Read Southern Kisi Chɛ̄lūīma̍yā 14 Bible Online

Chɛ̄lūīma̍yā 14 - Southern Kisi bible

Chɛ̄lūīma̍yā 14

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ ke᷅ ya̍ yōōŋgōo̍ a̍ mɛ̄ɛ̍ pīɔ̍ɔ̍ ō kɛ̄ɛ̄ ni̍ŋ si̍a̍a̍ yɛ̍ o̍kɔ̄ɔ̄. Mbo̍ dīmūl la̍ āā,

²“Lɛ̄ŋndē Chu̍dāle̍ŋ lē bīī mɔ̍nɛ̍i̍. Chi̍o̍o̍ŋ Chu̍dā ŋ̍ cho̍ o̍ dɛ̍nɛ̍ pa̍lāā bɛ̄ndōo̍ ni᷄ŋ. Wāŋnda̍ Chu̍dā a̍ cho̍ īhīni̍ lɛ᷅ŋ nda̍ kpo̍u̍ ma̍ wā cha᷄ŋnda̍ŋ. Cha᷄ŋnda̍ŋ lā chō sūɛ̍i̍ Chūlu̍sɛ̄lɛ̄m chi̍e̍e̍ kpu̍ū bɛ̄ndū.

³Wānāā bɛ̄ndūa̍a̍ Chu̍dā a̍ ve᷅m bu̍ɛ̍i̍yāā ndāa̍ le̍ mɛ̄ŋnda̍ŋ. Kɛ̍ ā kɔ̍ ba̍lū o̍ fo̍ndāŋndā māmɛ̄ŋnda̍ŋ kpo̍u̍ ā sēēlu̍ŋ ma̍mɛ᷅ŋ o̍ māmɛ̄ŋ te̍. Ā mīīŋgu̍ a̍ kpɛ̍ɛ̍nɛ̍ŋ ndāŋ ku̍a̍ndāŋ māmɛ̄ŋndo̍ŋ fo̍ndō. Kɔ̄lta̍ŋ lā tāmbu̍ nda̍, ā si̍nā nyɛ᷅ o̍ nyɛ̄ nda̍ yɔ̄ŋ te̍. Ā chō mīīŋgōo̍ a̍ bāla̍ŋ lā hānda᷄ŋ nda̍ o̍ lēbōl.

⁴Lɛ̄ŋnde̍ŋ mɛ̄ɛ̍ le̍ ve̍sa̍ ni᷅ŋ te̍i̍, mi̍ lē tɛ̄ɛ̄ndīāā le̍ pīɔ̄ɔ̄ lēpɛ̄ŋndo̍. Wānāa̍ nɔ̍ chīɔ̍ɔ̍ŋ nda̍ kpo̍u̍ kɔ̄lta̍ŋ lā tāmbu̍ nda̍ ma̍ bīīnu᷄ŋ ba᷅la̍ŋ o̍ lēbōl.

⁵Kīa̍lla̍ kpo̍u̍ kōmɔ̄ɔ̍ mā mɛ̄ī chūāūwāā ndāā ka̍ŋ o̍ po̍llo̍ ni᷄ŋ mā hīāūnūŋ la̍chi̍, kāni̍ fo̍ndōle̍ ā nɔ̍ bi᷅l o̍ bīl nda̍ dē le̍.

⁶Sōfɛ̍li̍a̍a̍ yōndūa̍a̍ mɛ̄ɛ̍ kōlɔ̄ɔ̍ bīī nda̍ te̍i̍, ma̍ kɔ̍ si᷅m o̍ pēmbūŋ vēsɛ̍i̍yo̍ŋ chōo̍ mā yōōmū a̍ lāsōndō mɛ̄ɛ̍ tūŋnda̍ yōōmū nu̍a̍ā a̍ lāsōndō yɛ̍. Ā bālu̍ fe̍e̍ le̍ bīl nda̍ dīā wo̍, ā sēēlu̍ŋ bi᷅l o̍ bīl te̍.

