Read Southern Kisi Chɛ̄lūīma̍yā 13 Bible Online

Chɛ̄lūīma̍yā 13 - Southern Kisi bible

Chɛ̄lūīma̍yā 13

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl la̍ āā, “Kɔ̍ mā kɔ̍ pi̍o̍ndū pɛ̄ŋgɛ̍i̍ kōlā kɛ̍ndɛ̄ kɛ̍ndɔ̄ɔ̍ mā yi̍i̍nu̍ŋ ndu̍ māā yāmbā. Kɛ̍ kōlā i̍pɛ̍ŋgɔ̍ɔ̍ ho̍ō a̍ nɔ̍ mā ma̍l ndu̍ o̍ māmɛ̄ŋ ni᷄ŋ te̍.”

²O̍ ko̍ŋ, mi̍ kɔ̍ pi̍o̍ndū kōlā i̍pɛ̍ŋgɛ̍ kɛ̍ndɛ̄ kɛ̍ndɔ̄ɔ̍ mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l la̍ yɛ̍, mi̍ yi̍i̍nu᷄ŋ ndu̍ māā yāmbā.

³Mɛ̄ɛ̍ te̍le̍ŋ ti̍ŋ ō hīo̍u̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā nāa̍ ya̍ chu̍a̍ o̍ dīi̍ŋ ndɔ̄ɔ̍. Mbo̍ dīmūl la̍ āā,

⁴“So̍li̍ kōlā i̍pɛ̍ŋgɛ̍ ŋ̄ pēndū ma̍ yīīnu̍ŋ ndu̍ māā yāmbā wo̍, mā kūɛ̄ a̍ ndu̍ o̍ Pēē Bɛ̍ndōo̍ Yūfi̍lu̍a̍tīī mā kɔ̍ sɔ̍ɔ̍ŋā ndu̍ o̍ pōūta̍ŋ tɛ̄ɛ̄ŋ.”

⁵O̍ ko̍ŋ, mi̍ kɔ̍ sɔ̍ɔ̍ŋā kōlā i̍pɛ̍ŋgɔ̍ɔ̍ ho̍ō o̍ pōūta̍ŋ tɛ̄ɛ̄ŋ, o̍ Pīo̍o̍ Yūfi̍lu̍a̍tīī, mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l la̍ yɛ̍.

⁶Mɛ̄ɛ̍ pālɛ̍i̍ fa̍ŋgā ī hīo̍u̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl la̍ āā, “Kɔ̍ Yūfi̍lu̍a̍tīī mā kɔ̍ so̍lī kōlā i̍pɛ̍ŋgɛ̍ ya̍ I̍ di̍mu̍l nu̍m ma̍ kɔ̍ vi̍ōŋ lo̍ŋ ndo̍.”

⁷O̍ ko̍ŋ kɔ̍ɔ̍lī, mi̍ ku̍ā Yūfi̍lu̍a̍tīī, mi̍ kɔ̍ so̍lī kōlā i̍pɛ̍ŋgɔ̍ɔ̍ ho̍ō nāa̍ ya̍ I̍ sɔ̍ɔ̍ŋa̍ ndu̍ wa̍. Kɛ̍ kōlā i̍pɛ̍ŋgɔ̍ɔ̍ ho̍ō ō wa̍ ni᷅ŋ ō lūɛ̄īyāā mu̍lɛ̄, ndu̍ o̍o̍ bɛ̍nda̍ lɛ̍ le̍ nyɛ̄ o̍ nyɛ̄ tōsā a̍ ndu̍ le̍.

⁸O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l la̍ āā,

⁹“Nyɛ̄ ya̍ Mɛ̍lɛ̄ka̍ Ya̍a̍wɛ̄ɛ̄ di̍mi̍ wo̍ cho̍ ho̍ō ni̍, mɛ̄ɛ̍ i̍ yɔ̍nu̍ŋ nu̍a̍ā a̍ kōlā i̍pɛ̍ŋgɔ̍ɔ̍ ho̍ō yɛ̍, le̍nde̍ ko̍ ya̍ I̍ tɛ̍ɛ̍mbūū ni̍ŋ nyɛ᷅ wāŋnda̍ Chu̍dā, a̍ wāŋnda̍ Chūlu̍sɛ̄lɛ̄m chi̍e̍e̍ a̍ ke̍lū yōŋgāa̍ a̍ ndu̍ o̍kɔ̄ɔ̄ wo̍ ni̍.

