Read Southern Kisi Chɛ̄lūīma̍yā 27 Bible Online

Chɛ̄lūīma̍yā 27 - Southern Kisi bible

Chɛ̄lūīma̍yā 27

¹Mɛ̄ɛ̍ Sɛ̄dīka̍yā, po̍ Chōōsa̍yā wo̍ ō sīmnu᷄ŋ ma̍sāa̍ le̍ Chu̍dā, ō bēndu̍ ti᷅ŋ te̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ ke᷅ ya̍ Chɛ̄lūīma̍yā yōōŋgōo̍.

²Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl la̍ māā, to̍o̍si̍a̍a̍ yūe̍i̍ a̍ yāu̍ vīsīo̍o̍ mā lo̍ o̍ ko̍ŋ, mā yi̍i̍ yɔ̄mīī sīŋgāfīlɛ̄i̍ a̍ ndi̍, mɛ̄ɛ̍ nda̍ tōōsīāā nu̍a̍ā yɔ̄mnde̍ le̍ nāūwāā wāa̍ hāndɔ̄ɔ̍ o̍ lākɛ̄su̍ yɛ̍, mā ha̍ndu̍ŋ ndi̍ o̍ īkɛ̄su̍.

³Mā lo̍ o̍ ko̍ŋ mā yɔ̍ŋ dīōmnde̍ŋ o̍ māsāā yɛ̍ yi̍a̍a̍ cho̍ o̍ chi̍o̍o̍ŋ mu᷅ŋ nda̍ lo̍, mu̍ŋ yɔ̍nūŋ ni̍ māā, Mo̍wa̍bī, a̍ A̍mɔ̄ŋ, a̍ Ta̍a̍yā, a̍ Sa̍i̍dɔ̄ŋ. Wānāā Māsāa̍ ha̍ā ā vēm Chūlu̍sɛ̄lɛ̄m nāa̍ Māsāa̍ Sɛ̄dīka̍yā chu̍a̍ māā hɔ̄ltē ndā wa̍, a̍ wāŋnda̍ ha̍ā sa̍na̍a̍ ŋ̄ yɔ᷄ŋ di̍ōmnde̍ŋ nde᷅ŋ nāa̍ nda̍ chūa̍ ni̍.

⁴Di̍mu̍l wa̍nāā nda̍ vēm ka̍ŋ nda̍ yōōŋgōo̍ ho̍ō mā kūɛ̄ ma̍ kɔ̍ di̍mūl wānāā ndāā ba̍nāa̍. Di̍mu̍l nda̍ māā Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ kpu̍lu̍ŋgūma̍ bɛ̄ndōo̍, ō wāŋnda̍ I̍sɔ̄lūɛ̄ī a̍ pi̍ɛ̍īyo̍ nyɛ̄ o̍ di̍mi̍ wo̍ cho̍ ho̍ō ni̍, ō dīmi̍ āā,

⁵“Ya̍ Mɛ̍lɛ̄ka̍, a̍ kpāāya̍ nī bɛ̍ndōo̍, ndu̍yɛ̍ a̍ dīāllūŋ nīŋ ka̍la̍ŋ, ya̍ I̍ to̍o̍si̍a̍a̍ chi̍e̍ēŋndo̍ ho̍ō ni̍, a̍ wāŋndā chi̍e̍e̍ya̍a̍ cho̍ lēni᷄ŋ nda̍ ndu̍yɛ̍ a̍ vīsīa̍a̍ cho̍ lēni᷄ŋ nda̍. Ndu̍yɛ̍ wāna̍ ya̍ I̍ ye̍e̍mā le̍ nyɔ̄ɔ̍ŋ mu᷅ŋ kīo̍o̍ wo̍, ndu̍ ya̍ I̍ ke᷅ ni̍.

⁶Le̍la̍ŋ lɛ̄ŋīī nyɛ̄i̍ kpo̍u̍, I̍ cho̍ ndi̍ chūā mi̍ ke̍ bu̍ɛ̍ī nūu̍ Nābi̍u̍kānɛ̍ɛ̍sā, o̍ cho̍ māsāa̍ le̍ Ba̍bi̍lɔ̄ŋ ndo̍ mī ī wa̍ ndu̍ o̍ bā bɛ̄ŋgu̍. Vīsīa̍a̍ cho̍ bɛ̍ɛ̍ yo̍ndōla̍ŋ ni᷄ŋ o̍ lɛ̄ŋnde̍ he̍ī ni᷄ŋ nda̍, I̍ cho̍ tōsā mā wa̍ o̍ bā ndɔ̄ɔ̍ bɛ̄ŋgu̍.

