ mī ī yɔ̄nu̍ŋ dɔ̍ɔ̍ mī nāā wɔ̄ɔ̍ŋndo̍ ho̍ō ō kēēku̍ wāŋndo̍ chōo̍ mī kāwa̍la̍ŋ lā lo̍ ndu̍ lēkɔ̄ɔ̍ kpo̍u̍, chɔ̍ŋ o̍ bōlle̍ŋ mbō tōl a̍ pēlo̍ŋ di̍, wānā so̍līāā lāsa̍lāa̍ ō nɔ̄ mbō dīmu̍l wāŋnda̍ māā wānā ko̍ŋ ō chō ni᷅ŋ ō dīāndāā ya̍ Mɛ̍lɛ̄ka̍ o̍ hɔ̄l.

¹³

¹⁴Kɛ̍ tē nāā kōŋ ō ma᷄l wāŋndo̍ pāūwo̍ lēkɔ̄ɔ̍ pɛ̍, mɛ̄ɛ̍ wānā ko̍ŋ ō chō ō nɔ̄ɔ̄lɛ̍i̍ ya̍ Mɛ̍lɛ̄ka̍ o̍ hɔ̄l.

¹⁵Wānā so̍līāā lāsa̍lāa̍ ō nɔ̄ mbō mɛ̄ɛ̄ndi̍a̍ŋ vɛ̍lɛ̄ wa̍nā ko̍ŋ. Tē ō sāālu̍ŋ pa̍ū kōŋ wānā ko̍ŋ lēkɔ̄ɔ̍ pɛ̍, ō nɔ̄ mbō dīmu̍l wāŋnda̍ māā wānā ko̍ŋ ō chō ō nɔ̄ɔ̄lɛ̍i̍ ya̍ Mɛ̍lɛ̄ka̍ o̍ hɔ̄l, kāni̍ fo̍ndōle̍, nāa̍ ta᷅ŋ wa̍nā wo̍ ō pūm wānā ko̍ŋ ō nɔ̄ ko̍ŋ ni̍.

¹⁶Kɛ̍ tē pāū kōŋ ō sēŋgū wānā ko̍ŋ pɛ̍, mī kāwa̍a̍ lo̍ o̍ fo̍ndā kōŋ, wānā ko̍ŋ ō nɔ̄ mbō mīīŋgu̍ nāa̍ wānā so̍līāā lāsa̍lāa̍ chūā.

¹⁷O̍ ko̍ŋ, mbō kɔ̍ mɛ̍ɛ̍nda᷄ŋ ndu̍ vɛ̄lɛ̄. Tē sīōŋgɔ̄ɔ̍ kpe̍e̍kpe̍i̍ pāū kōŋ ō sēŋgū ni̍ mi̍ kāwa̍a̍ lō o̍ fo̍ndā kōŋ, wānā so̍līāā lāsa̍lāa̍ ō nɔ̄ mbō dīmu̍l wāŋnda̍ māā wānā ko̍ŋ ō sīmnu᷄ŋ o̍ di̍a̍ndāā ya̍ Mɛ̍lɛ̄ka̍ o̍ hɔ̄l.”

¹⁸Mi̍ Mɛ̄lɛ̄ka̍ hīāū lāchī a̍ sūɛ̍i̍ āā, “Mī ī yɔ̄nu̍ŋ dɔ̍ɔ̍ mī hīndɔ̄ɔ̍ ō cha᷄l wāŋndo̍, ndu̍yɛ̍ mbō chɔ᷄m o̍ hɔ̄lla̍ māā ō sēŋgū.

¹⁹Kɛ̍ tē te̍le̍ŋ ti̍ŋ ō hīōū pɛ̍, fo̍ndāŋ kōŋ ō hīndū wāŋndo̍ mbō dēndū fo̍, tē ko̍ŋ te̍ ō yɔ̄nu̍ŋ o̍ si̍a̍ŋā a̍ būŋgāŋ hūmbo᷄ŋ lēni᷄ŋ. Wānā ko̍ŋ ō nɔ̄ mbō kūɛ̄ o̍ wānā so̍līāā lāsa̍lāa̍ lo̍.