⁷Wānāā nīa̍a̍ ā chō cha᷄ŋndo̍ nāa̍ ya̍ chu̍a̍ kpe̍e̍kpe̍i̍, ā chō dīmīo̍o̍ māā, ōo̍ Mɛ̄lɛ̄ka̍ Ya̍a̍wɛ̄ɛ̄, mi̍ chē bɛ̍ɛ̍ mi̍ yɔ̄ŋndā nāāla̍ wɔ̍ɔ̍ŋnda̍ŋ lā wā lā chɔ̄mna᷄ŋ kpe̍nde̍ke̍le̍ ni̍, mi̍ ŋ̄ kɛ̄ɛ̄ nu̍m le̍ te̍le̍ŋnda̍ fa̍ŋā fa̍ŋā, mi̍ ŋ̄ tūāl mɛ̄lɛ̄ka̍a̍ chēle̍ŋnda̍ kɔ̄ɔ̄lī, ndu̍yɛ̍ mi̍ ŋ̄ tōsā yɔ̄ŋ wɔ̄ɔ̍ŋndo̍ a̍ nūm, kɛ̍ ō wa̍ bɛ̍ɛ̍ le̍ dīōlā nūmnda̍ kɛ̍ndɛ̄la̍ŋ su̍e̍e̍, to̍sa̍ i̍sɔ̍ɔ̍ o̍ sūɛ̍i̍ he̍ī ni᷄ŋ.

⁸Nu᷄m pīlɛ̍ kpe̍ I̍sɔ̄lūɛ̍i̍ya̍ ā tīīnda̍ŋ le̍ nda̍ mālāa̍ ni̍. Tē kpūndɔ̍ɔ̍ ō kōma̍l I̍sɔ̄lūɛ̍i̍ya̍ pɛ̍, nu᷄m pi̍ŋī nda̍ ni̍. Kɛ̍ vɛ᷅ ma̍ wā na̍a̍ bīyɔ̄ɔ̍ wānā che᷅ pɛ̍ āā mīāllo̍ ŋ̄ chō a̍ na̍a̍ ni̍? Vɛ᷅ ni᷅ŋ ma̍ wā a̍ na̍a̍ mɛ̄ɛ̍ wānā hi̍a̍u̍wa᷄ŋndo̍ ō lɔ̄l nu̍a̍ā o̍ chi̍o̍o̍, tē pāa̍le̍ŋ lē sɛ̄ ndɔ̍ɔ̍ pɛ̍ ō hīōūnu᷄ŋ yɛ̍?”

⁹“Vɛ᷅ ma̍ wā na̍a̍ bīyɔ̄ɔ̍ o̍ sūɛ̍i̍ he̍ī ni᷅ŋ mɛ̄ɛ̍ sūɛ̍i̍ ī wōōlū nu̍a̍ā wāŋndo̍ ō nɔ᷅ mɛ̍ɛ̍ o̍ mɛ̍ɛ̍ yɔ̍ŋāā le̍ yɛ̍? Vɛ᷅ ma̍ wā na̍a̍ tōfāa̍, mɛ̄ɛ̍ ku̍u̍ba̍nɔ̍ chɔ̄ūwo̍ kpāāya̍ ndɔ̄ɔ̍ ō chūū nu̍a̍ā ō nɔ̍lā lɛ̍ mbō pīŋi̍ wānāā ndūa̍a̍ le̍ yɛ̍? O̍o̍ Mɛ̄lɛ̄ka̍ Ya̍a̍wɛ̄ɛ̄, ŋ̄ sīnā māā ā chō na̍a̍ tɛ̄ɛ̄ŋ le̍ te̍le̍ŋ o̍ te̍le̍ŋ. Wānāā nūmnda̍ na̍a̍ ŋ̄ chō ni̍. Yāndi̍i̍ ma᷅l na̍a̍ le̍.”

