Read Southern Kisi Chɛ̄lūīma̍yā 3 Bible Online

Chɛ̄lūīma̍yā 3 - Southern Kisi bible

Chɛ̄lūīma̍yā 3

¹Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mī āā, “Wāŋnda̍ I̍sɔ̄lūɛ̄ī, sāwāa̍ dīmi̍ māā tē wānā pɔ̍nɔ̍ɔ̍ ō kɛ̄ɛ̍ la̍a̍ ndɔ̍ pɛ̍, mī wānā la̍nɔ̍ ko̍ŋ ō kɔ̍ cha᷅l wānā pɔ̍nɔ̍ chɛ̍le̍ŋ o̍ bā, māā wānā pɔ̍nɔ̍ kɛ̍ɛ̄ ko̍ŋ chu̍ā kōŋ ndo̍, ō nɔ̍ lɛ̍ mbō mīŋgi̍ chūā kōŋ chūā o̍ nɔ̄ ni̍ŋ te̍. Māā tē ō tōsa̍ ko̍ŋ pɛ̍, mɛ̄ɛ̍ sāwa̍ to̍sā mī lɛ̄ŋnde̍ŋ lē sīmnu᷄ŋ le̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l lo̍, mɛ̄ɛ̍ ndu̍ o̍ tɛ̍ɛ̍mbu̍u̍ ko̍ŋ ni̍. Tē ō wa̍ māā yɔ̄ŋɔ̄ɔ̄ pɛ̍, nya̍ wāŋnda̍ I̍sɔ̄lūɛ̄ī lā chō māchūāā a̍ ya̍ mɛ̄ɛ̍ pɔ̍nɔ̍ɔ̍ a̍ la̍nɔ̍ɔ̍ ā chō nu̍a̍ā yɛ̍. Kɛ̍ mi̍ lā māl la̍ mi̍ lā mūli᷄ŋ nyɛ᷅m chēle̍ŋ fāŋgā fa̍ŋga᷄ŋ nya̍ kāāla̍ wo̍ŋ kɔ̄ɔ̄lī. Kɛ̍ ndu̍yɛ̍ mi̍ lā yēēmā vɛ̄lɛ̄ le̍ mī mi̍ŋgi̍ nya̍ chūā.

²Lā mɛ̄ɛ̄nda̍ŋ ndɔ̍ o̍ pēmbo᷄ŋ chōo̍. Pēmbīi̍ kūɛ̍ɛ̍nɛ̍ cho̍ yɛ̄ lā nɔ̍ fo̍ndā lāsōōlu̍u̍wo̍ lo̍ŋ te̍? Mɛ̄ɛ̍ wāŋ lāāndūāā tīāmāa̍ ā chāl nu̍a̍ā pūa̍a̍ chūmndo̍ o̍ nɛ̄īla̍ŋ yɛ̍, le̍nde̍ nya̍ chāl wa᷅ŋnda̍ chūmndo̍ o̍ fo̍ndāŋndā lāsōōlu̍u̍la̍ nyāla̍ŋ ni̍. Mɛ̍ɛ̍ A̍lu̍a̍būi̍ya̍ ā chāl nu̍a̍ā wāŋnda̍ chūmndo̍ o̍ nɛ̄īla̍ŋ o̍ lɛ̄ŋndē po̍lte̍ŋ ni᷄ŋ le̍ nda̍ dēlɔ̄ɔ̍ chōo̍ yɛ̍, le̍nde̍ nya̍ chāl nda̍ chūmndo̍ ni̍. Mi̍ lā bīī mi̍ lā kɛ̄ɛ̄ ya̍ mi̍ lā mūli᷄ŋ nyɛ᷅m chēle̍ŋndo̍ŋ sōōlūūwo̍ māā mɛ̄lɛ̄ka̍a̍ nya̍. O̍ ko̍ŋ, mi̍ lā tōsā lɛ̄ŋnde̍ŋ kpo̍u̍ mi̍ lē sīmnu᷄ŋ le̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l.

