Read Southern Kisi Lɛ̄vi̍ti̍kɔ̍ɔ̄ 27 Bible Online

Lɛ̄vi̍ti̍kɔ̍ɔ̄ 27 - Southern Kisi bible

Lɛ̄vi̍ti̍kɔ̍ɔ̄ 27

¹O̍ ko̍ŋ kɔ̍ɔ̍lī, mī Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē āā,

²“Di̍mu̍l wa᷅ŋnda̍ I̍sɔ̄lūɛ̄ī māā sāwāla̍ ya̍ Mɛ̍lɛ̄ka̍ dɔ̄ū vɛ̄lɛ̄ la̍ŋ, la̍ŋ la̍ cho̍ la᷅ŋ ni̍. Tē ō wa̍ pɛ̍ mī wāŋndo̍ ō chūa̍ būŋgɛ̄i̍ le̍ wāna̍ chi̍o̍o̍ yɔ̄ŋgōo̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ le̍ mī wānā ko̍ŋ ō wa᷄ ni᷅ŋ le̍ ya̍ pɛ̍, kɛ̍ mī wānā ko̍ŋ ō yēēma̍ le̍ wānā ko̍ŋ bāŋāa̍ pɛ̍, nyɛ̄ sɔ̄lāa̍ cho̍ ō kīālāā ba̍a̍ le̍ wānā ko̍ŋ bāŋāa̍ wo̍ ndu̍ cho̍ ho̍ō ni̍.

³Tē ō wa̍ wānā pɔ̍nɔ̍ ka̍a̍so̍ŋnɔ̍ɔ̍ pɛ̍, o̍ cho̍ chɔ̍ŋ wɔ̍sīla̍ŋ bi̍di̍i̍ŋ mbō kūɛ̄ wɔ̄sīla̍ŋ be̍le̍-ŋɔ̍mpu᷅m ndo̍, ka̍ni̍ŋ hu̍mbo᷄ŋ be̍le̍-ŋu̍ɛ̍ɛ̍nu̍ nda̍ nɔ̄ ni̍ mā bāŋa̍ ndu̍ a̍ mu̍ŋ. Tē ō wa̍ wɛ̄ɛ̄ŋ kālāa̍ pɛ̍, ka̍ni̍ŋ hu̍mbo̍ŋ be̍le̍-ya̍a̍. Tē ō wa̍ chūāāmbɔ̄ pīāāndōo̍ pɛ̍, chɔ̍ŋ wɔ̍sīla̍ŋ lā ŋūɛ̍ɛ̍nu̍ mbo̍ kūā wɔ̄sīla̍ŋ bi̍di̍i̍ŋ, ka̍ni̍ŋ hu̍mbo᷄ŋ bi̍di̍i̍ŋ nda̍ nɔ̄ ni̍ mā bāŋa̍ ndu̍ a̍ mu̍ŋ, Tē ō wa̍ chūāāmbɔ̄ lāāndū fɔ̍ŋndɔ̍ɔ̍ pɛ̍, ka̍ni̍ŋ hu̍mbo᷄ŋ tɔ̍. Tē ō wa̍ chɛ̄lɛ̄kpɛ̍ le̍ndōo̍ pɛ̍, o̍ chi̍ŋa̍ wɔ̍ wɔ̍sīlā ŋūɛ̍ɛ̍nu̍ le̍ wo̍, wānā pɔ̍nɔ̍ɔ̍ ka̍ni̍ŋ hu̍mbo᷄ŋ ŋ̄ ŋūɛ̍ɛ̍nu̍, wānā la̍nɔ̍ɔ̍ ka̍ni̍ŋ hu̍mbo᷄ŋ ŋ̄ ŋgāa̍. Tē ō wa̍ pɛ̍ wa᷅na̍ hi̍o̍ū ni᷅ŋ wɔ̄sīla̍ŋ be̍le̍-ŋɔ̍mpu᷅m ndo̍ pɛ̍, wānā pɔ̍nɔ̍ɔ̍ ka̍ni̍ŋ hu̍mbo̍ŋ tɔ̍ a̍ ŋ̄ ŋūɛ̍ɛ̍nu̍, wānā la̍nɔ̍ɔ̍ ka̍ni̍ hu̍mbo᷄ŋ tɔ̍. Ndu̍yɛ̍ nyɛ̄ sɔ̄lāa̍ cho̍ ho̍ō le̍ wāŋndo̍ bāŋāa̍ wo̍, sēke̍lēi̍ wānāā sōlīāā lāsa̍lāa̍ a̍ chɛ̍la᷅ŋ (...)

