Read Southern Kisi Chɛ̄lūīma̍yā 25 Bible Online

Chɛ̄lūīma̍yā 25 - Southern Kisi bible

Chɛ̄lūīma̍yā 25

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ ke᷅ ya̍ yōōŋgōo̍ a̍ wāŋnda̍ Chu̍dā kpo̍u̍ o̍kɔ̄ɔ̄. Wɔ̄sī Chɛ̄hōwa̍kīm, māsāa̍ le̍ Chu̍dā, po̍ Chōōsa̍yā wo̍ ō chīŋa̍ wɔ̄sīla̍ŋ lā hīɔ̍ɔ̍lu̍ o̍ lēmāsā Chu̍dā wo̍, wɔ̄sī kōŋ ya̍ I̍ sɔ̍la̍ yōōŋgōo̍ ho̍ō ni̍. Māsāa̍ Nābi̍u̍kānɛ̍ɛ̍sā, o̍ wa̍ Ba̍bi̍lɔ̄ŋ ndo̍ wɔ̄sī ndɔ̍ tāso̍o̍ o̍ māsāle̍ŋ chōo̍ ndu̍ wa̍ kōŋ ni̍.

²O̍ ko̍ŋ, mi̍ ya̍ Chɛ̄lūīma̍yā, wāna̍ su̍a̍ā le̍ Mɛ̄lɛ̄ka̍ wo̍ dīmūl wāŋnda̍ Chu̍dā, a̍ wāŋnda̍ Chūlu̍sɛ̄lɛ̄m kpo̍u̍ a̍a̍,

³“Chɔ̍ŋ a̍ wɔ̄sī Chōōsa̍yā, o̍ wa̍ māsāa̍ Chu̍dā wo̍, po̍ A̍mɔ̄ŋ ndo̍ ō chīŋa̍ wɔ̄sīla̍ŋ tɔ̍ a̍ lā yāa̍ o̍ lēmāsā wo̍, mbo̍ bīya᷅ŋ a̍ pāa̍le̍ hāūle̍ŋ nde᷅ŋ, Mɛ̄lɛ̄ka̍ Ya̍a̍wɛ̄ɛ̄ o̍ cho̍ ya̍ yōōŋgūla̍ŋ kīo̍o̍ le̍ nya̍ dīmūllo̍. Chɔ̍ŋ a̍ te̍le̍ŋ ko̍ŋ ō chō ni᷅ŋ hāū wɔ̍sīla̍ŋ bi̍di̍i̍ŋ a̍ lā yāa̍. Ndu̍yɛ̍ yōōŋgū o̍ yōōŋgū Mɛ̄lɛ̄ka̍ ō chō ya̍ kīo̍o̍ le̍ nya̍, ō pīlɛ̍ bɛ̍ɛ̍ I̍ kɛ̍ɛ̍ wɔ̍ nya̍ ndu̍ dīmūl te̍. Kɛ̍ lā chɛ᷄l mī lā ya᷄ŋ nyɛ̄ Mɛ̄lɛ̄ka̍ dīmi̍ wo̍ lānī le̍.

⁴Le̍ te̍le̍ŋ o̍ te̍le̍ŋ, Mɛ̄lɛ̄ka̍ Ya̍a̍wɛ̄ɛ̄ o̍ cho̍ bu̍ɛ̍i̍yāā ndūa̍a̍ su̍a̍ā le̍ ndu̍ wa̍ vīōmɔ̄ɔ̍ a̍ yōōŋgūla̍ŋ nāa̍ nya̍ chūā mā dīmūl nya̍, kɛ̍ lā chɛ᷄l mī lā tūēī Mɛ̄lɛ̄ka̍ dīōm te̍, kɛ̄lɛ̄ŋgāā le̍, mī lā ya᷄ŋ bɛ̍ɛ̍ ni᷅la̍ŋ o̍ nyɛ̄ o̍ di̍mūl nya̍ wo̍.

⁵Ma̍ dīmūl nya̍ māā Mɛ̄lɛ̄ka̍ dīmi̍ māā, wāŋnda̍ Chu̍dā, lā pɛ̄ŋgi̍ yɔ̍ŋndā wɔ̄ɔ̍ŋnda̍ŋ tōsāa̍, ndu̍yɛ̍ mī lā ma᷄l sɔ̄ɔ̍ŋ wɔ̄ɔ̍ŋ nya̍ chō tōsāa̍ wo̍ŋ. Ko̍ŋ to̍sā ni̍ mī lā cha᷄l o̍ lɛ̄ŋndē ya̍ Mɛ̍lɛ̄ka̍ Ya̍a̍wɛ̄ɛ̄ ke̍ nya̍ le᷅ŋ nya̍ fi̍nyāā nyāā ma̍māa̍ le̍ fɛ̍ɛ̍ŋ a̍ fɛ̍ɛ̍ŋ nde̍ŋ ni᷄ŋ.

