Read Southern Kisi Chɛ̄lūīma̍yā 22 Bible Online

Chɛ̄lūīma̍yā 22 - Southern Kisi bible

Chɛ̄lūīma̍yā 22

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl la̍ māā, kɔ̍ o̍ chīɛ̄ī lēmāsā māsa̍ bɛ̍ndōo̍ Chu̍dā, mā kɔ̍ di̍mī yōōŋgōo̍ ho̍ō lo̍ŋ, nāa̍ wānāa̍ cho̍ lo̍ŋ nda̍ chūā. Di̍mu̍l nda̍ māā,

²nūm māsā bɛ̍ndōo̍ Chu̍dā, nu̍m mi̍i̍ŋgu̍ ho̍ō o̍ fōōfo̍ Māsāa̍ Dēēvi̍o̍o̍ chōo̍ wo̍, nya̍ wānāā bɛ̄ndūa̍a̍ cho̍ nu̍m o̍ bā bɛ̄ŋgu̍ wa̍ ndu̍yɛ̍ a̍ wānāā nūmnda̍ ki̍nɛ̍i̍, nya̍ wānā o̍ wāna̍ ke̍e̍kū o̍ dīōlā sāāsā ho̍ō le̍ lūɛ̄īyɔ̄ɔ̍ o̍ fo̍ndā lēmāsāa̍, lā ya᷄ŋ ni᷅la̍ŋ o̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍.

³Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Nyɛ̄ ya̍ I̍ ye̍e̍ma̍ nya̍ mī lā tōsa̍ wo̍ cho̍ ho̍ō ni̍. I̍ ye̍e̍ma̍ nya̍ mī lā wa̍ wāŋnda̍ tɛ̄ɛ̄ŋ sa̍kpō, ndu̍yɛ̍ mī lā wa̍ wānāā tōnya̍. Wānāā nda̍ chō ka̍fāla̍ŋ tōsāllo̍ wa̍, lā sūŋgu̍ le̍ nda̍, mī lā pīŋi̍ nda̍ wānāā dɛ̍nɛ̍ wɔ̍ɔ̍ŋāā kāŋ o̍ bā. Wānāā lēkāa̍wa̍a̍ cho̍ nya̍ tɛ̄ɛ̄ŋ nda̍ ni̍, vi̍i̍ya̍a̍ nɔ̍ lɛ̍ ŋ̄fi̍nyā le̍ wa̍ ni̍ a̍ wāŋ lāāndūāā pīāāndūāā ndāa̍ ā vī wa̍, lā bi̍ī nda̍ bīyɔ̄ɔ̄ wɔ̄ɔ̍ŋ kɛ̄lɛ̄ŋgāā mī lā tūsi̍ nda̍ nyɛ̄ pālāā chōo̍ le̍. Ndu̍yɛ̍ lā di̍ī wāŋndo̍ o̍ tɛ̍ɛ̍mbu̍u̍ i̍sɔ̍ɔ̍ o̍ īsɔ̄ɔ̍ le̍ wo̍ o̍ fo̍ndāa̍ ho̍ō le̍.

⁴Nyɛ̄ o̍ nyɛ̄ ya̍ I̍ cho̍ nya̍ dīmūllo̍, tē lā ya᷄ŋ ndu̍ nīla̍ŋ pɛ̍, mī lā tūsi̍ŋ o̍ ndu̍ bɛ̍ŋgu̍, le̍ te̍le̍ŋ o̍ te̍le̍ŋ tōsāa̍ ya̍ I̍ to̍sā ni̍, mī māsāā bɛ̍ndūa̍a̍ ā hīōū lāchī a̍ fūlāa̍ o̍ pūlāle̍ Dēēve̍le̍ŋ chōo̍. Le̍ te̍le̍ŋ o̍ te̍le̍ŋ ā wā ni̍ŋ ke̍e̍kōo̍ ā pīlɛ̍ŋ pi̍lɛ̍ŋ nda̍ o̍ dīōlā sāāsāa̍ ho̍ō le̍ lūɛ̄īyɔ̄ɔ̍ o̍ fo̍ndā lēmāsāa̍ o̍ nyɛ̄lā su̍a̍a̍ ā nāŋ nda̍ŋ ni̍ŋ a̍ o̍ su̍a̍ā chōo̍, a̍ wānāā bɛ̄ndūa̍a̍ wa᷅ nda̍ wa̍llo̍ o̍ bā bɛ̄ŋgu̍ lātūlu̍ a̍ wānāā ndāa̍ kpɛ̍kpɛ̄lɛ̄ɛ̄ bɛ̄ndū.

