Read Southern Kisi Chɛ̄lūīma̍yā 31 Bible Online

Chɛ̄lūīma̍yā 31 - Southern Kisi bible

Chɛ̄lūīma̍yā 31

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā vɛ̄lɛ̄ nāa̍ ya̍ Chɛ̄lūīma̍yā chu̍a̍ mbo̍ dīmī āā, “A̍ te̍le̍ŋ ko̍ŋ, yu̍ŋgu̍la̍ŋ I̍sɔ̄lūɛ̄ī kpo̍u̍ I̍ cho̍ hūnɔ̄ɔ̄ wā Mɛ̄lɛ̄ka̍ ndā, ndu̍yɛ̍ mī nda̍ bɛ̍ɛ̍ a̍ wa̍ wānāā nī.”

²“Mɛ̄lɛ̄ka̍ Ya̍a̍wɛ̄ɛ̄ o̍ di̍mī māā, bōōndi̍i̍ I̍sɔ̄lūɛ̍i̍ya̍ ā hɛ̄lu᷄ŋ ya̍a̍mɔ̍ɔ̍wa̍, ā dīu̍ nda̍ a̍ mɔ̄ɔ̄ŋ fāŋndo̍ŋ te̍ ma̍ hūŋ o̍ lɛ̄ŋndē po̍lte̍ŋ ni̍ŋ nde̍, mi̍ lo᷅ o̍ ko̍ŋ mi̍ tu̍i̍i̍nu᷄ŋ nda̍ īnyīɛ̍ɛ̍ mi̍ ma̍lā nda̍. Mɛ̄ɛ̍ I̍sɔ̄lūɛ̍i̍ya̍ ā yēēma̍ mālāa̍,

³I̍ wa̍ la̍nda̍ŋ a̍ nda̍ kɛ̍ mi̍ sɔ̍ɔ̍ŋgūū nda̍ īkɛ̄i̍. Wāŋnda̍ I̍sɔ̄lūɛ̄ī, ō cho̍ ha̍ū le̍ ya̍ Mɛ̍lɛ̄ka̍ kāāla̍ nya̍ le̍, o̍ kāndɔ᷄ŋndo̍ pa̍ ya̍ I̍ ka̍ndu̍ nya̍ kāālāa̍ chɔ̄mndo̍ ni̍. Ndu̍yɛ̍ mi̍ wa᷅ wɔ̄ bɛ̍ɛ̍ hi̍o̍u̍wɔ̄ɔ̍ lāchī kɛ᷅ a̍ nya̍ kāālā kōŋ chɔ̄mndo̍.

⁴Wāŋnda̍ I̍sɔ̄lūɛ̄ī, nya̍ wānāā nīa̍a̍ ya̍ I̍ ka̍a̍la̍ wa̍, I̍ cho̍ vɛ̄lɛ̄ lɛ̄ŋndē nyāle̍ŋ mīŋgī tāŋgūl sɛ̄nɛ̄ī mī lē mīīŋgu̍ māā pāāndū. Lā chō vɛ̄lɛ̄ hūnɔ̄ɔ̄ nya̍a̍le̍ dɔ̍u̍nɔ᷄ŋ mī lā chūa̍ nyɛ̄m chāa̍ŋ mī lā bālu̍ a̍ yōla̍ŋ māā pāāndū.

⁵Lā chō hūnɔ̄ɔ̄ vɛ̄lɛ̄ kpe̍le̍la̍ nyāla̍ŋ yɔ̄mīī mākīle̍pīi̍ye̍ mīŋgī tōsāa̍ o̍ pēmbūŋ Sāme̍e̍līāā wo̍ŋ chōo̍ māā pāāndū, ndu̍yɛ̍ nya̍ to̍sa̍ ni̍ŋ kpe̍le̍la̍ la̍ŋ nda̍, mī lā dē kpe̍le̍la̍ nyāla̍ŋ tɔ̄nɔ̄.

⁶Te̍le̍ŋ cho̍ fūūlūū, wānāā mɛ̄ŋgɛ̄lāa̍ ā bālū ni̍ŋ yo̍ndāa̍ o̍ pēmbūŋ E̍fi̍lūēmndo̍ŋ chōo̍ mā dīmu̍l wāŋnda̍ māā, lā ŋ̄ kɔ̄ŋnu᷅ŋ Sa̍a̍yɔ̄ŋ chi̍e̍e̍ mī ŋ̄ kɔ̍ so̍o̍lūū Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nāa̍.”

