Read Southern Kisi Chɛ̄lūīma̍yā 10 Bible Online

Chɛ̄lūīma̍yā 10 - Southern Kisi bible

Chɛ̄lūīma̍yā 10

¹Wāŋnda̍ I̍sɔ̄lūɛ̄ī, lā ya᷄ŋ ni᷅la̍ŋ mī lā tūēī nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍.

²Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Wāŋnda̍ I̍sɔ̄lūɛ̄ī, lā tu̍āl ka̍ālā lɛ̄ŋnde̍ īpīlɛ̍i̍ ī chō chōo̍ la̍ŋ kɔ̄ɔ̄lī le̍. Sɔ̄ɔ̍ŋ yɔ̍nūŋ o̍ ha̍la̍a̍ ni᷄ŋ cho̍o̍ cho̍o̍ mī sīōōŋīī bɛ̄ndūe̍i̍ ī nɔ̄ lɛ̄ŋnde̍ īpīlɛ̍i̍ bīyɔ̄ɔ̍ wo̍ŋ, nya̍ du̍a̍ū lāāla᷄ŋ nyāā o̍ mu̍ŋ ni̍ŋ mī sīōōŋīī bīī nya̍ le̍.

³Wāŋnda̍ ha̍ā, nyɛ̄ o̍ nyɛ̄ nda̍ chō sōōlūūwo̍, nyɛ̄m fo̍ndō fu̍u̍ ŋ̍ cho̍ ni̍. Tē ā kēŋ pɛ̍ yɔ᷅mndo̍ o̍ būndɔ̍ɔ̍ ni᷄ŋ, wānāā ndāā si̍a̍lāa̍ ā lo̍ o̍ ko̍ŋ ā sɛ̄l yɔ̄m kōŋ nyɛ̄ kɛ̄ndɛ̄ kɛ̍ndɛ̄, ā tōōsi̍a̍a̍ ndu̍ nyɔ̄ɔ̍ le̍ ndu̍ sōōlūūwo̍ māā mɛ̄lɛ̄ka̍ ndā.

⁴Tē ā chīi̍ ndu̍ sīɔ̄lɔ̄ɔ̄ pɛ̍ ā lo̍ o̍ ko̍ŋ ā tēēŋgi̍a̍a̍ ka̍ni̍i̍ hu̍mbūe̍i̍, kɛ̄lɛ̄ŋgāā ka̍ni̍i̍ si̍a̍ŋɛ̄i̍ ā kūmbū ndu̍ a̍ ndi̍ kpo̍u̍. O̍ ko̍ŋ kɔ̍ɔ̍lī, ā chu̍a̍ ndu̍ ā kɔ̍ si̍mī ndu̍ ā chu̍a̍ lɔ̄ndīmɛ̄i̍yo̍ŋ a̍ ba̍ŋ ndu̍ pe̍ŋ pe̍ŋ a̍ ha̍mɛ̄i̍yo̍ yɔ̄ŋi̍ o̍ de̍l.

⁵Tē ā chīi̍ mɛ̄lɛ̄ka̍a̍ ndāa̍ ha̍ā tōōsīāā pɛ̍ kpo̍u̍ a̍ kɔ̍ si̍mī nda̍, mɛ̄ɛ̍ nda̍ sīmī nu̍a̍ā nyɔ̄ɔ̍ o̍ chīɛ̍i̍ ni᷄ŋ māā wāna̍ chi̍e̍e̍ le̍ yōūwa̍ wūēēnɔ᷄ŋndo̍ yɛ̍. Nāa̍ nda̍ sīmī nda̍ wa̍ lo̍ŋ ko̍ nda̍ wā ni̍, ā su̍ū le̍, ndu̍yɛ̍ ā ku̍ē a̍ bā ndā le̍, mɛ̄ɛ̍ mī wāŋnda̍ chu̍a̍ nda̍ mā kɔ̍ kɛ̍sī nda̍ nāa̍ nda̍ nɔ̄ le̍ nda̍ kɛ̄sīo̍o̍ wa̍. Le̍la̍ŋ lā yɔ᷅ŋ īsīōōŋ le̍ mɛ̄lɛ̄ka̍a̍ wāā le̍nde̍ le̍, fo̍ndōle̍ ā nɔ̍lā mā yɔ᷄ŋ nya̍ nyɛ̄ o̍ nyɛ̄ le̍, ndu̍yɛ̍ vɛ̍lɛ̄ ā nɔ̍ ma̍lā o̍ mālā le̍ nya̍ le̍.

