Read Southern Kisi Lɛ̄vi̍ti̍kɔ̍ɔ̄ 16 Bible Online

Lɛ̄vi̍ti̍kɔ̍ɔ̄ 16 - Southern Kisi bible

Lɛ̄vi̍ti̍kɔ̍ɔ̄ 16

¹Mɛ̄ɛ̍ pūa̍a̍ ŋi̍ɔ̍ɔ̍ŋāa̍ E̍lɔ̄ŋ nda̍, a̍ so̍li̍ sa̍lāa̍ o̍ nɛ̄ī che᷅le̍ŋ chōo̍ te̍ŋge̍le̍ŋ nda̍ ā vī, mi̍ Mɛ̍lɛ̄ka̍ Ya̍a̍wɛ̄ɛ̄ o̍ su̍a̍ā nāa̍ Mūu̍sē chu̍a̍.

²Mbo̍ dīmūl ndu̍ āā, “Di̍mu̍l E̍lɔ̄ŋ bɛ̍ nūm māā o̍ cho̍ te̍le̍ŋ o̍ te̍le̍ŋ te̍ o̍ nɔ̍ mbō lūɛ̄ī o̍ fo̍ndā nī di̍a̍ndāa̍ mbō hīōū o̍ kōla̍ cho̍ ō lāndāā lo̍ŋ ndo̍ lēkɔ̍ɔ̍lī le̍, kāni̍ fo̍ndōle̍, kɔ̍fū kpe̍ma̍ cho̍ o̍ kōlā ko̍ŋ lāchī wo̍, o̍ kūmbu̍ ndɔ̄ɔ̍ chōo̍ kpe̍ŋgbe̍i̍ ni̍ īnyīɛ̍ɛ̍yo̍ ō chō ni̍, nāa̍ ya̍ I̍ hu᷅ŋ mī wa̍ o̍ yu̍mbu̍ yu̍mbo̍o̍ ni᷄ŋ nda̍. Tē ō fūla̍ kɔ̄ɔ̄lī pɛ̍ mbō lūɛ̄ī lo̍ŋ te̍le̍ŋ o̍ nɔ̍ le̍ lūɛ̄īyɔ̄ɔ̄ le̍ wo̍, ō sɔ̄la̍ pīɔ̍mndo̍.

³Tē ō wa̍ lūɛ̄īyɔ̄ɔ̍ o̍ fo̍ndā nī di̍a̍ndāa̍ pɛ̍, ō nɔ̄ mbō kūɛ̄ a̍ nāū fɔ̍ŋndɔ̍ɔ̍ le̍ sa̍la̍ fa̍ŋā yɔ᷅ŋ wɔ̄ɔ̍ŋndo̍ wo̍ sōlīo̍o̍, o̍ ko̍ŋ kɔ̍ɔ̍lī, a̍ sāā fɔ̍ŋndɔ̍ɔ̍ le̍ sa̍lā lūāmāa̍ sōlīo̍o̍.

⁴“Ndu̍yɛ̍ te̍ ō wa̍ lūɛ̄īyɔ̄ɔ̍ lo̍ŋ pɛ̍, ō nɔ̄ mbō pūlu᷄ŋ fo̍, o̍ ko̍ŋ kɔ̍ɔ̍lī, mbō wōūnu̍ŋ nyɛ̍lā sōlīāā lāsa̍lā la̍ŋ, la̍ cho̍ lā tōōsīāā a̍ kōla̍ ba̍ā kālāa̍ mi̍ lā wā lā dīāndāā ya̍ Mɛ̍lɛ̄ka̍ o̍ hɔ̄l la̍ŋ, tē ō wōūnu̍ŋ pɛ̍ do᷅mā le̍bɛ̍ŋgo̍o̍, ō wōūnu̍ŋ do᷅mā vi̍lɛ̄i̍ wa᷅ o̍ dōmā ko̍ŋ chōo̍ wo̍, o̍ yīi̍ nu̍m yāu̍le̍ŋ lēchōo̍, o̍ ko̍ŋ kɔ̍ɔ̍lī, ō wōūnu̍ŋ mɔ̍si̍l vi̍lɛ̄īyo̍.

