Read Southern Kisi Chɛ̄lūīma̍yā 4 Bible Online

Chɛ̄lūīma̍yā 4 - Southern Kisi bible

Chɛ̄lūīma̍yā 4

¹Mi̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍a̍ū lāchī a̍ sūɛ̍i̍ mbo̍ dīmī āā, “Wāŋnda̍ I̍sɔ̄lūɛ̄ī, tē lā wa̍ mīīŋgū ya̍ o̍ ībūŋ pɛ̍, mɛ̄ɛ̍ lā mīīŋgu̍ ya̍ o̍ ībūŋ. Tē lā yēēma̍ pɛ̍ le̍ ke̍ŋ to̍sāa̍, mɛ̄ɛ̍ nyɛ̄ o̍ nyɛ̄ nya̍ sōōlūū māā mɛ̄lɛ̄ka̍a̍ nyā, nyɛ̄m ya̍ Mɛ̍lɛ̄ka̍ tu᷄l mu᷅ŋ yɛ̄le̍ŋ tūl bɛ̄ndōo̍ wo̍ŋ, mɛ̄ɛ̍ lā fāŋa̍ mu̍ŋ o̍ hɔ̄l, ndu̍yɛ̍ mī lā wa̍ sa̍kpō ya̍ Mɛ̍lɛ̄ka̍ o̍ hɔ̄l.

²Tē lā chūa̍ ībūŋgā o̍ ībūŋgā o̍ dīōlā nīla̍ŋ ni᷄ŋ pɛ̍, lā wa̍ sa̍kpō, ndu̍yɛ̍ mī lā sāndu̍, o̍ ko̍ŋ kɔ̍ɔ̍lī, mī lā lo̍ o̍ būŋgɛ̄ī kēŋ chōo̍. Tē lā tōsa̍ ko̍ŋ pɛ̍, lɛ̄ŋnde̍ o̍ chi̍e̍ēŋndo̍ ni᷄ŋ, ī nyūnā ya̍ ni̍ŋ le̍ mī dɔ̍ū ndi̍ sa̍lā mɛ̄ɛ̍ ya̍ I̍ dɔ̍ū nya̍ sa̍lā yɛ̍. Ko̍ŋ to̍sā ni̍ mī lɛ̄ŋīī kēŋ ī sāŋga̍la̍ ya̍.”

³O̍ ko̍ŋ kɔ̍ɔ̍lī, nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l wāŋnda̍ Chu̍dā a̍ wāŋnda̍ Chūlu̍sɛ̄lɛ̄m chi̍e̍e̍ wo̍ cho̍ ho̍ō ni̍. Ō dīmi̍ āā, “Nya̍ wāŋnda̍ Chu̍dā a̍ nya̍ wāŋnda̍ Chūlu̍sɛ̄lɛ̄m chi̍e̍e̍, lā bɛ̄ɛ̄ndi̍a̍a̍ kɔ᷅ltā nyāla̍ ka̍lā ka̍lālā bɛ̄ŋnda̍ŋ mɛ̄ɛ̍ nda̍ wāā nu̍a̍ā lɛ̄ŋndē kālā ka̍lā le̍ bɛ̄ŋnde̍ŋ le̍ tɔ̄lɔ̄ɔ̄la̍ŋ yɛ̍. Kɔ̄ltā nyāla̍ŋ lā wa᷅ lā kālā mɛ̄ɛ̍ wāŋndo̍ ō tūāl nu̍a̍ā yɛ̄yi̍i̍ kɛ̍ndɛ̄i̍ o̍ yɔ̄ɔ̍ŋ tɛ̄ɛ̄ŋ yɛ̍ le̍.

⁴Lā dīndi̍ nya̍ pi̍la̍ ya̍ Mɛ̍lɛ̄ka̍ Ya̍a̍wɛ̄ɛ̄ o̍ hɔ̄l. Lā bɛ̄ɛ̄ndi̍a̍a̍ kɔ̍ltā nyāla̍ŋ mī lā mūli̍ŋ nāa̍ ya̍ chu̍a̍, nya̍ wāŋnda̍ Chu̍dā a̍ nya̍ wāŋnda̍ Chūlu̍sɛ̄lɛ̄m chi̍e̍e̍. Tē ō cho̍ ko̍ŋ te̍, ya̍ Mɛ̍lɛ̍ka̍ chō tu̍mbe̍ dɔ̍ɔ̍nɔ᷄ŋ a̍ nya̍ o̍ ka̍lā ka̍lā mī tu̍si̍ nya̍ nyɛ̄ pālāā bɛ̄ndōo̍ chōo̍, mɛ̄ɛ̍ yīŋndē bɛ̄ndūle̍ŋ lē sāndū nu̍a̍ā wānā nɔ̍lā le̍ŋ nyūmī le̍ yɛ̍. Kāni̍ fo̍ndōle̍ le̍ yɔ̄ŋndā wɔ̄ɔ̍ŋndā nyā tōsa̍ la̍ŋ.”

