Read Southern Kisi Chɛ̄lūīma̍yā 20 Bible Online

Chɛ̄lūīma̍yā 20 - Southern Kisi bible

Chɛ̄lūīma̍yā 20

¹Po̍ pi᷅lɛ̍ wa̍ dīōla̍ŋ āā Pa̍a̍sīɔ̄ɔ̄, fi̍nyā ndɔ̍ dīōla̍ŋ āā I̍māā. Wāna̍ so̍lī sa̍lāa̍ o̍ Mɛ̄lɛ̄ka̍ lo̍ wo̍ Pa̍a̍sīɔ̄ɔ̄ ko̍ŋ ō wa̍ ni̍, ndu̍yɛ̍ ndu̍ wa̍ vɛ̄lɛ̄ wānāā nda̍ a̍a̍ to̍sā wa̍llo̍ o̍ chīɛ̍i̍ Mɛ̄lɛ̄ka̍a̍ wa̍ bōlle̍ŋ ni̍. Mɛ̄ɛ̍ Pa̍si̍ɔ̍ɔ̄ kōŋ ō tūēī yōōŋgūlā ya̍ Chɛ̄lūīma̍yā wa̍ dīmīo̍o̍ la̍ŋ,

²mbo̍ tōsā ma̍ bīī ya̍ Chɛ̄lūīma̍yā ma̍ lūāā ya̍ lɔ̄ɔ̍ pīla̍, ndu̍yɛ̍ mbo̍ tōsā ma̍ dūāū ya̍ o̍ kpɛ̍ɛ̍ yɔ̄mndo̍ o̍ dīō sāāsā chīɛ̍i̍ Mɛ̄lɛ̄ka̍a̍ īkɛ̄i̍, ō nda̍ a̍a̍ ve̍e̍lū āā Dīo̍o̍ Bɛ̍ŋnja̍mīŋ ho̍ō mālūāŋ ndo̍.

³Mɛ̄ɛ̍ pāa̍le̍ŋ lē sɛ̄ dīi̍mā ndɔ̄ɔ̍, mi̍ Pa̍si̍ɔ̍ɔ̄ o̍ to̍sa̍ ma̍ māl la̍. Mi̍ lo᷅ o̍ ko̍ŋ mi̍ dīmūl ndu̍ āā, “Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ māā dīōlā nūmnda̍ cho̍ lɛ̍ āā Pa̍si̍ɔ̍ɔ̄ le̍. Kɛ̍ chɔ̍ŋ a̍ hāū dīōlā nūmnda̍ŋ ni᷅ŋ āā, ‘Wāna̍ sīōōŋīī bɛ̄ndōo̍ bā o̍ bā fe̍e̍.’ ”

⁴Kāni̍ fo̍ndōle̍, Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “I̍ cho̍ tōsā mā sīmnu᷄ŋ wa᷅na̍ sīōōŋīī bɛ̄ndūe̍i̍ ī bīī yo̍, ndu̍yɛ̍ mī to̍sa̍ mā sīmnu᷄ŋ wa᷅na̍ to̍sā mī sīōōŋīī bɛ̄ndūe̍i̍ ī bīī chāāŋāā nūmnda̍ wo̍. Ya̍a̍mɔ̍ɔ̍wa̍ chō hūnɔ̄ɔ̄ chāāŋāā nūmnda̍ dīū kpo̍u̍ a̍ mɔ̄ɔ̄ŋ fāŋndo̍ŋ. Ndu̍yɛ̍ nu̍m o̍ hɔ̄l kpe̍e̍kpe̍i̍ nda̍ dīū ni̍ŋ nda̍ ni̍ mā chē. I̍ cho̍ hūnɔ̄ɔ̄ lɛ̄ŋndē Chu̍dāle̍ŋ kpo̍u̍ ma̍lɔ̄ɔ̄ māsāa̍ Ba̍bi̍lɔ̄ŋ o̍ bā. Ō bīī ni̍ŋ wa᷅ŋnda̍ mbō dīu̍ ā ti᷄ŋ ndu̍yɛ̍ mbō kūɛ̄ a̍ ā ti᷄ŋ o̍ bīyɔ̄ɔ̍ ni̍ŋ Ba̍bi̍lɔ̄ŋ.

