Read Southern Kisi Lɛ̄vi̍ti̍kɔ̍ɔ̄ 19 Bible Online

Lɛ̄vi̍ti̍kɔ̍ɔ̄ 19 - Southern Kisi bible

Lɛ̄vi̍ti̍kɔ̍ɔ̄ 19

¹Mi̍ Mɛ̍lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē āā,

²“Di̍mu̍l wa᷅ŋnda̍ I̍sɔ̄lūɛ̄ī kpo̍u̍ māā nyɛ̄ ya̍ I̍ dīmi̍ wo̍ cho̍ ho̍ō ni̍. Wāŋnda̍ I̍sɔ̄lūɛ̄ī, lā wa̍ wānāā dīāndāā, fo̍ndōle̍, ya̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍, wāna̍ cho̍ ō dīāndāā wo̍ ya̍ cho̍ ni̍.

³Wānā o̍ wānā ke̍ fi̍nyā nu̍m bɛ̄ɛ̄le̍ŋ a̍ kālā nu̍m, ndu̍yɛ̍, mā ke̍ pāa̍le̍ nīle̍ pɛ̍ŋgīāāle̍ŋ bɛ̄ɛ̄le̍ŋ. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ni̍.

⁴“Ō fūla̍ o̍ ya̍ kɔ̄ɔ̄lī, lā so̍o̍lūū nyɛ̄ o̍ nyɛ̄ chēle̍ŋ māā mɛ̄lɛ̄ka̍ nyā le̍, ɔ̄ɔ̄ mī lā tōōsi̍a̍a̍ nyɛ̄ o̍ nyɛ̄ chēle̍ŋ a̍ īchīli̍ŋ le̍ ndu̍ sōōlūū māā mɛ̄lɛ̄ka̍ nyā le̍. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ni̍.

⁵“Tē lā hīŋ a̍ sa̍lālā nyāla̍ kɔ̄l nyūlūla̍ŋ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ pɛ̍, lā sōli̍ la̍ŋ o̍ nɛ̄i̍ ya̍ I̍ hīnī kɔ᷅l mī lā bīīlu̍ wo̍ chōo̍.

⁶Tē lā sōli̍ sa̍lāla̍ŋ nda᷅ŋ pɛ̍, lā nɔ̄ mī lā dē nyɛ̄ dīāā lāsa̍la̍ kōŋ pāa̍le̍ le̍ŋ. O̍ ko̍ŋ kɔ̍ɔ̍lī, tē nyɛ̄ o̍ nyɛ̄ lɔ̍l ku̍ya̍ pɛ̍, lā dīā ndu̍ vɛ̄lɛ̄ dīi̍mā ndɔ̄ kōŋ. Kɛ̍ tē nyɛ̄ o̍ nyɛ̄ ō lɔ᷄l ni᷅ŋ ku̍ya̍ pɛ̍, o̍ pāa̍le̍ ya̍a̍ ndɔ̄le̍ŋ chōo̍, lā nɔ̄ mī lōm ndu̍.

⁷Tē lā dē ndu̍ o̍ pāa̍le̍ ya̍a̍ ndɔ̄le̍ŋ chōo̍ pɛ̍, mɛ̄ɛ̍ sūɛ̍i̍ wɔ̍ɔ̍ŋīī bɛ̄ndūe̍i̍ pīla̍ nya̍ tōsa̍ ke̍ŋ ni̍. I̍ bi̍ī sa̍lā nya̍ sōlī ko̍ŋ ndo̍ le̍.

