Read Southern Kisi Lɛ̄vi̍ti̍kɔ̍ɔ̄ 4 Bible Online

Lɛ̄vi̍ti̍kɔ̍ɔ̄ 4 - Southern Kisi bible

Lɛ̄vi̍ti̍kɔ̍ɔ̄ 4

¹Mi̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍a̍ū lāchī a̍ sūɛ̍i̍ mbo̍ dīmūl Mūu̍sē āā,

²“Di̍mu̍l wa᷅ŋnda̍ I̍sɔ̄lūɛ̄ī, māā tē ō wa̍ pɛ̍ mī wāŋndo̍ ō tōsa̍ yɔ̄ŋ wɔ̄ɔ̍ŋndo̍, nyɛ̄ ya̍ Mɛ̄lɛ̄ka̍ Ya̍a̍wɛ̄ɛ̄ di̍mi̍ māā lā to̍sā le̍ wo̍ mbō tōsa̍ ndu̍yɛ̍, kɛ̍ ndu̍yɛ̍ mbō ve̍ kɛ̄ɛ̄sīāā le̍ wānā ko̍ŋ ō kɛ̄ɛ̄si̍a̍a̍ le̍ yɔ̄ŋ wɔ̄ɔ̍ŋ wāā le̍nde̍ to̍sā le̍, mɛ̄ɛ̍ nyɛ̄ wānā ko̍ŋ ō nɔ̄ mbō tōsa̍ wo̍ ndu̍ cho̍ ho̍ō ni̍.

³Tē ō wa̍ pɛ̍ māā māsa̍ wānāā sōlīāā lāsa̍lāa̍ o̍ to̍sa̍ yɔ̄ŋ wɔ̄ɔ̍ŋ wāā le̍nde̍ ni̍, mbō tōsa̍ mī wāŋnda̍ ā sɔ̄la̍ yāālāa̍ ya̍ Mɛ̄lɛ̄ka̍ o̍ hɔ̄l le̍ dɛ̍nɛ̍ pa̍lāa̍ sɔ̄lāa̍, māsa̍ wānāā sōlīāā lāsa̍lā kōŋ ō nɔ̄ mbō hīŋ a̍ nāū tōōyōo̍ o̍ nɔ̍ sɔ᷅ŋ o̍ sɔ̄ŋ te̍ wo̍, mā sōli̍ sa̍lāa̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ le̍ yɔ̄ŋ wɔ̄ɔ̍ŋ o̍ to̍sa̍ wo̍.

⁴Māsa̍ wānāā sōlīāā lāsa̍lā kōŋ ō nɔ̄ mbō hīŋ a̍ nāū tōōyē kōŋ o̍ tɛ̍ndīi̍ chɔ᷅m māā Mɛ̄lɛ̄ka̍ ō chō a̍ nya̍ la̍tu̍lu̍ wo̍ sōndōo̍ ya̍ Mɛ̍lɛ̄ka̍ Ya̍a̍wɛ̄ɛ̄ o̍ hɔ̄l. Tē ō hīŋ a̍ ndu̍ pɛ̍, ō hāndu̍ ndu̍ bāa̍ o̍ lēbōl, o̍ ko̍ŋ kɔ̍ɔ̍lī, ā dīī nāū kōŋ ya̍ Mɛ̍lɛ̄ka̍ Ya̍a̍wɛ̄ɛ̄ o̍ hɔ̄l.

⁵Tē ā dīī nāūwo̍ ho̍ō pɛ̍, wānā so̍līāā lāsa̍lā ko̍ŋ, ō chūa̍ kōo̍ma̍ nāū kōŋ mā ti᷄ŋ ō lūɛ̄ī a̍ ma̍ŋ o̍ tɛ̍ndīi̍ chɔ᷅m māā Mɛ̄lɛ̄ka̍ chō a̍ nya̍ la̍tu̍lu̍ wo̍ ni᷄ŋ.

⁶Tē ō lūɛ̄ī a̍ ma̍ŋ lo̍ŋ pɛ̍, kōlā bɛ̍ndu̍ cho̍ ō lāndāā o̍ fo̍ndā dīāndāa̍ hi̍o̍ū dīōndɔ̄ɔ̍ kpo̍u̍ wo̍ wo̍, wānā so̍līāā lāsa̍lā kōŋ ō yīŋ sūe̍i̍ o̍ ko̍o̍ma̍ ma̍ŋ ni᷄ŋ o̍ fāsa̍ŋa̍ ma̍ŋ o̍ kōlā bɛ̍ndū kōŋ hɔ̄lndɔ̄ lē ŋɔ᷄mmɛ̍ū.

