Read Southern Kisi Lɛ̄vi̍ti̍kɔ̍ɔ̄ 15 Bible Online

Lɛ̄vi̍ti̍kɔ̍ɔ̄ 15 - Southern Kisi bible

Lɛ̄vi̍ti̍kɔ̍ɔ̄ 15

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē nda̍ E̍lɔ̄ŋ āā,

²“Lā dīmu̍l wa᷅ŋnda̍ I̍sɔ̄lūɛ̄ī māā sāwāla̍ ya̍ Mɛ̍lɛ̄ka̍ ke̍ nda̍ vɛ̄lɛ̄ la̍ŋ la̍ cho̍ la᷅ŋ ni̍. Tē wānā pɔ̍nɔ̍ɔ̍ ō sɔ̄lā nāā wānā pɔ̍nɔ̍ɔ̍ ō chīī o̍ lɛ̄mbɔ̄ɔ̍ ni᷄ŋ ndo̍ pɛ̍, mɛ̄ɛ̍ wānā pɔ̍nɔ̍ ko̍ŋ ō sīmnu᷄ŋ o̍ nɔ̍ɔ̍lɛ̍i̍ ya̍ o̍ hɔ̄l.

³Wānā pɔ̍nɔ̍ sɔ̍lā ko̍ŋ na̍a̍ kōŋ ndo̍, ā yɔ᷄ŋ bɛ̍ɛ̍ mī nāā kōŋ ō pɛ̄ŋgi̍ ɔ̄ɔ̄ mbō hīōū lāchī, wānā pɔ̍nɔ̍ ko̍ŋ ō wā o̍ nɔ̍ɔ̍lɛ̍i̍ ya̍ o̍ hɔ̄l. Ndu̍yɛ̍ sāwāla̍ cho̍ a̍ wānā wa̍ā le̍nde̍ o̍kɔ̄ɔ̄ la̍ŋ la̍ cho̍ la᷅ŋ ni̍.

⁴Kpēlē o̍ kpēlē wānā ko̍ŋ ō hīni̍ chōo̍ pɛ̍, ɔ̄ɔ̄ kpe̍ŋgbe̍i̍ o̍ kpe̍ŋgbe̍i̍ o̍ cha᷄l chōo̍ pɛ̍, kpēlē ko̍ŋ, ō sīmnu᷄ŋ o̍ nɔ̍ɔ̍lɛ̍i̍ ya̍ o̍ hɔ̄l.

⁵Wānā o̍ wāna̍ pi̍la̍ŋ kpe̍le̍ wānā ko̍ŋ ō hīni̍ chōo̍ wo̍ pɛ̍, kɛ̄lɛ̄ŋgāā mbō cha᷄l o̍ kpe̍ŋgbe̍i̍ wānā ko̍ŋ ō cha᷄l chōo̍ wo̍, wānā ko̍ŋ ō sīmnu᷄ŋ o̍ nɔ̍ɔ̍lɛ̍i̍ ya̍ o̍ hɔ̄l. Pāa̍le̍ le̍ŋ kpɛ᷅ŋ ō nɔ̄ɔ̄lɛ̍i̍ wānā ko̍ŋ ō nīīlū ya̍ o̍ hɔ̄l ni̍, ha̍a̍a̍ mī fīti̍līo̍o̍ ō tōl. Wānā ko̍ŋ ō nɔ̄ mbō tɔ̄ɔ̄ nyɛ̄la̍ wa᷅ ndu̍ lēkɔ̄ɔ̍ la̍ŋ, ndu̍yɛ̍ mbō pūlu̍ŋ fo̍ ma̍lāŋ o̍ si̍mnūŋ o̍ di̍a̍ndāā ya̍ o̍ hɔ̄l.

