Read Southern Kisi Chɛ̄lūīma̍yā 33 Bible Online

Chɛ̄lūīma̍yā 33 - Southern Kisi bible

Chɛ̄lūīma̍yā 33

¹Bōōndi̍i̍ ya̍ Chɛ̄lūīma̍yā wa̍ o̍ bīyɔ̄ɔ̍ ni᷄ŋ, o̍ la̍u̍ ba̍lu̍ fo̍ndā lēmāsāa̍ wo̍ ve̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā vɛ̄lɛ̄ nāa̍ ya̍ chu̍a̍ o̍ dīi̍ŋ ndɔ̄ɔ̍, mbo̍ kē ya̍ yōōŋgū chēle̍ŋ.

²Mi̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ to̍o̍si̍a̍a̍ chi̍e̍ēŋndo̍ ho̍ō wo̍, o̍ tu̍u̍la̍ ndu̍ o̍ kāndɔ᷄ŋndo̍, mbo̍ tōōsīāā ndu̍ kpɛ̍ kpɛ̍ mɛ̄ɛ̍ o̍ nɔ̍ le̍ wāa̍ yɛ̍ wo̍, mbo̍ sūāā vɛ̄lɛ̄ nāa̍ ya̍ chu̍a̍. Mi̍ Mɛ̄lɛ̄ka̍ nɔ̍ ko̍ŋ di̍ōla̍ŋ āā Mɛ̄lɛ̄ka̍ Ya̍a̍wɛ̄ɛ̄ wo̍ ō lō o̍ ko̍ŋ mbo̍ dīmūl la̍ āā,

³“Nyu̍na̍ ya̍ Mɛ̍lɛ̄ka̍ dīōm, ndu̍yɛ̍ I̍ cho̍ nu̍m dīōm mūlī, o̍ ko̍ŋ kɔ̍ɔ̍lī, mī chɔ̍m nu̍m sɔ̄ɔ̍ŋ tɔ̍ɔ̍ma̍ŋ bɛ̄ndo̍ŋ, a̍ sɔ̄ɔ̍ŋ cho̍ ŋ̄ vīāŋna᷄ŋ a̍ si̍nā mu̍ŋ pɛ̄ŋgu̍ le̍ wo̍ŋ.

⁴Ya̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍ ā pīɛ̄īyo̍, nyɛ̄ ya̍ I̍ di̍mi̍ wo̍ cho̍ ho̍ō. Le̍ kīndīo̍o̍ yɔ̄ŋi̍ ya̍a̍mɔ̍ɔ̍wa̍a̍ dɔ̍ū ha̍ā nya̍ o̍ pi̍ŋndo̍ ni̍ŋ ma̍ bɛ̄ɛ̄ndīa̍ŋ le̍ nya̍ dēlɔ̄ɔ̍ chōo̍ wa̍ ā nɔ̄la̍ nya̍, mi̍ lā pēsī chīɛ̄īlā bɔ̄ɔ̍ bɔ̍ɔ̍ Chūlu̍sɛ̄lɛ̄m ndu̍yɛ̍ a̍ chīɛ̄īla̍ŋ lā ti᷄ŋ o̍ fo̍ndāŋ lēmāsāa̍.

⁵Lā sīmūl ni̍ŋ wa᷅ŋnda̍ Ba̍bi̍lɔ̄ŋ a̍ sɔ̍ŋgɔ̍ɔ̍ mī wāŋnda̍ Ba̍bi̍lɔ̄ŋ a̍ ye᷅m nya̍ ndu̍yɛ̍ mā dīu̍ nya̍ ta̍u̍ ta̍u̍. Wāŋ vīlɛ̍i̍ya̍ ā pīā ni̍ŋ chi̍ɛ̍īla̍ŋ ni̍ŋ cha̍ cha̍. I̍ cho̍ tōsā mā dīu̍ nya̍ dīūwo̍ pīla̍, fo̍ndōle̍, ya̍ Mɛ̍lɛ̄ka̍ I̍ ta̍mbu̍ kɔ̄l a̍ nya̍ ndu̍yɛ̍ mi̍ du̍a̍u̍nu᷄ŋ tu̍mbe̍ a̍ nya̍ o̍ ka̍lā ka̍lā. Ya̍ Mɛ̍lɛ̄ka̍ I̍ fa̍ŋa̍ hɔ̄lāā nīa̍a̍ o̍ chi̍o̍o̍ ho̍ō chōo̍ ba̍ū, fo̍ndōle̍, le̍ yɔ̄ŋ wɔ̄ɔ̍ŋ wāŋnda̍ o̍ chi̍o̍o̍ ho̍ō ni᷄ŋ a̍ to̍sa̍ wo̍.

