Read Southern Kisi Chɛ̄lūīma̍yā 29 Bible Online

Chɛ̄lūīma̍yā 29 - Southern Kisi bible

Chɛ̄lūīma̍yā 29

¹O̍ ko̍ŋ kɔ̍ɔ̍lī, mi̍ ya̍ Chɛ̄lūīma̍yā po̍o̍nyīāā yāu̍wo̍ le̍ mī yɔ̍ŋ ndu̍ Ba̍bi̍lɔ̄ŋ nāa̍ wāŋ bɛ̄ndūāā nda̍ kūɛ̄ o̍ bīyɔ̄ɔ̍ ni̍ŋ nda̍ chūā, a̍ wānāa̍ so̍lī sa̍lāla̍ŋ o̍ Mɛ̄lɛ̄ka̍ lo̍ wa̍, a̍ wānāa̍ su̍a̍ā le̍ Mɛ̄lɛ̄ka̍ wa̍, ō ko̍ŋ kɔ̍ɔ̍lī, a̍ wānāā tūa̍a̍ kpo̍u̍ ā Nābi̍u̍kānɛ̍ɛ̍sā o̍ so̍li̍ Chūlu̍sɛ̄lɛ̄m mbo̍ kūā a̍ nda̍ o̍ bīyɔ̄ɔ̍ ni̍ŋ Ba̍bi̍lɔ̄ŋ nda̍.

²Ndu̍yɛ̍ a̍ te̍le̍ŋ ko̍ŋ, Māsāa̍ Chɛ̄hōwa̍chīŋ ni̍, kāla̍ ndɔ̄ ni̍, a̍ wānāā nda̍ a̍a̍ to̍sā wa̍llo̍ o̍ chīɛ̄ī lēmāsāa̍ ni᷄ŋ nda̍, a̍ wāŋ bɛ̄ndūa̍a̍ Chu̍dā a̍ Chūlu̍sɛ̄lɛ̄m, a̍ wānā o̍ wāna̍ cha̍ā nyɛ᷅ o̍ nyɛ̄ sīɔ̄lɔ̄ɔ̄ a̍ lābā, a̍ lābā, o̍ ko̍ŋ kɔ̍ɔ̍lī, a̍ sūmnda̍, nda̍ kpo̍u̍ nda̍ a̍a̍ ku̍ɛ̄ ni᷅ŋ a̍ nda̍ o̍ bīyɔ̄ɔ̍ ni᷄ŋ Ba̍bi̍lɔ̄ŋ.

³Mɛ̄ɛ̍ ya̍ I̍ po̍o̍nyi̍a̍a̍ yāu̍wo̍ ho̍ō, mi̍ kē Ɛ̄la̍a̍sā, po̍ Si̍a̍fa᷅ŋndo̍, nda̍ Kɛ̄mālu̍i̍yā, po̍ Hīlīka̍yā wo̍ ā Māsāa̍ Sɛ̄dīka̍yā o̍ wa̍ Chu̍dā wo̍ ndu̍ o̍o̍ ve᷅m nāa̍ Māsāa̍ Nābi̍u̍kānɛ̍ɛ̍sā chu̍a̍ Ba̍bi̍lɔ̄ŋ nda̍, le̍ mā kūɛ̄ a̍ ndu̍ mā kɔ̍ ke᷅ wānāa̍ wa̍ ha̍ā o̍ bīyɔ̄ɔ̍ ni᷄ŋ nda̍. Mi̍ di̍mūl wānāa̍ wa̍ ha̍ā Ba̍bi̍lɔ̄ŋ o̍ bīyɔ̄ɔ̍ ni᷄ŋ nda̍ o̍ yāu̍wo̍ ni᷄ŋ āā,

⁴“Nya̍ wānāā Mɛ̄lɛ̄ka̍ Ya̍a̍wɛ̄ɛ̄ o̍ chɛ̍l ha̍ā mi̍ Māsāa̍ Nābi̍u̍kānɛ̍ɛ̍sā, o̍ ku̍ā a̍ nya̍ o̍ bīyɔ̄ɔ̍ ni᷄ŋ Ba̍bi̍lɔ̄ŋ nda̍, nyɛ̄ ndu̍ Mɛ̍lɛ̄ka̍ Ya̍a̍wɛ̄ɛ̄ Mɛ̄lɛ̄ka̍ nɔ̍ kpāāyāa̍ kpo̍u̍ wo̍, I̍sɔ̄lūɛ̍i̍ya̍ Mɛ̄lɛ̄ka̍ ndāa̍ nyɛ̄ o̍ di̍mi̍ a̍ nya̍ o̍kɔ̄ɔ̄ wo̍ cho̍ ho̍ō ni̍. Ō dīmi̍ āā,

