Read Southern Kisi Chɛ̄lūīma̍yā 11 Bible Online

Chɛ̄lūīma̍yā 11 - Southern Kisi bible

Chɛ̄lūīma̍yā 11

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ ke᷅ vɛ̄lɛ̄ ya̍ Chɛ̄lūīma̍yā yōōŋgū chēle̍ŋ. Mbo̍ dīmī āā,

²“Chɛ̄lūīma̍yā, kpe̍ma̍ ya̍ I̍ yi̍i̍ a̍ wāŋnda̍ I̍sɔ̄lūɛ̄ī wo̍, ya̍ŋ ni᷅la̍ŋ mā tūēī dīōmndā kpe̍ma̍ ko̍ŋ ō yīīnu̍ŋ cho̍o̍ la̍ŋ, ndu̍yɛ̍ mā yi̍ya̍la̍ŋ wāŋnda̍ Chu̍dā a̍ wānāa̍ cho̍ Chūlu̍sɛ̄lɛ̄m chi̍e̍e̍ wa̍, a̍ la̍ŋ o̍kɔ̄ɔ̄.

³Di̍mu̍l nda̍ māā Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍ ō dīmi̍ māā, wāŋnda̍ I̍sɔ̄lūɛ̄ī, kpe̍ma̍ ya̍ Mɛ̍lɛ̄ka̍ yīi̍ a̍ nya̍ wo̍, chɛ̄la᷅ŋ yɔ̍nu̍ŋ o̍ kpe̍ma̍ ko̍ŋ ni᷄ŋ ku̍mbū nyāa̍ wo̍, wānā o̍ wāna̍ kɛ̍ɛ̍ le̍ nyɛ̄ chɛ̄la᷅ŋ kōŋ ō dīmi̍ wo̍ tōsāa̍ pɛ̍, dɛ̍nɛ̍ pa̍lāa̍ ya̍ Mɛ̍lɛ̄ka̍ hāndū wa̍nā ko̍ŋ chōo̍ ni̍.

⁴Bōōndi̍i̍ ya̍ I̍ so̍li̍ fi̍nyāā nyāā ma̍māa̍ o̍ chɛ̄le̍ŋ ni᷄ŋ I̍chi̍pī, o̍ fo̍ndāŋ dɛ̍nɛ̍ pa̍lāā bɛ̄ndōo̍ ve̍, kpe̍ma̍ ya̍ I̍ yi̍i̍ a̍ nda̍ wo̍, ndu̍ wa̍ ho̍ō ni̍. Mi̍ di̍mūl nda̍ māā, tē ā tūsi̍ŋ o̍ dīōm nūu̍ bɛ̄ŋgu̍ pɛ̍, nyɛ̄ o̍ nyɛ̄ ya̍ I̍ di̍mu̍l nda̍ le̍ tōsāa̍ mā tōsa̍ ndu̍ pɛ̍, māā ā chō wā wānāā nī, ndu̍yɛ̍ mī ya̍ bɛ̍ɛ̍ wa̍ Mɛ̍lɛ̄ka̍ ndā.

⁵Ndu̍yɛ̍, mi̍ di̍mūl nda̍ māā būŋgɛ̄ī ya̍ I̍ chu̍e̍l fi̍nyāā ndāa̍ le̍ nda̍ lɛ̄ŋnde̍ cho̍ lē pīāā a̍ nyɛ̄m kɛ̄ndɔ᷄ŋ, ndu̍yɛ̍ mi̍ lē nɔ̄ fo̍ndāŋndā kɛ̄ndɛ̄lā tɔ̄lɔ̄ɔ̄la̍ŋ lā nāŋ nda̍ŋ nde̍ŋ kīo̍o̍ le̍ŋ, māā I̍ cho̍ būŋgɛ̄ī kēŋ pēēlū. Ndu̍yɛ̍ mi̍ pe̍e̍lū būŋgɛ̄ī kēŋ mi̍ ke̍ nda̍ le̍ŋ mɛ̄ɛ̍ ya̍ I̍ di̍mi̍ yɛ̍, lɛ̄ŋndē lēŋ nya̍ chō le᷅ŋ hāū ni̍ŋ ni̍.” Mɛ̄ɛ̍ Mɛ̄lɛ̄ka̍ dīmi̍ le̍nde̍, mi̍ di̍mūl ndu̍ a̍a̍, “Le̍nde̍ kpe̍e̍kpe̍i̍ i̍ yɔ̍nu̍ŋ ni̍ Mɛ̄lɛ̄ka̍ Ya̍a̍wɛ̄ɛ̄.”

