Read Southern Kisi Chɛ̄lūīma̍yā 35 Bible Online

Chɛ̄lūīma̍yā 35 - Southern Kisi bible

Chɛ̄lūīma̍yā 35

¹A̍ bōōndi̍i̍ Chɛ̄hōwa̍kīm, po̍ Chōōsa̍yā wo̍ ō wa̍ māsāa̍ Chu̍dā ve̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā nāa̍ ya̍ chu̍a̍, mbo̍ kē ya̍ yōōŋgōo̍. Mbo̍ dīmūl la̍ āā,

²“Chɛ̄lūīma̍yā, kɔ̍ o̍ chāāŋāā nyāā I̍sɔ̄lūɛ̍i̍ya̍ ā pīli̍a̍a̍ lo̍ nda̍ yɔ̍nūŋ māā yu̍ŋgu̍ Lu̍ɛ̍ka̍bī wo̍ ni̍, mā ve̍e̍lu̍ nda̍, mā kōma̍l nu̍m o̍ chīɛ̍i̍ cho̍ le̍ ya̍ Mɛ̍lɛ̄ka̍ Ya̍a̍wɛ̄ɛ̄ wo̍ wo̍, o̍ lu̍mūi̍la̍ cho̍ lā hōlāā a̍ kpāki̍ chīɛ̄ī kōŋ nda̍ŋ ō pīlɛ̍ ni̍ŋ. Tē a̍ ve̍e̍lu̍ nda̍ lo̍ŋ pɛ̍, a̍ fa̍nda̍ nda̍ mūɛ̄īya̍ŋ le̍ mā ko᷄l.”

³O̍ ko̍ŋ, mi̍ ma̍lnu᷄ŋ mi̍ ku̍ā nāa̍ yu̍ŋgu̍ Lu̍ɛ̍ka̍bī wo̍ chūā mɛ̄ɛ̍ nda̍ chō kpo̍u̍, Chāāsāna̍yā, po̍ Chɛ̄lūīma̍yā ndɔ̍ɔ̍ma̍ nī wo̍, ndu̍ yɔ̍nūŋ māā po̍ ma̍ma̍ Hābāsīna̍yā wo̍ ni̍, a̍ pūa̍a̍ ā pīli̍a̍a̍ kpo̍u̍ o̍ yu̍ŋgu̍ ko̍ŋ chōo̍, o̍ ko̍ŋ kɔ̍ɔ̍lī, a̍ pūa̍a̍ ndu̍ Cha̍a̍sa̍na̍yā wa̍.

⁴Mi̍ ve̍e̍lū nda̍ kpo̍u̍ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍. Mi̍ lu̍ɛ̍ī a̍ nda̍ o̍ lu̍mūi̍ pūa̍a̍ Ha̍nāŋ nda̍ ni᷄ŋ. Ha̍nāŋ ko̍ŋ yɛ̄ wāna̍ su̍a̍ā le̍ Mɛ̄lɛ̄ka̍ wo̍ o̍ wa̍ ni̍, fi̍nyā ndɔ̍ dīōla̍ŋ āā Īkīdāla̍yā. Wāŋ bɛ̄ndūa̍a̍ wa̍ o̍ chīɛ̍i̍ Mɛ̄lɛ̄ka̍a̍ wa̍, o̍ lu̍mūi̍ ndāa̍ īkɛ̄i̍ lu̍mūi̍yo̍ ho̍ō ō wa̍ ni̍, o̍ lu̍mūi̍ Māāsɛ̍yā wo̍ chōo̍. Māāsɛ̍yā ko̍ŋ, fi̍nyā ndɔ̍ wa̍ Si̍a̍lūm ni̍. Ndu̍yɛ̍ Māāsɛ̍yā ko̍ŋ, ndu̍ ndu̍ o̍o̍ ma̍ndā di̍o̍o̍ le̍ lūɛ̄īyɔ̄ɔ̍ o̍ fo̍ndā chīɛ̍i̍ Mɛ̄lɛ̄ka̍a̍ ni̍.

⁵O̍ ko̍ŋ kɔ̍ɔ̍lī, mi̍ chu̍ā kpɛ̍ɛ̍nɛ̍ŋ māmūɛ̄īyo̍ŋ, a̍ mūɛ̄īya̍ŋ lēni᷄ŋ ma̍ pi̍a̍ā cha̍, a̍ tāālāla̍ ko̍lāā māmūɛ̄īla̍ŋ mi̍ kɛ̍sī nda̍ lāchī. Mi̍ di̍mūl nda̍ a̍a̍, “Lā chē mūɛ̄īya̍ŋ mī lā ko᷄l.”