⁵Kɛ̍ tē lā ye᷄ŋ ya̍ nīla̍ŋ mī lā tūsi̍ŋ o̍ dīōm nūu̍ bɛ̄ŋgu̍ le̍, I̍ te̍ŋnu᷄ŋ, tōsāa̍ ya̍ I̍ to̍sā ni̍, mī fo̍ndā lēmāsāa̍ ho̍ō ō tāmbu̍, mbō sīmnu᷄ŋ pɔ᷅m. Ya̍ Mɛ̍lɛ̄ka̍ Ya̍a̍wɛ̄ɛ̄, ya̍ so̍ō ni̍.”

⁶Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ a̍ fo̍ndā lēmāsāa̍ Chu̍dā o̍kɔ̄ɔ̄ wo̍ cho̍ ho̍ō ni̍. Ō dīmi̍ āā, “Nūm fo̍ndā lēmāsāa̍ Chu̍dā mi̍ chē bɛ̍ɛ̍ ma̍ wā ya̍ o̍ hɔ̄l mɛ̄ɛ̍ lɛ̄ŋndē tɔ̄nɔ̄le̍ bɛ̍ndūle̍ŋ Ki̍li̍a̍a̍dī le̍ cho̍ yɛ̍, ndu̍yɛ̍ ma̍ wā vɛ̄lɛ̄ māā lūāŋūŋ bɛ̄ndūŋ tɔ̄nɔ̍ŋ Le̍ba̍nɔ̄ŋ, kɛ̍ I̍ cho̍ nu̍m hūnɔ̄ɔ̄ tɛ̄ɛ̄mbūū mā sīmnu᷄ŋ māā pɔ̄m. Mɛ̄ɛ̍ chi̍o̍o̍ ō lō nu̍a̍ā pɔ̄m, wānā o̍ wānā che᷅l lɛ̍ lo̍ŋ te̍ yɛ̍, le̍nde̍ ŋ̄ wā ni̍ŋ ni̍.

⁷I̍ cho̍ wānāā tɛ̄ɛ̄mbāa̍ vīōmɔ̄ɔ̄ mā hīŋ a̍ wōlɔ̄ɔ̄lā ndāla̍ chɔ̄ūla̍ŋ mā hu᷄ŋ tɛ̍ɛ̍mbūū nu̍m. Sūŋgbu̍ma̍ kɛ̍ndɛ̄ kɛ̍ndɛ̄ ma̍ cho̍ na̍nu᷄ŋ, ma̍ tōōsīāā ma̍ŋ a̍ yɔ̄mīī si̍dāāve̍ wa̍ŋ, ā chō ma̍ŋ hūnɔ̄ɔ̄ kīīŋūū mā ma᷄l ma̍ŋ o̍ yīŋ.

⁸Wāŋnda̍ o̍ lɛ̄ŋīī bɔ̄ɔ̍ bɔ̍ɔ̍ ni̍ŋ ā wā ni̍ŋ ke̍e̍kōo̍ o̍ chi̍e̍e̍ pɔ᷅mndo̍ ho̍ō ni᷄ŋ mā wa̍ nyūūni̍āŋndo̍ āā, ‘Vɛ᷅ mi̍ Mɛ̄lɛ̄ka̍ Ya̍a̍wɛ̄ɛ̄ o̍ to̍sā he̍ī a̍ chi̍e̍e̍ tɔ̍ɔ̍ma̍ bɛ̄ndōo̍ ho̍ō?’

