Read Southern Kisi Chɛ̄lūīma̍yā 36 Bible Online

Chɛ̄lūīma̍yā 36 - Southern Kisi bible

Chɛ̄lūīma̍yā 36

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā nāa̍ ya̍ chu̍a̍ mbo̍ kē ya̍ yōōŋgōo̍. Wɔ̄sī Chɛ̄hōwa̍kīm, po̍ Chōōsa̍yā wo̍ ō chīŋa̍ wɔ̄sīla̍ŋ lā hīɔ̍ɔ̍lu̍ o̍ lēmāsā Chu̍dā wo̍, o̍ wɔ̄sī kōŋ ni̍ŋ kpe̍e̍kpe̍i̍ ya̍ I̍ sɔ̍la̍ yōōŋgōo̍ ho̍ō ni̍. Mi̍ Mɛ̄lɛ̄ka̍ dīmūl la̍ āā,

²“Chu̍a̍ ya̍u̍wo̍ mā po̍o̍nyi̍a̍a̍ nyɛ̄ o̍ nyɛ̄ ya̍ Mɛ̍lɛ̄ka̍ dɔ̄ū nu̍m o̍ sōndō, ma̍ dīmī ndu̍ a̍ wāŋnda̍ I̍sɔ̄lūɛ̄ī o̍kɔ̄ɔ̄, ndu̍yɛ̍ a̍ wāŋnda̍ Chu̍dā o̍ ko̍ŋ kɔ̍ɔ̍lī, a̍ lɛ̄ŋnde̍ ī pīlɛ̍i̍ kpo̍u̍. Nyɛ̄ o̍ nyɛ̄ ya̍ I̍ di̍mu̍l nu̍m a̍ nda̍ o̍kɔ̄ɔ̄, chɔ̍ŋ a̍ bōōndi̍i̍ Chōōsa̍yā o̍ wa̍ wɔ̄ māsā ve̍, mbo̍ bīī a̍ pāa̍le̍ hāūle̍ŋ nde̍ŋ, po̍o̍nyi̍a̍a̍ ndu̍ kpo̍u̍ o̍ yāu̍ cho̍o̍.

³Tē wāŋnda̍ Chu̍dā a̍ tu̍e̍ī dɛ̍nɛ̍ pa̍lāā ya̍ Mɛ̍lɛ̄ka̍ kɛ̄ɛ̄sīa̍a̍ le̍ nda̍ tūsīo̍o̍ chōo̍ ki̍nɛ̍i̍yo̍ pɛ̍, mī ī yɔ̄nu̍ŋ dɔ̍ɔ̍ mī nda̍ kpo̍u̍ a̍ mu̍li̍ŋ, mā pɛ̄ŋgi̍ yɔ̄ŋndā wɔ̄ɔ̍ŋnda̍ŋ tōsāa̍. O̍ ko̍ŋ, mī ya̍ Mɛ̍lɛ̄ka̍ ma᷄l nda̍ le̍ dɛ̍nɛ̍ wɔ̍ɔ̍ŋ o̍ dɛ̍nɛ̍ wɔ̍ɔ̍ŋ a̍ yɔ̄ŋ wɔ̄ɔ̍ŋ o̍ yɔ̄ŋ wɔ̄ɔ̍ŋ nda̍ tōsa̍.”

⁴O̍ ko̍ŋ, mi̍ ve̍e̍lū Ba̍lu̍kī, po̍ Nɛ̄lu̍a̍yā wo̍, mi̍ di̍mūl ndu̍ le̍ mbō pōōnyi̍a̍l la̍, nyɛ̄ o̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ dɔ̍ū ya̍ o̍ sōndō mi̍ di̍mī. Ndu̍yɛ̍ nyɛ̄ o̍ nyɛ̄ Mɛ̄lɛ̄ka̍ dɔ̄ū ya̍ o̍ sōndō, mi̍ Ba̍lu̍kī po̍o̍nyīāā ndu̍ kpo̍u̍ o̍ yāu̍ chōo̍.

⁵O̍ ko̍ŋ kɔ̍ɔ̍lī, mi̍ di̍mūl Ba̍lu̍kī a̍a̍, “Ā kūūna̍ ya̍ māā ya̍ I̍ ku̍ā lɛ̄ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ le̍.