⁶Ōo̍ Mɛ̄lɛ̄ka̍ Ya̍a̍wɛ̄ɛ̄, wānā o̍ wānā cho̍ māā nūm te̍. Ā chō Mɛ̄lɛ̄ka̍ kpāāyā bɛ̍ndū. Dīōlā nūmnda̍ŋ lā chō dīōlā kpāāyā ndu̍yɛ̍ mi̍ lā wā dīōlā tɔ̍ɔ̍ bɛ̍ndū.

⁷Nu̍m cho̍ māsā bɛ̍ndōo̍ le̍ lɛ̄ŋnde̍ o̍ chi̍e̍ēŋndo̍ chōo̍ kpo̍u̍ ni̍. Wānā o̍ wāna̍ cho̍ o̍ chi̍e̍ēŋndo̍ chōo̍, ō nɔ̄ mbō ke̍ nu̍m bɛ̄ɛ̄le̍ŋ. Nu̍m pīlɛ̍ kpe̍ nɔ̍ ni̍ mā sɔ̍la̍ bɛ̄ɛ̄le̍ le̍ŋ, fo̍ndōle̍, o̍ chi̍e̍ēŋndo̍ chōo̍ kpo̍u̍ wānā o̍ wānā cho̍ mbō nɔ̄ kɔ̄l kālo̍o̍ māā nūm te̍, wānāā kɔ̄l kālu̍a̍a̍ bɛ̍ndūa̍a̍ cho̍ o̍ lɛ̄ŋnde̍ ni᷄ŋ nda̍ tɛ̄ɛ̄ŋ ni̍, māsāa̍ ndāā bɛ̍ndūa̍a̍ tɛ̄ɛ̄ŋ ni̍, wānā ko̍ŋ ō cho̍ le̍.

⁸Wāŋnda̍ ha̍ā kpo̍u̍, ā nɔ̍ kɔ̍l kālu̍ o̍ kɔ̄l kālu̍ le̍, dīɔ̄mnda̍ nda̍ chō ni̍. Nyɛ̄m wāŋnda̍ sōōlūū māā mɛ̄lɛ̄ka̍a̍ ndā ma̍ tīīnda᷄ŋ mu̍ŋ le̍ nda̍ kɔ̄l kālo̍o̍ kīo̍o̍ wo̍ŋ, yɛ̄ɛ̄ nyɛ̍m mu᷅ŋ ŋ̄ kē yɛ̍ nda̍? Ŋ̄ ke᷅ nda̍ nyɛ̄ o̍ nyɛ̄ le̍.

⁹Ka̍ni̍ŋ hu̍mbūŋ nda̍ chāŋ o̍ lɛ̄ŋndē Sīpe᷅ŋnde̍ŋ ni᷄ŋ ndo̍ŋ, a̍ ka̍ni̍i̍ si̍a̍ŋāŋ nda̍ fūlā o̍ lɛ̄ŋndē Yu̍fa̍a̍sīle̍ŋ ni᷄ŋ ndo̍ŋ, mu̍ŋ nda̍ hūŋ wa̍nāā ndāa̍ cha̍ā nyɛ᷅ a̍ lābā wa̍ kīo̍o̍ ni̍ mā chōo̍ nda̍ nyɔ̄ɔ̍ŋ le̍ mu̍ŋ sōōlūūwo̍ māā mɛ̄lɛ̄ka̍a̍ ndā. Tē ā chīi̍ nyɔ̄ɔ̍ŋ mu᷅ŋ chɔ̄ūwɔ̄ɔ̍ a̍ lābā pɛ̍ kpo̍u̍ ā bɛ̄ɛ̄ndi̍a̍a̍ dōmāla̍ ba̍ā kālālā bɛ̄ndūla̍ŋ ā wōu̍ mu̍ŋ.[3] Nyɛ̄m nda̍ pi̍la̍ tōōsīāā mu̍ŋ ndo̍ŋ mu̍ŋ nda̍ sōōlūū ni̍ māā mɛ̄lɛ̄ka̍a̍ ndā.