⁹O̍ ko̍ŋ, mī wāŋnda̍ dīmu̍l nda̍ āā, ‘Le̍ mɛ̄ɛ̍ wāŋnda̍ ha̍ā ā tɛ̄ɛ̄mbu̍u̍ kpe̍ma̍ Mɛ̄lɛ̄ka̍ Ya̍a̍wɛ̄ɛ̄, o̍ cho̍ Mɛ̄lɛ̄ka̍ ndāa̍ wo̍ ō yīi̍ a̍ nda̍ wo̍ ma̍ mūli̍ŋ nyɛ᷅m chēle̍ŋndo̍ sōōlūūwo̍ māā mɛ̄lɛ̄ka̍a̍ ndā yɛ̍, le̍la̍ŋ he̍ī ī yɔ̄nu̍ŋ a̍ chi̍o̍o̍ ho̍ō ni̍.’ ”

¹⁰Wāŋnda̍ Chu̍dā, lā cha᷅ŋ ndɛ̄ le̍ māsa̍ vi᷅ wo̍ le̍. Mɔ̍nɛ̍i̍ bi̍ī lɛ̄ nya̍ le̍ mɛ̄ɛ̍ o̍ fa̍ŋa̍ŋ nya̍ chōo̍ yɛ̍ le̍. Wāna̍ nya̍ cha̍ŋ cha̍ŋndo̍ pīla̍ le̍ ndu̍ wo̍, ndu̍ cho̍ po̍ ndɔ̍ mi̍i̍ŋgu̍ o̍ fōōfo̍ ndɔ̄ɔ̍ ma̍ kūā a̍ ndu̍ o̍ bīyɔ̄ɔ̍ ni᷄ŋ ndo̍ ni̍. Kāni̍ fo̍ndōle̍ kɔ̄lā nda̍ kūɛ̄ la̍ŋ a̍ ndu̍ la̍ŋ, o̍ bīyɔ̄ɔ̄ kōŋ ni᷄ŋ o̍ cho̍ ni᷅ŋ lō ni̍. Le̍ fɛ̍ɛ̍ŋ a̍ fɛ̍ɛ̍ŋ ō de᷅l lɛ̍ lɛ̄ŋndē ndɔ̄le̍ o̍ ve̍lu᷄ŋ ni̍ŋ nde̍ŋ lēhɔ̄l te̍.

¹¹Chōwāha̍a̍sī, o̍ mi̍i̍ŋgu̍ māsāa̍ Chu̍dā o̍ fōōfo̍ Chōōsa̍yā fi̍nyā ndɔ̄ wo̍ wo̍, o̍ nda̍ kūɛ̄ o̍ bīyɔ̄ɔ̍ ni᷄ŋ o̍ lɛ̄ŋndē chēle̍ŋ ni̍ŋ ndo̍, nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ a̍ ndu̍ o̍kɔ̄ɔ̄ wo̍ cho̍ ho̍ō ni̍. Ō dīmi̍ āā, “Le̍ fɛ̍ɛ̍ŋ a̍ fɛ̍ɛ̍ŋ Chōwa̍ha̍a̍sī o̍ mi̍i̍ŋgū lɛ̍ o̍ lɛ̄ŋnde̍ŋ nde᷅ŋ ni̍ŋ te̍.

¹²O̍ bīyɔ̄ɔ̍ ni̍ŋ o̍ cho̍ wu̍ nāa̍ nda̍ kūɛ̄ a̍ ndu̍ wa̍ ni̍. Le̍ fɛ̍ɛ̍ŋ a̍ fɛ̍ɛ̍ŋ ō de᷅l lɛ̍ lɛ̄ŋnde̍ŋ nde᷅ŋ lēhɔ̄l te̍.”

¹³Dɛ̍nɛ̍ pa̍lāā bɛ̄ndōo̍ chō le̍ wāŋndo̍ ho̍ō, wāna̍ ta̍ŋgūl ho̍ō chīɛ̄ī ndɔ̍ lēmāsāa̍ o̍ nɛ̄i̍ lāka̍fā bɛ̄ndōo̍ ni᷄ŋ ndo̍, wāna̍ si̍mī ho̍ō chīɛ̄īyo̍, tē ō chīi̍ sīmī pɛ̍, ō tāŋgu̍l vɛ̄lɛ̄ ō chēle̍ŋ lēcho̍ō mbō tōsāl wa᷅ŋnda̍ yɔ̄ŋ wɔ̄ɔ̍ŋndo̍ o̍ ndu̍ tāŋgūllo̍ ni᷄ŋ ndo̍, o̍ sa̍a̍ŋgīāā ho̍ō wāŋnda̍ le̍ ndu̍ wa̍llo̍ tōsāllo̍ mbō kɛ̄ɛ̄ le̍ nda̍ pāāwāa̍ wo̍.