⁵Sūl o̍ su̍l cho̍ o̍ chi̍o̍o̍ ho̍ō ni̍ŋ, a̍ nyɛ̄ o̍ nyɛ̄ dīa̍a̍ cho̍ na̍nu᷄ŋ, a̍ nyɛ̄m ba̍ā kāla᷄ŋ cho̍ na̍nu᷄ŋ ndo̍ŋ, o̍ ko̍ŋ kɔ̍ɔ̍lī a̍ nyɛ̄ o̍ nyɛ̍ cho̍ ō kɛ̄sīāā o̍ fo̍ndāŋndā nda̍ kɛ̄sī nyɛ̍ sɔ̄lāa̍ Māsā Bɛ̍ndōo̍ Chu̍dā la̍ŋ, ya̍a̍mɔ̍ɔ̍wa̍ chō mu̍ŋ hūnɔ̄ɔ̄ pūŋgā kpo̍u̍ mā kūɛ̄nu̍ŋ a̍ mu̍ŋ Ba̍bi̍lɔ̄ŋ.

⁶Ndu̍yɛ̍ nūm Pa̍sīɔ̄ɔ̄, nūm a̍ yu̍ŋgu̍ nu̍mndo̍ kpo̍u̍ ā chō nya̍ hūnɔ̄ɔ̄ bīyɔ̄ɔ̄ mā kūɛ̄ a̍ nya̍ o̍ bīyɔ̄ɔ̍ ni̍ŋ Ba̍bi̍lɔ̄ŋ. O̍ bīyɔ̄ɔ̄ kōŋ ni᷄ŋ nya̍ chō lākɔ̄ lō ni̍, nya̍ chāāŋāā nūm nda̍, a̍ ŋ̄ wa̍ sɔ̄ɔ̍ŋ wa̍ā lāchīŋ lāchōōwa᷄ŋ dīmūllo̍ wa̍, mī lā vī lo̍ŋ ndu̍yɛ̍ mā chɔ̍ nya̍ lo̍ŋ.”

⁷Mɛ̄lɛ̄ka̍ Ya̍a̍wɛ̄ɛ̄, a̍ to̍sa̍l la̍ kāŋgālāa̍ ndu̍yɛ̍ ma̍ hūī ya̍. Kpāāyā nu̍mndo̍ hīōū kpāāya̍ nūu̍. A̍ chi̍i̍ ya̍ yōmɔ̄ɔ̄. Bā o̍ bā ya̍ I̍ hi̍o̍u̍ ni᷅ŋ wāŋnda̍ ā chō ya̍ māmɔ̄ɔ̍. Lɔ̍ɔ̍ o̍ lɔ̍ɔ̍ wāŋnda̍ chē ya̍ pɛ̍, mɛ̄ɛ̍ mā bāa̍ ya̍ sɔ̄ɔ̄lɛ̄ma̍a̍.

⁸Lɔ̍ɔ̍ o̍ lɔ̍ɔ̍ tē I̍ wa̍ wāŋnda̍ yōōŋgūlā nūmnda̍ŋ dīmūllo̍ pɛ̍, sa̍a̍le̍la̍ŋ kpo̍sōŋ ko̍ la̍ fu̍lā ya̍ o̍ sōndō ni̍. Dīōmndā kpūndɛ̍ la̍ŋ a̍ dīōmndā dɛ̍nɛ̍ pa̍lāālā bɛ̄ŋnda̍ŋ, la̍ŋ kpo̍so̍ŋ la̍ fu̍lā ya̍ ni᷅ŋ o̍ sōndō ni̍. Yōōŋgūlā ŋ̄ chō ya̍ dɔ̄wɔ̄ɔ̍ o̍ sōndō la̍ŋ Mɛ̄lɛ̄ka̍ Ya̍a̍wɛ̄ɛ̄, lā tōsa̍ mi̍ wa᷅ yīōūla̍ŋ sɔ̄lāa̍ a̍ bɛ̄ɛ̄la̍ ta̍mbɛ̍i̍la̍ŋ lēpāa̍ o̍ lēpāa̍.

⁹Kɛ̍ tē I̍ di̍mi̍ vɛ̄lɛ̄ pɛ̍ āā, “I̍ cho̍ pūɛ̄ɛ̄nɔ᷄ŋ a̍ Mɛ̄lɛ̄ka̍ Ya̍a̍wɛ̄ɛ̄ wo̍ ho̍ō. I̍ cho̍ lɛ̍ wā yōōŋgūlā ndɔ̄la̍ŋ ndāŋ dīmī le̍,” pɛ̍, mɛ̄ɛ̍ yīŋnde̍ŋ lē wā nu̍a̍ā wāŋndo̍ lūmī lūmīo̍o̍ yɛ̍, le̍nde̍ dīōmndā nūmnda̍ŋ lā wā ya̍ wa̍llo̍ ni᷄ŋ ni̍. I̍ ki̍ndi̍ bɛ̍ɛ̍ le̍ la̍ŋ kɛ̄si᷄ŋndo̍ o̍ kɔ̄l, I̍ nɔ̍lā le̍, mɛ̄ɛ̍ mī di̍mi̍ la̍ŋ.