²⁰Tē ō kūɛ̄ pɛ̍, wānā so̍līāā lāsa̍lāa̍ ō kɔ̍ mɛ̍ɛ̍ndīa̍ŋ ndu̍. Tē fo̍ndā nyɔ̄ɔ̍ hīndū ndu̍ ko̍ŋ ndo̍ ō sīmnu᷄ŋ pa̍ūwo̍ pɛ̍, ndu̍yɛ̍ mī yīīŋīi̍ ba̍lu̍ pāū kōŋ nde̍ ī yɔ̄nu̍ŋ i̍ hu̍mbū pɛ̍, mɛ̄ɛ̍ nāa̍ wɔ̄ɔ̍ŋ ta᷅ŋ wa̍nā wo̍ ndu̍ fu̍la̍ ko̍ŋ wānā ko̍ŋ ni̍. Wānā so̍līāā lāsa̍lāa̍ ō nɔ̄ mbō dīmu̍l wāŋnda̍ māā wānā ko̍ŋ ō chō ō nɔ̄ɔ̄lɛ̍i̍ ya̍ Mɛ̄lɛ̄ka̍ o̍ hɔ̄l.

²¹Kɛ̍ tē wānā so̍līāā lāsa̍lāa̍ ō mɛ̄ɛ̄ndīa̍ŋ fo̍ndāŋ kōŋ pɛ̍, mbō chē māā yīīŋīi̍ ba̍lu̍ pāū kōŋ nde̍ i̍ cho̍ i̍ hu̍mbū le̍, ndu̍yɛ̍, māā pāū kōŋ yīŋgi̍la̍ ti̍ŋ te̍, ndu̍yɛ̍ mī pāū kālāa̍ ō kāndu̍ sīōŋgɔ̄ɔ̍ pɛ̍, wānā so̍līāā lāsa̍lāa̍ ō nɔ̄ mbō sōli̍ wānā ko̍ŋ wāŋnda̍ tɛ̄ɛ̄ŋ mbō kɔ̍ wa᷅ nāa̍ yo̍lo̍līa̍a̍ ndu̍ pīlɛ̍ le̍ pālɛ̍i̍ ī ŋɔ᷄mmɛ̍ū.

²²O̍ pāa̍le̍ ŋɔ̍mmɛ̍ūle̍ŋ chōo̍, wānā so̍līāā lāsa̍lāa̍ ō mɛ̄ɛ̄ndi̍a̍ŋ vɛ̍lɛ̄ wānā ko̍ŋ fo̍ndā kōŋ. Tē chē pɛ̍ māā pāū kālāa̍ ō chō kɔ̄la̍ŋ a̍ dīōnɔ᷄ŋndo̍ pɛ̍, mɛ̄ɛ̍ nāa̍ wɔ̄ɔ̍ŋ ta᷅ŋ wa̍nā wo̍ ō pūm ndu̍ fu̍la̍ wānā ko̍ŋ ni̍. Wānā so̍līāā lāsa̍lāa̍ ō nɔ̄ mbō dīmu̍l wāŋnda̍ māā wānā ko̍ŋ ō chō ō nɔ̄ɔ̄lɛ̍i̍ ya̍ Mɛ̍lɛ̄ka̍ o̍ hɔ̄l.

²³Kɛ̍ tē fo̍ndāŋ kōŋ ō hi̍u̍ la̍chi̍ a̍ dīōnɔ᷄ŋndo̍ le̍, mɛ̄ɛ̍ ō cho̍ na̍ā wɔ̄ɔ̍ŋ te̍ cho̍ wānā ko̍ŋ lēkɔ̄ɔ̍ le̍. Hīndɔ̄ɔ̍ cha̍l ndu̍ wo̍ tīndī ndɔ̄ɔ̍ cho̍ ko̍ŋ ni̍. Wānā so̍līāā lāsa̍lāa̍ ō nɔ̄ mbō dīmu̍l wāŋnda̍ māā wānā ko̍ŋ ō chō ni᷅ŋ ō dīāndāā ya̍ Mɛ̍lɛ̄ka̍ o̍ hɔ̄l.

²⁴“Mī ī yɔ̄nu̍ŋ dɔ̍ɔ̍ mī wāŋndo̍ ō lōmnu᷄ŋ, mī pāū kōŋ ō wa᷄ o̍ hu̍mbū lēni᷄ŋ a̍ būŋgāŋ sīāŋa᷄ŋ, ɔ̄ɔ̄ mbō wa᷄ ō hūmbū lēni᷄ŋ.