⁶

⁷O̍ ko̍ŋ kɔ̍ɔ̍lī, wānā o̍ wāna̍ pi̍la̍ŋ wānā pɔ̍nɔ̍ ko̍ŋ pɛ̍, wānā ko̍ŋ bɛ̍ɛ̍ o̍ si̍mnu᷄ŋ o̍ nɔ̍ɔ̍lɛ̍i̍ ya̍ o̍ hɔ̄l. Wānā ko̍ŋ ō nɔ̄ mbō tɔ̄ɔ̄ nyɛ̄la̍ wa᷅ ndu̍ lēkɔ̄ɔ̍ la̍ŋ, ndu̍yɛ̍ mbō pūlu̍ŋ fo̍ ma̍lāŋ o̍ si̍mnūŋ o̍ di̍a̍ndāā ya̍ o̍ hɔ̄l. Ndu̍yɛ̍ pāa̍le̍ le̍ŋ kpɛ᷅ŋ ō nɔ̄ɔ̄lɛ̍i̍ wānā ko̍ŋ ō nīīlū ya̍ o̍ hɔ̄l ni̍, ha̍a̍a̍ mī fīti̍līo̍o̍ tōl.

⁸Ndu̍yɛ̍ tē wānā pɔ̍nɔ̍ chi̍i̍ ko̍ŋ o̍ lɛ̄mbɔ̄ɔ̍ ni᷄ŋ ndo̍ ō tūfū wa̍nā o̍ wānā lɔ̄lūa̍ŋ chōo̍ pɛ̍, wānā ko̍ŋ bɛ̍ɛ̍ o̍ si̍mnu᷄ŋ o̍ nɔ̍ɔ̍lɛ̍i̍ ya̍ o̍ hɔ̄l. Pāa̍le̍ le̍ŋ kpɛ᷅ŋ ō nɔ̄ɔ̄lɛ̍i̍ wānā ko̍ŋ ō nīīlū ya̍ Mɛ̄lɛ̄ka̍ o̍ hɔ̄l ni̍, ha̍a̍a̍ mī fīti̍līo̍o̍ tōl. Wānā ko̍ŋ ō nɔ̄ mbō tɔ̄ɔ̄ nyɛ̄la̍ wa᷅ ndu̍ lēkɔ̄ɔ̍ la̍ŋ, ndu̍yɛ̍ mbō pūlu̍ŋ fo̍ ma̍lāŋ o̍ si̍mnūŋ o̍ di̍a̍ndāā ya̍ o̍ hɔ̄l.

⁹Nyɛ̄ o̍ nyɛ̄ wānā pɔ̍nɔ̍ ko̍ŋ ō wa̍ kɔ̄la̍ŋ chōo̍ pɛ̍, nyɛ̄ kōŋ bɛ̍ɛ̍ ō sīmnu᷄ŋ o̍ nɔ̍ɔ̍lɛ̍i̍ ya̍ o̍ hɔ̄l.

¹⁰Wānā o̍ wāna̍ pi̍la̍ŋ nyɛ᷅ kōŋ pɛ̍, wānā ko̍ŋ pāa̍le̍ le̍ŋ kpɛ᷅ŋ ō nɔ̄ɔ̄lɛ̍i̍ o̍ ni̍i̍lū ya̍ o̍ hɔ̄l ni̍, ha̍a̍a̍ mī fīti̍līo̍o̍ tōl. Ndu̍yɛ̍ wānā o̍ wāna̍ chu̍a̍ nyɛ̄ kōŋ pɛ̍ mbō yɛ̄ɛ̄ ndu̍ īnɛ̍, wānā ko̍ŋ bɛ̍ɛ̍ ō sīmnu᷄ŋ o̍ nɔ̍ɔ̍lɛ̍i̍ ya̍ o̍ hɔ̄l. Pāa̍le̍ le̍ŋ kpɛ᷅ŋ ō nɔ̄ɔ̄lɛ̍i̍ wānā ko̍ŋ ō nīīlū ya̍ Mɛ̄lɛ̄ka̍ o̍ hɔ̄l ni̍, ha̍a̍a̍ mī fīti̍līo̍o̍ tōl. Wānā ko̍ŋ ō nɔ̄ mbō tɔ̄ɔ̄ nyɛ̄la̍ wa᷅ ndu̍ lēkɔ̄ɔ̍ la̍ŋ, ndu̍yɛ̍ mbō pūlu̍ŋ fo̍ ma̍lāŋ o̍ si̍mnūŋ o̍ di̍a̍ndāā ya̍ o̍ hɔ̄l.