⁵O̍ nɔ̄ mbō nyūna̍ wāŋnda̍ I̍sɔ̄lūɛ̄ī mā ke̍ ndu̍ chūīŋāā tōōyīa̍a̍ ā ŋīɔ̍ɔ̍ŋ le̍ mbo̍ sōli̍ nda̍ sa̍lāa̍, ō pīlɛ̍ le̍ sa̍lā fa̍ŋā yɔ᷅ŋ wɔ̄ɔ̍ŋndo̍ wo̍, ō pīlɛ̍ le̍ sa̍lā lūāmāa̍.

⁶Ndu̍yɛ̍, ndu̍ E̍lɔ̄ŋ ō nɔ̄ mbō sōli̍ nāū tōōyōo̍ sa̍la̍ fa̍ŋā yɔ᷅ŋ wɔ̄ɔ̍ŋndo̍ wo̍, le̍ ndu̍ pi̍la̍ a̍ yu̍ŋgu̍ ndɔ̄ɔ̍.

⁷Chūīŋāā ŋīɔ̍ɔ̍ŋāā kāŋ nda̍, ō nɔ̄ mbō kūɛ̄ a̍ nda̍ Mɛ̍lɛ̍ka̍ Ya̍a̍wɛ̄ɛ̍ lāchī, o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ o̍ cho̍ a̍ nya̍ lātūlu̍ wo̍ sōndōo̍.

⁸Tē ō kūɛ̄ a̍ nda̍ lo̍ŋ pɛ̍, o̍ kɔ̍ wu̍ū kōo̍ŋ, le̍ sīnāa̍ chūi̍ŋ nɔ̍ le̍ sa̍lāa̍ sōli᷄ŋndo̍ o̍ ya̍ Mɛ̄lɛ̄ka̍ Ya̍a̍wɛ̄ɛ̄ lo̍ wo̍, a̍ chūi̍ŋ nɔ̍ le̍ kɔ̄la̍ŋ o̍ po̍llo̍ ni᷄ŋ A̍sa̍sɛ̄ɛ̄ wo̍.

⁹Chūīŋ kōo̍ŋ ŋ̄ chō chɔ̄m māā ndu̍ nɔ̍ le̍ sa̍lāa̍ sōli᷄ŋndo̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ ni̍ wo̍, E̍lɔ̄ŋ nɔ̍ mbō sōli̍ chūīŋ kōŋ sa̍lā fa̍ŋā yɔ᷅ŋ wɔ̄ɔ̍ŋndo̍ wo̍.

¹⁰Chūīŋ kōo̍ŋ chō chɔ̄m māā ndu̍ nɔ̍ le̍ kɔ̄la̍ŋ o̍ po̍llo̍ ni᷄ŋ A̍sa̍sɛ̄ɛ̄ wo̍, E̍lɔ̄ŋ o̍ nɔ̍ mbō hīŋ a̍ chūīŋ kōŋ yōōmū, mbō hu᷄ŋ yɔ̍ŋgū ndu̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍, o̍ ko̍ŋ kɔ̍ɔ̍lī, mā ma᷄l chūīŋndo̍ kōŋ mbō kūɛ̄nu᷄ŋ o̍ po̍llo̍ ni᷄ŋ A̍sa̍sɛ̄ɛ̄. Mɛ̄ɛ̍ o̍ nɛ̄īyo̍ ho̍ō ni᷄ŋ wāŋnda̍ nɔ̄lā ni̍ mā sɔ̄la̍ mālɔ̄ɔ̍ le̍ yɔ̄ŋndā ndāla̍ wɔ̍ɔ̍ŋnda̍ŋ.

¹¹O̍ ko̍ŋ kɔ̍ɔ̍lī, nāū tōōyē E̍lɔ̄ŋ o̍ nɔ̍ mbō sōli̍ sa̍la̍ fa̍ŋā yɔ᷅ŋ wɔ̄ɔ̍ŋndo̍ wo̍ le̍ ndu̍ pi̍la̍ a̍ yu̍ŋgu̍ ndɔ̄ɔ̍ wo̍, mī E̍lɔ̄ŋ o̍ yɔ̍ŋgu̍ nāū kōŋ o̍ ya̍ lo̍, mbō dīī ndu̍.