²⁵Wānā so̍līāā lāsa̍lāa̍ ō nɔ̄ mbō mɛ̄ɛ̄ndi̍a̍ŋ pa̍ū kōŋ. Tē yīīŋīi̍ ba̍lu̍ pāū kōŋ nde̍ ī yɔ̄nu̍ŋ pɛ̍ i̍ hu̍mbū, ndu̍yɛ̍ mī pāū kālāa̍ ō yīŋgi̍la̍ ti᷄ŋ pɛ̍, mɛ̄ɛ̍ nāa̍ wɔ̄ɔ̍ŋ ta᷅ŋ wa̍nā wo̍ ō pūm, ndu̍ wānā ko̍ŋ ō sɔ̄lā ko̍ŋ o̍ lōmnɔ᷄ŋ ko̍ŋ ni᷄ŋ ni̍. Wānā so̍līāā lāsa̍lāa̍ ō nɔ̄ mbō dīmu̍l wāŋnda̍ māā wānā ko̍ŋ ō chō ō nɔ̄ɔ̄lɛ̍i̍ ya̍ Mɛ̍lɛ̄ka̍ o̍ hɔ̄l, kāni̍ fo̍ndōle̍, ī wā i̍ chɔ̍mna᷄ŋ kpe̍nde̍ke̍le̍ māā nāā wɔ̄ɔ̍ŋ ta᷅ŋ wa̍nā wo̍ ō pūm, ndu̍ wānā ko̍ŋ ō sɔ̄la̍ ko̍ŋ ni̍.

²⁶Kɛ̍ tē wānā so̍līāā lāsa̍lāa̍ ō mɛ̄ɛ̄nda̍ŋ fo̍ndāŋ kōŋ pɛ̍, mbō sāālu̍ŋ māā yīīŋīi̍ ba̍lu̍ pāū kōŋ nde̍ ī cho̍ i̍ hu̍mbū le̍, ndu̍yɛ̍, māā pāū kālāa̍ ō yīŋgi̍la̍ ti̍ŋ te̍, ndu̍yɛ̍ mī pāū kālāa̍ ō kāndu̍ sīōŋgɔ̄ɔ̍ pɛ̍, wānā so̍līāā lāsa̍lāa̍ ō nɔ̄ mbō sōli̍ wānā ko̍ŋ wāŋnda̍ tɛ̄ɛ̄ŋ mbō kɔ̍ wa᷅ nāa̍ yo̍lo̍līa̍a̍ ndu̍ pīlɛ̍ le̍ pālɛ̍i̍ ī ŋɔ᷄mmɛ̍ū

²⁷O̍ pāa̍le̍ ŋɔ̍mmɛ̍ūle̍ŋ chōo̍, wānā so̍līāā lāsa̍lāa̍ ō nɔ̄ mbō mɛ̄ɛ̄ndi̍a̍ŋ ndu̍. Tē pāū kōŋ ō wa̍ hīōūwɔ̄ɔ̍ lāchī a̍ dīōnɔ᷄ŋndo̍ pɛ̍, mɛ̄ɛ̍ nāā wɔ̄ɔ̍ŋ ta᷅ŋ wa̍nā wo̍ ō pūm ndu̍ fu̍lā ko̍ŋ wa̍nā ko̍ŋ ni̍. Wānā so̍līāā lāsa̍lāa̍ ō nɔ̄ mbō dīmu̍l wāŋnda̍ māā wānā ko̍ŋ ō chō ō nɔ̄ɔ̄lɛ̍i̍ ya̍ Mɛ̍lɛ̄ka̍ o̍ hɔ̄l.

²⁸Kɛ̍ tē pāū kōŋ ō hi̍u̍ la̍chi̍ a̍ dīōnɔ᷄ŋndo̍ le̍, mbō kāndu̍ sīōŋgɔ̄ɔ̍ pɛ̍, mɛ̄ɛ̍ ō cho̍ na̍ā wɔ̄ɔ̍ŋ te̍ cho̍ wānā ko̍ŋ lēkɔ̄ɔ̍ le̍. Lōmnɔ᷄ŋ wānā ko̍ŋ ō lōmnu᷄ŋ ndo̍ ndu̍ to̍sa̍ ni̍ fo̍ndā kōŋ ō hīndū le̍. Wānā so̍līāā lāsa̍lāa̍ ō nɔ̄ mbō dīmu̍l wāŋnda̍ māā wānā ko̍ŋ ō chō ō dīāndāā ya̍ Mɛ̍lɛ̄ka̍ o̍ hɔ̄l.