¹¹Wānā o̍ wānā, wānā pɔ̍nɔ̍ ko̍ŋ ō pīla̍ŋ pɛ̍, mbō pūlū fɛ̍lɛ̍ŋ ba᷅la̍ŋ te̍, wāna̍ o̍ pi̍lāŋ ko̍ŋ ndo̍ bɛ̍ɛ̍ ō sīmnu᷄ŋ o̍ nɔ̍ɔ̍lɛ̍i̍ ya̍ o̍ hɔ̄l. Pāa̍le̍ le̍ŋ kpɛ᷅ŋ ō nɔ̄ɔ̄lɛ̍i̍ wānā ko̍ŋ ō nīīlū ya̍ o̍ hɔ̄l ni̍, ha̍a̍a̍ mī fīti̍līo̍o̍ tōl. Wānā ko̍ŋ ō nɔ̄ mbō tɔ̄ɔ̄ nyɛ̄la̍ wa᷅ ndu̍ lēkɔ̄ɔ̍ la̍ŋ, ndu̍yɛ̍ mbō pūlu̍ŋ fo̍ ma̍lāŋ o̍ si̍mnūŋ o̍ di̍a̍ndāā ya̍ o̍ hɔ̄l.

¹²Tē wānā pɔ̍nɔ̍ ko̍ŋ ō pīla̍ŋ kpɛ̍ɛ̍nɛ̍i̍ pūūlū pɛ̍, kpɛ̍ɛ̍nɛ̍i̍ ke̍ŋ ā nɔ̄ mā pɛ̄l ndi̍. Tē ō pīla̍ŋ nyɛ᷅ īlāāndū o̍ nyɛ̄ īlāāndu̍ cho̍ ī tōōsīāā a̍ yɔ̄m pɛ̍, nyɛ̄ īlāāndīī kēŋ ā nɔ̄ mā tɔ̄ɔ̄ ndi̍ a̍ mɛ̄ŋnda̍ŋ.

¹³Tē wānā pɔ̍nɔ̍ ko̍ŋ ō sēŋgū a̍ nāā kōŋ pɛ̍, ō nɔ̄ mbō chu᷄m le̍ pālɛ̍i̍ ī ŋɔ᷄mmɛ̍ū le̍ mbō sɔ̄la̍ dīndīo̍o̍ ya̍ o̍ hɔ̄l. O̍ ko̍ŋ kɔ̍ɔ̍lī, ō nɔ̄ mbō tɔ̄ɔ̄ nyɛ̄lā ndɔ̄la̍ŋ, ndu̍yɛ̍ mbō pūlu᷄ŋ a̍ mɛ̄ŋmā sɛ̄nɛ̄īya̍ŋ fo̍. O̍ ko̍ŋ, mbō sīmnu᷄ŋ o̍ di̍a̍ndāā ya̍ o̍ hɔ̄l.

¹⁴Wānā ko̍ŋ ō nɔ̄ mbō chu᷄m le̍ pālɛ̍i̍ ī ŋɔ᷄mmɛ̍ū, o̍ pāa̍le̍ ŋɔ̄ma̍a̍ le̍ŋ chōo̍, ō hīŋ a̍ ka᷅ŋgbu̍a̍a̍ ā ŋīɔ̍ɔ̍ŋ ɔ̄ɔ̄ pīīŋāā fɔ̍ŋndu̍a̍a̍ ā ŋīɔ̍ɔ̍ŋ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ la̍tu̍lu̍ wo̍ sōndōo̍. Tē ō hīŋ a̍ nda̍ pɛ̍, ō ke̍ wānā so̍līāā lāsa̍lāa̍.

