Read Southern Kisi Chɛ̄lūīma̍yā 15 Bible Online

Chɛ̄lūīma̍yā 15 - Southern Kisi bible

Chɛ̄lūīma̍yā 15

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl la̍ āā, “Nda̍ a̍a̍ yɔ̍ŋ bɛ̍ɛ̍ mī Mūu̍sē nda̍ Sa̍a̍mi̍ɛ̍ɛ̄ nda̍ a̍a̍ hu̍ŋ si᷅m ya̍ o̍ hɔ̄l le̍ ya̍ nyɔ̄ɔ̄lōo̍ le̍ wāŋnda̍ ha̍ā, ya̍ i̍i̍ mi̍ŋgī lɛ̍ kɔ̄llo̍ o̍ wāŋnda̍ ha̍ā lo̍ le̍. Le̍la̍ŋ to̍sa̍ mā fāŋa̍ŋ ya̍ o̍ hɔ̄l. Fa̍ŋa̍ nda̍ ya̍ o̍ hɔ̄l.

²Mī wāŋnda̍ ha̍ā ā nyūna̍ nu̍m dɔ̍ɔ̍ āā, ‘Kūɛ̍ɛ̍nɛ̍ nāa̍ ŋ̄ chō lākɔ̄?’ Tē ā nyūna̍ nu̍m pɛ̍, di̍mu̍l nda̍ māā Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, ‘Wānāa̍ nɔ̍ mā sɔ̄la̍ pīɔ̍mndo̍ a̍ nāāla̍ŋ nda̍ ā chō pīɔ̍mndo̍ sɔ̄lā a̍ nāāla̍ŋ. Ā nda̍ nɔ̄ mā dīu̍ o̍ chɔ̄ūwo̍ ni᷄ŋ nda̍ ā chō nda̍ dīū o̍ chɔ̄ūwo̍ ni᷄ŋ. Ā yīa̍a̍ŋ mā nɔ̄ mī mā dīu̍ wa̍ yīa̍a̍ŋ mā chō nda̍ hūnɔ̄ɔ̄ dīū. Ā nda̍ nɔ̄ mā kūɛ̄ o̍ chɛ̄le̍ŋ ni᷄ŋ nda̍, ā chō lākɔ̄ a̍ nda̍ o̍ bīyɔ̄ɔ̍ ni᷄ŋ.’ ”

³Mi̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍a̍ū lāchī a̍ sūɛ̍i̍, mbo̍ dīmī āā, “Nɛ̄īla̍ ya̍ I̍ tɛ̍ɛ̍mbūū ni̍ŋ nda̍ la̍ŋ lā chō lā hīɔ̍ɔ̍lu̍. La̍ŋ la̍ cho̍ la᷅ŋ ni̍. I̍ cho̍ tōsā mā dīu̍ nda̍ a̍ mɔ̄ɔ̄ŋ fāŋndo̍ŋ, mī tūŋnda̍ sɛ̄ŋi̍ŋ a̍ vīsīŋ nda᷄ŋ, mī yōūwa̍ dē vīsīŋ nda̍ŋ, ndu̍yɛ̍ vɛ̍lɛ̄ vīsīŋ ndāŋ lo᷅ ni̍ŋ ŋ̍ sɛ̍ŋīa̍ŋ lɛ᷅ŋ ndo̍ŋ mī vīsīāā yōndūa̍a̍ ā hu᷄ŋ di̍ō mu̍ŋ.

⁴Nyɛ̄ ya̍ I̍ to̍sā ni̍ŋ a̍ nda̍ wo̍, wāŋnda̍ o̍ lɛ̄ŋnde̍ ni᷄ŋ kpo̍u̍ sīōōŋīī bɛ̄ndūe̍i̍ ī chō nda̍ bīyɔ̄ɔ̄. Le̍ sa̍bū ya̍ I̍ to̍sa̍ ni̍ŋ he̍ī a̍ wāŋnda̍ ha̍ā wo̍ cho̍ ni̍, le̍ nyɛ̄ Mānāa̍sē, po̍ Hɛ̄sɛ̄ki̍yā wo̍ ō tōsa̍ bōōndi̍i̍ o̍ wa̍ māsāa̍ o̍ lɛ̄ŋndē Chu̍dāle̍ŋ ni᷄ŋ nde̍.”

