Read Southern Kisi Chɛ̄lūīma̍yā 12 Bible Online

Chɛ̄lūīma̍yā 12 - Southern Kisi bible

Chɛ̄lūīma̍yā 12

¹“Mɛ̄lɛ̄ka̍ Ya̍a̍wɛ̄ɛ̄, I̍ si̍nā māā le̍ te̍le̍ŋ o̍ te̍le̍ŋ tē I̍ ŋɔ̍ɔ̍chi̍a̍ŋ nāa̍ nūm chu̍a̍ pɛ̍ a̍ īsɔ̄ɔ̍ o̍ i̍sɔ̄ɔ̍ o̍kɔ̄ɔ̄, ō nɛ̄ī sa̍kpōo̍ chōo̍ ŋ̄ bīī ndi̍ ni̍. Kɛ̍ ndu̍yɛ̍, I̍ ye̍e̍ma̍ mī nyu̍na̍ nu̍m a̍ mɛ̄ɛ̍ ŋ̄ bīī sɔ̍ɔ̍ŋ ŋ̄ pūm yɛ̍ o̍kɔ̄ɔ̄. Vɛ᷅ mā to̍sa̍ mī wānāā dɛ̍nɛ̍ wɔ̍ɔ̍ŋnda̍ ā dīī dɛ̍nɛ̍? Vɛ᷅ mī wānāā yɔ̄ŋ wɔ̄ɔ̍ŋāā ā bɛ̄ndūa̍a̍ ā wānu̍ŋ, le̍ te̍le̍ŋ o̍ te̍le̍ŋ nyɛ̄ o̍ nyɛ̄ wā ō kɛ̄ndɛ̄ a̍ nda̍?

²Wāŋnda̍ ha̍ā, mɛ̄ɛ̍ wāŋndo̍ ō tūāl nu̍a̍ā yɔ̄mndo̍, mī yɔ̄m kōŋ ō lūɛ̄ī pūūndo̍ŋ lɛ̄ŋ nyɛ̄ kɛ̄ndɛ̄ kɛ̍ndɛ̄, ndu̍yɛ̍ mbō hīndū, mbō kāndu̍ kōmɔ̄ɔ̍ yɛ̍, le̍nde̍ ŋ̄ kɛ̄si̍ nda̍ o̍ fo̍ndāŋndā ndāla̍ŋ ni̍ mā to̍sa̍ mā sīmnu᷄ŋ wa̍nāā kpāāyā. Ndu̍yɛ̍ wāŋnda̍ ha̍ā yɛ̍, a̍ lāsōndō ko̍ni̍ nda̍ sūāā sɔ̍ɔ̍ŋ kɛ̍ndɔ̍ŋ a̍ nūm o̍kɔ̄ɔ̄ ni̍, kɛ̍ ndu̍yɛ̍ kɔ̄ltā ndāla̍ŋ lā chōŋnu᷄ŋ la̍nda̍ŋ a̍ nūm.

³Kɛ̍ ya̍ ya̍, nūm Mɛ̄lɛ̄ka̍ Ya̍a̍wɛ̄ɛ̄, ā sīnā a̍ ya̍ o̍kɔ̄ɔ̄. Ā chō chɔ̄ɔ̍ yīya᷄ŋnda̍ cho̍ o̍ kɔ̄l nūu̍ ni᷄ŋ nda̍ŋ, ndu̍yɛ̍ ma̍ wā ya̍ tōfāa̍ kīo̍o̍ le̍ mā chē mɛ̄ɛ̍ kɔ̄l nūu̍ chō a̍ nūm yɛ̍. Wānāā dɛ̍nɛ̍ wɔ̍ɔ̍ŋnda̍ ha̍ā, to̍sa̍ mā sāsu̍ nda̍ le̍ nda̍ kɔ̄la̍ŋ dīūwo̍ mɛ̄ɛ̍ ndā kūā nu̍a̍ā a̍ sāa̍ o̍ yōōle̍ŋ le̍ ndu̍ kɔ̄la̍ŋ dīyɔ̄ɔ̍ yɛ̍. Hɛ̍li̍ nda̍ pɔ̍ɔ̍ mā wa̍ pɔ̍ɔ̍ ā kɛ̄sīāā le̍ nda̍ hūnɔ̄ɔ̍ dīūwo̍ o̍ pāa̍le̍ le̍ŋ chōo̍.

