Read Southern Kisi Chɛ̄lūīma̍yā 21 Bible Online

Chɛ̄lūīma̍yā 21 - Southern Kisi bible

Chɛ̄lūīma̍yā 21

¹Ō wa̍ a̍ pāa̍le̍ pi᷅lɛ̍ mi̍ Māsā Bɛ̍ndōo̍ Sɛ̄dīka̍yā o̍ wa̍ māsāa̍ Chu̍dā wo̍ ō vīām Pa̍si̍ɔ̍ɔ̄, po̍ Mālīki̍yāā wo̍ a̍ Sɛ̄fāna̍yā wāna̍ so̍lī sa̍lāa̍ o̍ Mɛ̄lɛ̄ka̍ lo̍ wo̍, po̍ Māāsɛ̍yā wo̍ nāa̍ ya̍ Chɛ̄lūīma̍yā chu̍a̍ a̍ yōōŋgōo̍. Le̍ mā kɔ̍ di̍mūl ya̍ Chɛ̄lūīma̍yā āā, “Māsāa̍ Nābi̍u̍kānɛ̍ɛ̍sā ho̍ō Ba̍bi̍lɔ̄ŋ nda̍ pūa̍a̍ ndūa̍a̍ chɔ̄ūwa̍ ā hīŋ le̍ na̍a̍ dēlɔ̄ɔ̍ chōo̍ a̍ sɔ̍ŋgɔ̍ɔ̍. Le̍la̍ŋ yāndi̍i̍ nyu̍na̍l nāa̍ Mɛ̄lɛ̄ka̍ Ya̍a̍wɛ̄ɛ̄ dīōm. Kɛ̄lɛ̄ŋgāā mī Mɛ̄lɛ̄ka̍ Ya̍a̍wɛ̄ɛ̄ o̍ to̍sa̍l na̍a̍ kɔ̄ndɔ̄fi̍li̍ ndɔ̄ bɛ̍ndōo̍ māā pāāndū, mbō tōsa̍ mī Māsā Bɛ̍ndōo̍ Nābi̍u̍kānɛ̍ɛ̍sā o̍ ma̍ŋga̍la̍ kɔ̄l ndɔ̄ɔ̍ mbō mīīŋgu᷄ŋ, ō de᷅l na̍a̍ chōo̍ le̍.” O̍ ko̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā nāa̍ ya̍ Chɛ̄lūīma̍yā chu̍a̍.

³Mi̍ di̍mūl wānāā māsāa̍ vēm nda̍ a̍a̍, “Lā kɔ̍ di̍mūl Sɛ̄dīka̍yā māā,

⁴nyɛ̄ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍ ō dīmi̍ wo̍ cho̍ ho̍ō ni̍. O̍ dīmi̍ āā, ‘Ya̍ Mɛ̍lɛ̄ka̍ pīla̍ kpe̍e̍kpe̍i̍ cho̍ nūm Sɛ̄dīka̍yā, so̍vɛ̄i̍ya̍a̍ nu̍m nda̍ yōmɔ̄ɔ̄ ni̍, a̍ cho̍ sɔ̍ŋgɔ̍ɔ̍ a̍ māsāa̍ Ba̍bi̍lɔ̄ŋ nda̍ so̍vɛ̄i̍ya̍a̍ ndūa̍a̍ a̍ hu̍ŋ ba̍lū chi̍e̍e̍ nyāa̍ ma̍ dūāū nya̍ o̍ pi̍ŋndo̍ ni᷄ŋ nda̍. Wōlɔ̄ɔ̄lā chɔ̄ūla̍ cho̍ pūa̍a̍ nu̍mnda̍ o̍ lābā le̍ sɔ̍ŋgɔ̍ɔ̍ la̍ŋ, I̍ cho̍ la̍ŋ hūnɔ̄ɔ̄ chūūŋgīāā mī di̍ī la̍ŋ be̍mbo̍o̍ o̍ chi̍o̍o̍ tɛ̄ɛ̄ŋ kpe̍e̍kpe̍i̍.

⁵Ya̍ Mɛ̍lɛ̄ka̍ pīla̍ ya̍ kpe̍e̍kpe̍i̍ cho̍ sɔ̍ŋgā a̍ nya̍ a̍ kpāāya̍ nī bɛ̍ndōo̍ kpo̍u̍ ni̍, fo̍ndōle̍ I̍ dɔ̍u̍nu᷄ŋ tu̍mbe̍ a̍ nya̍ o̍ ka̍lā ka̍lā. Lā tōsa̍ mi̍ tu̍u̍lū kɔ̄l a̍ nya̍.

