Read Southern Kisi Chɛ̄lūīma̍yā 38 Bible Online

Chɛ̄lūīma̍yā 38 - Southern Kisi bible

Chɛ̄lūīma̍yā 38

¹O̍ ko̍ŋ kɔ̍ɔ̍lī, mi̍ ka̍ndū wāŋnda̍ yōōŋgū Mɛ̄lɛ̄ka̍ ke̍ ya̍ le̍ nda̍ wo̍ dīmūl lo̍. Sīɛ̄fāta̍yā, po̍ Ma̍tāŋ ndo̍ ni̍, a̍ Kɛ̄dāla̍yā po̍ Pa̍si̍ɔ̍ɔ̄ wo̍, a̍ Chɛ̄hu̍kāl, po̍ Sīɛ̄lɛ̄ma̍yā wo̍, a̍ Pa̍si̍ɔ̍ɔ̄, po̍ Mālīki̍yā wo̍, ma̍ tūēī mi̍ wa᷅ wāŋnda̍ ha̍ā yōōŋgōo̍ ho̍ō dīmūllo̍. I̍ wa̍ wāŋnda̍ kpo̍u̍ di̍mūl lo̍ a̍a̍,

²“Mɛ̄lɛ̄ka̍ Ya̍a̍wɛ̄ɛ̄ di̍mi̍ māā wānā o̍ wāna̍ lo̍ o̍ chi̍o̍o̍ ho̍ō ni᷄ŋ pɛ̍, tē a̍ vi̍ o̍ chɔ̄ūwo̍ ni᷄ŋ te̍, yīa̍a̍ŋ ma̍ cho̍ nu̍m dīyɔ̄ɔ̄ ni̍, tē yīa̍a̍ŋ mā dīi̍ nu̍m te̍, nāa̍ cho̍ nu̍m dīyɔ̄ɔ̄ ni̍. Kɛ̍ ō dīmi̍ māā, wānā o̍ wāna̍ fu̍la̍ pɛ̍ mā kɔ̍ yɔ̍ŋgu̍ŋ o̍ pūa̍a̍ chɔ̄ūwa̍ Ba̍bi̍lɔ̄ŋ ndo̍, ā cho̍ nu̍m dīyɔ̄ɔ̄ le̍. Wānā ko̍ŋ, yōōmū nūmndo̍ chō chīndā, a̍ sɔ̍lā pi̍ɔ̍m te̍.

³Kāni̍ fo̍ndōle̍, Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, ‘Chi̍o̍o̍ ho̍ō ō chō hūnɔ̄ɔ̄ wā ō yɔ̄ŋga᷄ŋ o̍ pūa̍a̍ chɔ̄ūwāa̍ māsāa̍ Ba̍bi̍lɔ̄ŋ nda̍ lo̍ mā bīī ndu̍.’ ”

⁴Mɛ̄ɛ̍ wāŋ bɛ̄ndūa̍a̍ ha̍ā ā tūēī mi̍ wa᷅ wāŋnda̍ ha̍ā yōōŋgōo̍ ho̍ō dīmūllo̍, ma̍ kɔ̍ di̍mūl māsā bɛ̍ndōo̍ āā, “Pōo̍ ho̍ō mɛ̄ɛ̍ mī ŋ̄ to̍sa᷅ŋ mbō sɔ̄la̍ pīɔ̍mndo̍. Tē ō cho̍ ko̍ŋ te̍, ō chō tōsā mī dīāllo̍ŋ vī so̍vɛ̄i̍ya̍a̍ tu̍a̍a̍ lo̍ ha̍ā o̍ chi̍o̍o̍ ho̍ō ni᷄ŋ nda̍, ndu̍yɛ̍ a̍ wānā o̍ wāna̍ cho̍ o̍ chi̍o̍o̍ ho̍ō ni᷄ŋ a̍ dīōmndā o̍ cho̍ la᷅ŋ dīmīo̍o̍ la̍ŋ. Ō cho̍ ma̍lā le̍ pōo̍ ho̍ō ō chō wāŋnda̍ le̍, dɛ̍nɛ̍ pa̍lāa̍ o̍ ye̍e̍ma̍ nda̍ tūsīo̍o̍ chōo̍ ni̍.”