⁸“Tē ō wa̍ pɛ̍, māā wāna̍ chu̍a̍ būŋgɛ̄i̍ he̍ī yo̍ ō nɔ̍lā nyɛ̍ sɔ̄lāa̍ cho̍ ho̍ō ō kīālāā ba̍a̍ wo̍ sɔ̄lā le̍ pɛ̍, mɛ̄ɛ̍ wānā ko̍ŋ ō nɔ̄ mbō hīŋ a̍ wāna̍ o̍ chu̍a̍ ko̍ŋ bu̍ŋgɛ̄i̍ le̍ yɔ̄ŋgōo̍ wo̍ nāa̍ wānā so̍līāā lāsa̍lāa̍ chūā. O̍ ko̍ŋ mī wānā so̍līāā lāsa̍lāa̍ ō kēlū nyɛ̄ sɔ̄lāa̍ ba̍a̍ mɛ̄ɛ̍ kpɛ̍ɛ̍ wāna̍ chu̍a̍ ko̍ŋ bu̍ŋgɛ̄i̍ yo̍ ō nɔ̄lā sɔ̍lā le̍ wānā ko̍ŋ bāŋāa̍ yɛ̍.

⁹“Tē ō wa̍ pɛ̍ māā chɔ̄lōo̍ wāŋndo̍ ō chūa̍ būŋgɛ̄i̍ le̍ yɔ̄ŋgōo̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ ni̍, ndu̍yɛ̍ mi̍ chɔ̄lu̍ kōŋ ō wā ō bɛ̄ndāā, mɛ̄ɛ̍ chɔ̄lū kōŋ ō chīī sīmnɔ᷄ŋ o̍ di̍a̍ndāā ya̍ Mɛ̍lɛ̄ka̍ o̍ hɔ̄l.

¹⁰Wānā ko̍ŋ ō nɔ̍ mbō hīŋ a̍ chɔ̄lū o̍ chɔ̄lū chēle̍ŋ sɔ̍ŋgɔ̍ chɔ̄lū kōŋ te̍. Ā yɔ᷄ŋ bɛ̍ɛ̍ mī chɔ̄lū o̍ hi̍ŋ le̍ sɔ̍ŋgɔ̍ chɔ̄lū kōŋ ndo̍ ō bɛ̄nda̍ mbō hīōū chɔ̄lū o̍ chu̍a̍ būŋgɛ̄i̍ yo̍, ɔ̄ɔ̄ mī chɔ̄lū o̍ chu̍a̍ būŋgɛ̄i̍ yo̍ ō bɛ̄nda̍ mbō hīōū chɔ̄lū o̍ hi᷅ŋ ndo̍, ō nɔ̍ mbō sīŋga̍ chɔ̄lū kōŋ te̍. Tē ō hīŋ a̍ chɔ̄lū o̍ chɔ̄lū le̍ sīŋgāa̍ pɛ̍, chɔ̄lūāā ŋīɔ̍ɔ̍ŋāā kāŋ kpo̍u̍ le̍ ya̍ Mɛ̍lɛ̄ka̍ Ya̍a̍wɛ̄ɛ̄ nda̍ wa̍ ni̍.

¹¹Tē ō wa̍ pɛ̍, māā chɔ̄lū wāŋndo̍ ho̍ō ō chūa̍ būŋgɛ̄i̍ yo̍ māā ō cho̍ chɔ̍lu̍ cho̍ ō dīāndāā le̍, wānā ko̍ŋ ō nɔ̄ mbō hīŋ a̍ chɔ̄lū kōŋ nāa̍ wānā so̍līāā lāsa̍lāa̍ chūā.

¹²O̍ ko̍ŋ, mī wānā so̍līāā lāsa̍lāa̍ ō hu̍ŋ mɛ̍ɛ̍nda᷄ŋ chɔ̍lū kōŋ, mbō kēlū ndu̍ īyāma̍. Chɔ̄lū kōŋ ō wa᷄ o̍ kɛ̍ndɛ̄, ō wa᷄ o̍ wɔ̍ɔ̍ŋ, ba̍ā o̍ ba̍ā wānā so̍līāā lāsa̍lāa̍ ō kēlū pɛ̍, ba̍ā ko᷄ŋ lo᷅ le̍cho̍o̍ ni̍.

