Read Southern Kisi Lɛ̄vi̍ti̍kɔ̍ɔ̄ 20 Bible Online

Lɛ̄vi̍ti̍kɔ̍ɔ̄ 20 - Southern Kisi bible

Lɛ̄vi̍ti̍kɔ̍ɔ̄ 20

¹Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē āā,

²“Di̍mu̍l wa᷅ŋnda̍ I̍sɔ̄lūɛ̄ī māā, wānā o̍ wāna̍ yɔ̍ŋgu̍ chūāūwāā ndūa̍a̍ le̍ mā sōli̍ nda̍ sa̍lāa̍ o̍ mɛ̄lɛ̄ka̍ Mo̍lɛ̍kī lo̍ pɛ̍, ō wa̍ I̍sɔ̄lūɛ̍i̍nɔ̍, ō wa̍ wānāā lēkāa̍wa̍a̍ cho̍ nya̍ tɛ̄ɛ̄ŋ nda̍ ni̍, wānā ko̍ŋ I̍sɔ̄lūɛ̍i̍ya̍a̍ tu̍a̍a̍ ā nɔ̄ mā lo̍ ndu̍ vīīyo̍ a̍ pōūta̍ŋ mbō vī.

³Wānā o̍ wāna̍ yɔ̍ŋgu̍ chūāūwāā ndūa̍a̍ le̍ ma̍ sōli̍ nda̍ sa̍lāa̍ o̍ mɛ̄lɛ̄ka̍ Mo̍lɛ̍kī lo̍ pɛ̍, mɛ̄ɛ̍ wānā ko̍ŋ ō sīīŋgu̍u̍ fo̍ndā nī di̍a̍ndāa̍ fo̍ndā nɔ̄ɔ̄lɛ̍i̍, ndu̍yɛ̍ mbo̍ sōlī dīōlā nīla̍ di̍a̍ndāāla̍ŋ o̍ ba̍a̍ ni̍ŋ. Wānā wa̍ā le̍nde̍ kɔ̄ɔ̍ ya̍ I̍ mu̍lūl ndu̍ ni̍, ndu̍yɛ̍ mī so̍li̍ ndu̍ I̍sɔ̄lūɛ̍i̍ya̍ tɛ̄ɛ̄ŋ po̍.

⁴Ndu̍yɛ̍ te̍ wāŋndo̍ ō tōsa̍ sūɛ̍i̍ wa̍ā le̍nde̍ pɛ̍ kɛ̍ mi̍ wāŋnda̍ I̍sɔ̄lūɛ̄ī a̍ chu̍e̍ ndi̍ māā īsɔ̄ɔ̍ le̍, mā kēi̍ wānā ko̍ŋ hɔ̄lte̍ŋ chōo̍ ā di̍ī ndu̍ le̍ pɛ̍, wāna̍ yɔ̍ŋgū ko̍ŋ chu̍a̍u̍wāā ndūāā ka̍ŋ le̍ nda̍ sa̍lāa̍ sōlīo̍o̍ o̍ mɛ̄lɛ̄ka̍ Mo̍lɛ̍kī lo̍ wo̍,

⁵wānā ko̍ŋ kɔ̄ɔ̍ ya̍ mūlūl ndu̍ ni̍, ndu̍ ni̍ a̍ yu̍ŋgu̍ ndɔ̄ɔ̍ kpo̍u̍, a̍ to᷅l ndu̍ kɔ̄ɔ̄lī ma̍ mūli᷄ŋ mɛ̍lɛ̍ka̍ mo̍lɛ̍ki̍ sōōlūūwo̍ wa̍, mī so̍li̍ nda̍ I̍sɔ̄lūɛ̍i̍ya̍ tɛ̄ɛ̄ŋ po̍.

⁶“O̍ ko̍ŋ kɔ̍ɔ̍lī, wānā o̍ wāna̍ kɛ̍ɛ̍ wāa̍ sa̍kpō a̍ ya̍ Mɛ̄lɛ̄ka̍ pɛ̍, mbo̍ mūli᷄ŋ kɔ᷅la̍ŋ o̍ wānāā ŋ̄wāŋ vīlɛ̍i̍ya̍ lo̍, a̍ o̍ māndi̍a̍a̍ lo̍ le̍ ndu̍ yāwāla̍ŋ vīmndo̍ pɛ̍, wānā ko̍ŋ kɔ̄ɔ̍ ya̍ mu̍lūl ndu̍ ni̍ ndu̍yɛ̍ mī so̍li̍ ndu̍ I̍sɔ̄lūɛ̍i̍ya̍ tɛ̄ɛ̄ŋ po̍.