⁵‘Lā tāŋgu̍l chi̍ɛ̍īla̍ŋ nāa̍ nya̍ chō ka̍ŋ nda̍ mī lā cha᷄l lo̍ŋ kpe̍e̍kpe̍i̍. Lā tōsa̍ kpe̍le̍la̍ŋ le̍ mī lā sɔ̄la̍ nyɛ̄ nya̍ dīā wo̍.

⁶Lā kēna᷅ŋ la̍a̍ndūa̍a̍ mī lā vēlū chūāūwa̍ ta̍u̍ ta̍u̍. Ndu̍yɛ̍ mī lā pūūlu̍l pu̍a̍a̍ nyāa̍ lāāndūa̍a̍, o̍ ko̍ŋ kɔ̍ɔ̍lī, mī lā kɛ̄si̍ chūāā nyāā la̍a̍ndūa̍a̍ o̍ nɔ̄la̍ŋ le̍ mī nda̍ bɛ̍ɛ̍ a̍ ve̍lū chūāūwa̍. Lā kūi̍ lo̍ŋ ta̍u̍ ta̍u̍, lā to̍sā mī lā pɛ̄ŋgi̍ kūīyo̍ le̍, yɔ̄ŋi̍ nya̍ dɔ̄ɔ̄na̍ŋ.

⁷Ndu̍yɛ̍ o̍ ko̍ŋ kɔ̍ɔ̍lī, lā tōsa̍ sɔ̍ɔ̍ŋ kɛ̍ndɔ᷄ŋ le̍ mī kɔ̄l nyūlōo̍ a̍ dɛ̍nɛ̍ kɛ̍ndɔ̄ɔ̍ wa̍ o̍ chi̍e̍e̍ ya̍ I̍ to̍sa̍ ko̍ŋ ma̍ kūā a̍ nya̍ o̍ bīyɔ̄ɔ̍ ni᷄ŋ ndo̍. Lā nyūna̍ ya̍ Mɛ̍lɛ̄ka̍ Ya̍a̍wɛ̄ɛ̄ dīōm le̍ mī dɔ̍ū chi̍e̍e̍ ko̍ŋ sa̍lā, fo̍ndōle̍ tē dɛ̍nɛ̍ kɛ̍ndɔ̄ɔ̍ wa̍ ō chi̍e̍e̍ ko̍ŋ ni᷄ŋ pɛ̍, nya̍ bɛ̍ɛ̍ dɛ̍nɛ̍ nyā kɛ̍ndɔ̄ɔ̍ o̍ wa᷅ ni̍.

⁸Ya̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nɔ̍ kpāāyāa̍ kpo̍u̍, I̍sɔ̄lūɛ̍i̍ya̍ Mɛ̄lɛ̄ka̍ ndāa̍, sīlā ya̍ I̍ nɔ̍ le̍ nya̍ wo̍ cho̍ ho̍ō ni̍. Wānāa̍ su̍a̍ā le̍ Mɛ̍lɛ̄ka̍ ma̍ wā nya̍ tɛ̄ɛ̄ŋ ndā ni̍, a̍ wānāa̍ di̍mī sɔ̍ɔ̍ŋ wa᷅ hu̍nɔ̄ɔ̄ yɔ̄nɔ᷄ŋndo̍ nda̍, lā chɛ᷅l mā hūi̍ nya̍ le̍. Lā ya᷅ŋ nīla̍ŋ o̍ lɔ̄mā sɔ̄lāāmā nda̍ dīmūl nya̍ wa̍ŋ te̍.

⁹Nyɛ̄ o̍ nyɛ̄ nda̍ chō nya̍ dīmūllo̍ māā ya̍ Mɛ̍lɛ̄ka̍ di̍mi̍ ni̍, chōōla̍ŋ ko̍ o̍ cho̍ ni̍. Ō cho̍ ya̍ Mɛ̍lɛ̄ka̍ le̍ ke̍ nda̍ yōōŋgūlā la̍ŋ te̍.’ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍, nyɛ̄ o̍ di̍mi̍ wo̍ cho̍ ko̍ŋ ni̍.