¹³Kɛ̍ tē wānā ko̍ŋ ō yēēma̍ le̍ chɔ̄lū ndɔ̄ ko̍ŋ bāŋāa̍ pɛ̍, ō nɔ̄ mbō pāāwa̍ ba̍ā chɔ̄lū kōŋ, ndu̍yɛ̍ tē ba̍ā chɔ̄lū kōŋ ō wa̍ kɛ̄mɛ̄ pɛ̍, ō nɔ̄ mbō hāndu̍ bi̍di̍i̍ŋ lēchōo̍ ba̍na̍sīi̍yo̍.

¹⁴“Tē ō wa̍ pɛ̍ mī wāŋndo̍ ō yɔ̄ŋgu̍ chīɛ̄ī ndɔ̄ɔ̍ le̍ mī chīɛ̄ī kōŋ ō wa̍ ni᷅ŋ le̍ ya̍ Mɛ̍lɛ̄ka̍ Ya̍a̍wɛ̄ɛ̄ pɛ̍, wānā so̍līāā lāsa̍lāa̍ ō nɔ̄ mbō mɛ̄ɛ̄ndi̍a̍ŋ chi̍ɛ̍ī kōŋ mbō kēlū ndu̍ īyāma̍. Chīɛ̄ī kōŋ ō wa̍ o̍ kɛ̍ndɛ̄, ō wa̍ o̍ wɔ̍ɔ̍ŋ, ba̍ā o̍ ba̍a̍ ba̍ā wānā so̍līāā lāsa̍lāa̍ ō kēlū le̍ chīɛ̄ī ko̍ŋ pɛ̍, mɛ̄ɛ̍ ba̍ā ko̍ŋ lo᷅ le̍cho̍o̍ ni̍.

¹⁵Tē wāna̍ chīɛ̄īyo̍ ō yēēma̍ le̍ chīɛ̄ī ndɔ̄ɔ̍ bāŋāa̍ pɛ̍, mɛ̄ɛ̍ ba̍a̍ cho̍ ō kīālāā le̍ chīɛ̄ī ko̍ŋ ndo̍ ndu̍ o̍ nɔ̍ ni̍ mbō pāāwa̍. Ndu̍yɛ̍ te̍ ba̍ā chīɛ̄ī kōŋ ō wa̍ nyɛ̄ sɔ̄lāa̍ kɛ̄mɛ̄ pɛ̍, ō nɔ̄ mbō hāndu̍ bi̍di̍i̍ŋ lēcho̍ō ba̍na̍sīi̍yo̍. O̍ ko̍ŋ, mī chīɛ̄ī ndɔ̄ɔ̍ mīīŋgu̍ ndu̍ o̍ bā.

¹⁶Tē wāŋndo̍ yɔ̄ŋgu̍ yōndō yu̍ŋgu̍ ndāa̍ ō ti᷄ŋ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ pɛ̍, bāa̍līi̍ŋ lu̍ɛ̍ī o̍ yōndō kōŋ ni᷄ŋ o̍ wa̍llo̍ ni᷄ŋ ndo̍ŋ, mu̍ŋ nda̍ nɔ̄ ni̍ mā kēlū ba̍a̍. Ndu̍yɛ̍ ba̍a̍līi̍yo̍ŋ bu̍sɔ̄ɔ̍ ō pīlɛ̍ ō nɔ̄ mbō wa᷄ ba̍a̍ ka̍ni̍ŋ hu̍mbo᷄ŋ tɔ̍.

¹⁷Tē ō wa̍ pɛ̍ māā o̍ wɔ̄sī nyɛ̄ o̍ nyɛ̄ nɔ̄ mbō sɔ̄la̍ bāŋa᷄ŋndo̍ wo̍ mɛ̄ɛ̄lu̍la̍ŋ wānā ko̍ŋ ō yɔ̄ŋgu̍ yōndō kōŋ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ ni̍, mɛ̄ɛ̍ ba̍ā kpe̍e̍kpe̍i̍yo̍ nda̍ nɔ̄ ni̍ mā kēlū le̍ yōndōo̍ ho̍ō.