⁷Le̍la̍ŋ, lā dīndi̍ nya̍ pi̍la̍ mī lā wa̍ ā dīāndāā, fo̍ndōle̍, ya̍ cho̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ni̍.

⁸Lā chu̍a̍ sa̍wāla̍ nīla̍ŋ ndu̍yɛ̍ mī lā tōsa̍ nyɛ̄ o̍ nyɛ̄ la̍ di̍mi̍ le̍ tōsāa̍. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍, wāna̍ to̍sā mī lā wa̍ ā dīāndāā wo̍.

⁹“Wānā o̍ wāna̍ ye̍i̍ fi̍nyā ndɔ̍ ɔ̄ɔ̄ kāla̍ ndɔ̍ pɛ̍, wānā ko̍ŋ ō nɔ̄ mbō sɔ̄la̍ pīɔ̍mndo̍. Ndu̍yɛ̍ wānā ko̍ŋ ndu̍ pi̍la̍ tɔ̍ɔ̍ya̍ŋ pīɔ̍m ndɔ̄ɔ̍ ō wā cho̍o̍ ni̍, fo̍ndōle̍ le̍ mɛ̄ɛ̍ o̍ ye̍i̍ fi̍nyā ndɔ̍ ɔ̄ɔ̄ kāla̍ ndɔ̄ yɛ̍.

¹⁰“Wānā o̍ wāna̍ su̍u̍nda̍ a̍ la̍nɔ̍ pi̍la̍a̍ pɛ̍, wānā ko̍ŋ ni̍, chūā kōŋ ni̍, ā nɔ̄ mā sɔ̄la̍ pīɔ̍mndo̍.

¹¹Wānā o̍ wāna̍ su̍u̍nda̍ a̍ kāla̍ ndɔ̄ pɛ̍, mɛ̄ɛ̍ wānā ko̍ŋ ō tɛ̄ɛ̄mbūū fi̍nyā ndɔ̍ lābɛ̄ɛ̄. Wānā ko̍ŋ ni̍ kāla̍ ndɔ̄ ko̍ŋ ni̍, ā nɔ̄ mā sɔ̄la̍ pīɔ̍mndo̍. Ndu̍yɛ̍ nda̍ pi̍la̍ tɔ̍ɔ̍ya̍ŋ pīɔ̍m ndāa̍ ō wā cho̍o̍ ni̍.

¹²Wānā o̍ wāna̍ su̍u̍nda̍ a̍ la̍nɔ̍ɔ̍ po̍ ndɔ̄ɔ̍ pɛ̍, wānā ko̍ŋ ni̍ chūā kōŋ ni̍, ā nɔ̄ mā sɔ̄la̍ pīɔ̍mndo̍. Nda̍ ŋi̍ɔ̍ɔ̍ŋ sūɛ̍i̍ wɔ̄ɔ̍ŋnde̍ nda̍ tōsā ke̍ŋ ni̍. Ndu̍yɛ̍ nda̍ pi̍la̍ tɔ̍ɔ̍ya̍ŋ pīɔ̍m ndāa̍ ō wā chōo̍ ni̍.

¹³Wānā o̍ wāna̍ wa̍ a̍ chāa̍ŋ ndɔ̄ wa̍nā pɔ̍nɔ̍ɔ̍ pɛ̍, mɛ̄ɛ̍ wāŋndo̍ wā nu̍a̍ā a̍ wānā la̍nɔ̍ɔ̍ yɛ̍ pɛ̍, nda̍ ŋi̍ɔ̍ɔ̍ŋ kpo̍u̍ mɛ̄ɛ̍ ā tōsa̍ māāla̍ŋ, ā nɔ̄ mā sɔ̄la̍ pīɔ̍mndo̍. Ndu̍yɛ̍, nda̍ pi̍la̍ tɔ̍ɔ̍ya̍ŋ pīɔ̍m ndāa̍ wā chōo̍ ni̍.

