Read Southern Kisi Chɛ̄lūīma̍yā 28 Bible Online

Chɛ̄lūīma̍yā 28 - Southern Kisi bible

Chɛ̄lūīma̍yā 28

¹O̍ pāŋgi̍i̍ ŋu̍ɛ̍ɛ̍nu̍e̍i̍ ni᷄ŋ o̍ wɔ̄sī pīlɛ̍ kōŋ ni᷄ŋ, ya̍ Chɛ̄lūīma̍yā ni̍, wānāā sōlīāā lāsa̍lāa̍ ni̍, a̍ wāŋnda̍ ā pīli̍a̍a̍ ŋ̄ wa̍ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ ni᷄ŋ pa̍a̍le̍ pi᷅lɛ̍. Ndu̍yɛ̍ Sɛ̄dīka̍yā, māsāa̍ le̍ Chu̍dā, wɔ̄sī ndɔ̄ hi̍ɔ̍ɔ̍lo̍o̍ o̍ māsāle̍ŋ chōo̍ o̍ wa̍ ko̍ŋ ni̍. Mi̍ wāna̍ su̍a̍ā le̍ Mɛ̄lɛ̄ka̍ wo̍ Hānāni̍yā, po̍ A̍sɔ̄ɔ̄ wo̍, fūlāa̍ Ki̍bīɔ̄ŋ chi̍e̍e̍ o̍ di̍mūl la̍ wāŋnda̍ kpo̍u̍ o̍ hɔ̄l lo̍ŋ āā,

²“Nyɛ̄ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍, I̍sɔ̄lūɛ̍i̍ya̍ Mɛ̄lɛ̄ka̍ ndāa̍ ō dīmi̍ wo̍ cho̍ ho̍ō ni̍, ō dīmi̍ āā, ‘Sāŋgā o̍ sāŋgā Māsāa̍ Ba̍bi̍lɔ̄ŋ o̍ ha̍ndu̍ wāŋnda̍ chōo̍ mbo̍ sīīŋgūū nda̍ chīāā ndɔ̄, I̍ chi̍i̍ ndu̍ fāŋā.

³Nyɛ̄ o̍ nyɛ̄ Nābi̍u̍kānɛ̍ɛ̍sā māsāa̍ le̍ Ba̍bi̍lɔ̄ŋ o̍ chu̍a̍ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ ni̍ŋ mbo̍ kūā a̍ ndu̍ Ba̍bi̍lɔ̄ŋ, I̍ cho̍ mu̍ŋ mīŋgī na̍nu᷄ŋ kpo̍u̍ o̍ wɔ̄sīlā tīɔ̍ɔ̍ŋ bɛ̄ŋgu̍.

⁴Ndu̍yɛ̍ o̍ ko̍ŋ kɔ̍ɔ̍lī, Chɛ̄hōwa̍kīm, o̍ wa̍ māsāa̍ le̍ Chu̍dā wo̍, ndu̍ yɔ̍nūŋ māā po̍ Chɛ̄hōwa̍chīŋ ndo̍ ni̍, a̍ wānā o̍ wānā nda̍ bīī Chu̍dā ma̍ kūā a̍ nda̍ o̍ bīyɔ̄ɔ̍ ni̍ŋ Ba̍bi̍lɔ̄ŋ, I̍ cho̍ nda̍ mīŋgī na̍nu᷄ŋ kpo̍u̍, fo̍ndōle̍, sāŋgā o̍ sāŋgā māsāa̍ Ba̍bi̍lɔ̄ŋ o̍ ha̍ndu̍ wāŋnda̍ chōo̍, I̍ cho̍ hūnɔ̄ɔ̄ chīī a̍ ndu̍.’ ”