¹⁸Kɛ̍ tē ō wa̍ pɛ̍, māā wɔ̄sīī be̍le̍-ŋu̍ɛ̍ɛ̍no̍o̍ ō hīōū fɛ̍lɛ̍ŋ ma̍lāŋ wāŋndo̍ ho̍ō ō yɔ̄ŋgu̍ yo̍ndōo̍ ho̍ō o̍ ya̍ Mɛ̍lɛ̄ka̍ lo̍, mɛ̄ɛ̍ wānā so̍līāā lāsa̍lāa̍ ō nɔ̄ mbō chɔ᷄m wɔ̄sīlā tɔ̄la̍ lo̍ le̍ wɔ̄sīī be̍le̍-ŋu̍ɛ̍ɛ̍no̍o̍ chīŋāa̍ la̍ŋ, ndu̍yɛ̍ mbō chɔ᷄m nyɛ̄ sɔ̄lāa̍ nɔ̍ mbō wa̍ le̍ īwɔ̄sī o̍ īwɔ̄sī wo̍, o̍ ko̍ŋ kɔ̍ɔ̍lī mbō dɔ̄ū nyɛ̄ sɔ̄lāā kōŋ nāa̍ pi᷅lɛ̍ le̍ wɔ̄sīlā lāŋ.

¹⁹Te̍ wāna̍ yɔ̍ŋgu̍ yōndōo̍ ho̍ō wo̍ ō yēēma̍ le̍ yōndō ndɔ̄ɔ̍ bāŋāa̍ pɛ̍, wānā ko̍ŋ ō nɔ̄ mbō pāāwa̍ nyɛ̄ sɔ̄lāa̍ cho̍ ō kīālāā ba̍a̍ le̍ yōndō kōŋ ndo̍, ndu̍yɛ̍ te̍ nyɛ̄ sɔ̄lāā kōŋ ō wa̍ kɛ̄mɛ̄ pɛ̍, ō nɔ̄ mbō hāndu̍ bi̍di̍i̍ŋ lēcho̍ō ba̍na̍sīi̍yo̍. O̍ ko̍ŋ mī yōndō ndɔ̄ɔ̍ mīīŋgu̍ ndu̍ o̍ bā.

²⁰Kɛ̍ tē wāna̍ nɔ̍ yōndōo̍ ho̍ō wo̍ ō yēēma̍ le̍ yōndō ndɔ̄ɔ̍ ho̍ō bāŋā le̍, mbō lo̍ o̍ ko̍ŋ mbō chɛ᷄l mā pīsi̍ yōndōo̍ ho̍ō wānā che᷅le̍ŋ o̍ bā pɛ̄, mɛ̄ɛ̍ wāna̍ yōndō kōŋ ō nɔ̍ lɛ̍ di̍ o̍ di̍ le̍ yōndō kōŋ bāŋāa̍ le̍.

²¹Tē wɔ̄sī nyɔ̄ɔ̍ŋ nɔ̄ le̍ bāŋa᷄ŋndo̍ wo̍ ō fūūlu̍u̍ pɛ̍, mī yōndōo̍ ho̍ō ō sɔ̄la̍ bāŋa᷄ŋndo̍, mɛ̄ɛ̍ yōndo̍ wa᷅ o̍ yɔ̍ŋa᷄ŋ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ wo̍ o̍ wa᷅ ni̍. Ndu̍yɛ̍ yōndō kōŋ wānāā sōlīāā lāsa̍lāa̍ nda̍ nɔ᷅ ni᷅ŋ ni̍.

²²Tē wāŋndo̍ o̍ chūa̍ būŋgɛ̄i̍ le̍ yōndō ndɔ̍ o̍ pe̍ndū wo̍ yɔ̄ŋgōo̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ pɛ̍, ndu̍yɛ̍ mbō ve᷄ yo̍ndō nda̍ yu̍ŋgu̍ le̍ pɛ̍,

²³wānāā sōlīāā lāsa̍lāa̍ ā nɔ̄ mā kēlū yōndōo̍ kōŋ ba̍a̍. Mɛ̄ɛ̍ wɔ̄sīla̍ŋ lā lō le̍ mī nyɛ̄ o̍ nyɛ̄ ō sɔ̄la̍ bāŋa᷄ŋndo̍ fūūlu̍u̍ yɛ̍, le̍nde̍ nda̍ nɔ̄ ni̍ mā kēlū ndu̍ ba̍a̍. Ndu̍yɛ̍ nyɛ̄ sɔ̄lāā o̍ nyɛ̄ sɔ̄lāā nda̍ kēlū ba̍a̍ pɛ̍, wāna̍ yɔ̍ŋgū ko̍ŋ yo̍ndō kōŋ ndo̍ ō nɔ̄ mbō pāāwa̍ nyɛ̄ sɔ̄lāā kōŋ pāa̍le̍ le̍ŋ. Ndu̍yɛ̍ nyɛ̄ sɔ̄lāā kōŋ le̍ ya̍ Mɛ̍lɛ̄ka̍ Ya̍a̍wɛ̄ɛ̄ o̍ nɔ̍ ni̍ mbō wa̍.