⁷O̍ ko̍ŋ kɔ̍ɔ̍lī, mī wānā so̍līāā lāsa̍lā kōŋ ō chu̍a̍ kōo̍ma̍ ma̍ŋ mā ti᷄ŋ, mbō sūu̍ ma̍ŋ o̍ nyɛ̄la̍ cho̍ o̍ ma̍āŋndo̍ sɔ̍ŋgi̍la̍ŋ māā lālēē la̍ŋ, ma̍āŋ cho̍ le̍ nyɛ̄m chūŋ kɛ̄ndɔ᷄ŋ lōmɔ̄ɔ̍ le̍chōo̍ Mɛ̍lɛ̄ka̍ Ya̍a̍wɛ̄ɛ̄ lāchī wo̍, o̍ cho̍ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ la̍tu̍lu̍ wo̍ ni᷄ŋ ndo̍.

⁸Nāū nda̍ chō ho̍ō dīyɔ̄ɔ̄ wo̍ ā nɔ̄ mā sōli̍ chūɛ̄īma̍ cho̍ ndu̍ ni᷄ŋ mā hōlna᷄ŋ o̍ pūlo̍ŋ nda̍ŋ ki̍nɛ̍i̍,

⁹a̍ bɔ̄ŋgu̍ŋ mūu̍ŋ ndo̍ŋ, lātūlu̍ a̍ chūɛ̄īma̍ ho̍lnu̍ŋ bɔ᷅ŋgu̍ŋ mu̍ŋ nda̍ŋ, a̍ yēmi̍i̍ hɔ᷅lle̍, sōlīo̍o̍ ndi̍ le̍nde̍ a̍ bɔ̄ŋgu̍ŋ mūu̍ŋ ndo̍ŋ lātūlu̍.

¹⁰O̍ ko̍ŋ kɔ̍ɔ̍lī, mī wānā so̍līāā lāsa̍lāa̍ ō chūa̍ nyɛ̄m nda̍ chō mu̍ŋ so̍lī wo̍ŋ, mbō lōm mu̍ŋ o̍ ma̍āŋ nda̍ lūām sa̍lā lūāmāa̍ wo̍ chōo̍. Chɔ̄lū nda̍ dīī le̍ sa̍lā kɔ̄l nyūlōo̍ sōlīo̍o̍ wo̍, nyɛ̄m nda̍ nɔ̄ mā sōli̍ chɔ̄lū kōŋ ni᷄ŋ ndo̍ŋ, mu̍ŋ ko̍ni̍ nda̍ nɔ̄ mā sōli̍ vɛ̄lɛ̄ chɔ̄lōo̍ ho̍ō ni᷄ŋ mā lōm mu̍ŋ ni̍.

¹¹Kɛ̍ nāūwo̍ ho̍ō yāu̍ ndɔ̄ɔ̍ ni̍, vīsīŋ tɔ᷄ŋ ni̍, bōlle̍ŋ ni̍, a̍ pēlo᷄ŋ, a̍ nyɛ̄ o̍ nyɛ̍ cho̍ ndu̍ ni᷄ŋ, lātūlu̍ a̍ pōōlā ndɔ̄la̍ŋ kpo̍u̍, lā nɔ̄ mī lā chūa̍ mu̍ŋ kpo̍u̍ mī lā kūɛ̄ a̍ mu̍ŋ o̍ dɔ̍ɔ̍ŋgɔ̍ nya̍ chō wo̍ da̍ŋga̍la̍, o̍ fo̍nda̍ cho̍ ō dīāndāā ya̍ Mɛ̍lɛ̄ka̍ o̍ hɔ̄l lo̍ nāa̍ nda̍ vīāū pu᷅lta̍ŋ nda̍ mī lā kɔ̍ ki̍i̍sūū yīŋnde̍ŋ lo̍ŋ mī lā lōm vīsīŋ nāū kōŋ lo̍ŋ kpo̍u̍.