⁵Mi̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍a̍ū lāchī a̍ sūɛ̍i̍, mbo̍ dīmī āā, “Chūlu̍sɛ̄lɛ̄m, nyɛ̄ ya̍ I̍ to̍sa̍ ni̍ŋ a̍ nya̍ wo̍ ō nɛ̄ɛ̍nɛ̍ kpe̍e̍kpe̍i̍ nyīɛ̍ɛ̍ye̍ nɔ̄lā yɛ̍ ni̍ŋ mī ī bīī ndu̍ le̍ nya̍? Ō nɛ̄ɛ̍nɛ̍ nɔ̍lā yɛ̍ ni̍ŋ mī mɔ̍nɛ̍i̍ ī bīī ndu̍ le̍ nya̍? Ō nɛ̄ɛ̍nɛ̍ wa᷅ yɛ̍ bɛ̍ɛ̍ hi̍o̍u̍wɔ̄ɔ̍ mbō si᷄m mbō nyūna̍ a̍ nya̍ o̍kɔ̄ɔ̄?

⁶Ya̍ cho̍ Mɛ̄lɛ̄ka̍ nyāa̍ ni̍, kɛ̍ mī lā lō o̍ ko̍ŋ mi̍ lā kɛ̄ɛ̄ ya̍, ndu̍yɛ̍ mi̍ lā wā hīōūwɔ̄ɔ̍ lāchī kɛ᷅ a̍ ya̍ fāŋa᷄ŋndo̍ o̍ ībūŋ. Le̍ he̍ī, ya̍ Mɛ̍lɛ̄ka̍ I̍ cho̍ tu̍mbe̍ dɔ̍ɔ̍nɔ᷄ŋ a̍ nya̍ mi̍ tu̍sī nya̍ nyɛ̄ pālāa̍ chōo̍ mi̍ tɛ̍ɛ̍mbūū nya̍, fo̍ndōle̍ I̍ nɔ̍lā lɛ̍ mī ti̍u̍ kɔ̄l nūu̍ bā le̍.

⁷Mɛ̄ɛ̍ wāŋndo̍ ō wā nu̍a̍ā hɛ̄īyo̍ mī hūēīye̍ ī kūānūŋ a̍ tɛ̄fɛ̍la̍ŋ yɛ̍, le̍nde̍ ya̍ I̍ to̍sa̍ ni̍ŋ a̍ nya̍ o̍ chi̍e̍e̍ŋ nya̍ŋ ni̍. I̍ cho̍ tōsā mī pīɔ̍mnda̍ŋ lā kōma̍l nya̍. Mi̍ chē bɛ̍ɛ̍ mi̍ lā wā wānāā nīa̍a̍ ni̍, kɛ̍, I̍ cho̍ nya̍ hūnɔ̄ɔ̄ tɛ̄ɛ̄mbūū, kāni̍ fo̍ndōle̍ le̍ mɛ̄ɛ̍ nya̍ kɛ̄ɛ̍ le̍ ka̍ālā nyāla̍ŋ māŋgālāa̍ yɛ̍.

⁸Wāŋ lāāndūa̍a̍ vi̍i̍kūū ni̍ŋ pi̍a̍a̍ndūa̍a̍ o̍ lɛ̄ŋnde᷅ŋ ni᷄ŋ nda̍ ā wā ni̍ŋ ku̍ndā ha̍a̍a̍ ā hīāū ni̍ŋ mɛ̄ɛ̍ si̍o̍ōŋnde̍ ī wā nu̍a̍ā o̍ Pēe̍ Mɛ̄ŋmā Īhɛ᷄llo̍ kɔ̄ŋgɔ̍ yɛ̍. Chūāā pīāāndūa̍a̍ cho̍ lɛ̄ŋnde̍ŋ nde᷅ŋ nda̍, kālāa̍ ndāa̍, īpāla̍ de̍ŋ wānāa̍ lu̍e̍ī ni̍ŋ nda̍ mɔ̍nɛ̍i̍ ya̍ ā hūŋ ni̍ŋ ni̍. O̍ lē pīlɛ̍ ni᷄ŋ kpe̍, I̍ cho̍ tōsā mī kɔ̄ltā ndāla̍ŋ lā bīī mɔ̍nɛ̍i̍ ndu̍yɛ̍ mī sīōōŋīī bɛ̄ndūe̍i̍ ī bīī nda̍.