⁷Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Wāŋnda̍ lā sōli̍ cho̍ndu̍ŋ kɔ̄l kɛ̄ndɔ̍ŋ le̍ I̍sɔ̄lūɛ̄ī. Lā sōli̍ cho̍ndo̍ŋ mī lā hēēlu̍ dīōmnda̍ŋ chōo̍ te̍mā te̍mā, le̍ lɛ̄ŋnde̍ hi̍o̍ū le᷅ŋ lɛ̄ŋnde̍ kpo̍u̍ o̍ chi̍e̍ēŋndo̍ ni᷄ŋ nde̍ŋ. Lā sōli̍ cho̍ndu̍ŋ sa̍ŋgāla̍ŋ chōo̍ cho̍o̍ mī lā dīmi̍ āā, ‘Mɛ̄lɛ̄ka̍ Ya̍a̍wɛ̄ɛ̄ o̍ chi̍i̍ndi̍a̍a̍ wānāā ndūa̍a̍. Ō chīīndi̍a̍a̍ I̍sɔ̄lūɛ̍i̍ya̍a̍ tu̍a̍a̍ lo̍ yōōmū wa̍.’

⁸Mī di̍mu̍l nya̍, I̍ cho̍ hūnɔ̄ɔ̄ I̍sɔ̄lūɛ̍i̍ya̍ sōlī nāa̍ nda̍ chō o̍ bīyɔ̄ɔ̍ ni̍ŋ ba᷅ lūāŋndo̍ wa̍, ndu̍yɛ̍ mī chu̍u̍ŋgi̍a̍a̍ a̍ cho̍ ā sɛ̄ŋīa̍ŋ o̍ chi̍e̍ēŋndo̍ ni᷄ŋ nda̍ kpo̍u̍ na̍a̍ pi᷅lɛ̍ mī mi̍ŋgi̍ nda̍ o̍ lɛ̄ŋndē ndāle̍ŋ ni᷄ŋ. Ndu̍yɛ̍ bōōndi̍i̍ nda̍ wā ni̍ŋ mi̍i̍ŋgōo̍ ve̍, wānā su̍mɛ̍i̍ ni̍, wānā bɛ̍vɛ̍i̍ ni̍, wāna̍ yo᷄l ni̍, wāna̍ yo᷄l nda̍ sɔ̄ɔ̄ŋgu̍u̍ ni᷅ŋ īkɛ̍i̍ le̍ vīōlɔ̄ɔ̍ ni̍, nda̍ kpo̍u̍ ō pīlɛ̍ bɛ̍ɛ̍ o̍ lo̍ ni̍ŋ kɔ̍ɔ̍lī le̍. Mīīŋgū nda̍ wā ni̍ŋ ndo̍, ā wā ni̍ŋ sɛ̍lɛ̍ bɛ̍ndū.

⁹Ndu̍yɛ̍ bōōndi̍i̍ ya̍ I̍ wa᷅ ni̍ ni̍ŋ mi̍i̍ŋgōo̍ a̍ nda̍ ve̍, ā wā ni̍ŋ kɔ᷅la̍ŋ a̍ cha᷄ŋndo̍ mā pīɛ̄ī ya̍ le̍ mī ma̍l nda̍ le̍ nyɛ̄ nda̍ tōsa̍ wo̍. I̍ cho̍ kēēkū a̍ nda̍ o̍ pēēla̍ pɔ̍mbɔ̄la̍ŋ īkɛ̄i̍ ndu̍yɛ̍ mī ke̍e̍ku̍ a̍ nda̍ o̍ nɛ̄i̍ cho̍ nyɛ̄ kɛ̄ndɛ̄ tɛ̍lɛ̍kɛ̍ wo̍ nāa̍ ō pīlɛ̍ bɛ̍ɛ̍ o̍ bo᷅ŋ te̍ wa̍. Kāni̍ fo̍ndōle̍ ya̍ Mɛ̍lɛ̄ka̍, I̍ cho̍ māchūāā fi̍nya̍a̍ le̍ I̍sɔ̄lūɛ̄ī. E̍fi̍lūēm ndu̍ yɔ̍nūŋ māā I̍sɔ̄lūɛ̄ī ni̍, o̍ cho̍ māchūāā māā po̍ ni̍ tāse̍.”

¹⁰Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Lā ya᷄ŋ ni᷅la̍ŋ o̍ nyɛ̄ ya̍ I̍ cho̍ dīmī wo̍, nya̍ wāŋnda̍ o̍ lɛ̄ŋnde̍ ni᷄ŋ, ndu̍yɛ̍ mī lā dīmu̍l wānāa̍ cho̍ o̍ fo̍ndāŋndā le̍vīlta̍ŋ o̍ pēēla̍ŋ kɔ̄ŋgɔ̍ wa̍ nyɛ̄ ya̍ I̍ cho̍ dīmī wo̍. Lā dīmu̍l nda̍ māā wāna̍ sɛ̍ŋi̍ I̍sɔ̄lūɛ̍i̍ya̍ o̍ lɛ̄ŋnde̍ ni᷄ŋ o̍ bīyɔ̄ɔ̍ ni᷄ŋ ndo̍ ō chō vɛ̄lɛ̄ nda̍ chūūŋgīāā nāa̍ pi᷅lɛ̍ ndu̍yɛ̍ mbō mānda̍ nda̍ mɛ̄ɛ̍ wāna̍ ma̍ndāā lāsāa̍ ō māndā nu̍a̍ā sāa̍ ndūa̍a̍ yɛ̍.