¹⁰Kɛ̍ nūm nūm Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ cho̍ kpe̍e̍kpe̍i̍yo̍ ŋ̄ chō ni̍. Mɛ̄lɛ̄ka̍ cho̍ yōōmū, ndu̍yɛ̍ mbo̍ wā māsāa̍ le̍ fɛ̍ɛ̍ŋ a̍ fɛ̍ɛ̍ŋ ndo̍ ŋ̄ chō ni̍. Tē ā dɔ̄ɔ̍ŋ tu̍mbe̍ pɛ̍, chi̍e̍ēŋndo̍ kpo̍u̍ nyīīyāa̍ o̍ nyi̍i̍yā ni̍. Tē a̍ tu̍u̍lū kɔ̄l pɛ̍, lɛ̄ŋnde̍ kpo̍u̍ ī nɔ̍lā mī ī si᷄m te̍.”

¹¹Mɛ̄lɛ̄ka̍, ma̍ dīmūl la̍ māā ya̍ I̍ di̍mu̍l wa̍nāa̍ so̍o̍lūū nyɛ᷅m chēle̍ŋndo̍ŋ nda̍ āā, “Nyɛ̄m nya̍ chō mu᷅ŋ sōōlūūwo̍ māā mɛ̄lɛ̄ka̍a̍ nyā wo̍ŋ, ō cho̍ mu̍ŋ te̍ cho̍ Mɛ̄lɛ̄ka̍ kpe̍e̍kpe̍i̍yo̍ o̍ to̍o̍si̍a̍a̍ chi̍e̍ēŋndo̍ ho̍ō a̍ chi̍e̍ēŋndo̍ chōo̍ cho̍o̍ wo̍ le̍. Le̍ he̍ī, nyɛ̄m mu᷅ŋ kpo̍u̍ ŋ̄ chō hūnɔ̄ɔ̄ wā ŋ̄ tɛ̄ɛ̄mbāā. Mu̍ŋ kpo̍u̍ ŋ̄ chō hūnɔ̄ɔ̄ lō.”

¹²Mɛ̄lɛ̄ka̍ Ya̍a̍wɛ̄ɛ̄, ndu̍ to̍o̍si̍a̍a̍ chi̍e̍ēŋndo̍ ho̍ō kpo̍u̍ a̍ kpāāya̍ ndɔ̄ bɛ̍ndo̍o̍ ni̍. Chi̍e̍ēŋndo̍ ho̍ō kpo̍u̍ ndu̍ dɔ̍ū ndu̍ nāa̍ pi᷅lɛ̍ ni̍, mbo̍ bɛ̄ɛ̄ndīāā ndu̍ a̍ kɔ̄l kālu̍ ndɔ̄ɔ̍. Ndu̍ pɛ̍ŋgɛ̍la̍ ha̍la̍a̍ ho̍ō chōo̍ cho̍o̍ o̍ tāāsi̍ ndɔ̄ bɛ̍ndōo̍ ni᷄ŋ ni̍.