⁶Mi̍ Mɛ̄lɛ̄ka̍ Ya̍a̍wɛ̄ɛ̄ o̍ lo᷅ o̍ ko̍ŋ mbo̍ dīmūl la̍ āā, “Ba̍lu̍ o̍ chi̍e̍e̍ŋ bɛ̍ndo᷄ŋ Chu̍dā kpo̍u̍ o̍ ko̍ŋ kɔ̍ɔ̍lī, mā ba̍lu̍ vɛ̄lɛ̄ o̍ nɛ̄īla̍ bɛ̄ndūla̍ŋ Chūlu̍sɛ̄lɛ̄m chi̍e̍e̍ mā yo̍nda̍ yōōŋgōo̍ ho̍ō. Di̍mu̍l wa᷅ŋnda̍ Chu̍dā kpo̍u̍ a̍ wāŋnda̍ Chūlu̍sɛ̄lɛ̄m māā ya̍ Mɛ̍lɛ̄ka̍ dīmi̍ āā, ‘Wāŋnda̍ I̍sɔ̄lūɛ̄ī, lā lōōnu̍ŋ kpe̍ma̍ ya̍ Mɛ̍lɛ̄ka̍ yīi̍ a̍ fi̍nyāā nyāā ma̍māa̍ wo̍ ndu̍yɛ̍ mī lā tōsa̍ nyɛ̄ o̍ nyɛ̍ di̍mi̍ŋ o̍ kpe̍ma̍ ko̍ŋ ni᷄ŋ.

⁷Bōōndi̍i̍ ya̍ I̍ so̍li̍ fi̍nyāā nyāā ma̍māa̍ o̍ chɛ̄le̍ŋ ni᷄ŋ I̍chi̍pī ve̍, mi̍ si̍lā nda̍ ō kālā ka̍lā le̍ mā tūsi̍ŋ o̍ dīōm nūu̍ bɛ̄ŋgu̍. Ndu̍yɛ̍ chɔ̍ŋ a̍ te̍le̍ŋ fi̍nyāā nyāā ma̍māa̍ mbo̍ bīya᷅ŋ a̍ pāa̍le̍ hāūle̍ŋ nde᷅ŋ, I̍ pɛ̍ŋgi̍ wɔ̍ a̍ nya̍ wāŋnda̍ I̍sɔ̄lūɛ̍i̍ sīlāa̍ le̍ tūsi᷄ŋndo̍ o̍ dīōm nūu̍ bɛ̄ŋgu̍ le̍.