¹³Tē ō wa̍ pɛ̍ mī nya̍ wāŋnda̍ I̍sɔ̄lūɛ̍i̍ kpo̍u̍ mī lā tōsa̍ nyɛ̄ ya̍ Mɛ̄lɛ̄ka̍ Ya̍a̍wɛ̄ɛ̄ dīmu̍l nya̍ māā lā to̍sā le̍ wo̍, kɛ̍ ndu̍yɛ̍ lā si̍nā le̍, ko̍ŋ bɛ̍ɛ̍ I̍ chu̍a̍ ndu̍ māā yɔ̄ŋ wɔ̍ɔ̍ŋndo̍ nya̍ tōsa̍ ni̍.

¹⁴Le̍la̍ŋ tē lā sāālu̍ŋ dɔ̍ɔ̍ pɛ̍ māā lā tōsa̍ yɔ̄ŋ wɔ̄ɔ̍ŋndo̍, nya̍ wa᷅ o̍ ku̍ndā kōŋ chōo̍ wa̍, lā bīi̍ na̍ū tōōyōo̍ lā hīŋ a̍ ndu̍, lā sōli̍ ndu̍ sa̍lāa̍ le̍ yɔ̄ŋ wɔ̄ɔ̍ŋ kōŋ o̍ tɛ̍ndīi̍ chɔ᷅m māā Mɛ̄lɛ̄ka̍ chō a̍ nya̍ la̍tu̍lu̍ wo̍ sōndōo̍.

¹⁵Tē lā hīŋ a̍ nāūwo̍ ho̍ō pɛ̍, wāŋ bɛ̄ndūa̍a̍ I̍sɔ̄lūɛ̄ī a̍ ha̍ndu̍ ndu̍ bāla̍ŋ o̍ lēbōl, ā dīī ndu̍ ya̍ Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l.

¹⁶Tē ā dīī ndu̍ pɛ̍, māsa̍ wānāā sōlīāā lāsa̍lāa̍ ō chūa̍ kōo̍ma̍ nāū kōŋ mā ti᷄ŋ ō lūɛ̄ī a̍ ma̍ŋ o̍ tɛ̍ndīi̍ chɔ᷅m māā Mɛ̍lɛ̄ka̍ chō a̍ nya̍ la̍tu̍lu̍ wo̍ ni᷄ŋ.

¹⁷Tē ō lūɛ̄ī a̍ ma̍ŋ lo̍ŋ pɛ̍, kōlā bɛ̍ndu̍ cho̍ ō lāndāā o̍ fo̍ndā dīāndāa̍ hi̍o̍ū dīōndɔ̄ɔ̍ kpo̍u̍ wo̍ wo̍, māsa̍ wānāā so̍līāā lāsa̍lā kōŋ ō yīŋ sūe̍i̍ o̍ ko̍o̍ma̍ ma̍ŋ ni᷄ŋ, o̍ fāsa̍ŋa̍ ma̍ŋ o̍ kōlā bɛ̍ndū kōŋ hɔ̄lndɔ̄ lē ŋɔ᷄mmɛ̍ū, Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l.

¹⁸O̍ ko̍ŋ kɔ̍ɔ̍lī, mī wānā so̍līāā lāsa̍lā kōŋ ō chu̍a̍ kōo̍ma̍ ma̍ŋ mā ti᷄ŋ mbō kɔ̍ su̍ū ma̍ŋ o̍ nyɛ̄la̍ cho̍ o̍ ma̍āŋndo̍ sɔ̍ŋgi̍la̍ŋ māā lālēē la̍ŋ. Mɛ̄lɛ̄ka̍ Ya̍a̍wɛ̄ɛ̄ lāchī, ma̍āŋ cho̍ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ la̍tu̍lu̍ wo̍ ni᷄ŋ ndo̍.

¹⁹O̍ ko̍ŋ kɔ̍ɔ̍lī, chūɛ̄īma̍ cho̍ nāū kōŋ ni᷄ŋ nda̍ŋ ki̍nɛ̍i̍, mbō sōli̍ ma̍ŋ, mbō lōm ma̍ŋ kpo̍u̍ o̍ ma̍āŋndo̍ chōo̍.

²⁰Nāū wāŋnda̍ I̍sɔ̄lūɛ̄ī a̍ cho̍ ko̍ŋ sa̍lāa̍ sōlī wo̍, māsa̍ wānāā sōlīāā lāsa̍lāa̍ ō nɔ̄ mbō tōsa̍ a̍ nāū kōŋ, mɛ̄ɛ̍ o̍ to̍sa̍ a̍ nāū tāse̍ o̍ so̍li̍ sa᷅la̍ fa̍ŋā yɔ᷅ŋ wɔ̄ɔ̍ŋndo̍ wo̍ yɛ̍, mɛ̄ɛ̍ nu̍a̍ā wānā so̍līāā lāsa̍lāa̍ ō lōōkū to̍sā ni̍ mī wāŋnda̍ sɔ̄la̍ mālɔ̄ɔ̍ le̍ yɔ̄ŋ ndā wɔ̍ɔ̍ŋndo̍.