¹⁴Wānā o̍ wāna̍ chu̍a̍ wānā la̍nɔ̍ɔ̍ a̍ kāla̍ ndɔ̄ o̍ nɔ̄ɔ̍ ni᷄ŋ pɛ̍, mɛ̄ɛ̍ sūɛ̍i̍ wɔ̍ɔ̍ŋīī bɛ̄ndūe̍i̍ pīla̍ nda̍ tōsa̍ ke̍ŋ ni̍, po̍ ko̍ŋ ni̍, wāŋ lāāndūāā kāŋ ni̍, ā nɔ̄ mā lōm nda̍ chi̍li̍kɔ̍, ko̍ŋ to̍sā ni̍ mī yɔ̄ŋ wɔ̄ɔ̍ŋ wāā le̍nde̍ o̍ fu̍la̍ nya̍ tɛ̍ɛ̍ŋ.

¹⁵Wa̍nā o̍ wāna̍ hi̍ni̍ a̍ chɔ̄lōo̍ pɛ̍, wānā ko̍ŋ ō nɔ̄ mbō sɔ̄la̍ pīɔ̍mndo̍, ndu̍yɛ̍ chɔ̄lū kōŋ bɛ̍ɛ̍ ō nɔ̄ mbō sɔ̄la̍ pīɔ̍mndo̍.

¹⁶Wa̍nā la̍nɔ̍ o̍ wānā la̍nɔ̍ to̍sa̍ pɛ̍ mī chɔ̄lōo̍ ō hīni̍ a̍ ndu̍, wānā la̍nɔ̍ ko̍ŋ ni̍, chɔ̄lū kōŋ ni̍, ā nɔ̄ mā dīī nda̍. Ndu̍yɛ̍ nda̍ pi̍la̍ tɔ̍ɔ̍ya̍ŋ pīɔ̍m ndāa̍ ō wā cho̍o̍ ni̍.

¹⁷“Wānā o̍ wāna̍ chu̍a̍ yēma̍ ndɔ̄ o̍ nɔ̄ɔ̍ ni᷄ŋ pɛ̍, ō wa̍ ye̍ma̍ ndɔ̍ kālā pi᷅lɛ̍, ō wa̍ ye̍ma̍ ndɔ̍ fi̍nyā pīlɛ̍, mɛ̄ɛ̍ wānā ko̍ŋ sūɛ̍i̍ lāsi̍ɔ̍mbu̍i̍ bɛ̍ndūe̍i̍ pīla̍ o̍ to̍sā ke̍ŋ ni̍. Wānā pɔ̍nɔ̍ to̍sā su̍ɛ̍i̍ ke̍ŋ ndo̍ ni̍, chūā kōŋ ni̍, ā nɔ̄ mā so̍li̍ nda̍ I̍sɔ̄lūɛ̍i̍ya̍ tɛ̄ɛ̄ŋ po̍, wāŋnda̍ o̍ hɔ̄l kpe̍nde̍ke̍le̍, kāni̍ fo̍ndōle̍, le̍ mɛ̄ɛ̍ nda̍ sīīni̍āŋ ve̍llāa̍ vēllē māā wānā pɔ̍nɔ̍ a̍ wānā la̍nɔ̍ yɛ̍. Ndu̍yɛ̍ nyɛ̄ o̍ nyɛ̍ ko̍ma̍l nda̍ pɛ̍, nda̍ pi̍la̍ tɔ̍ɔ̍ya̍ŋ ko̍ŋ ō wā cho̍o̍ ni̍.

¹⁸Wānā o̍ wāna̍ wa̍ a̍ wānā la̍nɔ̍ɔ̍ a̍ bōōndi̍i̍ ndūɛ̍i̍ o̍ wa᷅ o̍ te̍le̍ŋ ndɔ̄ɔ̍ ni᷄ŋ nde̍ pɛ̍, wānā ko̍ŋ ni̍, wānā la̍nɔ̍ ko̍ŋ ni̍, ā nɔ̄ mā sōli̍ nda̍ I̍sɔ̄lūɛ̍i̍ya̍ tɛ̄ɛ̄ŋ, kāni̍ fo̍ndōle̍, nda̍ nda̍ ŋi̍ɔ̍ɔ̍ŋ kpo̍u̍ ā tɛ̄ɛ̄mbu̍u̍ sāwa̍ to̍sā mī wāŋndo̍ ō sīmnu᷄ŋ o̍ nɔ̍ɔ̍lɛ̍i̍ yo̍.