⁶I̍ cho̍ tōsā mī nāā wɔ̄ɔ̍ŋ bɛ̄ndōo̍ ō de᷄l chi̍e̍e̍ bɛ̍ndōo̍ ho̍ō ni̍ŋ, wāŋndā chīe̍e̍ya̍ ni̍, chɔ̄lūa̍a̍ ni̍, mā vī wūo̍o̍ pīla̍.’

⁷Mi̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍a̍ū lāchī a̍ sūɛ̍i̍, mbo̍ dīmī āā, ‘Tē ko̍ŋ o̍ hi̍o̍ū pɛ̍, nūm Sɛ̄dīka̍yā, māsāa̍ le̍ Chu̍dā ni̍, wāŋ bɛ̄ndūa̍a̍ cho̍ nu̍m wa̍llo̍ o̍ bā bɛ̄ŋgu̍ wa̍ ni̍, o̍ ko̍ŋ kɔ̍ɔ̍lī, a̍ wānāā tūa̍a̍ kpo̍u̍, nya̍ chɔ̄ūwo̍ ō kēēkū ni̍ŋ cho̍o̍ mī yīmā bɛ̄ndūa̍ŋ mā kēēku̍ nya̍ chōo̍ mī nāā wɔ̄ɔ̍ŋ bɛ̄ndū kōŋ ō kēēku̍ nya̍ chōo̍ mī la̍ lo̍ yōōmū wa̍, I̍ cho̍ nya̍ mālɔ̄ɔ̄ Nābi̍u̍kānɛ̍ɛ̍sā māsāa̍ le̍ Ba̍bi̍lɔ̄ŋ a̍ ya̍a̍mɔ̍ɔ̍wa̍a̍ nyāa̍ ye̍e̍ma̍ le̍ nya̍ dīūwo̍ wa̍ o̍ bā. Māsāa̍ Nābi̍u̍kānɛ̍ɛ̍sā o̍ cho̍ nya̍ hūnɔ̄ɔ̄ dīū a̍ mūɛ̄ī fāŋnde̍. Īnyīɛ̍ɛ̍ bɛ̍ɛ̍ ō tu̍i̍i̍nūŋ ni̍ŋ nya̍ le̍, kɛ̄lɛ̄ŋgāā le̍, mbō chīīndi̍a̍a̍ bɛ̍ɛ̍ wa᷅ŋndo̍ ō pīlɛ̍, ɔ̄ɔ̄ mī mɔ̍nɛ̍i̍ bi̍ī ndu̍ bɛ̍ɛ̍ le̍ nya̍.’

⁸“O̍ ko̍ŋ kɔ̍ɔ̍lī, lā kɔ̍ di̍mūl wāŋnda̍ kpe̍nde̍ māā Mɛ̍lɛ̄ka̍ Ya̍a̍wɛ̄ɛ̄ o̍ di̍mi̍ āā, ‘Wāŋnda̍ Chūlu̍sɛ̄lɛ̄m, ya̍ Mɛ̍lɛ̄ka̍ Ya̍a̍wɛ̄ɛ̄ I̍ cho̍ nya̍ nɛ̄īla̍ŋ chɔ̄m lā tīɔ̍ɔ̍ŋ, nɛ̄i̍ to̍sā mī lā wa̍ yōōmū wo̍, a̍ nɛ̄i̍ to̍sā mī lā sɔ̄la̍ pīɔ̍mndo̍ wo̍ mī lā chu̍a̍ ō nya̍ yēēma̍ wo̍.

⁹Wānā o̍ wāna̍ lo̍ Chūlu̍sɛ̄lɛ̄m na̍nu᷄ŋ pɛ̍, tē chɔ̄ūwo̍ dīi̍ nu̍m te̍, yīmā bɛ̄ndūa̍ŋ ma̍ cho̍ nu̍m dīyɔ̄ɔ̄ ni̍, tē yīmā māŋ mā dīi̍ nu̍m te̍, mɛ̄ɛ̍ nāā wɔ̄ɔ̍ŋ bɛ̄ndōo̍ ndu̍ cho̍ nu̍m dīyɔ̄ɔ̄ ni̍. Kɛ̍ wānā o̍ wāna̍ fu̍la̍ pɛ̍ ma̍ kɔ̍ yɔ̍ŋgu̍ŋ o̍ pūa̍a̍ Ba̍bi̍lɔ̄ŋ ndo̍, pūa̍a̍ hu̍ŋ ba̍lū chi̍o̍o̍ le̍ ndu̍ dēlɔ̄ɔ̍ chōo̍ wa̍, wānā ko̍ŋ a̍ cho̍ pi̍ɔ̍m sɔ̍lā le̍.