¹⁰“Mɛ̍lɛ̄ka̍ Ya̍a̍wɛ̄ɛ̄ o̍ di̍mi̍ āā, ‘Tē wɔ̄sīlā be̍le̍-ŋɔ̍mmɛ̍ūlā ya̍ I̍ ke̍ wāŋnda̍ Ba̍bi̍lɔ̄ŋ le̍ wāa̍ o̍ kpāāyāa̍ chōo̍ la̍ŋ lā chūū pɛ̍, ya̍ Mɛ̄lɛ̄ka̍ I̍ cho̍ hɔ̄lla̍ mūlī nāa̍ nya̍ chūā mī pe̍e̍lu̍ būŋgɛ̄ī ya̍ I̍ chu̍e̍l nya̍ ve̍ mī mīŋgi̍ nya̍ o̍ lɛ̄ŋndē nyāle̍ŋ ni̍ŋ.

¹¹Ya̍ Mɛ̍lɛ̄ka̍ ya̍ pīlɛ̍ kpe̍ si̍nā tu̍u̍lā ya̍ I̍ nɔ̍ le̍ nya̍ la̍ŋ ni̍. Tūūlā ya̍ I̍ nɔ̍ le̍ nya̍ la̍ŋ, tūūla̍ chu̍ū nya̍ ni̍ŋ dɛ̍nɛ̍ kɛ̍ndɔ̄ɔ̍ la̍ŋ la̍ cho̍ ni̍, lā cho̍ tu̍ūla̍ chu̍u̍ nya̍ kpūndɛ̍ le̍. Tūūla̍ to̍sā ni̍ŋ mī lā nɔ̄ tīīnda᷄ŋndo̍ o̍ sīɔ̄dīi̍ nyā lāchīo̍o̍ ni᷄ŋ nda̍ŋ la̍ cho̍ ni̍.

¹²Tē te̍le̍ŋ ko̍ŋ ō fūūlu̍u̍ pɛ̍, ya̍ Mɛ̍lɛ̄ka̍ ya̍ nya̍ nyūnā ni̍ŋ di̍ōm le̍ nyɛ̄ nya̍ hāu̍ bā wo̍ ni̍. Lā hūŋ ni̍ŋ nāa̍ ya̍ chu̍a̍, mī lā hu᷄ŋ pi̍ɛ̍ī ya̍ le̍ nyɛ̄ nya̍ hāu̍ bā wo̍, ndu̍yɛ̍ mī mu̍li̍ nya̍ dīōm.

¹³Tē lā hu᷄ŋ to᷅l nɛ̄i̍ nūu̍ kɔ̄ɔ̄lī pɛ̍ a̍ kɔ̄ltā nyāla̍ŋ kpo̍u̍, lā hūŋ ni̍ŋ mī lā hu᷄ŋ sa̍a̍lu̍ŋ ya̍.

¹⁴Lā chō ya̍ sāālɔ᷄ŋ, ndu̍yɛ̍ mī lo̍ o̍ ko̍ŋ mī so̍li̍ nya̍ o̍ bīyɔ̄ɔ̍ ni᷄ŋ mī mi̍ŋgi̍ nya̍ o̍ lɛ̄ŋndē nyāle̍ŋ ni᷄ŋ. Bā o̍ bā ya̍ I̍ to̍sa̍ ma̍ sɛ̄ŋi̍ŋ a̍ nya̍ o̍ lɛ̄ŋnde̍ ni᷄ŋ a̍ o̍ fo̍ndāŋndā yɛ̍ yɛ̍la̍ŋ, I̍ cho̍ nya̍ hūnɔ̄ɔ̄ sōlī lo̍ŋ, mī chu̍u̍ŋgi̍a̍a̍ nya̍ nāa̍ pi᷅lɛ̍, mī mi̍ŋgi̍ nya̍ o̍ lɛ̄ŋndē ya̍ I̍ to̍sa̍ ma̍ sōlī nya̍le̍ŋ ni̍ŋ.’ Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ cho̍ ko̍ŋ ni̍.

¹⁵“Mī lā dīmi̍ dɔ̍ɔ̍ māā, Mɛ̄lɛ̄ka̍ Ya̍a̍wɛ̄ɛ̄ o̍ chi̍i̍ na̍a̍ ni᷅ŋ wānāa̍ su̍a̍ā le̍ Mɛ̄lɛ̄ka̍ wa̍ kē Ba̍bi̍lɔ̄ŋ na̍nu᷄ŋ.”

