Read Southern Kisi Chɛ̄lūīma̍yā 2 Bible Online

Chɛ̄lūīma̍yā 2 - Southern Kisi bible

Chɛ̄lūīma̍yā 2

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ ke᷅ ya̍ yōōŋgōo̍,

²le̍ mī kɔ̍ yo̍ndā ndu̍ nāa̍ wāŋnda̍ Chūlu̍sɛ̄lɛ̄m kpo̍u̍ chu̍a̍. Yōōŋgū o̍ ke̍ ya̍ wo̍ ndu̍ wa̍ ho̍ō ni̍. Mbo̍ dīmī āā, “Wāŋnda̍ I̍sɔ̄lūɛ̄ī, bōōndi̍i̍ ya̍ I̍ hɛ̍li̍ nya̍ sɛ̄nɛ̄īye̍, I̍ si̍nā mɛ̄ɛ̍ kpɛ̍ nya̍ a̍a̍ dɔ̍ū tīīnda᷄ŋ nyāa̍ o̍ ya̍ ni̍ŋ yɛ̍. Kāālā nya̍ a̍a̍ ka̍a̍la̍ ya̍ wo̍, to̍fa̍ wɔ̍ kɔ̍ mɛ̄ɛ̍ wāŋndo̍ ō chūā nu̍a̍ā la̍nɔ̍ɔ̍ sɛ̄nɛ̄ī, mī la̍nɔ̍ ko̍ŋ ō kāāla̍ ndu̍ kāālā bɛ̄ndōo̍ yɛ̍. Le̍ tīīnda᷄ŋ nya̍ a̍a̍ nɔ̍ o̍ ya̍ ni̍ŋ ndo̍, mi̍ lā bīī mi̍ lā tūāl la̍ kɔ̄ɔ̄lī o̍ lɛ̄ŋndē po̍lte̍ŋ bɛ̍ndūle̍ŋ ni᷄ŋ. Lɛ̄ŋndē vēsɛ̍i̍le̍ bɛ̍ndūle̍ŋ, nāa̍ tɔ̄lɔ̄ɔ̄ o̍ tɔ̄lɔ̄ɔ̄ ō vi᷅l bɛ̍ɛ̍ le̍ wa̍, mi̍ lā tūāl la̍ kɔ̄ɔ̄lī lo̍ŋ.

³A̍ te̍le̍ŋ ko̍ŋ, ya̍ Mɛ̍lɛ̄ka̍ Ya̍a̍wɛ̄ɛ̄ ya̍ pīlɛ̍ kpe̍ I̍sɔ̄lūɛ̄ī ndu̍ o̍o̍ ti̍i̍nda̍ŋ ni̍ māā Mɛ̄lɛ̄ka̍ ndɔ̄. I̍sɔ̄lūɛ̄ī, a̍ wa̍ māwāā ya̍ o̍ hɔ̄l to̍fa̍ wɔ̍ ko̍ mɛ̄ɛ̍ tɔ̄lɔ̄ɔ̄ tāse̍ wāŋndo̍ ō kēndī ho̍ō o̍ chīɛ̄ī ndūɛ̍i̍ ni᷄ŋ ndo̍ ō wā nu̍a̍ā mī wāŋndo̍ nɔ̄ yēēmɛ̍i̍ le̍ ndu̍ ta̍u̍ ta̍u̍ yɛ̍. Wānā o̍ wāna̍ tu̍si̍ I̍sɔ̄lūɛ̍i̍ya̍ sāŋgāa̍ chōo̍, nda̍ kpo̍u̍ mi̍ ki̍lūl nda̍ yāmɛ̍i̍, ndu̍yɛ̍ mi̍ ha̍ndū nda̍ nyɛ̄ pālāā bɛ̄ndōo̍ chōo̍. Ya̍ Mɛ̍lɛ̄ka̍ Ya̍a̍wɛ̄ɛ̄ nyɛ̄ ya̍ I̍ di̍mi̍ wo̍ cho̍ ho̍ō ni̍.”

⁴Lā ya᷄ŋ ni᷅la̍ŋ mī lā tūēī nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍, nya̍ wānā o̍ wāna̍ fu̍la̍ o̍ pūlāle̍ Che̍kɔ̍pūle̍ŋ chōo̍. Lā tūe̍i̍ nyɛ᷅ o̍ di̍mi̍ wo̍ nya̍ yu̍ŋgu̍la̍ŋ I̍sɔ̄lūɛ̄ī kpo̍u̍.

⁵Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ cho̍ ho̍ō ni̍. Ō dīmi̍ āā, “Bōōndi̍i̍ fi̍nyāā nyāā ma̍māa̍ ā wa̍ yōōmū ve̍, o̍ pāa̍le̍ŋ ni᷄ŋ bɛ̍ɛ̍ ō pīlɛ̍ ō dīmi̍ nu̍a̍ā māā īwɔ̄ɔ̍ŋ ī wāā nu̍a̍ā le̍ ya̍ Mɛ̍lɛ̄ka̍ tōsa̍l ndu̍ le̍. Kɛ̍ ma̍ bīī ma̍ kɛ̍ɛ̍ ya̍ ma̍ mūli᷄ŋ nyɛ᷅m fo̍ndo̍ŋ sōōlūūwo̍ māā mɛ̄lɛ̄ka̍a̍ nda̍. O̍ ko̍ŋ, nda̍ pi̍la̍ bɛ̍ɛ̍ ma̍ sīmnu᷄ŋ wa̍nāā fo̍ndō fu̍u̍ ya̍ Mɛ̍lɛ̄ka̍ o̍ hɔ̄l.