¹⁹“Wānā o̍ wānā su̍u̍nda̍ a̍ te̍nā nūmndo̍ pɛ̍, ɔ̄ɔ̄ pɔ̄mbɔ̄ɔ̍ kālā nu̍m ɔ̄ɔ̄ bɛ̄ndōo̍ kālā nu̍m pɛ̍, mɛ̄ɛ̍ bɛ̄ɛ̄la̍ŋ ŋ̄ tɛ̄ɛ̄mbu̍u̍ nda̍ la̍ŋ ni̍. Wāna̍ to̍sa̍ ī wāā le̍nde̍ pɛ̍, wānā ko̍ŋ ni̍ chūā kōŋ ni̍, ā nɔ̄ mā sɔ̄la̍ dɛ̍nɛ̍ pa̍lāa̍ le̍ nyɛ̄ nda̍ tōsa̍ ko̍ŋ ndo̍.

²⁰Wānā o̍ wāna̍ su̍u̍nda̍ a̍ la̍nɔ̍ɔ̍ fi̍nyā nūm pɔ̍mbɔ̄ ɔ̄ɔ̄ fi̍nyā nūm bɛ̍ndū pɛ̍, mɛ̄ɛ̍ wānā ko̍ŋ bɛ̄ɛ̄la̍ŋ ŋ̄ tɛ̄ɛ̄mbu̍u̍ la̍ŋ fi̍nyā nūm ko̍ŋ ni̍. Po̍ ko̍ŋ ni̍, chūā kōŋ ni̍, ā nɔ̄ mā sɔ̄la̍ dɛ̍nɛ̍ pa̍lāa̍ le̍ yɔ̄ŋ ndā wɔ̍ɔ̍ŋ kōŋ, nda̍ ŋīɔ̍ɔ̍ŋ fa̍ū ā wū le̍nde̍ ā vi̍lū ŋ̍chu̍a̍u̍ le̍.

²¹Wānā o̍ wāna̍ po̍o̍nda̍ pɔ̄mbɔ̄ ndɔ̍ ɔ̄ɔ̄ bɛ̄ ndɔ̍ la̍nɔ̍ɔ̍ o̍ bā pɛ̍, mbō sīīŋgu̍u̍ chūā kōŋ la̍a̍ ndɔ̄ pɛ̍, mɛ̄ɛ̍ wānā ko̍ŋ ō tɛ̄ɛ̄mbu̍u̍ sāwa̍ to̍sā mī wāŋndo̍ ō sīmnu̍ŋ o̍ nɔ̍ɔ̍lɛ̍i̍ yo̍, ndu̍yɛ̍ mɛ̄ɛ̍ o̍ tɛ̄ɛ̄mbūū pɔ̄mbɔ̄ ndɔ̄ ko̍ŋ ɔ̄ɔ̄ ndɔ̄ ko̍ŋ lābɛ̄ɛ̄. Po̍ ko̍ŋ ni̍, chūā kōŋ ni̍, ā wū le̍nde̍ ni̍ ā vi̍lū ŋ̍chu̍a̍u̍ le̍.”

²²Mi̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍a̍ū lāchī a̍ sūɛ̍i̍ mbo̍ dīmī āā, “Le̍la̍ŋ nya̍ wāŋnda̍ I̍sɔ̄lūɛ̄ī, nyɛ̄ o̍ nyɛ̄ sāwāla̍ nīla̍ŋ lā dīmi̍, a̍ nyɛ̄ o̍ nyɛ̄ ya̍ dīmu̍l nya̍ le̍ tōsāa̍, lā wa̍ ndu̍ to̍sāa̍ le̍ te̍le̍ŋ o̍ te̍le̍ŋ. Ko̍ŋ to̍sā ni̍, lɛ̄ŋndē Ke̍nāŋnde̍ŋ lē ya̍ I̍ cho̍ le᷅ŋ nya̍ kɔ̄la̍ŋ kīo̍o̍ le̍ŋ, lē kɛ̍ɛ̄ nya̍ mī tɔ̄lɔ̄ɔ̄lā nyā la̍ŋ lā kɛ̍ɛ̍ nāŋɔ̄ɔ̍, mī lā wa̍ ā sōlīāā lēni᷄ŋ po̍ le̍.

²³Wānāa̍ cho̍ o̍ lɛ̄ŋndē lēŋ ni̍ŋ nya̍ lāchī mi̍ wa᷅ nda̍ tōūwɔ̄ɔ̍ wa̍, na̍a̍mu̍lā ndāla̍ wɔ̍ɔ̍ŋndā nda̍ nɔ̄ la̍ŋ, lā kɔ̍ to᷅l la̍ŋ kɔ̄ɔ̄lī le̍. Na̍a̍mu̍lā ndāla̍ wɔ̍ɔ̍ŋndā la̍ŋ la̍ to̍sa̍ ni̍ mi̍ tu᷅l nda̍ yɛ̄le̍ŋ tūl bɛ̄ndōo̍.