¹²O̍ ko̍ŋ kɔ̍ɔ̍lī, mbō kɔ̍ kɔ̍ndū dɛ̄ŋgūlta̍ŋ o̍ ma̍āŋndo̍ chōo̍, hɛ̄ŋgɛ̍i̍ chu̍a̍ā lēyīŋ ndo̍ cha̍ Mɛ̍lɛ̄ka̍ Ya̍a̍wɛ̄ɛ̄ lāchī. O̍ ko̍ŋ kɔ̍ɔ̍lī, mbō kɔ̄ndū vɛ̄lɛ̄ nyɛ̄m chūŋ kɛ̄ndɛ̄ kɛ̍ndɔ᷄ŋ ŋ̍ cho̍ ŋ̄ chūīyāā wo̍ŋ bāa̍ lē dīi̍ŋ, mbō kūɛ̄ a̍ mu̍ŋ o̍ fo̍ndā dīāndāa̍ hi̍o̍ū kpo̍u̍ wo̍, lātūlu̍ a̍ yīŋndē lēŋ.

¹³Mbō dɔ̄ū nyɛ̄m chūŋ kɛ̄ndɛ̄ŋ mu᷅ŋ o̍ yīŋndē lēŋ chōo̍ ya̍ Mɛ̍lɛ̄ka̍ Ya̍a̍wɛ̄ɛ̍ lāchī. O̍ ko̍ŋ, mī kūmi̍i̍ ke̍ŋ ī kūmbū kpe̍ŋgbe̍i̍ īnyīɛ̍ɛ̍yo̍, o̍ cho̍ o̍ kūmbū kɔ̍fu̍ kpe̍ma̍a̍ chōo̍ wo̍, yɔ̄ŋi̍ o̍ de̍l ndu̍ lēhɔ̄l mbō sɔ̄la̍ pīɔ̍mndo̍.

¹⁴O̍ ko̍ŋ kɔ̍ɔ̍lī, nāū o̍ di̍ī ko̍ŋ le̍ sa̍lāa̍ sōlīo̍o̍ le̍ ndu̍ pi̍la̍ a̍ yu̍ŋgu̍ ndɔ̄ɔ̍ wo̍, mbō wōu̍ sūe̍i̍ o̍ kōo̍ma̍ nāū kōŋ ni᷄ŋ, mbō fāsa̍ŋa̍ ma̍ŋ mā ti᷄ŋ o̍ kūmbū kɔ̍fū kōŋ lāchī, ō kpe̍ŋgbe̍i̍ īnyīɛ̍ɛ̍yo̍ ō chō lēchōo̍ wo̍, mbō fāsa̍ŋa̍ vɛ̄lɛ̄ mā ti᷄ŋ kɔ̍fū kālāa̍ lāchī lē ŋɔ᷄mmɛ̍ū.

¹⁵O̍ ko̍ŋ kɔ̍ɔ̍lī, mbō dīī chūi̍ŋ cho̍ le̍ sa̍la̍ fa̍ŋā yɔ̄ŋ wɔ̄ɔ̍ŋndo̍ wo̍ le̍ sa̍lāa̍ sōlīo̍o̍ le̍ wāŋnda̍ I̍sɔ̄lūɛ̄ī. Tē ō dīī ndu̍ pɛ̍, ō lūɛ̄ī a̍ kōo̍ma̍ ndūa̍a̍ŋ o̍ fo̍ndā dīāndāa̍ hi̍o̍ū kpo̍u̍ wo̍, ō fāsa̍ŋa̍ ma̍ŋ mā ti᷄ŋ o̍ kpe̍ŋgbe̍i̍ īnyīɛ̍ɛ̍yo̍ chōo̍, ndu̍yɛ̍ a̍ o̍ kpe̍ŋgbe̍i̍ kōŋ lāchī, mɛ̄ɛ̍ o̍ to̍sa̍ a̍ kōo̍ma̍ nāūwo̍ yɛ̍ ko̍ni̍.

¹⁶Tē wāŋnda̍ I̍sɔ̄lūɛ̄ī a̍ si̍mnu᷄ŋ a̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l pɛ̍, ndu̍yɛ̍ mā sōli̍ ya̍ dīōm, o̍ ko̍ŋ kɔ̍ɔ̍lī, mā tōsa̍ yɔ̄ŋ wɔ̄ɔ̍ŋndo̍ pɛ̍, nɛ̄īyo̍ ho̍ō o̍ nɔ̍ ni̍ mbō dīndi̍ fo̍ndā dīāndāa̍ hi̍o̍ū kpo̍u̍ wo̍. Ndu̍yɛ̍ tɛ̍ndīi̍ chɔ᷅m māā Mɛ̍lɛ̍ka̍ Ya̍a̍wɛ̄ɛ̄ chō a̍ nya̍ lātūlu̍ bɛ̍ɛ̍, le̍nde̍ ko̍ni̍ nya̍ nɔ̄ ni̍ mī lā dīndi̍ ndu̍, fo̍ndōle̍ ō chō ō tāŋgūlāā nya̍ I̍sɔ̄lūɛ̍i̍ya̍ tɛ̍ɛ̍ŋ, ndu̍yɛ̍ lā chō ā nɔ̄ɔ̄lɛ̍i̍ ya̍ Mɛ̍lɛ̄ka̍ o̍ hɔ̄l.