⁶Ya̍ Mɛ̍lɛ̄ka̍ Ya̍a̍wɛ̄ɛ̄, ya̍ so̍li̍ nda̍ o̍ chɛ̄le̍ŋ ni᷄ŋ I̍chi̍pī ni̍, mi̍ hu᷅ŋ a̍ nda̍. Mɛ̄ɛ̍ ya̍ so̍li̍ nda̍ I̍chi̍pi̍, mi̍ kēēkū a̍ nda̍ o̍ lɛ̄ŋndē po̍lte̍ bɛ̍ndūle̍ŋ ni᷄ŋ. Lɛ̄ŋndē vēsɛ̍i̍le̍ wɔ̍ɔ̍ŋ wɔ̄ɔ̍ŋndē bɛ̄ndūle̍ŋ, nāa̍ wānā se̍e̍lūŋ bɛ̍ɛ̍ le̍mɛ᷅ŋ o̍ lēmɛ̄ŋ te̍ wa̍, nāa̍ wāna̍ chi̍e̍e̍ o̍ che᷅l bɛ̍ɛ̍ le̍ wa̍, kɛ̄lɛ̄ŋgāā mī wāna̍ chi̍e̍e̍ o̍ ke̍e̍ku̍ bɛ̍ɛ̍ le̍ wa̍, lo̍ŋ ya̍ I̍ ke̍e̍ku̍ a̍ nda̍ ni̍, ndu̍yɛ̍ mi̍ lo᷅ nda̍ māndāa̍ ha̍a̍a̍ ma̍ fūūlūū na̍nu᷄ŋ. Kɛ̍ ma̍ hu᷄ŋ pu̍ɛ̍ɛ̍nu᷄ŋ a̍ ya̍ ā nɔ̄la̍ mā lōōnu̍ŋ kɛ̍ndɛ̄i̍ nīi̍ le̍.

⁷Ya̍ so̍li̍ nya̍ o̍ chɛ̄le̍ŋ ni᷄ŋ I̍chi̍pī ni̍ mi̍ hu᷅ŋ a̍ nya̍ o̍ lɛ̄ŋndē kɛ̄ndɛ̄le̍ŋ nde᷅ŋ ni᷄ŋ. Tɔ̄lɔ̄ɔ̄ o̍ tɔ̄lɔ̄ɔ̍ cho̍ lɛ̄ŋnde᷅ŋ a̍ nyɛ̄ o̍ nyɛ̄ kɛ̄ndɛ̍ cho̍ na̍nu᷄ŋ, mi̍ ke᷅ nya̍ kpo̍u̍ le̍ mī lā dē nyɛ̄ o̍ nyɛ̍ cho̍ na̍nu᷄ŋ tɔ̍nɔ̄. Kɛ̍ mi̍ lā bīī mi̍ lā tōsā mi̍ lɛ̄ŋndē nīle̍ŋ kɛ̍ndɛ̄ le̍ŋ lē sīmnu᷄ŋ lɛ᷅ŋndē nɔ̄ɔ̄lɛ̍i̍ ya̍ Mɛ̍lɛ̄ka̍ o̍ hɔ̄l. Lɛ̄ŋndē nīle̍ ya̍ I̍ ke̍ nya̍ le̍ŋ mi̍ lā tɛ̄ɛ̄mbūū le̍ŋ, mi̍ lā tōsā, mi̍ tu᷅l ni᷅ŋ nde̍ŋ yɛ̄le̍ŋ tūl bɛ̄ndōo̍.

⁸Wānāā nīāā so̍līāā lāsa̍lāa̍ kpe̍e̍kpe̍i̍, ā yēēma̍ bɛ̍ɛ̍ mā sīna̍ a̍ ya̍ Mɛ̍lɛ̄ka̍ Ya̍a̍wɛ̄ɛ̄ o̍kɔ̄ɔ̄ le̍. Wānāa̍ pɛ̍ɛ̍kū wa᷅ŋnda̍ sāwāla̍ nīla̍ŋ nda̍, nda̍ bɛ̍ɛ̍ kpe̍e̍kpe̍i̍ hi̍o̍ū ya̍ bɛ̍ɛ̍ si̍mūl. Wānāa̍ cho̍ wāŋnda̍ chīla̍ŋnda̍ kpo̍u̍, ma̍ bīī ma̍ sīmūl la̍. Wānāā nda̍ a̍a̍ su̍a̍ā le̍ ya̍ wa̍ nda̍ kpo̍u̍ ma̍ mūli᷄ŋ ni᷅ŋ sūɛ̍i̍ le̍ Bāāl, o̍ ko̍ŋ kɔ̍ɔ̍lī, mā sōōlūū nyɛ᷅m fo̍ndōŋ chēle̍ŋ māā mɛ̄lɛ̄ka̍a̍ ndā.

⁹Le̍la̍ŋ ya̍ Mɛ̍lɛ̄ka̍ Ya̍a̍wɛ̄ɛ̄, I̍ cho̍ vɛ̄lɛ̄ īsɔ̄ɔ̍ o̍ ka̍lā ka̍lā a̍ nyɛ̄ nya̍ wānāā nīa̍a̍ I̍sɔ̄lūɛ̄ī a̍ to̍sa̍ a̍ ya̍ wo̍ o̍kɔ̄ɔ̄. Ndu̍yɛ̍ nyɛ̄ nya̍ tōsa̍ a̍ ya̍ wo̍, ā yɔ᷄ŋ bɛ̍ɛ̍ mī lā hu᷄ŋ fa̍ŋa᷄ŋ, chūāā nyāa̍ ni̍, a̍ chūāā nyāā ma̍māa̍ mbō kūɛ̄ a̍ ha̍ā lāchī kɛ᷅, I̍ cho̍ wā nda̍ ndu̍ chɔ̄mndo̍ chōo̍.