¹⁰Wāŋnda̍ ha̍ā wānāā dɛ̍nɛ̍ wɔ̍ɔ̍ŋnda̍ nda̍ chō ni̍. Ā kɛ̄ɛ̍ le̍ ya̍ dīōmndo̍ tūēīyɔ̄ɔ̍ ma̍ lō o̍ ko̍ŋ ma̍ tōsā bōllē kālāle̍ŋ a̍ ya̍ ma̍ mūli᷄ŋ nyɛ᷅m chēle̍ŋndo̍ŋ sāāŋ̄gīāllo̍, ndu̍yɛ̍ mā sōōlūū mu̍ŋ māā mɛ̄lɛ̄ka̍a̍ ndā. Le̍ he̍ī, mɛ̄ɛ̍ kōlā i̍pɛ̍ŋgɔ̍ɔ̍ ho̍ō ō tāmbu̍ nu̍a̍ā mbo̍ sīmnu᷄ŋ yu̍u̍lu̍ fo̍ndō fu̍u̍ yɛ̍, le̍nde̍ i̍ yɔ̍nūŋ ni̍ŋ a̍ nda̍ ni̍.

¹¹Mɛ̄ɛ̍ wāŋndo̍ ō yīīnūŋ nu̍a̍ā kōlā i̍pɛ̍ŋgɔ̍ɔ̍ māā yāmbā, mbō sāa̍ ndu̍ chāŋnda̍ nyɛ̄ kɛ̄ndɛ̄ kpi̍ŋ yɛ̍, le̍nde̍ ya̍ i̍i̍ ye̍e̍ma̍ ni̍ mī wāŋnda̍ Chu̍dā a̍ wāŋnda̍ Chūlu̍sɛ̄lɛ̄m nda̍ a̍a̍ na̍nu᷄ŋ ya̍ o̍ ībūŋ mī nda̍ a̍a̍ ho̍lnu̍ŋ ya̍ nyɛ̄ kɛ̄ndɛ̄ kɛ̍ndɛ̄. Ya̍ i̍i̍ ye̍e̍ma̍ mī nda̍ a̍a̍ wa̍ māā wānāā nī le̍ mī dīōlā nīla̍ŋ la̍ a̍a̍ sɔ̍la̍ sāŋgālāa̍ a̍ bɛ̄ɛ̄le̍ŋ. Kɛ̍ wāŋnda̍ ha̍ā ā ye᷄ŋ ya̍ lānī le̍.”

¹²O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ dīmūl la̍ āā, “Chɛ̄lūīma̍yā, di̍mu̍l wa᷅ŋnda̍ I̍sɔ̄lūɛ̄ī māā ya̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍ dīmi̍ māā, kpɛ̍ɛ̍nɛ̍i̍ māmūɛ̄īye̍, mūɛ̄īya̍ŋ nda̍ dūāū le̍ni̍ŋ ni̍. Tē a̍ di̍mu̍l nda̍ le̍nde̍ pɛ̍ mā dīmu̍l nu̍m māā, na̍a̍ bɛ̍ɛ̍ ŋ̄ sīnā māā kpɛ̍ɛ̍nɛ̍i̍ māmūɛ̄īye̍ ndi̍, mūɛ̄īya̍ŋ wānā du̍a̍ū le̍ni̍ŋ ni̍ pɛ̍,

¹³a̍ lo̍ ko̍ŋ a̍ di̍mu̍l nda̍ māā, nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ cho̍ ho̍ō ni̍. Ō dīmi̍ māā, wānā o̍ wāna̍ cho̍ lɛ̄ŋnde̍ŋ nde᷅ŋ, I̍ cho̍ tōsā mā hu᷄ŋ yɔ̍nu̍ŋ mɛ̄ɛ̍ mūɛ̄īya̍ŋ mā bīī nu̍a̍ā wāŋndo̍ yɛ̍. Māsāā bɛ̍ndūa̍a̍ I̍sɔ̄lūɛ̄ī, a̍ fu̍la̍ o̍ pūlāle̍ Māsāa̍ Dēēve̍le̍ŋ chōo̍ wa̍ ni̍, wānāā sōlīāā lāsa̍lāa̍ ni̍, wānāa̍ su̍a̍ā le̍ Mɛ̄lɛ̄ka̍ wa̍ ni̍, ndu̍yɛ̍ a̍ wānā o̍ wāna̍ cho̍ Chūlu̍sɛ̄lɛ̄m chi̍e̍e̍, nda̍ kpo̍u̍ le̍nde̍ nda̍ yɔ̄nūŋ ni̍ŋ ni̍.