¹⁶“Kɛ̍ lā ya᷄ŋ ndɔ̍ ni᷅la̍ŋ, mī lā tūēī nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ a̍ wāna̍ mi̍i̍ŋgu̍ māsāa̍ o̍ kpe̍ŋgbe̍i̍ lēmāsa̍ Dēēvi̍o̍o̍ chōo̍ wo̍ ndu̍yɛ̍ a̍ wāŋnda̍ o̍ chi̍o̍o̍ ho̍ō ni᷄ŋ o̍kɔ̄ɔ̄ wo̍, nda̍ yɔ̍nūŋ ni̍ māā wānāya᷅ŋ nya᷄ŋ, a̍ lo̍ na̍nu᷄ŋ ā kūe̍ a̍ nda̍ŋ o̍ bīyɔ̄ɔ̍ ni᷄ŋ te̍ wa̍.

¹⁷Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ ō dīmi̍ māā, o̍ cho̍ ya̍a̍mɔ̍ɔ̍wa̍ yɔ̄ŋ mā hu᷄ŋ de᷅l wāŋnda̍ ha̍ā chōo̍ a̍ mɔ̄ɔ̄ŋ fāŋndo̍ŋ, ndu̍yɛ̍ mī to̍sa̍ mī yīmā bɛ̄ndūa̍ŋ mā de᷄l nda̍ chōo̍, o̍ ko̍ŋ kɔ̍ɔ̍lī, mī to̍sa̍ mī nāa̍ ō de᷄l nda̍ chōo̍ mbō tīu̍ kpo̍u̍. I̍ cho̍ tōsā mā yɔ̄nu̍ŋ wa᷅ŋnda̍ o̍ hɔ̄l, mɛ̄ɛ̍ fi̍kīi̍ya̍ŋ mā hīū nu̍a̍ā sīɔ̍ɔ̍ mā ni᷅ŋ ndɛ̍ le̍ dīo̍ le̍ yɛ̍.

¹⁸I̍ lo᷅ ni̍ŋ ya̍a̍mɔ̍ɔ̍wa̍ vīōmɔ̄ɔ̍ mā chīŋa̍la᷅ŋ nda̍, o̍ ko̍ŋ kɔ̍ɔ̍lī, mī lo̍ nda̍ nyɛ̄ pālāa̍ tūsīo̍o̍ chōo̍ a̍ yīmā bɛ̄ndūa̍ŋ ndu̍yɛ̍ a̍ nāālā wɔ̄ɔ̍ŋnda̍ŋ, ha̍a̍a̍ mbo̍ lo̍ o̍ ko̍ŋ mī to̍sa̍ mā nyāānu̍ŋ mā sɛ̄ŋi̍ŋ o̍ chi̍e̍ēŋndo̍ ni᷄ŋ kpo̍u̍. Ndu̍yɛ̍ lēlɛ̄ŋ o̍ lēlɛ̄ŋ ya̍ I̍ to̍sā ni̍ŋ mā wa̍ lo̍ŋ, wāŋnda̍ o̍ lɛ̄ŋndē lēŋ ni᷄ŋ kpo̍u̍ tē ā chē nyɛ̍ yɔ̍nūŋ ni̍ŋ a̍ wāŋnda̍ ha̍ā wo̍ pɛ̍, sīōōŋīī bɛ̄ndūe̍i̍ ī chō nda̍ bīyɔ̄ɔ̄. Ā chō nda̍ hūnɔ̄ɔ̄ dātā, mā sīɔ̄ɔ̄ndi̍a̍a̍ nda̍, mā chūa̍ nda̍ nyɛ̄ fo̍ndō fu̍u̍, ndu̍yɛ̍ mā sīīŋgu̍u̍ dīōlā ndāla̍ŋ māā tāāmāsi̍ le̍ wāŋnda̍ sēndi̍o̍o̍ hāndɔ̄ɔ̍ chōo̍.