¹¹Ya̍ Mɛ̍lɛ̄ka̍ Ya̍a̍wɛ̄ɛ̄, I̍ cho̍ hūnɔ̄ɔ̄ wāŋnda̍ I̍sɔ̄lūɛ̍i̍ bāŋā o̍ bīyɔ̄ɔ̍ ni̍ŋ, mī chi̍i̍ndi̍a̍a̍ nda̍ wānāa̍ nɔ̍ kpāāyāa̍ ma̍ hīāū nda̍ wa̍ o̍ bā.

¹²Wāŋnda̍ I̍sɔ̄lūɛ̄ī a̍ hu᷅ŋ ni̍ŋ mā hu᷄ŋ so̍lī chōndu̍ŋ kɔ̄l kɛ̄ndɔ̍ŋ o̍ Pēmbīī Sa̍a̍yɔ̄ŋnde̍ chōo̍. Ā hūŋ ni̍ŋ mā hu᷄ŋ dɔ̍u̍nu̍ŋ nya̍a̍le̍ ta̍u̍ ta̍u̍, kāni̍ fo̍ndōle̍, a̍ sa̍lā bɛ̄ndū ya̍ Mɛ̍lɛ̄ka̍ Ya̍a̍wɛ̄ɛ̄ I̍ du̍a̍ū ni̍ŋ nda̍ wo̍. I̍ du̍a̍ū ni̍ŋ nda̍ sa̍lā mī ke̍ nda̍ nyɛ̄ dīa̍a̍, a̍ mūɛ̄īya̍ŋ, a̍ chūɛ̄īmā ɔ̄li̍fīi̍ya̍ŋ a̍ sāa̍ o̍ ko̍ŋ kɔ̍ɔ̍lī, a̍ nāūva̍ ta̍u̍ ta̍u̍. Wāŋnda̍ I̍sɔ̄lūɛ̄ī a̍ wa᷅ ni̍ŋ mɛ̄ɛ̄ kpe̍le̍ nda̍ pɔ̄ɔ̄lā ho̍ō, le̍ te̍le̍ŋ o̍ te̍le̍ŋ ō wā pu̍īyo̍ tɛ̍ɛ̍ tɛ̍ɛ̍ wo̍ ō wā nu̍a̍ā yɛ̍. Ā nɔ̄ ni̍ŋ nyɛ᷅ o̍ nyɛ̄ o̍ bā. Nyɛ̄ o̍ nyɛ̄ ō ve᷅m ni̍ŋ nda̍ lēpɛ̄ŋ te̍.

¹³Chūāū ndāā la̍a̍ndūa̍a̍ ā wā ni̍ŋ ba̍lɔ̄ɔ̍ yōla̍ŋ mā tōsā kɔ̍l kɛ̄ndɔ̄ɔ̍, o̍ ko̍ŋ kɔ̍ɔ̍lī, mī chūāā pīāāndūa̍a̍ a̍ bɛ̄ndūa̍a̍ ā tōsā bɔ᷅ŋa᷅ŋndā kɔ̄l kɛ̄ndɛ̄lā bɛ̄ŋnda̍ŋ. I̍ cho̍ tōsā mī kɔ̄l ndā ta̍mbɛ̍i̍yo̍ ō sīmnu᷄ŋ kɔ᷅l kɛ̄ndɛ̄. I̍ cho̍ nda̍ kɔ̄lta̍ŋ nyɔ̄ɔ̄lū mī fa̍ŋa̍ kɔ̄l ndā ta̍mbɛ̍i̍yo̍ mī to̍sa̍ mā sīmnu᷄ŋ wa̍nāā kɔ̄l kɛ̄ndɛ̄.

¹⁴Wānāa̍ so̍lī sa̍lāla̍ŋ o̍ ya̍ Mɛ̍lɛ̄ka̍ lo̍ wa̍, sɔ̄la̍ nyɛ̄ dīāā kɛ̄ndɛ̄ kɛ̍ndɔ̄ɔ̍ ta̍u̍ ta̍u̍, ndu̍yɛ̍ mī to̍sa̍ wānāā nīa̍a̍ ā he̍ū ni̍ŋ ba̍ le̍ nyɛ̄ o̍ nyɛ̄ le̍. Ya̍ Mɛ̍lɛ̄ka̍ Ya̍a̍wɛ̄ɛ̄ ya̍ so̍ō ni̍.”

