Read Southern Kisi Chɛ̄lūīma̍yā 30 Bible Online

Chɛ̄lūīma̍yā 30 - Southern Kisi bible

Chɛ̄lūīma̍yā 30

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ ke᷅ vɛ̄lɛ̄ ya̍ Chɛ̄lūīma̍yā yōōŋgū chēle̍ŋ. Mbo̍ dīmūl la̍ āā,

²“Ya̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍ nyɛ̄ ya̍ I̍ di̍mi̍ wo̍ cho̍ ho̍ō ni̍. Po̍o̍nyi̍a̍a̍ nyɛ᷅ o̍ nyɛ̄ ya̍ I̍ di̍mu̍l nu̍m o̍ yāu̍ chōo̍.

³Kāni̍ fo̍ndōle̍, pālɛ̍i̍ cho̍ hūnɔ̄ɔ̄ fūūlūū mī to̍sa̍ mī wānāā nīa̍a̍ I̍sɔ̄lūɛ̄ī a̍ Chu̍dā a̍ hu̍ŋ mi̍i̍ŋgū mɛ̄ɛ̍ nda̍ wa̍ pāāndū yɛ̍. I̍ cho̍ nda̍ hūnɔ̄ɔ̄ sōlī o̍ bīyɔ̄ɔ̍ ni̍ŋ, mī mi̍ŋgi̍ nda̍ o̍ lɛ̄ŋndē ya̍ I̍ ke̍ fi̍nyāā ndāā ma̍māa̍ māā nyɛ̄ ndā le̍ŋ ni᷄ŋ, mī to̍sa̍ mī lē sīmnu᷄ŋ vɛ̍lɛ̄ lɛ̄ŋndē ndā. Ya̍ Mɛ̍lɛ̄ka̍ Ya̍a̍wɛ̄ɛ̄, ya̍ so̍ō ni̍.”

⁴Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ a̍ wāŋnda̍ I̍sɔ̄lūɛ̄ī, ndu̍yɛ̍ a̍ wāŋnda̍ Chu̍dā o̍kɔ̄ɔ̄ wo̍ ndu̍ cho̍ ho̍ō ni̍.

⁵Mɛ̄lɛ̄ka̍ Ya̍a̍wɛ̄ɛ̄ o̍ di̍mūl la̍ āā, “I̍ cho̍ tūēīyɔ̄ɔ̍ wāŋnda̍ cha᷄ŋnda̍ŋ kpe̍e̍kpe̍i̍ a̍ sīōōŋīī bi̍ī nda̍ ve̍. Ā pɛ̍ a̍ sīōōŋīī bɛ̄ndūe̍i̍ ma̍ wā cha᷄ŋnda̍ŋ kpe̍e̍kpe̍i̍. Kɔ̄l nyūlū o̍ kɔ̄l nyūlū bɛ̍ɛ̍ ā nɔ̍ lɛ̍ le̍.

⁶Chɛ̄lūīma̍yā, nyu̍na̍ wɔ̍ wa᷅ŋnda̍ mā sīna̍ pɛ̄ŋgu̍. Wāŋ pīāāndūa̍a̍ ā chūā pa̍ la̍yo̍l mā vēlū? Kɛ̍ vɛ᷅ mi̍ wa᷅ wāŋ pīāāndūa̍a̍ chɔ̄ɔ̍ mā hāndūŋ ba̍la̍ŋ o̍ lādēmbē mā nyūūmbūŋ a̍ cha᷄ŋnda̍ŋ mɛ̄ɛ̍ pūli̍i̍ vi̍a̍lɛ̄i̍ ī wā nu̍a̍ā wāna̍ yo᷄llo̍ nɛ̄īyo̍ mbō wa̍ nyūūmbɔ᷄ŋ ko̍ŋ a̍ nyɛ̄ nɛ̄īyāa̍ yɛ̍? Vɛ᷅ mi̍ hɔ̄lla̍ ā māŋgāla᷄ŋ nda̍ nu̍a̍ā lēpīlɛ̍ be̍lu᷄ŋ mɛ̄ɛ̍ hɔ̄lla̍ ā māŋgālāŋ nu̍a̍ā wāna̍ yo᷄l pūli̍i̍ sa̍māa̍ yɛ̍?