⁸Ndu̍yɛ̍ wānā o̍ wāna̍ de᷅ ndu̍ pɛ̍, mɛ̄ɛ̍ wānā ko̍ŋ ō tōsa̍ sūɛ̍i̍ wɔ̍ɔ̍ŋīī bɛ̄ndū bɛ̍ndū. Kāni̍ fu̍u̍le̍, wānā ko̍ŋ ō ke̍ nyɛ᷅m dīānda᷄ŋ Mɛ̄lɛ̄ka̍ Ya̍a̍wɛ̄ɛ̄ wo̍ŋ lēbɛ̄ɛ̄ le̍. Wānā ko̍ŋ a̍ nɔ̄ mā sōli̍ ndu̍ wānāā ndūa̍a̍ tɛ̄ɛ̄ŋ po̍.

⁹“Tē lā wa̍ wi̍tīi̍ŋ nya̍ŋ kōūwɔ̄ɔ̍ pɛ̍, lā fu̍u̍lūū a̍ kōūwɔ̄ɔ̍ o̍ sɔ̍ŋgi̍ sɔ̍ŋgi̍la̍ŋ te̍. Ndu̍yɛ̍ bā o̍ bā nya̍ chīi̍ ni᷅ŋ kōūwɔ̄ɔ̄ pɛ̍, lā mi̍i̍ŋgū lɛ̄ ŋ̍ lo̍ kɔ̄ɔ̄lī wo̍ŋ nūūwā le̍, ŋ̍ lo᷅ mu̍ŋ kɔ̍ɔ̍lī wo̍ŋ wānāā tāmbɛ̍i̍ya̍ a̍ wānāā lēkāa̍ wa̍a̍ cho̍ nya̍ tɛ̍ɛ̍ŋ nda̍, nda̍ nɔ̍ mu̍ŋ ni̍.

¹⁰O̍ ko̍ŋ kɔ̍ɔ̍lī, tē lā wa̍ kīle̍pīi̍ma̍ nyāa̍ŋ kēēndūūwo̍ pɛ̍, lā di̍ndī ma̍ŋ kēēndūūwo̍ fo̍ fo̍ le̍. Mā pɔ̄mpɔ̍mbɔ̄ma̍ lo᷅ ma̍ŋ le̍cho̍o̍ wa̍ŋ, a̍ ma̍ de̍lī lɛ᷅ŋ nda̍ŋ, wānāā tāmbɛ̍i̍ya̍ a̍ wānāā lēkāa̍ wa̍a̍ cho̍ nya̍ tɛ̄ɛ̄ŋ nda̍, nda̍ nɔ̍ ma̍ŋ ni̍. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ni̍.

¹¹“Wānā to̍sā le̍vi̍i̍ le̍. Wānā to̍sā la̍ka̍fā le̍. Lā di᷅mu̍la̍ŋ chōōla̍ŋ te̍.

¹²Wānā me̍nāŋ se᷅ndi̍ sɔ̄ŋ cho̍o̍ wo̍ a̍ dīōlā nīla̍ŋ te̍. Tē wānā to̍sa̍ ke̍ŋ pɛ̍ mɛ̄ɛ̍ a̍ tɛ̍ɛ̍mbu̍u̍ dīōlā nīla̍ŋ lābɛ̄ɛ̄. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.

¹³“Wānā to̍sāl cha̍a̍ŋ nu̍m ka̍fāla̍ŋ ɔ̄ɔ̄ mā chi̍i̍mbu̍u̍ nyɛ̄ ndɔ̄ le̍. Tē a̍ chu̍a̍ wāŋndo̍ le̍ wa̍li̍ lēpāla̍a̍ pɛ̍, pāāwāa̍ ndɔ̄ɔ̍ ō lɔ᷅l nu̍m kūēē mɛ̄ɛ̍ dīi̍mā ndɔ̄ɔ̍ le̍.

¹⁴Wānā ye̍ī wa᷅na̍ nīlā bāŋu̍lɛ̍i̍yo̍ le̍. Wānā chi᷅ wa̍nā su̍mɛ̍i̍yo̍ hūnɔ̄ɔ̍ mā kɛ̍si̍ ndu̍ nyɔ̄ɔ̍ lāchī le̍ mbō bo᷄ŋ te̍. Lā nɔ̍ si̍o̍ōŋnde̍ le̍ Mɛ̄lɛ̄ka̍ nyāa̍. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.