¹⁷Ndūyɛ̍ bōōndi̍i̍ E̍lɔ̄ŋ o̍ nɔ̍ mbō wa̍ o̍ fo̍ndā dīāndāa̍ hi̍o̍ū kpo̍u̍ wo̍ mbō wa̍ sa̍lāla̍ŋ ndāŋ sōlīo̍o̍ ve̍, sa̍lāa̍ le̍ ndu̍ pi̍la̍ a̍ yu̍ŋgu̍ ndɔ̄ɔ̍ le̍ yɔ̄ŋ ndā wɔ̍ɔ̍ŋndo̍, a̍ sa̍lāa̍ le̍ wāŋnda̍ I̍sɔ̄lūɛ̄ī kpo̍u̍ le̍ yɔ̄ŋ ndā wɔ̍ɔ̍ŋndo̍, wānā o̍ wānā che᷅le̍ŋ ō nɔ̍ mbō wa̍ o̍ tɛ̍ndīi̍ chɔ᷅m māā Mɛ̄lɛ̄ka̍ chō a̍ nya̍ la̍tu̍lu̍ wo̍ ni᷄ŋ te̍, ha̍a̍a̍ mbō chīi̍ sa̍lāla̍ŋ sōlī mbō fūla̍.

¹⁸Tē ō chīi̍ nyɛ̄ o̍ nyɛ̍ o̍ nɔ̍ le̍ tōsāa̍ lo̍ŋ to̍sā pɛ̍, ō fūla̍ o̍ ma̍āŋ cho̍ o̍ bɛ̍ɛ̄ ya̍ Mɛ̍lɛ̍ka̍ Ya̍a̍wɛ̄ɛ̄ lāchī wo̍. Tē ō fūla̍ pɛ̍, ō chūa̍ kōo̍ma̍ nāū o̍ di̍ī yo̍ mā ti᷄ŋ, a̍ kōo̍ma̍ chūīŋ o̍ di̍ī yo̍ mā ti᷄ŋ, ō sūu̍ ma̍ŋ o̍ nyɛ̄la̍ cho̍ sɔ̍ŋgi̍la̍ŋ māā lālēē la̍ŋ le̍ ndu̍ dīndīo̍o̍ ya̍ Mɛ̍lɛ̄ka̍ o̍ hɔ̄l.

¹⁹O̍ ko̍ŋ kɔ̍ɔ̍lī, mbō fāsa̍ŋa̍ kōo̍ma̍ ma̍ŋ mā ti᷄ŋ o̍ ma̍āŋndo̍ le̍ ŋɔ᷄mmɛ̍ū, a̍ īsū le̍ ma̍āŋ kōŋ dīndīo̍o̍, ndu̍yɛ̍ mbō tōsa̍ mbō wa᷄ ō yɔ̄ŋa᷄ŋ o̍ ya̍ Mɛ̍lɛ̄ka̍ lo̍. Mɛ̄ɛ̍ o̍ nɛ̄īyo̍ ho̍ō ni᷄ŋ yɔ̄ŋ wɔ̄ɔ̍ŋ o̍ yɔ̄ŋ wɔ̄ɔ̍ŋ wāŋnda̍ I̍sɔ̄lūɛ̄ī a̍ to̍sa̍, ma̍ sīmnu᷄ŋ a̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l, mɛ̄ɛ̍ dīndī kōŋ o̍ wa᷅ ko̍ŋ ma̍āŋ ni̍.”