¹⁰Tē lā yēēma̍ fūlā kɔ̄ɔ̄līo̍o̍ pɛ̍, lā ta᷄ŋ ndɔ̍ o̍ lɛ̄ŋndē Sa̍i̍pūlɔ̄ɔ̄le̍ŋ ni᷄ŋ o̍ pēēla̍ bɛ̄ndūla̍ŋ īkɛ̄i̍ bā pāa̍le̍ŋ lē dēllo̍ mī lā kɔ̍ mɛ̍ɛ̍nda̍ŋ nyɛ᷅ wāŋnda̍ Sa̍i̍pūlɔ̄ɔ̄ a̍ cho̍ tōsāa̍ wo̍. Tē ko̍ŋ te̍ lā vīo̍m ndɔ̍ ŋ̍wa᷅ŋ o̍ lɛ̄ŋndē Kɛ̍dāāle̍ŋ ni᷄ŋ, kūmbū pāa̍le̍ lē chāŋndo̍ mā kɔ̍ mɛ̍ɛ̍nda᷄ŋ nyɛ᷅ kɛ̄ndɛ̄ kɛ̍ndɛ̄ mā chē nyɛ̍ cho̍ yɔ̄nɔ᷄ŋndo̍ lo̍ŋ ndo̍. Tē nya̍ pi̍la̍ chē nyɛ̍ cho̍ yɔ̄nɔ᷄ŋndo̍ o̍ lɛ̄ŋnde̍ he̍ī ni᷄ŋ ndo̍ pɛ̍, lā chō dīmī māā kāni̍ bɛ̍ɛ̍ ī wāā le̍nde̍ i̍ yɔ̍nu̍ŋ ndɔ̍ le̍.

¹¹Mi̍ chē bɛ̍ɛ̍, lɛ̄ŋīi̍ kɛ̍ɛ̍ ya̍ ve̍ nyɛ̄m nda̍ chō sōōlūūwo̍ māā mɛ̄lɛ̄ka̍a̍ ndā wo̍ŋ ŋ̄ cho̍ mɛ̍lɛ̄ka̍a̍ kpe̍e̍kpe̍i̍ le̍ ni̍, kɛ̍ kāni̍ bɛ̍ɛ̍ lɛ̄ŋīī kēŋ lē pīlɛ̍ bɛ̍ɛ̍ lē kɛ̄ɛ̍ wɔ̍ nyɛ᷅m ndāŋ mu̍ŋ mī lē mūli̍ŋ mɛ̍lɛ̄ka̍ chēle̍ŋ sōōlūū le̍. Ya̍ Mɛ̍lɛ̄ka̍ ya̍ cho̍ Mɛ̄lɛ̄ka̍ nyāa̍ ni̍, Mɛ̄lɛ̄ka̍ to̍sa̍ mi̍ nya̍ I̍sɔ̄lūɛ̍i̍ya̍ ā sɔ̄lā bɛ̄ɛ̄le̍ bɛ̍ndūle̍ŋ o̍ chi̍e̍ēŋndo̍ ni᷄ŋ ndo̍. Kɛ̍ mi̍ lā bīī mi̍ lā kɛ̄ɛ̄ ya̍, mi̍ lā mūli̍ŋ nyɛ᷅m fo̍ndō fo̍ndo̍ŋ sōōlūūwo̍ māā mɛ̄lɛ̄ka̍a̍ nyā.

¹²Nyɛ̄ o̍ nyɛ̍ cho̍ o̍ ha̍la̍a̍ ni̍ŋ cho̍o̍ cho̍o̍, I̍ cho̍ tōsā mī sīōōŋnde̍ bīī mu̍ŋ, mī ŋ̄ nyīīya̍ kpa᷅kpā, a̍ nyɛ̍ yɔ̍nūŋ ndo̍, kɔ̄ndɔ̄fi̍llo̍ chō mu̍ŋ bīyɔ̄ɔ̄ ŋ̄ nɔ̍lā ni̍ŋ mī sōō ba̍kō le̍.

¹³Nya̍ wānāā nīa̍a̍ I̍sɔ̄lūɛ̄ī la̍ tōsa̍ yɔ̄ŋndā wɔ̄ɔ̍ŋnda̍ŋ lā tīɔ̍ɔ̍ŋ a̍ ya̍. Ō tāso̍o̍, ya̍ Mɛ̍lɛ̄ka̍ ya̍ cho̍ wāna̍ yɔ̄ŋgū mɛ᷅ŋma̍ ke᷅ wa̍nā yo̍o̍mū kpe̍e̍kpe̍i̍yo̍ wa̍ŋ ni̍, kɛ̍ mi̍ lā bīī mi̍ lā kɛ̄ɛ̄ ya̍. Mɛ̄ɛ̍ nya̍ kɛ̄ɛ̍ ya̍, mi̍ lā mūli᷄ŋ nyɛ᷅m fo̍ndō fo̍ndo᷄ŋ sōōlūūwo̍ māā mɛ̄lɛ̄ka̍a̍ nya̍. Tē ō wa̍ māā īsɔ̄ɔ̍ pɛ̍, lā kɛ̄ɛ̍ mākɛ̄yāā mɛ̄ŋmā kɛ̄ndɛ̄ kɛ̍ndīa̍ŋ mi̍ lā kūā mɛ̄ŋnda̍ŋ fɛ̄ɛ̄līa̍a̍ o̍ so̍o̍ŋnda̍ māmɛ̄ŋmndā wɔ̄ɔ̍ŋnda̍ŋ ni᷄ŋ.