¹⁵“Tē a̍ wa̍ wāŋnda̍ yāmɛ̍i̍ kīōlɔ̄ɔ̍ tɛ̄ɛ̄ŋ pɛ̍, wa̍ sa̍kpō o̍ ndi̍ kīōlɔ̄ɔ̍ ni᷄ŋ, ndu̍yɛ̍ mā di̍mi̍ tōnya̍a̍. Si᷅m wāŋndo̍ kɔ̄ɔ̄lī, le̍ mɛ̄ɛ̍ o̍ cho̍ wānā ta̍mbɛ̍i̍, ɔ̄ɔ̄ wānā su̍lāā yɛ̍ mā ke̍ ndu̍ di̍o̍o̍ le̍.

¹⁶Wānā be̍lu̍ a̍ dīōlā wāŋndo̍ o̍ sōndō mā tɛ̍ɛ̍mbu̍u̍ ndu̍ tɔ̍ɔ̍ wāŋnda̍ tɛ̄ɛ̄ŋ te̍. Ndu̍yɛ̍ wānā to̍sā i̍sɔ̍ɔ̍ o̍ īsɔ̄ɔ̍ i̍ to̍sā mī yōōmu̍ chāa̍ŋ nūmndo̍ ō wa̍ o̍ kpūndɔ̍ɔ̍ ni᷄ŋ te̍. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.

¹⁷“Wānā nɔ᷅ yɛ̄lē tūlāāle̍ chāa̍ŋ nūmnde̍ŋ o̍ kɔ̄l te̍. Tē chāa̍ŋ nūm o̍ to̍sa̍l nu̍m sūɛ̍i̍ pɛ̍, di̍mu̍l ndu̍ kpe̍nde̍ke̍le̍ mī lā tōōsi̍āŋ tɛ̍ɛ̄ŋ. Yɔ̄ŋi̍ o̍ lo̍ o̍ ko̍ŋ mī nūm bɛ̍ɛ̍ mā to̍sa̍ yɔ̄ŋ wɔ̄ɔ̍ŋndo̍.

¹⁸Tē chāa̍ŋ nūm o̍ to̍sa̍l nu̍m sūɛ̍i̍ wɔ̍ɔ̍ŋnde̍ pɛ̍, ki̍ndī le̍ ndu̍ māa̍ mi̍ŋgūl te̍, ɔ̄ɔ̄ mā bīī ndu̍ o̍ kɔ̄l te̍. Lā kāāla̍ wa̍nāā nya̍ chīɛ̄ɛ̄li̍āŋ nda̍ mɛ̄ɛ̍ nya̍ kāāla̍ nya̍ pi̍la̍ yɛ̍. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.[2]

¹⁹“Lā tōsa̍ nyɛ᷅ sāwāla̍ nīla̍ŋ lā dīmi̍ wo̍. Wānā o̍ wānā chɛ᷅l mī chɔ̄lū nūmndo̍ ō he᷄l chɔ̄lū nda̍ cho̍ su̍u̍ pi᷅lɛ̍ le̍ wo̍ le̍. Wānā to̍sā kpe̍lo̍o̍ mā tɔ̄l yɛ̄i̍yo̍ŋ ŋ̄ mūu̍ŋ lēni᷄ŋ te̍. Wānā wo̍u̍nu̍ŋ nyɛ᷅ chūɛ̄ɛ̄na᷄ŋ nda̍ tōōsīāā a̍ fūŋnde̍ mu̍ūli̍āŋnde̍ŋ ndo̍ le̍.