⁵Mɛ̄ɛ̍ nda̍ dīmu̍l Māsāa̍ Sɛ̄dīka̍ya̍ le̍nde̍, mbo̍ dīmūl nda̍ āā, “Bālā tīɔ̍ɔ̍ŋ, ō chō nya̍ o̍ bā. Māsāa̍ ya̍ I̍ cho̍ ni̍, nyɛ̄ o̍ nyɛ̄ nya̍ kpo̍u̍ dīmi̍ pɛ̍, I̍ fe̍ŋāŋ nya̍ kɔ̄ɔ̄lī le̍.”

⁶O̍ ko̍ŋ, ma̍ bīī ya̍, ma̍ tūsī ya̍ o̍ so̍o̍ŋ māmɛ̄ŋ vēlɛ̍i̍yo̍ ni᷄ŋ a̍ yōōle̍ŋ, Mālīki̍yā, māsāa̍ po̍ ndɔ̄ɔ̍ so̍o̍ŋ ndɔ̍ māmɛ̄ŋndo̍. La̍u̍ wa̍ fo̍ndā lēmāsāa̍ ō bālāā wo̍, o̍ lāū kōŋ so̍o̍ŋ māmɛ̄ŋndo̍ ho̍ō ō wa̍ ni̍. So̍o̍ŋndo̍ ho̍ō ō wa̍ ō vēlɛ̍i̍, kɛ̍, lōōlīo̍o̍ ō wa̍ lēni᷄ŋ. Ma̍ tūsī ya̍, mi̍ tu̍āl o̍ lōōlī ko̍ŋ ni᷄ŋ.

⁷O̍ ko̍ŋ, mi̍ Ɛ̄bɛ̄dīmɛ̍lɛ̍kī po̍ I̍to̍o̍pīāānɔ̄ɔ̍, wānāa̍ to̍sā wa̍llo̍ o̍ māsāa̍ lo̍ chi̍ɛ̍ī ni̍ŋ nda̍ ō pīlɛ̍, mbo̍ tūɛ̄ī māā ā dɔ̄ū ya̍ o̍ so̍o̍ŋ māmɛ̄ŋ vēlɛ̍i̍yo̍ ni᷄ŋ. Māsāa̍ Sɛ̄dīka̍yā o̍ wa̍ īchāli̍ sɔ̍ɔ̍ŋ dīmīo̍o̍ o̍ Dīō sāāsāa̍ Bɛ̍ŋnja̍mīŋ.

⁸Mi̍ Ɛ̄bɛ̄dīmɛ̍lɛ̍kī, o̍ ma᷅l nāa̍ o̍ wa̍ o̍ māsāa̍ lo̍ chi̍ɛ̍ī ni̍ŋ nda̍, mbo̍ kūā nāa̍ māsāa̍ chūā. Mbo̍ kɔ̍ di̍mūl māsāa̍ āā,

⁹“Māsānɔ̄ɔ̍, sɔ̄ɔ̍ŋ pūa̍a̍ ha̍ā ā chō tōsāa̍ a̍ Chɛ̄lūīma̍yā, wāna̍ su̍a̍ā le̍ Mɛ̄lɛ̄ka̍ wo̍ wo̍ŋ, ŋ̄ wɔ̄u̍ ŋ̄ bɔ̄ɔ̍. I̍ tu̍e̍ī māā ā bīī ndu̍ ma̍ kɔ̍ dɔ̍ū ndu̍ o̍ so̍o̍ŋ māmɛ̄ŋ vēlɛ̍i̍yo̍ ni̍ŋ. Tē ō lo̍ o̍ so̍o̍ŋ ko̍ŋ ni᷄ŋ pɛ̍, a̍ yīmā bɛ̄ndūma̍ de̍l ma᷅ŋ o̍ chi̍o̍o̍ ho̍ō ni᷄ŋ, nyɛ̄ dīa̍a̍ bɛ̍ɛ̍ wānā se̍e̍lūŋ te̍ wa̍ŋ, ō chō wu̍ a̍ yīa̍a̍ŋ.”