³Le̍ he̍ī, mi̍ to̍sā pīɔ̄ɔ̄ o̍ pīɔ̄ɔ̄ ndu̍ o̍o̍ se᷅ lɛ᷅ŋnde̍ŋ nde᷅ŋ te̍. Mɔ᷄m mɔ̍mndo̍ ho̍ō bɛ̍ɛ̍ ndu̍ o̍o̍ chu̍chū lɛ᷅ŋnde̍ŋ nde᷅ŋ te̍. Kɛ̍ a̍ ko̍ŋ kpo̍u̍ mi̍ lā hīāū lāchī a̍ ya̍ kīɔ̍ɔ̍ le̍ mɛ̄lɛ̄ka̍a̍ chēle̍ŋ nda̍. Ndu̍yɛ̍ lāsi̍ɔ̍mbu̍ bɛ̍ɛ̍ la̍ bi̍i̍ nya̍ bɛ̍ɛ̍ le̍ nyɛ̄ nya̍ tōsa̍ wo̍ le̍.

⁴“Ndu̍yɛ̍ a̍ kɛ̄ɛ̄ nya̍ kɛ̄ɛ̍ ya̍ ko̍ŋ ndo̍ kpo̍u̍, su̍ŋ su̍ŋ bɛ̍ɛ̍ mi̍ lā wā dīmīo̍o̍ āā, ‘Nu᷄m cho̍ fi̍nyā nāa̍ ni̍. Sīndɛ̄ pa̍ ŋ̄ chɔ᷄m na̍a̍ ni̍ māā a̍ ka̍a̍la̍ na̍a̍.

⁵A̍ do̍u̍nu᷄ŋ tu̍mbe̍ a̍ na̍a̍ mā wa̍ a̍ tu̍mbe̍ ko̍ŋ le̍ fɛ̍ɛ̍ŋ a̍ fɛ̍ɛ̍ŋ te̍. A̍ tu̍u̍lū kɔ᷅l a̍ na̍a̍ mā wa̍ a̍ kɔ̄l tūū kōŋ le̍ te̍le̍ŋ o̍ te̍le̍ŋ te̍? Wāŋnda̍ I̍sɔ̄lūɛ̄ī, le̍nde̍ nya̍ chō dīmīo̍o̍ a̍ sōndōlā nyāla̍ŋ ni̍, kɛ̍ a̍ ko̍ŋ kpo̍u̍ mi̍ lā wā hīōūwɔ̄ɔ̍ lāchī a̍ yɔ̄ŋndā wɔ̄ɔ̍ŋnda̍ŋ tōsāa̍ mɛ̄ɛ̍ nya̍ yēēmā yɛ̍.’ ”

⁶Bōōndi̍i̍ Chōōsa̍yā o̍ wa̍ māsāa̍ I̍sɔ̄lūɛ̍i̍ ye̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ ke᷅ ya̍ yōōŋgōo̍ le̍ I̍sɔ̄lūɛ̄ī. Mbo̍ dīmūl la̍ āā, “Chɛ̄lūīma̍yā, ā chē nyɛ̄ wāŋnda̍ I̍sɔ̄lūɛ̄ī, wānāa̍ kɛ̍ɛ̍ ha̍ā le̍ ya̍ dīōmndo̍ tūēīyɔ̄ɔ̍ wa̍ ā tōsa̍ wo̍? Ā bīī ma̍ kɛ̄ɛ̄ ya̍, ma̍ mūli᷄ŋ nyɛ᷅m chēle̍ŋndo̍ sōōlūūwo̍ o̍ pēmbo᷄ŋ chōo̍ a̍ o̍ yɔ̄mīī pūīyɛ̄i̍ bɛ̄ŋgu̍.

⁷A̍ sɔ̄ɔ̍ŋ wɔ̍ɔ̍ŋ nda̍ wa̍ mu᷅ŋ tōsāa̍ kpo̍u̍ wo̍ŋ, I̍ wa̍ yīya᷄ŋndo̍ māā wāŋnda̍ ha̍ā ā wa̍ hūnɔ̄ɔ̄ o̍ nda̍ pi̍la̍ ni᷄ŋ mī nda̍ a̍a̍ mi̍i̍ŋgu̍ ya̍ o̍ ībūŋ, kɛ̍ ā chɛ᷄l mā mīīŋgu̍ ya̍ o̍ ībūŋ te̍. Ndu̍yɛ̍ nyɛ̄ o̍ nyɛ̄ nda̍ tōsa̍, mi̍ chāāŋāā ndāa̍ Chu̍dā a̍ bi̍ī mi̍ nda̍ bɛ̍ɛ̍ a̍ kɛ̍ɛ̄ le̍ ya̍ dīōmndo̍ tūēīyɔ̄ɔ̍ wa̍ ā chā kpo̍u̍.