²⁰Mi̍ Mɛ̄lɛ̄ka̍ hīāū lāchī a̍ sūɛ̍i̍, mbo̍ dīmī āā, “Tē E̍lɔ̄ŋ o̍ chi̍i̍ sa̍lāla̍ŋ ndāŋ sōlī pɛ̍ kpo̍u̍, sa̍lāa̍ le̍ fo̍nda̍ dīāndāa̍ hi̍o̍ū kpo̍u̍ wo̍ dīndīo̍o̍, ya̍ Mɛ̍lɛ̄ka̍ o̍ hɔ̄l, a̍ sa̍lāa̍ le̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ o̍ cho̍ a̍ nya̍ lātūlu̍ wo̍ dīndīo̍o̍, a̍ sa̍lāa̍ le̍ ma̍āŋndo̍ dīndīo̍o̍, ō hīŋ ni̍ko̍ a̍ chūīŋndo̍ o̍ cho̍ yōōmū wo̍.

²¹Tē ō hīŋ a̍ ndu̍ pɛ̍, ndu̍ E̍lɔ̄ŋ o̍ ha̍ndu̍ chūīŋ kōŋ bāla̍ o̍ lēbōl, yɔ̄ŋ wɔ̄ɔ̍ŋ o̍ yɔ̄ŋ wɔ̄ɔ̍ŋ wāŋnda̍ I̍sɔ̄lūɛ̄ī a̍ to̍sa̍, a̍ dɛ̍nɛ̍ wɔ̍ɔ̍ŋ o̍ dɛ̍nɛ̍ wɔ̍ɔ̍ŋ nda̍ tōsa̍, o̍ ko̍ŋ kɔ̍ɔ̍lī, a̍ nyɛ̄ o̍ nyɛ̄ nda̍ tōsa̍ o̍ ya̍ Mɛ̍lɛ̄ka̍ sīmūllo̍ ni᷄ŋ, ō chɔ̄ɔ̄mu̍u̍ mu̍ŋ chūīŋ kōŋ o̍ lēbōl kpo̍u̍. Nyɛ̄ o̍ nyɛ̄ wāŋnda̍ I̍sɔ̄lūɛ̄ī a̍ to̍sa̍ kpo̍u̍, ō tōl chūīŋ kōŋ kɔ̄ɔ̄lī. Tē ō chīi̍ mu̍ŋ chɔ̄ɔ̄mūū pɛ̍ kpo̍u̍ chu̍i̍ŋ kōŋ o̍ lēbōl, a̍ hɛ̄li̍ wāŋndo̍, a̍ ke̍ ndu̍ chūīŋ kōŋ, ō kūɛ̄ a̍ ndu̍ ku̍mbū po̍llo̍ ō kɔ̍ ma᷅l ndu̍ ō kūɛ̄ o̍ po̍llo̍ ni᷄ŋ.

²²Tē ō ma᷄l chūīŋ kōŋ pɛ̍, mɛ̄ɛ̍ yɔ̄ŋ wɔ̄ɔ̍ŋ o̍ yɔ̄ŋ wɔ̄ɔ̍ŋ wāŋnda̍ I̍sɔ̄lūɛ̄ī a̍ to̍sa̍, ndu̍ chūīŋ kōŋ ō kūā ko̍ŋ ni̍.

²³O̍ ko̍ŋ kɔ̍ɔ̍lī, mī E̍lɔ̄ŋ o̍ mi̍i̍ŋgu̍ o̍ tɛ̍ndīi̍ chɔ᷅m māā Mɛ̄lɛ̄ka̍ chō a̍ nya̍ lātūlu̍ wo̍ ni᷄ŋ. Nyɛ̄lā sōlīāā lāsa̍lālā o̍ wo̍u̍nūŋ le̍ lūɛ̄īyɔ̄ɔ̍ o̍ fo̍ndā dīāndāa̍ hi̍o̍ū kpo̍u̍ wo̍ la̍ŋ, la̍ cho̍ lā tōōsīāā a̍ kōla̍ ba̍ā kālā ka̍lāa̍ la̍ŋ, mbō kɔ᷄ so̍lī la̍ŋ o̍ tɛ̍ndīi̍ ko̍ŋ ni᷄ŋ lo̍ŋ, mbō mɛ̄i̍ la̍ŋ lo̍ŋ.