⁹Kāla̍ chūa̍a̍ ō nɔ̄ ni̍ŋ chu̍a̍ūwa̍ ā ŋɔ᷄mmɛ̍ū nda̍ kpo̍u̍ mā chūu̍. O̍ ko̍ŋ, mī kāla̍ chūā kōŋ ō wōu̍ kpa̍nɛ̍i̍ mbō kūɛ̄ le̍ wūo̍o̍ o̍ fōōfōo̍ chōo̍. Īpāla̍ de̍ŋ mī kāla̍ chūā kōŋ nyūmnda̍ŋ mā tōl kpi᷅ŋgbi̍ le̍ ndu̍. Si̍ɔ̍mbu̍la̍ bɛ̄ndūla̍ŋ lā chō ndu̍ bīyɔ̄ɔ̄ ndu̍yɛ̍ mbō tāmbu̍ lābɛ̄ɛ̄ chāāŋāā ndūa̍a̍ tɛ̄ɛ̄ŋ. Ndu̍yɛ̍ wānāā tūa̍a̍ lo᷅ ni̍ŋ yo̍o̍mū wa̍ I̍ cho̍ tōsā mī ya̍a̍mɔ̍ɔ̍wa̍ ā dīu̍ nda̍ kpo̍u̍. Ya̍ Mɛ̍lɛ̄ka̍ Ya̍a̍wɛ̄ɛ̄ ya̍ so̍ō ni̍.”

¹⁰Kɔ̄l nūu̍ ō tāmbu̍ ō bɔ̄ɔ̍. Vɛ᷅ mi̍ kāla̍ nūu̍ ō vīālū ya̍ o̍ chi̍e̍ēŋndo̍ chōo̍? Lɛ̄ŋnde̍ŋ nde᷅ŋ kpo̍u̍ bā o̍ bā ya̍ I̍ kɔ̍, mɛ̄ɛ̍ mī wāŋnda̍ ā sɛ̄ɛ̄ŋgi̍āŋ a̍ ya̍ ndu̍yɛ̍ mā sīmu̍l la̍ ō kālā ka̍lā. Ndu̍yɛ̍ I̍ wu̍u̍ yɛ̍ wānā ku̍e̍ē mī sūɛ̍i̍ ke̍ŋ ī wa̍ na̍a̍ tɛ̄ɛ̄ŋ te̍, wānā wu̍u̍ yɛ̍ vɛ̄lɛ̄ ya̍ kūēē le̍, kɛ̍ nda̍ kpo̍u̍ ma̍ wā sa̍a̍le̍la̍ŋ dīmīo̍o̍ a̍ ya̍.

¹¹Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl la̍ āā, “Chɛ̄lūīma̍yā, ya̍ Mɛ̍lɛ̄ka̍ I̍ chō nu̍m chīīndīāā, ndu̍yɛ̍ I̍ cho̍ nu̍m chīīndīāā le̍ sa̍bū kɛ̄ndɛ̄ kɛ̍ndɛ̄. Wānāa̍ si̍mnu᷄ŋ ha̍ā ya̍a̍mɔ̍ɔ̍wa̍a̍ nu̍mnda̍ wa̍, tē dɛ̍nɛ̍ pa̍lāa̍ ō kōma̍l nda̍ pɛ̍, ndu̍yɛ̍ mī te̍le̍ŋ kɔ̄l tāmbɛ̍i̍ bɛ̍ndo̍o̍ ō hīŋ le̍ nda̍, I̍ cho̍ tōsā mā hu᷄ŋ nyɔ̍ɔ̍lū nu̍m le̍ mā ma̍la̍ nda̍.

¹²Ō nɛ̄ɛ̍nɛ̍ nɔ̍lā yɛ̍ mbō yēm chīli̍ŋi̍i̍ ka̍lā ka̍lɛ̄i̍, chīli̍ŋndo̍ŋ mɛ̄ɛ̍ ŋ̄ nda̍ fūlā mu᷅ŋ bā lūāŋndo̍ wo̍ŋ ŋ̄ chō nu̍a̍ā ŋ̄ tōōsīāā a̍ chīli̍ŋu̍ŋ būlɔ̍ŋsīi̍yo̍ŋ lātūlu̍ yɛ̍ wo̍ŋ.

¹³“Le̍ yɔ̄ŋndā wɔ̄ɔ̍ŋndā wānāā nīa̍a̍ ā tōsa̍ o̍ lɛ̄ŋnde̍ŋ nde᷅ŋ ni᷄ŋ kpo̍u̍ la̍ŋ, I̍ cho̍ tōsā mī ya̍a̍mɔ̍ɔ̍wa̍ hu᷄ŋ pu̍ŋgā sūltā ndāla̍ŋ o̍ ko̍ŋ kɔ̍ɔ̍lī, a̍ nyɛ̄ o̍ nyɛ̄ nda̍ chūūŋgi̍a̍a̍ mā kūɛ̄nu᷄ŋ a̍ la̍ŋ.