⁷Pāa̍le̍ kpūndɛ̍lē bɛ̄ndūle̍ŋ lē chō o̍ nɛ̍i̍. Tē pāa̍le̍ le̍ŋ lē fūūlu̍u̍ pɛ̍, kpūndɛ̍ yɔ̍nūŋ ni̍ŋ ndo̍, sɔ̍ŋgɔ̍ ndɔ̄ bɛ̍ɛ̍ o̍ ve᷅m ni̍ŋ te̍. Pāa̍le̍ le̍ŋ lē wā ni̍ŋ pa̍a̍le̍ dɛ̍nɛ̍ pa̍lāālē bɛ̄ndū le̍ wānāā nīa̍a̍ I̍sɔ̄lūɛ̄ī. Kɛ̍ ndu̍yɛ̍ yōōmūlā ndāla̍ŋ lā lo᷅ ni̍ŋ o̍ dɛ̍nɛ̍ pa̍lāā kōŋ ni᷄ŋ te̍, I̍ cho̍ nda̍ chīīndīāā.”

⁸Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍, ō dīmi̍ āā, “Tē te̍le̍ŋ ko̍ŋ ō fūūlu̍u̍ pɛ̍, nyɛ̄ kīndīlāā ya̍a̍mɔ̍ɔ̍wa̍a̍ ndāa̍ ā hāndu̍ nda̍ chōo̍ wo̍, I̍ cho̍ nda̍ ndu̍ fāŋā chōo̍, ndu̍yɛ̍ mī so̍li̍ nda̍ nāa̍ nda̍ chō o̍ bīyɔ̄ɔ̍ ni᷄ŋ nda̍, ndu̍yɛ̍ mī to̍sa̍ le̍ fɛ̍ɛ̍ŋ a̍ fɛ̍ɛ̍ŋ, wāŋnda̍ o̍ lɛ̄ŋīī chēle̍ŋnde̍ ni̍ŋ a̍ ku̍ē lɛ̍ a̍ nda̍ o̍ bīyɔ̄ɔ̄ ni᷄ŋ te̍.

⁹Ya̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ ndāa̍, ya̍ nda̍ wā ni̍ŋ sa̍a̍ŋīāllo̍ ni̍, a̍ wāna̍ ya̍ I̍ si̍i̍ŋgūū ni̍ŋ ma̍sāa̍ nda̍ chōo̍ fūlāa̍ o̍ pūlāle̍ Dēēve̍le̍ŋ chōo̍ wo̍.”

¹⁰“Le̍la̍ŋ sīōōŋīī bi̍ī nya̍ le̍, nya̍ yu̍ŋgu̍ bu̍ɛ̍ī nūu̍ Che̍kɔ̍pū wo̍. Lā ta̍mbū lākɔ̄l te̍, nya̍ yu̍ŋgu̍ I̍sɔ̄lūɛ̄ī yo̍. I̍ cho̍ nya̍ pīŋī mī so̍li̍ nya̍ o̍ lɛ̄ŋndē lēvīltē lēŋ ni᷄ŋ. I̍ cho̍ nya̍ hūnɔ̄ɔ̄ sōlī o̍ bīyɔ̄ɔ̍ ni᷄ŋ o̍ lɛ̄ŋndē lēŋ ni᷄ŋ. Lā chō mīīŋgū o̍ lɛ̄ŋndē nyāle̍ŋ ni̍ŋ, ndu̍yɛ̍ mī lā wānu̍ŋ a̍ kɔ̄l nyūlū. Lā wānūŋ ni̍ŋ o̍ bā nyāa̍ chōo̍ yɛ̍lɛ̍kɛ̍lɛ̍ɛ̍ wānā o̍ wānā nɔ̍lā ni̍ŋ mbō tōsa̍ mī sīōōŋīī bīī nya̍ le̍.

¹¹Ya̍ Mɛ̍lɛ̄ka̍ I̍ cho̍ a̍ nya̍ lātūlu̍, ndu̍yɛ̍ I̍ cho̍ yōōmūlā nyāla̍ŋ chīīndīāā. Lɛ̄ŋīī ya̍ I̍ to̍sa̍ mi̍ ī sɛ̄ŋi᷄ŋ a̍ nya̍ o̍ bīyɔ̄ɔ̍ ni᷄ŋ nde̍ ki̍nɛ̍i̍, I̍ cho̍ ndi̍ tɛ̄ɛ̄mbūū kpo̍u̍. Kɛ̍ nya̍ nya̍ I̍ tɛ̍ɛ̍mbūū ni̍ŋ nya̍ kpo̍u̍ le̍. Kɛ̍ ndu̍yɛ̍ le̍ nyɛ̄ nya̍ tōsa̍ wo̍, I̍ me᷅l nya̍ le̍nde̍ le̍, mɛ̄ɛ̍ mī tu̍si̍ nya̍ nyɛ̄ pālāa̍ chōo̍. Ndu̍yɛ̍ I̍ tu̍si̍ nya̍ bɛ̍ɛ̍ nyɛ᷅ pālāa̍ chōo̍, o̍ nɛ̄ī kpe̍e̍kpe̍i̍ ya̍ I̍ to̍sā ndi̍ ni̍. Ya̍ Mɛ̍lɛ̄ka̍ Ya̍a̍wɛ̄ɛ̄ ya̍ so̍ō ni̍.”