¹⁰Mi̍ māsāa̍ lō o̍ ko̍ŋ mbo̍ dīmūl Ɛ̄bɛ̄dīmɛ̍lɛ̍kī I̍to̍o̍pīāānɔ̄ āā, “Hɛ̍li̍ pu̍a̍a̍ ŋ̄wāŋ be̍le̍-ya̍a̍ mī lā kɔ̍ so̍lī Chɛ̄lūīma̍yā wāna̍ su̍a̍ā le̍ Mɛ̄lɛ̄ka̍ wo̍ o̍ so̍o̍ŋ ko̍ŋ ni̍ŋ, yɔ̄ŋi̍ o̍ lo̍ lo̍ŋ mbō vī.”

¹¹O̍ ko̍ŋ, mi̍ Ɛ̄bɛ̄dīmɛ̍lɛ̍kī o̍ chu̍ā pūa̍a̍ ŋ̄wāŋ be̍le̍-ya̍a̍, o̍ ko̍ŋ kɔ̍ɔ̍lī, mbo̍ kūā o̍ fo̍ndā nda̍ kɛ̄sī nyɔ̍ɔ̍ŋ o̍ fo̍ndā lēmāsāa̍ wo̍, mbo̍ chɔ̄ɔ̄vīāā nyɛ̄lā yūūlu̍la̍ wa̍ lo̍ŋ nda̍ŋ, ma̍ kūā o̍ so̍o̍ŋ nda̍ dɔ̄ū ya̍ ni᷄ŋ ndo̍. O̍ ko̍ŋ, ma̍ bāā nyɛ̄lā yūūlu̍la̍ la̍ŋ o̍ yōōle̍ŋ, ma̍ tūsī o̍ so̍o̍ŋ ya̍ I̍ wa̍ ni᷄ŋ ndo̍, a̍ yōōle̍ŋ lātūlu̍.

¹²Mi̍ Ɛ̄bɛ̄dīmɛ̍lɛ̍kī I̍to̍o̍pīāānɔ̄ o̍ di̍mūl la̍ āā, “Ha̍ndu̍ŋ yu̍u̍lu̍la̍ŋ ndāŋ o̍ wɔ̄ɔ̄ŋnda̍ŋ bɛ̄ŋgu̍, mā ka̍fa̍la̍ŋ yo̍ōle̍ŋ lēcho̍ō yɔ̄ŋi̍ yōōle̍ŋ lē bōōlu̍u̍ nu̍m.” Mi̍ to̍sā mɛ̄ɛ̍ nda̍ dīmu̍l la̍ yɛ̍.

¹³Ō ko̍ŋ, ma̍ hēēlū ya̍ a̍ yōōlē lēŋ, ma̍ sōlī ya̍ o̍ so̍o̍ŋ māmɛ̄ŋ vēlɛ̍i̍ ko̍ŋ ni᷄ŋ. Mɛ̄ɛ̍ nda̍ sōli̍ ya̍, ma̍ dīmūl la̍ le̍ mī wa̍ o̍ la̍ūwo̍ lo̍ŋ.

¹⁴O̍ ko̍ŋ kɔ̍ɔ̍lī, mi̍ Māsāa̍ Sɛ̄dīka̍yā o̍ vi̍ām wāŋnda̍ ma̍ kɔ᷅ hu᷅ŋ a̍ ya̍ Chɛ̄lūīma̍yā, ya̍ wāna̍ su̍a̍ā le̍ Mɛ̄lɛ̄ka̍ wo̍, o̍ Dīō sāāsā yāa̍ ndɔ̄ɔ̍ le̍ lūɛ̄īyɔ̄ɔ̍ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍. Mɛ̄ɛ̍ ya̍ I̍ ku̍ɛ̄, mi̍ māsāa̍ ō dīmūl la̍ āā, “I̍ ye̍e̍ma̍ mī nyu̍na̍ nu̍m īsɔ̄ɔ̍ Chɛ̄lūīma̍yā. Ndu̍yɛ̍ vi᷅ŋ ya̍ nyɛ̄ o̍ nyɛ̄ le̍, di̍mu̍l la̍ tōnya̍a̍ kpe̍nde̍ke̍le̍.”

