Read Southern Kisi Chɛ̄lūīma̍yā 34 Bible Online

Chɛ̄lūīma̍yā 34 - Southern Kisi bible

Chɛ̄lūīma̍yā 34

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā vɛ̄lɛ̄ nāa̍ ya̍ Chɛ̄lūīma̍yā chu̍a̍ mbo̍ kē ya̍ yōōŋgōo̍. A̍ te̍le̍ŋ ko̍ŋ, Māsāa̍ Nābi̍u̍kānɛ̍ɛ̍sā o̍ wa̍ Ba̍bi̍lɔ̄ŋ ndo̍ a̍ pūa̍a̍ ndūa̍a̍ chɔ̄ūwa̍ kpo̍u̍ ā wa̍ sɔ̍ŋgɔ̍ɔ̍ a̍ Chūlu̍sɛ̄lɛ̄m ndu̍yɛ̍, a̍ chi̍e̍e̍ŋ ba̍lu̍ Chūlu̍sɛ̄lɛ̄m ndo̍ŋ kpo̍u̍. Lɛ̄ŋīī Māsāa̍ Nābi̍u̍kānɛ̍ɛ̍sā o̍ wa̍ māsāa̍ chōo̍ ve̍ ki̍nɛ̍i̍, a̍ wānāā yɛ̍ yi̍a̍a̍ wa̍ ndu̍ o̍ bā bɛ̄ŋgu̍ wa̍, nda̍ kpo̍u̍ ma̍ chūūŋgīāā pūa̍a̍ ndāa̍ chɔ̄ūwa̍ ma̍ yɔ̄ŋ nda̍ le̍ sɔ̍ŋgɔ̄ɔ̍ ho̍ō. Mi̍ Mɛ̄lɛ̄ka̍ dīmūl la̍ āā,

²“Ya̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍ ā pīɛ̄īyo̍, nyɛ̄ ya̍ I̍ di̍mi̍ wo̍ cho̍ ho̍ō ni̍,” kɔ̍ nāa̍ Māsā Bɛ̍ndōo̍ Sɛ̄dīka̍yā chu̍a̍ māsāa̍ le̍ Chu̍dā, mā kɔ̍ di̍mūl ndu̍ māā ya̍ Mɛ̍lɛ̄ka̍ dīmi̍ āā, “Sɛ̄dīka̍yā, ya̍ Mɛ̍lɛ̄ka̍ Ya̍a̍wɛ̄ɛ̄ cho̍ hūnɔ̄ɔ̄ māsāa̍ Ba̍bi̍lɔ̄ŋ chi̍o̍o̍ ho̍ō mālɔ̄ɔ̄ o̍ bā ndu̍yɛ̍ mī to̍sa̍ mbō lōm ndu̍ kpo̍u̍.

³Ndu̍yɛ̍ nūm Sɛ̄dīka̍yā pi̍la̍ bɛ̍ɛ̍ a̍ nɔ̍lā ni̍ŋ mā hɛ̄lu᷄ŋ mā nya̍a̍nu̍ŋ te̍. Ā chō nu̍m bīyɔ̄ɔ̄ mā yɔ̄ŋgu̍ nu̍m o̍ māsāa̍ Ba̍bi̍lɔ̄ŋ ndo̍. Lā chō chāna᷅ŋ nya̍ ndu̍ hɔ᷅lla̍ a̍ hɔ̄lla̍, ndu̍yɛ̍ mā si̍m ndu̍ o̍ hɔ̄l mā wa̍ ndu̍ hɔ̄lla̍ tōfāa̍ mā sūāā. Ndu̍yɛ̍ o̍ ko̍ŋ kɔ̍ɔ̍lī, ā chō lākɔ̄ a̍ nūm o̍ bīyɔ̄ɔ̍ ni̍ŋ Ba̍bi̍lɔ̄ŋ.

⁴Kɛ̍ ndu̍yɛ̍, ya̍ŋ ni᷅la̍ŋ Sɛ̄dīka̍yā, mā tūēī nyɛ̄ ya̍ Mɛ̍lɛ̄ka̍ Ya̍a̍wɛ̄ɛ̄ di̍mi̍ a̍ nūm o̍kɔ̄ɔ̄ wo̍. I̍ cho̍ tōsā a̍ cho̍ pi̍ɔ̍m sɔ̍lā o̍ chɔ̄ūwo̍ ni᷄ŋ te̍.