⁶Lā tu̍āl nyɛ̄m chēle̍ŋndo̍ŋ kɔ̄ɔ̄lī, mī lā sōōlu̍u̍ mu̍ŋ ndu̍yɛ̍ mī lā sāāŋgi̍a̍l mu̍ŋ māā mɛ̄lɛ̄ka̍a̍ nyā le̍. Nyɛ̄ o̍ nyɛ̄ nya̍ tōōsi̍a̍a̍ a̍ bālā nyāla̍ŋ lā so̍o̍lūū ndu̍ le̍, yɔ̄ŋi̍ ya̍ Mɛ̍lɛ̄ka̍ dɔ̄ɔ̄nu̍ŋ tu̍mbe̍ a̍ nya̍. Tē lā tūsi̍ŋ o̍ nyɛ̄ ya̍ I̍ di̍mu̍l nya̍ wo̍ bɛ̄ŋgu̍ pɛ̍, I̍ tu̍sī nya̍ dɛ̍nɛ̍ pa̍lāā o̍ dɛ̍nɛ̍ pa̍lāā chōo̍ le̍.

⁷Mi̍ Mɛ̄lɛ̄ka̍ Ya̍a̍wɛ̄ɛ̄ pi̍la̍ o̍ wa᷅ ni̍ko̍ hi̍o̍u̍wɔ̄ɔ̍ lāchī a̍ sūɛ̍i̍ nāa̍ nya̍ chūā, mbo̍ dīmī māā, kɛ̍ lā chɛ᷄l mī lā tūsi̍ŋ o̍ dīōm nūu̍ bɛ̄ŋgu̍ le̍. Nyɛ̄m nya̍ pi̍la̍ tōōsi̍a̍a̍ a̍ bālā nyāla̍ŋ ndo̍ŋ, mi̍ lā chūā mu̍ŋ māā mɛ̄lɛ̄ka̍a̍ nyā, o̍ ko̍ŋ, mi̍ lā tōsā mi̍ ya̍ Mɛ̍lɛ̄ka̍ dūāūnu᷄ŋ tu̍mbe̍ a̍ nya̍. Nya̍ pi̍la̍ kpe̍e̍kpe̍i̍ nu̍u̍va̍ dɛ̍nɛ̍ pa̍lāā bɛ̄ndu̍ to᷅l nya̍ chōo̍ wo̍ ni̍.

⁸Le̍la̍ŋ, nyɛ̄ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ ō dīmi̍ a̍ nya̍ o̍kɔ̄ɔ̄ wo̍ cho̍ ho̍ō ni̍.” Ō dīmi̍ āā, “Le̍ kɛ̄ɛ̄ nya̍ kɛ̄ɛ̍ ya̍ dīōmndo̍ tūēīyɔ̄ɔ̍ wo̍,

⁹I̍ cho̍ pūa̍a̍ chɔ̄ūwāa̍ cho̍ bā lūāŋndo̍ wa̍ chūūŋgīāā nāa̍ pi᷅lɛ̍, mī ve᷅m nda̍ lātūlu̍ nda̍ wāna̍ ya̍ I̍ cho̍ vīōmɔ̄ɔ̄ māā bu̍ɛ̍ī nī wo̍, ndu̍ yɔ̍nūŋ māā Māsāa̍ Nābi̍u̍kānɛ̍ɛ̍sā o̍ cho̍ Ba̍bi̍lɔ̄ŋ ndo̍ ni̍, mā hu᷄ŋ chi᷅ŋa̍la᷅ŋ lɛ᷅ŋndē Chu̍dāle̍ŋ nde᷅ŋ ndu̍yɛ̍ a̍ wānā o̍ wāna̍ cho̍ o̍ lɛ̄ŋnde̍ŋ nde᷅ŋ ni᷄ŋ ndu̍yɛ̍ o̍ ko̍ŋ kɔ̍ɔ̍lī, a̍ lɛ̄ŋīi̍ ba̍lu̍ Chu̍dā ve̍ kpo̍u̍. Lɛ̄ŋndē Chu̍dāle̍ŋ ni̍, lɛ̄ŋīi̍ ba̍lu̍ le̍ŋ nde̍ ni̍, I̍ cho̍ ndi̍ tɛ̄ɛ̄mbūū mī to̍sa̍ mī ī sīmnu᷄ŋ pɔ᷅mnda̍ŋ le̍ fɛ̍ɛ̍ŋ a̍ fɛ̍ɛ̍ŋ. Wānā o̍ wānā cho̍ hūnɔ̄ɔ̄ lɛ̄ŋnde̍ he̍ī chɔ̄, mī sīōōŋīī bɛ̄ndūe̍i̍ ī bīī ndu̍. Ndu̍yɛ̍ wāŋnda̍ chō ndi̍ hūnɔ̄ɔ̄ nūā mā sīɔ̄ɔ̄ndi̍a̍a̍ ndi̍, ndu̍yɛ̍ mī ī tāmbu̍ lābɛ̄ɛ̄ mī si̍ɔ̍mbu̍la̍ŋ lā bīī ndi̍ o̍ chi̍e̍ēŋndo̍ ni᷄ŋ.