¹⁵Mi̍ di̍mūl ndu̍ a̍a̍, “Tē I̍ di̍mu̍l nu̍m tōnya̍a̍ pɛ̍, ā chō ya̍ dīyɔ̄ɔ̄. Ā yɔ᷄ŋ bɛ̍ɛ̍ mī si̍la̍ nu̍m mī chɔ̍m nu̍m nyɛ̄ ŋ̄ tōsa̍ wo̍, a̍ ye᷅ŋ ya̍ ni̍ŋ la̍ni̍ le̍.”

¹⁶Kɛ̍ mi̍ Māsāa̍ Sɛ̄dīka̍yā o̍ chu̍e̍l la̍ būŋgɛ̄i̍ na̍a̍ ŋi̍ɔ̍ɔ̍ŋ kpe̍ ndu̍yɛ̍ mbo̍ mēnāla᷄ŋ ya̍ āā, “I̍ me̍na̍ŋ o̍ Mɛ̄lɛ̄ka̍ Ya̍a̍wɛ̄ɛ̄ po̍, Mɛ̄lɛ̄ka̍ cho̍ yōōmū le̍ fɛ̍ɛ̍ŋ ndo̍, Mɛ̄lɛ̄ka̍ ke̍ na̍a̍ yōōmōo̍ wo̍, I̍ cho̍ nu̍m dīyɔ̄ɔ̄ le̍, ndu̍yɛ̍ I̍ me᷅l nu̍m vɛ̄lɛ̄ wānāa̍ cho̍ kīndīo̍o̍ le̍ nu̍m dīyɔ̄ɔ̍ wa̍ o̍ bā le̍.”

¹⁷Mɛ̄ɛ̍ o̍ chu̍e̍l la̍ būŋgɛ̄i̍ le̍nde̍, mi̍ di̍mu̍l ndu̍ Sɛ̄dīka̍yā a̍a̍, “Nyɛ̄ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍, I̍sɔ̄lūɛ̍i̍ya̍ Mɛ̄lɛ̄ka̍ ndāa̍ ō dīmi̍ wo̍ cho̍ ho̍ō ni̍. Ō dīmi̍ āā, ‘Tē a̍ chɛ̍l pɛ̍, mā yɔ̍ŋgu̍ŋ nu᷅m pi̍la̍ o̍ pūa̍a̍ māsāa̍ Ba̍bi̍lɔ̄ŋ ndo̍, yōōmū nūmndo̍ chō chīndā, ndu̍yɛ̍ chi̍o̍o̍ ho̍ō bɛ̍ɛ̍ ā lu᷅m ndu̍ le̍. Nūm ni̍, yu̍ŋgu̍ nu̍mndo̍ ni̍, ā cho̍ nya̍ dīyɔ̄ɔ̄ le̍.

¹⁸Kɛ̍ tē a̍ chɛ̍l mā yɔ̍ŋgu̍ŋ o̍ nda̍ lo̍ le̍, I̍ cho̍ chi̍o̍o̍ ho̍ō mālɔ̄ɔ̍ pūa̍a̍ Ba̍bi̍lɔ̄ŋ o̍ bā mā lōm ndu̍. Ndu̍yɛ̍ o̍ ko̍ŋ kɔ̍ɔ̍lī, nūm pi̍la̍ bɛ̍ɛ̍ a̍ nɔ̍lā ni̍ŋ mā hɛ̄lu᷄ŋ te̍.’ ”