¹⁴Wāŋnda̍ I̍sɔ̄lūɛ̄ī, lā tōfa̍ wɔ̍ nyɛ̍ yɔ̍nu̍ŋ a̍ nya̍ wo̍. Lā cho̍ la̍chɛ᷅ māā lā nɔ̍ ti̍i̍nda᷄ŋ o̍ tīīnda᷄ŋ te̍ le̍. Lā cho̍ mɛ̄ɛ̍ wāŋnda̍ ā vīālūŋ nu̍a̍ā o̍ chɛ̄le̍ŋ ni᷄ŋ mā wa̍ ā nɔ᷅ wa̍nā o̍ wāna̍ ma̍la̍ nda̍ yɛ̍ le̍ le̍.

¹⁵Kɛ̍ mi̍ ya̍a̍mɔ̍ɔ̍wa̍ hūŋ ma̍ hu᷄ŋ de᷅l nya̍ chōo̍ ma̍ tɛ̄ɛ̄mbūū lɛ̄ŋndē nyāle̍ŋ kpo̍u̍. Wānā a̍a̍ tu̍e̍ī ya̍a̍mɔ̍ɔ̍wa̍ hūnɔ̄ɔ̍ le̍ nya̍ dēlɔ̄ɔ̍ chōo̍ pɛ̍, to̍fa̍ wɔ̍ ko̍ mɛ̄ɛ̍ kpɔ̍kūŋnda̍ ā wā nu̍a̍ā hūnɔ̄ɔ̍ a̍ īhɛ̄ū hɛ̄ūve̍ le̍ vīsīo̍o̍ dēlɔ̄ɔ̍ chōo̍ yɛ̍. Chi̍e̍e̍ŋ nya̍ŋ kpo̍u̍ ma̍ pēsī pēsī mu̍ŋ ma̍ tōsā mi̍ ŋ̄ sīmnu᷄ŋ pɔ᷅mnda̍ŋ.

¹⁶Mi̍ pūa̍a̍ chɔ̄ūwa̍ o̍ lɛ̄ŋndē I̍chi̍pīle̍ŋ ni᷄ŋ hu᷄ŋ de᷅l lɛ̄ŋndē nyāle̍ŋ chōo̍ ma̍ tɛ̄ɛ̄mbūū le̍ŋ kpo̍u̍, nda̍ yɔ̍nūŋ ni̍ māā pūa̍a̍ Mɛ̍mfi̍sī chi̍e̍e̍ a̍ ha̍ā Tāpāni̍hɛ̍sī chi̍e̍e̍ O̍ ko̍ŋ, ma̍ tōsā mi̍ bɛ̄ɛ̄le̍ I̍sɔ̄lūɛ̍i̍ya̍ nda̍ a̍a̍ nɔ̍ le̍ŋ lē chūū.

¹⁷Mī di̍mu̍l nya̍ wāŋnda̍ I̍sɔ̄lūɛ̄ī, dɛ̍nɛ̍ pa̍lāā o̍ dɛ̍nɛ̍ pa̍lāa̍ ko̍ma̍l nya̍, nya̍ pi̍la̍ ve̍e̍lu̍ŋ ndu̍ chōo̍ ni̍. Ya̍ Mɛ̍lɛ̄ka̍ Ya̍a̍wɛ̄ɛ̄, ya̍ cho̍ Mɛ̄lɛ̄ka̍ nyāa̍ ni̍. Kɛ̍ mi̍ lā lō o̍ ko̍ŋ mi̍ lā kɛ̄ɛ̄ ya̍ mi̍ lā fāŋa᷄ŋ o̍ nɛ̄i̍ nūu̍ chōo̍ nɛ̄i̍ ya̍ I̍ chɔ̍m nya̍ le̍ wāa̍ lēcho̍ō wo̍.

¹⁸Wāŋnda̍ I̍sɔ̄lūɛ̄ī, tē ā hu᷄ŋ kɔ᷅ a̍ nya̍ o̍ lɛ̄ŋndē I̍chi̍pīle̍ŋ ni᷄ŋ pɛ̍, tɔ̄nɔ̍ yɛ̄ɛ̍nɛ̍ nya̍ chō yɛ̄ lākɔ̄ sɔ̄lā lo̍ŋ? Ō fūla̍ o̍ mɛ̄ŋmā nya̍ wā ni̍ŋ kɔ̍ndɔ̄ɔ̍ o̍ Pīo̍o̍ Na̍īl mī lā kōl la̍ŋ kɔ̄ɔ̄lī, lā nɔ᷅ ni̍ŋ tɔ̍nɔ̄ o̍ tɔ̄nɔ̄ che᷅le̍ŋ lo̍ŋ te̍. Tɔ̄nɔ̍ yɛ̄ɛ̍nɛ̍ nya̍ chō yɛ̄ lākɔ̄ sɔ̄lā o̍ lɛ̄ŋndē Āsi̍i̍līāāle̍ŋ ni᷄ŋ tē ā hu᷄ŋ kɔ᷅ a̍ nya̍ lo̍ŋ pɛ̍? Tɔ̄nɔ̍ nya̍ sɔ̄lā ni̍ŋ lo̍ŋ ndo̍ mɛ̄ɛ̍ le̍ mɛ̄ŋmā kōlāāmā nya̍ wā ni̍ŋ kɔ̍ndɔ̄ɔ̍ o̍ Pīo̍o̍ Yūfi̍lu̍a̍tīī mī lā kōl la̍ŋ.