²⁹“Tē pāūwo̍ ō fūla̍ wāŋndo̍ o̍ lēbōl kɛ̄lɛ̄ŋgāā o̍ da̍a̍da̍a̍ pɛ̍, ō wa̍ wa̍nā pɔ̍nɔ̍ ō wa̍ wa̍nā la̍nɔ̍,

³⁰wānā so̍līāā lāsa̍lāa̍ ō nɔ̄ mbō mɛ̄ɛ̄ndi̍a̍ŋ wa̍nā ko̍ŋ pāū kōŋ. Tē pāū kōŋ ō yīŋgi̍la̍ ti᷄ŋ pɛ̍, ndu̍yɛ̍ mī yīīŋīi̍ ba̍lu̍ pāū kōŋ nde̍ ī wa̍ māā ba̍si̍, ndu̍yɛ̍ mī ī wa̍ mɔ̍lɔ̍lɔ̍ mɔ̍lɔ̍lɔ̍ pɛ̍, mɛ̄ɛ̍ nāā wɔ̄ɔ̍ŋ fu̍lā wa᷅ŋndo̍ o̍ lēbōl ɔ̄ɔ̄ o̍ da̍a̍da̍a̍ mī yīīŋnde̍ ī yūŋgāŋ, ndu̍yɛ̍ mbō tāŋ wa̍nā wo̍, mɛ̄ɛ̍ ndu̍ fu̍la̍ wānā ko̍ŋ ni̍. Wānā so̍līāā lāsa̍lāa̍ ō nɔ̄ mbō dīmu̍l wāŋnda̍ māā wānā ko̍ŋ ō chō ō nɔ̄ɔ̄lɛ̍i̍ ya̍ Mɛ̍lɛ̄ka̍ o̍ hɔ̄l.

³¹Kɛ̍ tē wānā so̍līāā lāsa̍lāa̍ ō mɛ̄ɛ̄ndi̍a̍ŋ pa̍ū kōŋ pɛ̍, mbō sāālu̍ŋ māā pāū kōŋ ō cho̍ la̍kɔ̍ a̍ dīōnɔ᷄ŋndo̍ le̍, ndu̍yɛ̍ mī yīīŋīi̍ ba̍lu̍ tɛ̄ɛ̄ŋ kōŋ nde̍ ī ve̍ i̍ ti̍ŋī le̍, ndu̍yɛ̍ mī pāū kōŋ ō wa̍ nyūmu̍llo̍, wānā so̍līāā lāsa̍lāa̍ ō nɔ̄ mbō sōli̍ wānā ko̍ŋ wāŋnda̍ tɛ̄ɛ̄ŋ, mbō kɔ̍ wa᷅ nāa̍ yo̍lo̍līa̍a̍, ndu̍ pīlɛ̍ le̍ pālɛ̍i̍ ī ŋɔ᷄mmɛ̍ū.

³²O̍ pāa̍le̍ ŋɔ᷄mmɛ̍ūle̍ŋ chōo̍, wāna̍ so̍līāā lāsa̍lāa̍ ō nɔ̄ mbō mɛ̄ɛ̄ndi̍a̍ŋ vɛ̍lɛ̄ pāū kōŋ. Tē ō hīu̍ la̍chi̍ a̍ tīmbu̍la᷅ŋndo̍, ndu̍yɛ̍ mī yīīŋīi̍ ba̍lu̍ ndu̍ ve̍ ī ve̍ māā ba̍si̍ le̍, ndu̍yɛ̍ mī pāū kōŋ ō ve̍ ti᷄ŋ kɔ̄la̍ŋ a̍ yīŋgīlāa̍ le̍,

³³wāna̍ pāū kōŋ ō fūlā ko̍ŋ ndo̍, nɔ̄ mbō sēndi̍ŋ, kɛ̍ mbō mɛ̄i̍ yīīŋīi̍ ba̍lu̍ pāū kōŋ nde̍ chɛ̍ chɛ̍. O̍ ko̍ŋ kɔ̍ɔ̍lī, mī wānā so̍līāā lāsa̍lāa̍ ō sōli̍ ndu̍ wāŋnda̍ tɛ̄ɛ̄ŋ mbō kɔ̍ wa᷅ nāa̍ yo̍lo̍līa̍a̍ ndu̍ pīlɛ̍ le̍ pālɛ̍i̍ vɛ̄lɛ̄ ī ŋɔ᷄mmɛ̍ū.