²⁴O̍ ko̍ŋ kɔ̍ɔ̍lī, tē wɔ̄sī bāŋa᷄ŋndo̍ ō fūūlu̍u̍ pɛ̍, mī nyɛ̄ o̍ nyɛ̄ ō sɔ̄la̍ bāŋa᷄ŋndo̍, wānā ko̍ŋ ō mīŋgi̍ wāna̍ o̍ pe̍ndū ko̍ŋ yōndō kōŋ o̍ bā wo̍ yōndō ndɔ̄ɔ̍ o̍ bā le̍ mī nyɛ̄m ndɔ̍ŋ ki̍ɔ̍ɔ̍ŋ ŋ̄ mīīŋgu̍ ndu̍ o̍ bā.

²⁵Ndu̍yɛ̍ tē lā wa̍ nyɔ̄ɔ̍ŋ mu᷅ŋ ba̍āla̍ŋ kīōlɔ̄ɔ̍ pɛ̍, sēke̍lēi̍ wānāā sōlīāā lāsa̍lāa̍ ā chɛ̄la᷅ŋ cho̍o̍ le̍ ka̍ni̍ŋ hu̍mbo᷄ŋ tūūwo̍ wo̍, a̍ ndu̍ nya̍ tūū nyɛ̍ sɔ̄lāā kōŋ ni̍.

²⁶“Kɛ̍ ndu̍yɛ̍ lā sīna̍ pɛ̍ŋgu̍ māā chɔ̄lūāā tāsi̍a̍a̍ chɔ̄lūāā nyāa̍ ā kūām nda̍ ki̍nɛ̍i̍, ō wa̍ nāū ō wa̍ sa̍ā, māā le̍ ya̍ Mɛ̍lɛ̄ka̍ Ya̍a̍wɛ̄ɛ̄ nda̍ chō ni̍. Lā nɔ̍ lɛ̍ mī lā yɔ̄ŋgu̍ ka̍ŋ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ le̍, fo̍ndōle̍ ā chō ni᷅ŋ le̍ ya̍.

²⁷Kɛ̍ tē ō wa̍ chɔ̄lu̍ cho̍ o̍ di̍a̍ndāā pɛ̍, nūm wāna̍ chɔ̄lū kōŋ ā nɔ̄ mā ba̍ŋa̍ chɔ̄lū nūmndo̍ a̍ nyɛ̄ sɔ̄lāa̍, mɛ̄ɛ̍ chɔ̄lōo̍ ō nɔ̄ ba̍a̍ yɛ̍. Ndu̍yɛ̍ tē ba̍ā ndɔ̄ɔ̍ ō wa̍ kɛ̄mɛ̄ pɛ̍, ā nɔ̄ mā ha̍ndu̍ bi̍di̍i̍ŋ lēchōo̍ ba̍na̍sīi̍yo̍. Kɛ̍ tē nūm wāna̍ chɔ̄lōo̍ ho̍ō a̍ ba̍ŋa̍ dɔ̍ɔ̍ chɔ̄lū nūmndo̍ le̍, lā nɔ̄ mī lā pīsi̍ chɔ̄lōo̍ ho̍ō mɛ̄ɛ̍ ba̍ā chɔ̄lōo̍ chō ō kīālāā yɛ̍.

²⁸Kɛ̍ nyɛ̄ o̍ nyɛ̄ wāŋndo̍ ō chūa̍ ni᷅ŋ pɛ̍ chɔ̍ mbo̍ yɔ̄ŋgū ndu̍ o̍ ya̍ Mɛ̄lɛ̄ka̍ Ya̍a̍wɛ̄ɛ̄ lo̍ māā sa̍lā, ō wa̍ wa᷅na̍ chi̍o̍o̍ ō wa̍ chɔ̍lū, ō wa̍ yo̍ndō, mɛ̄ɛ̍ nyɛ᷄ cho̍ ō yɔ̄ŋa᷄ŋ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ wo̍ o̍ cho̍ ni᷅ŋ le̍ fɛ̍ɛ̍ŋ a̍ fɛ̍ɛ̍ŋ ni̍. Wānā o̍ wānā nɔ̍ lɛ̍ mbō pēndū, ɔ̄ɔ̄ mbō bāŋa̍ nyɛ̄ kōŋ te̍.[7]

²⁹Ā yɔ᷄ŋ bɛ̍ɛ̍ mbō wa̍ māā wāna̍ chi̍o̍o̍ nda̍ yɔ̄ŋgu̍ yɔ̄ŋgū kōŋ ni̍, wāna̍ chi̍e̍e̍ ko̍ŋ ō nɔ̍ mbō sɔ̄la̍ bāŋā le̍, ā nɔ̄ mā dīī ndu̍.