⁸Kɛ̍ fi̍nyāā nyāā ma̍māa̍ ā ye᷄ŋ ya̍ lānī le̍, kɛ̄lɛ̄ŋgāā ni᷅ŋ te̍, mā tūsi̍ŋ o̍ dīōm nūu̍ bɛ̄ŋgu̍. Nda̍ kpo̍u̍, ma̍ hīāū lāchī a̍ bōllē kālāle̍ŋ tōsāa̍, yīya᷄ŋnda̍ dɛ̍nɛ̍ wɔ̍ɔ̍ŋnda̍ wa̍ o̍ kɔ̄ltā ndāla̍ŋ ni᷄ŋ nda̍ŋ, la̍ŋ ko̍ nda̍ hīōū lāchī a̍ tōsāa̍ ni̍. Kpe̍ma̍ ya̍ I̍ yi̍i̍ a̍ nda̍ wo̍ ā chɛ᷄l mā tōsa̍ nyɛ̍ di̍mi̍ŋ o̍ kpe̍ma̍ ko̍ŋ ni᷄ŋ ndo̍ le̍. Le̍ he̍ī, dɛ̍nɛ̍ pa̍lāā o̍ dɛ̍nɛ̍ pa̍lāā ya̍ I̍ di̍mi̍ o̍ kpe̍ma̍ ko̍ŋ ni᷄ŋ māā tē ā kɛ̄ɛ̍ le̍ nyɛ̍ di̍mi̍ŋ o̍ kpe̍ma̍ ko̍ŋ ni᷄ŋ ndo̍ tōsāa̍ pɛ̍ I̍ tu̍si̍ nda̍ ndu̍ chōo̍ wo̍, mi̍ tu̍sī ndu̍ nda̍ chōo̍ kpo̍u̍.’ ”

⁹Mi̍ Mɛ̄lɛ̄ka̍ Ya̍a̍wɛ̄ɛ̄ o̍ lo᷅ o̍ ko̍ŋ mbo̍ dīmūl la̍ āā, “Chɛ̄lūīma̍yā, wāŋnda̍ Chu̍dā, a̍ wānāa̍ cho̍ Chūlu̍sɛ̄lɛ̄m chi̍e̍e̍ wa̍ ā yīi̍ ya̍ de̍fo̍o̍.

¹⁰Fi̍nyāā ndāā ma̍māa̍ kɛ̍ɛ̍ le̍ ya̍ dīōmndo̍ tūēīyɔ̄ɔ̍ wa̍, sɔ̄ɔ̍ŋ wɔ̍ɔ̍ŋ fi̍nyāā ndāā ma̍māā kāŋ ā wa̍ tōsāa̍ wo̍ŋ, mu̍ŋ nda̍ bɛ̍ɛ̍ nda̍ mūli̍ŋ to̍sāa̍ ni̍. Nyɛ̄m chēle̍ŋ ndo̍ŋ, mu̍ŋ nda̍ chō ni᷅ŋ sōōlūūwo̍ māā mɛ̄lɛ̄ka̍a̍ ndā ni̍. Wāŋnda̍ I̍sɔ̄lūɛ̄ī ni̍, wāŋnda̍ Chu̍dā ni̍ ā tɛ̄ɛ̄mbu̍u̍ kpe̍ma̍ ya̍ Mɛ̍lɛ̄ka̍ yīi̍ a̍ fi̍nyāā ndāā ma̍māa̍ wo̍.

¹¹Le̍la̍ŋ nyɛ̄ ya̍ Mɛ̍lɛ̄ka̍ Ya̍a̍wɛ̄ɛ̄ di̍mi̍ wo̍ cho̍ ho̍ō ni̍, I̍ cho̍ wāŋnda̍ ha̍ā dɛ̍nɛ̍ pa̍lāā bɛ̄ndōo̍ tūsī chōo̍ ō nda̍ nɔ̍lā ni̍ŋ mā fūla̍ lēbɛ̄ŋgu̍ le̍ wo̍. Ā chāŋ ni̍ŋ nāa̍ ya̍ Mɛ̍lɛ̄ka̍ chu̍a̍ mā nyūna̍ ya̍ le̍ mālāa̍ kɛ̍ I̍ ye᷅ŋ ni̍ŋ nda̍ lānī le̍.

¹²Wāŋnda̍ Chūlu̍sɛ̄lɛ̄m a̍ wāŋnda̍ Chu̍dā a̍ cha᷅ŋ ni̍ŋ nāa̍ mɛ̄lɛ̄ka̍a̍ ndāa̍ chūā, ndu̍yɛ̍ o̍ ko̍ŋ kɔ̍ɔ̍lī, mā lōm nyɛ̄m chūŋ kɛ̄ndɔ̍ŋ o̍ nda̍ lo̍, le̍ mī mɛ̄lɛ̄ka̍a̍ ndāā ka̍ŋ ā māla̍ nda̍, kɛ̍ mɛ̄lɛ̄ka̍a̍ ndāā ka̍ŋ ā nɔ̍lā ni̍ŋ mā ma̍la̍ nda̍ mā sōli̍ nda̍ o̍ nyɛ̄ pālāā kōŋ ni᷄ŋ te̍.