¹⁰Bɔ̄ɔ̄lūū nya̍a̍le̍ ni̍, bɔ̄ɔ̄lūū kɔ̄l kɛ̄ndɛ̄ ni̍, o̍ ko̍ŋ kɔ̍ɔ̍lī, a̍ bɔ̄ɔ̄lūū kɔ̄l kɛ̄ndɛ̄ bɛ̄ndu̍ yɔ̍nūŋ o̍ bɔ̄ŋa᷅ŋndā nɔ̄la̍ kɛ̍sīāā la̍ŋ chōo̍ wo̍, la̍ŋ kpo̍u̍ lā chō hūnɔ̄ɔ̄ chūwɔ̄ɔ̄ o̍ lɛ̄ŋnde̍ he̍ī ni̍ŋ. Chu᷄la̍ wāŋ lāāndūa̍a̍ ā chu̍ la̍ŋ kpo̍u̍ lā chō hūnɔ̄ɔ̄ mɛ̄ɛ̄lū. O̍ ko̍ŋ kɔ̍ɔ̍lī, la̍mbūi̍la̍ wāŋnda̍ mɛ̄ndūl chi̍ɛ̍īla̍ŋ ni᷄ŋ nda̍ŋ bɛ̍ɛ̍ lā ve᷅m lɛ̍ ni̍ŋ mɛ̍ndūlɔ᷄ŋ te̍.

¹¹Lɛ̄ŋndē Chu̍dāle̍ŋ kpo̍u̍ lē chō hūnɔ̄ɔ̄ sīmnɔ᷄ŋ pɔ᷅m. Ndu̍yɛ̍ lɛ̄ŋīi̍ ba̍lu̍ Chu̍dā ve̍ kpo̍u̍ ī chō hūnɔ̄ɔ̄ wā Māsāa̍ Ba̍bi̍lɔ̄ŋ o̍ bā bɛ̄ŋgu̍ ndu̍yɛ̍ mī ī sāāŋgi̍a̍l ndu̍ le̍ wɔ̄sīla̍ŋ be̍le̍-ŋɔ̍mmɛ̍ū.

¹²Kɛ̍ ndu̍yɛ̍ tē wɔ̄sīlā be̍le̍ŋ ŋɔ̍mmɛ̍ūlā lāŋ lā hīōū pɛ̍, Māsāa̍ Ba̍bi̍lɔ̄ŋ ni̍, wāŋnda̍ Ba̍bi̍lɔ̄ŋ ni̍, I̍ cho̍ nda̍ hūnɔ̄ɔ̄ nyɛ̄ pālāā bɛ̄ndōo̍ tūsī chōo̍, fo̍ndōle̍, le̍ yɔ̄ŋndā ndāla̍ wɔ̍ɔ̍ŋnda̍ŋ. I̍ cho̍ hūnɔ̄ɔ̄ lɛ̄ŋndē Ba̍bi̍lɔ̄ŋ nde̍ŋ tɛ̄ɛ̄mbūū ndu̍yɛ̍ mī to̍sa̍ mī lē sīmnu᷄ŋ pɔ᷅mndo̍ le̍ fɛ̍ɛ̍ŋ a̍ fɛ̍ɛ̍ŋ.

¹³Kpūndɛ̍ o̍ kpūndɛ̍ ya̍ I̍ di̍mi̍ le̍ lɛ̄ŋnde̍ tūsīo̍o̍ chōo̍ ndu̍yɛ̍ mi̍ du̍a̍ū ndu̍ Chɛ̄lūīma̍yā o̍ sōndō mbo̍ dīmūl wāŋnda̍ a̍ ndu̍ a̍ ndu̍ o̍kɔ̄ɔ̄, la̍ŋ la̍ yɔ̍nūŋ māā kpūndɛ̍la̍ cho̍ lā pōōnyīāā o̍ yāu̍wo̍ ho̍ō ni᷄ŋ ki̍nɛ̍i̍ la̍ŋ ni̍, I̍ cho̍ la̍ŋ hūnɔ̄ɔ̄ lɛ̄ŋndē Ba̍bi̍lɔ̄ŋnde̍ŋ tūsī chōo̍ kpo̍u̍.