⁴Mɛ̄lɛ̄ka̍, bāā mɛ̄ɛ̍ nu̍a̍ā ko̍ lɛ̄ŋnde̍ŋ nde᷅ŋ lē chō ni᷅ŋ lō lē tāmbɛ̍i̍ māā lɛ̄ŋndē po̍l ni̍, bīllo̍ kpo̍u̍ o̍ chīɔ̍ɔ̍ŋ ni᷄ŋ mbō chūū vēsa̍? Le̍ yɔ̄ŋ wɔ̄ɔ̍ŋ wānāa̍ cho̍ o̍ lɛ̄ŋnde̍ŋ nde᷅ŋ ni᷄ŋ nda̍, vīsīāā yōndūa̍a̍ a̍ yōūwa̍ kpo̍u̍ ā chūu̍ ni᷅ŋ.” Ndu̍yɛ̍ o̍ ko̍ŋ kɔ̍ɔ̍lī, mi̍ wānāā dɛ̍nɛ̍ wɔ̍ɔ̍ŋnda̍ ha̍ā ā wā dīmīo̍o̍ āā, “Nyɛ̄ o̍ nyɛ̄ na̍a̍ ŋ̄ chō tōsāa̍ Mɛ̄lɛ̄ka̍ cho̍ na̍a̍ chɔ̄ le̍.”

⁵Mi̍ Mɛ̄lɛ̄ka̍ lō o̍ ko̍ŋ mbo̍ dīmūl la̍ āā, “Chɛ̄lūīma̍yā, tē lā wa̍ nyāānɔ᷄ŋ lābɛ̄ɛ̄la̍a̍ nya̍ wāŋndā chīe̍e̍ya̍ pɛ̍ mā sa̍ŋga̍, vɛ̄ɛ̍nɛ̍ ŋ̄ sīmūl lɛ̍ su̍a̍a̍ le̍ nyāānɔ᷄ŋ lābɛ̄ɛ̄la̍a̍ nya̍ nda̍? Tē a̍ bu̍mba̍ kɔ̄la̍ŋ nɔ̄lāa̍ nāa̍ kpe̍nde̍ke̍lla̍ pɛ̍, mā kūā mā bōŋī mā dēl pɛ̍, vɛ̄ɛ̍nɛ̍ ŋ̄ nɔ̄lā yɛ̍ kɔ̄la̍ŋ o̍ yōndō mɔ̄ndɔ̄ mɔ̄ndɔ̄ bɛ̄ndōo̍ ni᷄ŋ, mɛ̄ɛ̍ Chɔ̍ɔ̍dāŋ kɔ̍ŋgɔ̍ o̍ cho̍ nu̍a̍ā yɛ̍?

⁶Chɛ̄lūīma̍yā, wānāya᷅ŋ nūmndo̍ŋ kpe̍e̍kpe̍i̍, a̍ nya̍ fūla̍ o̍ yu̍ŋgu̍ pi̍lɔ̍ɔ̍ chōo̍ nya̍ nda̍ wa̍, nda̍ pi̍si̍ nu̍m ni̍. Nda̍ yi̍i̍ nu̍m de̍fo̍o̍ ni̍ le̍ nu̍m dēlɔ̄ɔ̍ chōo̍. Le̍la̍ŋ mɛ̄ɛ̍ o̍ mɛ̄ɛ̍ nda̍ sōo̍ sɔ̍ɔ̍ŋ kɛ̍ndɔ̍ŋ a̍ nūm o̍kɔ̄ɔ̄, la̍a̍la̍ŋ a̍ nda̍ le̍.”