¹⁵Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Bɔ̄ɔ̄lūū bɛ̄ndōo̍ chō sūɛ̍i̍ Lu̍a̍mā. Cha᷄ŋnda̍ŋ lā chō sūɛ̍i̍ kpu̍ū bɛ̄ndū. Lu̍e̍chɛ̄l cho̍ cha᷄ŋndo̍ le̍ chūāūwāā ndūa̍a̍.[5] Ō chō cha᷄ŋndo̍, ndu̍yɛ̍ ō nyɔ̍ɔ̍lūŋ kpo̍so̍ŋ te̍, kāni̍ fo̍ndōle̍ chūāā ndūa̍a̍ chūu̍ pa̍ku̍.”

¹⁶Kɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l ndu̍ āā, o̍ me̍i̍ cha̍ŋndo̍, mā wɔ̍ɔ̍su̍u̍ mɛ̍mi̍a̍ŋ, fo̍ndōle̍ sāŋgā ŋ̄ sāŋga̍ le̍ chūāūwāā nūmnda̍ wo̍ ō cho̍ la̍kɔ̍ŋnɔ᷄ŋ fo̍ndō fu̍u̍ le̍, ā chō fāndāa̍ sɔ̄lā le̍ wa̍li̍ ŋ̄ tōsa̍ wo̍. Ā chō fūlā nāa̍ nda̍ chō ya̍a̍mɔ̍ɔ̍wa̍a̍ ndāa̍ o̍ bā o̍ bīyɔ̄ɔ̍ ni̍ŋ nda̍ mā mīīŋgu̍ o̍ lɛ̄ŋndē ndāle̍ŋ ni᷄ŋ.

¹⁷Le̍la̍ŋ me̍i̍, ā nɔ̄ nyɛ̄ ŋ̄ wā le̍hɔ᷅l o̍ nɛ̄ī le̍ ndu̍ o̍ sīɔ̄dīi̍ lāchīo̍o̍ ni̍ŋ ndo̍. Chūāā nūmnda̍ chō mīīŋgū o̍ lɛ̄ŋndē ndāle̍ŋ ni̍ŋ.

¹⁸I̍ tu̍e̍ī cha᷄ŋnda̍ īmɔ̍nɛ̍la̍ wāŋnda̍ I̍sɔ̄lūɛ̄ī ā chō la̍ŋ. Ā chō dīmīo̍o̍ māā, ŋ̄ wa̍ māwāā mɛ̄ɛ̍ nāū bōllē kālāa̍ ō wā nu̍a̍ā yɛ̍, kɛ̍ ma̍ pɛ̄ɛ̄kū na̍a̍ mi̍ ŋ̄ tūsi̍ŋ to̍o̍lō sa̍na̍a̍ a̍ dɛ̍nɛ̍ pa̍lāā ŋ̄ tūsi̍ na̍a̍ chōo̍ le̍ na̍a̍ sīlāa̍ wo̍. Le̍la̍ŋ yāndi̍i̍ Mɛ̄lɛ̄ka̍, to̍sa̍ mī ŋ̄ mīīŋgu̍ nu̍m o̍ ībūŋ, mī ŋ̄ mīīŋgu̍ māā pāāndū. Nūm ko̍ni̍ cho̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nāa̍ ni̍.

¹⁹Na̍a̍ ŋ̍ lo̍ o̍ ko̍ŋ mi̍ ŋ̄ fāŋa᷄ŋ nu̍m o̍ ībūŋ. Kɛ̍ mi̍ ŋ̄ hūŋ o̍ na̍a̍ pi̍la̍ ni̍ŋ mi̍ mɔ̍nɛ̍i̍ bīī na̍a̍ le̍ nyɛ̄ na̍a̍ ŋ̄ tōsa̍ wo̍, mi̍ ŋ̄ mīīŋgū nāa̍ nūm chu̍a̍. Mɛ̄ɛ̍ na̍a̍ ŋ̄ hīŋ o̍ nāāla̍ŋ ni᷄ŋ mi̍ mɔ̍nɛ̍i̍ bɛ̍ndūe̍i̍ ī pīā o̍ kɔ̄ltā nāāla̍ŋ ni̍ŋ. Na̍a̍ pi̍la̍ bɛ̍ɛ̍ mi̍ si̍ɔ̍mbu̍la̍ŋ lā bīī na̍a̍, ndu̍yɛ̍ mi̍ kɔ̄ltā nāāla̍ŋ lā tāmbū le̍ nyɛ̄ o̍ nyɛ̄ na̍a̍ ŋ̄ tōsa̍ o̍ chūāāmbɔ̄yɛ̍ī nɛ̄i̍ ni᷄ŋ.