¹²Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Wāŋnda̍ I̍sɔ̄lūɛ̄ī, dɛ̍nɛ̍ nyā pa̍lāa̍ ō chō māchūāā mɛ̄ɛ̍ wāŋndo̍ ō nɔ̄ nu̍a̍ā pāū ko̍lo̍ŋndo̍ ō si̍ŋgū le̍ yɛ̍. Dɛ̍nɛ̍ nyā pa̍lāa̍ pāū ko̍lo̍ŋndo̍ o̍ cho̍ ni̍, ō si̍ŋgū le̍.

¹³Wānā o̍ wānā cho̍ mbō mānda̍ nya̍ mbō sōli̍ nya̍ lēni᷄ŋ te̍. Pāū nyāa̍ ō nɔ̍ ma̍ko̍ŋgo̍ o̍ mākōŋgo̍ le̍ ndu̍ chīɔ̄ū le̍. Nɛ̄ī o̍ nɛ̄ī cho̍ mī lā sēŋgū a̍ ndu̍ le̍.

¹⁴Wānāā nya̍ a̍a̍ na̍a̍ŋa᷅ŋ pa̍a̍ndū nya̍ nda̍ā wa̍ kpo̍u̍ ā pūɛ̄ɛ̄nu̍ŋ a̍ nya̍. Nda̍ kpo̍u̍, wānā o̍ wānā o̍ bu̍u̍la̍ŋ ndɛ̍ a̍ nya̍ le̍. Mɛ̄ɛ̍ wāŋndo̍ ō yɔ̄ŋūl nu̍a̍ā ya̍a̍mɔ̍ɔ̍nɔ̍ ndɔ̄ɔ̍ yɛ̍, le̍nde̍ kɛ̍sɛ̍ kɛ̍sɛ̍ ya̍ I̍ yɔ̄ŋūl nya̍ ni̍. I̍ yɔ̄ŋūl nya̍ yɔ̄ŋūllo̍ pi̍la̍. Kāni̍ fo̍ndōle̍, dɛ̍nɛ̍ wɔ̍ɔ̍ŋ nya̍ tōsa̍ wo̍, chō ō bɔ̄ɔ̍, yɔ̄ŋndā wɔ̄ɔ̍ŋndā nya̍ tōsa̍ la̍ŋ lā chō fāŋgā.

¹⁵Nya̍ a̍a̍ pɛ̍ŋgī cha̍ŋndo̍ a̍ yɔ̄ŋūlɔ᷄ŋ nya̍ yɔ̄ŋu̍lu̍ŋ ndo̍, kāni̍ yɔ̄ŋūlɔ᷄ŋ nyāa̍ ō nɔ̍ ma̍ko̍ŋgo̍ o̍ mākōŋgo̍ le̍ ndu̍ chīɔ̄ū le̍. Le̍ dɛ̍nɛ̍ wɔ̍ɔ̍ŋ bɛ̄ndū nya̍ tōsa̍ wo̍, ndu̍yɛ̍ a̍ yɔ̄ŋndā wɔ̄ɔ̍ŋndā fāŋgālā nya̍ to̍sa̍ la̍ŋ, nyɛ̄ ko̍ŋ to̍sa̍ ni̍ mi̍ tu̍sī nya̍ nyɛ̄ pālāā kōŋ chōo̍.