⁶Le̍la̍ŋ ā bīī pɛ̍, a̍ chu̍a̍ yāu̍wo̍ ho̍ō a̍ ku̍e̍l la̍ a̍ ndu̍ lo̍ŋ, o̍ pāa̍le̍ wāŋnda̍ kpo̍u̍ a̍ cho̍ chūūŋgi̍āŋ lo̍ŋ le̍ su᷅mndo̍ bīyɔ̄ɔ̍ le̍ŋ chōo̍. Tē ā kūɛ̄ a̍ ndu̍ pɛ̍, dīōmndā Mɛ̄lɛ̄ka̍ Ya̍a̍wɛ̄ɛ̄, o̍ dɔ̍ū ya̍ la᷅ŋ o̍ sōndō, mi̍ to̍mbōlāl nu̍m ma̍ pōōnyīāā la̍ŋ nda̍ŋ, a̍ kɔ̍ to̍mbōlāl wāŋnda̍ la̍ŋ chōo̍ cho̍o̍ kpo̍lo̍to̍to̍. Wānā o̍ wāna̍ cho̍ wā ō chūūŋgi̍āŋ ndo̍ŋ, lātūlu̍ a̍ wānāa̍ cho̍ fūlā o̍ chi̍o̍o̍ŋ yɛ̍ yɔ̍ŋ o̍ lɛ̄ŋndē Chu̍dāle̍ŋ ni᷄ŋ nda̍, to̍mbo̍la̍l nda̍ dīōmnda̍ŋ ndāŋ chōo̍ cho̍o̍, nda̍ kpo̍u̍ mā tūēī la̍ŋ.

⁷Mī ī yɔ̄nu̍ŋ dɔ̍ɔ̍, mī wāŋnda̍ ha̍ā ā tūēī dīōmnda̍ŋ ndāŋ, mā nyūna̍ Mɛ̄lɛ̄ka̍ Ya̍a̍wɛ̄ɛ̄ le̍ mbō ma᷄l nda̍ le̍ yɔ̄ŋndā ndāla̍ wɔ̍ɔ̍ŋnda̍ŋ ndu̍yɛ̍ mā ma᷄l yɔ̄ŋnda̍ wɔ̍ɔ̍ŋndā nda̍ chō tōsāa̍ la̍ŋ. Ka̍ni̍ fo̍ndōle̍, dɛ̍nɛ̍ pa̍lāā Mɛ̄lɛ̄ka̍ ō kɛ̄ɛ̄si̍a̍a̍ le̍ wāŋnda̍ ha̍ā tūsīo̍o̍ chōo̍ wo̍ ō chō bɔ̄ɔ̍. Ō tāmbu̍ kɔ̄l a̍ nda̍ ndu̍yɛ̍ mbo̍ dūāūnu̍ŋ tu̍mbe̍ a̍ nda̍ o̍ ka̍lā ka̍lā.”

⁸O̍ ko̍ŋ, mi̍ Ba̍lu̍kī ku̍ā o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍, mbo̍ kɔ̍ to̍mbōlāl wāŋnda̍ dīōmndā Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l la̍ māā ya̍ I̍ dɔ̍u̍ o̍ yāu̍ cho̍o̍ la̍ŋ kpo̍lo̍to̍to̍ mɛ̄ɛ̍ ya̍ I̍ di̍mu̍l ndu̍ yɛ̍.

⁹Wɔ̄sī Māsāa̍ Chɛ̄hōwa̍kīm po̍ Chōōsa̍yā wo̍ o̍ chi̍ŋa̍ wɔ̄sīla̍ŋ lā ŋūɛ̍ɛ̍nu̍ o̍ lēmāsā Chu̍dā wo̍, pāŋgi̍i̍ ŋɔ̍ma̍hīɔ̍ɔ̍lūe̍i̍ o̍ wɔ̄sī kōŋ ni᷄ŋ, o̍ pāŋgi̍i̍ ke̍ŋ ni᷄ŋ kpe̍e̍kpe̍i̍ wāŋnda̍ Chūlu̍sɛ̄lɛ̄m kpo̍u̍, a̍ wāŋnda̍ o̍ chi̍o̍o̍ŋ Chu̍dā a̍ chu̍u̍ŋgi̍āŋ kpo̍u̍ o̍ chīɛ̍i̍ Mɛ̄lɛ̄ka̍a̍ ni̍, le̍ mā bīī su᷅mndo̍ le̍ Mɛ̄lɛ̄ka̍ Ya̍a̍wɛ̄ɛ̄ o̍ ma̍la̍ nda̍.