¹⁵O̍ ko̍ŋ, mī wānā so̍līāā lāsa̍lāa̍ ō sōli̍ yōūwāā kāŋ sa̍lāa̍, ō sōli̍ pɛ̍ o̍ pi᷅lɛ̍ sa̍la̍ fa̍ŋā yɔ̄ŋ wɔ̄ɔ̍ŋndo̍ wo̍, ō sōli̍ vɛ̄lɛ̄ ō pīlɔ̍ɔ̍ sa̍lā lūāmāa̍. Mɛ̄ɛ̍ o̍ to᷄lta̍ŋ nda᷅ŋ wānā so̍līāā lāsa̍lāa̍ ō lōōkū to̍sā ni̍ mī wānā pɔ̍nɔ̍ ko̍ŋ ō sīmnu᷄ŋ o̍ di̍a̍ndāā ya̍ o̍ hɔ̄l.

¹⁶“Tē wānā pɔ̍nɔ̍ɔ̍ ō chīi̍ chīī yɔ̄ŋāa̍ ho̍ō o̍ lɛ̄mbɔ̄ɔ̍ ni᷄ŋ pɛ̍ mbō ve᷄ na̍ā le̍, wānā pɔ̍nɔ̍ ko̍ŋ ō sīmnu᷄ŋ o̍ nɔ̍ɔ̍lɛ̍i̍ ya̍ o̍ hɔ̄l. Pāa̍le̍ le̍ŋ kpɛ᷅ŋ ō nɔ̄ɔ̄lɛ̍i̍ wānā ko̍ŋ ō nīīlū ya̍ o̍ hɔ̄l ni̍, ha̍a̍a̍ mī fīti̍līo̍o̍ tōl. Ō nɔ̄ mbō pūlu̍ŋ a̍ bōlle̍ŋ kpo̍u̍ le̍ mbō sīmnu᷄ŋ vɛ̍lɛ̄ o̍ di̍a̍ndāā ya̍ o̍ hɔ̄l.

¹⁷Ndu̍yɛ̍ tē chīī kōŋ ō pīla̍ŋ do᷅ma̍ ndɔ̄ɔ̍ pɛ̍, ɔ̄ɔ̄ mbō pīla̍ŋ ko᷅la̍ cho̍ ō tōōsīāā a̍ yāu̍ vīsīo̍o̍ wo̍, dōmā ko̍ŋ ɔ̄ɔ̄ kōla̍ ko̍ŋ, ā nɔ̄ mā tɔ̄ɔ̄ ndu̍. Ndu̍yɛ̍ dōmā ko̍ŋ ɔ̄ɔ̄ kōlā ko̍ŋ, pāa̍le̍ le̍ŋ kpɛ᷅ŋ ō nɔ̄ɔ̄lɛ̍i̍ o̍ ni̍i̍lū ya̍ o̍ hɔ̄l ni̍, ha̍a̍a̍ mī fīti̍līo̍o̍ tōl.

¹⁸Tē wānā pɔ̍nɔ̍ɔ̍ nda̍ wānā la̍nɔ̍ɔ̍ ā bɔ̄ŋa̍ nɔ̄ɔ̍ pɛ̍, mī wānā pɔ̍nɔ̍ɔ̍ ō chīi̍, nda̍ ŋi̍ɔ̍ɔ̍ŋ kpo̍u̍ ā nɔ̄ mā pūlu᷄ŋ. Ndu̍yɛ̍ pāa̍le̍ le̍ŋ kpɛ᷅ŋ ā nɔ̄ɔ̄lɛ̍i̍ nda̍ nīīlū ya̍ o̍ hɔ̄l ni̍, ha̍a̍a̍ mī fīti̍līo̍o̍ tōl.