¹⁴Ndu̍yɛ̍ nda̍ kpo̍u̍ I̍ cho̍ nda̍ hūnɔ̄ɔ̄ dīū ā pīlɛ̍ŋ pi̍lɛ̍ŋ nda̍, ō ya̍ I̍ bi̍ī ko̍, I̍ fa̍sāŋā ndu̍ o̍ chāa̍ŋ ndɔ̄ ō dēl ō wū. Fi̍nyāa̍ a̍ pūa̍a̍ ndāā vi̍a̍lāa̍ lātūlu̍ le̍nde̍ ya̍ I̍ di̍ū ni̍ŋ nda̍ ni̍. Tē te̍le̍ŋ ko̍ŋ ō fūūlu̍u̍ pɛ̍, īnyīɛ̍ɛ̍ bɛ̍ɛ̍ I̍ nɔ᷅ ni̍ŋ le̍ nda̍, kɛ̄lɛ̄ŋgāā mī mɔ̍nɛ̍i̍ bīī ya̍ le̍ nda̍, ɔ̄ɔ̄ mī kɔ̍ɔ̍ni̍a̍a̍ bīī ya̍ le̍ nda̍, mī ma̍ŋga̍la̍ kɔ̄l nūu̍ I̍ tɛ̍ɛ̍mbūū nda̍ nda̍ le̍ le̍.”

¹⁵Wāŋnda̍ I̍sɔ̄lūɛ̄ī, Mɛ̄lɛ̄ka̍ Ya̍a̍wɛ̄ɛ̄ o̍ chi̍i̍ īsɔ̄ɔ̍ nāa̍ nya̍ chūā. Lā ya᷄ŋ ni᷅la̍ŋ mī lā tūēī nyɛ̄ o̍ di̍mu̍l nya̍ wo̍. Lā to̍sā lāyōŋgā a̍ ndu̍ le̍.

¹⁶Lā ke̍ Mɛ̍lɛ̄ka̍ Ya̍a̍wɛ̄ɛ̄ o̍ cho̍ Mɛ̄lɛ̄ka̍ nyāa̍ wo̍ bɛ̄ɛ̄le̍ŋ. Tē ō cho̍ ko̍ŋ te̍, ō chō nyūmmā bɛ̄ndūa̍ŋ tūsī o̍ lɛ̄ŋndē nyāle̍ŋ ni᷄ŋ kpi᷅ŋgbi̍. Ō chō tōsā mī lā bōŋi̍ bo̍ŋi̍ o̍ nyūmmā bɛ̄ndūa̍ŋ ni᷄ŋ o̍ pēmbo᷄ŋ chōo̍. Nyɛ̄ wa̍wo̍ŋ nya̍ chō chūmndo̍ le̍ ndu̍ wo̍, ō chō tōsā mī nyɛ̄ wāwo̍ŋ ko̍ŋ ō sīmnu᷄ŋ nyu̍mmā bɛ̄ndū. Ō chō tōsā mbō sīmnu᷄ŋ nyu᷅mmā tīŋgīsi̍ma̍ bɛ̍ndū.

¹⁷Kɛ̍ tē lā tōsa̍ yōŋgāa̍ pɛ̍ mī lā kɛ̄ɛ̍ le̍ ndu̍ nīla̍ŋ yāŋɔ̄ɔ̍, I̍ cho̍ lākɔ̄ o̍ fo̍ndāŋ yo̍lo̍līɔ̍ɔ̍ mī kɔ̍ cha᷅ŋ pɔ̍ɔ̍ le̍ nya̍. I̍ cho̍ cha᷄ŋ cha̍ŋndo̍ pīla̍ mī mɛ̍mi̍a̍ŋ mā līīvi̍a̍a̍ ya̍ būŋnde̍ yɔ̍ yɔ̍, fo̍ndōle̍ le̍ kɔ̄lā nda̍ kūā ni̍ŋ a̍ nya̍ wānāa̍ Mɛ̄lɛ̄ka̍ Ya̍a̍wɛ̄ɛ̄ wa̍ o̍ bīyɔ̄ɔ̍ ni᷄ŋ nda̍ŋ.

¹⁸Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl la̍ āā, “Di̍mu̍l ma̍sā bɛ̍ndōo̍ nda̍ kāla̍ ndɔ̄ le̍ mā tōl o̍ kpe̍ŋgbe̍i̍la̍ ndāla̍ lēmāsāla̍ŋ chōo̍, fo̍ndōle̍, mɔ̍si̍lta̍ ndāla̍ lēbɛ̄ɛ̄lā lēmāsāla̍ŋ lā fāŋa̍ŋ nda̍ o̍ lēbōl.”