⁸Le̍ kɛ̄ɛ̄ wāŋnda̍ I̍sɔ̄lūɛ̄ī a̍ kɛ̍ɛ̍ ya̍ ma̍ mūli᷄ŋ nyɛ᷅m chēle̍ŋndo̍ŋ sōōlūūwo̍ wo̍, mi̍ lo᷅ o̍ ko̍ŋ mi̍ kɛ̍ɛ̄ wāŋnda̍ I̍sɔ̄lūɛ̄ī mi̍ fa̍ŋā nda̍ bā nūu̍ chōo̍. Ndu̍yɛ̍ ko̍ŋ kpo̍u̍ mi̍ wāŋnda̍ Chu̍dā, I̍sɔ̄lūɛ̍i̍ya̍ chāāŋāā ndāa̍ ā chā. Kɛ̍ mi̍ chē bɛ̍ɛ̍ mi̍ wāŋnda̍ Chu̍dā, wānāa̍ bi̍ī mi̍ nda̍ bɛ̍ɛ̍ a̍ kɛ̍ɛ̄ le̍ ya̍ dīōmndo̍ tūēīyɔ̄ɔ̍ wa̍ ā chā nyɛ̄ o̍ nyɛ̍ yɔ̍nu̍ŋ ni̍, īsīōōŋ ī bīi̍ nda̍ le̍. Nda̍ bɛ̍ɛ̍ ma̍ lo̍ o̍ ko̍ŋ ma̍ kɛ̄ɛ̄ ya̍, ma̍ mūli᷄ŋ nyɛ᷅m chēle̍ŋndo̍ŋ sōōlūūwo̍ māā mɛ̄lɛ̄ka̍a̍ ndā.

⁹Yɔ̄ŋ wɔ̄ɔ̍ŋ wāŋnda̍ I̍sɔ̄lūɛ̄ī a̍ to̍sa̍ wo̍ wāŋnda̍ Chu̍dā a̍ chi̍ ndu̍ bɛ̍ɛ̍ nyɛ᷅ o̍ nyɛ̄ le̍, ō nda̍ nda̍ tōsa̍ wo̍ bɛ̍ɛ̍ hi̍o̍ū a̍ ō wāŋnda̍ I̍sɔ̄lūɛ̄ī a̍ to̍sa̍ wo̍. Nda̍ nda̍ pōūta̍ŋ a̍ yɔ̄mnde̍ nda̍ a̍a̍ so̍o̍lūū ni̍ māā mɛ̄lɛ̄ka̍a̍ nda̍. O̍ ko̍ŋ ma̍ tōsā lɛ̄ŋnde̍ŋ kpo̍u̍ mi̍ lē sīmnu᷄ŋ le̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l.

¹⁰Ndu̍yɛ̍ a̍ sɔ̄ɔ̍ŋ wɔ̄ɔ̍ŋ wāŋnda̍ Chu̍dā, nda̍ yɔ̍nūŋ māā I̍sɔ̄lūɛ̍i̍ya̍ chāāŋāā ndāa̍ ni̍, ā tōsa̍ mu᷅ŋ ndo̍ŋ kpo̍u̍, ā chɛ᷄l mā mūli̍ŋ nāa̍ ya̍ chu̍a̍ a̍ kɔ̄ltā ndāla̍ŋ kpo̍u̍ le̍. Chɔ̄mndo̍ ko̍ nda̍ wa̍ o̍ hɔ̄lla̍ ni̍ māā ā mūli̍ŋ nāa̍ ya̍ chu̍a̍. Ya̍ Mɛ̍lɛ̄ka̍ Ya̍a̍wɛ̄ɛ̄, ya̍ cho̍ sūɛ̍i̍.”

¹¹Mi̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍a̍ū lāchī a̍ sūɛ̍i̍, mbo̍ dīmī āā, “Mi̍ chē bɛ̍ɛ̍ mi̍ wāŋnda̍ I̍sɔ̄lūɛ̄ī a̍ kɛ̍ɛ̄ le̍ ya̍ dīōmndo̍ tūēīyɔ̄ɔ̍ ni̍, kɛ̍ tē I̍ tu̍u̍ nda̍ a̍ wāŋnda̍ Chu̍dā pɛ̍, wānāa̍ bi̍ī ha̍ā ma̍ kɛ̄ɛ̄ ya̍ dīōm nda̍, wāŋnda̍ I̍sɔ̄lūɛ̄ī ya̍ I̍ hi̍a̍ū chɔ᷅ wānāā kɛ̄ndɛ̄, mbo̍ hīāū wāŋnda̍ Chu̍dā.”