⁶Kɛ̍ ndu̍yɛ̍, te̍le̍ŋ cho̍ fūūlūū mī hu̍ŋ ba̍ŋā chi̍o̍o̍ ho̍ō mī mi̍ŋgi̍ ndu̍ o̍ bā ndɔ̄ɔ̍ chōo̍. I̍ cho̍ vɛ̄lɛ̄ hūnɔ̄ɔ̄ wānāā nīa̍a̍ chīɔ̄ū mī to̍sa̍ mā wa̍ o̍ kɔ̄l nyūlū bɛ̍ndōo̍ ni̍ŋ, ndu̍yɛ̍ mā wānu̍ŋ o̍ bā ndāa̍ chōo̍ yɛ̍lɛ̍kɛ̍lɛ̍ɛ̍ nyɛ̄ o̍ nyɛ̄ yɔ̍nūŋ o̍ pi᷅lɛ̍ le̍.

⁷I̍ cho̍ hūnɔ̄ɔ̄ Chu̍dā a̍ I̍sɔ̄lūɛ̍i̍ mīŋgī tāŋgūl mī to̍sa̍ mā mīīŋgu̍ mɛ̄ɛ̍ nda̍ wa̍ o̍ tāse̍la̍ ndɔ̄ɔ̍ yɛ̍.

⁸I̍ cho̍ nda̍ hūnɔ̄ɔ̄ dīndī, ndu̍yɛ̍ mī ma̍l nda̍ le̍ yɔ̄ŋndā wɔ̄ɔ̍ŋnda̍ nda̍ tōsa̍ a̍ ya̍ la̍ŋ, ndu̍yɛ̍ a̍ le̍ sīmūl nda̍ sīmu̍l la̍ wo̍.

⁹Chūlu̍sɛ̄lɛ̄m o̍ to̍sā ni̍ŋ mī wāŋnda̍ dɔ̄ɔ̄nu᷄ŋ nya̍a̍le̍ a̍ ya̍, ndu̍yɛ̍ mā ke̍ ya̍ bɛ̄ɛ̄le̍ŋ ndu̍yɛ̍ mā kēlū yōŋgāa̍ a̍ ya̍ Mɛ̍lɛ̄ka̍ o̍kɔ̄ɔ̄. Wāŋnda̍ o̍ lɛ̄ŋnde̍ ni᷄ŋ kpo̍u̍ o̍ chi̍e̍ēŋndo̍ ni᷄ŋ, tē ā hu᷄ŋ tu̍e̍ī a̍ sɔ̄ɔ̍ŋ kɛ̍ndɛ̄ŋ ya̍ I̍ to̍sāl ni̍ŋ wa᷅ŋnda̍ Chūlu̍sɛ̄lɛ̄m ndo̍ŋ o̍kɔ̄ɔ̄ pɛ̍, mā tūēī a̍ dɛ̍nɛ̍ kɛ̍ndɛ̄ bɛ̄ndū ya̍ I̍ to̍sā ni̍ŋ mbō wa̍ o̍ chi̍o̍o̍ ho̍ō ni᷄ŋ ndo̍, sīōōŋnde̍ chō nda̍ bīyɔ̄ɔ̄ a̍ ya̍ mā nyīīya̍ kpa̍kpā.”