¹⁴Ō bīī pɛ̍ ō dīmi̍ āā, “I̍ cho̍ chīɛ̄ī lēmāsā bɛ̄ndōo̍ tāŋgūl, tē I̍ chi̍i̍ ndu̍ sīmī pɛ̍, I̍ ta̍ŋgu̍l vɛ̄lɛ̄ lu̍mūi̍la̍ che᷅le̍ŋ lēcho̍ō fɛ̍kɛ̄ī fɛ̄kɛ̄ī Ndu̍yɛ̍ mbō tāŋgu̍l ndu̍ le̍nde̍ mɛ̄ɛ̍ o̍ di̍mi̍ yɛ̍, a̍ wu̍ndɛ̄i̍la̍ŋ lā bɛ̄ndū wa̍ŋgba̍ŋ bɛ̍ndū. Mbō hōli̍ ho̍li̍ pɛ̄ŋgɔ̍ŋ yɔ̄m si̍dāā wo̍ lēni᷄ŋ mbō kūmbū ndu̍ lēni᷄ŋ kpo̍u̍ a̍ mu̍ŋ. O̍ ko̍ŋ kɔ̍ɔ̍lī, tē ō chīi̍ ndu̍ tāŋgūl pɛ̍, ō sūu̍ ndu̍ pɔ̄u̍ si̍a̍ŋāa̍ kpo̍u̍.

¹⁵Kɛ̍ bāā chīɛ̄ī lēmāsāa̍ tāŋgūllo̍ mā bɛ̍ɛ̍ndi̍a̍a̍ ndu̍ a̍ yɔ̄mīī si̍dāāve̍ yɔ̄mīī ba̍ā kālɛ̄ī bɛ̄ndūi̍i̍ nɔ̍ tɔ̍ɔ̍ ve̍, mbō hīōū chīɛ̄ī o̍ chīɛ̄ī lēmāsā nāŋɔ̄ɔ̄ ndu̍ si̍i̍ŋgūū nu̍m māsa̍ tɔ̍ɔ̍ bɛ̍ndū ni̍? Ō cho̍ ndu̍ le̍. Ō yɛ̄ɛ̍nɛ̍ to̍sa̍ yɛ̄ mī nyɛ̄ o̍ nyɛ̄ wā ō kɛ̄ndɛ̄ a̍ Chōōsa̍yā fi̍nyā nūm o̍ māsāle̍ ndɔ̄le̍ŋ ni᷄ŋ? Le̍ mɛ̄ɛ̍ o̍ wa̍ sa̍kpō ndu̍yɛ̍ mbo̍ wā wāna̍ tōnya̍ yɛ̍, nyɛ̄ kōŋ Mɛ̄lɛ̄ka̍ dɔ̄ū ndu̍ sa̍lā kōŋ ni̍, mi̍ nyɛ̄ o̍ nyɛ̄ wā ō kɛ̄ndɛ̄ a̍ ndu̍ o̍ māsāle̍ ndɔ̄le̍ŋ ni᷄ŋ.

¹⁶Wānāā tāmbɛ̍i̍ya̍ ni̍, wānāā bālā hāvɛ̍i̍ya̍ ni̍, le̍ te̍le̍ŋ o̍ te̍le̍ŋ ō wa̍ sa̍kpō o̍ sɔ̄ɔ̍ŋ ndāa̍ŋ dīmīo̍o̍ ni̍ŋ mbō tōsā mā sɔ̄lā di̍la̍ ndāla̍ŋ. Nyɛ̄ ko̍ŋ to̍sa̍ ni̍, mi̍ nyɛ̄ o̍ nyɛ̄ wā ō kɛ̄ndɛ̄ a̍ ndu̍ o̍ māsāle̍ ndɔ̄le̍ŋ ni̍ŋ. Ndu̍yɛ̍ le̍ mī wānā si̍na̍ ya̍ Mɛ̍lɛ̄ka̍ nyɛ̄ kɛ̄ndɛ̍ī, nu̍a̍ā ŋ̄ nɔ̄ ni̍ mā wa̍. Ya̍ Mɛ̄lɛ̄ka̍ Ya̍a̍wɛ̄ɛ̄ ya̍ so̍ō ni̍.”