¹²Le̍la̍ŋ kɔ̍ o̍ lɛ̄ŋnde̍ŋ bā lūāŋndo̍, mā kɔ̍ yo̍ndā nāa̍ wāŋnda̍ I̍sɔ̄lūɛ̄ī chu̍a̍ māā nyɛ̄ Mɛ̄lɛ̄ka̍ dīmi̍ wo̍ ndu̍ cho̍ ho̍ō ni̍. Ō dīmi̍ āā, “Wāŋnda̍ I̍sɔ̄lūɛ̄ī, lā bīī mi̍ lā kɛ̄ɛ̄ le̍ ya̍ dīōmndo̍ tūēīyɔ̄ɔ̍, mi̍ lā tōsā mi̍ ya̍ Mɛ̍lɛ̄ka̍ dūāūnu᷄ŋ tu̍mbe̍ a̍ nya̍, kɛ̍ I̍ cho̍ nya̍ dīmūllo̍ mī lā mīīŋgu̍ nāa̍ ya̍ chu̍a̍. Mi̍ chē bɛ̍ɛ̍ mi̍ du̍a̍u̍nu᷄ŋ tu̍mbe̍ a̍ nya̍ o̍ ka̍lā ka̍lā, kɛ̍ I̍ cho̍ nya̍ īnyīɛ̍ɛ̍ tūīīnɔ᷄ŋ mī ma̍l nya̍ le̍ nyɛ̄ nya̍ to̍sa̍ wo̍. Tu̍mbe̍ o̍ tu̍mbe̍ ya̍ I̍ dɔ̍ɔ̍ŋ a̍ nya̍, ō chō mɛ̄ɛ̄lū.

¹³Nyɛ̄ ya̍ I̍ ye̍e̍ma̍ nya̍ mī lā tōsa̍ ndu̍ pīlɛ̍ kpe̍ wo̍, ndu̍ cho̍ ni̍, sɔ̄lɔ̄la᷄ŋndo̍ māā lā tōsa̍ yɔ̄ŋ wɔ̄ɔ̍ŋndo̍ ndu̍yɛ̍ o̍ ko̍ŋ kɔ̍ɔ̍lī, mi̍ lā sīmūl la̍, ya̍ Mɛ̍lɛ̄ka̍ Ya̍a̍wɛ̄ɛ̄ Mɛ̄lɛ̄ka̍ nyāa̍. Lā sɔ̄lɔ̍la̍ŋ māā lā kɛ̄ɛ̍ ya̍ Mɛ̍lɛ̄ka̍ mi̍ lā mūli᷄ŋ nyɛ᷅m chēle̍ŋndo̍ŋ sōōlūūwo̍ o̍ yɔ̄mīī pūīyɛ̄i̍ bɛ̄ŋgu̍ māā mɛ̄lɛ̄ka̍a̍ nyā ndu̍yɛ̍ o̍ ko̍ŋ kɔ̍ɔ̍lī, māā nyɛ̄ o̍ nyɛ̄ ya̍ I̍ di̍mu̍l nya̍ le̍ tōsāa̍ mi̍ lā kɛ̄ɛ̄ le̍ ndu̍ tōsāa̍.”

¹⁴Mi̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍a̍ū lāchī a̍ sūɛ̍i̍ mbo̍ dīmī āā, “Lā mūli̍ŋ nāa̍ ya̍ chu̍a̍, nya̍ wāŋnda̍ I̍sɔ̄lūɛ̄ī nya̍ bi̍ī ha̍ā mi̍ lā kɛ̄ɛ̄ le̍ ya̍ dīōmndo̍ tūēīyɔ̄ɔ̍ wa̍, fo̍ndōle̍, ya̍ Mɛ̍lɛ̄ka̍ I̍ chu̍a̍ nya̍ māā wānāā nī. I̍ cho̍ nya̍ hūnɔ̄ɔ̄ wāŋnda̍ hɛ̄lī tɛ̄ɛ̄ŋ ā pīlɛ̍ŋ pi̍lɛ̍ŋ nda̍. O̍ chi̍e̍e̍ o̍ chi̍e̍e̍ I̍ cho̍ hūnɔ̄ɔ̄ wāŋndo̍ hɛ̄lī ō pīlɛ̍, ndu̍yɛ̍ o̍ ku̍ndā o̍ ku̍ndā chōo̍ mī hɛ̍li̍ wāŋnda̍ ā ŋīɔ̍ɔ̍ŋ nda̍ tɛ̄ɛ̄ŋ ndu̍yɛ̍ mī chu̍a̍ nda̍ mī mīŋgi̍ nda̍ Sa̍a̍yɔ̄ŋ chi̍e̍e̍.