¹⁹Kāni̍ fo̍ndōle̍, le̍ mɛ̄ɛ̍ nda̍ kɛ̄ɛ̍ le̍ nyɛ̄ ya̍ I̍ di̍mu̍l nda̍ wo̍ tōsāa̍ yɛ̍. Le̍ te̍le̍ŋ o̍ te̍le̍ŋ I̍ wa̍ bu̍ɛ̍i̍yāā nīa̍a̍ vīōmɔ̄ɔ̍ nāa̍ nya̍ chūā a̍ yōōŋgūla̍ŋ, nda̍ yɔ̍nūŋ māā wānāa̍ su̍a̍ā le̍ Mɛ̄lɛ̄ka̍ wa̍ ni̍, kɛ̍ lā chɛ᷄l mī lā ya̍ŋ nda̍ lānī le̍. Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ cho̍ ko̍ŋ ni̍.

²⁰Le̍la̍ŋ lā ya᷄ŋ ni᷅la̍ŋ mī lā tūēī nyɛ̄ Mɛ̍lɛ̄ka̍ Ya̍a̍wɛ̄ɛ̄ cho̍ nya̍ dīmūllo̍, nya̍ o̍ to̍sa̍ ha̍ā ma̍ sōlī nya̍ Chūlu̍sɛ̄lɛ̄m ma̍ kūā a̍ nya̍ Ba̍bi̍lɔ̄ŋ o̍ bīyɔ̄ɔ̍ ni᷄ŋ nda̍.

²¹“E̍ha̍bī, po̍ Kōla̍a̍yā wo̍ ni̍, a̍ Sɛ̄dīka̍yā po̍ Ma̍a̍sɛ̍yāā wo̍, a̍ cho̍ nya̍ chōōla̍ŋ dīmūllo̍ mā dīmī māā wānāa̍ su̍a̍ā le̍ Mɛ̄lɛ̄ka̍ wa̍ nda̍ chō ni̍ wa̍, nyɛ̄ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nɔ̍ kpāāyāa̍ kpo̍u̍, I̍sɔ̄lūɛ̍i̍ya̍ Mɛ̄lɛ̄ka̍ ndāa̍ ō dīmi̍ a̍ nda̍ o̍kɔ̄ɔ̄ wo̍ cho̍ ho̍ō ni̍. Ō dīmi̍ māā ō chō nda̍ mālɔ̄ɔ̄ Nābi̍u̍kānɛ̍ɛ̍sā o̍ bā, māsāa̍ le̍ Ba̍bi̍lɔ̄ŋ, mbō dīu̍ nda̍ nya̍ o̍ hɔ̄l kpe̍nde̍ke̍le̍.

²²Ō dīmi̍ māā nyɛ̍ yɔ̍nūŋ ni̍ŋ a̍ nda̍ wo̍, wānā o̍ wāna̍ cho̍ o̍ bīyɔ̄ɔ̍ ni̍ŋ Ba̍bi̍lɔ̄ŋ, ā chūā ni̍ŋ ndu̍ māā tāāmāsi̍ le̍ wāŋnda̍ sēndi̍o̍o̍ hāndɔ̄ɔ̍ chōo̍. Māa̍ wāŋndo̍ ō wā ni̍ŋ cha᷄ŋ ndɔ̍ mēnāa̍ mbō dīmi̍ māā, nūm mɛ̄ɛ̍ mī Mɛ̄lɛ̄ka̍ Ya̍a̍wɛ̄ɛ̄ o̍ to̍sa̍ a̍ nūm mɛ̄ɛ̍ i̍ yɔ̍nu̍ŋ a̍ Sɛ̄dīka̍yā nda̍ E̍ha̍bī, wānāā Māsāa̍ Ba̍bi̍lɔ̄ŋ o̍ lo᷅m yōōmū chi̍li̍kɔ̍ wa̍ yɛ̍.