⁷Chɔ̍ŋ a̍ ndu̍, mbō kūɛ̄ a̍ chūāā ndūa̍a̍ ndu̍yɛ̍ a̍ chūāā ndūāā ma̍māa̍, lɛ̄ŋnde̍ kpo̍u̍, ī wā ni̍ŋ nda̍ sāāŋgīāllo̍, ha̍a̍a̍ mbō lo̍ o̍ ko̍ŋ mī te̍le̍ŋ lɛ̄ŋndē ndɔ̄le̍ŋ bɛ̍ɛ̍ le̍ de᷅l ni̍ŋ ya̍a̍mɔ̍ɔ̍wa̍ o̍ bā wo̍ ō fūūlu̍u̍. A̍ te̍le̍ŋ ko̍ŋ, lɛ̄ŋndē ndɔ̄le̍ŋ bɛ̍ɛ̍ le̍ wa᷅ ni̍ŋ o̍ chɛ̄le̍ŋ ni᷄ŋ lɛ̍ŋīī bɔ̄ɔ̍ bɔ̍ɔ̍ a̍ māsāa̍ kpāāyāā bɛ̍ndūa̍a̍ o̍ bā.

⁸“Lēlɛ̄ŋ o̍ lēlɛ̄ŋ, kɛ̄lɛ̄ŋgāā lēmāsā o̍ lēmāsa̍ kɛ̍ɛ̍ le̍ Nābi̍u̍kānɛ̍ɛ̍sā sāāngīāllo̍ pɛ̍, mī lē kɛ̄ɛ̍ le̍ wāa̍ o̍ kpāāya̍ ndɔ̄ɔ̍ bɛ̄ŋgu̍ pɛ̍, lɛ̄ŋndē lēŋ dɛ̍nɛ̍ pa̍lāa̍ ya̍ I̍ tu̍sī le̍ŋ chōo̍ ni̍. Tōsāa̍ ya̍ I̍ to̍sā ni̍ mī ya̍a̍mɔ̍ɔ̍wa̍ de᷄l lɛ̄ŋndē lēŋ chōo̍ a̍ chɔ̄ūwo̍, ndu̍yɛ̍ mī to̍sa̍ mī yīmā bɛ̄ndūa̍ŋ mā de᷄l o̍ lɛ̄ŋndē lēŋ ni᷄ŋ, o̍ ko̍ŋ kɔ̍ɔ̍lī, mī to̍sa̍ mī nāa̍ de᷄l o̍ lɛ̄ŋndē lēŋ ni᷄ŋ mbō tīu̍ kpo̍u̍. I̍ lo᷅ lɛ̄ŋndē lēŋ nyɛ̄ pālāa̍ tūsīo̍o̍ chōo̍ ha̍a̍a̍ mī to̍sa̍ mī Nābi̍u̍kānɛ̍ɛ̍sā o̍ tɛ̍ɛ̍mbu̍u̍ le̍ŋ kpo̍u̍. Ya̍ Mɛ̍lɛ̄ka̍ Ya̍a̍wɛ̄ɛ̄ ya̍ so̍ō ni̍.

⁹Le̍la̍ŋ ā yɔ̍ŋ bɛ̍ɛ̍ mī wānāā nyāa̍ di̍mi̍ māā wānāa̍ su̍a̍ā le̍ ya̍ Mɛ̍lɛ̄ka̍ wa̍ nda̍ chō ni̍ wa̍, a̍ wānāā nyāa̍ vi̍ām ya̍wāla̍ŋ nda̍, a̍ wānāā nyāa̍ tɛ̍ɛ̍sīāā lɔ̍mā sɔ̄la̍ŋ nda̍, a̍ wānāā nyāa̍ ŋ̄wāŋ vīlɛ̍i̍ya̍, ndu̍yɛ̍ a̍ māndi̍a̍ā nyāa̍, ā dīmu̍l nya̍ bɛ̍ɛ̍ māā, māsāa̍ Ba̍bi̍lɔ̄ŋ o̍ cho̍ nya̍ yōmɔ̄ɔ̄ le̍, lā ya᷅ŋ nda̍ lānī le̍.

