Read Southern Kisi Chɛ̄lūīma̍yā 37 Bible Online

Chɛ̄lūīma̍yā 37 - Southern Kisi bible

Chɛ̄lūīma̍yā 37

¹Mɛ̄ɛ̍ Nābi̍u̍kānɛ̍ɛ̍sā, māsā bɛ̍ndōo̍ le̍ Ba̍bi̍lɔ̄ŋ o̍ bi̍ī lɛ̄ŋndē Chu̍dāle̍ŋ, mbo̍ hɛ̄lī, Sɛ̄dīka̍yā, po̍ Chōōsa̍yā wo̍, mbo̍ sīīŋgūū ndu̍ māsāa̍ le̍ Chu̍dā o̍ fōōfo̍ Chɛ̄hōwa̍chīŋ, po̍ Chɛ̄hōwa̍kīm ndo̍ chōo̍.

²Kɛ̍ Māsāa̍ Sɛ̄dīka̍yā ni̍, wānāa̍ wa̍ ndu̍ wa̍llo̍ o̍ bā bɛ̄ŋgu̍ wa̍ ni̍, wāŋnda̍ Chu̍dā ni̍, ā ye᷄ŋ ni᷅la̍ŋ o̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ dɔ̍ū ya̍ Chɛ̄lūīma̍yā, wāna̍ su̍a̍ā le̍ Mɛ̄lɛ̄ka̍ wo̍ o̍ sōndō mi̍ di̍mūl nda̍ wo̍ le̍.

³Ō wa̍ a̍ te̍le̍ŋ pi᷅lɛ̍, mi̍ Māsāa̍ Sɛ̄dīka̍yā o̍ vi̍ām Chɛ̄hu̍kāl po̍ Sīɛ̄lɛ̄ma̍yā wo̍ nda̍ Sɛ̄fāna̍yā, wāna̍ so̍lī sa̍lāa̍ o̍ Mɛ̄lɛ̄ka̍ lo̍ wo̍ ndu̍ yɔ̍nūŋ māā po̍ Māāsɛ̍yā wo̍ ni̍ nāa̍ ya̍ Chɛ̄lūīma̍yā, wāna̍ su̍a̍ā le̍ Mɛ̄lɛ̄ka̍ wo̍ chūā, le̍ mī nyu̍na̍ Mɛ̄lɛ̄ka̍ Ya̍a̍wɛ̄ɛ̍, Mɛ̄lɛ̄ka̍ nāa̍ dīōm a̍ lɛ̄ŋndē nāāle̍ŋ o̍kɔ̄ɔ̄.

⁴Ndu̍yɛ̍ a̍ te̍le̍ŋ ko̍ŋ, nda̍ a̍a̍ do̍u̍ wɔ̍ ya̍ chīɛ̄ī ni̍ŋ te̍, I̍ wa̍ŋnu̍ŋ ndɔ̍ kēla᷄ŋndo̍ wāŋnda̍ tɛ̄ɛ̄ŋ, o̍ bā nūu̍ chōo̍.

⁵A̍ te̍le̍ŋ ko̍ŋ pūa̍a̍ chɔ̄ūwa̍ Ba̍bi̍lɔ̄ŋ nda̍ a̍a̍ hi᷅ŋ le̍ Chūlu̍sɛ̄lɛ̄m dēlɔ̄ɔ̍ chōo̍ ni̍, ma̍ dūāū ndu̍ o̍ pi̍ŋndo̍ ni᷄ŋ kpɔ̍kɔ̍su̍. Kɛ̍ mɛ̄ɛ̍ pūa̍a̍ chɔ̄ūwa̍ Ba̍bi̍lɔ̄ŋ a̍ tu̍e̍ī māā māsāa̍ I̍chi̍pī o̍ chu̍ā pūa̍a̍ ndūa̍a̍ chɔ̄ūwa̍ ma̍ māl I̍chi̍pī ma̍ tāŋ o̍ lɛ̄ŋndē Chu̍dāle̍ŋ ni᷄ŋ, ma̍ māl Chūlu̍sɛ̄lɛ̄m ma̍ mīīŋgu᷄ŋ o̍ lɛ̄ŋndē ndāle̍ŋ ni᷄ŋ.