²³Kāni̍ fo̍ndōle̍, sɔ̄ɔ̍ŋ wāŋnda̍ ha̍ā ā tōsa̍ I̍sɔ̄lūɛ̄īyo̍ŋ, ŋ̄ wɔ̄u̍ ŋ̄ bɔ̄ɔ̍. Chāāŋāā ndāa̍ nda̍ chīɛ̄ɛ̄li̍āŋ nda̍, a̍ lāāndāā wānāā kāŋ nda̍ a̍a̍ ti̍ām ni̍, ndu̍yɛ̍ o̍ ko̍ŋ kɔ̍ɔ̍lī, mā dīmūl wa᷅ŋnda̍ yōōŋgūlā lāchōōwā la̍ŋ, mā dīmī māā o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ yōōŋgūlā lāŋ lā chɛ᷄ŋ ni̍. Ndu̍yɛ̍ ō cho̍ bɛ̍ɛ̍ ya̍ Mɛ̍lɛ̄ka̍ Ya̍a̍wɛ̄ɛ̄ le̍ ya̍ i̍i̍ su̍a̍ā nāa̍ nda̍ chūā le̍. Nyɛ̄ o̍ nyɛ̄ nda̍ wa̍ tōsāa̍, ō pīlɛ̍ bɛ̍ɛ̍ cho̍ mī ya̍ Mɛ̍lɛ̄ka̍ kɛ̄ɛ̍ chɔ̄ le̍. Tē ō wa̍ sūɛ̍i̍ lēse̍ī pɛ̍, I̍ nɔ̍lā mī tɛ̍nda̍ se̍īle̍ŋ mī chɔ̍m nyɛ̄ o̍ nyɛ̄ nda̍ tōsa̍. Nyɛ̄ Mɛ̄lɛ̄ka̍ Ya̍a̍wɛ̄ɛ̄ di̍mi̍ wo̍ ndu̍ cho̍ ko̍ŋ ni̍.”

²⁴O̍ ko̍ŋ kɔ̍ɔ̍lī, yōōŋgū Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍, I̍sɔ̄lūɛ̍i̍ya̍ Mɛ̄lɛ̄ka̍ ndāa̍ ō kē ya̍ le̍ Sīɛ̄ma̍yā, wānā wa̍ā Nɛ̍hɛ̍lām chi̍e̍e̍ wo̍ ndu̍ cho̍ ho̍ō ni̍. Mɛ̄lɛ̄ka̍ dīmi̍ āā, “Nūm Sīɛ̄ma̍yā, a̍ lo̍ o̍ ko̍ŋ ma̍ chāl a̍ bōllē nūm ma̍ pōōnyīāā yāu̍wo̍ nāa̍ wānā so̍līāā lāsa̍lāa̍ wo̍ Sɛ̄fāna̍yā chu̍a̍, po̍ Māāsɛ̍yā wo̍, a̍ wānāa̍ wa̍ Chūlu̍sɛ̄lɛ̄m nda̍ kpo̍u̍, ndu̍yɛ̍ a̍ wānāa̍ so̍lī sa̍lāla̍ŋ o̍ Mɛ̄lɛ̄ka̍ lo̍ wa̍. Ma̍ lō o̍ ko̍ŋ ma̍ di̍mūl Sɛ̄fāna̍yā o̍ yāu̍wo̍ ni᷄ŋ āā,

²⁵

²⁶“Nūm Mɛ̄lɛ̄ka̍ Ya̍a̍wɛ̄ɛ̄ o̍ hɛ̍li̍ māā wānā so̍līāā lāsa̍lā ni̍ mbo̍ mīŋgī nu̍m o̍ fōōfo̍ Chɛ̄hōwa̍dā wo̍, le̍ mā wa̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ bōlle̍ŋ kpo̍u̍. Tē bōlle̍ŋ lē hīŋnu̍ŋ wa᷅ŋndo̍ pɛ̍ mbō sīīŋgu̍u̍ ndu̍ pi̍la̍ wāna̍ su̍a̍ā le̍ Mɛ̄lɛ̄ka̍ wo̍, nu̍m nɔ̍ ni̍ mā bīī wānā ko̍ŋ mā dɔ̄ū ndu̍ o̍ kpi̍ɔ̍ɔ̍, ndu̍yɛ̍ mā wo̍u̍ ndu̍ vɛ̄lɛ̄ chīli̍ŋu̍ŋ nda̍ wōū wa̍nāā sēēmɛ̍i̍ya̍ o̍ lābo̍lō wo̍ŋ o̍ lābo̍lō.

²⁷Vɛ᷅ mi̍ Chɛ̄lūīma̍yā, wānā wa̍ā A̍na̍tɔ̍tī chi̍e̍e̍ o̍ si̍i̍ŋgūū ndu̍ pi̍la̍ wāna̍ su̍a̍ā le̍ Mɛ̄lɛ̄ka̍ wo̍ nya̍ tɛ̄ɛ̄ŋ lo̍ŋ, a̍ nɔ̍lā mā bīī ndu̍ le̍?