¹⁰Mi̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍a̍ū lāchī a̍ sūɛ̍i̍ mbo̍ di̍mī āā, “Wāŋnda̍ chō dīmīo̍o̍ māā, mbɔ̄ Chūlu̍sɛ̄lɛ̄m a̍ chi̍o̍o̍ŋ Chu̍dā ŋ̍ pi̍ɔ̍l. Ŋ̄ sīmnu᷄ŋ mɛ̄ɛ̍ po̍llo̍ ō wā nu̍a̍ā, wāna̍ chi̍e̍e̍ kɛ̄lɛ̄ŋgāā chɔ̄lū o̍ chɔ̄lū o̍ ve᷅m lo̍ŋ te̍ yɛ̍. Kɛ̍ ndu̍yɛ̍, te̍le̍ŋ cho̍ fūūlūū, fo̍ndāŋndā nya̍ cho̍ la᷅ŋ dīmīo̍o̍ a̍ la̍ŋ o̍kɔ̄ɔ̄ la̍ŋ, lā tūɛ̄ī ni̍ŋ vɛ̍lɛ̄ wāŋnda̍,

¹¹bɔ̄ɔ̄lūūlā kɔ̄ltā kɛ̄ndɛ̄la̍ŋ lo̍ŋ, a̍ nya̍a̍le̍ la̍ŋ ndu̍yɛ̍ a̍ chōndu̍ŋ kɔ̄l kɛ̄ndɔ̍ŋ o̍ nɔ̄la̍ kɛ̍sīāāla̍ŋ chōo̍. Wānāa̍ wa᷅ ni̍ŋ hu̍nɔ̄ɔ̍ sa̍lālā ba̍li̍ka̍la̍ŋ sōlīo̍o̍ o̍ ya̍ Mɛ̄lɛ̄ka̍ Ya̍a̍wɛ̄ɛ̄ lo̍ o̍ chīɛ̄ī nūu̍ ni᷄ŋ nda̍, lā tūɛ̄ī ni̍ŋ vɛ̍lɛ̄ nda̍ chōndu̍ŋ kɔ̄l kɛ̄ndɔ̍ŋ sōlīo̍o̍ mā wa̍ dīmīo̍o̍ o̍ chōndo̍ŋ ni᷄ŋ māā, lā ŋ̄ mēlnu᷅ŋ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ ba̍li̍ka̍, fo̍ndōle̍, Mɛ̄lɛ̄ka̍ Ya̍a̍wɛ̄ɛ̄ o̍ cho̍ wānā kɛ̍ndɛ̄, ndu̍yɛ̍ kāālā ndɔ̄ɔ̍ ō chō le̍ fɛ̍ɛ̍ŋ a̍ fɛ̍ɛ̍ŋ. Le̍ sa̍bū nda̍ wā ni̍ŋ cho̍ndu̍ŋ kɔ̄l kɛ̄ndɛ̄ŋ mu᷅ŋ sōlīo̍o̍ wo̍ cho̍ ni̍, I̍ cho̍ tōsā mī lɛ̄ŋnde̍ŋ nde᷅ŋ lē mīīŋgu̍ o̍ bā ndɔ̄ɔ̍ chōo̍, mī lē sīmnu᷄ŋ vɛ̍lɛ̄ lɛ̄ŋndē dɛ̍nɛ̍ kɛ̍ndɛ̄lē bɛ̄ndū māā pāāndū. Ya̍ Mɛ̍lɛ̄ka̍ Ya̍a̍wɛ̄ɛ̄, ya̍ so̍ō ni̍.”

¹²Mi̍ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ ō hīāū lāchī a̍ sūɛ̍i̍, mbo̍ dīmī āā, “Lɛ̄ŋnde̍ cho̍ le᷅ŋ hūnɔ̄ɔ̄ lō fo̍ndō mī lē sīmnu᷄ŋ māā lɛ̄ŋndē po̍li̍, nāa̍ wāna̍ chi̍e̍e̍ kɛ̄lɛ̄ŋgāā chɔ̄lū o̍ chɔ̄lū ō che᷅l te̍ le̍ŋ, te̍le̍ŋ cho̍ fūūlūū, mī fo̍ndāŋndā māndāā lāsāāla̍ŋ lā tīu̍ vɛ̄lɛ̄ o̍ lɛ̄ŋnde̍ŋ nde᷅ŋ ni᷄ŋ, nāa̍ wānāā māndāā lāsāa̍ ā māndā ni̍ŋ sa̍a̍ ndāa̍ wa̍.