¹⁰Mi̍ Ba̍lu̍kī ku̍ā o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ lo̍ŋ mbo̍ kɔ̍ to̍mbōlāl wāŋnda̍ nyɛ̄ o̍ nyɛ̄ Mɛ̄lɛ̄ka̍ dɔ̄ū ya̍ Chɛ̄lūīma̍yā o̍ sōndō, mbo̍ wā ō pōōnyīāā o̍ yāu̍wo̍ cho̍o̍. Ndu̍yɛ̍ wānā o̍ wāna̍ wa̍ lo̍ŋ, nda̍ kpo̍u̍ ma̍ tūɛ̄ī nyɛ̍ to̍mbo̍la̍ŋndo̍. Kɛ̄mālu̍i̍yā, po̍ Si̍a̍fāŋ ndo̍, o̍ wa̍ wānā po̍o̍nyi̍a̍a̍ o̍ tōŋgo̍ kɔ̍ɔ̍sɔ̍ɔ̍ ni᷄ŋ ndo̍, lu̍mūi̍ ndɔ̍ wa̍ o̍ fo̍ndā chīɛ̍i̍ Mɛ̄lɛ̄ka̍a̍ wo̍ o̍ lu̍mūi̍ ko̍ŋ ni̍ŋ Ba̍lu̍kī o̍ wa̍ ni̍, wāŋnda̍ kpo̍u̍ ā wa̍ nīla̍ŋ yāŋɔ̄ɔ̍ mbō tōmbōlāl nda̍ dīōmnda̍ wa̍ lā pōōnyīāā o̍ yāu̍wo̍ ho̍ō chōo̍ la̍ŋ. Ndu̍yɛ̍ lu̍mūi̍yo̍ ho̍ō, o̍ la̍ū chīɛ̍i̍ Mɛ̄lɛ̄ka̍ bā lūāŋndo̍, o̍ di̍o̍ nɔ̍ dīōla̍ŋ āā Dīō kpākī Sɛ̄nɛ̄īyo̍ wo̍ īkɛ̄i̍ o̍ wa̍ ni̍.

¹¹Mɛ̄ɛ̍ Māka̍yā, po̍ Kɛ̄mālu̍i̍yā wo̍, ndu̍ yɔ̍nūŋ māā po̍ ma̍ma̍ Si̍a̍fāŋ ndo̍ ni̍, ō tūēī dīōm o̍ dīōm Mɛ̄lɛ̄ka̍ Ya̍a̍wɛ̄ɛ̄ o̍ so̍ō mbo̍ wā o̍ yāu̍wo̍ chōo̍,

¹²mi̍ Māka̍yā ku̍ā o̍ fo̍ndā lēmāsāa̍, nāa̍ wāŋ bɛ̄ndūa̍a̍ Chu̍dā a̍ wa̍ ā chūūŋgi̍āŋ o̍ lu̍mūi̍ wāna̍ po̍o̍nyīāā o̍ tōŋgo̍ kɔ̍ɔ̍sɔ̍ɔ̍ wo̍ ni᷄ŋ nda̍. Ndu̍yɛ̍ wāŋ bɛ̄ndūa̍a̍ kpo̍u̍, Ɛ̄līsi̍a̍mā, wānā po̍o̍nyi̍a̍a̍ o̍ tōŋgo̍ kɔ̍ɔ̍sɔ̍ɔ̍ ni᷄ŋ ni̍, Dɛ̄la̍a̍yā, po᷄ Sīɛ̄ma̍yā wo̍ ni̍, Ɛ̄līna̍tāŋ, po̍ A̍ki̍bɔ̄ɔ̄ wo̍ ni̍, Kɛ̄mālu̍i̍yā po̍ Si̍a̍fāŋ ndo̍ ni̍, Sɛ̄dīka̍yā po̍ Hānāni̍yā wo̍ ni̍, a̍ wāŋ bɛ̄ndūa̍a̍ ā pīli̍a̍a̍ kpo̍u̍ ā wa̍ īchāli̍ lo̍ŋ o̍ bɔ̄ŋa᷅ŋndo̍ ni᷄ŋ.