⁵Ā chō hūnɔ̄ɔ̄ wu᷄ o̍ kɔ̄l nyūlū ni̍ŋ ndu̍yɛ̍ mī wāŋnda̍ ā cha̍ŋ nu̍m. Wāŋnda̍ chō hūnɔ̄ɔ̄ nyɛ̄m chūŋ kɛ̄ndɔ̍ŋ lōmɔ̄ɔ̄ o̍ cha᷄ŋ nu̍mndo̍ chōo̍ le̍ nu̍m bɛ̄ɛ̄le̍ŋ kīo̍o̍, mɛ̄ɛ̍ nda̍ lōm nyɛ̄m chūŋ kɛ̄ndɔ᷄ŋ o̍ cha᷄ŋnda̍ fi̍nyāā nūm a̍ ma̍māa̍ chōo̍ le̍ nda̍ bɛ̄ɛ̄le̍ŋ kīo̍o̍ yɛ̍, nda̍ yɔ̍nūŋ māā a̍ ke̍e̍ku̍ māsāa̍ o̍ lɛ̄ŋnde̍ŋ nde᷅ŋ ni̍ŋ nu̍m lāchī wa̍ ni̍. Wāŋnda̍ ā chō nu̍m cha̍ŋ mā dīmi̍ māā, ōo̍ māsa̍ nāa̍, māsa̍ nāa̍ ō vī fɔ̍. Ya̍ Mɛ̍lɛ̄ka̍ Ya̍a̍wɛ̄ɛ̄ ya̍ so̍ō ni̍.”

⁶O̍ ko̍ŋ, nyɛ̄ o̍ nyɛ̄ Mɛ̄lɛ̄ka̍ ō dīmu̍l la̍, ya̍ Chɛ̄lūīma̍yā mi̍ di̍mūl Māsāa̍ Sɛ̄dīka̍ya̍ ndu̍ kpo̍u̍ Chūlu̍sɛ̄lɛ̄m chi̍e̍e̍.

⁷A̍ te̍le̍ŋ ko̍ŋ, māsāa̍ Ba̍bi̍lɔ̄ŋ nda̍ pūa̍a̍ ndūa̍a̍ chɔ̄ūwa̍ ā wa̍ sɔ̍ŋgɔ̍ɔ̍ kpe̍e̍kpe̍i̍ a̍ chi̍o̍o̍ŋ mu᷅ŋ, mu̍ŋ yɔ̍nūŋ ni̍ māā Chūlu̍sɛ̄lɛ̄m La̍ki̍sī, a̍ Āsi̍kāā. Ndu̍yɛ̍ o̍ lɛ̄ŋndē Chu̍dāle̍ŋ ni᷄ŋ kpo̍u̍, chi̍e̍e̍ŋ mu̍ŋ ŋ̍ lo̍ŋ ni᷅ŋ mi̍ ŋ̄ nɔ̄ sāāsāla̍ŋ lā bālāā wo̍ŋ ŋ̍ wa̍ mu᷅ŋ ni̍.

⁸Mi̍ chɛ̄la᷅ŋndo̍ ndu̍ o̍o̍ yɔ̍nu̍ŋ Ma̍sāa̍ Sɛ̄dīka̍ya̍ tɛ̄ɛ̄ŋ nda̍ wāŋnda̍ Chūlu̍sɛ̄lɛ̄m kpo̍u̍ le̍ mī wānā o̍ wānā ndu̍ o̍o̍ ma̍l chīa̍a̍ wa̍ ndu̍ o̍ bā wa̍ mā mīīŋgu̍ o̍ lānda̍ lo̍, ā bi̍ī nda̍ nyɛ̄ o̍ nyɛ̄ o̍ bā le̍ nda̍ mālɔ̄ɔ̍ le̍.

⁹Mi̍ chɛ̄la᷅ŋndo̍ ō yɔ̄nu᷄ŋ, māā wānā o̍ wāna̍ nɔ̍ Hi̍būlūi̍nɔ̍ɔ̍ o̍ bā o̍ chɛ̄le̍ŋ ni̍ŋ, ō wa̍ chɛ᷅ wānā pɔ̍nɔ̍, ō wa̍ chɛ᷅ wānā la̍nɔ̍ māā ō nɔ̄ mbō ma᷄l ndu̍, māā wānā o̍ wānā o̍ nɔ̍ mbō kɛ̄si̍ cha᷄ŋ ndɔ̄ Hi̍būlūi̍nɔ̍ɔ̍ māā chɛ̄ le̍.