¹³Chi̍e̍e̍ŋ cho̍ o̍ pēmbo᷄ŋ chōo̍ wo̍ŋ ni̍, a̍ chi̍o̍o̍ŋ o̍ pēmbo᷄ŋ hōlnɔ᷄ŋndo̍, a̍ būŋgɛ̄ī Chu̍dāve̍ ba᷅ tōūwo̍, a̍ būŋgɛ̄ī Bɛ̍ŋnja̍mīŋ nde̍, a̍ sɔ̄ndɔ̄kɔ̍lta̍ ba̍lu̍ Chūlu̍sɛ̄lɛ̄m nda̍ŋ, a̍ chi̍o̍o̍ŋ Chu̍dā, ŋ̄ pīlɔ̍ŋ kpo̍u̍ wānāā māndāā lāsāa̍ ā chō hūnɔ̄ɔ̄ tīū mā hu᷄ŋ wa᷅ vɛ̄lɛ̄ sāa̍ ndāa̍ chɔ̄mndo̍ māā pāāndū. Ya̍ Mɛ̍lɛ̄ka̍ Ya̍a̍wɛ̄ɛ̄ ya̍ so̍ō ni̍.”

¹⁴Mi̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍a̍ū lāchī a̍ sūɛ̍i̍ mbo̍ dīmī āā, “Būŋgɛ̄ī ya̍ I̍ chu̍e̍l wāŋnda̍ I̍sɔ̄lūɛ̄ī a̍ wāŋnda̍ Chu̍dā ve̍, te̍le̍ŋ cho̍ fūūlūū mī hu̍ŋ pe̍e̍lū būŋgɛ̄ī kēŋ.

¹⁵A̍ te̍le̍ŋ ko̍ŋ, I̍ cho̍ wāŋndo̍ hɛ̄lī o̍ chīɛ̍i̍ Dēēvi̍o̍o̍ ni̍ŋ, o̍ cho̍ sa̍kpō wo̍, mī si̍i̍ŋgu̍u̍ ndu̍ māsāa̍ lɛ̄ŋnde̍ŋ nde᷅ŋ chōo̍, ndu̍yɛ̍ mbō tōsa̍ nyɛ̄ cho̍ sa̍kpō o̍ ko̍ŋ kɔ̍ɔ̍lī, mbo̍ bɛ̄ndā le̍ tōsāa̍ wo̍ o̍ lɛ̄ŋnde̍ŋ ni᷄ŋ kpo̍u̍.

¹⁶O̍ te̍le̍ŋ ndɔ̄ɔ̍ bɛ̄ŋgu̍, lɛ̄ŋndē Chu̍dāle̍ŋ lē chō hūnɔ̄ɔ̄ pīōŋɔ̄ɔ̍ sɔ̄lā, ndu̍yɛ̍ o̍ ko̍ŋ kɔ̍ɔ̍lī, mī Chūlu̍sɛ̄lɛ̄m o̍ sɔ̍lā kɔ̄l nyūlōo̍ mbō wānu̍ŋ o̍ bā ndɔ̄ɔ̍ chōo̍ yɛ̍lɛ̍kɛ̍lɛ̍ɛ̍. A̍ te̍le̍ŋ ko̍ŋ wāŋnda̍ ā vēēlū ni̍ŋ Chūlu̍sɛ̄lɛ̄m māā, Mɛ̄lɛ̄ka̍ Ya̍a̍wɛ̄ɛ̄, o̍ cho̍ sa̍kpō a̍ na̍a̍ wo̍.

¹⁷Ndu̍yɛ̍ ya̍ Mɛ̍lɛ̄ka̍ Ya̍a̍wɛ̄ɛ̄, nyɛ̄ ya̍ I̍ di̍mi̍ wo̍ cho̍ ho̍ō ni̍. Chɔ̍ŋ a̍ te̍le̍ŋ ko̍ŋ mbō kūɛ̄ a̍ lāchī kɛ᷅, o̍ pūlāle̍ Dēēve̍ le̍ŋ chōo̍ māsāā bɛ̍ndūa̍a̍ le̍ I̍sɔ̄lūɛ̄ī a̍ wa᷅ ni̍ŋ fu̍lāa̍ ni̍.

¹⁸Ndu̍yɛ̍ o̍ ko̍ŋ kɔ̍ɔ̍lī, wānāa̍ fu̍la̍ o̍ pūlāle̍ Li̍va̍īle̍ŋ chōo̍ wa̍, le̍ te̍le̍ŋ o̍ te̍le̍ŋ o̍ pūlālē ndāle̍ŋ chōo̍ wānāa̍ so̍lī sa̍lāla̍ŋ o̍ ya̍ Mɛ̍lɛ̄ka̍ lo̍ wa̍ ā wā ni̍ŋ fu̍lāa̍ ni̍, sa̍lālā lūāmāā ni̍, sa̍lālā tɔ̄lɔ̄ɔ̄ ku̍l ni̍, sa̍lālā yɔ̄ŋāā chēle̍ŋ ni̍.”