¹⁴I̍ cho̍ tōsā mā kɔ̍ wa᷅ o̍ chɛ̄le̍ŋ ni̍ŋ ya̍a̍mɔ̍ɔ̍wa̍a̍ ndāa̍ o̍ bā, o̍ lɛ̄ŋndē nda̍ si̍nā bɛ̍ɛ̍ le̍ le̍ŋ ni᷄ŋ, fo̍ndōle̍, tu̍mbe̍ ya̍ I̍ du̍a̍u̍nūŋ ni̍ŋ a̍ nda̍ wo̍, ō wā ni̍ŋ ma̍wa̍ā mɛ̄ɛ̍ yīŋndē bɛ̄ŋnde̍ŋ lē wā nu̍a̍ā lē nyu᷅m kpo̍so̍ŋ te̍ yɛ̍.”

¹⁵Mi̍ lo᷅ o̍ ko̍ŋ mi̍ di̍mūl Mɛ̄lɛ̄ka̍ āā, “Ōo̍ Mɛ̄lɛ̄ka̍ Ya̍a̍wɛ̄ɛ̄, ya̍ ya̍ ā sīnā wa᷅na̍ ya̍ I̍ cho̍ wo̍. Lo̍o̍nu̍ŋ a̍ ya̍ Mɛ̄lɛ̄ka̍ mā sɔ̍ɔ̍ŋgu̍u̍ ya̍ īkɛ̄i̍. Wānāa̍ cho̍ ya̍ ha̍ā nyɛ̄ pālāa̍ tūsīo̍o̍ chōo̍ wa̍ su̍ŋgu̍ le̍ ya̍ Mɛ̄lɛ̄ka̍ mā mi̍ŋgu̍l nda̍ māa̍. I̍ si̍nā māā nūm wānā bi̍u̍wa᷄ŋndo̍ ŋ̄ chō ni̍. Kɛ̍ ndu̍yɛ̍ lo᷅ chūmndo̍ mī wāŋnda̍ ha̍ā ā tīu̍ ya̍ bā mā chīi̍ a̍ ya̍ le̍. Mɛ̄lɛ̄ka̍, ā sīnā māā bɛ̄ɛ̄la̍ o̍ bɛ̄ɛ̄la̍ ta̍mbɛ̍i̍ ya̍ I̍ cho̍ sɔ̄lāa̍ māā le̍ nūm ya̍ I̍ cho̍ la̍ŋ sɔ̄lāa̍ ni̍.

¹⁶Mɛ̄ɛ̍ dīōmndā nūmnda̍ŋ lā kōmāl la̍, I̍ me̍l la̍ŋ lɛ̄ŋ te̍, mi̍ chu̍ā la̍ŋ a̍ kɔ̄l nūu̍ kpo̍u̍. Mi̍ dīōmndā nūmnda̍ la̍ŋ lā chūū ya̍ nya̍a̍lo̍o̍ ndu̍yɛ̍ mi̍ hi̍nī kɔ̄l a̍ la̍ŋ ta̍u̍ ta̍u̍, fo̍ndōle̍, nūm Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍, le̍ nūm ya̍ I̍ cho̍ ni̍.

¹⁷Wānāa̍ cha᷅l ha̍ā o̍ bɔ̄ŋa᷅ŋndā ndāla̍ kɔ̄ltā kɛ̄ndɛ̄la̍ŋ chōo̍ mā tōsā kɔ᷅ltā kɛ̄ndɛ̄lā bɛ̄ndūla̍ŋ nda̍, I̍ sɔ̍ɔ̍ŋgu̍u̍ nda̍ chōo̍ o̍ bɔ̄ŋa᷅ŋndā ndāla̍ la̍ŋ mī ŋ̄ cha᷄l na̍a̍ nda̍ lātūlu̍ le̍. Mi̍ lo᷅ o̍ ko̍ŋ mi̍ wa̍ŋnu᷄ŋ ya̍ pīlɛ̍ kpe̍, fo̍ndōle̍, ya̍ i̍i̍ ye̍e̍ma̍ mī tu̍si̍ŋ o̍ dīōm nūmndo̍ bɛ̄ŋgu̍. Ma̍ tōsā mi̍ du̍a̍u̍nu᷄ŋ tu̍mbe̍ o̍ ka̍lā ka̍lā a̍ wānāā yɔ̄ŋ wɔ̄ɔ̍ŋnda̍ ha̍ā.