¹⁴Nda̍ bɛ̍ɛ̍ lɛ̄ŋīī bɔ̄ɔ̍ bɔ̍ɔ̍ I̍ cho̍ māsāa̍ kpāāyāā bɛ̍ndūa̍a̍ o̍ bā bɛ̄ŋgu̍ ve̍ ā chō nda̍ hūnɔ̄ɔ̄ bīyɔ̄ɔ̍ mā kūɛ̄ a̍ nda̍ o̍ bīyɔ̄ɔ̍ ni᷄ŋ. Nyɛ̄ o̍ nyɛ̄ nda̍ tōsa̍ nda̍ bɛ̍ɛ̍ I̍ cho̍ nda̍ hūnɔ̄ɔ̄ pāāwā kōŋ kē.”

¹⁵O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍ ō dīmūl la̍ āā, “Bi̍i̍ ta̍a̍lāa̍ ho̍ō ya̍ o̍ bā, o̍ cho̍ ō pīāā a̍ mūɛ̄īmā nīa̍a̍ŋ ndo̍, ma̍ŋ ma̍ yɔ̍nūŋ ni̍ māā tu̍mbe̍ ya̍ Mɛ̍lɛ̄ka̍ dɔ̄ɔ̄nu᷄ŋ ndo̍, mā ba̍lu̍ a̍ ndu̍ o̍ lɛ̄ŋīī ya̍ I̍ cho̍ nu̍m vīōmɔ̄ɔ̄ a̍ ndu̍ ve̍ ni̍ŋ, mā to̍sa̍ mī lɛ̄ŋīī kēŋ kpo̍u̍ a̍ ko̍l ma̍ŋ.

¹⁶Lēlɛ̄ŋ o̍ lēlɛ᷄ŋ le̍ ko̍l mūɛ̄īya̍ŋ māŋ pɛ̍, ma̍ŋ ma̍ yɔ̍nūŋ māā tu̍mbe̍ nūu̍ ni̍, mūɛ̄īya̍ŋ māŋ mā chō wānāa̍ cho̍ o̍ lɛ̄ŋndē lēŋ ni᷄ŋ nda̍ bīyɔ̄ɔ̄ nda̍ kpo̍u̍ mā sēēmi̍a̍a̍ a̍ ma̍ŋ, fo̍ndōle̍, I̍ cho̍ ya̍a̍mɔ̍ɔ̍wa̍ vīōmɔ̄ɔ̄ a̍ mɔ̄ɔ̄ŋ fāŋndo̍ŋ mā kɔ̍ de᷅l lɛ̄ŋndē lēŋ chōo̍ a̍ sɔ̍ŋgɔ̄ɔ̍.”

¹⁷O̍ ko̍ŋ, mi̍ bi̍ī tāālāa̍ ho̍ō Mɛ̄lɛ̄ka̍ Ya̍a̍wɛ̄ɛ̄ o̍ bā, mi̍ ba̍lū a̍ ndu̍ o̍ lɛ̄ŋīī o̍ ve᷅mm ya̍ māā ya̍ I̍ ba̍lu̍ a̍ ndu̍ ve̍ ni᷄ŋ, mi̍ to̍sā mi̍ lɛ̄ŋnde̍ he̍ī ī kōl mūɛ̄īma̍ wa̍ o̍ tāālāa̍ ho̍ō ni᷄ŋ nda̍ŋ, ma̍ŋ ma̍ yɔ̍nūŋ māā tu̍mbe̍ ndɔ̄ɔ̍ ni̍.