¹⁷Mi̍ Mɛ̄lɛ̄ka̍ hīāū lāchī a̍ sūɛ̍i̍ mbo̍ dīmī āā, “Kɛ̍ nūm nūm, le̍ te̍le̍ŋ o̍ te̍le̍ŋ nyɛ̄ ŋ̄ lāndu̍ŋ kɔ᷅l lo̍ ko̍ cho̍ hɔ̄lte̍ŋ lūɛ̄īyɔ̄ɔ̍ o̍ nyɛ̄m pi̍la̍ŋ mā tōsāl wa᷅ŋnda̍ ka̍fāla̍ŋ ni̍. Wānāa̍ tɛ̍ɛ̍mbu̍u̍ i̍sɔ̍ɔ̍ o̍ īsɔ̄ɔ̍ le̍ wa̍, ma̍ wā nda̍ dīūwo̍ o̍ fo̍ndō fu̍u̍wo̍ chōo̍, o̍ ko̍ŋ kɔ̍ɔ̍lī, mā tūsī wa᷅ŋnda̍ nyɛ̄ pālāa̍ chōo̍, ndu̍yɛ̍ mā bīī wa᷅ŋnda̍ bīyɔ̄ɔ̄ wāŋta̍ndāa̍.”

¹⁸Le̍la̍ŋ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ a̍ Chɛ̄hōwa̍kīm, po̍ Chōōsa̍yā wo̍, o̍ mi̍i̍ŋgu̍ Māsāa̍ Chu̍dā o̍ fōōfo̍ fi̍nyā ndɔ̄ wo̍ chōo̍ wo̍ cho̍ ho̍ō ni̍. Ō dīmi̍ āā, “Chɛ̄hōwa̍kīm o̍ cho̍ hūnɔ̄ɔ̄ pīɔ̍mndo̍ sɔ̄lā wāna̍ ndɔ̄ɔ̍ ō pīlɛ̍ bɛ̍ɛ̍ ō che᷅ŋ ni̍ŋ ndu̍ chōo̍ le̍. Ndu̍yɛ̍ wānāā o̍ cho̍ māsāa̍ chōo̍ wa̍ ō pīlɛ̍ bɛ̍ɛ̍ ō nɔ̍lā ni̍ŋ mbō cha᷄ŋ ndu̍ le̍!

¹⁹Ndu̍yɛ̍ pīɔ̍m o̍ cho̍ sɔ̄lā wo̍, mɛ̄ɛ̍ nda̍ tōsā nu̍a̍ā a̍ sōfɛ̍lɛ̍ vi̍lɛ̍i̍yo̍ yɛ̍, le̍nde̍ nda̍ tōsā ni̍ŋ a̍ ndu̍ ni̍. Ā chō dīāllūŋ ndɔ̄ɔ̍ŋ sāsɔ̄ɔ̄ mā kūɛ̄ a̍ mu̍ŋ o̍ sāāsa̍ chi̍o̍o̍ lēkɔ̍ɔ̍lī, mā kɔ̍ vi̍o̍ū mu̍ŋ o̍ bɛ̍ɛ̄ lo̍ŋ.”

²⁰Wāŋnda̍ Chūlu̍sɛ̄lɛ̄m, lā he᷄l o̍ pēmbūŋ Le̍ba̍nɔ̄ŋ ndo̍ŋ chōo̍ mī lā bīī mɔ̍nɛ̍i̍. Lā kɔ̍ o̍ lɛ̄ŋndē Ba̍sīāŋnde̍ ni̍ŋ mī lā kɔ̍ cha᷅ŋ. Lā he᷄l o̍ pēmbūŋ Mo̍wa̍bī wo̍ŋ chōo̍ mī lā kɔ̍ bi̍ī mɔ̍nɛ̍i̍, fo̍ndōle̍, chāāŋāā nyāa̍ nya̍ a̍a̍ ti̍i̍nda̍ŋ nda̍ ā chūu̍.