⁶Mɛ̄ɛ̍ Māsā Bɛ̍ndōo̍ Sɛ̄dīka̍yā o̍ ve᷅mm ya̍ māā ya̍ I̍ nyu̍na̍l ndu̍ Mɛ̄lɛ̄ka̍ dīo̍m, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā nāa̍ ya̍ Chɛ̄lūīma̍yā, wāna̍ su̍a̍ā le̍ Mɛ̄lɛ̄ka̍ wo̍ chūā. Mbo̍ dīmūl la̍ āā,

⁷“Ya̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍, nyɛ̄ ya̍ I̍ di̍mi̍ wo̍ cho̍ ho̍ō ni̍. Di̍mu̍l Ma̍sāa̍ Sɛ̄dīka̍yā, o̍ ve᷅mm nu̍m le̍ ya̍ dīōmndo̍ nyūnāa̍ wo̍ māā ya̍ Mɛ̍lɛ̄ka̍ dīmi̍ āā, ‘Sɛ̄dīka̍yā, māsāa̍ I̍chi̍pī nda̍ pūa̍a̍ ndūa̍a̍ chɔ̄ūwa̍ ā chō hūnɔ̄ɔ̍ le̍ nya̍ mālāa̍ sɔ̍ŋgɔ̄ɔ̍ a̍ ya̍a̍mɔ̍ɔ̍wa̍a̍ nyāa̍. Kɛ̍ ā chō mīīŋgɔ᷄ŋ o̍ lɛ̄ŋndē ndāle̍ŋ ni᷄ŋ.

⁸O̍ ko̍ŋ kɔ̍ɔ̍lī, pūa̍a̍ chɔ̄ūwa̍ Ba̍bi̍lɔ̄ŋ a̍ cho̍ vɛ̄lɛ̄ mīīŋgū na̍nu᷄ŋ, mā hu᷄ŋ de᷅l chi̍o̍o̍ ho̍ō chōo̍ a̍ sɔ̍ŋgɔ̍ɔ̍. Ndu̍yɛ̍ ā chō ndu̍ bīyɔ̄ɔ̄ mā lōm ndu̍ chi̍li̍kɔ̍.

⁹Nyɛ̄ ya̍ Mɛ̍lɛ̄ka̍ Ya̍a̍wɛ̄ɛ̄ di̍mi̍ wo̍ cho̍ ho̍ō ni̍. Lā hu̍ī nya̍ pi̍la̍ mī lā yīya̍ŋ māā pūa̍a̍ Ba̍bi̍lɔ̄ŋ a̍ cho̍ lɛ̍ mīīŋgū na̍nu᷄ŋ te̍ le̍. Pūa̍a̍ Ba̍bi̍lɔ̄ŋ a̍ cho̍ vɛ̄lɛ̄ hūnɔ̄ɔ̄ mā hu᷄ŋ chi᷅ŋa̍la᷅ŋ nya̍ a̍ sɔ̍ŋgɔ̍ɔ̍.

¹⁰Ā yɔ᷄ŋ bɛ̍ɛ̍ mī lā yēm pūa̍a̍ chɔ̄ūwa̍ Ba̍bi̍lɔ̄ŋ kpo̍u̍, a̍ cho̍ nya̍ ha̍ā sāā a̍ sɔ̍ŋgɔ̍ɔ̍ wa̍, ā tūa̍a̍ cho̍ lō yōōmū mā mīīŋgu̍ o̍ tɛ̍ndɛ̄i̍la̍ ndāla̍ŋ ni̍ŋ mā kɔ̍ hi̍nī ā bōōlu̍ɛ̍i̍ya̍ wa̍, nda̍ cho̍ hūnɔ̄ɔ̄ chi̍o̍o̍ ho̍ō lōmɔ̄ɔ̄ ni̍, mbō ŋūɛ̄ chi̍li̍kɔ̍.’ ”

¹¹O̍ ko̍ŋ kɔ̍ɔ̍lī, mi̍ pūa̍a̍ chɔ̄ūwa̍ Ba̍bi̍lɔ̄ŋ a̍ ma᷅l Chūlu̍sɛ̄lɛ̄m ma̍ mīīŋgū o̍ lɛ̄ŋndē ndāle̍ŋ ni᷄ŋ. Kāni̍ fo̍ndōle̍, ma̍ tūɛ̄ī māā pūa̍a̍ chɔ̄ūwa̍ I̍chi̍pī a̍ cho̍ hūnɔ̄ɔ̍ le̍ wāŋnda̍ Chūlu̍sɛ̄lɛ̄m mālāa̍ a̍ sɔ̍ŋgɔ̍ɔ̍.