¹³Ndu̍ su̍a̍ā o̍ mɛ̄ŋma̍ cho̍ o̍ ha̍la̍a̍ ni᷄ŋ cho̍o̍ cho̍o̍ wa̍ŋ lo̍ ni̍, mī mā wa̍ bɔ̄ɔ̄lūū bɛ̄ndōo̍. Mbo̍ tōsa̍ mī mɛ̄ŋnda̍ŋ mā chɛ᷄ŋ o̍ chi̍e̍ēŋndo̍ chōo̍ mī mā chūūŋgi̍āŋ o̍ ha̍la̍a̍ ni᷄ŋ cho̍o̍ cho̍o̍ mī mā sīmnu᷄ŋ pi̍ɔ̍ɔ̄. Mbō yɔ᷄ŋ pīɔ̍ɔ̍ kōŋ o̍ chi̍e̍ēŋndo̍ chōo̍, lātūlu̍ a̍ nyɛ̄ ŋūāla̍lɛ̍ī ŋūāla̍lɛ̍īyo̍. Mbō tōsa̍ mī hūēīye̍ chɛ᷄ŋ nāa̍ i̍ cho̍ īkɛ̄sīāā wa̍ mī ī hīŋ a̍ kpāāyā bɛ̍ndōo̍.

¹⁴Tē wānā yi̍ya̍ŋ wa᷅na̍ Mɛ̄lɛ̄ka̍ chō wo̍ pɛ̍, na̍a̍ ŋ̄wāŋndā chīe̍e̍, chūānɔ᷄ŋndo̍ na̍a̍ ŋ̄ chūānūŋ ni̍ māā dīɔ̄mnda̍ na̍a̍ ŋ̄ chō ni̍, māā ŋ̄ cho̍ wa̍nāā kɔ̄l kālu̍ kpo̍so̍ŋ a̍ mɛ̄ɛ̍ na̍a̍ ŋ̄ yīya̍ŋ yɛ̍ le̍. Le̍ he̍ī, wānā o̍ wāna̍ to̍o̍sīāā nyɛ᷅m chēle̍ŋndo̍ŋ mā sōōlūū mu̍ŋ māā mɛ̄lɛ̄ka̍a̍ nda̍, wānāā kāŋ si̍ɔ̍mbu̍la̍ŋ lā chō nda̍ bīyɔ̄ɔ̄, fo̍ndōle̍ mɛ̄lɛ̄ka̍a̍ ndāā ka̍ŋ ki̍nɛ̍i̍ mɛ̄lɛ̄ka̍ā lāchōōwāa̍ nda̍ chō ni̍, ā cho̍ mɛ̍lɛ̄ka̍ā yōōmāā le̍.

¹⁵Nyɛ̄m fo̍ndō fu̍u̍ wāŋndā chīe̍e̍ya̍ ā tōōsīāā a̍ bālā ndāla̍ŋ ndo̍ŋ ŋ̍ cho̍ ni̍, nyɛ᷄m cho̍ le̍ wāŋndā chīe̍e̍ya̍ hūīyo̍ wo̍ŋ. Ndu̍yɛ̍ nyɛ̄m mu᷅ŋ kpe̍nde̍ tē te̍le̍ŋ Mɛ̄lɛ̄ka̍ ō tɛ̄ɛ̄mbūū ni̍ŋ mu̍ŋ ndo̍ ō fūūlu̍u̍ pɛ̍, ŋ̄ chō hūnɔ̄ɔ̄ wā ŋ̄ tɛ̄ɛ̄mbāā kpo̍u̍.

¹⁶Kɛ̍ Mɛ̄lɛ̄ka̍ yu̍ŋgu̍ Che̍kɔ̍pū wo̍ ndu̍ ndu̍ cho̍ māā nyɔ̄ɔ̍ŋ mu᷅ŋ te̍. Ndu̍ to̍o̍si̍a̍a̍ nyɛ̄ o̍ nyɛ̄ fe̍e̍ ni̍. Ndu̍yɛ̍ mbo̍ lō o̍ ko̍ŋ mbo̍ hɛ̄lī wāŋnda̍ I̍sɔ̄lūɛ̄ī mbo̍ sīīŋgūū nda̍ māā wānāā ndɔ̄. Mɛ̄lɛ̄ka̍ kōŋ, dīōlā ndɔ̄la̍ŋ la̍ cho̍ ni̍ āā, Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍a̍ nɔ̍ kpāāyāa̍ kpo̍u̍ wo̍.