¹⁰Nyɛ̄ o̍ nyɛ̄ wāŋnda̍ chō dīmu̍la᷅ŋndo̍ tōōlō a̍ ya̍ o̍kɔ̄ɔ̄, I̍ cho̍ tūēīyɔ̄ɔ̍ kpo̍u̍. Tē ā chē ya̍ pɛ̍, ā dīmi̍ āā, “Sīōōŋīī bɛ̄ndūe̍i̍ ī chō ni᷅ŋ ī tīūwāā bā o̍ bā fe̍e̍ a̍ nyɛ̄ pōo̍ ho̍ō ō chō dīmīo̍o̍ wo̍. Le̍la̍ŋ tē ō dīmi̍ dɔ̍ɔ̍ dīōm o̍ dīōm wɔ̄ɔ̍ŋ na̍nu᷄ŋ pɛ̍, ŋ̄ kɔ̍ di̍mūl wāŋ bɛ̄ndūa̍a̍.” Chāāŋāā nīa̍a̍ na̍a̍ ŋ̍ na̍a̍ŋa᷅ŋ nda̍ bɛ̍ɛ̍, cha᷄lle̍ ya̍ ni᷅ŋ mɛ̄ŋgɛ̄lāa̍ le̍ mī be̍ndu᷄ŋ bɛ̍ɛ̍ che̍le̍ŋbe̍ŋge̍le̍ mā tōsa̍ dɔ̍ɔ̍ nyɛ̄ nda̍ yēēma̍ a̍ ya̍ wo̍. Ā chō dīmīo̍o̍ āā, “Ŋ̄ chūmnu᷅ŋ tu̍ŋ, kɛ̄lɛ̄ŋgāā wāŋndo̍ chō ndu̍ hūī mbō bēndu᷄ŋ bɛ̍ɛ̍ che̍le̍ŋbe̍ŋge̍le̍. Te̍le̍ŋ ko̍ŋ na̍a̍ ŋ̄ chō ndu̍ dēlɔ̄ɔ̄ chōo̍ ni̍, mī ŋ̄ mīŋgu̍l ndu̍ māa̍.”

¹¹Kɛ̍ ndu̍yɛ̍, nūm Mɛ̄lɛ̄ka̍ Ya̍a̍wɛ̄ɛ̄, ā chō ya̍ īsīsi̍ i̍kɛ̍i̍ le̍ sɔ̍ŋgɔ̍ɔ̍ a̍ nda̍ mɛ̄ɛ̍ ku̍u̍ba̍nɔ̍ dīāllūŋ kālā bɛ̄ndōo̍ ō sīm nu̍a̍ā le̍ sɔ̍ŋgɔ̍ɔ̍ yɛ̍. Ya̍a̍mɔ̍ɔ̍wa̍a̍ nīa̍a̍ ha̍ā ki̍nɛ̍i̍ ā chō hūnɔ̄ɔ̄ dēlɔ̄ɔ̄. Ā nɔ̍lā ni̍ŋ mā yēm ya̍ le̍. Si̍ɔ̍mbu̍la̍ bɛ̄ndūla̍ŋ lā chō nda̍ hūnɔ̄ɔ̄ bīyɔ̄ɔ̄, fo̍ndōle̍, ā ti̍ū ni̍ŋ ba̍ mā tōsa̍ nyɛ̄ nda̍ yēēma̍ le̍ tōsāa̍ a̍ ya̍ wo̍ le̍. Si̍ɔ̍mbu̍la̍ bi̍ī ni̍ŋ nda̍ la̍ŋ, fɛ̍ɛ̍ŋ a̍ fɛ̍ɛ̍ŋ ā nɔ̍lā ni̍ŋ mā pu̍ɛ̍ɛ̍nu̍ŋ a̍ la̍ŋ o̍kɔ̄ɔ̄ le̍.

¹²O̍o̍ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍, nūm ā nɔ̄lā mā to̍fa̍ wāŋndā chīe̍e̍ya̍ mā si̍na̍ wānāā sa̍kpūa̍a̍. Ā nɔ̄lā mā to̍fa̍ o̍ kɔ̄l wāna̍ chi̍o̍o̍ ni̍ŋ mā si̍na̍ yīya᷄ŋ cho̍ ndu̍ o̍ kɔ̄l lo̍. Le̍la̍ŋ I̍ ma̍l nu̍m sūɛ̍i̍ nīi̍ o̍ bā na̍a̍ ya̍a̍mɔ̍ɔ̍wa̍a̍ nīa̍a̍ tɛ̄ɛ̄ŋ Mɛ̄lɛ̄ka̍. I̍ ye̍e̍ma̍ mā mi̍ŋgu̍l nda̍ māa̍ le̍ nyɛ̄ nda̍ tōsa̍l la̍ wo̍.

