Read Southern Kisi Chɛ̄lūīma̍yā 19 Bible Online

Chɛ̄lūīma̍yā 19 - Southern Kisi bible

Chɛ̄lūīma̍yā 19

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl la̍ āā, “Kɔ̍ mā kɔ̍ pi̍o̍ndū kpɛ̍ɛ̍nɛ̍i̍ pūūlūe̍i̍ wānā chu̍a̍u̍wāā ŋ̄kpɛ̍ɛ̍nɔ̍ɔ̍ o̍ bā. O̍ ko̍ŋ kɔ̍ɔ̍lī, mā chu̍a̍ wāŋ bɛ̄ndūa̍a̍ cho̍ wāŋnda̍ chīla̍ŋ nda̍ ā ti̍ŋ a̍ wāŋ bɛ̄ndūa̍a̍ wānāā sōlīāā lāsa̍lāa̍,

²mī lā kēēku̍ a̍ dīō sāāsā kpɛ̍ɛ̍nɛ̍ŋ pi̍ɔ̍lɛ̍i̍yo̍ mī lā kūɛ̄ o̍ lɛ̄ŋndē dɛ̍ŋgbɛ̍le̍ŋ Hi̍nɔ̄m. O̍ ko̍ŋ kɔ̍ɔ̍lī, ma̍ kɔ̍ yo̍ndā mā dīmi̍ yōōŋgū ya̍ I̍ cho̍ nu̍m kē wo̍ lo̍ŋ nāa̍ wāŋnda̍ chūā.

³Di̍mu̍l nda̍ māā, nya̍ māsāā bɛ̍ndūa̍a̍ Chu̍dā a̍ nya̍ wāŋnda̍ Chūlu̍sɛ̄lɛ̄m chi̍e̍e̍, lā ya̍ŋ ni᷅la̍ŋ mī lā tūēī nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍. Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍, Mɛ̄lɛ̄ka̍ I̍sɔ̄lūɛ̍i̍ya̍ ō dīmi̍ māā, lā ya᷄ŋ ya̍ nīla̍ŋ mī lā tūēī nyɛ̄ ya̍ I̍ cho̍ dīmīo̍o̍ wo̍. Dɛ̍nɛ̍ pa̍lāa̍ ya̍ I̍ cho̍ hūnɔ̄ɔ̄ fo̍ndāa̍ ho̍ō tūsī chōo̍ wo̍ tē wānā o̍ wānā hu᷄ŋ tu̍e̍ī a̍ ndu̍ o̍kɔ̄ɔ̄ pɛ̍, ā chō lɔ̄lūla̍ŋ lɔ̄ɔ̄.

⁴Kāni̍ fu̍u̍le̍, le̍ kɛ̄ɛ̄ wāŋnda̍ o̍ lɛ̄ŋnde̍ŋ nde᷅ŋ ni᷄ŋ a̍ kɛ̍ɛ̍ ya̍ ma̍ tōsā mi̍ fo̍ndāa̍ ho̍ō ō sīmnu᷄ŋ fo̍ndā nɔ̄ɔ̄lɛ̍i̍ a̍ sōōlu̍u̍la̍ che᷅le̍ŋ nda̍ŋ ndo̍. Ma̍ lō o̍ ko̍ŋ, ma̍ mūli̍ŋ sa̍lāla̍ŋ lōmɔ̄ɔ̍ o̍ mɛ̄lɛ̄ka̍a̍ chēle̍ŋnda̍ lo̍, mɛ̄lɛ̄ka̍a̍ nda̍ si̍nā bɛ̍ɛ̍ pa̍a̍ndū le̍ wa̍, ā fi̍nyāā ndāā ma̍māa̍ nda̍ a̍a̍ si̍nā bɛ̍ɛ̍ a̍ nda̍ o̍kɔ̄ɔ̄ le̍ wa̍ kɛ̄lɛ̄ŋgāā le̍ māsāa̍ bɛ̍ndūa̍a̍ Chu̍dā. O̍ ko̍ŋ kɔ̍ɔ̍lī, ma̍ tōsā mi̍ fo̍ndāa̍ ho̍ō ō sīmnu᷄ŋ fo̍ndā dīyāā wānāa̍ tɛ̍ɛ̍mbu̍u̍ i̍sɔ̍ɔ̍ o̍ īsɔ̍ɔ̍ le̍ wa̍.

⁵Ma̍ lō o̍ ko̍ŋ ma̍ tāŋgūl fo̍ndāŋndā lāsōōlu̍u̍la̍ŋ le̍ mɛ̄lɛ̄ka̍ ndāa̍ Bāāl ndu̍yɛ̍ mā kūā chu̍a̍ā ndāa̍ lōmɔ̄ɔ̍ lo̍ŋ māā lāsa̍lā o̍ mɛ̄lɛ̄ka̍ ndā ko̍ŋ ndo̍. Ō cho̍ ya̍ Mɛ̍lɛ̄ka̍ le̍ ve᷅m nda̍ le̍ ī wāā le̍nde̍ to̍sā le̍, kɛ̄lɛ̄ŋgāā le̍, mī tu̍u̍ bɛ̍ɛ̍ i̍ wa̍ā le̍nde̍. Ndu̍yɛ̍ ō cho̍ bɛ̍ɛ̍ su̍ɛ̍i̍ ya̍ Mɛ̍lɛ̄ka̍ de᷄l kɔ̄l le̍ tōsā le̍.