³⁴O̍ pāa̍le̍ ŋɔ̍mmɛ̍ūle̍ŋ chōo̍, wānā so̍līāā lāsa̍lāa̍ ō mɛ̄ɛ̄ndi̍a̍ŋ vɛ̍lɛ̄ wa̍nā ko̍ŋ. Tē pāūwo̍ ō hīu̍ la̍chi̍ a̍ dīōnɔ᷄ŋndo̍ le̍, ndu̍yɛ̍, mbō yīŋgi̍la̍ ti᷄ŋ lēni᷄ŋ te̍, wānā so̍līāā lāsa̍lāa̍ ō nɔ̄ mbō dīmu̍l wāŋnda̍ māā wānā ko̍ŋ ō chō ō dīāndāā ya̍ Mɛ̍lɛ̄ka̍ o̍ hɔ̄l. Wānā ko̍ŋ ō nɔ̄ mbō tɔ̄ɔ̄ nyɛ̄la̍ ndɔ̄la̍ŋ fo̍, o̍ ko̍ŋ mbō mīīŋgu̍ ō dīāndāā ya̍ Mɛ̍lɛ̄ka̍ o̍ hɔ̄l.

³⁵Kɛ̍ tē wānā ko̍ŋ ō mīīŋgu̍ pɛ̍, a̍ dīmī wānā so̍līāā lāsa̍lāa̍ ō dīmi̍ ko̍ŋ māā ō chō ō dīāndāa̍ wo̍, mī pāūwo̍ ō kɔ̍ hi̍o̍ū lāchī a̍ dīōnɔ᷄ŋndo̍ pɛ̍,

³⁶wānā so̍līāā lāsa̍lāa̍ ō nɔ̄ mbō mɛ̄ɛ̄ndi̍a̍ŋ vɛ̍lɛ̄ wānā ko̍ŋ. Te̍ wānā so̍līāā lāsa̍lāa̍ ō sāālu̍ŋ pɛ̍ māā pāū kōŋ ō chō hīōūwɔ̄ɔ̍ lāchī a̍ dīōnɔ᷄ŋndo̍, wānā so̍līāā lāsa̍lāa̍ ō nɔ̄ mbō dīmu̍l wāŋnda̍ māā wānā ko̍ŋ ō chō ō nɔ̄ɔ̄lɛ̍i̍ ya̍ Mɛ̍lɛ̄ka̍ o̍ hɔ̄l, mbō tōfa̍ lɛ̍ bɛ̍ɛ̍ le̍ yīīŋīi̍ wa᷅ o̍ pāū kōŋ māā ba̍si̍ ve̍ le̍.

³⁷Kɛ̍ te̍ wānā so̍līāā lāsa̍lāa̍ ō mɛ̄ɛ̄ndi̍a̍ŋ pa̍ū kōŋ pɛ̍, mbō sa̍a̍lu̍ŋ māā pāūwo̍ ō hīu̍ la̍chi̍ a̍ dīōnɔ᷄ŋndo̍ le̍, ndu̍yɛ̍ mbō chē mī yīīŋīi̍ ba̍lu̍ pāū kōŋ nde̍ ī sīmnu᷄ŋ i̍ ti̍ŋī pɛ̍, mɛ̄ɛ̍ pāū wānā ko̍ŋ ō sēŋgū. Wānā so̍līāā lāsa̍lāa̍ ō nɔ̄ mbō dīmu̍l wāŋnda̍ māā wānā ko̍ŋ ō chō ō dīāndāā ya̍ Mɛ̍lɛ̄ka̍ o̍ hɔ̄l.

³⁸“Tē kāwa̍a̍ ō de᷄l wānā pɔ̍nɔ̍ɔ̍ ɔ̄ɔ̄ wānā la̍nɔ̍ɔ̍ pɛ̍ mbō wa̍ ō hūmbū,

³⁹wānā so̍līāā lāsa̍lāa̍ ō nɔ̄ mbō mɛ̄ɛ̄ndi̍a̍ŋ wa̍nā ko̍ŋ kāwa̍ kōŋ. Tē kāwa̍ kōŋ ō hīu̍ di̍o̍ndɔ̄ɔ̄ fo̍fo̍ le̍, mɛ̄ɛ̍ ō cho̍ na̍a̍ yɔ̍ŋ wānā nyɛ᷅ le̍ o̍ cho̍ ko̍ŋ te̍. Wānā ko̍ŋ ō nɔ̄ mbō wa̍ ō dīāndāā ya̍ Mɛ̍lɛ̄ka̍ o̍ hɔ̄l.

⁴⁰“Mī ī yɔ̄nu̍ŋ dɔ̍ɔ̍ mī yīīŋnde̍ ī chūū wānā pɔ̍nɔ̍ɔ̍ o̍ lēbōl, mī te̍mbe̍llo̍ ō de᷄l ndu̍ lāchī, ɔ̄ɔ̄ o̍ mūndū, ko̍ŋ chɔ᷅m nu̍a̍ā māā wānā ko̍ŋ ō chō ō nɔ̄ɔ̄lɛ̍i̍ ya̍ Mɛ̍lɛ̄ka̍ o̍ hɔ̄l te̍.

