Read Southern Kisi Chɛ̄lūīma̍yā 24 Bible Online

Chɛ̄lūīma̍yā 24 - Southern Kisi bible

Chɛ̄lūīma̍yā 24

¹Bōōndi̍i̍ Māsa̍ Nābi̍u̍kānɛ̍ɛ̍sā, o̍ wa̍ Ba̍bi̍lɔ̄ŋ ndo̍ ō de᷄l lɛ̄ŋndē Chu̍dāle̍ŋ chōo̍ ve̍, Māsāa̍ Chɛ̄hōwa̍chīŋ o̍ wa̍ Chu̍dā wo̍, ndu̍ yɔ̍nūŋ māā po̍ Chɛ̄hōwa̍kīm ndo̍ ni̍, a̍ lāŋgba̍ā kālla̍ Chu̍dā, a̍ wānāa̍ cha̍ā nyɔ̍ɔ̍ŋ sīɔ̄lɔ̄ɔ̍ a̍ lābā chāā bɛ̄ndōo̍ wa̍, o̍ ko̍ŋ kɔ̍ɔ̍lī, a̍ wānāa̍ cha̍ā vɛ̍lɛ̄ nyɛ̄ a̍ lābā wa̍, mi̍ Māsāa̍ Nābi̍u̍kānɛ̍ɛ̍sā o̍ bi̍ī nda̍ kpo̍u̍ mbo̍ kūā a̍ nda̍ o̍ bīyɔ̄ɔ̍ ni̍ŋ Ba̍bi̍lɔ̄ŋ. Bōōndi̍i̍ nda̍ kūɛ̄ a̍ wāŋnda̍ ha̍ā o̍ bīyɔ̄ɔ̍ ni̍ŋ nde̍, ō wa̍ a̍ te̍le̍ŋ pi᷅lɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ chɔ᷄m ya̍ Chɛ̄lūīma̍yā yi̍lāŋndo̍. O̍ yi̍lāŋndo̍ ho̍ō ni᷄ŋ, mi̍ cha᷅ kāmbɛ̍i̍la̍ŋ la̍ŋ tīɔ̍ɔ̍ŋ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ dīō, a̍ fi̍kīi̍ya̍ŋ lēni᷄ŋ.

²Kāmbɛ̍i̍la̍ ti̍ɔ̍ɔ̍ŋnda̍ŋ nda᷅ŋ, ō pīlɔ̍ɔ̍ fi̍kīi̍ma̍ kɛ̍ndɛ̄ kɛ̍ndīa̍ŋ ma̍ wa̍ lēni᷄ŋ ni̍, fi̍kīi̍ma̍ tāse̍ma̍ ke̍lēŋā nu̍a̍ā di̍u̍wɔ̄ɔ̍ wa̍ŋ. Kāmbɛ̍i̍yo̍ ō pīlɔ̍ɔ̍ yɛ̍, fi̍kīi̍ma̍ wɔ̍ɔ̍ŋ nda̍ŋ ma̍ wa̍ lēni᷄ŋ ni̍, mā wa̍ mā wɔ̍ɔ̍ŋ ha̍a̍a̍, ma̍a̍ ni̍ŋ le̍ dīo̍ le̍.

³O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ nyu̍nā ya̍ āā, “Ō yɛ̄ɛ̍nɛ̍ ŋ̄ chō yɛ̄ chɔ̄ŋnɔ᷄ŋndo̍ o̍ hɔ̄l Chɛ̄lūīma̍yā?” Mi̍ di̍mūl ndu̍ āā, “Fi̍kīi̍ya̍ŋ ya̍ I̍ cho̍ chɔ̄ɔ̍ ni̍, mā kɛ̄ndɛ̄ kɛ̍ndīa̍ŋ, a̍ mā wɔ̄ɔ̍ŋnda̍ŋ, ma̍ ni̍ŋ bɛ̍ɛ̍ le̍ dīo̍ le̍ wa̍ŋ.”

⁴O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl la̍ āā,

⁵“Ya̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍, nyɛ̄ ya̍ I̍ di̍mi̍ a̍ fi̍kīi̍ma̍ kɛ̍ndɛ̄ kɛ̍ndɛ̄ mā ŋ̄ chē ma̍ŋ nda̍ŋ o̍kɔ̄ɔ̄ wo̍ cho̍ ho̍ō ni̍. Wānāā ya̍ I̍ to̍sa̍ ma̍ chūā nda̍ Chu̍dā ma̍ kūā a̍ nda̍ o̍ bīyɔ̄ɔ̍ ni̍ŋ Ba̍bi̍lɔ̄ŋ nda̍, mɛ̄ɛ̍ fi̍kīi̍ma̍ kɛ̍ndɛ̄ kɛ̍ndīa̍ŋ māŋ mā chō nu̍a̍ā yɛ̍, le̍nde̍ ya̍ Mɛ̍lɛ̄ka̍ chūa̍ nda̍ ni̍.