¹³Mɛ̄ɛ̍ wāŋnda̍ Chu̍dā a̍ nɔ̍ chi̍o̍o̍ŋ fāŋā yɛ̍, le̍nde̍ ko̍ni̍ mɛ̄lɛ̄ka̍a̍ ndāa̍ chō fāŋā ni̍. O̍ ko̍ŋ kɔ̍ɔ̍lī, o̍ bɛ̍ɛ̄la̍ŋ Chūlu̍sɛ̄lɛ̄m chi̍e̍e̍ kpo̍u̍ ma̍āŋnda̍ŋ lā chō lā tīūwāā lo̍ŋ, nāa̍ wāŋnda̍ Chūlu̍sɛ̄lɛ̄m a̍ so̍lī sa̍lāla̍ŋ o̍ mɛ̄lɛ̄ka̍ ndāa̍ Bāāl lo̍ wa̍, mɛ̄lɛ̄ka̍ nda̍ ya̍ Mɛ̍lɛ̄ka̍ tu᷄l yɛ̄le̍ŋ tūl bɛ̄ndōo̍ wo̍.

¹⁴Le̍la̍ŋ mī di̍mu̍l nūm Chɛ̄lūīma̍yā, nyu̍nā lɛ̄ ya̍ dīōm le̍ wāŋnda̍ ha̍ā le̍. Cha᷅ŋ nāa̍ ya̍ chu̍a̍ le̍ wāŋnda̍ ha̍ā, ma̍ ŋɔ̍ɔ̍cha̍ŋ o̍ ya̍ lo̍ le̍ nda̍ le̍. Dɛ̍nɛ̍ pa̍lāa̍ ō kōma̍l bɛ̍ɛ̍ wa᷅ŋnda̍ ha̍ā, mā nyūna̍ ya̍ dīōm le̍ mālāa̍, I̍ ye᷅ŋ nda̍ lānī le̍.”

¹⁵“Wāŋnda̍ ha̍ā, wānāā nīa̍a̍ ya̍ I̍ ka̍a̍la̍ wa̍ nda̍ chō ni̍, kɛ̍ sɔ̄ɔ̍ŋ wɔ̍ɔ̍ŋ nda̍ tōsa̍ wo̍ŋ ŋ̄ chō ŋ̄ bɔ̄ɔ̍. Le̍la̍ŋ I̍ chi̍ sa̍bū o̍ sa̍bū nda̍ hīŋ o̍ chīɛ̄ī nūu̍ le̍ ya̍ sōōlūūwo̍ wo̍ le̍. Ā yi̍ya̍ŋ nu̍a̍ā māā tē ā chūa̍ būŋga᷄ŋ le̍ sɔ̄ɔ̍ŋ kɛ̍ndɔ̍ŋ tōsāa̍ pɛ̍, o̍ ko̍ŋ kɔ̍ɔ̍lī, mā sōli̍ chɔ̄lūa̍a̍ sa̍lālā lūāmāāla̍ŋ o̍ ya̍ lo̍, māā dɛ̍nɛ̍ pa̍lāā ya̍ I̍ kɛ̍ɛ̍si̍a̍a̍ le̍ nda̍ wo̍ ō chō nda̍ bīōndɔ̄ɔ̄ le̍. Ā yi̍ya̍ŋ le̍nde̍ mā wa̍ a̍ kɔ̄l kɛ̄ndɛ̄ kōŋ te̍.