¹³I̍ so̍lī wɔ̍ chōndu̍ŋ kɔ̄l kɛ̄ndɔ̍ŋ nāa̍ Mɛ̄lɛ̄ka̍ Ya̍a̍wɛ̄ɛ̄ chu̍a̍. I̍ sa̍ŋgālā wɔ̍ Mɛ̄lɛ̄ka̍ Ya̍a̍wɛ̄ɛ̍ o̍ chōndo̍ŋ ni̍ŋ. Kāni̍ fo̍ndōle̍, ndu̍ Mɛ̍lɛ̄ka̍, ndu̍ chi̍i̍ndīāā wa̍nāā nda̍ chō nyɛ̄ pālāa̍ tūsīo̍o̍ chōo̍ wa̍, mbō sōli̍ nda̍ wānāā dɛ̍nɛ̍ wɔ̍ɔ̍ŋnda̍ o̍ bā ni̍.

¹⁴Sēndi̍o̍o̍ ō chō o̍ pāa̍le̍ nda̍ vēlū ya̍ le̍ŋ chōo̍. Mbɔ̄ māā pāa̍le̍ŋ nde᷅ŋ lē wa᷅ pāa̍le̍ sa̍lā chō chōo̍ le̍ fɔ̍!

¹⁵Wāna̍ chu̍u̍ fi̍nyā nūu̍ yōōŋgōo̍ pāa̍le̍ le̍ŋ mbo̍ dīmūl fi̍nyā nūu̍ āā, “Ā vīlu̍l nu̍m wānā pɔ̍nɔ̍ɔ̍, mbo̍ tōsā mi̍ fi̍nyā nūu̍ ō dūāūnu̍ŋ nya̍a̍le̍ wo̍, mbɔ̄ sēndi̍o̍o̍ ō wa̍ wa̍nā ko̍ŋ chōo̍ fɔ̍!

¹⁶Mbɔ̄ māā wāŋndo̍ ho̍ō ō wa̍ o̍ tɛ̍ɛ̍mbāā māa̍ chi̍e̍e̍ŋ Mɛ̄lɛ̄ka̍ Ya̍a̍wɛ̄ɛ̄ o̍ tɛ̍ɛ̍mbu̍u̍ īnyīɛ̍ɛ̍ bɛ̍ɛ̍ i̍ bi̍ī ndu̍ le̍ mu̍ŋ tɛ̄ɛ̄mbūū le̍ wo̍ fɔ̍! Mbɔ̄ māā wāŋndo̍ ho̍ō ō nīīlu̍ bɔ̍ɔ̍lūū chɔ̄ūwo̍ tūēīnɔ᷄ŋndo̍ o̍ lānī fɔ̍, bɔ̄ɔ̄lūu̍ to̍sā mī sīōōŋīī bɛ̄ndūe̍i̍ ī bīī ndu̍ wo̍!

¹⁷Kāni̍ fo̍ndōle̍ le̍ mɛ̄ɛ̍ o̍ chɛ̍l mi̍ vi̍a̍lu᷄ŋ ō dīi̍ ya̍ lɔ̍ɔ̍ ya̍ I̍ wa̍ o̍ dēmbōo̍ ni᷄ŋ ndo̍ le̍ yɛ̍. Tē ndu̍ o̍o̍ di̍ī ya̍ a̍ te̍le̍ŋ ko̍ŋ pɛ̍, dēmbe̍ kāla̍ nūu̍ ndu̍ ko̍ni̍ ndu̍ o̍o̍ wa᷅ ni̍ŋ sɛ̍i̍ nūu̍ ni̍.

¹⁸Ɔ̍ɔ̄ le̍ sa̍bū kāla̍ nūu̍ ō sōli̍ŋ ya̍ o̍ īpūlu̍ wo̍? Bāā le̍ yōōmū nūu̍ wāa̍ o̍ dɛ̍nɛ̍ pa̍lāā bɛ̄ndōo̍ ni᷄ŋ, mī kɔ̄l nūu̍ ō bīī mɔ̍nɛ̍i̍ le̍ te̍le̍ŋ o̍ te̍le̍ŋ, ndu̍yɛ̍ mī lo̍ o̍ si̍ɔ̍mbu̍la̍ŋ ni̍ŋ ha̍a̍a̍ mī vi᷅, le̍la̍ŋ ko̍ ya̍ I̍ ve̍lu᷄ŋ ni̍?”