¹⁸Mi̍ ku̍ā a̍ tāālāa̍ ho̍ō Chūlu̍sɛ̄lɛ̄m chi̍e̍e̍, ndu̍yɛ̍ a̍ o̍ chi̍o̍o̍ŋ ŋ̄pīlɔ̍ŋ Chu̍dā kpo̍u̍. Māsāā bɛ̍ndūa̍a̍ o̍ chi̍o̍o̍ŋ mu᷅ŋ ndu̍yɛ̍ a̍ lāŋgba̍ā ndāā ka᷅lla̍ nda̍ kpo̍u̍ ma̍ kōl mūɛ̄īya̍ŋ māŋ, le̍ mī chi̍e̍e̍ŋ ndāŋ mu̍ŋ ŋ̄ pīɔ̍l mī ŋ̄ sīmnu᷄ŋ pɔ᷅mnda̍ŋ, le̍ mī chi̍e̍e̍ŋ nda̍ŋ ŋ̄ sīmnu᷄ŋ fo̍ndāŋndā wāŋnda̍ chē mā sīɔ̄ɔ̄ndi̍a̍a̍, le̍ mī dīōlā ndāla̍ŋ lā sīmnu᷄ŋ nyɛ᷅ tūwāā māā tāāmāsi̍ le̍ wāŋnda̍ sēndi̍o̍o̍ hāndɔ̄ɔ̍ chōo̍. Ndu̍yɛ̍ mi̍ ī yɔ̄nu᷄ŋ a̍ chi̍o̍o̍ŋ mu᷅ŋ mɛ̄ɛ̍ Mɛ̄lɛ̄ka̍ dīmi̍ yɛ̍. Ndu̍yɛ̍ chɔ̍ŋ a̍ te̍le̍ŋ ko̍ŋ mbo̍ bīya᷅ŋ a̍ te̍le̍ŋndo̍ ho̍ō, o̍ bā kōŋ chōo̍ ŋ̍ cho̍ ni̍.

¹⁹Wānāā ya̍ I̍ to̍sa̍ ma̍ kōl o̍ tāālāa̍ ho̍ō ni᷄ŋ nda̍ a̍ cho̍ ha̍ā ni̍. Māsā bɛ̍ndōo̍ I̍chi̍pī a̍ wānāa̍ wa̍ ndu̍ wa̍llo̍ o̍ bā bɛ̄ŋgu̍ wa̍, māsāa̍ ndūāā pɔ̍mbūa̍a̍, a̍ wāŋnda̍ I̍chi̍pī kpo̍u̍, ndu̍yɛ̍ a̍ wānāā lēkāa̍wa̍a̍ wa̍ nda̍ tɛ̄ɛ̄ŋ nda̍, a̍ māsāā bɛ̍ndūa̍a̍ o̍ lɛ̄ŋndē U̍sīle̍ŋ ni᷄ŋ kpo̍u̍, a̍ māsāa̍ o̍ chi̍e̍e̍ŋ bɛ̍ndūŋ māFīli̍i̍tīāŋ ndo̍ŋ ni᷄ŋ, mu̍ŋ yɔ̍nūŋ ni̍ māā A̍si̍kɛ̍lɔ̄ŋ, a̍ Ka̍a̍sā, a̍ Ɛ̍ki̍lɔ̄ŋ ndu̍yɛ̍ o̍ wānāā tūa̍a̍ lo̍ A̍si̍dɔ̍dī chi̍e̍e̍ wa̍, O̍ ko̍ŋ kɔ̍ɔ̍lī, a̍ wāŋnda̍ o̍ lɛ̄ŋndē I̍dɔ̄mnde̍ŋ ni᷄ŋ, a̍ lɛ̄ŋndē Mo̍wa̍bīle̍ŋ, a̍ lɛ̄ŋndē A̍mɔ̄ŋnde̍ŋ, a̍ māsāā bɛ̍ndūa̍a̍ kpo̍u̍ Ta̍a̍yā chi̍e̍e̍, a̍ Sa̍i̍dɔ̄ŋ chi̍e̍e̍, a̍ māsāā bɛ̍ndūa̍a̍ o̍ lɛ̄ŋīi̍ ho̍lnu̍ŋ pe̍e̍ mɛ̄ŋmā īhɛ᷄llo̍ ve̍ ni᷄ŋ, a̍ chi̍e̍e̍ŋ bɛ̍ndo᷄ŋ mu᷅ŋ kpo̍u̍, mu̍ŋ yɔ̍nūŋ ni̍ māā Dɛ̍dāŋ, a̍ Tɛ̍mā, a̍ Bu̍u̍sī, a̍ wānāa̍ ki̍lī yi̍īŋnde̍ lēchōo̍ mī ī lo̍ ī bīŋgī bi̍ŋgī wa̍(...)