¹⁶Mɛ̄ɛ̍ yɔ̄m ɔ̄li̍fīi̍ wo̍ ō wā nu̍a̍ā, le̍ te̍le̍ŋ o̍ te̍le̍ŋ ō chō le̍nde̍ o̍ pu̍i̍yāā yu̍kɔ̄ŋ mbō kūā ɔ̄li̍fīi̍ma̍ kɛ̄ndɛ̄ kɛ̍ndīa̍ŋ yɛ̍, le̍nde̍ ya̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nɔ̍ kpāāyāa̍ kpo̍u̍ wo̍ ya̍ i̍i̍ chu̍a̍ wāŋnda̍ ha̍ā ni̍. Kɛ̍ I̍ cho̍ tōsā mī ya̍a̍mɔ̍ɔ̍wa̍ hīŋ a̍ bɔ̄ɔ̄lūū bɛ̄ndōo̍ mā hu᷄ŋ de᷅l nda̍ chōo̍. Mɛ̄ɛ̍ yɔ̄mndo̍ ō ŋūā nu̍a̍ā a̍ lɛ̄ūwūŋ ndɔ̍ŋ kpo̍u̍ yɛ̍, le̍nde̍ nda̍ tɛ̄ɛ̄mbūū ni̍ŋ nda̍ ni̍.

¹⁷“Wāŋnda̍ I̍sɔ̄lūɛ̄ī a̍ wāŋnda̍ Chu̍dā a̍ wa̍ māwāā mɛ̄ɛ̍ yɔ̄m ɔ̄li̍fīi̍ wo̍ ō chō nu̍a̍ā yɛ̍. Ya̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nɔ̍ kpāāyāa̍ kpo̍u̍ wo̍, ya̍ ya̍ i̍i̍ tɔ᷅l yɔ̄mndo̍ ho̍ō ni̍, kɛ̍ I̍ chi̍i̍ kɛ̄ɛ̄sīāā le̍ mī tɛ̍ɛ̍mbu̍u̍ ndu̍. Wāŋnda̍ I̍sɔ̄lūɛ̄ī ni̍, wāŋnda̍ Chu̍dā ni̍, ā tōsa̍ mi̍ ya̍ Mɛ̍lɛ̄ka̍ dūāūnu᷄ŋ tu̍mbe̍ a̍ nda̍, fo̍ndōle̍, le̍ yɔ̄ŋ wɔ̄ɔ̍ŋ nda̍ tōsa̍ wo̍, ndu̍ yɔ̍nūŋ māā kɛ̄ɛ̄ nda̍ kɛ̄ɛ̍ ya̍ ma̍ mūli᷄ŋ sa̍lāla̍ŋ sōlīo̍o̍ o̍ Bāāl lo̍ māā mɛ̄lɛ̄ka̍ ndā yɛ̍ wo̍ ni̍.”

¹⁸O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl la̍ a̍ de̍fe̍ ya̍a̍mɔ̍ɔ̍wa̍a̍ nīa̍a̍ ā yīi̍ ya̍ le̍ ya̍ dīyɔ̄ɔ̍ wo̍ o̍kɔ̄ɔ̄.

¹⁹Mɛ̄ɛ̍ nda̍ wā nu̍a̍ā kɔ̄la̍ŋ a̍ sāa̍ le̍ ndu̍ dīyɔ̄ɔ̍ kɛ̍ ō si̍nā le̍ yɛ̍, le̍nde̍ ya̍ I̍ wa̍ ni᷅ŋ ya̍a̍mɔ̍ɔ̍wa̍a̍ nīa̍a̍ tɛ̄ɛ̄ŋ ni̍. Mɛ̄ɛ̄māā ya̍a̍mɔ̍ɔ̍wa̍a̍ nīa̍a̍ nda̍ a̍a̍ chi̍i̍ ni᷅ŋ kɛ̄ɛ̄sīāā le̍ ya̍ dīyɔ̄ɔ̍ I̍ si̍na̍ ndi̍ nu̍a̍ā le̍. Ā wa̍ ni᷅ŋ dīmīo̍o̍ o̍ nyɛ̄ chāā ni᷄ŋ āā, “Yɔ̄m wɔ̄ɔ̍ŋndo̍ tē wānā ye̍e̍ma̍ le̍ ndu̍ fāŋāa̍ pɛ̍ ba̍ū, lā tɛ̄ɛ̄mbu̍u̍ ndu̍ a̍ kōmɔ̄ɔ̄ ndɔ̄ɔ̍ lātūlu̍ kpo̍u̍. Ŋ̄ dīīnu᷅ŋ pōo̍ ho̍ō mī ŋ̄ fāŋa᷅ŋ ndu̍ o̍ chi̍e̍ēŋndo̍ chōo̍, mī ŋ̄ tōsa̍ wānā o̍ wānā yi̍yāŋ ndɛ̍ a̍ ndu̍ o̍kɔ̄ɔ̄ le̍.”