²⁸Tu̍e̍i̍ yɔ̍ yo̍o̍ŋgū o̍ yɔ̍ŋ nāa̍ na̍a̍ chūā Ba̍bi̍lɔ̄ŋ na̍nu᷄ŋ ndo̍. Ō dīmi̍ āā, ‘Lā cho̍ ya̍lā fūlā o̍ bīyɔ̄ɔ̍ ni᷄ŋ te̍. Le̍la̍ŋ lā tāŋgu̍l chi̍ɛ̍īla̍ŋ mī lā cha᷄l kpe̍e̍kpe̍i̍. Lā tōsa̍ kpe̍le̍la̍ŋ le̍ mī lā sɔ̄la̍ nyɛ̄ nya̍ dīā wo̍.’ ”

²⁹Mɛ̄ɛ̍ Sɛ̄fāna̍yā o̍ sɔ̍la̍ yāu̍ Sīɛ̄ma̍yā o̍ po̍o̍nyi̍a̍l ndu̍ ho̍ō wo̍, mbo̍ hūŋ a̍ ndu̍ nāa̍ ya̍ Chɛ̄lūīma̍yā chu̍a̍ mbo̍ tōfā ndu̍ ya̍ o̍ hɔ̄l.

³⁰O̍ ko̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā nāa̍ ya̍ chu̍a̍ mbo̍ kē ya̍ yōōŋgōo̍. Mbo̍ dīmūl la̍ āā,

³¹“Chɛ̄lūīma̍yā, yɔ̍ŋ yo̍o̍ŋgōo̍ ho̍ō nāa̍ wāŋnda̍ Chu̍dā chu̍a̍ kpo̍u̍, a̍ cho̍ o̍ bīyɔ̄ɔ̍ ni᷄ŋ nda̍. Di̍mu̍l nda̍ māā nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ a̍ Sīɛ̄ma̍yā, wānā wa̍ā Nɛ̍hɛ̍lām chi̍e̍e̍ o̍kɔ̄ɔ̄ wo̍ cho̍ ho̍ō ni̍. Ō dīmi̍ āā, ‘Yōōŋgū o̍ yōōŋgū Sīɛ̄ma̍yā o̍ cho̍ nya̍ dīmūllo̍ māā wāna̍ su̍a̍ā le̍ ya̍ Mɛ̍lɛ̄ka̍ wo̍ o̍ cho̍ ni̍, ō cho̍ ya̍ Mɛ̍lɛ̄ka̍ le̍ dɔ̍ū ndu̍ ndu̍ o̍ sōndō le̍. Hūīyo̍ ko̍ o̍ cho̍ nya̍ ni̍, mbō tōsā mī lā lāāla̍ŋ cho̍o̍lā o̍ cho̍ nya̍ dīmūllo̍ la̍ŋ.

³²Le̍la̍ŋ nyɛ̄ ya̍ Mɛ̍lɛ̄ka̍ Ya̍a̍wɛ̄ɛ̄ di̍mi̍ a̍ ndu̍ o̍kɔ̄ɔ̄ wo̍ cho̍ ho̍ō ni̍. I̍ cho̍ Sīɛ̄ma̍yā wānā wa̍ā Nɛ̍hɛ̍lām chi̍e̍e̍ nyɛ̄ pālāa̍ tūsī chōo̍ nda̍ wānāa̍ fu̍la̍ o̍ pūlālē ndɔ̄la̍ŋ chōo̍ wa̍ kpo̍u̍. I̍ cho̍ tōsā, wānāa̍ fu̍la̍ o̍ pūlālē ndɔ̄le̍ŋ chōo̍ wa̍, ō pīlɛ̍ bɛ̍ɛ̍ ō lo᷅ ni̍ŋ yo̍o̍mū nya̍ tɛ̄ɛ̄ŋ mbō chē sɔ̄ɔ̍ŋ kɛ̍ndɛ̄ŋ ya̍ I̍ to̍sāl ni̍ŋ wa̍nāā nīa̍a̍ wo̍ŋ o̍ yɔ̄nɔ᷄ŋndo̍ le̍. Kāni̍ fo̍ndōle̍ ndu̍ to̍sa̍ ni̍ mi̍ wāŋnda̍ ha̍ā ā sīmūl lā. Ya̍ Mɛ̍lɛ̄ka̍ Ya̍a̍wɛ̄ɛ̄ ya̍ so̍ō ni̍.’ ”