¹⁵Tē te̍le̍ŋ ko̍ŋ ō fūūlu̍u̍ pɛ̍, I̍ cho̍ hūnɔ̄ɔ̄ wāŋnda̍ hɛ̄lī, ā ya̍ Mɛ̍lɛ̄ka̍ hīni̍ kɔ̄l la̍ mī si̍i̍ŋgu̍u̍ nda̍ māsāa̍ nya̍ chōo̍. Wāŋnda̍ ha̍ā ā wā ni̍ŋ māsāa̍ kɔ̄l kālu̍ bɛ̍ndū, ndu̍yɛ̍ mā wa̍ māsāa̍ tāāsi̍ bɛ̄ndū nya̍ chōo̍.

¹⁶A̍ te̍le̍ŋ ko̍ŋ, I̍ cho̍ tōsā mī lā kūi̍ kūīyo̍ pīla̍ o̍ lɛ̄ŋndē nyāle̍ŋ ni᷄ŋ. A̍ bōōndi̍i̍ ke̍ŋ, wānā o̍ wānā cho̍ hūnɔ̄ɔ̄ pūɛ̍ɛ̍ŋ a̍ kɔ̍fu̍ si̍m le̍ kpe̍ma̍ ya̍ Mɛ̍lɛ̄ka̍ Ya̍a̍wɛ̄ɛ̄ o̍ yi̍i̍ a̍ nya̍ wo̍. Wānā o̍ wānā de᷅l ni̍ŋ bɛ̍ɛ̍ kɔ᷅l o̍ kɔ̍fū ko̍ŋ te̍ kɛ̄lɛ̄ŋgāā ni᷅ŋ te̍ mī wānā yi̍ya̍ŋ bɛ̍ɛ̍ a̍ ndu̍ o̍kɔ̄ɔ̄, fo̍ndōle̍ a̍ te̍le̍ŋ ko̍ŋ, wānā o̍ wānā nɔ᷅ ni̍ŋ i̍ye̍e̍ma̍ le̍ ndu̍ le̍ kɛ̄lɛ̄ŋgāā ni᷅ŋ te̍ mī wāŋnda̍ nɔ̄ bɛ̍ɛ̍ i̍ye̍e̍ma̍ le̍ ō chēle̍ŋ tōsā.

¹⁷A̍ bōōndi̍i̍ ke̍ŋ, wāŋnda̍ vēēlū ni̍ŋ Chūlu̍sɛ̄lɛ̄m āā, ‘Fo̍ndāŋ kpe̍ŋgbe̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ ō chō wo̍.’ Wāŋnda̍ o̍ lɛ̄ŋnde̍ ni᷄ŋ kpo̍u̍, ā chūūŋgi̍āŋ ni̍ŋ Chūlu̍sɛ̄lɛ̄m chi̍e̍e̍ le̍ ya̍ Mɛ̄lɛ̄ka̍ Ya̍a̍wɛ̄ɛ̄ bɛ̄ɛ̄le̍ŋ kīo̍o̍. A̍ te̍le̍ŋ ko̍ŋ, wāŋnda̍ ve᷅m lɛ̍ ni̍ŋ bo̍llē kālā tōsā a̍ ya̍ Mɛ̍lɛ̄ka̍ mā tōsa̍ yīya᷄ŋnda̍ wɔ̍ɔ̍ŋnda̍ hu᷅ŋ nda̍ o̍ lākɔ̄l la̍ŋ te̍.

¹⁸Tē te̍le̍ŋ ko̍ŋ ō fūūlūū pɛ̍, I̍ cho̍ tōsā mī wāŋnda̍ I̍sɔ̄lūɛ̄ī nda̍ wāŋnda̍ Chu̍dā a̍ dɔ̍u̍nu᷄ŋ na̍a̍ pi᷅lɛ̍ mā chɛ᷄ŋ nāa̍ nda̍ chō o̍ chɛ̄le̍ŋ ni᷄ŋ o̍ lɛ̄ŋnde̍ cho̍ bā lūāŋndo̍ le̍ŋ ni᷄ŋ nda̍ mā mīīŋgu̍ o̍ lɛ̄ŋndē ya̍ I̍ ke̍ fi̍nyāā ndāā ma̍māa̍ māā nyɛ̄ ndā le̍ fɛ̍ɛ̍ŋ a̍ fɛ̍ɛ̍ŋ ndo̍ le̍ŋ ni̍ŋ.”