¹⁹Yɔ̄ŋndā nyāla̍ wɔ̍ɔ̍ŋnda̍ŋ la̍ŋ la̍ cho̍ nya̍ hūnɔ̄ɔ̄ nyɛ̄ pālāā bɛ̄ndōo̍ tūsī chōo̍ ni̍. Lā bīī mi̍ lā kɛ̄ɛ̄ ya̍ kɛ̍ nya̍ pi̍la̍ chō hūnɔ̄ɔ̄ īchāli̍, mī kɔ̄ltā nyāla̍ŋ lā kīlu̍l nya̍ yāmɛ̍i̍ le̍ nyɛ̄ nya̍ tōsa̍ wo̍. Lā chō hūnɔ̄ɔ̄ sīnā māā ī chō sūɛ̍i̍ wɔ̍ɔ̍ŋ wɔ̍ɔ̍ŋ bɛ̄ndū, ndu̍yɛ̍ mi̍ ī wā sūɛ̍i̍ tɛ̍ɛ̍mbu̍u̍ ya̍ Mɛ̍lɛ̄ka̍ kɔ̄l le̍ ya̍ Mɛ̍lɛ̄ka̍ Ya̍a̍wɛ̄ɛ̄, ya̍ Mɛ̍lɛ̄ka̍ nyāa̍ kīɔ̍ɔ̍ lā nɔ᷅ i̍si̍o̍ōŋ o̍ īsīōōŋ le̍ dɛ̍nɛ̍ pa̍lāā le̍. Ya̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ nɔ̍ kpāāyāa̍ kpo̍u̍ wo̍, ya̍ so̍ō ni̍ mɛ̄ɛ̍ mī ī yɔ̄nu̍ŋ mɛ̄ɛ̍ ya̍ I̍ di̍mi̍ yɛ̍.”

²⁰Mi̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ dīmī āā, “Ō cho̍ ha̍ū le̍ nya̍ I̍sɔ̄lūɛ̍i̍ya̍ kɛ̄ɛ̍ ya̍ le̍, sīndɛ̄ pa̍ nya̍ kɛ̄ɛ̍ ya̍ ni̍, māā ya̍ I̍ nɔ᷅ nya̍ kpāāyā cho̍o̍ le̍. Sīndɛ̄ pa̍ nya̍ sōli̍ ya̍ dīōm ni̍, mi̍ lā kɛ̄ɛ̄ ya̍ le̍ mɛ̄lɛ̄ka̍a̍ chēle̍ŋnda̍. Mi̍ lā bīī mi̍ lā tīū fo̍ndāŋndā lāsōōlu̍u̍ la̍ŋ o̍ pēmbo᷄ŋ chōo̍, a̍ o̍ yɔ̄mīī pūīyɛ̄i̍ bɛ̄ŋgu̍ kpo̍u̍, mī lā kēī nyɛ᷅m chēle̍ŋndo̍ sōōlūūwo̍ lo̍ŋ māā mɛ̄lɛ̄ka̍a̍ nyā.

²¹Tē ō wa̍ māā yɔ̄ŋɔ̄ɔ̄ pɛ̍, mɛ̄ɛ̍ wāŋndo̍ ō hɛ̄lī nu̍a̍ā yɔ̄mīī mākīle̍pīi̍ kɛ̍ndɛ̄ kɛ̍ndɛ̄i̍ mbō tɔ̄l ndi̍, mbō nɔ̄ tīīnda᷄ŋndo̍ o̍ ndi̍ ni̍ŋ māā ō chō kɔ̄mndē kɛ̄ndɛ̄ kɛ̍ndɛ̄le̍ŋ sɔ̄lā o̍ ndi̍ ni̍ŋ yɛ̍ le̍nde̍ ya̍ i̍i̍ hɛ̍li̍ nya̍ ni̍, mi̍ nɔ᷅ tīīnda᷄ŋndo̍ o̍ nya̍ ni᷄ŋ. Kɛ̍ mi̍ lā bīī mi̍ lā hūī ya̍, mi̍ lā sīmnu᷄ŋ mɛ̄ɛ̍ yɔ̄mīī mākīle̍pīi̍ye̍ ī tāmbū nu̍a̍ā mī ī sīmnu᷄ŋ yɔ̍mīī yōndūēī fo̍ndō fo̍ndūe̍i̍ ī nɔ᷅ ko̍mɔ̄ɔ̄ kɛ̄ndɛ̄ le̍ yɛ̍.

²²Wāŋnda̍ I̍sɔ̄lūɛ̄ī, yɔ̄ŋndā nyāla̍ wɔ̍ɔ̍ŋnda̍ŋ lā tōsa̍ mi̍ lā sīmnu᷄ŋ a̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l. Ndu̍yɛ̍ nɔ̄ɔ̄līāā yɔ̄ŋndā nyāla̍ wɔ̍ɔ̍ŋnda̍ŋ lā nɔ̄ɔ̄li̍a̍a̍ nya̍ ya̍ o̍ hɔ̄l lo̍, sɛ̍ɛ̍ o̍ sɛ̍ɛ̍ cho̍ mī lā dīndi̍ nya̍ pi̍la̍ a̍ ndu̍, mbō tōsa̍ mī lā sīmnu᷄ŋ a̍ di̍a̍ndāā ya̍ Mɛ̍lɛ̄ka̍ o̍ hɔ̄l te̍.