¹⁰Kɛ̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ a̍ wāŋnda̍ ha̍ā o̍kɔ̄ɔ̄ wo̍ cho̍ ho̍ō ni̍, ō dīmi̍ āā, “Wāŋnda̍ ha̍ā yēēmɛ̍i̍ ndɛ̄i̍ bɛ̍ndūe̍i̍ le̍ te̍le̍ŋ o̍ te̍le̍ŋ, ndi̍ cho̍ ya̍ Mɛ̍lɛ̄ka̍ fāŋa᷄ŋndo̍ o̍ ŋ̄dīāl ni̍, mā bālū nyɛ᷅m chēle̍ŋndo̍ŋ sōōlūūwo̍ māā mɛ̄lɛ̄ka̍a̍ ndā. Ā nɔ̍ ye̍e̍mɛ̍i̍ o̍ yēēmɛ̍i̍ nda̍ kīndī mā wa̍ o̍ nɛ̄i̍ nūu̍ chōo̍ le̍. Le̍la̍ŋ, ya̍ Mɛ̍lɛ̄ka̍ Ya̍a̍wɛ̄ɛ̄ chɛ᷅l lɛ̍ nda̍ māā wānāā nī le̍. Yɔ̄ŋ wɔ̄ɔ̍ŋ o̍ yɔ̄ŋ wɔ̄ɔ̍ŋ nda̍ tōsa̍, I̍ me᷅l nda̍ le̍ ō pīlɛ̍ bɛ̍ɛ̍ le̍, mɛ̄ɛ̍ mī tu̍si̍ nda̍ nyɛ̄ pālāa̍ chōo̍ le̍ ndu̍.”

¹¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl la̍ āā, “Nyu̍nā ya̍ dīōm le̍ wāŋnda̍ ha̍ā mālā le̍.

¹²Ā yɔ᷄ŋ bɛ̍ɛ̍ mā bīī su᷅mndo̍, ndu̍yɛ̍ mā nyūna̍ ya̍ dīōm, I̍ ye᷅ŋ nda̍ lānī le̍. Ā sōli̍ bɛ̍ɛ̍ sa̍lālā lūāmāāla̍ŋ nāa̍ ya̍ chu̍a̍ a̍ sa̍lālā tɔ̄lɔ̄ɔ̄lā ku̍lta̍ŋ, I̍ bi̍ī sa̍lālā ndāla̍ŋ te̍. I̍ cho̍ nda̍ hūnɔ̄ɔ̄ tɛ̄ɛ̄mbūū a̍ chɔ̄ūla̍ŋ o̍ ko̍ŋ kɔ̍ɔ̍lī, a̍ yīa̍a̍ŋ ndu̍yɛ̍ a̍ nāālā wɔ̄ɔ̍ŋnda̍ŋ.”

¹³Mi̍ lo᷅ o̍ ko̍ŋ mi̍ di̍mūl Mɛ̄lɛ̄ka̍ a̍a̍, “O̍o̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, wānāa̍ su̍a̍ā le̍ nūm nda̍ ā chō wāŋnda̍ dīmūllo̍ māā nūm di̍mi̍ āā, ‘Chɔ̄ū o̍ chɔ̄ū ō hi᷅ŋ o̍ lɛ̄ŋnde̍ŋ nde᷅ŋ ni᷄ŋ te̍, ndu̍yɛ̍ māyī o̍ māyī mā de᷅l lɛ᷅ŋnde᷅ŋ te̍. I̍ cho̍ tōsā mī kɔ̄l nyūlōo̍ ō wa̍ o̍ lɛ̄ŋnde̍ŋ nde᷅ŋ ni᷄ŋ.’ ”