¹⁹Tē wānā la̍nɔ̍ɔ̍ ō chē te̍le̍ŋ ndɔ̄ɔ̍ pɛ̍, le̍ pālɛ̍i̍ ī ŋɔ᷄mmɛ̍ū wānā la̍nɔ̍ ko̍ŋ ō ve᷅ o̍ di̍a̍ndāā ya̍ Mɛ̍lɛ̄ka̍ o̍ hɔ̄l te̍. Ndu̍yɛ̍ wānā o̍ wāna̍ pi̍la̍ŋ wa̍nā la̍nɔ̍ wa̍ā le̍nde̍ pɛ̍, wānā ko̍ŋ bɛ̍ɛ̍ pāa̍le̍ le̍ŋ kpɛ᷅ŋ ō nɔ̄ɔ̄lɛ̍i̍ o̍ ni̍i̍lū ya̍ o̍ hɔ̄l ni̍, ha̍a̍a̍ mī fīti̍līo̍o̍ tōl.

²⁰Ndu̍yɛ̍ a̍ te̍le̍ŋ o̍ cho̍ ko̍ŋ o̍ te̍le̍ŋ ndɔ̄ɔ̍ ni᷄ŋ ndo̍, nyɛ̄ o̍ nyɛ̄ o̍ hi̍ni̍ chōo̍, ɔ̄ɔ̄ mbō cha᷄l lēchōo̍ pɛ̍, nyɛ̄ kōŋ bɛ̍ɛ̍ ō sīmnu᷄ŋ o̍ nɔ̍ɔ̍lɛ̍i̍ ya̍ o̍ hɔ̄l.

²¹Wānā o̍ wāna̍ pi̍la̍ŋ kpe̍le̍ wānā la̍nɔ̍ ko̍ŋ ō hīni̍ cho̍o̍ wo̍ pɛ̍, wānā ko̍ŋ ō sīmnu᷄ŋ o̍ nɔ̍ɔ̍lɛ̍i̍ ya̍ o̍ hɔ̄l. Pāa̍le̍ le̍ŋ kpɛ᷅ŋ ō nɔ̄ɔ̄lɛ̍i̍ wānā ko̍ŋ ō nīīlū ni̍, ha̍a̍a̍ mī fīti̍līo̍o̍ tōl. Wānā ko̍ŋ ō nɔ̄ mbō tɔ̄ɔ̄ nyɛ̄la̍ cho̍ ndu̍ lēkɔ̄ɔ̍ la̍ŋ, ndu̍yɛ̍ mbō pūlu̍ŋ fo̍ ma̍lāŋ o̍ si̍mnūŋ o̍ di̍a̍ndāā ya̍ o̍ hɔ̄l.

²²Wānā o̍ wāna̍ pi̍la̍ŋ nyɛ᷅ o̍ nyɛ̄ wānā la̍nɔ̍ ko̍ŋ ō cha᷄l chōo̍ wo̍ pɛ̍, wānā ko̍ŋ bɛ̍ɛ̍ ō sīmnu᷄ŋ o̍ nɔ̍ɔ̍lɛ̍i̍ ya̍ o̍ hɔ̄l. Pāa̍le̍ le̍ŋ kpɛ᷅ŋ ō nɔ̄ɔ̄lɛ̍i̍ wānā ko̍ŋ ō nīīlū ni̍, ha̍a̍a̍ mī fīti̍līo̍o̍ tōl. Wānā ko̍ŋ ō nɔ̄ mbō tɔ̄ɔ̄ nyɛ̄la̍ wa᷅ ndu̍ lēkɔ̄ɔ̍ la̍ŋ, ndu̍yɛ̍ mbō pūlu̍ŋ fo̍ ma̍lāŋ o̍ si̍mnūŋ o̍ di̍a̍ndāā ya̍ o̍ hɔ̄l.