²¹Bōōndi̍i̍ nya̍ wānu̍ŋ o̍ bā nyāa̍ chōo̍ mi̍ nyɛ̄ o̍ nyɛ̄ wā ō kɛ̄ndɛ̄ a̍ nya̍ ve̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā nāa̍ nya̍ chūā, mbo̍ sīlā nya̍ le̍ mī lā māŋga̍la̍ŋ. Kɛ̍ lā chɛ᷄l mī lā ya᷄ŋ ndu̍ lānī le̍. Ndu̍yɛ̍ chɔ̍ŋ a̍ chūāāmbɔ̄yɛ̍ī nyɛ̄i̍ mi̍ lā sōlī ndu̍ dīōm, o̍ bā kōŋ chōo̍ nya̍ lo̍ ni̍ ha̍a̍a̍ a̍ te̍le̍ŋndo̍ ho̍ō, lā chɛ᷄l mī lā tūsi̍ŋ o̍ dīōm ndɔ̄ɔ̍ bɛ̄ŋgu̍ le̍.

²²Le̍ he̍ī, wānāa̍ cho̍ nya̍ chīla̍ŋ nda̍ kpo̍u̍, ā chō nda̍ hūnɔ̄ɔ̄ bāsɔ̄ɔ̄ tɛ̍ɛ̍ mɛ̄ɛ̍ hūēīye̍ bāsū nu̍a̍ā nyɔ̄ɔ̍ mī ī kūɛ̄nu᷄ŋ a̍ ndu̍ yɛ̍. Chāāŋāā nyāa̍ nya̍ a̍a̍ ti̍i̍nda̍ŋ le̍ nya̍ mālāa̍ wa̍ ā chō nda̍ hūnɔ̄ɔ̄ bīū kpo̍u̍ mā kūɛ̄ a̍ nda̍ o̍ bīyɔ̄ɔ̍ ni᷄ŋ. Si̍ɔ̍mbu̍la̍ bɛ̄ndūla̍ŋ lā chō nya̍ hūnɔ̄ɔ̄ bīyɔ̄ɔ̄, mī lā tāmbu̍ lābɛ̄ɛ̄, kāni̍ fo̍ndōle̍, le̍ sɔ̄ɔ̍ŋ wɔ̍ɔ̍ŋ nya̍ tōsa̍ ki̍nɛ̍i̍ yo̍ŋ.

²³Nya̍ cho̍ o̍ chīɛ̄īlā kɛ̄ndɛ̄ kɛ̍ndɛ̄la̍ŋ ni᷄ŋ nda̍, chīɛ̄īla̍ cho̍ lā bɛ̄ɛ̄ndīāā a̍ yɔ̄mīī si̍dāāve̍ Le̍ba̍nɔ̄ŋ mi̍ lā wānu᷄ŋ o̍ pɛ̄ŋgīo̍o̍ ni᷄ŋ nyɛ̄ o̍ nyɛ̄ ō yɔ̍nūŋ a̍ nya̍ le̍ wa̍, lā chō hūnɔ̄ɔ̄ cha᷄ŋ mī lā nyūūmbu̍ŋ a̍ nyɛ̄ nɛ̄īyāa̍ mɛ̄ɛ̍ pūli̍i̍ vi̍a̍lɛ̄i̍ ī kpūwā nu̍a̍ā wāna̍ yo᷄llo̍, mbō wa̍ o̍ nyɛ̄ nɛ̄īyāā kōŋ ni᷄ŋ yɛ̍.

²⁴O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Chɛ̄hōwa̍chīŋ, māsāa̍ le̍ Chu̍dā, po̍ Māsāa̍ Chɛ̄hōwa̍kīm ndo̍, āā, “Chɛ̄hōwa̍chīŋ, ya̍ Mɛ̄lɛ̄ka̍ cho̍ yōōmū le̍ fɛ̍ɛ̍ŋ a̍ fɛ̍ɛ̍ŋ ndo̍ I̍ te̍ŋnu᷄ŋ, I̍ cho̍ nu̍m kɔ̄ɔ̍ mūlūl, nda̍ a̍a̍ yɔ̍ŋ bɛ̍ɛ̍ mī nūm o̍o̍ wa̍ māā kēlɛ̄i̍ ta̍mbūe̍i̍ye̍ o̍ sūēī ni̍i̍ bā kɛ̄ndɛ̄i̍, sōlīo̍o̍ ya̍ I̍ wa̍ nu̍m ni̍ po̍.