¹⁹Mi̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍a̍ū lāchī a̍ sūɛ̍i̍, mbo̍ dīmī āā, “Wāŋnda̍ I̍sɔ̄lūɛ̄ī, yēēmɛ̍i̍ nīi̍ kpe̍e̍kpe̍i̍ ndi̍ i̍i̍ wa̍ ni̍ le̍ mī ya̍ i̍i̍ bi̍ī nya̍ māā chūāūwāā ni̍. Mi̍ yi̍ya᷄ŋ le̍ mī ke̍ nya̍ lɛ̄ŋndē kɛ̄ndɛ̄ kɛ̍ndɛ̄lē bɛ̄ŋnde̍ŋ, lɛ̄ŋnde̍ na̍ŋ mi̍ lē hīāū lɛ̄ŋnde̍ kpo̍u̍ o̍ chi̍e̍ēŋndo̍ ni᷄ŋ nde̍ŋ māā nyɛ̄ nyā. Ndu̍yɛ̍ mi̍ yi̍ya̍ŋ māā nya̍ bɛ̍ɛ̍ lā chō ya̍ chūā māā fi̍nyā nyā, ndu̍yɛ̍ māā fɛ̍ɛ̍ŋ a̍ fɛ̍ɛ̍ŋ lā kɛ̍ɛ̄ ya̍ le̍.

²⁰Kɛ̍ mi̍ lā lō o̍ ko̍ŋ mi̍ lā sōlī ya̍ dīōm, nya̍ wāŋnda̍ I̍sɔ̄lūɛ̄ī. Mɛ̄ɛ̍ wānā la̍nɔ̍ɔ̍ ō mɛ̄ī nu̍a̍ā pɔ̍nɔ̍ nda̍ cha᷄l lo̍ mbō mūli̍ŋ wa᷅ŋ pīāāndūāā chēle̍ŋnda̍ bālɔ̄ɔ̍ kɔ̄ɔ̄lī yɛ̍, le̍nde̍ nya̍ tōsa̍ a̍ ya̍ ni̍. Ya̍ Mɛ̍lɛ̄ka̍ Ya̍a̍wɛ̄ɛ̄, ya̍ cho̍ sūɛ̍i̍ nāa̍ nya̍ chūā ni̍, nya̍ wāŋnda̍ I̍sɔ̄lūɛ̄ī.”

²¹Bɔ̄ɔ̄lūū bɛ̄ndōo̍ ō wā ni̍ŋ su̍ɛ̍i̍ kpe̍e̍kpe̍i̍ o̍ pēmbo᷄ŋ chōo̍. Wāŋnda̍ I̍sɔ̄lūɛ̄ī a̍ wa᷅ ni̍ŋ cha̍ŋnda̍ŋ kpe̍e̍kpe̍i̍ nāa̍ Mɛ̄lɛ̄ka̍ chūā mā nyɔ̄ɔ̄lū ndu̍. Ā bīī ma̍ kɛ̄ɛ̄ Mɛ̄lɛ̄ka̍ Ya̍a̍wɛ̄ɛ̄ o̍ cho̍ Mɛ̄lɛ̄ka̍ ndāa̍ wo̍, ma̍ tūāl nɛ̄īla̍ yɔ̄ŋ wɔ̄ɔ̍ŋ nda̍ŋ kɔ̄ɔ̄lī, la̍ bɛ̍nda̍ Mɛ̍lɛ̄ka̍ o̍ hɔ̄l te̍ la̍ŋ.