¹⁷Wāŋnda̍ Chūlu̍sɛ̄lɛ̄m, lā dōvi̍ pɔ̍ɔ̍ wōlɔ̄ɔ̄lā nyāla̍ŋ mī lā bɛ̄ɛ̄ndi̍a̍ŋ le̍ kɔ̄lā nda̍ chō hūnɔ̄ɔ̄ a̍ nya̍ la̍ŋ. Ya̍a̍mɔ̍ɔ̍wa̍ ā hīŋ ni᷅ŋ ma̍ dūāū nya̍ o̍ pi̍ŋndo̍ ni᷄ŋ kpo̍kɔ̍su̍.

¹⁸Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Te̍le̍ŋndo̍ fūūlu̍u̍, te̍le̍ŋ ya̍ I̍ hi᷅ŋ wānāā nīa̍a̍ sōlī o̍ lɛ̄ŋnde̍ŋ nde᷅ŋ ni᷄ŋ, mī vi̍o̍ū nda̍ pɔ̍ o̍ lɛ̄ŋndē chēle̍ŋ ni᷄ŋ ndo̍. I̍ hi᷅ŋ nda̍ nyɛ̄ pālāā bɛ̄ndōo̍ tūsī chōo̍. Ā hīŋ sīnā māā I̍ dɔ̍u̍nu᷄ŋ tu̍mbe̍ a̍ nda̍ o̍ ka̍lā ka̍lā.”

¹⁹Dɛ̍nɛ̍ pa̍lāā bɛ̄ndōo̍ ō kōma̍l na̍a̍ wāŋnda̍ Chūlu̍sɛ̄lɛ̄m fɔ̍. Kpūndɛ̍ bɛ̄ndu̍ ko̍ma̍l na̍a̍ wo̍ ō chō māchūāā mɛ̄ɛ̍ pāū ko̍lo̍ŋ bɛ̍ndo̍o̍ ō wā nu̍a̍ā wāŋndo̍, ō si̍ŋgū kpo̍so̍ŋ te̍ yɛ̍. Kɛ̍ ndu̍yɛ̍ ŋ̄ nɔ̍ mɛ̍ɛ̍ o̍ mɛ̄ɛ̍ yɔ̍ŋāā le̍, mɛ̄ɛ̍ mī ŋ̄ bi̍u̍nu̍ŋ nyɛ᷅ pālāa̍ ho̍ō.

²⁰Tɛ̄ndɛ̍i̍la̍ nāāla̍ lɔ̍lāā la̍ŋ lā chūū ni᷅ŋ tɛ̄ɛ̄mbūū. Yūēī na̍a̍ ŋ̍ ki̍ndū le̍ tɛ̍ndɛ̄i̍la̍ nāāla̍ tōndɔ̄ɔ̍ ve̍ kpo̍u̍ ā chīi̍ ndi̍ kīlī kīlī. Chūāā nāa̍ kpo̍u̍ ā bīu̍ nda̍ ma̍ kūānu᷄ŋ a̍ nda̍. Wānā o̍ wānā cho̍ lɛ̍ na̍a̍ īkɛ̄i̍ mbō māla̍ na̍a̍ tɛ̍ndɛ̄i̍la̍ nāāla̍ŋ mīŋgī tāŋgūl te̍. Ŋ̄ nɔ̍ lɛ̍ wānā o̍ wānā i̍kɛ̍i̍ na̍nu᷄ŋ o̍ ma̍lā na̍a̍ bɛ̍ɛ̍ ko̍lāla̍ tɛ̍ndɛ̄i̍la̍ nāā la̍ŋ tōndɔ̄ɔ̄ le̍.