²⁵I̍ cho̍ nu̍m mālɔ̄ɔ̄ ya̍a̍mɔ̍ɔ̍wa̍a̍ nu̍mnda̍ a̍ cho̍ nɛ̄īla̍ŋ nūūvīa̍a̍ le̍ nu̍m dīyɔ̄ɔ̍ wa̍ o̍ bā, ya̍a̍mɔ̍ɔ̍wa̍a̍ sīōōŋnde̍ chō nu̍m chō bɛ̄ndōo̍ le̍ nda̍ wa̍, nda̍ yɔ̍nūŋ māā Māsāa̍ Nābi̍u̍kānɛ̍ɛ̍sā nda̍ so̍vɛ̄i̍ya̍a̍ kpāāyāā bɛ̍ndūa̍a̍ Ba̍bi̍lɔ̄ŋ ni̍.

²⁶Nūm ni̍, kālā nu̍m ni̍, I̍ cho̍ nya̍ tōūwɔ̄ɔ̄ mī so̍li̍ nya̍ o̍ lɛ̄ŋnde̍ŋ nde᷅ŋ ni᷄ŋ. Mī lā kɔ̍ wu᷅ o̍ lɛ̄ŋndē sūmīālte̍ŋ ni᷄ŋ.

²⁷Ā yēēmā ni̍ŋ le̍ mīīŋgōo̍ o̍ lɛ̄ŋnde̍ŋ nde᷅ŋ ni᷄ŋ, kɛ̍ a̍ mi̍i̍ŋgū lɛ̍ ni̍ŋ na̍nu᷄ŋ te̍.”

²⁸Chɛ̄hōwa̍chīŋ o̍ si̍mnu᷄ŋ ko̍ mɛ̄ɛ̍ kpɛ̍ɛ̍nɛ̍i̍ pi̍ɔ̍lɛ̍i̍ye̍ ī wā nu̍a̍ā o̍ sa᷄llo̍ chōo̍ wānā o̍ wānā ō he̍ū lɛ̍ bā a̍ ndi̍ le̍ yɛ̍. Ndu̍ ni̍, chūāā ndūa̍a̍ ni̍, ā chō nda̍ sōlī o̍ lɛ̄ŋnde̍ŋ nde᷅ŋ ni̍ŋ, mā kūɛ̄ a̍ nda̍ o̍ bīyɔ̄ɔ̍ ni̍ŋ o̍ lɛ̄ŋndē nda̍ si̍nā bɛ̍ɛ̍ le̍ le̍ŋ ni̍ŋ.

²⁹Ōo̍ lɛ̄ŋnde̍ŋ, tu̍e̍i̍ nyɛ᷅ ya̍ I̍ cho̍ dīmīo̍o̍ wo̍. Ya̍ŋ ni᷅la̍ŋ lɛ̄ŋnde̍ŋ mā tūēī. Tu̍e̍i̍ nyɛ᷅ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ lɛ̄ŋnde̍ŋ.

³⁰Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ cho̍ ho̍ō ni̍. Ō dīmi̍ āā, “Po̍o̍nyi̍a̍a̍ o̍ yāu̍ cho̍o̍ māā pōo̍ ho̍ō ō nɔ̍ lɛ̍ chūā o̍ chūā le̍, ndu̍yɛ̍ māā ō chō wu̍ le̍nde̍, dɛ̍nɛ̍ kɛ̍ndɛ̄ o̍ dɛ̍nɛ̍ kɛ̍ndɛ̄ ō cho̍ sɔ̍lā o̍ yōōmū ndɔ̄ɔ̍ ni᷄ŋ te̍. O̍ yu̍ŋgu̍ ndɔ̄ɔ̍ chōo̍ ki̍nɛ̍i̍, wāŋndo̍ ō pīlɛ̍ bɛ̍ɛ̍ ō di̍ī ni̍ŋ dɛ̍nɛ̍ le̍. Wāŋndo̍ ō pīlɛ̍ bɛ̍ɛ̍ ō sɔ̍lāŋ ni̍ŋ o̍ yu̍ŋgu̍ ndɔ̄ɔ̍ chōo̍ o̍ mi̍i̍ŋgū ni̍ŋ māsāa̍ Chu̍dā o̍ fōōfo̍ ndɔ̄ɔ̍ chōo̍ mbō cha᷄l o̍ kpe̍ŋgbe̍i̍ lēmāsa̍ Māsāa̍ Dēēvi̍o̍o̍ chōo̍ le̍.”