²¹O̍ ko̍ŋ, mbō chu̍a̍ nāū kōŋ mbō kɔ̍ lo᷅m ndu̍ o̍ dɔ̍ɔ̍ŋgɔ̍ nya̍ chō wo̍ da̍ŋga̍la̍, mɛ̄ɛ̍ nda̍ lo᷅m nu̍a̍ā nāū tāso̍o̍ yɛ̍ ko̍ni̍. Sa̍la̍ nɔ̍ mbō sōli̍ŋ le̍ yɔ̄ŋ wɔ̄ɔ̍ŋ wāŋnda̍ I̍sɔ̄lūɛ̄īyo̍ ndu̍ cho̍ ko̍ŋ ni̍.

²²Tē ō wa̍ pɛ̍ mī wāŋ bɛ̄ndūa̍a̍ I̍sɔ̄lūɛ̄ī ō pīlɛ̍ ō tōsa̍ nyɛ̄ ya̍ Mɛ̍lɛ̄ka̍ Ya̍a̍wɛ̄ɛ̄ Mɛ̄lɛ̄ka̍ ndɔ̄ɔ̍ dīmu̍l nya̍ māā lā to̍sā le̍ wo̍, kɛ̍ ndu̍yɛ̍ mbō sīna̍ le̍, ko̍ŋ bɛ̍ɛ̍ I̍ chu̍a̍ ndu̍ māā yɔ̄ŋ wɔ̍ɔ̍ŋndo̍ o̍ to̍sa̍ ni̍.

²³Le̍la̍ŋ tē ō sīna̍ dɔ̍ɔ̍ pɛ̍ māā ō tōsa̍ yɔ̄ŋ wɔ̄ɔ̍ŋ wāā le̍nde̍, ō nɔ̄ mbō hīŋ a̍ chūīŋndo̍ tōōyōo̍ o̍ nɔ̍ sɔ᷅ŋ o̍ sɔ̄ŋ te̍ wo̍ mbō sōli̍ ndu̍ sa̍lāa̍ o̍ ya̍ Mɛ̍lɛ̄ka̍ lo̍.

²⁴Tē ō hīŋ a̍ chūīŋndo̍ ho̍ō pɛ̍, ō hāndu̍ ndu̍ bāa̍ o̍ lēbōl, o̍ ko̍ŋ, a̍ dīī chūīŋndo̍ ho̍ō ya̍ Mɛ̍lɛ̄ka̍ Ya̍a̍wɛ̄ɛ̄ o̍ hɔ̄l, nāa̍ nda̍ nɔ̄ mā dīī chɔ̄lu̍ cho̍ le̍ sa̍lā lūāmāa̍ sōlīo̍o̍ wo̍ wa̍. Sa̍lā nɔ̍ mbō sōli̍ŋ le̍ yɔ̄ŋ wɔ̍ɔ̍ŋndo̍ wo̍ cho̍ ko̍ŋ ni̍.

²⁵O̍ ko̍ŋ kɔ̍ɔ̍lī, mī wānā so̍līāā lāsa̍lāa̍ ō yīŋ sūe̍i̍ o̍ kōo̍ma̍ cho̍ ma̍ŋ le̍ sa̍lā yɔ̄ŋ wɔ̍ɔ̍ŋndo̍ sōlīo̍o̍ wa̍ŋ ni᷄ŋ ma̍ ti᷄ŋ, mbō kɔ̍ su̍i̍ī ma̍ŋ o̍ nyɛ̄la̍ cho̍ o̍ ma̍āŋndo̍ sɔ̍ŋgi̍la̍ŋ māā lālēē la̍ŋ. O̍ kōŋ kɔ̍ɔ̍lī, kōo̍ma̍ tɔ᷅ ma̍ cho̍ lō wa̍ŋ ō chūa̍ ma̍ŋ ō tāla̍ ma̍ŋ o̍ ma̍āŋ lūāmāā lāsa̍la̍ kōŋ bɛ̄ŋgu̍.