⁴¹

⁴²Kɛ̍ tē ō wa̍ pɛ̍ mī būŋgāŋ hūmbo᷄ŋ a̍ ŋ̄ sīāŋa᷄ŋ ŋ̄ fūla̍ wānā ko̍ŋ o̍ te̍mbe̍l ko̍ŋ pɛ̍, mɛ̄ɛ̍ nāā wɔ̄ɔ̍ŋ ta᷅ŋ wa̍nā wo̍ ō pūm, ndu̍ fu̍la̍ ndu̍ ko̍ŋ ni̍.

⁴³Wānā so̍līāā lāsa̍lāa̍ ō nɔ̄ mbō mɛ̄ɛ̄ndi̍a̍ŋ wa̍nā ko̍ŋ te̍mbe̍l ko̍ŋ. Te̍ ō wa̍ le̍nde̍ a̍ būŋgāŋ sīāŋa᷄ŋ ndu̍yɛ̍ a̍ ŋ̄ hūmbo᷄ŋ pɛ̍, māā nāā wɔ̄ɔ̍ŋ ta᷅ŋ wa̍nā wo̍ pɛ̍,

⁴⁴wānā so̍līāā lāsa̍lāa̍ ō nɔ̄ mbō dīmu̍l wāŋnda̍ māā wānā ko̍ŋ ō chō ō nɔ̄ɔ̄lɛ̍i̍ ya̍ Mɛ̍lɛ̄ka̍ o̍ hɔ̄l, kāni̍ fo̍ndōle̍, nāā wɔ̄ɔ̍ŋ ta᷅ŋ wa̍nā wo̍ ō pūm, ndu̍ fu̍la̍ ndu̍ ko̍ŋ o̍ lēbōl ni̍.

⁴⁵“Tē wāŋndo̍ ō nɔ̄ nāā wɔ̄ɔ̍ŋ ta᷅ŋ wa̍nā wo̍ lēkɔ̄ɔ̍ pɛ̍, wānā ko̍ŋ ō nɔ̄ mbō wōōnu̍ŋ nyɛ̍lā yūūlu̍la̍ŋ, mbō ma᷄l yīīŋnde̍ le̍nde̍ ō sa̍a̍ndīāā le̍, ndu̍yɛ̍, mbo̍ yīīnu̍ŋ nyɔ̍ɔ̍ o̍ sōndō, mbō kūā a̍ dīmīo̍o̍ āā, ‘I̍ cho̍ ō nɔ̄ɔ̄lɛ̍i̍yo̍! I̍ cho̍ ō nɔ̄ɔ̄lɛ̍i̍yo̍.’

⁴⁶Ndu̍yɛ̍ ha̍a̍a̍ a̍ te̍le̍ŋ nāā kōŋ ō chō wa̍nā ko̍ŋ lēkɔ̄ɔ̍ wo̍, o̍ nɔ̄ɔ̄lɛ̍i̍ wānā ko̍ŋ ō wā ni̍. Ndu̍yɛ̍ wānā ko̍ŋ ō nɔ̄ mbō fūla̍ o̍ dɔ̍ɔ̍ŋgɔ̍ kōŋ ni᷄ŋ wa᷅ŋnda̍ tɛ̄ɛ̄ŋ mbō kɔ̍ wa᷅ a̍ bā ndɔ̄ yɛ̍.”

⁴⁷Mi̍ Mɛ̄lɛ̄ka̍ hīāū lāchī a̍ sūɛ̍i̍, mbo̍ dīmī āā, “Mī ī yɔ̄nu̍ŋ dɔ̍ɔ̍ mī nyɛ̄ chūɛ̄ɛ̄na᷄ŋndo̍, o̍ cho̍ ō tōōsīāā a̍ yīīŋīī sāa̍ kɛ̄lɛ̄ŋgāā a̍ fūŋnde̍ ba̍ā kālā le̍ŋ lē chēle̍ŋ ndo̍, mī nāā wɔ̄ɔ̍ŋndo̍ dēli̍ lēchōo̍ mbō yūl.