²³Wānā pɔ̍nɔ̍ o̍ wānā pɔ̍nɔ̍ pi̍la̍ŋ kpe̍le̍ wānā la̍nɔ̍ ko̍ŋ ō hīni̍ chōo̍ wo̍ a̍ te̍le̍ŋ ko̍ŋ, ɔ̄ɔ̄ mbō pīla̍ŋ nyɛ᷅ o̍ cha̍l chōo̍ wo̍ pɛ̍, wānā pɔ̍nɔ̍ ko̍ŋ pāa̍le̍ le̍ŋ kpɛ᷅ŋ ō nɔ̄ɔ̄lɛ̍i̍ o̍ ni̍i̍lū ni̍, ha̍a̍a̍ mī fīti̍līo̍o̍ tōl.

²⁴Ndu̍yɛ̍ wānā pɔ̍nɔ̍ o̍ wānā pɔ̍nɔ̍ bɔ̍ŋa̍ nɔ̄ɔ̍ a̍ wānā la̍nɔ̍ ko̍ŋ mī te̍le̍ŋ ndɔ̄ ko̍ŋ ō pīla̍ŋ ndu̍ pɛ̍, wānā pɔ̍nɔ̍ ko̍ŋ ō sīmnu᷄ŋ o̍ nɔ̍ɔ̍lɛ̍i̍ ya̍ o̍ hɔ̄l le̍ pālɛ̍i̍ ī ŋɔ᷄mmɛ̍ū. Ndu̍yɛ̍ kpēlē o̍ kpēlē wānā pɔ̍nɔ̍ ko̍ŋ ō hīni̍ chōo̍ a̍ te̍le̍ŋ ko̍ŋ pɛ̍, kpēlē ko̍ŋ bɛ̍ɛ̍ o̍ si̍mnu᷄ŋ o̍ nɔ̍ɔ̍lɛ̍i̍ ya̍ o̍ hɔ̄l.

²⁵Tē wānā la̍nɔ̍ɔ̍ bōōndi̍i̍ ndūɛ̍i̍ o̍ nɔ̍ le̍ te̍le̍ŋ ndɔ̄ɔ̍ chɔ̄ɔ̍ ve̍ ī fūūlu̍u̍ le̍ mbō chē te̍le̍ŋ ndɔ̄ɔ̍, ndu̍yɛ̍ mbō tōsa̍ pālɛ̍i̍ cha̍la̍ŋ ō chō o̍ te̍le̍ŋ ndɔ̄ ko̍ŋ ni᷄ŋ, ɔ̄ɔ̄ mbō chē te̍le̍ŋ ndɔ̄ɔ̍ a̍ te̍le̍ŋ o̍ nɔ̍ le̍ chɔ̄ɔ̍ wo̍, kɛ̍ mī pālɛ̍i̍ o̍ nɔ̍ le̍ chīīyo̍ ve̍ ī hīōū ō chīi̍ le̍ pɛ̍, pālɛ̍i̍ wānā la̍nɔ̍ ko̍ŋ ō wā ke̍ŋ o̍ te̍le̍ŋ ndɔ̄ɔ̍ ni᷄ŋ nde̍ kpo̍u̍, ō wā o̍ nɔ̍ɔ̍lɛ̍i̍ ya̍ o̍ hɔ̄l ni̍. Mɛ̄ɛ̍ o̍ wa᷅ nu̍a̍ā ō nɔ̄ɔ̄lɛ̍i̍ o̍ te̍le̍ŋ ndɔ̄ kpe̍e̍kpe̍i̍yo̍ ni᷄ŋ yɛ̍, le̍nde̍ o̍ wa᷅ o̍ nɔ̍ɔ̍lɛ̍i̍ ya̍ o̍ hɔ̄l o̍ pālɛ̍i̍ ke̍ŋ bɛ̄ŋgu̍ ni̍.