²⁶O̍ ko̍ŋ kɔ̍ɔ̍lī, chūɛ̄īma̍ cho̍ chūīŋ kōŋ ni᷄ŋ nda̍ŋ ki̍nɛ̍i̍ mbō sōli̍ ma̍ŋ, mbō lōm ma̍ŋ kpo̍u̍ o̍ ma̍āŋndo̍ chōo̍, mɛ̄ɛ̍ o̍ to̍sā nu̍a̍ā a̍ chūɛ̄īmā chɔ̄lū sa̍lā kɔ̄l nyūlōo̍ yɛ̍. Mɛ̄ɛ̍ nu̍a̍ā wānā so̍līāā lāsa̍lāa̍ ō lōōkū sa̍lāa̍ ho̍ō sōlī ni̍, le̍ mī wānā ko̍ŋ ō sɔ̄la̍ mālɔ̄ɔ̍ le̍ yɔ̄ŋ ndɔ̄ wɔ̍ɔ̍ŋndo̍.

²⁷Tē ō wa̍ pɛ̍ mī nya̍ wāŋnda̍ I̍sɔ̄lūɛ̄ī wānā pīlɛ̍ ō tōsa̍ nyɛ̄ ya̍ Mɛ̍lɛ̄ka̍ Ya̍a̍wɛ̄ɛ̄ dīmu̍l nya̍ māā lā to̍sā le̍ wo̍, kɛ̍ ndu̍yɛ̍ mbō sīna̍ le̍, ko̍ŋ bɛ̍ɛ̍ I̍ chu̍a̍ ndu̍ māā yɔ̄ŋ wɔ̍ɔ̍ŋndo̍ o̍ to̍sa̍ ni̍.

²⁸Le̍la̍ŋ tē ō sīna̍ dɔ̍ɔ̍ pɛ̍ māā ō tōsa̍ yɔ̄ŋ wɔ̄ɔ̍ŋ wāā le̍nde̍, ō nɔ̄ mbō hīŋ a̍ chūīŋ lāāndōo̍ o̍ nɔ̍ sɔ᷅ŋ o̍ sɔ̄ŋ te̍ wo̍ mbō sōli̍ ndu̍ sa̍lāa̍ le̍ yɔ̄ŋ wɔ̄ɔ̍ŋ o̍ to̍sa̍ ko̍ŋ ndo̍.

²⁹Tē wāŋndo̍ ho̍ō ō hīŋ a̍ chūīŋndo̍ ho̍ō le̍ sa̍lāa̍ sōlīo̍o̍ le̍ le̍ yɔ̄ŋ ndɔ̄ wɔ̍ɔ̍ŋndo̍ pɛ̍, ō hāndu̍ ndu̍ bāa̍ o̍ lēbōl, o̍ ko̍ŋ kɔ̍ɔ̍lī, a̍ dīī chūīŋndo̍ ho̍ō o̍ fo̍ndāŋ nda̍ dīī chɔ̍lōo̍ le̍ sa̍lālā lūāmāāla̍ŋ sōlīo̍o̍ wo̍.

³⁰O̍ ko̍ŋ kɔ̍ɔ̍lī, mī wānā so̍līāā lāsa̍la̍ ō yīŋ sūe̍i̍ o̍ kōo̍ma̍ chɔ̄lōo̍ ho̍ō ni᷄ŋ ma̍ ti̍ŋ, mbō kɔ̍ su̍i̍ī ma̍ŋ o̍ nyɛ̄la̍ cho̍ o̍ ma̍āŋ lūāmāā lāsa̍lā kōŋ sɔ̍ŋgi̍la̍ŋ māā lālēē la̍ŋ. O̍ kōŋ kɔ̍ɔ̍lī, kōo̍ma̍ tɔ᷅ ma̍ cho̍ lō wa̍ŋ, ō chūa̍ ma̍ŋ ō tāla̍ ma̍ŋ o̍ ma̍āŋ kōŋ bɛ̄ŋgu̍.