¹⁶Kɛ̍ ndu̍yɛ̍ ya̍a̍mɔ̍ɔ̍wa̍a̍ nyāa̍ cho̍ nya̍ ha̍ā tɛ̄ɛ̄mbūūwo̍ wa̍ ki̍nɛ̍i̍, nda̍ bɛ̍ɛ̍ le̍nde̍ ko̍ni̍ wāŋnda̍ chō nda̍ tɛ̄ɛ̄mbūū ni̍. Ya̍a̍mɔ̍ɔ̍wa̍a̍ nyāa̍ kpo̍u̍ ā chō hūnɔ̄ɔ̄ lākɔ̄ a̍ nda̍ o̍ bīyɔ̄ɔ̍ ni᷄ŋ. Wānāa̍ cho̍ ha̍ā nya̍ nyɛ̄ pālāa̍ tūsīo̍o̍ chōo̍ wa̍ ki̍nɛ̍i̍ nda̍ bɛ̍ɛ̍ le̍nde̍ ko̍ nda̍ tūsī ni̍ŋ nda̍ nyɛ̄ pālāa̍ chōo̍ ni̍. Wāna̍ o̍ wāna̍ cho̍ nyɛ̄m nyāa̍ŋ pūŋgāa̍, nda̍ bɛ̍ɛ̍ ā chō hūnɔ̄ɔ̄ nyɛ̄m nda̍ŋ pūŋgā kpo̍u̍ mā kūɛ̄nu᷄ŋ a̍ mu̍ŋ.

¹⁷Kɛ̍ nya̍ nya̍ I̍ cho̍ nya̍ pāūvīī nyɛ̄i̍ sīŋgī mī mi̍ŋgi̍ nya̍ kɛ̍ndi̍a̍a̍ o̍ ŋ̄dīāl. Ya̍a̍mɔ̍ɔ̍wa̍a̍ nyāa̍ ā chō nya̍ māmɔ̄ɔ̍ mā dīmī āā, ‘Mbɔ̄ Sa̍a̍yɔ̄ŋ ndu̍ o̍ cho̍ ni᷅ŋ māchūāā mɛ̄ɛ̍ nda̍ vīāū nu̍a̍ā nyɔ̄ɔ̍ o̍ sa᷄l lɛ̍. Wānā o̍ wānā bu̍u̍la̍ŋ ndɛ̍ a̍ ndu̍ le̍.’ Kɛ̍ I̍ cho̍ nya̍ hūnɔ̄ɔ̄ chīɔ̄ū mī sīŋgi̍ nya̍. Ya̍ Mɛ̍lɛ̄ka̍ Ya̍a̍wɛ̄ɛ̄ ya̍ so̍ō ni̍.”

¹⁸Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “I̍ cho̍ wānāā nīa̍a̍ mīŋgī o̍ lɛ̄ŋndē ndāle̍ŋ ni̍ŋ ndu̍yɛ̍ mī tūīīnu̍ŋ na̍a̍ ndāā cha̍lāa̍ īnyīɛ̍ɛ̍. Ā chō vɛ̄lɛ̄ Chūlu̍sɛ̄lɛ̄m mīŋgī tāŋgūl o̍ be̍mbe̍la̍ ndɔ̄la̍ŋ chōo̍ ndu̍yɛ̍ mī fo̍ndā lēmāsāa̍ o̍ mīīŋgu̍ vɛ̄lɛ̄ lāsīsi̍ o̍ fo̍ndā ndɔ̄ pa̍a̍ndōo̍ chōo̍.

¹⁹O̍ ko̍ŋ, wāŋndā Chūlu̍sɛ̄lɛ̄m a̍ cho̍ hūnɔ̄ɔ̄ chōndu̍ŋ kɔ̄l kɛ̄ndɔ̍ŋ sōlī, le̍ ya̍ Mɛ̍lɛ̄ka̍ ba̍li̍ka̍a̍ mēllo̍, ndu̍yɛ̍ mā tōsa̍ bɔ̄ɔ̄lūū kɔ̄l kɛ̄ndɛ̄ bɛ̄ndo̍o̍. I̍ cho̍ nda̍ sa̍lā dɔ̄wɔ̄ɔ̄, mī to̍sa̍ mā kūi̍ ta̍u̍ ta̍u̍. Ndu̍yɛ̍ le̍ te̍le̍ŋ o̍ te̍le̍ŋ ā wā ni̍ŋ ku̍īyo̍, ā dɔ̍ɔ̍nāŋ ni̍ŋ te̍. Ndu̍yɛ̍ sa̍lā ya̍ I̍ du̍a̍ū ni̍ŋ nda̍ wo̍, ō tōsā ni̍ŋ mī wāŋnda̍ ā ke̍ nda̍ bɛ̄ɛ̄le̍ŋ ta̍u̍ ta̍u̍.