¹³Mi̍ Māka̍yā o̍ do̍u̍nu᷄ŋ nda̍ ko̍na̍, nyɛ̄ o̍ nyɛ̄ o̍ tu̍e̍ī mi̍ Ba̍lu̍kī o̍ to̍mbōlāl nda̍.

¹⁴O̍ ko̍ŋ, mi̍ wāŋ bɛ̄ndūa̍a̍ ā vīām Chɛ̍hū, po̍ Nɛ̄tāna̍yā wo̍ le̍ mbō kɔ̍ ve̍e̍lū Ba̍lu̍kī le̍ mbo̍ hīŋ a̍ yāu̍ o̍ to̍mbo̍la̍l ko̍ŋ wa᷅ŋnda̍ nyɛ̄ o̍ nyɛ̄ wa̍ ō pōōnyīāā lēni᷄ŋ ndo̍, mbō hu᷄ŋ to̍fā ndu̍ nda̍ o̍ hɔ̄l. Ndu̍yɛ̍ Nɛ̄tāna̍yā, fi̍nyāa̍ Chɛ̍hū, fi̍nyā ndɔ̍ wa̍ Sīɛ̄lɛ̄ma̍yā ni̍. Sīɛ̄lɛ̄ma̍yā ko̍ŋ yɛ̄, fi̍nyā ndɔ̍ wa̍ Ku̍sī ni̍. O̍ ko̍ŋ, mi̍ Ba̍lu̍kī, po̍ Nɛ̄lu̍a̍yā wo̍, ō kūā a̍ yāu̍wo̍ ho̍ō nāa̍ wāŋ bɛ̄ndūa̍a̍ chūā.

¹⁵O̍ ko̍ŋ kɔ̍ɔ̍lī, ma̍ dīmūl Ba̍lu̍kī āā, “Cha̍l lɔ̍ mā to̍fa̍l na̍a̍ nyɛ̍ cho̍ o̍ yāu̍wo̍ ho̍ō ni᷄ŋ ndo̍ mī ŋ̄ tūēī.” Mi̍ Ba̍lu̍kī cha᷅l, mbo̍ tōfāl nda̍ nyɛ̄ o̍ nyɛ̍ wa̍ o̍ yāu̍wo̍ ni᷄ŋ.

¹⁶Mɛ̄ɛ̍ nda̍ chīi̍ dīōmnda̍ wa̍ lā pōōnyīāā o̍ yāu̍wo̍ ho̍ō ni᷄ŋ nda̍ŋ tūēīyɔ̄ɔ̄ kpo̍u̍, mi̍ sīōōŋnde̍ bīī nda̍, ma̍ nūāna᷅ŋ hɔ᷅lla̍ nya̍lākū nyālākū. Ma̍ dīmūl Ba̍lu̍kī āā, “Ŋ̄ chō lākɔ̄ mī ŋ̄ kɔ̍ do̍u̍nu᷄ŋ ma̍sā bɛ̍ndōo̍ sɔ̄ɔ̍ŋ mu᷅ŋ ko̍na̍.”

¹⁷Ma̍ nyūnā Ba̍lu̍kī āā, “Chɔ̍m ndɔ̍ na̍a̍, vɛ̄ɛ̍nɛ̍ ŋ̄ lōōku̍ yɛ̄ sɔ̄ɔ̍ŋ mu᷅ŋ kpo̍u̍ po̍o̍nyīāā? Bāā mbō wā Chɛ̄lūīma̍yā wa̍ nu̍m mu̍ŋ dīmūllo̍ ni̍, mā pōōnyīa̍a̍?”

¹⁸Mi̍ Ba̍lu̍kī chɛ᷅l āā, “E̍ī, Chɛ̄lūīma̍yā o̍ wa̍ ya̍ mu̍ŋ dīmūllo̍ ni̍, mī po̍o̍nyīāā mu̍ŋ o̍ yāu̍wo̍ ho̍ō chōo̍ a̍ kpɛ̄kīle̍ŋ.”