³¹O̍ ko̍ŋ kɔ̍ɔ̍lī, chūɛ̄īma̍ cho̍ chūīŋ kōŋ ni᷄ŋ nda̍ŋ ki̍nɛ̍i̍, mbō sōli̍ ma̍ŋ mbō lōm ma̍ŋ mɛ̄ɛ̍ nda̍ sōlī nu̍a̍ā chūɛ̄īmā chɔ̄lū sa̍lā kɔ̄l nyūlōo̍ yɛ̍. O̍ ko̍ŋ, tē wānā so̍līāā lāsa̍lāa̍ ō lōm ma̍ŋ o̍ ma̍āŋndo̍ chōo̍ pɛ̍, mī chūŋ kōŋ ō kōma̍l la̍, ya̍ Mɛ̍lɛ̄ka̍ Ya̍a̍wɛ̄ɛ̄ I̍ hi̍ni̍ kɔ̄l nyɛ̄ kɛ̄ndɛ̄ kɛ̍ndɛ̄. Mɛ̄ɛ̍ nu̍a̍ā wānā so̍līāā lāsa̍lāa̍ ō nɔ̄ ni̍ mbō sōli̍ sa̍lāa̍ ho̍ō, le̍ mī wānā ko̍ŋ sɔ̄la̍ mālɔ̄ɔ̍ le̍ yɔ̄ŋ ndɔ̄ wɔ̍ɔ̍ŋndo̍.

³²Tē sāā fɔ̍ŋndɔ̍ɔ̍ wānā kōŋ ō yēēma̍ le̍ sa̍lāa̍ sōlīo̍o̍ le̍ yɔ̄ŋ ndɔ̄ wɔ̄ɔ̍ŋ kōŋ ni̍, sāā ko̍ŋ ō nɔ̄ mbō wa̍ ō lāāndōo̍, ndu̍yɛ̍ ō nɔ᷅ sɔ̄ŋ o̍ sɔ̄ŋ te̍.

³³Ndu̍yɛ̍ tē wānā ko̍ŋ ō hīŋ a̍ sāā ko̍ŋ pɛ̍, ō hāndu̍ ndu̍ bāa̍ o̍ lēbōl, o̍ ko̍ŋ, ā dīī sāā ko̍ŋ o̍ fo̍ndāŋ nda̍ dīī chɔ̍lōo̍ le̍ sa̍lālā lūāmāāla̍ŋ sōlīo̍o̍ wo̍.

³⁴O̍ ko̍ŋ kɔ̍ɔ̍lī, mī wānā so̍līāā lāsa̍la̍ ō yīŋ sūe̍i̍ o̍ kōo̍ma̍ cho̍ ma᷅ŋ le̍ sa̍lā fa̍ŋā yɔ̄ŋ wɔ̍ɔ̍ŋndo̍ wo̍ wa̍ŋ ni᷄ŋ, mbō kɔ̍ su̍i̍ī ma̍ŋ o̍ nyɛ̄la̍ cho̍ o̍ ma̍āŋ lūāmāā lāsa̍lāa̍ sɔ̍ŋgi̍la̍ŋ māā lālēē la̍ŋ. O̍ kōŋ kɔ̍ɔ̍lī, kōo̍ma̍ tɔ᷅ ma̍ cho̍ lō wa̍ŋ, ō chūa̍ ma̍ŋ ō tāla̍ ma̍ŋ o̍ ma̍āŋ lūāmāā lāsa̍la̍ kōŋ bɛ̄ŋgu̍.

³⁵O̍ ko̍ŋ kɔ̍ɔ̍lī, chūɛ̄īma̍ cho̍ sāā fɔ̍ŋndɔ̍ kōŋ ni᷄ŋ nda̍ŋ ki̍nɛ̍i̍, mbō sōli̍ ma̍ŋ mɛ̄ɛ̍ nda̍ sōlī nu̍a̍ā chūɛ̄īmā chɔ̄lū sa̍lā kɔ̄l nyūlōo̍ yɛ̍. O̍ ko̍ŋ, mī wānā so̍līāā lāsa̍lāa̍ ō lōm ma̍ŋ o̍ ma̍āŋ nda̍ sōlī sa̍lāla̍ŋ o̍ Mɛ̄lɛ̄ka̍ Ya̍a̍wɛ̄ɛ̄ lo̍ wo̍ chōo̍. Mɛ̄ɛ̍ nu̍a̍ā wānā so̍līāā lāsa̍lāa̍ ō nɔ̄ mbō sōli̍ sa̍lāa̍ ho̍ō ni̍, le̍ mī wānā ko̍ŋ sɔ̄la̍ mālɔ̄ɔ̍, le̍ yɔ̄ŋ ndɔ̄ wɔ̍ɔ̍ŋndo̍.”