²⁰O̍ ko̍ŋ, mi̍ pi̍ɛ̍ī Mɛ̄lɛ̄ka̍ a̍a̍, “Ōo̍ Mɛ̄lɛ̄ka̍ Ya̍a̍wɛ̄ɛ̄, wāna̍ ki̍a̍lū ya̍mɛ̍i̍ o̍ tōnya̍a̍ chōo̍ wo̍ ŋ̄ chō ni̍. Nu᷄m si̍nā yi̍ya᷄ŋnda̍ wāna̍ chi̍o̍o̍ ni̍, a̍ tūūla̍ cho̍ o̍ kɔ̄l ndɔ̄ɔ̍ ni᷄ŋ nda̍ŋ. I̍ ma̍l nu̍m sūɛ̍i̍ nīi̍ o̍ bā Mɛ̄lɛ̄ka̍. Nūm pi̍la̍ mi̍ŋgu̍l ya̍a̍mɔ̍ɔ̍wa̍a̍ nīa̍a̍ ha̍ā māa̍.”

²¹Wāŋnda̍ A̍na̍tɔ̍tī chi̍e̍e̍ nda̍ a̍a̍ kɛ̍ɛ̍si̍a̍a̍ le̍ ya̍ dīyɔ̄ɔ̍. Ma̍ dīmūl la̍ māā tē ya̍ I̍ hi̍o̍ū lāchī a̍ yōōŋgu̍ Mɛ̄lɛ̄ka̍a̍ dīmīo̍o̍ pɛ̍ māā ā chō ya̍ dīyɔ̄ɔ̄.

²²Kɛ̍ nyɛ̄ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ ō dīmi̍ a̍ nda̍ o̍kɔ̄ɔ̄ wo̍ cho̍ ho̍ō ni̍. Ō dīmi̍ āā, “I̍ cho̍ hūnɔ̄ɔ̄ wāŋnda̍ ha̍ā nyɛ̄ pālāā bɛ̄ndōo̍ tūsī chōo̍. I̍ cho̍ tōsā mī chūāā ndāā pi̍a̍a̍ndūa̍a̍ ā hu᷄ŋ sɔ̍lā pīɔ̍mndo̍ o̍ chɔ̄ūwo̍ ni᷄ŋ, ndu̍yɛ̍ mī to̍sa̍ mī chɛ̄lɛ̄kpi̍a̍a̍ ndāā pi̍a̍a̍ndūa̍a̍ a̍ ā lāāndūa̍a̍ ā chūu̍ a̍ yīa̍a̍ŋ.

²³Tē te̍le̍ŋ ya̍ I̍ tu̍sī ni̍ŋ wa᷅ŋnda̍ A̍na̍tɔ̍tī nyɛ̄ pālāa̍ chōo̍ wo̍ ō fūūlu̍u̍ pɛ̍ mī hu̍ŋ tu̍sī nda̍ nyɛ̄ pālāā kōŋ chōo̍, I̍ cho̍ tōsā wāŋndo̍ ō pīlɛ̍ bɛ̍ɛ̍ ō lo᷅ ni̍ŋ yo̍o̍mū le̍.”