⁶Kɛ̍ ndu̍yɛ̍ mī di̍mu̍l nya̍, ya̍ Mɛ̍lɛ̄ka̍ Ya̍a̍wɛ̄ɛ̄, te̍le̍ŋ cho̍ hūnɔ̄ɔ̄ fūūlūū wāŋnda̍ ve̍e̍lū lɛ̍ ni̍ŋ fo̍ndāa̍ ho̍ō āā, To̍fɛ̍tī le̍, kɛ̄lɛ̄ŋgāā le̍ mā vēēlu̍ ndu̍ āā, Lɛ̄ŋndē Dɛ̍ŋgbɛ̍le̍ŋ Hi̍nɔ̄m. Kɛ̍ ā vēēlū ni̍ŋ fo̍ndāa̍ ho̍ō āā lɛ̄ŋndē Dɛ̍ŋgbɛ̍le̍ nda̍ dīu̍ wāŋndā chīe̍e̍ya̍ dīū bɛ̄ndōo̍ le̍ŋ.

⁷Tūū o̍ tūū wāŋnda̍ Chu̍dā a̍ wāŋnda̍ Chūlu̍sɛ̄lɛ̄m nda̍ a̍a̍ nɔ̍, o̍ fo̍ndāa̍ ho̍ō ya̍ I̍ cho̍ tōsā ni̍ mī tūūlā lāŋ lā tāmbu̍. I̍ cho̍ tōsā mī ya̍a̍mɔ̍ɔ̍wa̍a̍ ndāa̍ ā hu᷄ŋ di̍ū nda̍ a̍ mɔ̄ɔ̄ŋ fāŋndo̍ŋ. Ya̍a̍mɔ̍ɔ̍wa̍a̍ cho̍ nda̍ hūnɔ̄ɔ̄ dēlɔ̄ɔ̄ chōo̍ mā dīu̍ nda̍, ndu̍yɛ̍ mī to̍sa̍ mī yōūwa̍ a̍ vīsīāā yōndūa̍a̍ ā hu᷄ŋ di̍o̍ vīsīŋ nda̍ŋ.

⁸I̍ cho̍ tōsā mī Chūlu̍sɛ̄lɛ̄m o̍ ta̍mbu̍ mī to̍sa̍ mbō sīmnu᷄ŋ nyɛ̍ māmāā o̍ chi̍e̍ēŋndo̍ ni̍ŋ. Wānā o̍ wāna̍ wa᷅ ni̍ŋ hi̍o̍u̍wɔ̄ɔ̍ kɔ̄ndɔ̄fi̍llo̍ chō nda̍ bīyɔ̄ɔ̄ ndu̍yɛ̍ mā hi᷄ŋ bōlle̍, fo̍ndōle̍ a̍ mɛ̄ɛ̍ Chūlu̍sɛ̄lɛ̄m o̍ ta̍mbū ni̍ŋ nde̍.

⁹Ya̍a̍mɔ̍ɔ̍wa̍ chō hūnɔ̄ɔ̄ Chūlu̍sɛ̄lɛ̄m bālɔ̄ɔ̄ mā dɔ̄ū ndu̍ o̍ pi̍ŋndo̍ ni̍ŋ kpɔ̍kɔ̍su̍, wānā lu̍e̍ī le̍ wānā fūlā le̍. Nyɛ̄ o̍ nyɛ̄ dīa̍a̍ cho̍ Chūlu̍sɛ̄lɛ̄m, ō chō hūnɔ̄ɔ̄ chūwɔ̄ɔ̄. Yīa̍a̍ŋ mā wā ni̍ŋ ha̍a̍a̍, wāŋndā chīe̍e̍ya̍ nda̍ pi̍la̍ ā wa̍ ni̍ŋ di̍ūwa᷅ŋndo̍ mā dīāŋna᷅ŋ. Wāŋnda̍ wā ni̍ŋ chu̍a̍a̍ ndāa̍ dīūwo̍ mā dīā?

¹⁰“Tē a̍ chi̍i̍ yōōŋgōo̍ ho̍ō dīmī pɛ̍ kpo̍u̍, kpɛ̍ɛ̍nɛ̍i̍ pūūlūī ŋ̄ chō ke̍ŋ pi̍o̍ndɔ̄ɔ̄ mī ī wa̍ nu̍m o̍ bā ve̍, ā pɛ̄l ndi̍ wānāā nya̍ kūɛ̄ ka̍ŋ nya̍ nda̍ lātūlu̍ wa̍ o̍ hɔ̄l lo̍ŋ ā chē.”