²⁷Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl la̍ āā, “Di̍mu̍l wa᷅ŋnda̍ ha̍ā māā Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍, I̍sɔ̄lūɛ̍i̍ya̍ Mɛ̄lɛ̄ka̍ ndāa̍ nyɛ̄ ō dīmi̍ wo̍ cho̍ ho̍ō ni̍, ō dīmi̍ āā, ‘Lā ko᷄l mu̍ɛ̍īma̍ cho̍ o̍ tāālāa̍ ho̍ō ni᷄ŋ nda̍ŋ, ma̍ŋ ma̍ yɔ̍nūŋ māā tu̍mbe̍ nūu̍ ni̍. Lā ko᷄l ma̍ŋ mī mā bīī nya̍ bīyɔ̄ɔ̍ pīla̍, ndu̍yɛ̍ mī lā kūūsu̍u̍ a̍ ma̍ŋ. Mūɛ̄īya̍ŋ māŋ mā chō nya̍ bīyɔ̄ɔ̄ mī lā dēli̍ lɛ̍ɛ̍si̍ɛ̍ŋ a̍ ma̍ŋ, ndu̍yɛ̍ lā nɔ̍lā ni̍ŋ mī lā chɛ᷄ŋ te̍. Bīyɔ̄ɔ̄ ko̍ŋ yɔ̍nūŋ ni̍, māā ya̍a̍mɔ̍ɔ̍wa̍a̍ ya̍ Mɛ̍lɛ̄ka̍ yɔ̄ŋ ni̍ŋ a̍ mɔ̄ɔ̄ŋ fāŋndo̍ŋ le̍ nya̍ tɛ̄ɛ̄mbūū wo̍ wa̍.’

²⁸Ndu̍yɛ̍ tē wāŋnda̍ ha̍ā ā kɛ̄ɛ̍ le̍ tāālāa̍ ho̍ō bīyɔ̄ɔ̍ mā ko᷄l mūɛ̄īma̍ cho̍ lēni᷄ŋ nda̍ŋ pɛ̍, a̍ di̍mu̍l nda̍ āā, ‘Mɛ̄lɛ̄ka̍ Ya̍a̍wɛ̄ɛ̄ Mɛ̄lɛ̄ka̍ nɔ̍ kpāāyāa̍ kpo̍u̍ wo̍, nyɛ̄ o̍ di̍mi̍ wo̍ cho̍ ho̍ō ni̍. Ō dīmi̍ āā, “Lā nɔ̄ mī lā ko᷄l mūɛ̄īma̍ cho̍ o̍ tāālāa̍ ho̍ō ni᷄ŋ nda̍ŋ.

²⁹I̍ di̍mi̍ lɔ̍ nya̍, chi̍e̍e̍ cho̍ bɛ̍ɛ̍ le̍ ya̍ kɛ̍sɛ̍ kɛ̍sɛ̍ mbō nɔ̄ dīōlā nīla̍ŋ ndu̍ chōo̍ wo̍, I̍ ka̍ndu̍ ni᷅ŋ bɛ̍ɛ̍ ndu̍ nyɛ̄ pālāa̍ tūsīo̍o̍ chōo̍. Tē I̍ to̍sa̍ wɔ̄ ke̍ŋ a̍ chi̍e̍e̍ nūu̍ pɛ̍, ɔ̍ɔ̄ nya̍? Bāā mī ma̍l nya̍ I̍ tu̍sī nya̍ nyɛ̄ pālāa̍ chōo̍ le̍? Dɛ̍nɛ̍ pa̍lāa̍ ya̍ I̍ tu̍sī nya̍ chōo̍ ni̍. I̍ cho̍ chɔ̄ūwo̍ mālɔ̄ɔ̄ o̍ lɛ̄ŋnde̍ ni᷄ŋ kpo̍u̍ o̍ chi̍e̍ēŋndo̍ ni᷄ŋ. Ya̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nɔ̍ kpāāyāa̍ kpo̍u̍ wo̍ ya̍ so̍ō ni̍.” ’