¹⁹Chi̍e̍e̍ŋ bɛ̍ndu᷄ŋ cho̍ o̍ lɛ̄ŋndē Chu̍dāle̍ŋ ni᷄ŋ ba᷅ tōūwo̍ wo̍ŋ, ŋ̄ chō hūnɔ̄ɔ̄ wā ŋ̄ dūāūwāā o̍ pi̍ŋndo̍ ni᷄ŋ kpɔ̍kɔ̍su̍, wānā o̍ wānā nɔ̍lā ni̍ŋ mbō fūla̍ le̍. Wāŋnda̍ Chu̍dā kpo̍u̍ ā chō hūnɔ̄ɔ̄ lākɔ̄ a̍ nda̍ o̍ bīyɔ̄ɔ̍ ni᷄ŋ.

²⁰Wāŋnda̍ Chūlu̍sɛ̄lɛ̄m, lā tōfa̍ wɔ̍ o̍ nɛ̄ī, ya̍a̍mɔ̍ɔ̍wa̍a̍ nyāa̍ cho̍ chɔ̄nɔ᷄ŋndo̍ bā lūāŋndo̍ ma̍ wā hūnɔ̄ɔ̍. Wānāā nda̍ ke̍ nya̍ mi̍ lā wā nda̍ māndāa̍ mɛ̄ɛ̍ wānā ma̍ndāā lāsāa̍ ō māndā nu̍a̍ā sāa̍ ndūa̍a̍ yɛ̍, mi̍ nya̍ a̍a̍ wa᷅ yōŋgāa̍ bɛ̍ndōo̍ kīōlɔ̄ɔ̍ a̍ nda̍ o̍kɔ̄ɔ̄ wa̍, kūɛ̍ɛ̍nɛ̍ wānāā kāŋ ā chō yɛ̍?

²¹Wānāā nya̍ a̍a̍ chu̍a̍ māā chāāŋāā nyāa̍ nya̍ tīīnda̍ŋ nda̍ chō ni̍ wa̍, tē ā hu᷄ŋ kɛ̍sī ni᷅ŋ wānāā ka̍ŋ nya̍ chōo̍ pɛ̍, mī lā wa̍ nda̍ o̍ bā bɛ̄ŋgu̍, ō yɛ̄ɛ̍nɛ̍ nya̍ dīmī yɛ̍ ni̍ŋ? Nyɛ̄ pālāa̍ tu̍āl ni̍ŋ nya̍ chōo̍ wo̍ wāŋnda̍ Chūlu̍sɛ̄lɛ̄m ō wā ni̍ŋ o̍ bɔ̍ɔ̍, ō wā ni̍ŋ ko̍, mɛ̄ɛ̍ pūli̍i̍ vi̍a̍lɛ̄i̍ ī kpūwā nu̍a̍ā wāna̍ yo᷄llo̍ yɛ̍.

²²Ndu̍yɛ̍ mī lā nyu̍na̍ dɔ̍ɔ̍ nya̍ pi̍la̍ le̍ sa̍bū mu᷅ŋ kpo̍u̍ ŋ̍ yɔ̍nu̍ŋ a̍ nya̍ wo̍. Le̍ yɔ̄ŋndā wɔ̄ɔ̍ŋndā bɛ̄ndā nya̍ to̍sa̍ la̍ŋ le̍la̍ŋ mu᷅ŋ kpo̍u̍ ŋ̍ yɔ̍nūŋ ni̍ŋ a̍ nya̍ ni̍. Le̍ sa̍bū kōŋ ya̍a̍mɔ̍ɔ̍wa̍ kpūūvīāā ni̍ŋ wa᷅ŋ lāāndūāā nyāa̍ ni̍.

²³Mɛ̄ɛ̍ o̍ mɛ̄ɛ̍ wāna̍ chīo̍o̍ ō vīo̍u̍, kɔ̄ɔ̍le̍ ndɔ̄le̍ŋ lē māŋgālāŋ pa̍ kɔ̍ɔ̍le̍ che᷅le̍ŋ? Tāmbi̍llo̍ ō vīo̍u̍ bɛ̍ɛ̍ mɛ̍ɛ̍ o̍ mɛ̄ɛ̍ kɔ̄ɔ̍le̍ ndɔ̄le̍ŋ lē māŋgālāŋ pa̍? Lē ma̍ŋgālāŋ te̍. Le̍nde̍ ko̍ nya̍ chō ni̍, ha̍a̍a̍ mi̍ lā pɛ̄ɛ̄kū ni᷅ŋ a̍ sɔ̄ɔ̍ŋ wɔ̍ɔ̍ŋndo̍ŋ tōsāa̍, lā ma̍ŋgālāŋ ndɛ̍, lā mūli̍ŋ sɔ̍ɔ̍ŋ kɛ̍ndɔ᷄ŋ tōsāa̍ le̍.