¹²O̍ ko̍ŋ, mi̍ ya̍ Chɛ̄lūīma̍yā ma̍lnu᷄ŋ mi̍ bi̍ī kɔ̄la̍ŋ o̍ būŋgɛ̄ī Bɛ̍ŋnja̍mīŋnde̍ ni̍ŋ, chɔ̄nɔ᷄ŋndo̍ Chūlu̍sɛ̄lɛ̄m, le̍ mī kɔ̍ sɔ̍lā nyɛ̄m na̍ŋ yu̍ŋgo̍ŋ ŋ̍ nu̍ŋ.

¹³Kɛ̍ mɛ̄ɛ̍ ya̍ I̍ fu̍u̍lu̍u̍ o̍ dīō kpākīo̍o̍ Bɛ̍ŋnja̍mīŋ, mi̍ ko̍māl bōllē so̍vɛ̄i̍ya̍a̍ ma̍ndā di̍ō kōŋ nda̍ dīōla̍ŋ āā A̍lu̍i̍chā, po̍ Sīɛ̄lɛ̄ma̍yā wo̍, Hānāni̍yā po̍ ndɔ̄ ma̍māa̍. O̍ ko̍ŋ, mi̍ A̍lu̍sī o̍ si̍mī ya̍. Mi̍ A̍lu̍sī o̍ bi̍ī ya̍. Mbo̍ dīmūl la̍ āā, “A̍ ye̍e̍ma̍ mā hīōūnu᷄ŋ ku̍mbū pūa̍a̍ Ba̍bi̍lɔ̄ŋ.”

¹⁴Mi̍ di̍mūl ndu̍ āā, “Ō cho̍ le̍nde̍ le̍ fāllo̍, I̍ cho̍ la̍kɔ̍ kūmbū ndā le̍.” Kɛ̍ A̍lu̍sī o̍ ye̍ŋ ya̍ lānī le̍. Mbo̍ bīī ya̍ mbo̍ kūā a̍ nāa̍ wāŋ bɛ̄ndūa̍a̍ chūā.

¹⁵O̍ ko̍ŋ, mi̍ wāŋ bɛ̄ndūa̍a̍ ā dūāūnu᷄ŋ tu̍mbe̍ a̍ ya̍ ndu̍yɛ̍ ma̍ lūāā ya̍, o̍ ko̍ŋ kɔ̍ɔ̍lī, ma̍ kɔ̍ dɔ̍ū ya̍ o̍ chīɛ̄ī mānyūmndo̍ ni᷄ŋ o̍ Chōna̍ta᷅ŋndo̍ chi̍ɛ̍ī ni̍ŋ, o̍ wa̍ wānā po̍o̍nyīa̍a̍ wo̍. Ndu̍yɛ̍ chīɛ̍i̍ Chōna̍ta᷅ŋ ko̍ŋ, ndu̍ nda̍ a̍a̍ si̍i̍ŋgu̍u̍ ni᷅ŋ chīɛ̄ī mānyūmndo̍ ni̍.

¹⁶Fo̍ndā nda̍ bɛ̄ɛ̄ndi̍a̍a̍ lɛ̄ŋ māā so̍o̍ŋ le̍ wāŋnda̍ dɔ̄wɔ̄ɔ̍ lo̍ŋ ndo̍, o̍ fo̍ndā kōŋ nda̍ dɔ̄ū ya̍ ni̍. Le̍ te̍le̍ŋ vi̍lɛ̄ī I̍ wa̍ o̍ bīyɔ̄ɔ̍ ho̍ō ni᷄ŋ lo̍ŋ.