¹⁹Mi̍ wāŋ bɛ̄ndūa̍a̍ ā dīmūl Ba̍lu̍kī āā, “Nūm ni̍, Chɛ̄lūīma̍yā ni̍, lā kɔ̍ mī lā kɔ̍ vi̍o̍ŋnu᷄ŋ. Ndu̍yɛ̍ lā to̍sā mī wānā o̍ wānā si̍na̍ nāa̍ nya̍ chō a̍ vīāŋna᷄ŋ nda̍ le̍.”

²⁰O̍ ko̍ŋ kɔ̍ɔ̍lī, mi̍ wāŋ bɛ̄ndūa̍a̍ Chu̍dā a̍ chu̍ā yāu̍ nda̍ tōfa̍l nda̍ ho̍ō wo̍, ma̍ kɛ̄sī ndu̍ o̍ lu̍mūi̍ Ɛ̄līsi̍a̍mā wo̍ ni᷄ŋ, wāna̍ po̍o̍nyīāā o̍ tōŋgo̍ kɔ̍ɔ̍sɔ̍ɔ̍ ni᷄ŋ ndo̍. O̍ ko̍ŋ kɔ̍ɔ̍lī, ma̍ kūā nāa̍ māsāa̍ chūā, ma̍ kɔ̍ do̍u̍nu̍ŋ ndu̍ sūɛ̍i̍ he̍ī ko̍na̍ kpo̍u̍.

²¹O̍ ko̍ŋ, mi̍ māsāa̍ vīām Chɛ̍hu̍ū, le̍ mbō kūɛ̄ mbō kɔ̍ hu᷅ŋ a̍ yāu̍wo̍ ho̍ō. Mi̍ Chɛ̍hū ku̍ā mbo̍ kɔ̍ chu̍ā yāu̍wo̍ ho̍ō o̍ lu̍mūi̍ Ɛ̄līsi̍a̍mā ni᷄ŋ, wānā po̍o̍nyīa̍a̍ le̍ tōŋgo̍ kɔ̍ɔ̍sɔ̍ɔ̍, mbo̍ hūŋ a̍ ndu̍. Mɛ̄ɛ̍ o̍ hi᷅ŋ a̍ ndu̍, mbo̍ hu᷄ŋ to̍fā dīōmnda̍ wa̍ o̍ yāu̍ wo̍ ho̍ō ni᷄ŋ nda̍ŋ kpo̍lo̍to̍to̍ māsāa̍ lāchī, nda̍ wāŋ bɛ̄ndūa̍a̍ wa̍ īsīsi̍ ndu̍ ā bālāā wa̍.

²²Ndu̍yɛ̍ te̍le̍ŋ ko̍ŋ, te̍le̍ŋ īhūēīyo̍ ni̍. Māsāa̍ wa̍ īchāli̍ ha̍ŋgɔ̄ɔ̍ o̍ yīŋndē nda̍ dɔ̄ū o̍ hɛ̄ŋgɛ̍i̍ lēyīŋndo̍ ni᷄ŋ nde̍ŋ īkɛ̄i̍, o̍ fo̍ndā nda̍ tāŋgu̍l le̍ cha᷄lle̍ lo̍ŋ a̍ te̍le̍ŋ īhūēīyo̍ a̍ wɔ̄ɔ̄le̍ŋ ndo̍.

²³Mɛ̄ɛ̍ Chɛ̍hūdī o̍ ka̍ndu̍ dīōmnda̍ wa̍ o̍ yāu̍wo̍ ho̍ō ni᷄ŋ nda̍ŋ tōmbōlāa̍, tē Chɛ̍hu̍dī o̍ to̍mbo̍la̍ pɛ̍ di̍ōmndā wa̍ o̍ yāu̍wo̍ ho̍ō ni᷄ŋ nda̍ŋ, būŋga᷄ŋ ŋ̄gāa̍ ɔ̄ɔ̄ ŋ̄ hīɔ̍ɔ̍lu̍, māsāa̍ kīālū ya̍u̍wo̍ ho̍ō pɛ̄ŋgu̍ būŋgāŋ mu᷅ŋ chɛ̍ chɛ̍ a̍ mūɛ̄ī pɔ̄mbūɛ̍i̍, ō māl o̍ yīŋ. Ō lo̍ yāu̍wo̍ ho̍ō kīlī kīlīo̍o̍ le̍nde̍ a̍ būŋga᷄ŋ mbō māl o̍ yīŋ mbo̍ chīī ndu̍ lōmɔ̄ɔ̄ kpo̍u̍.