¹⁰Chōōla̍ŋ ko̍ni̍ nda̍ chō nya̍ ni̍. Tē lā ya᷄ŋ nda̍ nīla̍ŋ pɛ̍, ya̍a̍mɔ̍ɔ̍wa̍ chō nya̍ hūnɔ̄ɔ̄ sōlī o̍ lɛ̄ŋnde̍ŋ nde᷅ŋ ni᷄ŋ mā kūɛ̄ a̍ nya̍ o̍ lɛ̄ŋndē chēle̍ŋ ni̍ŋ pɔ̍ɔ̍li̍. I̍ cho̍ nya̍ sōlī o̍ lɛ̄ŋnde̍ŋ nde᷅ŋ ni᷄ŋ ndu̍yɛ̍ mī to̍sa̍ mā tɛ̄ɛ̄mbu̍u̍ nya̍.

¹¹Kɛ̍ lēlɛ̄ŋ o̍ lēlɛ᷄ŋ le̍ chɛ̍l pɛ̍ mī lē yɔ̄ŋgu̍ŋ o̍ kpāāya̍ Māsāa̍ Ba̍bi̍lɔ̄ŋ ndo̍ bɛ̄ŋgu̍, mī lɛ̄ŋndē lēŋ lē sāāŋgi̍a̍l ndu̍ pɛ̍, I̍ cho̍ tōsā, wānāa̍ cho̍ o̍ lɛ̄ŋndē lēŋ ni᷄ŋ nda̍ mā hīōū lāchī a̍ cha᷄lle̍ o̍ lɛ̄ŋndē ndāle̍ŋ ni᷄ŋ mā tōsā wa̍lta̍ ndāla̍ŋ ŋ̄chīɛ̄ɛ̄ la̍ŋ, wānā o̍ wānā so̍lī nda̍ o̍ lɛ̄ŋndē ndāle̍ŋ ni᷄ŋ te̍. Ya̍ Mɛ̍lɛ̄ka̍ Ya̍a̍wɛ̄ɛ̄, ya̍ so̍ō ni̍.”

¹²O̍ ko̍ŋ, mi̍ to̍sā mɛ̄ɛ̍ Mɛ̄lɛ̄ka̍ ō dīmu̍l la̍ yɛ̍. Ndu̍yɛ̍ o̍ ko̍ŋ kɔ̍ɔ̍lī, mi̍ dīmūl vɛ̄lɛ̄ Māsāa̍ Sɛ̄dīka̍yā, o̍ wa̍ Chu̍dā wo̍ yōōŋgū pīlɔ̍ɔ̍ ho̍ō kpe̍. Mi̍ di̍mūl ndu̍ a̍a̍, “Tē a̍ ye̍e̍ma̍ pɛ̍ mā hīōū lāchī a̍ wāa̍ yōōmū, mɛ̄ɛ̍ yɔ̍ŋgu̍ŋ Ma̍sāa̍ Ba̍bi̍lɔ̄ŋ o̍ bā bɛ̄ŋgu̍ mā sa̍a̍ŋgi̍a̍l ndu̍.

¹³Tē a̍ kɛ̍ɛ̍ le̍ ndu̍ yɔ̄ŋgɔ᷄ŋndo̍ o̍ bā bɛ̄ŋgu̍ pɛ̍, nūm ni̍, wānāā nūmnda̍ lɛ̄ŋnde̍ŋ nde᷅ŋ ni̍, lā chō hūnɔ̄ɔ̄ pīɔ̍mndo̍ sɔ̄lā, ā ti᷄ŋ ā sɔ̄lā ni̍ŋ pi̍ɔ̍mndo̍ o̍ chɔ̄ūwo̍ ni᷄ŋ, mī yīa̍a̍ŋ mā dīu̍ ā ti᷄ŋ nya̍ tɛ̄ɛ̄ŋ, o̍ ko̍ŋ kɔ̍ɔ̍lī, mī nāa̍ ō dīu̍ ā ti᷄ŋ. Kāni̍ fo̍ndōle̍, nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ cho̍ ko̍ŋ ni̍.

¹⁴Wānāā nyāā di̍mi̍ āā wānāa̍ su̍a̍ā le̍ ya̍ Mɛ̍lɛ̄ka̍ wa̍ nda̍ chō ni̍ wa̍ ā dīmu̍l nya̍ bɛ̍ɛ̍ āā, ‘Māsāa̍ Ba̍bi̍lɔ̄ŋ o̍ cho̍ nya̍ yōmɔ̄ɔ̄ le̍,’ lā ya᷅ŋ nda̍ lānī le̍, fo̍ndōle̍ chōōla̍ŋ ko̍ni̍ nda̍ wā nya̍ dīmūllo̍ ni̍.