⁴⁸Ɔ̄ɔ̄ mī ī yɔ̄nu̍ŋ mī kōlā i̍pɛ̍ŋgɔ̍ɔ̍ o̍ cho̍ ō tōōsīāā a̍ fūŋnde̍ kɛ̍ndɛ̄ kɛ̍ndɛ̄le̍ŋ, ɔ̄ɔ̄ a̍ yīīŋīī sāa̍ wo̍, ɔ̄ɔ̄ mbō wa̍ yāu̍ vīsīo̍o̍, kɛ̄lɛ̄ŋgāā nyɛ̍ cho̍ ō tōōsīāā a̍ yāu̍ vīsīo̍o̍ wo̍, mī nāa̍ wɔ̄ɔ̍ŋndo̍ ō dēli̍ lēchōo̍ mbō yu᷄l.

⁴⁹Tē yūl kōŋ ō wa̍ ti᷄ŋ ō tīŋī pɛ̍, māā kɔ̄ɔ̍le̍ chāāki̍ī, ɔ̄ɔ̄ mbō wa̍ ō sīāŋā pɛ̍, mɛ̄ɛ̍ yu᷄l nɔ̍lā mbō kūɛ̄ a̍ tīmbu̍la᷅ŋndo̍ wo̍ cho̍ ko̍ŋ ni̍. Ā nɔ̄ mā hīŋ a̍ nyɛ̍ yu̍l ko̍ŋ ndo̍ mā hu᷄ŋ chɔ᷅m wānā so̍līāā lāsa̍lāa̍.

⁵⁰O̍ ko̍ŋ, mī wānā so̍līāā lāsa̍lāa̍ ō mɛ̄ɛ̄ndi̍a̍ŋ yu̍l cho̍ ko̍ŋ o̍ nyɛ̄ kōŋ ndo̍. Mbō chūa̍ nyɛ̄ kōŋ mbō kɛ̄si̍ ndu̍ īnɛ̍ te̍ŋge̍le̍ŋ le̍ pālɛ̍i̍ ī ŋɔ᷄mmɛ̍ū.

⁵¹Ō pāa̍le̍ ŋɔ̍mmɛ̍ūle̍ŋ chōo̍, wānā so̍līāā lāsa̍lāa̍ ō nɔ̄ mbō mɛ̄ɛ̄ndi̍a̍ŋ vɛ̍lɛ̄ yu᷄l cho̍ o̍ nyɛ̄ kōŋ ndo̍. Tē yūl kōŋ ō hīōū lāchī a̍ pɛ̄ŋgɛ̄la᷄ŋndo̍ o̍ nyɛ̄ kōŋ pɛ̍, mɛ̄ɛ̍ yu᷄l nɔ̍lā mbō tɛ̄ɛ̄mbu̍u̍ nyɔ̄ɔ̍ wo̍ cho̍ ko̍ŋ ni̍. Nyɛ̄ kōŋ ō nɔ̄ɔ̄lɛ̍i̍yo̍ o̍ wa᷅ ya̍ Mɛ̄lɛ̄ka̍ o̍ hɔ̄l ni̍.

⁵²Nyɛ̄ kōŋ ō wa̍ o̍ to̍o̍sīāā a̍ kōlā ba̍ā kālā ka̍lā, ō wa̍ nyɛ᷅ chūɛ̄ɛ̄na᷄ŋ cho̍ ō tōōsīāā a̍ yīīŋīī vīsī, ā nɔ̄ mā lōm ndu̍ chi̍li̍kɔ̍, kāni̍ fo̍ndōle̍, yūl kōŋ, yu̍l ta᷅ŋ o̍ nyɔ̄ɔ̍ mbō tɛ̄ɛ̄mbu̍u̍ nyɔ̄ɔ̍ wo̍ cho̍ ko̍ŋ ni̍.

⁵³“Kɛ̍ tē wānā so̍līāā lāsa̍lāa̍ ō mɛ̄ɛ̄ndi̍a̍ŋ nyɛ᷅ kōŋ pɛ̍, mbō sāālu̍ŋ māā yūl kōŋ ō hīu̍ la̍chi̍ a̍ pɛ̄ŋgɛ̄la᷄ŋndo̍ le̍,

⁵⁴wānā so̍līāā lāsa̍lāa̍ ō nɔ̄ mbō dīmi̍ mā tɔ̄ɔ̄ nyɛ̄ kōŋ, o̍ ko̍ŋ kɔ̍ɔ̍lī, mbō chu̍a̍ vɛ̄lɛ̄ nyɛ̄ kōŋ mbō kɛ̄si̍ ndu̍ īnɛ̍ te̍ŋge̍le̍ŋ le̍ pālɛ̍i̍ vɛ̄lɛ̄ ī ŋɔ᷄mmɛ̍ū.