¹⁹Mi̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍a̍ū lāchī a̍ sūɛ̍i̍ nāa̍ ya̍ Chɛ̄lūīma̍yā chu̍a̍, mbo̍ dīmūl la̍ āā,

²⁰“Nyɛ̄ ya̍ Mɛ̍lɛ̄ka̍ Ya̍a̍wɛ̄ɛ̄ di̍mi̍ wo̍ cho̍ ho̍ō ni̍. Di̍ ya̍ I̍ ke̍ pāa̍le̍ŋ a̍ nyūmnda̍ŋ ndo̍, tē wānā nɔ̍lā di̍ ko̍ŋ tɛ̄ɛ̄mbūū pɛ̍, mā to̍sa̍ pāa̍le̍ŋ lē fūlā lɛ̍ a̍ te̍le̍ŋ le̍ nɔ̍ le̍ fūlāa̍ wo̍ le̍, nyūmnda̍ŋ bɛ̍ɛ̍ mā to̍sa̍ mā tu᷅l lɛ̍ a̍ te̍le̍ŋ ma̍ nɔ̍ le̍ tōlɔ̄ɔ̍ wo̍ le̍ pɛ̍,

²¹mɛ̄ɛ̍ kpe̍ma̍la̍ ti̍ɔ̍ɔ̍ŋndā ya̍ I̍ yi̍i̍ la᷅ŋ a̍ wāŋnda̍ ha̍ā la̍ŋ, ō ya̍ I̍ yi̍i̍ a̍ bu̍ɛ̍ī nūu̍ Dēēve̍ wo̍ ni̍, a̍ ō ya̍ I̍ yi̍i̍ a̍ Li̍va̍īya̍ wo̍, mɛ̄ɛ̍ wānā nɔ̍lā mā tɛ̍ɛ̍mbu̍u̍ kpe̍ma̍la̍ la̍ŋ. Tē wānā nɔ̍lā di̍ ko̍ŋ tɛ̄ɛ̄mbūū pɛ̍, mɛ̄ɛ̍ wānā nɔ̍lā mā tɛ̍ɛ̍mbu̍u̍ kpe̍ma̍la̍ ti̍ɔ̍ɔ̍ŋnda̍ŋ ndāŋ, mā to̍sa̍ wānāa̍ fu̍la̍ o̍ pūlāle̍ Dēēve̍ le̍ŋ chōo̍ wa̍ ā hi̍ū lāchi̍ a̍ wāa̍ māsāa̍ o̍ fōōfo̍ Dēēve̍ wo̍ chōo̍ le̍, ndu̍yɛ̍ mā to̍sa̍ wānāa̍ fu̍la̍ o̍ yu̍ŋgu̍ Li̍va̍īyo̍ chōo̍ mā sōlī sa̍lāla̍ŋ o̍ ya̍ lo̍ wa̍, ā hi̍ū la̍chi̍ a̍ sa̍lāla̍ŋ sōlīo̍o̍ o̍ ya̍ lo̍ le̍.

²²Wānāa̍ fu̍la̍ o̍ pūlāle̍ bu̍ɛ̍ī nūu̍ Dēēve̍ le̍ŋ chōo̍ wa̍ ni̍, a̍ wānāa̍ fu̍la̍ o̍ yu̍ŋgu̍ Li̍va̍īyo̍ chōo̍ wa̍, a̍ to̍sā wa̍llo̍ le̍ ya̍ wa̍, I̍ cho̍ tōsā mā kūi̍ ta̍u̍ ta̍u̍. Mɛ̄ɛ̍ lōo̍ŋ ŋ̄ chō nu̍a̍ā chōo̍ cho̍o̍ ŋ̄ chu̍ū chɔ᷅m te̍ yɛ̍, kɛ̄lɛ̄ŋgāā mɛ̄ɛ̍ si̍o̍ōŋnde̍ ī wā nu̍a̍ā o̍ pīo̍o̍ kɔ̄ŋgɔ̍ ī chu̍ū chɔ᷅m te̍ yɛ̍, le̍nde̍ wāŋnda̍ ha̍ā ā wā ni̍ŋ ni̍, ā chu̍ū chɔ᷅m te̍.”