²⁰“I̍sɔ̄lūɛ̄ī, po̍ ni̍ ya̍ Mɛ̍lɛ̄ka̍ kāāla̍ wo̍ ŋ̄ chō ni̍. Chūā ni̍ ya̍ I̍ ka̍a̍la̍ kāālā bɛ̄ndōo̍ wo̍ ŋ̄ chō ni̍. Ā yɔ᷄ŋ bɛ̍ɛ̍ mī kɔ̍ŋgɔ̍la̍ŋ nu̍m, kɔ̄l nūu̍ ō fe̍ŋāŋ o̍ nūmndo̍ le̍. Le̍la̍ŋ le̍ te̍le̍ŋ o̍ te̍le̍ŋ kɔ̄l nūu̍ chō o̍ nūmndo̍. Ndu̍yɛ̍ I̍ cho̍ nu̍m hūnɔ̄ɔ̄ īnyīɛ̍ɛ̍ tūīīnɔ᷄ŋ.

²¹Lā hāndu̍ ta̍a̍māsi̍la̍ŋ o̍ nɛ̄ī. Lā kɛ̄si̍ ta̍a̍māsi̍la̍ŋ o̍ nɛ̄ī le̍ nya̍ nɛ̄īyo̍ chɔ̄mndo̍. Lā mɛ̄ɛ̄nda̍ŋ nɛ̍i̍ nda̍ kēēku̍ a̍ nya̍ ma̍ hūŋ a̍ nya̍ wo̍, mī lā lōōnu̍ŋ ndu̍ le̍ mīīŋgōo̍. Wāŋnda̍ I̍sɔ̄lūɛ̄ī, nya̍ wānāā ya̍ I̍ ka̍a̍la̍ ha̍ā wa̍, lā chɔ̍ŋ lā mīīŋgu̍ o̍ lɛ̄ŋndē nyāle̍ŋ ni̍ŋ. Lā mīīŋgu̍ o̍ chi̍e̍e̍ŋ nyāŋ bɛ̍ndūŋ nya̍ mɛ̄i̍yo̍ŋ ni̍ŋ.

²²Wāŋnda̍ I̍sɔ̄lūɛ̄ī, vɛ̄ɛ̄ kpɛ̍ɛ̍ nya̍ chō yɛ̄ hīōūwɔ̄ɔ̄ lāchī a̍ kīɔ̍ɔ̍ si᷄mnda̍ŋ o̍ lāāla̍ŋ nyāa̍ chōo̍? Lā nɔ̍ la̍a̍la̍ŋ bɔ̍ɔ̍ le̍ ma᷅ chūāā nīa̍a̍. Ya̍ Mɛ̍lɛ̄ka̍ I̍ cho̍ tōsā mī sūɛ̍i̍ sɛ̄nɛ̄ī chēle̍ŋ, ī te̍ŋge̍le̍ŋnde̍ ī yɔ̄nu̍ŋ o̍ chi̍e̍ēŋndo̍ chōo̍. Ō wā ni̍ŋ su̍ɛ̍i̍ te̍ŋge̍le̍ŋ, to̍fa̍ wɔ̍ ko̍ mɛ̄ɛ̍ i̍ yɔ̍nūŋ nu̍a̍ā a̍ wānā pɔ̍nɔ̍ ndu̍ nɔ̍ le̍ la̍a̍ ndɔ̍ māndāa̍ ni̍, kɛ̍ mī la̍a̍ ndɔ̄ ko̍ŋ ndu̍ mi̍i̍ŋgu̍ ndu̍ māndāa̍ yɛ̍.”

²³Nyɛ̄ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍, I̍sɔ̄lūɛ̍i̍ya̍ Mɛ̄lɛ̄ka̍ ndāa̍ ō dīmi̍ wo̍ cho̍ ho̍ō ni̍, ō dīmi̍ āā, “Tē te̍le̍ŋ hūnɔ̄ɔ̄ fu̍u̍lu̍u̍, mī mi̍ŋgi̍ wāŋnda̍ Chu̍dā o̍ lɛ̄ŋndē ndāle̍ŋ ni̍ŋ. Tē te̍le̍ŋ ko̍ŋ ō fūūlu̍u̍ pɛ̍, wāŋnda̍ dīmī ni̍ŋ o̍ lɛ̄ŋndē Chu̍dāle̍ŋ ni̍ŋ ndu̍yɛ̍ a̍ o̍ chi̍o̍o̍ŋ Chu̍dā āā, ‘Mbɔ̄ māā Mɛ̄lɛ̄ka̍ Ya̍a̍wɛ̄ɛ̄ o̍ dɔ̍u̍ pe̍mbēi̍ Chūlu̍sɛ̄lɛ̄m sa̍lā fɔ̍, pēmbīi̍ cho̍ ī yɔ̄ŋga᷄ŋ o̍ ndu̍ lo̍ ve̍, ndu̍ yɔ̍nūŋ māā fo̍ndā ndɔ̄ cha̍lāā dīāndāā bɛ̄ndōo̍.’