¹⁴Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl la̍ āā, “Nyɛ̄ o̍ nyɛ̄ wānāa̍ di̍mi̍ ka̍ŋ māā wānāa̍ su̍a̍ā le̍ ya̍ wa̍ nda̍ chō ni̍ wa̍ ā chō wāŋnda̍ dīmūllo̍ a̍ dīōlā nīla̍ŋ, chōōla̍ŋ kpo̍sōŋ o̍ cho̍ ni̍. I̍ vi̍m nda̍ a̍ yōōŋgū o̍ yōōŋgū wāā le̍nde̍ le̍. Ndu̍yɛ̍ I̍ hɛ̍li̍ nda̍ bɛ̍ɛ̍ le̍ mā wa̍ wānāā nīāā su̍a̍ā le̍, kɛ̄lɛ̄ŋgāā ni᷅ŋ te̍ mī so̍ō bɛ̍ɛ̍ nāa̍ nda̍ chūā. Yi̍lāŋndā lā chōōwāla̍ŋ kpo̍sōŋ ko̍ nda̍ chō chɔ̄ɔ̍ ni̍ ma̍ wā nya̍ dīmūllo̍. Īsɔ̄ɔ̍ o̍ īsɔ̄ɔ̍ wa̍ā lāchī nda̍ chō wāŋnda̍ dīmūllo̍, sɔ̄ɔ̍ŋ fo̍ndō fu̍u̍ ŋ̍ cho̍ ni̍, sɔ̄ɔ̍ŋ nda̍ pi̍la̍ chāl mā kɛ̄ɛ̄si̍a̍a̍ o̍ kɔ̄ltā ndāla̍ŋ ni᷄ŋ le̍ wāŋnda̍ hūīyo̍ wo̍ŋ.

¹⁵Kɛ̍ ndu̍yɛ̍, wānāa̍ di̍mi̍ ka̍ŋ māā wānāa̍ su̍a̍ā le̍ ya̍ wa̍ nda̍ chō ni̍, I̍ vi̍m nda̍ le̍, mā dīmūl wa᷅ŋnda̍ māā ya̍ Mɛ̍lɛ̄ka̍ dīmi̍ māā chɔ̄ū o̍ chɔ̄ū ō hi᷅ŋ o̍ lɛ̄ŋnde̍ŋ nde᷅ŋ ni᷄ŋ te̍ ndu̍yɛ̍ māā yīmā de᷅l o̍ lɛ̄ŋnde̍ŋ nde᷅ŋ ni᷄ŋ te̍ wa̍, wānāā kāŋ, nyɛ̄ ya̍ Mɛ̍lɛ̄ka̍ Ya̍a̍wɛ̄ɛ̄ di̍mi̍ a̍ nda̍ o̍kɔ̄ɔ̄ wo̍ cho̍ ho̍ō ni̍. Wāŋnda̍ ha̍ā, chɔ̄ūla̍ŋ la̍ cho̍ nda̍ hūnɔ̄ɔ̄ chīī ni̍ a̍ yīmā bɛ̄ndūa̍ŋ.

¹⁶Ndu̍yɛ̍ wānāā nda̍ chō yōōŋgū kālāa̍ dīmūl lo̍ wa̍ nda̍ bɛ̍ɛ̍ chɔ̄ūla̍ŋ ko̍ni̍ la̍ chi̍ī ni̍ŋ nda̍ ni̍ a̍ yīmā bɛ̄ndūa̍ŋ. Dīāllūŋ nda᷄ŋ ŋ̄ chō hūnɔ̄ɔ̄ wā ŋ̄ vīāūwāā lɛ̄ŋ o̍ bɛ̍ɛ̄la̍ŋ Chūlu̍sɛ̄lɛ̄m. Wānā o̍ wānā o̍ ve᷅m ni̍ŋ le̍ mbō chɔ᷅ dīāllūŋ nda᷄ŋ te̍. Nda̍ pi̍la̍ ni̍, lāāndāā ndāa̍ ni̍, pūa̍a̍ ndāa̍ ni̍, chūāūwāā ndāā la̍a̍ndūa̍a̍ ni̍, ā chō hūnɔ̄ɔ̄ chūū kpo̍u̍. Yɔ̄ŋ wɔ̄ɔ̍ŋ o̍ yɔ̄ŋ wɔ̄ɔ̍ŋ nda̍ tōsa̍, I̍ cho̍ nda̍ hūnɔ̄ɔ̄ nyɛ̄ pālāā bɛ̄ndōo̍ tūsī chōo̍ le̍ ndu̍.”