¹⁰Kāni̍ fo̍ndōle̍, ya̍ Mɛ̍lɛ̄ka̍ Ya̍a̍wɛ̄ɛ̄ I̍ chi̍i̍ kɛ̄ɛ̄sīāā le̍ chi̍o̍o̍ ho̍ō nyɛ̄ pālāa̍ tūsīo̍o̍ chōo̍, I̍ nɔ̍ lɛ̍ kɛ̄sīāā le̍ ndu̍ dɛ̍nɛ̍ o̍ dɛ̍nɛ̍ kɛ̍ndɛ̄ tōsāl te̍. I̍ cho̍ chi̍o̍o̍ ho̍ō mālɔ̄ɔ̄ māsāa̍ Ba̍bi̍lɔ̄ŋ o̍ bā mbō ma̍l ndu̍ o̍ yīŋ mbō ŋūɛ̄ kpo̍u̍ mbō sīmnu̍ŋ pu᷅lta̍ŋ. Ya̍ Mɛ̍lɛ̄ka̍ Ya̍a̍wɛ̄ɛ̄ ya̍ so̍ō ni̍.’

¹¹“O̍ ko̍ŋ kɔ̍ɔ̍lī, lā dīmu̍l yu̍ŋgu̍ lēmāsa̍ cho̍ o̍ lɛ̄ŋndē Chu̍dāle̍ŋ ni᷄ŋ ndo̍, yu̍ŋgu̍ fu̍la̍ o̍ pūlāle̍ Māsāa̍ Dēēve̍ le̍ŋ chōo̍ wo̍, māā nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ cho̍ ho̍ō ni̍. Ō dīmi̍ āā, ‘Nya̍ cho̍ wāŋnda̍ chīla̍ŋ nda̍, le̍ te̍le̍ŋ o̍ te̍le̍ŋ lā nɔ̄ mī lā wa̍ wāŋnda̍ tɛ̄ɛ̄ŋ sa̍kpō tē lā wa̍ nda̍ sɔ̄ɔ̍ŋ dīmīo̍o̍ tɛ̄ɛ̄ŋ pɛ̍. Wānāā nda̍ chō ka̍fāla̍ŋ tōsāllo̍ wa̍, nya̍ nɔ̍ ni̍ mī lā sōō le̍ nda̍ mī lā pīŋi̍ nda̍. Tē ō cho̍ ko̍ŋ te̍, I̍ cho̍ tu̍mbe̍ dɔ̍ɔ̍nɔ᷄ŋ a̍ nya̍ o̍ ka̍lā ka̍lā mī tɛ̍ɛ̍mbu̍u̍ nya̍ mɛ̄ɛ̍ yīŋndē wānā nɔ̍lā nyu̍mī le̍ le̍ŋ lē tɛ̄ɛ̄mbūū nu̍a̍ā nyɔ̄ɔ̍ yɛ̍, fo̍ndōle̍ le̍ yɔ̄ŋndā nyāla̍ wɔ̍ɔ̍ŋnda̍ŋ.’

¹³Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ māā, nya̍ wāŋnda̍ Chūlu̍sɛ̄lɛ̄m, le̍ mɛ̄ɛ̍ nya̍ chō o̍ pēmbīī vīlɛ̄ī bɛ̄ndūe̍i̍ chōo̍ mī lā chā o̍ dɛ̍ŋgbɛ̍la̍ŋ ni᷄ŋ yɛ̍, nyɛ̄ kōŋ nya̍ chō dīmīo̍o̍ ni̍ māā ō nɛ̄ɛ̍nɛ̍ nɔ̍lā yɛ̍ mbō hu᷄ŋ sɔ̍ŋgā a̍ nya̍ lo̍ŋ. Māā ō nɛ̄ɛ̍nɛ̍ nɔ̍lā yɛ̍ mbō lūɛ̄ī bɛ̍ɛ̍ lo̍ŋ a̍ sɔ̍ŋgɔ̍ɔ̍. Kɛ̍ ndu̍yɛ̍ ya̍ Mɛ̍lɛ̄ka̍ I̍ cho̍ hūnɔ̄ɔ̄ sɔ̍ŋgā a̍ nya̍.

¹⁴Yɔ̄ŋ wɔ̄ɔ̍ŋ o̍ yɔ̄ŋ wɔ̄ɔ̍ŋ nya̍ tōsa̍, I̍ cho̍ nya̍ hūnɔ̄ɔ̄ dɛ̍nɛ̍ pa̍lāa̍ tūsī chōo̍ le̍ ndu̍. I̍ cho̍ chīɛ̄ī nya̍ lēmāsāa̍ mālɔ̄ɔ̄ o̍ yīŋ, ndu̍yɛ̍ o̍ ko̍ŋ kɔ̍ɔ̍lī, nyɛ̄ o̍ nyɛ̍ ba̍lu̍ ndu̍, mbō ŋūɛ̄ kpo̍u̍. Ya̍ Mɛ̍lɛ̄ka̍ Ya̍a̍wɛ̄ɛ̄, ya̍ so̍ō ni̍.”