¹⁰Wāŋ bɛ̄ndūāā I̍sɔ̄lūɛ̍i̍ya̍ kpo̍u̍, a̍ wānā o̍ wāna̍ lu̍ɛ̍ī o̍ chɛ̄la᷅ŋndo̍ ho̍ō bɛ̄ŋgu̍, nda̍ kpo̍u̍ ma̍ chɛ̄l, māā wānā o̍ wāna̍ nɔ̍ mbō ma᷄l chīa̍a̍ cho̍ ndu̍ o̍ bā wa̍ mā kūɛ̄nu᷄ŋ, chɛ̄ wānā pɔ̍nɔ̍ ni̍, chɛ̄ wānā la̍nɔ̍ ni̍, ndu̍yɛ̍ māā wānā o̍ wānā nɔ̍ lɛ̍ mbō bīī nda̍ a̍ ka̍ka̍ mbō mīŋgi̍ nda̍ o̍ lēchɛ̄ bɛ̄ŋgu̍ le̍. Ndu̍yɛ̍ ma̍ tōsā mɛ̄ɛ̍ nda̍ chɛ̄la᷅ŋ yɛ̍, mi̍ wānā o̍ wānā ma᷅l chīa̍a̍ wa̍ ndu̍ o̍ bā wa̍ ma̍ kūānu᷄ŋ.

¹¹Kɛ̍ mɛ̄ɛ̍ te̍le̍ŋ ti̍ŋ ō hīo̍u̍, ma̍ sīŋgā kɔ̄lta̍ŋ, ma̍ bīī vɛ̄lɛ̄ chīa̍a̍ kāŋ a̍ ka̍ka̍ ma̍ mīŋgī nda̍ o̍ chɛ̄le̍ŋ bɛ̄ŋgu̍.

¹²Mɛ̄ɛ̍ sūɛ̍i̍ he̍ī ī yɔ̄nu̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā nāa̍ ya̍ Chɛ̄lūīma̍yā chu̍a̍, mbo̍ dīmūl la̍ āā,

¹³“Ya̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍, nyɛ̄ ya̍ I̍ di̍mi̍ wo̍ cho̍ ho̍ō ni̍, bōōndi̍i̍ ya̍ I̍ so̍li̍ fi̍nyāā nyāā ma̍māa̍ I̍chi̍pī o̍ chɛ̄le̍ŋ ni᷄ŋ nde̍, mi̍ yi̍ī kpe̍ma̍a̍ a̍ nda̍. Mi̍ di̍mūl nda̍ māā,

¹⁴o̍ wɔ̄sīlā ŋɔ᷄mmɛ̍ū o̍ wɔ̄sīlā ŋɔ᷄mmɛ̍ū mɛ̄ɛ̄lu̍la̍ŋ, wānā o̍ wāna̍ nɔ̍ Hi̍būlūi̍nɔ̍ɔ̍ o̍ bā o̍ chɛ̄le̍ŋ ni᷄ŋ pɛ̍, ā nɔ̄ mā ma̍l ndu̍ mbō kūɛ̄nu᷄ŋ. Tē chɛ̄ kōŋ ō tōsa̍l nu̍m wa̍llo̍ le̍ wɔ̄sīla̍ŋ lā ŋɔ᷄mpu᷅m pɛ̍, ā nɔ̄, mā ma̍l ndu̍. Kɛ̍ fi̍nyāā nyāā ma̍māa̍ ā ye᷄ŋ ya̍ lānī le̍, kɛ̄lɛ̄ŋgāāle̍, mā tōsa̍ nyɛ̄ ya̍ I̍ di̍mu̍l nda̍ wo̍.