⁶Kɛ̍ ma̍ dīmūl la̍ āā, “Na̍a̍ ŋ̄ ko᷅l ma̍mu̍ɛ̍i̍ le̍. Chōna̍da̍bī fi̍nyāā nāā ma̍mā po̍ Lu̍ɛ̍ka̍bī wo̍, ndu̍ cho̍ŋgu̍ŋ fi̍nyāā nāa̍ sīndɛ̄ le̍nde̍ ni̍ mbo̍ dīmūl nda̍ āā, ‘Nya̍ ni̍, a̍ wānā o̍ wāna̍ cho̍ fūlā o̍ pūlālē nyāle̍ŋ chōo̍, le̍ fɛ̍ɛ̍ŋ a̍ fɛ̍ɛ̍ŋ lā ko᷅l māmūɛ̄ī le̍.

⁷O̍ ko̍ŋ kɔ̍ɔ̍lī, lā ta̍ŋgūl vɛ̄lɛ̄ lāchīɛ̄ī le̍ mālɔ̄ lēni᷄ŋ te̍, lā to̍sā wa̍li̍ kɛ̄lɛ̄ŋgāā mī lā nɔ̄ kpe̍le̍la̍ īyɔ̄m te̍. Le̍ fɛ̍ɛ̍ŋ a̍ fɛ̍ɛ̍ŋ, tɛ̍ndɛ̄i̍la̍ŋ la̍ŋ la̍ cho̍ chīɛ̄īlā nyāla̍ mālɔ̄la̍ŋ ni̍. Ko̍ŋ to̍sā ni̍, mī lā vīōū yōōmū ta̍u̍ ta̍u̍ o̍ lɛ̄ŋndē nya̍ chō le᷅ŋ ni᷄ŋ wānā cha᷅ko̍ āā mīālla̍ nya̍ chō ni̍ le̍ŋ.

⁸Ndu̍yɛ̍ nyɛ̄ o̍ nyɛ̄ Chōna̍da̍bī fi̍nyā nāā ma̍ma̍, po̍ Lu̍ɛ̍ka̍bī wo̍ ō dīmu̍l fi̍nyāā nāa̍ māā na̍a̍ ŋ̄ to̍sā le̍, ŋ̄ sōli̍ wɔ̍ ndu̍ dīōm te̍. Na̍a̍ pi̍la̍ ni̍, lāāndāā nāa̍ ni̍, pūa̍a̍ nāā wa᷅ŋ pīāāndūa̍a̍ ni̍, chūāā nāā wa᷅ŋ lāāndūa̍a̍ ni̍, ŋ̄ ko᷅l ma̍mu̍ɛ̍i̍ le̍,

⁹ŋ̄ tēŋgu̍l la̍chi̍ɛ̍i̍ le̍ mī ŋ̄ wa̍ lēni᷄ŋ te̍, ŋ̄ nɔ̍ kpe̍le̍la̍ īyɔ̄m te̍, ŋ̄ nɔ̍ ŋ̍chi̍ɛ̍ɛ̍ le̍, kɛ̄lɛ̄ŋgāā mī ŋ̄ nɔ̄ lātɔ̄lɔ̄ɔ̄.

¹⁰Kāni̍ bɛ̍ɛ̍, tɛ̍ndɛ̄i̍la̍ŋ, la̍ŋ la̍ cho̍ chīɛ̄īlā nāāla̍ŋ ni̍. Ndu̍yɛ̍ nyɛ̄ o̍ nyɛ̄ Chōna̍da̍bī fi̍nyā nāā ma̍mā o̍ di̍mu̍l fi̍nyāā nāa̍, ŋ̄ sōli̍ wɔ̍ ndu̍ dīōm te̍.

¹¹Kɛ̍ mɛ̄ɛ̍ Māsāa̍ Bɛ̍ndōo̍ Nābi̍u̍kānɛ̍ɛ̍sā ho̍ō Ba̍bi̍lɔ̄ŋ o̍ hu̍ŋ de᷅l lɛ̄ŋnde̍ŋ nde᷅ŋ chōo̍ a̍ sɔ̍ŋgɔ̍ɔ̍, mi̍ ŋ̄ kɛ̄ɛ̄sīāā le̍ mī ŋ̄ hīŋ Chūlu̍sɛ̄lɛ̄m na̍nu᷄ŋ mī ŋ̄ hu᷄ŋ cha᷅l na̍nu᷄ŋ, fo̍ndōle̍, sīōōŋnde̍ wa̍ nāa̍ le̍ pūa̍a̍ chɔ̄ūwa̍ Ba̍bi̍lɔ̄ŋ a̍ pūa̍a̍ chɔ̄ūwa̍ Si̍i̍līāā. Mɛ̄ɛ̍ nyɛ̄ ko̍ŋ to̍sa̍ ni̍, mi̍ ŋ̄ wā hāū i̍cha̍li̍ Chūlu̍sɛ̄lɛ̄m na̍nu᷄ŋ.’ ”