²⁶Ndu̍yɛ̍ pālɛ̍i̍ o̍ wa᷅ ke̍ŋ o̍ te̍le̍ŋ ndɔ̄ɔ̍ ni᷄ŋ nde̍, kpēlē o̍ kpēlē o̍ hi̍ni̍ chōo̍ pɛ̍, ɔ̄ɔ̄ mbō cha᷄l o̍ nyɛ̄ o̍ nyɛ̄ chōo̍, kpēlē ko̍ŋ, ɔ̄ɔ̄ nyɛ̄ kōŋ bɛ̍ɛ̍ ō nɔ̄ɔ̄lɛ̍i̍ o̍ wa᷅ ya̍ o̍ hɔ̄l ni̍. Mɛ̄ɛ̍ o̍ wa᷅ nu̍a̍ā ō nɔ̄ɔ̄lɛ̍i̍ te̍le̍ŋ ndɔ̄ kpe̍e̍kpe̍i̍yo̍ ni᷄ŋ yɛ̍, le̍nde̍ ko̍ni̍ o̍ wa᷅ o̍ pālɛ̍i̍ ke̍ŋ bɛ̄ŋgu̍ ni̍.

²⁷Ndu̍yɛ̍ kpēlē o̍ kpēlē wānā la̍nɔ̍ ko̍ŋ ō hīni̍ cho̍o̍ a̍ te̍le̍ŋ ko̍ŋ pɛ̍, ndu̍yɛ̍ mbō cha᷄l o̍ nyɛ̄ o̍ nyɛ̄ chōo̍ pɛ̍, wānā pɔ̍nɔ̍ o̍ wāna̍ pi̍la̍ŋ kpe̍lē ko̍ŋ kɛ̄lɛ̄ŋgāā nyɛ̄ kōŋ pɛ̍, wānā ko̍ŋ bɛ̍ɛ̍ o̍ si̍mnu᷄ŋ o̍ nɔ̍ɔ̍lɛ̍i̍ ya̍ o̍ hɔ̄l. Pāa̍le̍ le̍ŋ kpɛ᷅ŋ ō nɔ̄ɔ̄lɛ̍i̍ wānā ko̍ŋ ō nīīlū ni̍, ha̍a̍a̍ mī fīti̍līo̍o̍ tōl. Wānā ko̍ŋ ō nɔ̄ mbō tɔ̄ɔ̄ nyɛ̄la̍ wa᷅ ndu̍ lēkɔ̄ɔ̍ la̍ŋ, ndu̍yɛ̍ mbō pūlu̍ŋ fo̍ ma̍lāŋ o̍ si̍mnūŋ o̍ di̍a̍ndāā ya̍ o̍ hɔ̄l.

²⁸Ndu̍yɛ̍ tē wānā la̍nɔ̍ɔ̍ ō chīi̍ te̍le̍ŋ ndɔ̄ɔ̍ pɛ̍, ō nɔ̄ mbō kāndu̍ pālɛ̍i̍ chɔ̄mndo̍, ha̍a̍a̍ mbō chīi̍ pālɛ̍i̍ ī ŋɔ᷄mmɛ̍ū, ma̍lāŋ o̍ si̍mnūŋ o̍ di̍a̍ndāā ya̍ o̍ hɔ̄l.

²⁹Tē pālɛ̍i̍ ŋɔ̍mmɛ̍ū kēŋ ī hīōū pɛ̍, o̍ pāa̍le̍ ŋɔ̄ma̍a̍ le̍ŋ chōo̍ ō hīŋ a̍ ka᷅ŋgbu̍a̍a̍ ā ŋīɔ̍ɔ̍ŋ ɔ̄ɔ̄ pīīŋāā fɔ̍ŋndu̍a̍a̍ ā ŋīɔ̍ɔ̍ŋ nāa̍ wānā so̍līāā lāsa̍lāa̍ chūā o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ o̍ cho̍ a̍ nya̍ lātūlu̍ wo̍ sōndōo̍.