³⁰“Chɛ̄lūīma̍yā, nyɛ̄ o̍ nyɛ̄ ya̍ Mɛ̍lɛ̄ka̍ chō nu̍m dɔ̄wɔ̄ɔ̍ o̍ sōndō le̍ wāŋnda̍ ha̍ā, di̍mu̍l nda̍ ndu̍ kpo̍u̍. Di̍mu̍l nda̍ māā, te̍le̍ŋ cho̍ fūūlūū mɛ̄ɛ̍ kpɔ̍kūŋndo̍ ō wā nu̍a̍ā pɛ̄ɛ̄līa̍a̍ le̍ kɔ̄la̍ŋ vīsīo̍o̍ dēlɔ̄ɔ̍ chōo̍ yɛ̍, le̍nde̍ Mɛ̄lɛ̄ka̍ Ya̍a̍wɛ̄ɛ̄ o̍ wa᷅ ni̍ŋ pɛ̍ɛ̍līa̍a̍ o̍ fo̍ndā ndɔ̄ɔ̍ chōo̍ cho̍o̍ le̍ ya̍a̍mɔ̍ɔ̍wa̍a̍ ndūa̍a̍ chīŋa̍la᷅ŋndo̍ ni̍. Mɛ̄ɛ̍ ta᷅ŋnda̍ŋ mā dēŋī nu̍a̍ā yɛ̍, le̍nde̍ o̍ wa᷅ ni̍ŋ de̍ŋīo̍o̍ nāa̍ o̍ cho̍ īchāli̍ o̍ fo̍ndā ndɔ̄ɔ̍ chōo̍ cho̍o̍ wa̍ ni̍. Ō wā ni̍ŋ wa̍nāā ndūa̍a̍ pɛ̄ɛ̄līa̍a̍ chōo̍ kpe̍e̍kpe̍i̍ a̍ kpāāyā bɛ̍ndōo̍ le̍ nda̍ tɛ̄ɛ̄mbūūwo̍. Ō wā ni̍ŋ de̍ŋīo̍o̍ mbō nīɔ̄ū nīɔ̄ū wa᷅ŋnda̍ o̍ chi̍e̍ēŋndo̍ ni᷄ŋ le̍ nda̍ tɛ̄ɛ̄mbūūwo̍ mɛ̄ɛ̍ wāŋnda̍ nīɔ̄ū nīɔ̄ū nu̍a̍ā Kīle̍pīi̍ma̍ di̍u̍wa̍ŋ le̍ mūɛ̄īya̍ŋ to̍o̍sīa̍a̍ yɛ̍.

³¹Tē ō hu᷄ŋ wa᷅ dēŋīo̍o̍ pɛ̍, dīōm ndɔ̄ɔ̍ ō fūūlūū ni̍ŋ ba᷅ o̍ bā fe̍e̍ o̍ chi̍e̍ēŋndo̍ ni᷄ŋ. Nyɛ̄ o̍ nyɛ̄ lɛ̄ŋnde̍ o̍ chi̍e̍ēŋndo̍ ni̍ŋ i̍ to̍sa̍ a̍ Mɛ̄lɛ̄ka̍ Ya̍a̍wɛ̄ɛ̄, ō chō nda̍ mu̍ŋ hūnɔ̄ɔ̄ chɔ̄m chōo̍. Wāŋnda̍ kpo̍u̍ o̍ chi̍e̍ēŋndo̍ chōo̍ ō chō nda̍ hūnɔ̄ɔ̄ yāmɛ̍i̍ kīlūl le̍ nyɛ̄ nda̍ tōsa̍ wo̍. Ndu̍yɛ̍ wānāā dɛ̍nɛ̍ wɔ̍ɔ̍ŋnda̍ ki̍nɛ̍i̍ mbō tōsa̍ mā dīu̍ nda̍ a̍ mɔ̄ɔ̄ŋ fāŋndo̍ŋ. Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ ndu̍ wa̍ ko̍ŋ ni̍.”

³²Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ ō dīmi̍ āā, “Mī di̍mu̍l nya̍! Kpūndɛ̍ bɛ̄ndōo̍ ō hīŋ tīū o̍ lɛ̄ŋnde̍ ni᷄ŋ kpo̍u̍, ō chɛ̍ŋ pɛ̍ o̍ lɛ̄ŋnde̍ŋ lē pīlɛ̍ le̍ŋ ō hīōū o̍ lē pīlɛ̍ le̍ŋ. Hūēīyīī tɔ̍ɔ̍mɛ̍i̍ bɛ̄ndūi̍i̍ tɛ̍ɛ̍mbūū ni̍ŋ nyɛ᷅ o̍ nyɛ̄ fe̍e̍ ve̍ ī chō chɔ̄nɔ᷄ŋndo̍ o̍ fo̍ndāŋndā lēvīltā bɛ̄ŋnda̍ŋ o̍ chi̍e̍ēŋndo̍ ni᷄ŋ.”