¹⁹Kɛ̍ mi̍ Māsāa̍ Sɛ̄dīka̍yā o̍ di̍mūl la̍ āā, “Sīōōŋnde̍ chō ya̍ le̍ chāāŋāā nāā Chu̍ūwa̍, a̍ hi̍o̍u̍nu᷄ŋ pūa̍a̍ Ba̍bi̍lɔ̄ŋ kɔ̄ɔ̄lī wa̍. Tē I̍ yɔ̍ŋgu̍ŋ o̍ pūa̍a̍ Ba̍bi̍lɔ̄ŋ ndo̍ pɛ̍, pūa̍a̍ Ba̍bi̍lɔ̄ŋ a̍ cho̍ ya̍ mālɔ̄ɔ̄ chāāŋāā nāā Chu̍ūwa̍ o̍ bā, mā lūe̍i̍ ya̍ mɔ̍nɛ̍i̍.”

²⁰Mi̍ di̍mūl Māsāa̍ Sɛ̄dīka̍yā a̍a̍, “Ā me᷅l nu̍m nda̍ o̍ bā le̍. Yāndi̍i̍ I̍ nyɔ̍ɔ̍lu̍ nu̍m, to̍sa̍ tu̍ŋ nyɛ᷅ Mɛ̄lɛ̄ka̍ Ya̍a̍wɛ̄ɛ̄ o̍ dɔ̍ū ya̍ o̍ sōndō mi̍ di̍mūl nu̍m ndo̍. Tē a̍ to̍sa̍ le̍nde̍ pɛ̍, nyɛ̄ o̍ nyɛ̄ chō wā ō kɛ̄ndɛ̄ a̍ nūm, ndu̍yɛ̍ mī yōōmū nūmndo̍ ō chīndā.

²¹Kɛ̍ tē a̍ kɛ̍ɛ̍ le̍ yɔ̄ŋgɔ᷄ŋndo̍ pɛ̍, nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ chɔ̍m ya̍ o̍ yi̍lāŋndo̍ ni᷄ŋ a̍ nūm o̍kɔ̄ɔ̄ wo̍ cho̍ ho̍ō ni̍.

²²Wāŋ lāāndūa̍a̍ lo̍ o̍ chīɛ̄ī lēmāsa̍ Māsāa̍ Chu̍dā wo̍ ni̍ŋ nda̍ ki̍nɛ̍i̍, mi̍ cha᷅ ma̍ kūā a̍ nda̍ kpo̍u̍ nāa̍ wa᷅ŋ bɛ̄ndūa̍a̍ Māsāa̍ Ba̍bi̍lɔ̄ŋ nda̍ chūā. Ā chō kɔ̄la̍ŋ a̍ dīmīo̍o̍ āā, ‘Chāāŋāā nūm a̍ nūm o̍o̍ la̍a̍la̍ŋ nda̍ ā hūi̍ nu̍m, ndu̍yɛ̍ ma̍ tīū nu̍m bā. Mɛ̄ɛ̍ nda̍ chē māā pēlo̍ŋ ŋ̄ sɔ̄ɔ̄ŋa̍ nu̍m o̍ lōōlīo̍o̍ ni᷄ŋ ma̍ hāū, ma̍ māl nu̍m kpo̍u̍’ ”

²³Mi̍ hi̍a̍ū lāchī a̍ sūɛ̍i̍ nāa̍ ndu̍ chu̍a̍, mi̍ di̍mūl ndu̍ a̍a̍, “Lāāndāā nūmnda̍ kpo̍u̍ a̍ chūāā nūmnda̍, ā chō nda̍ sōlī mā kūɛ̄ a̍ nda̍ o̍ pūa̍a̍ Ba̍bi̍lɔ̄ŋ ndo̍. Ndu̍yɛ̍ nūm pi̍la̍ bɛ̍ɛ̍ a̍ nɔ̍lā ni̍ŋ mā hɛ̄lu᷄ŋ pu̍a̍a̍ Ba̍bi̍lɔ̄ŋ te̍. Māsāa̍ Ba̍bi̍lɔ̄ŋ o̍ cho̍ nu̍m bīyɔ̄ɔ̄, mbō kūɛ̄ a̍ nūm o̍ chɛ̄le̍ŋ ni᷄ŋ ndu̍yɛ̍ o̍ ko̍ŋ kɔ̍ɔ̍lī, chi̍o̍o̍ ho̍ō bɛ̍ɛ̍ mā ma᷄l ndu̍ o̍ yīŋ mbō ŋūɛ̄.”