²⁴A̍ te̍le̍ŋ ko̍ŋ, wāŋnda̍ ā chāl ni̍ŋ na̍a̍ pi᷅lɛ̍, o̍ lɛ̄ŋndē Chu̍dāle̍ŋ ni᷄ŋ ndu̍yɛ̍ a̍ o̍ chi̍o̍o̍ŋ Chu̍dā mā wānu̍ŋ a̍ kɔ̄l nyūlū. Wānāā tōsāā wa̍lta̍ īchīɛ̄ɛ̄ya̍ a̍ wānāa̍ ba̍lū chɔ̍lūa̍a̍ māndāa̍ wa̍, ā hūŋ ni̍ŋ mā hu᷄ŋ wa᷅ īchāli̍ na̍a̍ pi᷅lɛ̍.

²⁵Wānāa̍ cho̍ ā yɔ̄kpɛ̍i̍ ya̍, I̍ cho̍ tōsā mā mīīŋgu̍ yōōmūa̍ŋ sɔ̄lā, ndu̍yɛ̍ wānāa̍ cho̍ a̍ kɔ̄ltā tāmbɛ̍i̍la̍ŋ nda̍, mī to̍sa̍ mā na᷄ŋ lākɔ̄l.

²⁶A̍ te̍le̍ŋ ko̍ŋ, wāŋndo̍ dīmī ni̍ŋ āā, ‘I̍ wa̍ ō yɔ̄kpɛ̍i̍ mi̍ hi̍nī, kɛ̍ mɛ̄ɛ̍ ya̍ I̍ te̍ndū mi̍ ti̍a̍ndū a̍ yōōmūmā sɛ̄nɛ̄īya̍ŋ.’ ”

²⁷Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Te̍le̍ŋ cho̍ fūūlūū, I̍ cho̍ tōsā mī wāŋndā chīe̍e̍ya̍, a̍ vīsīa̍a̍ ā kūi̍ mā pɛ̄ cha̍ cha̍ o̍ lɛ̄ŋndē I̍sɔ̄lūɛ̍i̍le̍ŋ ni̍ŋ ndu̍yɛ̍ a̍ o̍ lɛ̄ŋndē Chu̍dāle̍ŋ ni̍ŋ.

²⁸Tē te̍le̍ŋ ko̍ŋ ō fūūlu̍u̍ pɛ̍, mɛ̄ɛ̍ ya̍ I̍ ha̍ndu̍ lɛ̄ŋndē ndāle̍ŋ hɔ̄lte̍ŋ kɔ̄ɔ̄lī, le̍ mī tu̍si̍ le̍ŋ dɛ̍nɛ̍ pa̍lāa̍ chōo̍, mī fa̍ŋa̍ le̍ŋ o̍ bā ndɔ̄ɔ̍ chōo̍, mī pu̍u̍si̍a̍a̍ le̍ŋ, ndu̍yɛ̍ mī to̍sa̍ mī lē pīɔ̍l o̍ ko̍ŋ kɔ̍ɔ̍lī, mī tɛ̍ɛ̍mbu̍u̍ le̍ŋ yɛ̍, le̍nde̍ ko̍ ya̍ I̍ ha̍ndū ni̍ŋ nde̍ŋ hɔ̄lte̍ŋ kɔ̄ɔ̄lī ni̍, le̍ mī mi̍ŋgi̍ le̍ŋ tāŋgūl ndu̍yɛ̍ mī to̍sa̍ mī lē si᷄m.

²⁹Tē te̍le̍ŋ ko̍ŋ ō fūūlu̍u̍ pɛ̍, tāle̍ wāŋnda̍ dīmī āā, ‘Fi̍nya̍a̍ nda̍ de᷅ kīle̍pīi̍ma̍ wa̍a̍lɛ̍i̍ya̍ŋ ni̍, kɛ̍ chūāā ndāa̍ chīŋndo̍ŋ ŋ̄ wāāla̍ sɔ̍ŋgɔ̍ ko̍ŋ ni̍,’ wo̍, wāŋnda̍ di̍mī lɛ̍ ni̍ŋ tāle̍ kōŋ te̍.

³⁰Kāni̍ fo̍ndōle̍, wāna̍ to̍sā yɔ᷅ŋ wɔ̄ɔ̍ŋndo̍ wo̍, ndu̍ sɔ̍lā pi̍ɔ̍mndo̍ le̍ yɔ̄ŋ ndɔ̄ wɔ̍ɔ̍ŋndo̍ ni̍. Wāna̍ di̍ā kīle̍pīi̍ma̍ wa̍a̍lɛ̍i̍ya̍ŋ ndo̍, ndu̍ chīŋndo̍ŋ ŋ̄ wāālīāā ni̍.”

³¹Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Te̍le̍ŋ cho̍ fūūlūū, I̍ cho̍ hūnɔ̄ɔ̄ kpe̍ma̍ sɛ̍nɛ̄īyo̍ yīī a̍ wāŋnda̍ I̍sɔ̄lūɛ̄ī ndu̍yɛ̍ a̍ wāŋnda̍ Chu̍dā.