¹⁵Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, ‘Nyɛ̄ o̍ nyɛ̄ wānāā dīmi̍ māā wānāa̍ su̍a̍ā le̍ ya̍ Mɛ̍lɛ̄ka̍ wa̍ ndā chō ni̍ wa̍ ā chō nya̍ dīmūllo̍ mā dīmī māā ya̍ Mɛ̍lɛ̄ka̍ so̍ō ni̍, chōōla̍ŋ ko̍ni̍ nda̍ chō nya̍ dīmūllo̍ ni̍. Ō cho̍ ya̍ Mɛ̍lɛ̄ka̍ le̍ su̍a̍ā nāa̍ nda̍ chūā le̍. Le̍la̍ŋ I̍ cho̍ nya̍ hūnɔ̄ɔ̄ sōlī o̍ lɛ̄ŋnde̍ŋ nde᷅ŋ ni᷄ŋ mī to̍sa̍ mā tɛ̄ɛ̄mbu̍u̍ nya̍ kpo̍u̍, nya̍ ni̍, a̍ wānāā nyāa̍ di̍mi̍ ka̍ŋ māā wānāa̍ su̍a̍ā le̍ ya̍ Mɛ̍lɛ̄ka̍ wa̍ nda̍ chō ni̍ wa̍ mā dīmūl nya̍ chōōla̍ŋ nda̍.’ ”

¹⁶O̍ ko̍ŋ kɔ̍ɔ̍lī, mi̍ di̍mūl wānāā sōlīāā lāsa̍lāa̍, a̍ wāŋnda̍ ā pīli̍a̍a̍ kpo̍u̍ a̍a̍, “Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ cho̍ ho̍ō ni̍, ō dīmi̍ māā, lā ya᷅ŋ wānāā nyāa̍ di̍mi̍ ka̍ŋ māā wānāa̍ su̍a̍ā le̍ ya̍ Mɛ̍lɛ̄ka̍ wa̍ nda̍ chō ni̍ wa̍ lānī le̍. Ā dīmu̍l nya̍ bɛ̍ɛ̍ māā nyɛ̄m lāāndūŋ wāŋnda̍ Ba̍bi̍lɔ̄ŋ a̍ chu̍a̍ o̍ chīɛ̍i̍ Mɛ̄lɛ̄ka̍a̍ ni̍ŋ ma̍ kūānu᷄ŋ a̍ mu̍ŋ ndo̍ŋ, māā ā chō mu̍ŋ mīŋgī Chūlu̍sɛ̄lɛ̄m su̍ŋ su̍ŋ lā ya᷅ŋ nda̍ lānī le̍, fo̍ndōle̍ chōōla̍ŋ ko̍ni̍ nda̍ wā nya̍ dīmūllo̍ ni̍.

¹⁷Lā tu̍āl nyɛ̄ nda̍ chō nya̍ dīmūllo̍ wo̍ kɔ̄ɔ̄lī le̍. Lā yɔ̄ŋgu̍ŋ o̍ Māsāa̍ Ba̍bi̍lɔ̄ŋ ndo̍ mī lā sāāŋgi̍a̍l ndu̍. Ko̍ŋ to̍sā ni̍ mī yōōmūlā nyāla̍ŋ lā chīndā. Lā to̍sā mī chi̍o̍o̍ ho̍ō ō pīɔ̍l mbō lo̍ pɔ̄m te̍.

¹⁸Tē wānāa̍ su̍a̍ā le̍ ya̍ Mɛ̍lɛ̄ka̍ Ya̍a̍wɛ̄ɛ̄ wa̍ nda̍ chō lēkɛ̍ndɛ̍ī ni̍, māā ya̍ Mɛ̍lɛ̄ka̍ Ya̍a̍wɛ̄ɛ̄ ke᷅ nda̍ yōōŋgūla̍ŋ le̍ wāŋnda̍ ni̍, mɛ̄ɛ̍ ā nyūna̍ wɔ̍ ya̍ Mɛ̍lɛ̄ka̍ Ya̍a̍wɛ̄ɛ̄ dīōm, ya̍ Mɛ̄lɛ̄ka̍ nɔ̍ kpāāyāa̍ kpo̍u̍ wo̍, nyɛ̄m lāāndu᷄ŋ lo̍ wɔ̄ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ chi̍ɛ̍ī ni̍ŋ a̍ o̍ chīɛ̄ī lēmāsāa̍ ni᷄ŋ Chu̍dā wo̍ŋ, mī to̍sa̍ wāŋnda̍ Ba̍bi̍lɔ̄ŋ a̍ si̍o̍ū la̍kɔ̍ŋnɔ᷄ŋ a̍ mu̍ŋ te̍.