⁶I̍ cho̍ nda̍ hɔ̄lte̍ŋ hāndɔ̄ɔ̄ chōo̍, mī bi̍ī nda̍ nyɛ̄ kɛ̄ndɛ̄ kɛ̍ndɛ̍, ndu̍yɛ̍ mī so̍li̍ nda̍ o̍ bīyɔ̄ɔ̍ ni̍ŋ mī mi̍ŋgi̍ nda̍ o̍ lɛ̄ŋnde̍ŋ nde᷅ŋ ni᷄ŋ. Tē I̍ mi̍ŋgi̍ nda̍ na̍nu᷄ŋ pɛ̍, I̍ cho̍ nda̍ mīŋgī tāŋgūl ndu̍yɛ̍ fɛ̍ɛ̍ŋ a̍ fɛ̍ɛ̍ŋ I̍ tɛ̍ɛ̍mbūū lɛ̍ nda̍ le̍. I̍ cho̍ nda̍ kɛ̄sī o̍ lɛ̄ŋnde̍ŋ nde᷅ŋ ni᷄ŋ mɛ̄ɛ̍ nda̍ tūāl nu̍a̍ā yɔ̄mndo̍ yɛ̍ mā wa̍ na̍nu᷄ŋ le̍ fɛ̍ɛ̍ŋ a̍ fɛ̍ɛ̍ŋ.

⁷I̍ cho̍ nda̍ kɔ̄lta̍ŋ māŋgālā ni̍ŋ mi̍ to̍sa̍ mā sīna̍ ya̍ māā ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍. Ā chō hūnɔ̄ɔ̄ sīmnɔ᷄ŋ wa̍nāā nī, ndu̍yɛ̍ mī ya̍ bɛ̍ɛ̍ si̍mnu᷄ŋ Mɛ̍lɛ̄ka̍ ndā, fo̍ndōle̍, ā chō hūnɔ̄ɔ̍ mīīŋgū ya̍ Mɛ̍lɛ̄ka̍ o̍ ībūŋ a̍ kɔ̄ltā ndāla̍ŋ kpo̍u̍.

⁸“O̍ ko̍ŋ kɔ̍ɔ̍lī, fi̍kīi̍ma̍ wɔ̍ɔ̍ŋ mā ŋ̄ chē ma̍ŋ mā ni̍ŋ bɛ̍ɛ̍ le̍ dīo̍ le̍ wa̍ŋ, ma̍ŋ ma̍ si̍m le̍ Māsāa̍ Sɛ̄dīka̍yā o̍ cho̍ Chu̍dā wo̍, a̍ lāŋgba̍ā ndūāā ka᷅lla̍ o̍ māsāle̍ ndɔ̄le̍ŋ ni̍ŋ, a̍ wānāā tūa̍a̍ lo̍ yōōmū wa̍ ni̍, a̍ lo̍ o̍ lɛ̄ŋnde̍ŋ nde᷅ŋ ni᷄ŋ nda̍ ni̍, a̍ ā nda̍ kūɛ̄ o̍ bīyɔ̄ɔ̍ ni᷄ŋ I̍chi̍pī wa̍. Mɛ̄ɛ̍ fi̍kīi̍ma̍ wɔ̍ɔ̍ŋ māŋ mā chō nu̍a̍ā mā bɛ̄nda̍ lɛ̍ le̍ dīo̍ le̍ mɛ̄ɛ̍ vīōūwɔ̄ɔ̍ yɛ̍, le̍nde̍ ya̍ Mɛ̍lɛ̄ka̍ chō hūnɔ̄ɔ̄ tōsā a̍ wāŋnda̍ ha̍ā ni̍.

⁹Kpūndɛ̍ bɛ̄ndū ya̍ I̍ ha̍ndū ni̍ŋ wa᷅ŋnda̍ ha̍ā chōo̍ wo̍, lɛ̄ŋnde̍ o̍ chi̍e̍ēŋndo̍ ni᷄ŋ kpo̍u̍ sīōōŋīī bɛ̄ndūe̍i̍ chō nda̍ bīyɔ̄ɔ̄ a̍ kpūndɛ̍ kōŋ. I̍ cho̍ tōsā mā hu᷄ŋ sɛ̍ŋi̍ŋ a̍ nda̍ o̍ lɛ̄ŋnde̍ ni᷄ŋ kpo̍u̍. Ā chō nda̍ hūnɔ̄ɔ̄ māmɔ̄ɔ̄ o̍ lɛ̄ŋnde̍ ni᷄ŋ ndu̍yɛ̍ mā sīīŋgu̍u̍ nda̍ nyɛ̄m lāpīsu̍l. Ā chō hūnɔ̄ɔ̄ lābɛ̄ɛ̄ ta̍mbu̍ mī si̍ɔ̍mbu̍la̍ŋ lā bīī nda̍, ndu̍yɛ̍ mī wāŋnda̍ chūa̍ dīōlā ndāla̍ŋ māā tāāmāsi̍ le̍ wāŋnda̍ sēndi̍o̍o̍ hāndɔ̄ɔ̍ chōo̍.

¹⁰I̍ cho̍ nda̍ hūnɔ̄ɔ̄ tɛ̄ɛ̄mbūū a̍ chɔ̄ūla̍ŋ ndu̍yɛ̍ a̍ yīmā bɛ̄ndūa̍ŋ o̍ ko̍ŋ kɔ̍ɔ̍lī, a̍ nāālā wɔ̄ɔ̍ŋ wɔ̍ɔ̍ŋnda̍ŋ, ndu̍yɛ̍ mī chi̍i̍ nda̍ kpo̍u̍ o̍ lɛ̄ŋnde̍ŋ nde᷅ŋ ni᷄ŋ, lɛ̄ŋndē ya̍ I̍ ke̍ le᷅ŋ nda̍ nda̍ fi̍nyāā ndāā ma̍māa̍ le̍ŋ.”