²³Kɛ̍ a̍ ko̍ŋ kpo̍u̍, mi̍ lā wā chɔ̄mndo̍ māā lā cho̍ a̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l te̍, māā kāni̍ bɛ̍ɛ̍ lā kɛ̄ɛ̍ ya̍ mī lā mūli̍ŋ mɛ̍lɛ̄ka̍a̍ nda̍ vēēlū āā Bāāl wa̍ sōōlūū le̍. Lā lōōnu̍ŋ ndɔ̍ ke̍lālā nyāla̍ŋ, bōōndi̍i̍ nya̍ wa̍ o̍ lɛ̄ŋndē dɛ̍ŋgbɛ̍le̍ŋ o̍ pēmbo᷄ŋ tɛ̄ɛ̄ŋ nde̍. Lā lōōnu̍ŋ ndɔ̍ sɔ̍ɔ̍ŋ wɔ̄ɔ̍ŋ nya̍ tōsa̍ lo̍ŋ ndo̍ŋ. Wāŋnda̍ I̍sɔ̄lūɛ̄ī, yēēmɛ̍i̍ nya̍ nɔ̄ le̍ yɔ̄ŋ wɔ̄ɔ̍ŋndo̍ ve̍, ī chō ī bɔ̄ɔ̍. Mɛ̄ɛ̍ nyɔ̍mi̍ la̍a̍ndōo̍ ō yēēmā nu̍a̍ā hēlɔ̄ɔ̍, mbō wa̍ īlām lāmnde̍ nyɔ̍mi̍ pi̍a̍a̍ndōo̍ kɔ̄ɔ̄lī yɛ̍, le̍nde̍ yēēmɛ̍i̍ chō nya̍ le̍ yɔ̄ŋ wɔ̄ɔ̍ŋndo̍ tōsāa̍ ni̍.

²⁴Yēēmɛ̍i̍ yɔ̄ŋ wɔ̄ɔ̍ŋ cho̍ nya̍ ni᷄ŋ nde̍ wānā o̍ wānā nɔ̍lā mbō kpāa̍ ndi̍ le̍. Mɛ̄ɛ̍ sōfɛ̍lɛ̍ yōndō lāāndōo̍ ō yēēmā nu̍a̍ā hēlɔ̄ɔ̍ yēēmā bɛ̄ndōo̍ mbō wa̍ mi᷄ŋndo̍ kēēlāa̍ o̍ hūēīye̍ ni᷄ŋ le̍ sōfɛ̍lɛ̍ pi̍a̍a̍ndōo̍ chūŋndo̍ tūēīyɔ̄ɔ̍ mbō kūɛ̄ lo̍ŋ yɛ̍ le̍nde̍ nya̍ chō ni̍. Sōfɛ̍lɛ̍ la̍a̍ndōo̍ tē yēēmɛ̍i̍ he̍lɛ̄i̍ ī bīī ndu̍ pɛ̍ te̍i̍, sōfɛ̍li̍a̍a̍ pi̍a̍a̍ndūāā nda̍ a̍a̍ ba̍lū ndu̍ pāāndū kɔ̄ɔ̄lī wa̍ kpo̍u̍, ā lō ni᷅ŋ ā chālna᷄ŋ mbo̍ kōma̍l nda̍ le̍ hēlɔ̄ɔ̍. Tē ō wa̍ māā yɔ̄ŋɔ̄ɔ̄ pɛ̍, nu̍a̍ā ko̍ nya̍ wāŋnda̍ I̍sɔ̄lūɛ̄ī nya̍ nɔ̄ yēēmɛ̍i̍ le̍ yɔ̄ŋ wɔ̄ɔ̍ŋndo̍ tōsāa̍ ni̍.

²⁵Kɔ̄vɛ̄i̍la̍ŋ kpo̍u̍ lā chūū ni᷅ŋ nya̍ sīɔ̄ŋ o̍ ŋ̄pēlū a̍ bālɔ̄ɔ̍ o̍ fo̍ndāŋndā yɛ̍ yɛ̍la̍ŋ mɛ̄lɛ̄ka̍a̍ chēle̍ŋ nda̍ kɔ̄ɔ̄lī. Tē lā bālu̍ pɛ̍ te̍i̍ bo̍lōla̍ŋ lā vēsa̍ nya̍ sɛ̍ɛ̍ŋ le̍ mɛ̄ŋmā lēpɛ̄ŋnda̍ŋ. Mi̍ he᷅l nya̍ o̍ kɔ̄ɔ̄ fe̍e̍ le̍ mī lā pɛ̄ŋgi̍ mɛ̄lɛ̄ka̍a̍ chēle̍ŋnda̍ sōōlūūwo̍, mī lā mīīŋgu̍ ya̍ o̍ ībūŋ. Kɛ̍ mi̍ lā dīmūl la̍ a̍a̍, ‘Sāko̍, mɛ̄lɛ̄ka̍a̍ chēle̍ŋnda̍ na̍a̍ ŋ̄ kāāla̍ ni̍, nda̍ na̍a̍ ŋ̄ tūāl kɔ̍ɔ̍lī ni̍.’ ”

²⁶Wāŋnda̍ I̍sɔ̄lūɛ̄ī, si̍ɔ̍mbu̍la̍ bɛ̄ndūla̍ŋ lā chō nya̍ hūnɔ̄ɔ̄ bīyɔ̄ɔ̄, nya̍ ni̍, a̍ māsāa̍ nyāā bɛ̍ndūa̍a̍ lātūlu̍ o̍ ko̍ŋ kɔ̍ɔ̍lī, a̍ wānāā nyāā bɛ̍ndūa̍a̍, a̍ wānāā nyāā so̍līāā lāsa̍lāa̍, ndu̍yɛ̍ a̍ wānāā nyāa̍ su̍a̍ā le̍ ya̍ Mɛ̍lɛ̄ka̍ wa̍. Ī yɔ̄nūŋ ni̍ŋ ko̍ a̍ nya̍ mɛ̄ɛ̍ nda̍ bīī nu̍a̍ā wāŋndo̍ o̍ vīīle̍ŋ mī si̍ɔ̍mbu̍la̍ bɛ̄ndūla̍ŋ lā bīī ndu̍ yɛ̍.