⁵Wānāa̍ so̍lī sa̍lāla̍ŋ o̍ Mɛ̄lɛ̄ka̍ lo̍ wa̍ ni̍, a̍ wāŋnda̍ ā pīli̍a̍a̍ kpo̍u̍, ā wa̍ īsīsi̍ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ ni᷄ŋ ndo̍ŋ. Mi̍ ya̍ Chɛ̄lūīma̍yā lo᷅ o̍ ko̍ŋ mi̍ di̍mūl Hānāni̍yā nda̍ o̍ hɔ̄l lo̍ŋ kpo̍u̍ a̍a̍,

⁶“Hānāni̍yā, mbɔ̄ māā ī yɔ̄nu̍ŋ mɛ̄ɛ̍ ŋ̄ dīmi̍ yɛ̍. Mbɔ̄ māā Mɛ̄lɛ̄ka̍ Ya̍a̍wɛ̄ɛ̄ o̍ to̍sa̍ mī nyɛ̄ ŋ̄ dīmi̍ wo̍ ō yɔ̄nu̍ŋ fɔ̍. Mbɔ̄ māā Mɛ̄lɛ̄ka̍ Ya̍a̍wɛ̄ɛ̄ o̍ to̍sa̍ mī dīōmndā ŋ̄ sōō la᷅ŋ nda̍ŋ lā chīŋa̍ lāsōndō, mī nyɛ̄m nda̍ chu̍a̍ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ŋ ni̍ŋ ma̍ kūa̍ŋ a̍ mu̍ŋ ndo̍ŋ ŋ̄ mīīŋgu̍ na̍nu᷄ŋ fɔ̍. Ndu̍yɛ̍ wānāā nda̍ kūɛ̄ bɛ̍ɛ̍ o̍ bīyɔ̄ɔ̍ ni᷄ŋ nda̍, mbɔ̄ māā ā mīīŋgu̍ na̍nu᷄ŋ fɔ̍.

⁷Kɛ̍ ya̍ŋ ni᷅la̍ŋ mā tūēī nyɛ̄ ya̍ I̍ cho̍ nu̍m dīmūl nya̍ wāŋnda̍ kpo̍u̍ wo̍.

⁸Lɔ̍ɔ̍ pa̍ bɛ̍ɛ̍ mi̍ nūm a̍ ya̍ ŋ̍ vi̍a̍lu᷄ŋ, wānāā nda̍ a̍a̍ su̍a̍ā bɛ̍ɛ̍ si̍ndɛ̄ le̍ Mɛ̄lɛ̄ka̍, mī Mɛ̄lɛ̄ka̍ ndu̍ o̍o̍ ke᷅ nda̍ yōōŋgūla̍ŋ le̍ lɛ̄ŋīī fāŋgā fa̍ŋgā a̍ māsɛ̄i̍ kpāāyɛ̄ī bɛ̍ndūe̍i̍ sīlāa̍ ve̍ wa̍, yōōŋgūlā chɔ̄ūla̍ŋ, a̍ yōōŋgūlā yīmā bɛ̄ndūa̍ŋ, a̍ yōōŋgūlā nāālā wɔ̄ɔ̍ŋnda̍ŋ, la̍ŋ nda̍ a̍a̍ di̍mūl lɛ᷅ŋnde̍ he̍ī a̍ māsɛ̄i̍ he̍ī ni̍.

⁹Le̍la̍ŋ tē wānā o̍ wāna̍ su̍a̍ā le̍ Mɛ̄lɛ̄ka̍ hīŋ pɛ̍, mbō dīmu̍l wāŋnda̍ yōōŋgōo̍ a̍ kɔ̄l nyūlōo̍ o̍kɔ̄ɔ̄, le̍ mī wāŋnda̍ ā sīna̍ māā wānā ko̍ŋ, wāna̍ su̍a̍ā le̍ Mɛ̄lɛ̄ka̍ Ya̍a̍wɛ̄ɛ̄ wo̍ lēkɛ̍ndɛ̍ī ō chō ni̍, mɛ̄ɛ̍ mī nyɛ̄ o̍ di̍mi̍ wo̍ ō yɔ̄nu̍ŋ.”