¹²O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl la̍ ya̍ Chɛ̄lūīma̍yā āā,

¹³“Ya̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nɔ̍ kpāāyāa̍ kpo̍u̍ wo̍, I̍sɔ̄lūɛ̍i̍ya̍ Mɛ̄lɛ̄ka̍ ndāa̍, nyɛ̄ ya̍ I̍ di̍mi̍ wo̍ cho̍ ho̍ō ni̍, kɔ̍ mā kɔ̍ di̍mūl wāŋnda̍ Chu̍dā, a̍ wāŋnda̍ Chūlu̍sɛ̄lɛ̄m chi̍e̍e̍ māā ya̍ Mɛ̍lɛ̄ka̍ dīmi̍ āā, ‘Wāŋnda̍ Chu̍dā, a̍ nya̍ wāŋnda̍ Chūlu̍sɛ̄lɛ̄m, vɛ᷅ lā chu̍ē si̍lāa̍ nūu̍ ndu̍yɛ̍ mī lā tūēī ya̍ Mɛ̄lɛ̄ka̍ Ya̍a̍wɛ̄ɛ̍ dīōm te̍?

¹⁴Chōna̍da̍bī, po̍ Lu̍ɛ̍ka̍bī wo̍, chōŋgɔ᷄ŋ o̍ cho̍ŋgu̍ŋ si̍ndɛ̄ chūāā ndūa̍a̍ a̍ lēpūlā kɛ᷅, māā fɛ̍ɛ̍ŋ a̍ fɛ̍ɛ̍ŋ bɛ̍ɛ̍ ā ko᷅l māmūɛ̄ī le̍ wo̍, wānāa̍ fu̍la̍ o̍ pūlāle̍ ndɔ̄le̍ŋ chōo̍ wa̍, ā chō wɔ̄ hāū o̍ dīōm tūɛ̄īyāā kōŋ bɛ̄ŋgu̍, fo̍ndōle̍, ā yēēma̍ mā sōli̍ fi̍nyā nda̍ ma̍ma̍ dīōm te̍. Kɛ̍ nya̍ wāŋnda̍ I̍sɔ̄lūɛ̄ī, le̍ te̍le̍ŋ o̍ te̍le̍ŋ I̍ cho̍ sūɛ̍i̍ nāa̍ nya̍ chūā mī chɔ᷅m nya̍ dīōmndā nīla̍ŋ, kɛ̍ lā chɛ᷄l mī lā tūēī ya̍ dīōm te̍.

¹⁵Mi̍ yɔ᷅ŋ bu̍ɛ̍i̍yāā nīa̍a̍ kpo̍u̍, nda̍ yɔ̍nūŋ māā wānāa̍ su̍a̍ā le̍ ya̍ wa̍ ni̍ le̍ mā hu᷄ŋ so̍ō nāa̍ nya̍ chūā, yɔ̄ŋndo̍ nda̍ le̍ te̍le̍ŋ o̍ te̍le̍ŋ a̍ yōōŋgūla̍ŋ le̍ nya̍. Ma̍ sīlā nya̍ māā nya̍ pɛ̄ŋgi̍ sɔ̍ɔ̍ŋ wɔ̍ɔ̍ŋndo̍ŋ tōsāa̍, ndu̍yɛ̍ mī lā māŋga̍la̍ ka̍a̍lā nyāla̍ŋ. O̍ ko̍ŋ kɔ̍ɔ̍lī, ma̍ dīmūl nya̍ māā nya̍ so̍o̍lūū nyɛ̄m chēle̍ŋndo̍ŋ, ndu̍yɛ̍ mī lā sāāŋgi̍a̍l mu̍ŋ māā mɛ̄lɛ̄ka̍a̍ nyā le̍, māā ko̍ŋ to̍sā ni̍, mī lā hīōū lāchī a̍ cha᷄lle̍ o̍ lɛ̄ŋnde̍ŋ nde᷅ŋ ni̍ŋ, lɛ̄ŋndē ya̍ I̍ ke̍ le̍ŋ fi̍nyāā nyāā ma̍māa̍ a̍ nya̍ le̍ŋ. Kɛ̍ lā tūi̍i̍ ya̍ dīōm te̍, kɛ̄lɛ̄ŋgāāle̍, mī lā to̍sa̍ nyɛ̄ ya̍ I̍ di̍mu̍l nya̍ wo̍.