³²Kpe̍ma̍ ya̍ I̍ cho̍ ni᷅ŋ yīī a̍ nda̍ wo̍, ndu̍ ve᷅m ni̍ŋ māā kpe̍ma̍ ya̍ I̍ yi̍i̍ sīndɛ̄ a̍ fi̍nyāā ndāā ma̍māa̍ bōōndi̍i̍ ya̍ I̍ so̍li̍ nda̍ I̍chi̍pī a̍ kpāāya̍ nī bɛ̍ndōo̍, mi̍ hu᷅ŋ a̍ nda̍ ve̍ le̍. Kāni̍ fo̍ndōle̍, kpe̍ma̍ ya̍ I̍ yi̍i̍ ko̍ŋ a̍ nda̍ wo̍, ma̍ tɛ̄ɛ̄mbūū kpe̍ma̍ ko̍ŋ, mi̍ chē bɛ̍ɛ̍ mi̍ ya̍ i̍i̍ ka̍a̍lā nda̍ a̍ kɔ̄l nūu̍ kpo̍u̍ mɛ̄ɛ̍ pōo̍ ō kāālā nu̍a̍ā la̍a̍ ndɔ̍ yɛ̍.

³³Kɛ̍ tē te̍le̍ŋ ko̍ŋ ō fūūlu̍u̍ pɛ̍, kpe̍ma̍ ya̍ I̍ cho̍ yīī a̍ nda̍ wo̍, ndu̍ wa᷅ ni̍ŋ ho̍ō ni̍, I̍ cho̍ tōsā mā wa̍ yīya᷄ŋndo̍ a̍ sāwāla̍ nīla̍ŋ le̍ te̍le̍ŋ o̍ te̍le̍ŋ ndu̍yɛ̍ mī po̍o̍nyi̍a̍a̍ la̍ŋ nda̍ o̍ lākɔ̄l. I̍ cho̍ wā Mɛ̄lɛ̄ka̍ nda̍, ndu̍yɛ̍ mī nda̍ bɛ̍ɛ̍ a̍ wa̍ wānāā nī.

³⁴A̍ te̍le̍ŋ ko̍ŋ, wānā o̍ wānā pɛ̍ɛ̍kū lɛ̍ ni̍ŋ wa᷅na̍ nda̍ chīɛ̄ɛ̄li̍āŋndo̍ kɛ̄lɛ̄ŋgāā wānāyɛ̍ī ndūɛ̍i̍ le̍ sīnāa̍ a̍ ya̍ Mɛ̍lɛ̄ka̍ Ya̍a̍wɛ̄ɛ̄ o̍kɔ̄ɔ̄ le̍. Kāni̍ fo̍ndōle̍, nda̍ kpo̍u̍, wānā o̍ wānā cho̍ hūnɔ̄ɔ̄ sīnā a̍ ya̍ o̍kɔ̄ɔ̄, chūāāmbɔ̄ ni̍, ka̍a̍so̍ŋnɔ̍ ni̍. Dɛ̍nɛ̍ wɔ̍ɔ̍ŋ o̍ dɛ̍nɛ̍ wɔ̍ɔ̍ŋ nda̍ tōsa̍, I̍ cho̍ nda̍ hūnɔ̄ɔ̄ mālɔ̄ɔ̄ le̍ ndu̍, ndu̍yɛ̍ mī pu̍ɛ̍ɛ̍nu̍ŋ a̍ yɔ̄ŋ wɔ̄ɔ̍ŋ o̍ yɔ̄ŋ wɔ̄ɔ̍ŋ nda̍ tōsa̍. Ya̍ Mɛ̍lɛ̄ka̍ Ya̍a̍wɛ̄ɛ̄ ya̍ so̍ō ni̍.”

³⁵“Mɛ̄lɛ̄ka̍ Ya̍a̍wɛ̄ɛ̄, ndu̍ to̍o̍si̍a̍a̍ pāa̍le̍ŋ ni̍ le̍ nyɛ̄ wa̍wo̍ŋndo̍ yɔ̄ŋgōo̍ īpāla̍. O̍ ko̍ŋ kɔ̍ɔ̍lī, mbo̍ hāndū pāŋge̍i̍ a̍ lōo̍ŋ chōo̍ cho̍o̍ kpɛ̍ kpɛ̍, le̍ nyɛ̄ wa̍wo̍ŋndo̍ yɔ̄ŋgōo̍ īchɔ̄l. Ndu̍yɛ̍ ndu̍ to̍sā ni̍ mī pe̍e̍ mɛ̄ŋmā īhɛ᷄llo̍ o̍ ō wa̍ hīīlɔ᷄ŋndo̍ īkpōku̍ kpo̍ku̍e̍i̍ bɛ̍ndūe̍i̍. Mɛ̄lɛ̄ka̍ ko̍ŋ, ndu̍ nɔ̍ dīōla̍ŋ ni̍ āā O̍o̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍. Ndu̍ Mɛ̍lɛ̄ka̍ kōŋ ō dīmi̍ māā,