¹⁵Kɛ̍ te̍le̍ŋ ti̍ŋ ko̍ni̍ o̍ hi̍o̍u̍ wɔ̄ ni̍, mi̍ nya̍ wāŋnda̍ I̍sɔ̄lūɛ̄ī a̍ hu᷅ŋ o̍ nya̍ pi̍la̍ ni̍ŋ mi̍ lā sīnā māā lā tōsa̍ yɔ̄ŋ wɔ̄ɔ̍ŋndo̍, mi̍ lā kɛ̄ɛ̄sīāā le̍ nyɛ̍ bɛ̍nda̍ ya̍ o̍ hɔ̄l lo̍ tōsāa̍. Nya̍ kpo̍u̍ mi̍ lā chɛ̄la᷅ŋ māā wānā o̍ wānā ō nɔ̄ mbō ma᷄l cha᷄ŋ ndɔ̄ I̍sɔ̄lūɛ̍i̍nɔ̍ cho̍ ndu̍ o̍ bā o̍ chɛ̄le̍ŋ ni᷄ŋ ndo̍ mbō kūɛ̄nu᷄ŋ fo̍ndō, ō bi̍ī ndu̍ nyɛ̄ o̍ nyɛ̄ o̍ bā le̍. Chīɛ̍i̍ cho̍ le̍ ya̍ Mɛ̍lɛ̄ka̍ wo̍, nāa̍ nya̍ sōōlūū ya̍ wa̍, lo̍ŋ kpe̍e̍kpe̍i̍ nya̍ hīŋ ni̍ mi̍ lā hu᷄ŋ yi̍ī kpe̍ma̍a̍ o̍ sūɛ̍i̍ he̍ī chōo̍.

¹⁶Kɛ̍ mi̍ lā lō o̍ ko̍ŋ, mi̍ lā sīŋgā vɛ̄lɛ̄ kɔ̄ltā nyāla̍ŋ mi̍ lā tōsā sūɛ̍i̍ tɛ̍ɛ̍mbūū di̍o̍la̍ nīla̍ŋ lābɛ̄ɛ̄ ve̍. Chɛ̄ o̍ chɛ̄ nya̍ ma᷄l mbō sɔ̄la̍ bāŋa᷄ŋndo̍, chɛ̄ wānā pɔ̍nɔ̍ ni̍, chɛ̄ wānā la̍nɔ̍ ni̍, mi̍ lā bīī nda̍ vɛ̄lɛ̄ a̍ ka̍ka̍ mi̍ lā mīŋgī nda̍ o̍ chɛ̄le̍ŋ bɛ̍ŋgu̍.

¹⁷“Le̍la̍ŋ nyɛ̄ ya̍ Mɛ̍lɛ̄ka̍ Ya̍a̍wɛ̄ɛ̄ di̍mi̍ wo̍ cho̍ ho̍ō ni̍. Le̍ kɛ̄ɛ̍ nya̍ kɛ̄ɛ̍ le̍ tūsi᷄ŋndo̍ o̍ dīōm nūu̍ bɛ̄ŋgu̍ mī lā kɛ̄ɛ̄ le̍ chāāŋāā nyāā I̍sɔ̄lūɛ̍i̍ya̍a̍ cho̍ nya̍ o̍ lābā o̍ chɛ̄le̍ŋ ni᷄ŋ nda̍ mālɔ̄ɔ̍ wo̍, I̍ cho̍ tōsā mī lā sɔ̄la̍ dɛ̍nɛ̍ pa̍lāā bɛ̄ndōo̍. I̍ cho̍ tōsā mī lā sɔ̄la̍ pīɔ̍mnda̍ŋ o̍ chɔ̄ūla̍ŋ ni̍ŋ, ndu̍yɛ̍ mī to̍sa̍ mī nāālā wɔ̄ɔ̍ŋndā bɛ̄ŋnda̍ŋ lā dīu̍ nya̍, a̍ yīmā bɛ̄ndūa̍ŋ. Nyɛ̄ ya̍ I̍ to̍sā ni̍ŋ a̍ nya̍ wo̍ lɛ̄ŋnde̍ kpo̍u̍ o̍ chi̍e̍ēŋndo̍ chōo̍ tē ā hu᷄ŋ tu̍e̍ī a̍ ndi̍ o̍kɔ̄ɔ̄ pɛ̍, sīōōŋīī bɛ̄ndūe̍i̍ chō nda̍ bīyɔ̄ɔ̄.

¹⁸Bōōndi̍i̍ nya̍ wa̍ kpe̍ma̍a̍ ho̍ō yīīyo̍ ya̍ Mɛ̍lɛ̄ka̍ o̍ hɔ̄l le̍, nāū nya̍ dīī mi̍ lā tɛ̄ndā ndu̍ tɛ̄ɛ̄ŋ mi̍ lā kɛ̄sī tɛ̄ndūlā ndɔ̄la̍ŋ vēllāa̍ vēllē wo̍, wānā o̍ wa᷅na̍ ke̍e̍ku̍ o̍ tɛ̄ndūlā nāū kōŋ tɛ̄ɛ̄ŋ le̍ kpe̍ma̍ ko̍ŋ yīīyo̍, mbo̍ kɛ̄ɛ̄ le̍ nyɛ̍ di̍mi̍ŋ o̍ kpe̍ma̍ ko̍ŋ ni᷄ŋ ndo̍ tōsāa̍, wānā ko̍ŋ bɛ̍ɛ̍ mɛ̄ɛ̍ i̍ yɔ̍nu̍ŋ a̍ nāū ko̍ŋ yɛ̍, le̍nde̍ i̍ yɔ̍nūŋ ni̍ŋ a̍ ndu̍ ni̍.