¹⁶Chōna̍da̍bī, po̍ Lu̍ɛ̍ka̍bī wo̍, nyɛ̍ o̍ mɛ̍i̍ sīndɛ̄ pūa̍a̍ ndūa̍a̍ ō chōŋga᷄ŋ ndo̍, a̍ pāa̍le̍ hāūle̍ŋ nde᷅ŋ bɛ̍ɛ̍ wānāa̍ fu̍la̍ o̍ pūlālē lēŋ chōo̍ wa̍, ā chō wɔ̄ hīōūwɔ̄ɔ̍ o̍ dīōm tūɛ̄īyāā kōŋ bɛ̄ŋgu̍. Kɛ̍ nya̍ wāŋnda̍ I̍sɔ̄lūɛ̄ī lā chɛ᷄l mī lā tūsi̍ŋ o̍ dīōm nūu̍ bɛ̄ŋgu̍ lē.

¹⁷Le̍la̍ŋ ya̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nɔ̄ kpāāyāa̍ kpo̍u̍ wo̍, I̍sɔ̄lūɛ̍i̍ya̍ Mɛ̄lɛ̄ka̍ ndāa̍, nyɛ̄ ya̍ I̍ di̍mi̍ wo̍ cho̍ ho̍ō nī. Dɛ̍nɛ̍ pa̍lāā o̍ dɛ̍nɛ̍ pa̍lāā ya̍ I̍ kɔ̍ŋgɔ̍la̍ŋ le̍ nya̍ tūsīo̍o̍ chōo̍, nya̍ wāŋnda̍ Chu̍dā, a̍ nya̍ wānā o̍ wāna̍ cho̍ Chūlu̍sɛ̄lɛ̄m, I̍ cho̍ nya̍ ndu̍ tūsī chōo̍ kpo̍u̍, fo̍ndōle̍, le̍ mɛ̄ɛ̍ nya̍ kɛ̄ɛ̍ ya̍ dīōm yɛ̍. I̍ so̍ō nāa̍ nya̍ chūā, lā tūi̍i̍ ya̍ dīōm te̍, ndu̍yɛ̍ mi̍ ve̍e̍lū nya̍ le̍ mī lā mīīŋgu̍ ya̍ o̍ ībūŋ, kɛ̍ lā ye᷄ŋ ya̍ lānī le̍.’ ”

¹⁸O̍ ko̍ŋ kɔ̍ɔ̍lī, mi̍ ya̍ Chɛ̄lūīma̍yā di̍mūl wānāa̍ fu̍la̍ o̍ ku̍nda̍ Lu̍ɛ̍ka̍bī wo̍ chōo̍ wa̍ a̍a̍, “Nyɛ̄ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍, I̍sɔ̄lūɛ̍i̍ya̍ Mɛ̄lɛ̄ka̍ ndāa̍ dīmi̍ a̍ nya̍ o̍kɔ̄ɔ̄ wo̍ cho̍ ho̍ō ni̍. Ō dīmi̍ āā, ‘Le̍ mɛ̄ɛ̍ nya̍ tūsi̍ŋ o̍ dīo̍m Chōna̍da̍bī fi̍nyā nyā ma̍mā wo̍ bɛ̄ŋgu̍, mi̍ lā chūā sāwāla̍ o̍ do̍u̍ nya̍ la̍ŋ kpo̍u̍, ndu̍yɛ̍ nyɛ̄ o̍ nyɛ̄ o̍ di̍mu̍l nya̍ le̍ tōsāa̍ mi̍ lā tōsā ndu̍ yɛ̍,

¹⁹ya̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nɔ̍ kpāāyāa̍ kpo̍u̍ wo̍, I̍sɔ̄lūɛ̍i̍ya̍ Mɛ̄lɛ̄ka̍ ndāa̍, I̍ chu̍e̍l nya̍ būŋgɛ̄i̍, māā chɔ̍ŋ a̍ te̍le̍ŋndo̍ ho̍ō mbō kūɛ̄ a̍ lāchī kɛ᷅, pūa̍a̍ fu̍la̍ o̍ yu̍ŋgu̍ Chōna̍da̍bī wo̍ chōo̍ wa̍, nda̍ wa᷅ ni̍ŋ wa̍llo̍ le̍ ya̍ Mɛ̍lɛ̄ka̍ le̍ te̍le̍ŋ o̍ te̍le̍ŋ ni̍.’ ”