²⁴Māsā bɛ̍ndōo̍ pīla̍ ni̍, wānāā ndūa̍a̍ wa̍lla̍ ni̍, nda̍ kpo̍u̍, mɛ̄ɛ̍ nda̍ tūēī dīōmnda̍ŋ ndāŋ, sīōōŋīī bīi̍ nda̍ mā sɛ̄ɛ̄si̍a̍ŋ la̍nyɛ̍ lēkɔ̄ɔ̍ le̍ kɔ̄l tāmbɛ̍i̍ chɔ᷅m te̍.

²⁵Ndu̍yɛ̍ bōōndi̍i̍ māsāa̍ ō wa̍ yāu̍wo̍ ho̍ō lōmɔ̄ɔ̍ ve̍, Ɛ̄līna̍tāŋ ni̍, Dɛ̄la̍a̍yā ni̍, a̍ kɛ̄mālu̍i̍yā ma̍ nyɔ̄ɔ̄lū māsāa̍ māā o̍ lu̍ām yāu̍wo̍ ho̍ō le̍, kɛ̍ māsāa̍ ye̍ŋ nda̍ lānī le̍.

²⁶O̍ ko̍ŋ kɔ̍ɔ̍lī, mi̍ māsāa̍ vīām Chɛ̍lu̍a̍mɛ̄ɛ̄l po̍ ndɔ̍, a̍ Sɛ̄lu̍i̍yā, po̍ Āsi̍lūɛ̄ɛ̄ wo̍, a̍ Sīɛ̄lɛ̄ma̍yā, po̍ A̍bi̍dī wo̍, le̍ mā kɔ̍ bi̍ī ya̍ Chɛ̄lūīma̍yā, wāna̍ su̍a̍ā le̍ Mɛ̄lɛ̄ka̍ wo̍, a̍ Ba̍lu̍kī, wāna̍ nī po̍o̍nyīa̍a̍. Kɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ vi̍āŋ na̍a̍ kpi̍ŋ ā sēēlu̍ŋ na̍a̍ le̍.

²⁷Mɛ̄ɛ̍ Māsāa̍ Chɛ̄hōwa̍kīm o̍ lo᷅m yāu̍ Ba̍lu̍kī o̍ po̍o̍nyi̍a̍a̍ ko̍ŋ di̍ōmndā ya̍ I̍ di̍mu̍l ndu̍ la̍ŋ ndo̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā vɛ̄lɛ̄ nāa̍ ya̍ chu̍a̍ mbo̍ dīmūl la̍ āā,

²⁸“Chu̍a̍ ya̍u̍ che᷅le̍ŋ mā po̍o̍nyīāā vɛ̄lɛ̄ dīōm o̍ dīo̍m wa̍ ō pōōnyīāā o̍ yāu̍ tāso̍o̍ ni᷄ŋ, yāu̍ Māsāa̍ Chɛ̄hōwa̍kīm māsāa̍ le̍ Chu̍dā o̍ lo᷅m ko̍ŋ ndo̍.

²⁹O̍ ko̍ŋ kɔ̍ɔ̍lī, mā di̍mu̍l Chɛ̄hōwa̍kīm, māsāa̍ le̍ Chu̍dā māā ya̍ Mɛ̍lɛ̄ka̍ Ya̍a̍wɛ̄ɛ̄ di̍mi̍ āā, ‘Chɛ̄hōwa̍kīm, ā bīī ma̍ lūām yāu̍ Chɛ̄lūīma̍yā o̍ po̍o̍nyi̍a̍a̍ wo̍, ma̍ lō o̍ ko̍ŋ ma̍ nyūnā Chɛ̄lūēma̍ya̍ māā vɛ᷅ mbo̍ pōōnyi̍a̍a̍ māā māsāa̍ Ba̍bi̍lɔ̄ŋ o̍ cho̍ hūnɔ̄ɔ̄ lɛ̄ŋnde̍ŋ nde᷅ŋ tɛ̄ɛ̄mbūū, o̍ ko̍ŋ kɔ̍ɔ̍lī, mbō dīu̍ wānā o̍ wāna̍ cho̍ o̍ lɛ̄ŋnde̍ŋ nde᷅ŋ ni᷄ŋ a̍ vīsīa̍a̍ lātūlu̍ kpo̍u̍.