²⁴Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “I̍ cho̍ nya̍ hūnɔ̄ɔ̄ sāŋɔ̄ɔ̄ o̍ lɛ̄ŋnde̍ ni᷄ŋ, mɛ̄ɛ̍ hūēīyīī kpāāyɛ̄i̍ cha᷅ŋ he̍ī kūmbū po̍llo̍ ve̍ ī sāŋ nu̍a̍ā bīl vēsɛ̍i̍yo̍ mbo̍ tīu̍ bā o̍ bā yɛ̍.

²⁵Nyɛ̄ pālāa̍ cho̍ nya̍ chūmndo̍ wo̍ ndu̍ cho̍ ko̍ŋ ni̍. Ya̍ Mɛ̍lɛ̄ka̍ nyɛ̄ ya̍ I̍ kɛ̍ɛ̍si̍a̍a̍ le̍ tōsāa̍ a̍ nya̍ wo̍ ndu̍ wa᷅ ni̍ŋ ko̍ŋ ni̍, fo̍ndōle̍, le̍ mɛ̄ɛ̍ nya̍ pūɛ̄ɛ̄nu̍ŋ a̍ ya̍ o̍kɔ̄ɔ̄ mi̍ lā dūāū tīīnda᷄ŋ nyāa̍ o̍ mɛ̄lɛ̄ka̍a̍ nyāa̍ lāchōōwāa̍ ni᷄ŋ yɛ̍.

²⁶Ya̍ Mɛ̍lɛ̄ka̍ I̍ chō tōsā mi̍ si̍ɔ̍mbu̍la̍ bɛ̄ndūla̍ŋ lā hu᷄ŋ bi̍ī nya̍. Ī yɔ̄nūŋ ni̍ŋ ko̍ a̍ nya̍ mɛ̄ɛ̍ nda̍ yūŋgā nu̍a̍ā wānā la̍nɔ̍ɔ̍ o̍ lu᷅ŋ mā mɛ̄i̍ ndu̍ fo̍ndō, mɛ̄ɛ̍ kāla̍ ndɔ̄ ve̍lū ndu̍ yɛ̍, mī si̍ɔ̍mbu̍la̍ŋ lā bīī ndu̍ yɛ̍.

²⁷Sɔ̄ɔ̍ŋ wɔ̍ɔ̍ŋ ya̍ Mɛ̍lɛ̄ka̍ tu᷄l yɛ̄le̍ŋ mi̍ lā wā mu̍ŋ to̍sāa̍ wo̍ŋ, I̍ cho̍ mu̍ŋ chɔ̄ɔ̍ kpo̍u̍. Lā kɛ̄ɛ̍ ya̍, mi̍ lā mūli᷄ŋ nyɛ᷅m chēle̍ŋndo̍ŋ sōōlūūwo̍, o̍ pēmbo᷄ŋ chōo̍ a̍ o̍ chīɔ̄ɔ̄ŋ nya᷄ŋ ni᷄ŋ māā mɛ̄lɛ̄ka̍a̍ nyā. Mɛ̄ɛ̍ wānā pɔ̍nɔ̍ɔ̍ ō lūɛ̄ī nu̍a̍ā la̍nɔ̍ɔ̍ chāa̍ŋ ndɔ̍ hɔ̄lte̍ŋ mbō tōl ndu̍ kɔ̄ɔ̄lī yɛ̍, le̍nde̍ nya̍ lūɛ̄ī nyɛ̄m mu᷅ŋ hɔ̄lte̍ŋ ni̍, mi̍ lā kɛ̄ɛ̄ ya̍ le̍ mu̍ŋ. Wāŋnda̍ Chūlu̍sɛ̄lɛ̄m, nyɛ̄ pālāā bɛ̄ndōo̍ ō chō le̍ nya̍. Lɔ̍ɔ̍ kūɛ̍ɛ̍nɛ̍ kpe̍e̍kpe̍i̍ nya̍ wā yɛ̍ ni̍ŋ a̍ di̍a̍ndāā ya̍ Mɛ̍lɛ̄ka̍ o̍ hɔ̄l?”