¹⁹Wāŋ bɛ̄ndūa̍a̍ Chu̍dā a̍ Chūlu̍sɛ̄lɛ̄m ni̍, wāŋ bɛ̄ndūa̍a̍ cha᷅l o̍ tōŋgo̍ kɔ̍ɔ̍sɔ̍ɔ̍ ni᷄ŋ nda̍ ni̍, wānāā sōlīāā lāsa̍lāa̍ ni̍, o̍ ko̍ŋ kɔ̍ɔ̍lī, a̍ wāŋnda̍ ā tūa̍a̍ kpo̍u̍, nda̍ kpo̍u̍ wānā o̍ wāna̍ ke̍e̍ku̍ o̍ tɛ̄ndūlā nāūwo̍ ho̍ō tɛ̄ɛ̄ŋ le̍ kpe̍ma̍a̍ ho̍ō yīīyo̍, le̍nde̍ i̍ yɔ̍nūŋ ni̍ŋ a̍ nda̍ ni̍.

²⁰I̍ cho̍ nda̍ hūnɔ̄ɔ̄ mālɔ̄ɔ̄ ya̍a̍mɔ̍ɔ̍wa̍a̍ ndāa̍ o̍ bā, a̍ cho̍ kīndīo̍o̍ kpe̍e̍kpe̍i̍ le̍ nda̍ dīūwo̍ wa̍ mā dīu̍ nda̍ kpo̍u̍. Yōūwa̍ a̍ vīsīāā yōndūa̍a̍ nda̍ di̍ā ni̍ŋ di̍a̍llūŋ nda̍ŋ ni̍.

²¹Ndu̍yɛ̍ Māsāa̍ Sɛ̄dīka̍yā ni̍, wānāā ndūāā bɛ̍ndūa̍a̍ ni̍, I̍ cho̍ nda̍ mālɔ̄ɔ̄ ya̍a̍mɔ̍ɔ̍wa̍a̍ ndāa̍ ye̍e̍ma̍ yēēmā bɛ̄ndōo̍ le̍ nda̍ dīūwo̍ wa̍ o̍ bā. Māsāa̍ Ba̍bi̍lɔ̄ŋ pūa̍a̍ ndūa̍a̍ chɔ̄ūwāa̍ hu̍ŋ chi᷅ŋa̍la᷅ŋ nya̍ ha̍ā, ma̍ mīīŋgu᷄ŋ nda̍, nda̍ o̍ bā ya̍ I̍ cho̍ Māsāa̍ Sɛ̄dīka̍yā nda̍ wānā ndūāā bɛ̍ndūa̍a̍ mālɔ̄ɔ̄ ni̍.

²²Ya̍ Mɛ̍lɛ̄ka̍ Ya̍a̍wɛ̄ɛ̄ cho̍ to̍sā mī pūa̍a̍ Ba̍bi̍lɔ̄ŋ a̍ hi᷅ŋ vɛ̄lɛ̄ mā hu᷄ŋ de̍l chi̍o̍o̍ ho̍ō chōo̍. Ā chō hūnɔ̄ɔ̄ chi̍o̍o̍ ho̍ō chīŋa̍la᷅ŋ a̍ sɔ̍ŋgɔ̍ɔ̍, ndu̍yɛ̍ mā bīī ndu̍, o̍ ko̍ŋ kɔ̍ɔ̍lī, mā ma᷄l ndu̍ o̍ yīŋ mbō ŋūɛ̄. Ndu̍yɛ̍ I̍ cho̍ tōsā mī chi̍o̍o̍ŋ Chu̍dā ŋ̍ pi̍ɔ̍l mī ŋ̄ sīmnu᷄ŋ pɔ᷅mnda̍ŋ nāa̍ wāna̍ chi̍e̍e̍ o̍ che᷅l te̍ wa̍.”