⁵⁵O̍ pāa̍le̍ ŋɔ̍mmɛ̍ūle̍ŋ chōo̍, wānā so̍līāā lāsa̍lāa̍ ō mɛ̄ɛ̄ndi̍a̍ŋ vɛ̍lɛ̄ nyɛ̄ kōŋ. Tē nyɛ̄ kōŋ ō wa̍ wɔ̄ pɛ̍ le̍nde̍ a̍ tɔ̄ɔ̄ nda̍ tɔ̄ɔ̄ ndu̍ ko̍ŋ ndo̍ kpo̍u̍, mbō fēŋa̍ŋ te̍, ā yɔ̍ŋ bɛ̍ɛ̍ mī yūl kōŋ ō hīu̍ la̍chi̍ a̍ pɛ̄ŋgɛ̄la᷄ŋndo̍ le̍, nyɛ̍ kōŋ ō nɔ̄ɔ̄lɛ̍i̍yo̍ o̍ wa᷅ ya̍ hɔ̄l ni̍. Ō wa᷄ o̍ hɔ̄lāā kɛ̄ndīa̍a̍, ō wa̍ o̍ hɔ̄lāā wɔ̄ɔ̍ŋnda̍ nāā kōŋ ō de᷄l o̍ nyɛ̄ kōŋ ni̍ mbo̍ yu᷄l, wānā so̍līāā lāsa̍lāa̍ ō nɔ̄ mbō lōm nyɛ̄ kōŋ chi̍li̍kɔ̍.

⁵⁶Kɛ̍ tē wānā so̍līāā lāsa̍lāa̍ ō sāālu̍ŋ pɛ̍ māā tɔ̄ɔ̄ nda̍ tɔ̄ɔ̄ nyɛ̄ kōŋ ndo̍ yūl kōŋ ō chūu̍ fa̍ŋa᷄ŋ te̍, nyɛ̄ kōŋ ō wa̍ ya̍u̍ vīsi̍, ō wa̍ nyɛ᷅ cho̍ ō tōōsīāā a̍ kōlā chēle̍ŋ, wānā so̍līāā lāsa̍lāa̍ ō nɔ̄ mbō fāŋa̍ fo̍ndāŋ yūl kōŋ ō chō wo̍ chɛ̍ chɛ̍.

⁵⁷Kɛ̍ tē yūl kōŋ ō mīīŋgu̍ vɛ̄lɛ̄ o̍ nyɛ̄ kōŋ pɛ̍, mbō wa̍ hīōūwɔ̄ɔ̍ lāchī a̍ pɛ̄ŋgɛ̄la᷄ŋndo̍, ō wa̍ ya̍u̍ vīsi̍, ō wa̍ nyɛ᷅ cho̍ ō tōōsīāā a̍ kōlā chēle̍ŋ, a̍ fūŋnde̍ ba̍ā kālā ka̍lā, ā nɔ̄ mā lōm nyɛ̄ kōŋ.

⁵⁸Ndu̍yɛ̍ ā yɔ᷄ŋ bɛ̍ɛ̍ mā tɔ̄ɔ̄ nyɔ̄ɔ̍ mī yūl kōŋ ō fāŋa̍ŋ kpo̍u̍, ā nɔ̄ vɛ̄lɛ̄ mā mīŋgi̍ ndu̍ tɔ̄ɔ̄, ma̍lāŋ o̍ si̍mnūŋ o̍ di̍a̍ndāā ya̍ o̍ hɔ̄l.

⁵⁹“Nyɛ̄ o̍ nyɛ̍ yu̍l nu̍a̍ā pɛ̍, ō wa᷄ nyɛ̍ chūɛ̄ɛ̄na᷄ŋ cho̍ ō tōōsīāā a̍ fūŋnde̍ ba̍ā kālā ka̍lā, kɛ̄lɛ̄ŋgāā a̍ yīīŋīī sāā, ō wa̍ nyɛ̍ cho̍ ō tōōsīāā a̍ yāu̍ vīsī, sāwāla̍ŋ ndāŋ la̍ŋ la̍ cho̍ le̍ nyɛ̄ wāā le̍nde̍ ni̍. Nɛ̄īla̍ŋ ndāŋ wānā so̍līāā lāsa̍lāa̍ ō lōōkū si̍nā ni̍ tē nyɛ̄ kōŋ ō chō ō dīāndāā ya̍ o̍ hɔ̄l, ɔ̄ɔ̄ tē ō chō ō nɔ̄ɔ̄lɛ̍i̍.”