³⁰O̍ ko̍ŋ, mī wānā so̍līāā lāsa̍lāa̍ ō sōli̍ yōūwāā ku̍ndālā tīɔ̍ɔ̍ŋāā kāŋ sa̍lāa̍, ō sōli̍ pɛ̍ o̍ pi᷅lɛ̍ sa̍lā fa̍ŋā yɔ̄ŋ wɔ̄ɔ̍ŋndo̍ wo̍, ō sōli̍ ō pīlɔ̍ɔ̍ sa̍lā lūāmāa̍. Mɛ̄ɛ̍ o̍ nɛ̄īyo̍ ho̍ō ni᷄ŋ wānā so̍līāā lāsa̍lāa̍ ō lōōkū to̍sā ni̍, mī wānā la̍nɔ̍ si̍mnu᷄ŋ ko̍ŋ o̍ nɔ̍ɔ̍lɛ̍i̍ le̍ te̍le̍ŋ ndɔ̄ɔ̍ chɔ̄ɔ̍ wo̍ ō sīmnu᷄ŋ vɛ̍lɛ̄ o̍ di̍a̍ndāā ya̍ o̍ hɔ̄l.

³¹Mɛ̄ɛ̍ nɛ̄īyo̍ ho̍ō nya̍ lōōkū to̍sā ni̍ mī I̍sɔ̄lūɛ̍i̍ya̍ ā kpɛ̄kpɛ̍la̍ nyɛ᷄m to̍sā mā sīmnu᷄ŋ a̍ nɔ̍ɔ̍lɛ̍i̍yo̍ŋ, ko̍ŋ to̍sā ni̍ ā tɛ̍ɛ̍mbūū chi̍ɛ̍ī ni̍ cho̍ nya̍ tɛ̄ɛ̄ŋ ndo̍ lābɛ̄ɛ̄, mā lo᷄ a̍ nɔ̍ɔ̍lɛ̍i̍ ya̍ o̍ hɔ̄l mā sɔ̄la̍ pīɔ̍mndo̍ le̍.

³²Tē nāā wānā pɔ̍nɔ̍ɔ̍ ō chīī o̍ lɛ̄mbɔ̄ɔ̍ ni᷄ŋ ndo̍ ō bīī wānā pɔ̍nɔ̍ɔ̍ pɛ̍, ɔ̄ɔ̄ mī wānā pɔ̍nɔ̍ɔ̍ ō chīi̍ chīī yɔ̄ŋāa̍ ho̍ō o̍ lɛ̄mbɔ̄ɔ̍ ni᷄ŋ, ɔ̄ɔ̄ mī wānā la̍nɔ̍ɔ̍ ō sɔ̄la̍ nāā ŋ̄wāŋ lāāndōo̍, ɔ̄ɔ̄ mbō chē te̍le̍ŋ ndɔ̄ɔ̍, ɔ̄ɔ̄ mī wānā pɔ̍nɔ̍ɔ̍ nda̍ wānā la̍nɔ̍ɔ̍ ā bɔ̄ŋa̍ nɔ̄ɔ̍ a̍ te̍le̍ŋ wānā la̍nɔ̍ɔ̍ ō wā o̍ te̍le̍ŋ ndɔ̄ɔ̍ ni᷄ŋ ndo̍, sɔ̄ɔ̍ŋ to̍sā mu᷅ŋ mī wāŋndo̍ ō sīmnu᷄ŋ o̍ nɔ̍ɔ̍lɛ̍i̍ ya̍ o̍ hɔ̄l lo̍ŋ ki̍nɛ̍i̍, sāwāla̍ cho̍ le̍ wānāā wāā le̍nde̍ di̍ndīo̍o̍ ya̍ o̍ hɔ̄l la̍ŋ, la̍ cho̍ la̍ŋ ni̍.”