¹⁷Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl la̍ āā, “Chɛ̄lūīma̍yā, di̍mu̍l wa᷅ŋnda̍ ha̍ā mɛ̄ɛ̍ mɔ̍nɛ̍i̍ chō o̍ kɔ̄l nūmndo̍ ni̍ŋ le̍ nda̍ yɛ̍. Di̍mu̍l nda̍ māā, I̍ cho̍ cha᷄ŋ cha̍ŋndo̍ pīla̍ le̍ nya̍. Le̍ īdīi̍ a̍ īchɔ̄l mɛ̍mi̍a̍ŋ mā wā ni̍ŋ ya̍ tōlɔ̄ɔ̍ le̍ nya̍, I̍ me̍ī ni̍ŋ te̍, kāni̍ fo̍ndōle̍, wānāā nīa̍a̍ ā yɔ̄ŋu̍lu̍ŋ o̍ bɔ̍ɔ̍. Nyɛ̍ lɔ̍ɔ̄ nda̍ wo̍ ō chō ō bɔ̄ɔ̍.

¹⁸Tē I̍ ku̍ɛ̄ o̍ chīɔ̍ɔ̍ŋ ni᷄ŋ pɛ̍, bā o̍ bā ya̍ I̍ mu̍li̍ hɔ᷅lla̍, wāŋ vīlɛ̍i̍ya̍ kpo̍sōŋ ya̍ I̍ cha᷅ ni̍, wānāā nda̍ dīu̍ o̍ chɔ̄ūwo̍ ni᷄ŋ nda̍. Yālāā ya̍ I̍ ku̍ā o̍ chi̍o̍o̍ŋ te̍, wānāa̍ cho̍ pīɔ̍mnda̍ŋ a̍ yīa̍a̍ŋ nda̍, nda̍ ya̍ I̍ cha᷅ ku̍ndāla̍ŋ o̍ bɛ̍ɛ̄la̍ŋ ni̍. Wānāa̍ su̍a̍ā le̍ Mɛ̄lɛ̄ka̍ wa̍ ni̍, wānāa̍ so̍lī sa̍lāla̍ŋ o̍ Mɛ̄lɛ̄ka̍ lo̍ wa̍ ni̍, wa̍lta̍ ndā tu̍ŋ nda̍ hīāū la̍chi̍ a̍ to̍sāa̍ ni̍. Ā si̍nā bɛ̍ɛ̍ nyɛ᷅ cho̍ yɔ̄nɔ᷄ŋndo̍ wo̍ pɛ̄ŋgu̍ le̍.”

¹⁹Wāŋnda̍ Chu̍dā a̍ cho̍ Mɛ̄lɛ̄ka̍ pīɛ̄īyo̍ mā nyūnā ndu̍ āā, “Mɛ̄lɛ̄ka̍ Ya̍a̍wɛ̄ɛ̄, mɛ̄ɛ̍ chīīyo̍ ko̍ ŋ̄ chīi̍ ni᷅ŋ Chu̍dā kīɔ̍ɔ̍ nu̍a̍ā ni̍? Mɛ̄ɛ̍ yɛ̄le̍ŋ kpe̍e̍kpe̍i̍ ŋ̄ chīi̍ ni᷅ŋ nu̍a̍ā Chūlu̍sɛ̄lɛ̄m tūl ni̍ Mɛ̄lɛ̄ka̍? Vɛ᷅ ma̍ yɔ̄ŋūl na̍a̍ nu̍a̍ā yɔ̄ŋūl na̍a̍ ŋ̄ sɔ̍lā chi̍ɔ̍u̍ le̍ wo̍? Ŋ̄ wa̍ yīya᷄ŋndo̍ māā ŋ̄ sɔ̄lā ni̍ŋ kɔ̍l nyūlōo̍, kɛ̍ ŋ̄ nɔ̄la̍ mī ŋ̄ sɔ̄la̍ ndu̍ le̍. Mi̍ ŋ̄ yīya᷄ŋ māā te̍le̍ŋ o̍ wa̍ fūūlu̍u̍ mī na̍a̍ ŋ̍ sɔ̍la̍ sīōŋgɔ̄ɔ̍, kɛ̍ sɔ̄ɔ̍ŋ lu̍e̍ī na̍a̍ sīōōŋīī bɛ̄ndūe̍i̍ yo̍ŋ mu̍ŋ ko̍ ŋ̄ ko̍māl na̍a̍ ni̍.