¹¹O̍ ko̍ŋ kɔ̍ɔ̍lī, mā di̍mu̍l nda̍ māā, Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ ō dīmi̍ āā, “Mɛ̄ɛ̍ kpɛ̍ɛ̍nɛ̍i̍ pūūlūe̍i̍ ī pīɔ̍l nu̍a̍ā wānā mi̍ŋgī lɛ̍ ndi̍ bɛ̄ɛ̄ndīāā le̍ yɛ̍, le̍nde̍ ya̍ I̍ cho̍ wāŋndā chīe̍e̍ya̍ o̍ lɛ̄ŋnde̍ŋ nde᷅ŋ ni̍ŋ a̍ chi̍o̍o̍ ho̍ō ni᷄ŋ tɛ̄ɛ̄mbūū ni̍. Wāŋnda̍ chīe̍e̍ya̍ ā wū ni̍ŋ ha̍a̍a̍, o̍ fo̍ndā lāsōōlu̍u̍wo̍ To̍fɛ̍tī bɛ̍ɛ̍, ā wā ni̍ŋ wa᷅ŋnda̍ chɔ̄ɔ̍ lo̍ŋ, kāni̍ fo̍ndō le̍, fo̍ndā o̍ fo̍ndā chēle̍ŋ ō ve᷅m lɛ̍ ni̍ŋ le̍ wāŋnda̍ chɔ̄ le̍.

¹²Nyɛ̄ ya̍ Mɛ̍lɛ̄ka̍ tōsā ni̍ŋ a̍ chi̍o̍o̍ ho̍ō o̍ ko̍ŋ kɔ̍ɔ̍lī, a̍ wāŋnda̍ o̍ chi̍o̍o̍ ho̍ō ni̍ŋ ndo̍, ndu̍ wa᷅ ni̍ŋ ko̍ŋ ni̍. I̍ cho̍ tōsā mī chi̍o̍o̍ ho̍ō ō sīmnu᷄ŋ o̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l mɛ̄ɛ̍ fo̍ndā lāsōōlu̍u̍wo̍ To̍fɛ̍tī o̍ si̍mnu᷄ŋ o̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l lɛ̍.

¹³Chīɛ̄īla̍ŋ Chūlu̍sɛ̄lɛ̄m kpo̍u̍, o̍ ko̍ŋ kɔ̍ɔ̍lī, a̍ chīɛ̄īlā māsāā bɛ̄ndūa̍a̍ Chu̍dā la̍tu̍lu̍, a̍ chīɛ̄ī o̍ chīɛ̄ī wāŋnda̍ hēl le̍cho̍o̍[4] mā lūām nyɛ᷅m chūŋ kɛ̄ndɔ̍ŋ lo̍ŋ o̍ lōo̍ŋ nda̍ sōōlūū māā mɛ̄lɛ̄ka̍a̍ ndā wo̍ŋ ndo̍, o̍ ko̍ŋ kɔ̍ɔ̍lī, mā tālā mu̍ɛ̍īya̍ŋ lo̍ŋ māā lāsa̍lā o̍ mɛ̄lɛ̄ka̍a̍ chēle̍ŋnda̍ lo̍, la̍ŋ kpo̍u̍ lā chō hūnɔ̄ɔ̄ sīmnɔ᷄ŋ la̍ nɔ̍ɔ̍lɛ̍i̍ mɛ̄ɛ̍ fo̍ndāa̍ To̍fɛ̍tī o̍ si̍mnu̍ŋ o̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l lɛ̍.”

¹⁴O̍ ko̍ŋ kɔ̍ɔ̍lī, mi̍ ma̍lnu᷄ŋ mi̍ ku̍ā To̍fɛ̍tī nāa̍ Mɛ̄lɛ̄ka̍ Ya̍a̍wɛ̄ɛ̄ o̍ ve᷅mm ya̍ le̍ kɔ̄la̍ŋ yōōŋgū ndɔ̄ɔ̍ yōndāa̍ wa̍. Mi̍ kɔ̍ si᷅m o̍ la̍u̍ ba̍lu̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ ni̍ŋ mi̍ di̍mūl wāŋnda̍ kpo̍u̍ a̍a̍,

¹⁵“Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍, I̍sɔ̄lūɛ̍i̍ya̍ Mɛ̄lɛ̄ka̍ ndāa̍ ō dīmi̍ āā, ‘Lā ya̍ŋ ya̍ nīla̍ŋ mī lā tūēī nyɛ̄ ya̍ I̍ cho̍ dīmī wo̍. Dɛ̍nɛ̍ pa̍lāā o̍ dɛ̍nɛ̍ pa̍lāā ya̍ I̍ di̍mi̍ le̍ chi̍o̍o̍ ho̍ō a̍ chi̍e̍e̍ŋ pɔ̍mbɔ᷄ŋ ba̍lu̍ ndu̍ wo̍ŋ tūsīo̍o̍ chōo̍ wo̍, ō pīlɛ̍ bɛ̍ɛ̍ ō lo᷅ ni̍ŋ mī kɛ̍ɛ̍ ndu̍ mu̍ŋ tūsī chōo̍ le̍, fo̍ndōle̍, wānāā bōlīī kālāā bɛ̄ndūa̍a̍ nya̍ chō nī, lā cho̍ wa̍nāa̍ tu̍e̍ī ya̍ dīōm te̍.’ ”