¹⁰O̍ ko̍ŋ kɔ̍ɔ̍lī, yɔ̄mīī sīŋgāfīlɛ̄ī ya̍ I̍ kɛ̍si̍ŋ o̍ īkɛ̄su̍ mɛ̄ɛ̍ nda̍ hāndū nu̍a̍ā nāūwāā wāa̍ yɔ̄mnde̍ o̍ ŋ̄kɛ̄su̍ le̍ wāa̍ yɛ̍ ve̍, mi̍ wāna̍ su̍a̍ā le̍ Mɛ̄lɛ̄ka̍ wo̍ Hānāni̍yā o̍ fa̍ŋā ya̍ yɔ̄mīī kēŋ o̍ īkɛ̄su̍ mbo̍ yīmī yīmī.

¹¹Mbo̍ lō o̍ ko̍ŋ mbo̍ dīmūl la̍ wāŋnda̍ o̍ hɔ̄l lo̍ŋ kpo̍u̍ āā, “Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ cho̍ ho̍ō ni̍, ō dīmi̍ māā mɛ̄ɛ̍ ya̍ I̍ yi̍mi̍ yɔ̄mnde̍ he̍ī nu̍a̍ā yɛ̍, māā le̍nde̍ ndu̍ Mɛ̍lɛ̄kā ō chīī ni̍ŋ sa̍ŋgā bɛ̄ndū Māsāa̍ Nābi̍u̍kānɛ̍ɛ̍sā o̍ ha̍ndu̍ lɛ̄ŋnde̍ kpo̍u̍ chōo̍ wo̍ ni̍. Ndu̍yɛ̍ ō dīmi̍ māā ō wɔ̄sīī ŋīi̍ŋ bɛ̄ŋgu̍, he̍ī ī chō yɔ̄nɔ᷄ŋ.” Mɛ̄ɛ̍ Hānāni̍yā o̍ chi̍i̍ dīōmndā lāŋ dīmi̍, mi̍ ya̍ Chɛ̄lūīma̍yā fu̍la᷄ŋ mi̍ ku̍a̍ŋnu᷄ŋ

¹²Mɛ̄ɛ̍ te̍le̍ŋ ti̍ŋ ō hīōū, chɔ̍ŋ a̍ te̍le̍ŋ Hānāni̍yā o̍ fa̍ŋa̍ yɔ̄mīī sīŋgāfīlɛ̄ī kēŋ ya̍ o̍ īkɛ̄su̍ mbo̍ yīmī ndi̍ wo̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā nāa̍ ya̍ chu̍a̍. Mbo̍ dīmūl la̍ āā,

¹³“Kɔ̍ mā kɔ̍ di̍mūl Hānāni̍yā māā ya̍ Mɛ̍lɛ̄ka̍ Ya̍a̍wɛ̄ɛ̄ di̍mi̍ āā, ‘Nyɛ̄ ŋ̄ yīmī yīmī wo̍ ndu̍ ndu̍ a̍ yɔ̄mnde̍ o̍ wa̍ ō tōōsīāā ni̍. Kɛ̍ ō ya̍ I̍ cho̍ ni᷅ŋ mīŋgī sɔ̍ŋgɔ̍ ko̍ŋ ndo̍, ndu̍ ndu̍ a̍ chīli̍ŋnde̍ o̍ cho̍ wā ō tōōsīāā ni̍.