²³O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl la̍ āā,

²⁴“Chɛ̄lūīma̍yā, nūm pi̍la̍ ā chō ni᷅ŋ tūēīyɔ̄ɔ̍ nyɛ̄ wāŋnda̍ chō dīmīo̍o̍ a̍ wānāā nīa̍a̍ o̍kɔ̄ɔ̄ wo̍. Ā chō dīmīo̍o̍ māā ya̍ Mɛ̍lɛ̄ka̍ I̍ kɛ̍ɛ̍ yu̍ŋgu̍la̍ ti̍ɔ̍ɔ̍ŋndā ya̍ I̍ hɛ̍li̍ la̍ŋ. Le̍ he̍ī, ma̍ wā wānāā nīa̍a̍ pɛ̄ɛ̄sāa̍ ā chūe̍ lɛ̍ nda̍ bɛ̍ɛ̍ māā ā chō lēlɛ̄ŋ te̍.

²⁵Kɛ̍ ndu̍yɛ̍ nyɛ̄ ya̍ Mɛ̍lɛ̄ka̍ Ya̍a̍wɛ̄ɛ̄ di̍mi̍ wo̍ cho̍ ho̍ō ni̍. Mɛ̄ɛ̍ ya̍ Mɛ̍lɛ̄ka̍ tōōsi̍a̍a̍ pāa̍le̍ŋ a̍ nyūmnda̍ŋ, mi̍ lo᷅ o̍ ko̍ŋ mi̍ ke᷅ nyɔ̄ɔ̍ŋ mu᷅ŋ di̍la̍ŋ kpɛ̍kpɛ̍. O̍ ko̍ŋ kɔ̍ɔ̍lī, mi̍ kɛ̍sī vɛ̄lɛ̄ sāwāla̍ŋ kpɛ̍ kpɛ̍, lā nyɔ̄ɔ̍ŋ o̍ chi̍e̍ēŋndo̍ ni᷄ŋ a̍ mu᷅ŋ o̍ ha̍la̍a̍ ni̍ŋ cho̍o̍ cho̍o̍ ŋ̍ nɔ̍ mī ŋ̄ wa̍ lēbɛ̄ŋgu̍ la̍ŋ.

²⁶Mɛ̄ɛ̍ di̍la̍la̍ŋ a̍ sāwāla̍ŋ lā chō nu̍a̍ā lā te̍mbū le̍ fɛ̍ɛ̍ŋ a̍ fɛ̍ɛ̍ŋ te̍ yɛ̍, le̍nde̍ kpe̍ma̍ ya̍ I̍ yi̍i̍ a̍ wānāa̍ fu̍la̍ o̍ pūlāle̍ Che̍kɔ̍pūle̍ŋ chōo̍, a̍ o̍ pūlāle̍ bu̍ɛ̍ī nūu̍ Dēēve̍ le̍ŋ chōo̍ wa̍ ō wā ni̍ŋ ni̍. Kpe̍ma̍ ya̍ I̍ yi̍i̍ a̍ nda̍ mi̍ di̍mī māā I̍ cho̍ wāŋndo̍ hɛ̄lī o̍ pūlāle̍ Dēēve̍le̍ŋ chōo̍ mī si̍i̍ŋgu̍u̍ ndu̍ māsāa̍ le̍ wānāa̍ fu̍la̍ o̍ pūlāle̍ E̍bīlāha᷅m nde̍ŋ chōo̍, a̍ pūlāle̍ Āa̍se̍le̍ŋ a̍ pūlāle̍ Che̍kɔ̍pūle̍ŋ ndo̍, I̍ cho̍ tōsā mbō hīōū lāchī a̍ wāa̍. I̍ cho̍ hūnɔ̄ɔ̄ wānāā nīa̍a̍ īnyīɛ̍ɛ̍ tūīīnɔ᷄ŋ, mī lo̍ ko̍ŋ mī to̍sa̍ mī lɛ̄ŋndē ndāle̍ŋ lē mīīŋgu̍ vɛ̄lɛ̄ nāŋɔ̄ɔ̄ māā pāāndū.”