²²Mɛ̄lɛ̄ka̍ Ya̍a̍wɛ̄ɛ̄ o̍ di̍mūl ni̍ŋ nda̍ āā, “Wāŋnda̍ I̍sɔ̄lūɛ̄ī, lā lo̍ o̍ ko̍ŋ mi̍ lā kɛ̄ɛ̄ ya̍ le̍ mɛ̄lɛ̄ka̍a̍ chēle̍ŋnda̍, kɛ̍ I̍ cho̍ nya̍ dīmūllo̍, mī lā fāŋa̍ŋ mɛ̍lɛ̄ka̍a̍ kāŋ kɔ̄ɔ̄lī, mī lā mīīŋgu̍ nāa̍ ya̍ chu̍a̍. Nyɛ̄ o̍ nyɛ̄ nya̍ tōsa̍, I̍ cho̍ nya̍ mālɔ̄ɔ̄ le̍ ndu̍.” O̍ ko̍ŋ, mī wāŋnda̍ I̍sɔ̄lūɛ̄ī a̍ di̍mi̍ āā, “ŋ̄ chɛ᷄l mī ŋ̄ mīīŋgu̍ nāa̍ nūm chu̍a̍ Mɛ̄lɛ̄ka̍, fo̍ndōle̍, nūm Mɛ̄lɛ̄ka̍ Ya̍a̍wɛ̄ɛ̄, nu̍m cho̍ Mɛ̄lɛ̄ka̍ nāa̍ ni̍.

²³Nyɛ̄ o̍ nyɛ̄ na̍a̍ ŋ̄ sōōlūū o̍ pēmbo᷄ŋ chōo̍ māā mɛ̄lɛ̄ka̍a̍ nāā, mālā o̍ mālā ŋ̄ sɔ̍lā o̍ mu̍ŋ ni̍ŋ te̍. Bɔ̄ɔ̄lūū fo̍ndōo̍ ko̍ na̍a̍ ŋ̄ kūā lo̍ŋ ni̍. Nūm Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nāa̍, nu̍m pīlɛ̍ kpe̍ nɔ̍lā ni̍ mā pi̍ŋi̍ yōōmūlā na̍a̍ I̍sɔ̄lūɛ̍i̍ya̍.

²⁴Ŋ̄ lo̍ wɔ̄ ā pɔ̄mbɔ̄ mi̍ ŋ̄ kāndū fi̍nyāā nāā ma̍māa̍ chɔ̄ɔ̍ nyɔ̄ɔ̍ŋ mu᷅ŋ sōōlūūwo̍ māā mɛ̄lɛ̄ka̍a̍ nda̍, ma̍ lō mu̍ŋ sōōlūūwo̍ ha̍a̍a̍ ma̍ wū, o̍ pāa̍le̍ŋ ni᷄ŋ bɛ̍ɛ̍ ŋ̄ chi᷄ tɔ̍nɔ̍ nda̍ sɔ̄la̍ o̍ nyɛ̄m mu᷅ŋ ni᷄ŋ ndo̍ le̍. Nyɛ̄ o̍ nyɛ̄ nda̍ sɔ̄la̍ o̍ sāŋgā ndāa̍ ni᷄ŋ, lāsāā ni̍, lānāū ni̍, o̍ ko̍ŋ kɔ̍ɔ̍lī, a̍ pūa̍a̍ ndāā vi̍a̍lāa̍ le̍cho̍ō, ndu̍yɛ̍ a̍ chūāā ndāā la̍a̍ndūa̍a̍, kpo̍u̍ ma̍ lō lēbɛ̄ŋgu̍, o̍ nyɔ̄ɔ̍ŋ mu᷅ŋ sōōlūūwo̍ ni᷄ŋ.

²⁵Si̍ɔ̍mbu̍la̍ bɛ̄ndūla̍ŋ lā bīī na̍a̍ a̍ bōlle̍ŋ mɔ̍ɔ̍su̍ Mɛ̄lɛ̄ka̍. Na̍a̍ pi̍la̍ ŋ̄ sōli̍ŋ o̍ ba̍a̍ ni᷄ŋ a̍ nyɛ̄ na̍a̍ ŋ̄ tōsa̍ a̍ nūm ndo̍. Nūm Mɛ̄lɛ̄ka̍ Ya̍a̍wɛ̄ɛ̄, nu᷄m cho̍ Mɛ̄lɛ̄ka̍ nāa̍ ni̍. Kɛ̍ na̍a̍ ni̍, fi̍nyāā nāā ma̍māa̍ ni̍ mi̍ ŋ̄ bīī mi̍ ŋ̄ sīmūl nu̍m. Nyɛ̄ o̍ nyɛ̄ ŋ̄ dīmu̍l na̍a̍ le̍ tōsāa̍, ŋ̄ chɛ᷄l mī ŋ̄ tōsa̍ ndu̍ le̍.”