²⁴Mɛ̄ɛ̍ ya̍ I̍ chi̍i̍ Māsāa̍ Sɛ̄dīka̍ya̍ dīōmnda̍ŋ ndāŋ dīmu̍l mbo̍ dīmūl la̍ āā, “Nyɛ̄ o̍ nyɛ̄ na̍a̍ ŋ̄ sūūki̍āŋ na̍nu᷄ŋ, di̍mūl wānā o̍ wānā a̍ ndu̍ o̍kɔ̄ɔ̄ le̍. Ko̍ŋ to̍sā ni̍, a̍ sɔ̍lā pi̍ɔ̍mndo̍ le̍.”

²⁵Tē wāŋ bɛ̄ndūa̍a̍ ā tūēī pɛ̍ māā I̍ ve̍e̍lu̍ nu̍m mi̍ ŋ̄ sūūki̍āŋ na̍a̍ nūm, ā chō hūnɔ̄ɔ̄ nāa̍ nūm chu̍a̍ mā dīmu̍l nu̍m āā,, “Chɔ̍m na̍a̍ nyɛ̄ nya̍ sūūki̍āŋ nya̍ māsāa̍ wo̍. Vi᷅ŋ na̍a̍ nyɛ̄ o̍ nyɛ̄ le̍, ŋ̄ cho̍ nu̍m dīyɔ̄ɔ̄ le̍.”

²⁶Tē ā dīmu̍l nu̍m le̍nde̍ pɛ̍, a̍ di̍mu̍l nda̍ āā, “Nyɔ̄ɔ̄lōo̍ ya̍ I̍ wa̍ māsāa̍ ni̍ māā ō mi̍ŋgī lɛ̄ ya̍ o̍ Chōna̍ta᷅ŋndo̍ chi̍ɛ̍ī ni̍ŋ o̍ chīɛ̄ī mānyūmndo̍ ni᷄ŋ te̍, yɔ̄ŋi̍ ya̍ I̍ lo̍ lo̍ŋ mī vi᷅.”

²⁷Ndu̍yɛ̍ mɛ̄ɛ̍ māsāa̍ ō dīmī yɛ̍, le̍nde̍ ko̍ i̍ yɔ̍nu̍ŋ ni̍. Wāŋ bɛ̄ndūa̍a̍ kpo̍u̍ ma̍ cha᷄ŋ ma̍ hūŋ nāa̍ ya̍ chu̍a̍ ma̍ hu᷄ŋ nyu̍nā ya̍. Ndu̍yɛ̍ nyɛ̄ māsāa̍ ō dīmu̍l la̍ māā ya̍ I̍ di̍mu̍l nda̍ wo̍, ndu̍ ko̍ni̍ ya̍ I̍ di̍mu̍l nda̍ ni̍. O̍ ko̍ŋ, nda̍ bɛ̍ɛ̍ ā sūu̍ lɛ̍ nyɛ̄ o̍ nyɛ̄ chēle̍ŋ nāa̍ ya̍ chu̍a̍ le̍, fo̍ndōle̍, nyɛ̄ o̍ nyɛ̄ na̍a̍ ŋ̄ sūūki̍āŋ na̍a̍ māsāa̍ wānā o̍ wānā tu̍i̍i̍ a̍ ndu̍ o̍kɔ̄ɔ̄ le̍.

²⁸Ndu̍yɛ̍ o̍ la̍u̍ ba̍lu̍ ko̍ŋ fo̍ndā lēmāsāa̍ wo̍ ya̍ I̍ lo̍ ni᷅ŋ o̍ bīyɔ̄ɔ̍ ni᷄ŋ ni̍ ha̍a̍a̍ mbo̍ lō ko̍ŋ mi̍ ya̍a̍mɔ̍ɔ̍wa̍ ā bīī Chūlu̍sɛ̄lɛ̄m.