³³Ndu̍yɛ̍ tē te̍le̍ŋ Mɛ̄lɛ̄ka̍ ō chō ho̍ō dīmīo̍o̍ wo̍ ō fūūlu̍u̍ pɛ̍, wānāā Mɛ̄lɛ̄ka̍ Ya̍a̍wɛ̄ɛ̄ o̍ di̍ū ni̍ŋ nda̍, ā wā ni̍ŋ a̍ ti̍u̍wāā bā o̍ bā fe̍e̍ o̍ chi̍e̍ēŋndo̍ ni̍ŋ. Ndu̍yɛ̍ wānā o̍ wānā o̍ che᷅ŋ ni̍ŋ wa᷅ŋnda̍ ha̍ā le̍. Wānā o̍ wānā o̍ chu̍ē ni̍ŋ nda̍ mbō chɔ̍ nda̍ le̍. Ā wā ni̍ŋ i̍hi̍ni̍ a̍ vi̍lɛ̍i̍ya̍ le̍nde̍ lɛ̍ɛ̍si̍ɛ̍ŋ ā tīūwāā ba᷅ o̍ bā fe̍e̍, mɛ̄ɛ̍ pōōla̍ŋ lā wā nu̍a̍ā lā tīūwāā o̍ fo̍ndāa̍ yɛ̍.

³⁴Lā cha᷄ŋ mī lā kōŋu̍l chōo̍ cho̍o̍ kpe̍le̍ŋ, nya̍ cho̍ ha̍ā wāŋnda̍ chīla̍ŋ māā wānāā māndāā lāsāā wa̍. Lā de᷄l lɛ᷅ŋ a̍ cha᷄ŋndo̍ mī lā yūūli̍a̍ŋ o̍ chu̍ndo̍o̍ ni̍ŋ, nya̍ wānāā bɛ̄ndūa̍a̍ cho̍ ha̍ā sāa̍ ha̍ā bōlle̍ŋ nda̍, fo̍ndōle̍, te̍le̍ŋ nda̍ nɔ̄ le̍ nya̍ dīūwo̍ wo̍ ō fūūlu̍u̍. Ā chō nya̍ hūnɔ̄ɔ̄ sīɔ̍ŋ mɛ̄ɛ̍ nda̍ dīī nu̍a̍ā sāa̍ mā sɛ̄ŋ ndu̍ yɛ̍.

³⁵Ndu̍yɛ̍ lā nɔ᷅ ni̍ŋ ba᷅ o̍ bā nya̍ vīāŋnūŋ te̍. Nɛ̄ī o̍ nɛ̄ī cho̍ mī lā lōōku̍ hīɔ̄lɔ᷄ŋ te̍.

³⁶Tu̍e̍i̍ yɔ̍ wa̍nāa̍ cho̍ wāŋnda̍ chīla̍ŋ māā wānāā māndāā lāsāā wa̍ cha᷄ŋnda̍ŋ ya̍ o̍ lānī se᷅. Wāŋ bɛ̄ndūa̍a̍ cho̍ sāa̍ ha̍ā bōlle̍ŋ nda̍ ā chō kōŋu̍llo̍ chōo̍ cho̍ kpe̍le̍ŋ, fo̍ndōle̍ Mɛ̄lɛ̄ka̍ Ya̍a̍wɛ̄ɛ̄ o̍ hi᷅ŋ fo̍ndā nda̍ māndā sa̍a̍ wo̍ tɛ̄ɛ̄mbūū.

³⁷Fo̍ndā nda̍ kɔ̄l nyūlū bɛ̄ndōo̍, ndu̍ yɔ̍nūŋ māā lɛ̄ŋndē ndāle̍ŋ ni̍, ō chō hūnɔ̄ɔ̄ sīmnɔ᷄ŋ po̍llo̍, a̍ tu̍mbe̍ Mɛ̄lɛ̄ka̍ Ya̍a̍wɛ̄ɛ̄ o̍ dɔ̍u̍nu᷄ŋ a̍ nda̍ o̍ ka̍lā ka̍lā wo̍.

³⁸Mɛ̄ɛ̍ kpɔ̍kūŋndo̍ ō māl nu̍a̍ā būūlu̍ ndɔ̄ɔ̍ mbō kūɛ̄nu᷄ŋ yɛ̍, le̍nde̍ Mɛ̄lɛ̄ka̍ Ya̍a̍wɛ̄ɛ̄ o̍ ma̍l wānāā ndūa̍a̍ ni̍. Lɛ̄ŋndē ndāle̍ŋ lē chō hūnɔ̄ɔ̄ tāmbu̍ mī lē sīmnu᷄ŋ po̍llo̍, fo̍ndōle̍, ya̍a̍mɔ̍ɔ̍wa̍ chō le̍ŋ hūnɔ̄ɔ̄ dēlɔ̄ɔ̄ chōo̍ a̍ mɔ̄ɔ̄ŋ fāŋndo̍ŋ. Ndu̍yɛ̍ Mɛ̄lɛ̄ka̍ Ya̍a̍wɛ̄ɛ̄ o̍ dɔ̍u̍nu̍ŋ tu̍mbe̍ a̍ nda̍ o̍ ka̍lā ka̍la̍.