³⁰Kɛ̍ ndu̍yɛ̍, ya̍ŋ ndɔ̍ ni᷅la̍ŋ mā tūēī nyɛ̄ ya̍ Mɛ̍lɛ̄ka̍ Ya̍a̍wɛ̄ɛ̄ di̍mi̍ a̍ nūm Māsāa̍ Chɛ̄hōwa̍kīm o̍kɔ̄ɔ̄ wo̍. Wānā o̍ wānā o̍ sɔ̍lāŋ ni̍ŋ o̍ yu̍ŋgu̍ nu̍mndo̍ chōo̍ mbō mīīŋgu̍ māsāa̍ o̍ kpe̍ŋgbe̍i̍ lēmāsa̍ Dēēvi̍o̍o̍ chōo̍ le̍. Ndu̍yɛ̍ dīāllūŋ nūm vi̍lɛ̍i̍yo̍ŋ, ŋ̄ chō hūnɔ̄ɔ̄ wā ŋ̄ vīāūwāā lɛ̄ŋ, tē pāa̍le̍ŋ lē nīīlu̍ mu̍ŋ pɛ̍ lɔ̍ɔ̄ kpɛ᷅ŋ, mɔ᷄mndo̍ lɔ̄ɔ̄lu̍ chūchɔ̄ɔ̍ lēcho̍ō i̍chɔ᷅l.

³¹Nūm ni̍, wānāa̍ fu̍la̍ o̍ pūlālē nūmnde̍ŋ chōo̍ wa̍ ni̍, a̍ wānāā nūm a̍ wa̍lla̍, I̍ cho̍ nya̍ nyɛ̄ pālāā bɛ̄ndōo̍ tūsī chōo̍, fo̍ndōle̍, le̍ yɔ̄ŋndā wɔ̄ɔ̍ŋndā nya̍ tōsa̍ ki̍nɛ̍i̍ la̍ŋ. Nūm ni̍, wāŋnda̍ Chūlu̍sɛ̄lɛ̄m ni̍, a̍ wāŋnda̍ Chu̍dā kpo̍u̍, dɛ̍nɛ̍ pa̍lāā o̍ dɛ̍nɛ̍ pa̍lāā ya̍ I̍ kɛ̍ɛ̍si̍a̍a̍ le̍ nya̍ tūsīo̍o̍ chōo̍, I̍ cho̍ nya̍ ndu̍ tūsī chōo̍ kpo̍u̍. Kāni̍ fo̍ndōle̍ le̍ mɛ̄ɛ̍ nya̍ kɛ̄ɛ̍ le̍ ya̍ dīōmndo̍ tūēīyɔ̄ɔ̍ yɛ̍.’ ”

³²O̍ ko̍ŋ kɔ̍ɔ̍lī, mi̍ ya̍ Chɛ̄lūīma̍yā chu̍ā yāu̍ che᷅le̍ŋ, mi̍ ke᷅ Ba̍lu̍kī, wāna̍ nī po̍o̍nyi̍a̍a̍. Yōōŋgū o̍ yōōŋgu̍ wa̍ ō pōōnyīāā o̍ yāu̍ tāso̍o̍ ni᷄ŋ, ō Māsāa̍ Chɛ̄hōwa̍kīm, māsāa̍ le̍ Chu̍dā o̍ lo᷅m ndo̍, mi̍ Ba̍lu̍kī mi̍ŋgī yōōŋgūlā lāŋ vɛ̄lɛ̄ pōōnyīāā kpo̍u̍ o̍ yāu̍wo̍ ho̍ō ni᷄ŋ. Mbo̍ pōōnyīāā nyɛ̄ o̍ nyɛ̄ ya̍ I̍ wa̍ ndu̍ dīmūllo̍. Ndu̍yɛ̍ ō fūla̍ o̍ yōōŋgūlā lāŋ kɔ̄ɔ̄lī, mi̍ yōōŋgūlā wāā le̍nde̍ la̍ che᷅le̍ŋ, lā ka̍ka̍ la̍ ha̍ndu᷄ŋ vɛ̍lɛ̄ lēcho̍ō.