¹⁸Kɛ̍ vɛ᷅ ni᷅ŋ Mɛ̄lɛ̄ka̍, mi̍ wa᷅ hīōūwɔ̄ɔ̍ lāchī a̍ wāa̍ o̍ nyɛ̄ pālāa̍ wāā nu̍a̍ā ni᷄ŋ? Vɛ᷅ yɔ̄ŋūlɔ᷄ŋ nūu̍ ho̍ō ō sɔ̍lā chi̍ɔ̍u̍ le̍, hīōūwɔ̄ɔ̍ lāchī tu̍ŋ? Bāā a̍ ye̍e̍ma̍ mā hu̍i̍ ya̍ mɛ̄ɛ̍ pēēla̍ pɔ̄mbɔ̄la̍ŋ lā tōsā nu̍a̍ā a̍ wāŋnda̍ yɛ̍? A̍ sīālte̍ŋ mɛ̄ŋnda̍ŋ mā wā ma̍ pi̍a̍ā cha̍ o̍ pēēla̍ŋ nda᷅ŋ, kɛ̍ tē wɔ̄ɔ̄le̍ŋ lē fūla̍ ndɔ̍ɔ̍ pɛ̍, kɔ̍ to̍fā ni᷅ŋ bɛ̍ɛ̍ a̍ se̍e̍lūŋ le̍mɛ᷅ŋ o̍ lēmɛ̄ŋ te̍?”

¹⁹Mi̍ Mɛ̄lɛ̄ka̍ Ya̍a̍wɛ̄ɛ̄ o̍ lo᷅ o̍ ko̍ŋ mbo̍ mūlī ya̍ dīōm āā, “Tē a̍ chɛ̍l pɛ̍ mā mi̍ŋgi̍ hɔ̄lla̍ o̍ ya̍ lo̍, I̍ cho̍ tōsā mā mi̍i̍ŋgu̍ māā pāāndū, ma̍ sīmnu᷄ŋ vɛ̍lɛ̄ wāna̍ sa̍a̍ŋgīāl la̍. Tē a̍ pɛ̍ŋgi̍ sɔ̄ɔ̍ŋ nɔ̍ kɔ̍l kālu̍ le̍ wo̍ŋ dīmīo̍o̍ pɛ̍, mā wa̍ wāŋnda̍ sɔ̄ɔ̍ŋ cho̍ sɔ̄ɔ̍ŋ kpe̍e̍kpe̍i̍yo̍ŋ ndo̍ŋ dīmūllo̍, I̍ cho̍ tōsā mā sīmnu᷄ŋ vɛ̍lɛ̄ wāna̍ su̍a̍ā le̍ ya̍ wo̍. Wāŋnda̍ ha̍ā, nda̍ cho̍ hūnɔ̄ɔ̄ nāa̍ nūm chu̍a̍ ni̍, ō cho̍ nu᷅m te̍ cho̍ lākɔ̄ nāa̍ nda̍ chūā le̍.

²⁰I̍ cho̍ tōsā mā sīmnu᷄ŋ wa᷅ŋnda̍ ha̍ā tɛ̄ɛ̄ŋ mɛ̄ɛ̍ sāāsa̍ ŋ̄chīli̍ŋndo̍ ō wā nu̍a̍ā ya̍a̍mɔ̍ɔ̍wa̍ o̍ nɔ̍lā ndu̍ pīɔ̄lɔ̄ɔ̄ le̍ yɛ̍. Ā sɔ̄ŋgā ni̍ŋ a̍ nūm kɛ̍ ā nɔ̍lā ni̍ŋ nu̍m yōmɔ̄ɔ̄ le̍, fo̍ndōle̍, I̍ wa᷅ ni̍ŋ nu̍m kɔ̄ɔ̄lī, le̍ mī chi̍i̍ndi̍a̍a̍ nu̍m ndu̍yɛ̍ mī ma̍nda̍ nu̍m.

²¹I̍ cho̍ nu̍m bāŋā wānāā dɛ̍nɛ̍ wɔ̍ɔ̍ŋnda̍ ha̍ā o̍ bā, wānāā kɔ̄ltā vēsɛ̍i̍ya̍a̍ bɛ̍ndūa̍a̍ ha̍ā, mī so̍li̍ nu̍m nda̍ o̍ bā. Ya̍ Mɛ̄lɛ̄ka̍ Ya̍a̍wɛ̄ɛ̄ ya̍ so̍ō ni̍.”