⁷O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mī āā, “I̍ cho̍ hūnɔ̄ɔ̄ yu̍ŋgu̍ nūu̍ I̍sɔ̄lūɛ̍i̍ kɛ̄ɛ̄. Yu̍ŋgu̍ ya̍ i̍i̍ hɛ̍li̍, mi̍ si̍i̍ŋgūū ndu̍ māā nyɛ̄ nī wo̍ ndu̍ wa̍ ho̍ō ni̍, kɛ̍ I̍ cho̍ ndu̍ hūnɔ̄ɔ̄ mālɔ̄ɔ̄. Wānāā nīa̍a̍ ya̍ i̍i̍ ka̍a̍la̍ wa̍, I̍ cho̍ nda̍ hūnɔ̄ɔ̄ mālɔ̄ɔ̄ ya̍a̍mɔ̍ɔ̍wa̍a̍ ndāa̍ o̍ bā.

⁸Yu̍ŋgu̍ ni̍ ya̍ I̍ hɛ̍li̍ mi̍ si̍i̍ŋgūū ndu̍ māā nyɛ̄ nī wo̍ ō sīmnu᷄ŋ nāa̍ ya̍ chu̍a̍, mɛ̄ɛ̍ kpɔ̍kūŋndo̍ wā nu̍a̍ā o̍ būndɔ̍ɔ̍ ni᷄ŋ yɛ̍. Mɛ̄ɛ̍ kpɔ̍kūŋndo̍ ō pɛ̄ɛ̄līāā nu̍a̍ā nyɔ̄ɔ̍ chōo̍ yɛ̍, le̍nde̍ nda̍ dɔ̄ɔ̄nu᷄ŋ yo̍lɛ̄i̍ a̍ ya̍ ni̍. Le̍ he̍ī, ya̍ Mɛ̍lɛ̄ka̍ I̍ tu̍l nda̍ yɛ̄le̍ŋ.

⁹Yu̍ŋgu̍ ya̍ I̍ si̍i̍ŋgu̍u̍ māā nyɛ̄m ni̍ ŋ̄kɛ᷅, ō sīmnu᷄ŋ nāa̍ ya̍ chu̍a̍ mɛ̄ɛ̍ yōū bīyāa̍ ō chō nu̍a̍ā yɛ̍. Kɛ̍ I̍ cho̍ tōsā mā hu᷄ŋ ba̍lū ndu̍ le̍ ndu̍ chīŋa̍la᷅ŋndo̍ mɛ̄ɛ̍ yōūwāā bīyāa̍ ā bālū nu̍a̍ā nyɔ̄ɔ̍ le̍ ndu̍ dēlɔ̄ɔ̍ chōo̍ yɛ̍. Lā dīmu̍l vīsīa̍a̍ yōndūa̍a̍ kpo̍u̍ mā chūūŋgi̍āŋ na̍a̍ pi᷅lɛ̍ le̍ hūnɔ̄ɔ̍ dīāllūŋ wāŋnda̍ ha̍ā dīo̍o̍ mā pīm.

¹⁰Māsāā bɛ̍ndūa̍a̍ cho̍ o̍ lɛ̄ŋīī chēle̍ŋnde̍ ni᷄ŋ nda̍ ā bɔ̄ɔ̍ bɔ̍ɔ̍ a̍ hūŋ ni̍ŋ mā hu᷄ŋ tɛ̍ɛ̍mbūū kpe̍le̍ ni̍ yɔ̄mīī kūāmāa̍, ndu̍ yɔ̍nūŋ māā wānāā nīa̍a̍ ni̍. Ā chō hūnɔ̄ɔ̄ chīɛ̄ī nīi̍ nīɔ̄ū nīɔ̄ū mā tɛ̄ɛ̄mbu̍u̍ ndi̍ kpo̍u̍. Chīɛ̄ī nīī kɛ̍ndɛ̄ kɛ̍ndɛ̄i̍ he̍ī, ā chō ndi̍ tɛ̄ɛ̄mbūū mī ī sīmnu᷄ŋ mɛ̄ɛ̍ lɛ̄ŋndē po̍lte̍ŋ lē chō nu̍a̍ā yɛ̍.