²⁰“Tē pōo̍ chē wānā la̍nɔ̍ chi̍ɔ̍ɔ̍ mbō yēēma̍ le̍ ndu̍ kɛ̄sīo̍o̍ o̍ nɔ̄ɔ̍ ni᷄ŋ pɛ̍, kɛ̍ ndu̍yɛ̍ mbō pāāwa̍ wɔ̍ nyɛ̍ sɔ̄lāa̍ o̍ nɔ̍ le̍ pāāwāa̍ le̍ ndu̍ bāŋāa̍, mbō sɔ̄la̍ wɔ̍ ba̍ŋa᷄ŋndo̍ wo̍ le̍, mbō lo̍ o̍ ko̍ŋ mī wānā pɔ̍nɔ̍ che᷅le̍ŋ ō sūūnda̍ a̍ chɛ̄ kōŋ pɛ̍, wānā pɔ̍nɔ̍ ko̍ŋ a̍ chɛ̄ kōŋ, ā nɔ̍ mā dīī nda̍ le̍, kāni̍ fo̍ndōle̍, chɛ̄ kōŋ ō cho̍ wɔ̍ o̍ ba̍ŋa᷄ŋ te̍. Wāŋ bɛ̄ndūa̍a̍ ā nɔ̄ mā yāāsi̍a̍a̍ o̍ sūɛ̍i̍ ke̍ŋ ni᷄ŋ mā sīna̍ nyɛ̄ kpe̍e̍kpe̍i̍ yɔ̍nu̍ŋ ndo̍.

²¹Kɛ̍ wānā pɔ̍nɔ̍ ko̍ŋ ō nɔ̄ mbō hīŋ a̍ sāā fɔ̍ŋndɔ̍ɔ̍ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ o̍ cho̍ a̍ nya̍ lātūlu̍ dīō le̍ mā sōli̍ sa̍lāa̍ le̍ pāāwā bīōndɔ᷄ŋndo̍.

²²Ndu̍yɛ̍ mī wānā so̍līāā lāsa̍lāa̍ ō sōli̍ sāā ko̍ŋ sa̍lāa̍ ya̍ Mɛ̍lɛ̄ka̍ Ya̍a̍wɛ̄ɛ̄ lāchī le̍ yɔ̄ŋ wɔ̄ɔ̍ŋ o̍ to̍sa̍ ko̍ŋ ndo̍. O̍ ko̍ŋ, mī po̍ ko̍ŋ ō sɔ̄la̍ mālɔ̄ɔ̍ le̍ yɔ̄ŋ wɔ̄ɔ̍ŋ o̍ to̍sa̍ wo̍.

²³“O̍ ko̍ŋ kɔ̍ɔ̍lī, tē lā fūūlu̍u̍ o̍ lɛ̄ŋndē nya̍ chō le᷅ŋ kɔ̄la̍ŋ bīyɔ̄ɔ̍ le̍ŋ ni᷄ŋ pɛ̍, mī lā cha᷄l ni᷅ŋ ndo̍ŋ, ndu̍yɛ̍, mī lā kāndu̍ wa̍lta̍ nyāla̍ ŋ̄chīɛ̄ɛ̄la̍ŋ tōsāa̍ pɛ̍, wɔ̄sīlā yāa̍la̍ tāse̍la̍ nya̍ chō wā chīɔ̄ɔ̄ŋ nyāa̍ŋ tōsāa̍ la̍ŋ ki̍nɛ̍i̍, kōmɔ̄ɔ̄ o̍ kōmɔ̄ɔ̄ yɔ̄mīī nyɛ̄i̍ ī kōm pɛ̍, o̍ wɔ̄sīlā lāŋ bɛ̄ŋgu̍, lā di̍ā kōmɔ̄ɔ̄lā lāŋ te̍, nyɛ̄ dīāā ya̍ I̍ ku̍u̍na̍ nya̍ le̍ dīo̍o̍ wo̍ la̍ cho̍ ni̍.