²⁴Mi̍ chu̍ēl nya̍ būŋgɛ̍i̍ māā I̍ cho̍ nya̍ lɛ̄ŋndē wāŋnda̍ ha̍ā kē mī lē sīmnu᷄ŋ nyɛ̍ nyā, lɛ̄ŋnde̍ cho̍ lē pīāā a̍ nyɛ̄m kɛ̄ndɔ᷄ŋ, ndu̍yɛ̍ mi̍ lē nɔ̄ fo̍ndāŋndā kɛ̄ndɛ̄lā tɔ̄lɔ̄ɔ̄la̍ŋ lā nāŋ nda̍ŋ nde̍ŋ. Ndu̍yɛ̍ I̍ cho̍ nya̍ le̍ŋ kē mɛ̄ɛ̍ ya̍ I̍ chu̍e̍l nya̍ būŋgɛ̍i̍ yɛ̍. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ni̍. I̍ hɛ̍li̍ nya̍ kāa̍la̍ŋ lā pīlɛ̍ la̍ŋ tɛ̄ɛ̄ŋ kpo̍u̍ mi̍ si̍i̍ŋgūū nya̍ wānāā te̍ŋge̍le̍ŋ.

²⁵Le̍la̍ŋ lā nɔ̄ mī lā sīna̍ yɛ̍ yi̍ɔ̍ɔ̍, mī lā sīna̍ vīsīa̍a̍ cho̍ ā dīāndāā le̍ dīo̍o̍ wa̍ tɛ̄ɛ̄ŋ, a̍ vīsīa̍a̍ cho̍ a̍ di̍a̍ndāā le̍ wa̍, ndu̍yɛ̍ vɛ̍lɛ̄ mī lā sīna̍ yɛ̍ yi̍ɔ̍ɔ̍ yōūwa̍ tɛ̄ɛ̄ŋ, ma̍ wā ā dīāndāā le̍ dīo̍o̍, a̍ a̍ cho̍ a̍ di̍a̍ndāā le̍ wa̍. Nyɛ̄ o̍ nyɛ̄ ya̍ I̍ di̍mi̍ māā ō cho̍ o̍ di̍a̍ndāā ya̍ o̍ hɔ̄l le̍ di̍o̍ le̍, vīsī ni̍, yōū ni̍, nyāā yōōmāa̍ ku̍ā ha̍ā lɛ̄ŋ sɔ̍ŋgɔ̍ sāsɔ᷄ŋndo̍ wa̍ ni̍, lā chɛ᷅l mī lā sīmnu̍ŋ a̍ nɔ̍ɔ̍lɛ̍i̍ o̍ nda̍ dīo̍o̍ ni᷄ŋ te̍.

²⁶Lā kīndi̍ŋ o̍ nɛ̄ī o̍ nɛ̄ī ni̍ŋ mī lā wa̍ ā dīāndāā ya̍ Mɛ̍lɛ̄ka̍ o̍ hɔ̍l, ndu̍yɛ̍ mī lā wa̍ le̍ ya̍, ya̍ pīlɛ̍ kpe̍, fo̍ndōle̍, ya̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍, Mɛ̄lɛ̄ka̍ dīāndāa̍ ya̍ I̍ cho̍ ni̍. Kāa̍la̍ŋ tɛ̄ɛ̄ŋ kpo̍u̍ nya̍ ya̍ I̍ hɛ̍li̍ ni̍, mi̍ si̍i̍ŋgūū nya̍ wānāā nī.

²⁷“Wānā o̍ wāna̍ wa̍ nya̍ tɛ̄ɛ̄ŋ pɛ̍, mbo̍ wā wāna̍ ŋ̄wāŋ vīlɛ̍i̍ ɔ̄ɔ̄ wānā vi̍a̍māā lāyāwā, ō wa̍ wa̍nā pɔ̍nɔ̍, ō wa̍ wa̍nā la̍nɔ̍, lā nɔ̄ mī lā lo̍ ndu̍ vīīyo̍ a̍ pōūta̍ŋ ha̍a̍a̍ mbō vī. Ndu̍yɛ̍, wānā ko̍ŋ ndu̍ pi̍la̍ tɔ̍ɔ̍ya̍ŋ pīɔ̍m ndɔ̄ɔ̍ ō wā cho̍o̍ ni̍.”