²⁴O̍ ko̍ŋ kɔ̍ɔ̍lī, mbō pūlu᷄ŋ o̍ fo̍ndā dīāndāa̍, mbō mīŋgi̍ŋ nyɛ̍lā ndɔ̄la̍ so̍līāā lāsa̍lā la̍ŋ lēkɔ̄ɔ̍, nyɛ̄lā o̍ wo̍u̍nūŋ lɔ̍ɔ̍ lɔ̍ɔ̍ la̍ŋ, mbō fūla̍ o̍ bɛ̍ɛ̄. Tē ō fūla̍ pɛ̍, ō sōli̍ sa̍lālā lūāmāālā o̍ nɔ̍ le̍ sōlīo̍o̍ la̍ŋ, sa̍lāa̍ le̍ yɔ̄ŋ ndɔ̄ wɔ̍ɔ̍ŋndo̍ fāŋāa̍, a̍ sa̍lāa̍ le̍ yɔ̄ŋ wɔ̄ɔ̍ŋ wāŋnda̍ I̍sɔ̄lūɛ̍i̍ fāŋāa̍.

²⁵Chɔ̄lūāā o̍ cho̍ dīyɔ̄ɔ̄ le̍ sa̍lāla̍ fa̍ŋā yɔ̄ŋ wɔ̄ɔ̍ŋndo̍ la̍ŋ nda̍, ō nɔ̄ mbō lōm chūɛ̄īmā chɔ̄lūāā kāŋ o̍ ma̍āŋndo̍ chōo̍.

²⁶O̍ ko̍ŋ kɔ̍ɔ̍lī, wāna̍ nda̍ hɛ̄li̍ ko̍ŋ le̍ mbō kūɛ̄ a̍ chūīŋ kōŋ mbō kɔ̍ ma᷅l ndu̍ mbō kūɛ̄ o̍ po̍llo̍ ni᷄ŋ A̍sa̍sɛ̄ɛ̄ wo̍, wānā ko̍ŋ ō nɔ̄ mbō tɔ̄ɔ̄ nyɛ̄la̍ wa᷅ ndu̍ lēkɔ̄ɔ̍ la̍ŋ, ndu̍yɛ̍ mbō pūlu᷄ŋ fo̍ ma̍lāŋ o̍ mi̍i̍ŋgū o̍ dɔ̍ɔ̍ŋgɔ̍ɔ̍ ni᷄ŋ.

²⁷O̍ ko̍ŋ kɔ̍ɔ̍lī, nāūwo̍ a̍ chūīŋ nda̍ dīī le̍ sa̍lāla̍ fa̍ŋā yɔ᷅ŋ wɔ̄ɔ̍ŋndo̍ la̍ŋ sōlīo̍o̍, ma̍ lūɛ̄ī a̍ kōo̍ma̍ nda᷄ŋ o̍ fo̍ndā dīāndāa̍ hi̍o̍ū kpo̍u̍ wo̍ wa̍, ā nɔ̄ mā chūa̍ nāū kōŋ a̍ chūīŋ kōŋ mā sōli̍ nda̍ o̍ ki̍āmndo̍ ni᷄ŋ. Yāu̍la̍ ndāla̍ŋ ni̍, vīsīŋ nda᷄ŋ ni̍, a̍ pōōlā ndāla̍ŋ kpo̍u̍, a̍ nɔ̄ mā lōm.

²⁸Ndu̍yɛ̍ wāna̍ cho̍ chɔ̄lūa̍a̍ ha̍ā lōmɔ̄ɔ̄ wo̍, ō nɔ̄ mbō tɔ̄ɔ̄ nyɛ̄la̍ wa᷅ ndu̍ lēkɔ̄ɔ̍ la̍ŋ, ndu̍yɛ̍ mbō pūlu᷄ŋ fo̍, ma̍lāŋ o̍ mi̍i̍ŋgū o̍ dɔ̍ɔ̍ŋgɔ̍ɔ̍ ni᷄ŋ.”

²⁹Mi̍ Mɛ̄lɛ̄ka̍ ō hīāū lāchī a̍ sūɛ̍i̍ nāa̍ Mūu̍sē chu̍a̍, mbo̍ dīmūl ndu̍ āā, “Sāwa̍ ya̍ I̍ cho̍ nya̍ dōū mbō wa̍ le̍ fɛ̍ɛ̍ŋ a̍ fɛ̍ɛ̍ŋ ndo̍ ndu̍ cho̍ ho̍ō ni̍. Īwɔ̄sī o̍ īwɔ̄sī, pāŋgi̍i̍ ŋɔ̍mmɛ̍ūve̍ mālɔ̄ tɔ̍, lā nɔ̄ mī lā bīī su᷅mndo̍ pāa̍le̍ le̍ŋ, ndu̍yɛ̍ lā nɔ̍ mī lā tōsa̍ wa̍li̍ o̍ wa̍li̍ pa̍a̍le̍ le̍ŋ te̍, chɔ̍ŋ a̍ nya̍ pi̍la̍ mbō kūɛ̄ a̍ wānāā lēkāa̍ wa̍a̍ cho̍ nya̍ tɛ̄ɛ̄ŋ nda̍.