²¹Wānāā nāā ba̍nāa̍ cho̍ na̍a̍ chīla̍ŋ nda̍ ā cho̍ wa̍nāā kɔ̄l kālu̍ le̍. Ā chɛ᷄l mā nyūna̍ Mɛ̍lɛ̄ka̍ Ya̍a̍wɛ̄ɛ̍ dīōm mbō chɔ᷄m nda̍ nyɛ̄ nda̍ nɔ̄ le̍ tōsāa̍ wo̍ le̍. Nyɛ̄ ko̍ŋ to̍sa̍ ni̍ ma̍ būmbā le̍ nyɛ̄ nda̍ nɔ̄ le̍ tōsāa̍ wo̍ tōsāa̍, ma̍ tōsā mi̍ wānāā nda̍ chō chīla̍ŋ nda̍ ā sāŋnu᷄ŋ.

²²Lā ya̍ŋ ndɔ̍ ni᷅la̍ŋ mī lā tūēī. Yōōŋgūla̍ŋ lā chō ni᷅ŋ hūnɔ̄ɔ̍ kpe̍e̍kpe̍i̍ a̍ ya̍a̍mɔ̍ɔ̍wa̍a̍ cho̍ hūnɔ̄ɔ̍ wa̍ o̍kɔ̄ɔ̄. Ya̍a̍mɔ̍ɔ̍wa̍ chō hūnɔ̄ɔ̍ a̍ bɔ̄ɔ̄lūūwo̍ īwɔ̄kɔ̄ wɔ̄kūɛ̍i̍ kpe̍e̍kpe̍i̍ fūlāa̍ o̍ lɛ̄ŋnde̍ cho̍ bā lūāŋndo̍ le̍ŋ ni᷄ŋ. Chi̍o̍o̍ŋ Chu̍dā kpo̍u̍ ā cho̍ mu̍ŋ hūnɔ̄ɔ̄ mīŋgī pɔ̄mnda̍ŋ, mī ŋ̄ sīmnu᷄ŋ nāa̍ vīsīāā yōndūa̍a̍ ā chāl la̍.

²³Mɛ̄lɛ̄ka̍ Ya̍a̍wɛ̄ɛ̄, ya̍ Chɛ̄lūīma̍yā I̍ si̍nā māā yōōmū ŋ̄ ke̍ wāna̍ chi̍o̍o̍ wo̍ ō cho̍ wa᷅na̍ chi̍o̍o̍ le̍ nɔ̍ ndu̍ le̍. Wāna̍ chi̍o̍o̍ nɔ̍ kpa̍a̍yā o̍ kpāāyā yōōmū ndɔ̄ɔ̍ chōo̍ le̍.

²⁴Mɛ̄lɛ̄ka̍ Ya̍a̍wɛ̄ɛ̄, mɛ̄ɛ̍ ŋ̄ chō na̍a̍ sīlāa̍ yɛ̍, si̍la̍ na̍a̍, kɛ̍ yāndi̍i̍ si̍la̍ na̍a̍ o̍ nɛ̄ī bɛ̍ɛ̍ŋ bɛ̍ɛ̍ŋ ni̍ŋ. Si̍lā na̍a̍ a̍ kɔ̄l tūū le̍ Mɛ̄lɛ̄ka̍, yɔ̄ŋi̍ na̍a̍ ŋ̄ chūu̍ kpo̍u̍.

²⁵Lɛ̄ŋīi̍ kɛ̍ɛ̍ le̍ nu̍m tōlɔ̄ɔ̍ kɔ̄ɔ̄lī ve̍ a̍ ndi̍ ŋ̄ dɔ̄ɔ̄nu̍ŋ tu̍mbe̍ o̍ ka̍lā ka̍lā ni̍ mā tu̍si̍ nda̍ nyɛ̄ pālāa̍ chōo̍. Wānāa̍ kɛ̍ɛ̍ le̍ nu̍m sōōlūūwo̍ wa̍ nda̍ ŋ tūsi̍ nyɛ᷅ pālāa̍ chōo̍ ni̍, fo̍ndōle̍, wāŋnda̍ ha̍ā, nda̍ di̍u̍ wānāā nūmnda̍ ni̍. Nda̍ di̍u̍ wānāā nūmnda̍ kpo̍u̍ ni̍, ndu̍yɛ̍ ma̍ tōsā mi̍ lɛ̄ŋndē nāāle̍ŋ lē lō pɔ̄m.