³⁶nyɛ̄m ya̍ I̍ to̍o̍si̍a̍a̍ mu᷅ŋ mi̍ kɛ̍sī mu̍ŋ a̍ wa̍lta̍ ndāla̍ŋ kpɛ̍ kpɛ̍ wo̍ŋ, tē nyɛ̄m mu᷅ŋ ŋ̄ nɔ̄lā pɛ̍ mī ŋ̄ fāŋa̍ŋ o̍ bā ŋ̍ nɔ̍ le̍ wāa̍ wo̍ chōo̍, mɛ̄ɛ̍ lɛ̄ŋndē I̍sɔ̄lūɛ̍i̍le̍ŋ lē chō fāŋa᷄ŋ ya̍ Mɛ̍lɛ̄ka̍ o̍ hɔ̄l.”

³⁷Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ māā, tē wānā nɔ̍la̍ ha̍la̍a̍ chōo̍ cho̍o̍ tu̍ū mā si̍na̍ mɛ̄ɛ̍ kpɛ̍ o̍ cho̍ yɛ̍, ndu̍yɛ̍ o̍ ko̍ŋ kɔ̍ɔ̍lī, mī wānā nɔ̍la̍ mā si̍na̍ a̍ chīyīī chi̍e̍ēŋndo̍ ho̍ō ō si᷄m chōo̍ ve̍ o̍kɔ̄ɔ̄ pɛ̍, mɛ̄ɛ̍ ya̍ Mɛ̄lɛ̄ka̍ I̍ cho̍ wānāa̍ fu̍la̍ o̍ pūlāle̍ I̍sɔ̄lūɛ̍i̍le̍ŋ chōo̍ wa̍ kɛ̄ɛ̄ le̍ yɔ̄ŋ o̍ yɔ̄ŋ wɔ̄ɔ̍ŋ nda̍ tōsa̍ wo̍. Ya̍ Mɛ̍lɛ̄ka̍ Ya̍a̍wɛ̄ɛ̄ ya̍ so̍ō ni̍.

³⁸Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Te̍le̍ŋ cho̍ hūnɔ̄ɔ̄ fūūlūū, Chūlu̍sɛ̄lɛ̄m kpo̍u̍, chɔ̍ŋ o̍ chīɛ̄ī vīlɛ̄ī bɛ̄ndōo̍ Ha̍na̍nɛ̄l mbō kūɛ̄ a̍ dīō sāāsā sɔ̍ŋgi̍o̍o̍ di̍, ō chō hūnɔ̄ɔ̄ mīīŋgū mbō tāŋgu̍lu̍ŋ kpo̍u̍, mbō wa̍ vɛ̄lɛ̄ chi̍e̍e̍ nī.

³⁹Pɛ̄ŋgu̍la̍ chi̍o̍o̍ lā chāŋ ni̍ŋ lo̍ŋ, mī lā kēēku̍ a̍ Pēmbīī Ka̍lu̍ɛ̍bīve̍, mī lā tūndū mī lā kūɛ̄ a̍ Pēmbīī Ko̍wāāve̍ kɛ᷅.

⁴⁰Dɛ̍ŋgbɛ̍ nda̍ chɔ̄ wa᷅ŋnda̍ o̍ ko̍ŋ kɔ̍ɔ̍lī, mā vi̍a̍ū bi᷅llo̍ lo̍ŋ ndo̍ ki̍nɛ̍i̍, a̍ chīɔ̍ɔ̍ŋ cho̍ o̍ pēē pɔ̍mbɔ̄ɔ̍ Ki̍di̍lɔ̄ŋ da̍ŋga̍la̍ wo̍ŋ kpo̍u̍, mbo̍ kɔ̍ fu̍u̍lūū o̍ dīō sāāsā Su̍a̍a̍, bā pāa̍le̍ŋ lē chāŋndo̍ lo̍ŋ kpo̍u̍, fo̍nda᷄ŋ wa᷅ ni̍ŋ o̍ yɔ̍ŋga᷄ŋ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ wo̍ o̍ wa᷅ ni̍ŋ ni̍. Ndu̍yɛ̍ I̍ cho̍ tōsā, fɛ̍ɛ̍ŋ a̍ fɛ̍ɛ̍ŋ ya̍a̍mɔ̍ɔ̍wa̍ ā pe᷅l lɛ̍ chi̍o̍o̍ ho̍ō kɛ̄lɛ̄ŋgāā mā tɛ̄ɛ̄mbu̍u̍ ndu̍ mbō lo̍ pɔ̄m te̍.”