²⁰Mɛ̄lɛ̄ka̍ Ya̍a̍wɛ̄ɛ̄, ŋ̄ chō nu̍m sɔ̄lɔ̄la᷄ŋndo̍ o̍ hɔ̄l kpe̍nde̍ke̍le̍ māā ŋ̄ tōsa̍ yɔ̄ŋ wɔ̄ɔ̍ŋndo̍ a̍ nūm, ndu̍yɛ̍ mi̍ ŋ̄ chɛ̄l ndi̍ vɛ̄lɛ̄ māā fi̍nyāā nāā ma̍māa̍ bɛ̍ɛ̍ ā tōsa̍ yɔ̄ŋ wɔ̄ɔ̍ŋndo̍ a̍ nūm.

²¹Le̍la̍ŋ yāndi̍i̍ Mɛ̄lɛ̄ka̍, ō wa̍ bɛ̍ɛ̍ le̍ dīōlā nūmnda̍ kɛ̍ndɛ̄la̍ŋ, tūīīnu̍ŋ na̍a̍ īnyīɛ̍ɛ̍, kɛ̍ɛ̄ na̍a̍ le̍. To̍sā mi̍ fo̍ndāŋ kpe̍ŋgbe̍i̍ nu̍m chālāā lēbīɔ̍ɔ̍ ō chō wo̍ ō tāmbu̍ lābɛ̄ɛ̄ le̍. Lo̍o̍nu̍ŋ kpe̍ma̍ ŋ̄ yīi̍ a̍ na̍a̍ wo̍ Mɛ̄lɛ̄ka̍. Tɛ̍ɛ̍mbūū kpe̍ma̍ ko̍ŋ te̍.

²²Nyɛ̄m fo̍ndōŋ wāŋnda̍ o̍ lɛ̄ŋīī chēle̍ŋnde̍ ni̍ŋ a̍ so̍o̍lu̍u̍ māā mɛ̄lɛ̄ka̍a̍ ndā wo̍ŋ ki̍nɛ̍i̍, ō pīlɛ̍ bɛ̍ɛ̍ cho̍ mbō nɔ̄la̍ pīɔ̍ɔ̍ tūsī le̍. Ha̍la̍a̍ chōo̍ cho̍o̍ bɛ̍ɛ̍ ō nɔ̍lā mbō tōsa̍ a̍ bā ndɔ̄ pīɔ̍ɔ̍ ō se᷅ le̍. Nūm Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nāa̍ nu᷄m pīlɛ̍ kpe̍ nɔ̍lā ni̍ mā to̍sa̍ mu᷅ŋ. Le̍la̍ŋ nu̍m pīlɛ̍ kpe̍ na̍a̍ ŋ̄ chō tōfāa̍ ni̍, fo̍ndōle̍ nu᷄m pīlɛ̍ kpe̍ nɔ̍lā ni̍ mā to̍sa̍ sɔ̄ɔ̍ŋ mu᷅ŋ ki̍nɛ̍i̍.”