²⁴O̍ ko̍ŋ kɔ̍ɔ̍lī, te̍ wɔ̄sīlā yāa̍la̍ la̍ŋ lā hīōū pɛ̍, wɔ̄sī hi̍ɔ̍ɔ̍lu̍ ndɔ̄ɔ̍, kōmɔ̄ɔ̄ o̍ kōmɔ̄ɔ̄ yɔ̄mīī nyɛ̄i̍ ī kōm pɛ̍, kōmɔ̄ɔ̄lā lāŋ ki̍nɛ̍i̍ lā sīmnu᷄ŋ la̍ di̍a̍ndāā. Lā nɔ̍ mī lā yɔ̄ŋgu̍ la̍ŋ kpo̍u̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍, le̍ ya̍ ba̍li̍ka̍a̍ mēllo̍.

²⁵O̍ ko̍ŋ kɔ̍ɔ̍lī, te̍ wɔ̄sī kōŋ ō chūū pɛ̍, wɔ̄sī ŋūɛ̍ɛ̍nu̍ ndɔ̄ɔ̍, lā kāndu̍ ni̍ko̍ ko̍mɔ̄ɔ̄lā yɔ̄mīī nyɛ̄i̍ dīo̍o̍. Tē lā tōsa̍ nu̍a̍ā pɛ̍, tɔ̄lɔ̄ɔ̄lā nyāla̍ŋ lā wā ni̍ŋ ko̍mɔ̄ɔ̍ ta̍u̍ ta̍u̍ o̍ chīɔ̄ɔ̄ŋ nyāa̍ŋ ni᷄ŋ. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ni̍.

²⁶“Lā di̍ā vīsīe̍i̍ a̍ kōo̍wa̍ŋ lēni᷄ŋ te̍. Lā ku̍ā o̍ wānāā vīāmāā lāyāwāa̍, ɔ̄ɔ̄ wānāā ko̍o̍ma̍ wɔ̍ɔ̍ŋnda̍ lo̍ le̍.

²⁷Lā se̍ndī yīīŋnde̍ nya̍ o̍ lēbōl o̍ da̍ŋga̍lta̍ŋ chɛ̍ chɛ̍ mī lā mɛ̄i̍ bōmbōo̍ tɛ̄ɛ̄ŋ ndo̍ te̍. Ɔ̄ɔ̄ wānā se᷅ndi̍ si̍ɛ̍i̍yi̍i̍ nu̍mnde̍ o̍ da̍ŋga̍lta̍ŋ kpo̍u̍ mā mɛ̍i̍ ndi̍ ī dīya᷄ŋ tɛ̍ɛ̄ŋ te̍.

²⁸Lā tɛ̍ɛ̍ndīāā dīāllūŋ nya̍ŋ tē wāna̍ nya̍a̍ vi᷅ pɛ̍ le̍ ndu̍ chāa̍ŋ ndo̍ le̍. Vɛ̄lɛ̄, wānā tu̍u̍lā nyɛ̄ o̍ nyɛ̄ o̍ dīāllūŋ nūmndo̍ŋ te̍. Ya̍ cho̍ Mɛ̍lɛ̄ka̍ Ya̍a̍wɛ̄ɛ̄ ni̍.

²⁹“Lā si̍i̍ŋgūū chūāūwāā nyāā wāŋ lāāndūa̍a̍ ti̍ām le̍ nyɛ̄ sɔ̄lāa̍ wa̍ le̍. Tē lā tōsa̍ ke̍ŋ pɛ̍, lɛ̄ŋnde̍ŋ lē sīmnu᷄ŋ lɛ᷅ŋndē wānāā tīāmāā, ndu̍yɛ̍ mī lē sīmnu᷄ŋ lɛ᷅ŋndē dɛ̍nɛ̍ wɔ̍ɔ̍ŋ bɛ̄ndū.