¹¹Ā chō ndi̍ hūnɔ̄ɔ̄ sīīŋgūū mɛ̄ɛ̍ lɛ̄ŋndē vēsɛ̍i̍le̍ bɛ̍ndūle̍ŋ lē chō nu̍a̍ā yɛ̍, mī ī sīmnu᷄ŋ fo̍ndāŋ tāmbɛ̍i̍ ya̍ Mɛ̍lɛ̄ka̍ o̍ hɔ̄l. Lɛ̄ŋnde̍ŋ nde᷅ŋ kpo̍u̍ lē chō hūnɔ̄ɔ̄ sīmnɔ᷄ŋ po̍llo̍. Ndu̍yɛ̍ wānā o̍ wānā bu̍u̍la̍ŋ bɛ̍ɛ̍ a̍ ndi̍ o̍kɔ̄ɔ̄ le̍.

¹²Pūa̍a̍ chɔ̄ūwāa̍ cho̍ hūnɔ̄ɔ̄ lɛ̄ŋnde̍ŋ nde᷅ŋ tɛ̄ɛ̄mbūū wa̍, ā chō hūnɔ̄ɔ̄ tīū o̍ pēmbūŋ po̍llo̍ŋ chōo̍ kpo̍u̍. Tē te̍le̍ŋ ko̍ŋ ō fūūlu̍u̍ pɛ̍, ya̍a̍mɔ̍ɔ̍wa̍a̍ ya̍ Mɛ̄lɛ̄ka̍ Ya̍a̍wɛ̄ɛ̄ I̍ vi̍ām ni̍ŋ le̍ lɛ̄ŋnde̍ŋ nde᷅ŋ tɛ̄ɛ̄mbūūwo̍ wa̍, ā wā ni̍ŋ fu̍lāa̍ bā o̍ bā fe̍e̍ mā tīu̍ o̍ lɛ̄ŋnde̍ŋ nde᷅ŋ ni᷄ŋ. Wānā o̍ wānā ve᷅m ni̍ŋ a̍ kɔ̄l nyūlū o̍ lɛ̄ŋnde̍ŋ nde᷅ŋ ni᷄ŋ te̍.

¹³Wānāā nīa̍a̍ ā sāŋ ni̍ŋ wi̍tīi̍yo̍ŋ o̍ chīɔ̄ɔ̄ŋ nda᷄ŋ ni᷄ŋ, kɛ̍ bīllo̍ kpo̍sōŋ ko̍ nda̍ kūāū ni̍ŋ ni̍. Ā tōsā ni̍ŋ wa̍lta̍ŋ mā yɔ̄ɔ̄kpi̍a̍a̍ nda̍ pi̍la̍ yɔ̄ɔ̄kpīa̍a̍ pīla̍, kɛ̍ ā sɔ̍lā ni̍ŋ tɔ̍nɔ̄ o̍ tɔ̄nɔ̍ le̍. Tɔ̄lɔ̄ɔ̄la̍ŋ o̍ chīɔ̄ɔ̄ŋ nda᷄ŋ ni᷄ŋ kpo̍u̍ lā chō hūnɔ̄ɔ̄ tāmbu̍ mī kɔ̄lta̍ŋ lā tāmbu̍ nda̍, fo̍ndōle̍, tu̍mbe̍ ya̍ Mɛ̍lɛ̄ka̍ Ya̍a̍wɛ̄ɛ̄ du̍a̍u̍nūŋ ni̍ŋ a̍ nda̍ wo̍ ō wā ni̍ŋ o̍ bɔ̍ɔ̍.”