²⁰I̍ cho̍ tōsā mī wāŋnda̍ I̍sɔ̄lūɛ̄ī chūāūwāā ndāa̍ ā hu᷄ŋ mi̍i̍ŋgu̍ mɛ̄ɛ̍ fi̍nyāā ndāa̍ ā wa̍ o̍ pāāndōo̍ ni᷄ŋ yɛ̍, ndu̍yɛ̍ mī to̍sa̍ mī ku̍ndā ndāa̍ ō mīīŋgu̍ vɛ̄lɛ̄ mbō si᷄m kpe̍e̍kpe̍i̍ māā pāāndū. Lēlɛ̄ŋ o̍ lēlɛ᷄ŋ le̍ tu̍si̍ nda̍ nyɛ̄ pālāa̍ chōo̍ pɛ̍, lɛ̄ŋndē lēŋ bɛ̍ɛ̍ dɛ̍nɛ̍ pa̍lāa̍ ya̍ I̍ tu̍sī ni̍ŋ le̍ŋ chōo̍ ni̍.

²¹Ndu̍yɛ̍ wāna̍ wa᷅ ni̍ŋ ma̍sāa̍ ndāa̍ chōo̍ wo̍, nda̍ pi̍la̍ tɛ̄ɛ̄ŋ kpe̍e̍kpe̍i̍ o̍ fu̍lā ni̍ŋ ni̍. I̍ to̍sā ni̍ŋ le̍ mī wānā ko̍ŋ ō nāŋnu̍ŋ ya̍ o̍ ībūŋ mbō wa̍ ya̍ īkɛ̄i̍ kpɛ̍ɛ̍lūŋ. Kāni̍ fo̍ndōle̍, ya̍ Mɛ̄lɛ̄ka̍ tē ō cho̍ mī chɛ̍l māā wāŋndo̍ ō nāŋnu̍ŋ ya̍ o̍ ībūŋ te̍, ō nɛ̄ɛ̍nɛ̍ nɔ̍lā yɛ̍ mbō nāŋnu̍ŋ ya̍ o̍ ībūŋ? Wānā ko̍ŋ ō cho̍ le̍. Wāŋnda̍ I̍sɔ̄lūɛ̄ī a̍ cho̍ vɛ̄lɛ̄ sīmnɔ᷄ŋ wa̍nāā nī, ndu̍yɛ̍ ya̍ bɛ̍ɛ̍ mī si̍mnu̍ŋ Mɛ̍lɛ̄ka̍ ndā. Ya̍ Mɛ̍lɛ̄ka̍ Ya̍a̍wɛ̄ɛ̄, ya̍ so̍ō ni̍.”

²²

²³Mɛ̄lɛ̄ka̍ Ya̍a̍wɛ̄ɛ̄ o̍ cho̍ hūnɔ̄ɔ̄ tu̍mbe̍ dɔ̍ɔ̍nɔ᷄ŋ o̍ ka̍lā ka̍lā a̍ wānāā dɛ̍nɛ̍ wɔ̍ɔ̍ŋnda̍, mbō tɛ̄ɛ̄mbu̍u̍ nda̍. Mɛ̄ɛ̍ hūēīyīī bɛ̄ndū bɛ̍ndūe̍i̍ ī hūŋ nu̍a̍ā a̍ kpāāyā bɛ̍ndōo̍ mī ī tɛ̄ɛ̄mbu̍u̍ nyɔ̄ɔ̍ŋ tɛ̄ɛ̄mbūū bɛ̄ndōo̍ yɛ̍, le̍nde̍ o̍ tɛ̍ɛ̍mbūū ni̍ŋ nda̍ a̍ tu̍mbe̍ ndɔ̄ bɛ̍ndōo̍ ni̍.

²⁴Ndu̍yɛ̍ tē Mɛ̄lɛ̄ka̍ Ya̍a̍wɛ̄ɛ̄ o̍ hu̍ŋ dɔ̍u̍nu᷄ŋ tu̍mbe̍ ko̍ŋ pɛ̍, kɔ̄l ndɔ̄ɔ̍ ō pɔ̍lūl ni̍ŋ te̍, ha̍a̍a̍ mbō ō lo̍ o̍ ko̍ŋ mbō chīi̍ nyɛ̄ o̍ nyɛ̄ o̍ kɛ̍ɛ̍si̍a̍a̍ o̍ kɔ̄l ndɔ̄ɔ̍ ni̍ŋ le̍ tōsāa̍, Nyɛ̄ ya̍ I̍ cho̍ ho̍ō dīmīo̍o̍ wo̍, lā cho̍ wɔ̍ ndu̍ pɛ̄ŋgu̍ si̍nā su̍ŋ su̍ŋ te̍, kɛ̍ te̍le̍ŋ cho̍ fūūlūū mī lā sīna̍ ndu̍ pɛ̄ŋgu̍ nyɛ̍ kɛ̄ndɛ̍ī.