³⁰Lā ke̍ pa̍a̍le̍ nīle̍ pɛ̍ŋgīāāle̍ŋ lēbɛ̄ɛ̄, ndu̍yɛ̍, mī lā ke̍ fo̍ndā nī di̍a̍ndāa̍ hi̍o̍ū kpo̍u̍ wo̍ bɛ̄ɛ̄le̍ŋ. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.

³¹“Lā ku̍ā o̍ wānāā ŋ̄wāŋ vīlɛ̍i̍ya̍ lo̍, ndu̍yɛ̍ a̍ o̍ māndi̍a̍a̍ lo̍ le̍ nya̍ lāyāwā vi᷅m te̍. Tē lā tōsa̍ ke̍ŋ pɛ̍, lā sīmnu᷄ŋ a̍ nɔ̍ɔ̍lɛ̍i̍. Ya̍ cho̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ni̍.

³²“Tē lā chē bɛ̄ndūa̍a̍ pɛ̍, lā chɔ᷄ŋ i̍si̍si̍ le̍ nda̍ bɛ̄ɛ̄le̍ŋ kīo̍o̍. O̍ ko̍ŋ kɔ̍ɔ̍lī, lā nɔ̍ si̍o̍o̍ŋīī nīi̍, ndu̍yɛ̍, mī lā tūēī ya̍ dīōm. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.

³³“Tē wāna̍ lēkāa̍ ō kōma̍l nya̍ pɛ̍ le̍ nya̍ cha᷄lle̍ tɛ̄ɛ̄ŋ o̍ lɛ̄ŋndē nyāle̍ŋ ni᷄ŋ, lā to̍sāl ndu̍ sūɛ̍i̍ wɔ̍ɔ̍ŋ te̍.

³⁴Lā bīi̍ ndu̍ mɛ̄ɛ̍ nya̍ bīī nya̍ pi̍la̍ I̍sɔ̄lūɛ̍i̍ya̍ yɛ̍. Lā kāāla̍ ndu̍ mɛ̄ɛ̍ nya̍ kāāla̍ nya̍ pi̍la̍ yɛ̍. Lā sīna̍ pɛ̍ŋgu̍ māā nya̍ bɛ̍ɛ̍ wānāā lēkāa̍wa̍ nya̍ wa᷄ o̍ lɛ̄ŋndē I̍chi̍pīle̍ŋ ni᷄ŋ ni̍. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ni̍.

³⁵“Lā to̍sāl wāŋnda̍ ka̍fāla̍ŋ o̍ nda̍ nyɔ̄ɔ̍ŋ tūūlūllo̍ ni᷄ŋ te̍, ō wa᷄ nyɛ᷅ wānā tu̍u̍ o̍ nyɛ̄ ni᷄ŋ, ō wa᷄ nyɛ᷅ hāndāā o̍ sēke̍lēi̍ chōo̍, ɔ̄ɔ̄ nyɛ̄ o̍ nyɛ̄ tūwāā.

³⁶Tē lā wa᷄ wāŋnda̍ nyɔ̄ɔ̍ŋ tūūlūllo̍ pɛ̍, ō wa᷄ se᷅ke̍lēi̍, ō wa᷄ nyɛ᷅ o̍ nyɛ̄ tūwāā nda̍ tūu̍ nyɛ̄, lā wa̍ sa̍kpō o̍ mu̍ŋ tūūwo̍ ni᷄ŋ. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍, o̍ so̍li̍ nya̍ o̍ lɛ̄ŋndē I̍chi̍pīle̍ŋ ni᷄ŋ ndo̍ ni̍.

³⁷Lā tōsa̍ nyɛ᷅ o̍ nyɛ̄ sāwāla̍ nīla̍ŋ lā dīmi̍ le̍ tōsāa̍, o̍ ko̍ŋ kɔ̍ɔ̍lī, nyɛ̄ o̍ nyɛ̄ ya̍ I̍ di̍mu̍l nya̍ le̍ tōsāa̍ mī lā wa̍ ndu̍ tōsāa̍. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.”