¹⁴O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mī āā, “Lɛ̄ŋīi̍ dɛ̍nɛ̍ wɔ̍ɔ̍ŋīī chi̍ɛ̍ɛ̍li̍āŋ a̍ I̍sɔ̄lūɛ̄ī, mi̍ ī tɛ̄ɛ̄mbūū lɛ̄ŋndē I̍sɔ̄lūɛ̍i̍le̍ŋ, lɛ̄ŋndē ya̍ I̍ ke̍ wānāā nīa̍a̍ māā lɛ̄ŋndē ndā le̍ŋ nde̍, nyɛ̄ ya̍ I̍ to̍sa̍ a̍ wāŋnda̍ Chu̍dā wo̍ mɛ̄ɛ̍ mī to̍sa̍ ndu̍ a̍ wāŋnda̍ o̍ lɛ̄ŋnde̍ he̍ī ni᷄ŋ. I̍ cho̍ wāŋnda̍ ha̍ā sōlī o̍ lɛ̄ŋīī ndɛ̄i̍ ke̍ŋ ni̍ŋ mī fa̍ŋa̍ nda̍ lo̍ŋ ba̍ū.

¹⁵Kɛ̍ ndu̍yɛ̍ tē te̍le̍ŋ ti̍ŋ hīōū pɛ̍, I̍ cho̍ wāŋnda̍ o̍ lɛ̄ŋnde̍ he̍ī ni᷄ŋ i̍nyīɛ̍i̍ tūīīnɔ᷄ŋ mī so̍li̍ nda̍ nāa̍ nda̍ chō wā wa̍, mī to̍sa̍ mī wānā o̍ wānā mi̍i̍ŋgu̍ o̍ nyɛ̄m ndɔ̄ɔ̍ŋ chōo̍, o̍ lɛ̄ŋndē ndɔ̄le̍ŋ ni᷄ŋ.

¹⁶Ndu̍yɛ̍ tē wāŋnda̍ ha̍ā ā chɛ᷄l pɛ̍ mā chu̍a̍ pɛ̄ɛ̄kūlā wānāā nīa̍a̍ a̍ kɔ̄ltā ndāla̍ŋ kpo̍u̍, ndu̍yɛ̍ mā sōōlu̍u̍ ya̍ Mɛ̍lɛ̄ka̍ Ya̍a̍wɛ̄ɛ̄ mɛ̄ɛ̍ nda̍ pɛ̄ɛ̄ku̍ wānāā nīa̍a̍ le̍ mɛ̄lɛ̄ka̍ ndāa̍ Bāāl sōōlūūwo̍ yɛ̍ pɛ̍, I̍ cho̍ tōsā mā sīmnu᷄ŋ wa̍nāā pīlɛ̍ nda̍ wānāā nīa̍a̍ ndu̍yɛ̍ mī to̍sa̍ mī nyɛ̄ o̍ nyɛ̄ ō wa̍ ō kɛ̄ndɛ̄ a̍ nda̍.

¹⁷Kɛ̍ lēlɛ̄ŋ o̍ lēlɛ̄ŋ le̍ kɛ̍ɛ̍ le̍ nīla̍ŋ yāŋɔ̄ɔ̍ o̍ nyɛ̄ ya̍ I̍ di̍mūl nda̍ wo̍ pɛ̍, wāŋnda̍ o̍ lɛ̄ŋndē lēŋ ni᷄ŋ, sōlīo̍o̍ ya̍ I̍ so̍lī nda̍ lo̍ŋ ni̍ po̍, ndu̍yɛ̍ mī tɛ̍ɛ̍mbu̍u̍ nda̍ kpo̍u̍. Ya̍ Mɛ̍lɛ̄ka̍ Ya̍a̍wɛ̄ɛ̄ ya̍ so̍ō ni̍.”