³⁰Kāni̍ fo̍ndōle̍, o̍ pāa̍le̍ŋ nde᷅ŋ chōo̍ sa̍lāla̍ŋ lā nɔ̄ mī lā sōli̍ŋ ni̍, le̍ mī lā sɔ̄la̍ mālɔ̄ɔ̍ le̍ yɔ̄ŋndā nyāla̍ wɔ̍ɔ̍ŋnda̍ŋ, mī lā sīmnu᷄ŋ a̍ di̍a̍ndāā ya̍ Mɛ̍lɛ̄ka̍ Ya̍a̍wɛ̄ɛ̄ o̍ hɔ̄l.

³¹Lā nɔ̄ mī lā chūa̍ pāa̍le̍ŋ nde᷅ŋ mɛ̄ɛ̍ pāa̍le̍ nīle̍ pɛ̍ŋgīāā le̍ŋ lē chō yɛ̍. Lā nɔ̄ mī lā bīī su᷅mndo̍ pāa̍le̍ le̍ŋ ndu̍yɛ̍, lā nɔ̍ mī lā tōsa̍ wa̍li̍ o̍ wa̍li̍ pa̍a̍le̍ le̍ŋ te̍. Sāwa̍ cho̍ le̍ fɛ̍ɛ̍ŋ a̍ fɛ̍ɛ̍ŋ ndo̍ ndu̍ cho̍ ko̍ŋ ni̍.

³²O̍ pāa̍le̍ le̍ŋ chōo̍, wānā so̍līāā lāsa̍lāa̍ ō cho̍ ō hɛ̄līāā le̍ mīīŋgōo̍ o̍ fōōfo̍ fi̍nyā ndɔ̄ wo̍ māā māsa̍ wānāā sōlīāā lāsa̍lā wo̍, ndu̍ nɔ̍ ni̍ mbō sōli̍ sa̍lāla̍ŋ le̍ wāŋnda̍ a̍ nyɔ̄ɔ̍ŋ dīndīo̍o̍ ya̍ o̍ hɔ̄l. Ō nɔ̄ mbō wōūnu̍ŋ nyɛ̍lā sōlīāā lāsa̍lāla̍ŋ,

³³mbō sōli̍ sa̍lālā yɛ̍ yɛ̍la̍ŋ nda᷅ŋ, sa̍la̍ cho̍ le̍ tɛ̍ndīi̍ chɔ᷅m māā Mɛ̄lɛ̄ka̍ chō a̍ nya̍ la̍tu̍lu̍ wo̍ dīndīo̍o̍ wo̍, a̍ sa̍la̍ cho̍ le̍ ma̍āŋndo̍ dīndīo̍o̍ wo̍, a̍ sa̍la̍ cho̍ le̍ wānāā sōlīāā lāsa̍lāa̍ dīndīo̍o̍ wo̍, o̍ ko̍ŋ kɔ̍ɔ̍lī, a̍ sa̍la̍ cho̍ le̍ wāŋnda̍ I̍sɔ̄lūɛ̄ī kpo̍u̍ di̍ndīo̍o̍ wo̍.

³⁴Sāwa̍ cho̍ le̍ fɛ̍ɛ̍ŋ a̍ fɛ̍ɛ̍ŋ ndo̍ ndu̍ cho̍ ko̍ŋ ni̍. Īwɔ̄sī o̍ īwɔ̄sī sa̍lāla̍ŋ nda᷅ŋ lā nɔ̄ mī lā sōli̍ŋ le̍pi᷅lɛ̍, le̍ yɔ̄ŋndā wɔ̄ɔ̍ŋnda̍ nya̍ wāŋnda̍ I̍sɔ̄lūɛ̄ī a̍ to̍sa̍ la̍ŋ fāŋāa̍.” Ndu̍yɛ̍ mi̍ Mūu̍sē o̍ to̍sā nyɛ̄ o̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l ndu̍.