¹⁴Ya̍ Mɛ̍lɛ̄ka̍ Ya̍a̍wɛ̄ɛ̄ Mɛ̄lɛ̄ka̍ nɔ̍ kpāāyāa̍ kpo̍u̍ wo̍, I̍sɔ̄lūɛ̍i̍ya̍ Mɛ̄lɛ̄ka̍ ndāa̍ nyɛ̄ ya̍ I̍ di̍mi̍ wo̍ cho̍ ho̍ō ni̍. I̍ cho̍ tōsā mī Nābi̍u̍kānɛ̍ɛ̍sā, Māsā Bɛ̍ndōo̍ Ba̍bi̍lɔ̄ŋ o̍ tu̍si̍ lɛ̄ŋnde̍ kpo̍u̍ nyɛ᷅ kīndīlāa̍ chōo̍. Nyɛ̄ kīndīlāā o̍ ha̍ndū ni̍ŋ nda̍ chōo̍ wo̍ ō wā ni̍ŋ ma̍wa̍ā mɛ̄ɛ̍ nda̍ kɛ̄sī nu̍a̍ā nāūwa̍ yɔ̄mnde̍ o̍ lākɛ̄su̍ le̍ wāa̍ yɛ̍, kɛ̍ mī ī wa̍ ī tōōsīāā a̍ chīli̍ŋnde̍. Lɛ̄ŋnde̍ he̍ī kpo̍u̍, ī chō hūnɔ̄ɔ̄ wā Nābi̍u̍kānɛ̍ɛ̍sā o̍ bā bɛ̄ŋgu̍ mī ī sāāŋgi̍a̍l ndu̍. Vīsīa̍a̍ cho̍ bɛ̍ɛ̍ yo̍ndōla̍ŋ ni᷄ŋ o̍ lɛ̄ŋnde̍ he̍ī ni᷄ŋ nda̍, I̍ cho̍ tōsā nda̍ kpo̍u̍ mā wa̍ ndu̍ o̍ bā bɛ̄ŋgu̍.’ ”

¹⁵O̍ ko̍ŋ kɔ̍ɔ̍lī, mi̍ ma̍lnu᷄ŋ mi̍ kɔ̍ di̍mūl Hānāni̍yā, wāna̍ su̍a̍ā le̍ Mɛ̄lɛ̄ka̍ wo̍ āā, “Ya̍ŋ ni᷅la̍ŋ nūm Hānāni̍yā! Mɛ̄lɛ̄ka̍ Ya̍a̍wɛ̄ɛ̄ o̍ ke̍ nu̍m yōōŋgū o̍ yōōŋgū le̍, ma̍ lō o̍ ko̍ŋ ma̍ dīmūl wāŋnda̍ chōōla̍ŋ, ndu̍yɛ̍ ma̍ tōsā mi̍ wāŋnda̍ ha̍ā ā lāāla̍ŋ cho̍o̍lā ŋ̄ dīmu̍l nda̍ la̍ŋ.

¹⁶Le̍la̍ŋ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ a̍ nūm o̍kɔ̄ɔ̄ wo̍ cho̍ ho̍ō ni̍, ō dīmi̍ āā, ‘Le̍ nyɛ̄ ŋ̄ tōsa̍ wo̍, I̍ cho̍ nu̍m fāŋā o̍ chi̍e̍ēŋndo̍ chōo̍ ba̍ū. A̍ cho̍ wɔ̍sīo̍o̍ ho̍ō chīī le̍, mā sɔ̍la̍ pīɔ̍mndo̍, fo̍ndōle̍, le̍ mɛ̄ɛ̍ ŋ̄ tōsa̍ mi̍ wāŋnda̍ ā sīmūl ya̍ Mɛ̍lɛ̄ka̍ Ya̍a̍wɛ̄ɛ̄ a̍ yōōŋgūlā nūmnda̍ lā chōōwā la̍ŋ yɛ̍.’ ”

¹⁷Ndu̍yɛ̍ Hānāni̍yā o̍ chi̍i̍ wɔ̍sī kōŋ te̍ mbo̍ wū. Pāŋgi̍i̍ ŋɔ̍mmɛ̍ūve̍ o̍ wɔ̄sī kōŋ ni᷄ŋ kpe̍e̍kpe̍i̍ o̍ vi᷅ ni̍.