¹⁷Mɛ̄ɛ̍ te̍le̍ŋ ti̍ŋ o̍ hīo̍u̍, mi̍ Māsāa̍ Sɛ̄dīka̍yā o̍ yɔ᷅ŋ le̍ ya̍, ma̍ sōlī ya̍ ma̍ kūā a̍ ya̍ o̍ fo̍ndā lēmāsāa̍, māsāa̍ lāchī. Mi̍ Māsāa̍ Sɛ̄dīka̍yā o̍ ve̍e̍lū ya̍ na̍a̍ ŋi̍ɔ̍ɔ̍ŋ kpe̍e̍le̍ mbo̍ nyūnā ya̍ āā, “Vɛ̄ɛ̄, Mɛ̄lɛ̄ka̍ Ya̍a̍wɛ̄ɛ̄ o̍ ke̍ nu̍m yōōŋgū o̍ yōōŋgū le̍ ya̍?” Mi̍ mu̍lūl ndu̍ a̍a̍, “E̍ī, Mɛ̄lɛ̄ka̍ ke̍ ya̍ yōōŋgōo̍ le̍ nūm? Ō dīmi̍ māā ā chō hūnɔ̄ɔ̄ wā ō yɔ̄ŋga᷄ŋ nāa̍ Māsāa̍ Ba̍bi̍lɔ̄ŋ chu̍a̍.”

¹⁸O̍ ko̍ŋ kɔ̍ɔ̍lī, mi̍ nyu̍nā Māsāa̍ Sɛ̄dīka̍yā a̍a̍, “Sūɛ̍i̍ yɛ̄ɛ̍nɛ̍ kpe̍e̍kpe̍i̍ ya̍ I̍ tɛ̍ɛ̍mbūū yɛ̄ a̍ nūm, kɛ̄lɛ̄ŋgāāle̍ a̍ wāŋ bɛ̄ndūa̍a̍ cho̍ nu̍m wa̍llo̍ o̍ bā bɛ̄ŋgu̍ wa̍, ɔ̄ɔ̄ a̍ wāŋnda̍ ā pīli̍a̍a̍, mi̍ lā dūāū ya̍ o̍ chīɛ̄ī mānyūmndo̍ ho̍ō ni᷄ŋ?

¹⁹Wānāā nūm a̍ su̍a̍ā le̍ Mɛ̄lɛ̄ka̍, ma̍ dīmūl nu̍m māā māsāa̍ Ba̍bi̍lɔ̄ŋ o̍ cho̍ nu̍m chīŋa̍la᷅ŋ a̍ sɔ̍ŋgɔ̄ le̍, kɛ̄lɛ̄ŋgāāle̍, mbō chīŋa̍la᷅ŋ lɛ᷅ŋnde̍ŋ nde᷅ŋ a̍ sɔ̍ŋgɔ̄ɔ̍ wa̍, kūɛ̄ɛ̄ nda̍ chō yɛ̄ ni᷅ŋ hāū?

²⁰Kɛ̍ ndu̍yɛ̍ yāndi̍i̍ māsānɔ̍ nūu̍, māsā bɛ̍ndōo̍, I̍ ye̍e̍ma̍ mā to̍sa̍l la̍ nyɛ̄ ya̍ I̍ cho̍ nu̍m dīmūl lo̍. Yāndi̍i̍, mi̍ŋgī lɛ̄ ya̍ o̍ Chōna̍ta᷅ŋ ndo̍ chi̍ɛ̍ī ni̍ŋ, o̍ chīɛ̄ī mānyūm kōŋ ni᷄ŋ te̍. Tē a̍ mi̍ŋgi̍ ya̍ lo̍ŋ pɛ̍, I̍ cho̍ wu̍.”

²¹O̍ ko̍ŋ, mi̍ Māsāa̍ Sɛ̄dīka̍yā o̍ to̍sā ma̍ dūāū ya̍ ni᷅ŋ chīɛ̄ī ni̍ŋ o̍ la̍u̍ ba̍lu̍ fo̍ndā lēmāsāa̍ wo̍. Lo̍ŋ ya̍ I̍ wa̍ ni᷅ŋ o̍ bīyɔ̄ɔ̍ ni᷄ŋ ni̍. Ndu̍yɛ̍ lēpāa̍ o̍ lēpāa̍, bēe̍dīi̍yo̍ kpūŋgbɛ̄i̍ ī pīlɛ̍ nda̍ a̍a̍ ke᷅ ya̍ ni̍, bēe̍dīi̍ wānāā tōōsīāā bēe̍dīi̍ya̍ nda̍ a̍a̍ pi̍sī o̍ nɛ̄īyo̍. Ndu̍ nda̍ lo̍ ya̍ kīo̍o̍ ni̍ ha̍a̍a̍, mɛ̄ɛ̍ mi̍ nyɛ̄ dīa̍a̍ ō chūū Chūlu̍sɛ̄lɛ̄m kpo̍u̍, ma̍ pɛ̄ŋgī ya̍ ndu̍ kīo̍o̍.