²⁷Lā bīī mi̍ lā kɛ̄ɛ̄ ya̍ mi̍ lā mūli᷄ŋ nyɛ᷅m chēle̍ŋndo̍ŋ sōōlūūwo̍ māā mɛ̄lɛ̄ka̍a̍ nyā. Lā bīī pɛ̍, lā dīmu̍l yɔ̄m fo̍ndō fo̍ndōo̍ māā, nu̍m cho̍ fi̍nyā nāa̍ ni̍, o̍ ko̍ŋ kɔ̍ɔ̍lī, mī lā dīmūl po̍ū fo̍ndōo̍ māā, nu᷄m cho̍ kāla̍ nāa̍ ni̍. Kɛ̍ ndu̍yɛ̍, tē dɛ̍nɛ̍ pa̍lāa̍ kōma̍l nya̍ pɛ̍, lā nyūna̍ ya̍ le̍ mī hi᷅ŋ mī hu̍ŋ ma̍lā nya̍.

²⁸“Tē dɛ̍nɛ̍ pa̍lāa̍ kōma̍l nya̍ pɛ̍, vɛ᷅ ni̍ko̍ lā nyu̍nā mɛ̍lɛ̄ka̍a̍ nyāa̍ nya̍ pi̍la̍ tōōsi̍a̍a̍ wa̍ mā māla̍ nya̍ le̍? Nda̍ nya̍ a̍a̍ ve̍e̍lū ni̍ mī nda̍ a̍a̍ ma̍la̍ nya̍ tē ā nɔ̄lā pɛ̍. Lā nɔ̄ mɛ̄lɛ̄ka̍a̍ yɛ̍ yi̍a̍a̍ nya̍ pīɛ̄ī ya̍ ta̍u̍. Chi̍e̍e̍ o̍ chi̍e̍e̍ cho̍ o̍ lɛ̄ŋndē Chu̍dāle̍ŋ ni᷄ŋ chi̍e̍e̍ bɛ̍ndū ni̍, chi̍e̍e̍ pɔ̍mbɔ̄ ni̍, lā nɔ̄ mɛ̄lɛ̄ka̍a̍ nyāa̍ ā tīūwāā lo̍ŋ kpo̍u̍, nda̍ nya̍ a̍a̍ nyu̍nā le̍ nya̍ mālāa̍ ni̍.

²⁹Ɔ̍ɔ̄ le̍ sa̍bū nya̍ chō ŋɔ̄ɔ̄chīa̍ŋndo̍ a̍ ya̍ māā I̍ kɛ̍ɛ̍ nya̍ wo̍? I̍ chi̍ sa̍bū o̍ sa̍bū nya̍ ŋɔ̄ɔ̄chīāŋ a̍ ya̍ wo̍ le̍. Kāni̍ fo̍ndōle̍, nya̍ wāŋnda̍ I̍sɔ̄lūɛ̄ī, nya̍ bi̍ī ni̍, mi̍ lā sīmūl la̍ mɛ̄ɛ̍ nya̍ chō kpo̍u̍.

³⁰Mi̍ lo᷅ o̍ ko̍ŋ, mi̍ tu̍sī wānāā nyāa̍ ā ti᷄ŋ dɛ̍nɛ̍ pa̍lāa̍ chōo̍, le̍ hāli̍ kpe̍ŋ mī lā mīīŋgu̍ ya̍ o̍ ībūŋ. Kɛ̍ lā chɛ᷄l mī lā mīīŋgu̍ ya̍ o̍ ībūŋ te̍. Mi̍ lā bīī mi̍ lā dēl wānāā nyāa̍ su̍a̍ā le̍ ya̍ wa̍ chōo̍ a̍ mɔ̄ɔ̄ŋ fāŋndo̍ŋ mɛ̄ɛ̍ kpɔ̍kūŋndo̍ ō dēl nu̍a̍ā vīsīo̍o̍ chōo̍ yɛ̍ mi̍ lā dīū nda̍ kpo̍u̍.

³¹Le̍la̍ŋ lā ya᷄ŋ ni᷅la̍ŋ nya̍ wāŋnda̍ I̍sɔ̄lūɛ̄ī, mī lā tūēī nyɛ̄ ya̍ Mɛ̍lɛ̄ka̍ Ya̍a̍wɛ̄ɛ̄ cho̍ dīmīo̍o̍ wo̍. Wāŋnda̍ I̍sɔ̄lūɛ̄ī, lā chɔ᷄m ndɔ̍ ya̍ sūɛ̍i̍ wɔ̍ɔ̍ŋ kpe̍e̍kpe̍i̍ ya̍ I̍ to̍sa̍l nya̍ ve̍. I̍ me̍l lɛ̍ nya̍ mī lā wa̍ mɛ̄ɛ̍ wāŋndo̍ ō wā nu̍a̍ā bālɔ̄ɔ̍ o̍ lɛ̄ŋndē po̍lte̍ bɛ̍ndūle̍ŋ ni᷄ŋ ō nɔ᷅ wa̍nā o̍ wānā ma̍lāā le̍ yɛ̍ le̍. I̍ tu̍si̍ yɛ̍ lɛ̄ŋndē nyāle̍ nyɛ᷅ pālāā chōo̍, mī lɛ̄ŋndē nyāle̍ wa̍ o̍ nyɛ̄ pālāā bɛ̄ndū ni᷄ŋ te̍. Le̍ sa̍bū yɛ̄ɛ̍nɛ̍ nya̍ dīmi̍ yɛ̄ ni᷅ŋ māā, mbɔ̄ ŋ̄ bāŋa̍ŋ, nyɛ̄ na̍a̍ ŋ̄ yēēmā ni᷅ŋ le̍ tōsāa̍ wo̍ na̍a̍ ŋ̄ tōsā ni᷅ŋ ni̍, ŋ̄ mi̍i̍ŋgū lɛ̍ nu̍m o̍ bā bɛ̄ŋgu̍ le̍?