³⁰O̍ ko̍ŋ kɔ̍ɔ̍lī, nyɛ̍ o̍ nyɛ̄ nya̍ sɔ̄la̍ o̍ chīɔ̄ɔ̄ŋ nyāa̍ŋ ni᷄ŋ pɛ̍ a̍ o̍ kpe̍le̍la̍ nyāla̍ŋ ni᷄ŋ māā kē lēbōl, ō wa̍ nyɛ̍ dīāā ku̍lu̍, ɔ̄ɔ̄ ō wa̍ la̍ko̍mɔ̄ɔ̄, nyɛ̄ kōŋ le̍ ya̍ Mɛ̍lɛ̄ka̍ Ya̍a̍wɛ̄ɛ̄ o̍ cho̍ ni᷅ŋ ni̍. Nyɛ̍ cho̍ ō yɔ̄ŋga᷄ŋ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ wo̍ o̍ cho̍ ni̍.

³¹Kɛ̍ tē wāŋndo̍ ō yēēma̍ le̍ kē ndɔ̍ lēbōllo̍ bāŋāa̍ pɛ̍, ō nɔ̄ di̍ mbō bāŋa̍. Ō nɔ̄ mbō pāāwa̍ nyɛ̄ sɔ̄lāa̍ mɛ̄ɛ̍ kē kōŋ ō nɔ̄ ba̍a̍ yɛ̍, ndu̍yɛ̍ tē ba̍ā ndɔ̄ɔ̍ ō wa̍ kɛ̄mɛ̄ pɛ̍, ō nɔ̄ mbō hāndu̍ bi̍di̍i̍ŋ lēchōo̍ ba̍na̍sīi̍yo̍.

³²Chɔ̄lūāā nyāa̍ ki̍nɛ̍i̍, nāū ni̍, sāā ni̍, chūi̍ŋ ni̍, ā kɛ᷅ o̍ kɛ᷅ nya̍ chɔ᷄m pɛ̍ tɔ̍, ō pīlɛ̍ nɔ̄ mbō wa᷄ le̍ ya̍ Mɛ̍lɛ̄ka̍ Ya̍a̍wɛ̄ɛ̄.

³³Ndu̍yɛ̍ wānā o̍ wānā tē a̍ wa̍ chɔ̄lūāā nūmnda̍ kē lēbōllo̍ sōlīo̍o̍ pɛ̍, a̍ nɔ̍ mā mɛ̍i̍ ā kɛ̄ndīa̍a̍ ki̍nɛ̍i̍ le̍ nūm pi̍la̍ mā so̍li̍ ā wɔ̄ɔ̍ŋnda̍ le̍. Ndu̍yɛ̍ vɛ̍lɛ̄ chɔ̄lū o̍ chɔ̄lū wānā yɔ̍ŋgu̍ ni᷅ŋ kē lēbōllo̍ pɛ̍, a̍ nɔ̍ lɛ̍ mā si̍ŋga̍ ndu̍ le̍. Tē a̍ yɔ̍ŋgu̍ chɔ̄lū o̍ chɔ̄lū sɔ̍ŋgɔ̍ɔ̍ ndɔ̄ɔ̍ pɛ̍, mɛ̄ɛ̍ nda̍ ŋi̍ɔ̍ɔ̍ŋ kpo̍u̍ le̍ ya̍ Mɛ̍lɛ̄ka̍ nda̍ nɔ̄ ni̍ mā wa̍. Ndu̍yɛ̍ a̍ nɔ̍ di̍ mā ba̍ŋa̍ ō kɛ᷅ o̍ kɛ᷅ le̍.”

³⁴Sāwāla̍ Mɛ̄lɛ̄ka̍ Ya̍a̍wɛ̄ɛ̄ o̍ ke̍ Mūu̍sē o̍ Pēmbīī Sa̍a̍nāīve̍ chōo̍ le̍ wāŋnda̍ I̍sɔ̄lūɛ̄ī la̍ŋ, la̍ŋ la̍ cho̍ la᷅ŋ ni̍.