¹⁹Kāni̍ bōōndi̍i̍ Nābi̍u̍kānɛ̍ɛ̍sā o̍ bi̍ī māsāa̍ Chu̍dā, ndu̍ yɔ̍nūŋ māā Chɛ̄hōwa̍chīŋ po̍ Chɛ̄hōwa̍kīm ndo̍ ni̍ ve̍, a̍ wāŋ bɛ̄ndūa̍a̍ Chu̍dā a̍ Chūlu̍sɛ̄lɛ̄m mbo̍ kūā a̍ nda̍ o̍ chɛ̄le̍ŋ ni̍ŋ Ba̍bi̍lɔ̄ŋ nde̍, ō chīi̍ la̍kɔ̍ a̍ nyɛ̄m ba̍āŋ kāla᷄ŋ wa̍ Chūlu̍sɛ̄lɛ̄m ndo̍ŋ kpo̍u̍ le̍. Mbo̍ mɛ̄ī sūŋgbu̍a̍ŋ, a̍ hɛ̄ŋgɛ̍i̍ bɛ̍ndū īchīli̍ŋ nda̍ tōōsīa̍a̍ a̍ būlɔ᷄ŋsīi̍ye̍ wo̍, o̍ nɔ̍ dīōla̍ŋ āā Pēe̍ Mɛ̄ŋmā Īhɛ᷄llo̍ wo̍, a̍ nyɛ̄lā vīlīāā lāwōlɔ̄ɔ̍, o̍ ko̍ŋ kɔ̍ɔ̍lī, a̍ nyɛ̄m kɛ̄ndɛ̄ kɛ̍ndɛ̄ŋ chēle̍ŋ o̍ fo̍ndāŋ nda̍ kɛ̄sī nyɔ̍ɔ̍ŋ o̍ chīɛ̄ī nūu̍ ni᷄ŋ ndo̍ŋ. “Kɛ̍ ya̍ Mɛ̄lɛ̄ka̍ Ya̍a̍wɛ̄ɛ̄, ya̍ Mɛ̄lɛ̄ka̍ nɔ̍ kpāāyāa̍ kpo̍u̍ wo̍, I̍sɔ̄lūɛ̍i̍ya̍ Mɛ̄lɛ̄ka̍ ndāa̍, nyɛ̄ ya̍ I̍ di̍mi̍ a̍ nyɔ̄ɔ̍ŋ mu᷅ŋ o̍kɔ̄ɔ̄ wo̍ cho̍ ho̍ō ni̍, nyɛ̍m cho̍ mu᷅ŋ ŋ̄ kɛ̄sīāā o̍ chīɛ̍i̍ nūu̍ a̍ o̍ chīɛ̄ī lēmāsāa̍ Chu̍dā wo̍ŋ.

²⁰

²¹

²²Nyɔ̄ɔ̍ŋ mu᷅ŋ kpo̍u̍, ā chō mu̍ŋ hūnɔ̄ɔ̄ sīōū chūā mā kūɛ̄nu᷄ŋ a̍ mu̍ŋ Ba̍bi̍lɔ̄ŋ. Ba̍bi̍lɔ̄ŋ lo̍ŋ nyɛ̄m mu᷅ŋ ŋ̄ chō lō ni̍, ha̍a̍a̍ mbō lo̍ o̍ ko̍ŋ mī te̍le̍ŋ ya̍ Mɛ̍lɛ̍ka̍ bɛ̄ɛ̄ndi̍a̍ŋ le̍ mu̍ŋ mīŋgīo̍o̍ na̍nu᷄ŋ ndo̍ ō fūūlu̍u̍. Tē te̍le̍ŋ ko̍ŋ ō fūūlu̍u̍ pɛ̍, I̍ cho̍ tōsā nyɛ̄m mu᷅ŋ kpo̍u̍ mī ŋ̄ mīīŋgu̍ Chūlu̍sɛ̄lɛ̄m na̍nu᷄ŋ, mī ŋ̄ hu᷄ŋ mi̍i̍ŋgū o̍ fo̍ndāŋndā ŋ̍ nɔ̍ le̍ wāa̍ la̍ŋ. Ya̍ Mɛ̍lɛ̍ka̍ Ya̍a̍wɛ̄ɛ̄ ya̍ so̍ō ni̍.”