³²Mɛ̄ɛ̍ o̍ mɛ̄ɛ̍ wānā la̍nɔ̍ cho̍ cha᷄lle̍ o̍ nɔ̄ɔ̍ ni᷄ŋ ndo̍ ō o̍ pu̍ɛ̍ɛ̄ŋ le̍ yɔ̄lɔ᷄ŋ, a̍ kēla᷄ŋ o̍ nɔ̍ le̍ wōo̍ŋndo̍ wo̍ŋ wōo̍ŋ te̍. Mɛ̄ɛ̍ o̍ mɛ̄ɛ̍ o̍ pu̍ɛ̍ɛ̍ŋ, ō pūɛ̍ɛ̍ŋ le̍ nyɛ̄lā o̍ nɔ̍ le̍ wōo̍ŋndo̍ le̍ cha᷄lle̍ o̍ nɔ̄ɔ̍ ni᷄ŋ nda᷄ŋ wōo̍ŋ te̍. Kɛ̍ nya̍ wāŋnda̍ I̍sɔ̄lūɛ̄ī, ō cho̍ ha̍ū le̍ nya̍ pūɛ̄ɛ̄ŋ a̍ ya̍ le̍, sīndɛ̄ pa̍ nya̍ pu̍ɛ̍ɛ̍ŋ a̍ ya̍ ni̍.

³³Ndu̍yɛ̍ mi̍ lā nɔ̄ tāāsi̍ kōŋ mɛ̄ɛ̍ nya̍ lōōkū wa᷅ŋnda̍ chɔ̄m māā lā kāāla̍ ndu̍ yɛ̍. Wāŋ lāāndūa̍a̍ cho̍ bɛ̍ɛ̍ wa᷅ŋ lāāndūāā tīāmāā bɛ̄ndūa̍a̍ wa̍, ā nɔ̄lā mā pɛ̄ɛ̄ku̍ nya̍ o̍ bā bɛ̄ŋgu̍.

³⁴Wānāa̍ tɛ̍ɛ̍mbūū i̍sɔ̍ɔ̍ o̍ īsɔ̄ɔ̍ le̍ wa̍, mi̍ lā wā nda̍ dīūwo̍ o̍ fo̍ndō fu̍u̍wo̍ chōo̍. Kōo̍ma̍ wānāā kāŋ wāŋnda̍ chɔ̄ɔ̍ ma̍ŋ mā tīūwāā o̍ nyɛ̄lā nyāla̍ŋ kpo̍u̍. Kɛ̍ a̍ ko̍ŋ kpo̍u̍,

³⁵“Mī lā dīmī māā, ŋ̄ tɛ̄ɛ̄mbu̍u̍ i̍sɔ̍ɔ̍ o̍ īsɔ̄ɔ̍ le̍. Mɛ̄lɛ̄ka̍ Ya̍a̍wɛ̄ɛ̄ o̍ do̍u̍nu̍ŋ tu̍mbe̍ a̍ na̍a̍ le̍. Kɛ̍ le̍ nyɛ̄ nya̍ chō ko̍ŋ di̍mīo̍o̍ wo̍ kpe̍e̍kpe̍i̍ ya̍ Mɛ̍lɛ̄ka̍ Ya̍a̍wɛ̄ɛ̄ ya̍ I̍ cho̍ nya̍ nyɛ̄ pālāā bɛ̄ndōo̍ tūsī chōo̍ ni̍.

³⁶Lā bīī mi̍ lā wā bālɔ̄ɔ̍ lɛ̄ŋnde̍ tɛ̄ɛ̄ŋ le̍ mālāa̍, lā ma᷄l pɛ̍ ba̍ā lā hi̍o̍ū ba̍ā kɛ̍ ndu̍yɛ̍ te̍le̍ŋ ko̍ŋ chō fūūlūū. Te̍le̍ŋ cho̍ fūūlūū, wāŋnda̍ I̍chi̍pī a̍ cho̍ nya̍ hūnɔ̄ɔ̄ kɔ̄l tɛ̄ɛ̄mbūū mɛ̄ɛ̍ wāŋnda̍ Āsi̍i̍līāā a̍ tɛ̍ɛ̍mbu̍u̍ nya̍ kɔ̄l lɛ̍.

³⁷Lā chō lɛ̄ŋndē nyāle̍ŋ hūnɔ̄ɔ̄ mālɔ̄ɔ̄ a̍ bāla̍ŋ o̍ lēbōl mī lā kūɛ̄ o̍ chɛ̄le̍ŋ ni᷄ŋ. Wānāā nya̍ tīīnda̍ŋ le̍ nya̍ mālāa̍ wa̍, ya̍ Mɛ̍lɛ̄ka̍ Ya̍a̍wɛ̄ɛ̄ I̍ chi̍i̍ nda̍ ni᷅ŋ kɛ̄ɛ̄. Lā cho̍ hūnɔ̄ɔ̄ mālā o̍ mālā sɔ̄lā lɛ̄ŋīī kēŋ o̍ bā le̍.”