⁵Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl la̍ āā, “Yo̍ndā Chūlu̍sɛ̄lɛ̄m chi̍e̍e̍ a̍ o̍ lɛ̄ŋndē Chu̍dāle̍ŋ ni᷄ŋ kpo̍u̍. Di̍mu̍l nda̍ māā a̍ bālu̍ a̍ bu̍lu̍ chɔ̄ūwo̍ hɔ̄ŋndo̍ o̍ lɛ̄ŋnde̍ŋ ni᷄ŋ kpo̍u̍. Māā ā bālu̍ a̍ wāŋnda̍ dīmūllo̍ chōo̍ cho̍o̍ kpe̍le̍ŋ āā, ‘Wāŋnda̍ lā ŋ̄ hu᷄ŋ ŋ̄ nyāānu̍ŋ, ya̍a̍mɔ̍ɔ̍wa̍ hīŋ. Lā ŋ̄ kɔ̄ŋnu᷅ŋ o̍ chi̍e̍e̍ŋ cho̍ ŋ̄ bālāā a̍ kpākīla̍ ka̍lā ka̍lālā bɛ̄ŋnda̍ŋ ndo̍ ni᷄ŋ.’

⁶Lā dīmu̍l wa᷅ŋnda̍ mā nyāānu̍ŋ mā kūɛ̄ Sa̍a̍yɔ̄ŋ chi̍e̍e̍ le̍ yōōmūlā ndāla̍ŋ chīīndīa̍a̍. Lā kēle̍ŋa̍ ma̍lɔ̄ɔ̄ chɔ̍ chɔ̍, lā to̍sā lāta̍ma̍la̍ le̍, fo̍ndōle̍ kpūndɛ̍ bɛ̄ndū ya̍ Mɛ̍lɛ̄ka̍ Ya̍a̍wɛ̄ɛ̄ di̍mi̍ le̍ nya̍ tūsīo̍o̍ chōo̍ chɔ̄nɔ᷄ŋndo̍ bā lūāŋndo̍ wo̍ ō hīŋ. Ya̍a̍mɔ̍ɔ̍wa̍a̍ cho̍ nya̍ hūnɔ̄ɔ̄ tɛ̄ɛ̄mbūū kpo̍u̍ wa̍ ā hīŋ.

⁷Ya̍a̍mɔ̍ɔ̍wa̍ ba̍lū lɛ᷅ŋnde̍ dēlɔ̄ɔ̍ chɔ̄ɔ̍ mā tɛ̄ɛ̄mbūū ndi̍ wa̍ ā bɛ̄ɛ̄ndi̍a̍ŋ le̍ nya̍ hūnɔ̄ɔ̍ dēlɔ̄ɔ̍ chōo̍. Mɛ̄ɛ̍ kpɔ̍kūŋndo̍ ō fūlā nu̍a̍ā fa̍ŋ o̍ bɛ̄mɛ̍lta̍ ndɔ̄la̍ŋ le̍ hūnɔ̄ɔ̍ vīsīo̍o̍ dēlɔ̄ɔ̍ chōo̍ yɛ̍, le̍nde̍ nda̍ dēl ni̍ŋ nya̍ chōo̍ ni̍. Ā chō hūnɔ̄ɔ̄ lɛ̄ŋndē Chu̍dāle̍ŋ dēlɔ̄ɔ̄ chōo̍ mā tɛ̄ɛ̄mbu̍u̍ le̍ŋ kpo̍u̍. Chi̍e̍e̍ŋ nya᷄ŋ kpo̍u̍ ā chō mu̍ŋ hūnɔ̄ɔ̄ pēsī mī ŋ̄ mīīŋgu̍ pɔ̄mnda̍ŋ, wānā o̍ wānā lo᷅ ni̍ŋ lo̍ŋ te̍.

⁸Le̍la̍ŋ lā wōūnu̍ŋ pɔ̍ɔ̍ nyɛ̄lā lābɛ̍kīla̍ŋ le̍ kɔ̄ltā nyāla̍ ta̍mbɛ̍i̍la̍ŋ chɔ̄mndo̍. Lā cha᷄ŋ mī lā kōŋu̍l chōo̍ cho̍o̍ kpe̍le̍ŋ, fo̍ndōle̍ tu̍mbe̍ bɛ̍ndū Mɛ̄lɛ̄ka̍ Ya̍a̍wɛ̄ɛ̄ o̍ dɔ̍u̍nu᷄ŋ a̍ nya̍ wāŋnda̍ Chu̍dā wo̍, ō pɔ̍lūl kɔ᷅l te̍.”

⁹Mi̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍a̍ū lāchī a̍ sūɛ̍i̍, mbo̍ dīmī āā, “Tē te̍le̍ŋ ko̍ŋ ō fūūlu̍u̍ pɛ̍, māsāā bɛ̍ndūa̍a̍ a̍ lāŋgba̍ā ndāā ka᷅lla̍ kpo̍u̍, kɔ̄lta̍ŋ lā chō nda̍ hūnɔ̄ɔ̄ lāāsīa̍ŋ ā si̍nā ni̍ŋ nyɛ᷅ nda̍ yɔ̄ŋ ndo̍ le̍. Wānāa̍ so̍lī sa̍lāa̍ o̍ ya̍ Mɛ̍lɛ̄ka̍ lo̍ wa̍, sīōōŋīī bɛ̄ndūe̍i̍ ī chō nda̍ hūnɔ̄ɔ̄ bīyɔ̄ɔ̄ a̍ nyɛ̍ yɔ̍nūŋ ni̍ŋ ndo̍. Wānāa̍ su̍a̍ā le̍ ya̍ wa̍ kpo̍u̍, kpɛ̍īyo̍ chō nda̍ hūnɔ̄ɔ̄ bīyɔ̄ɔ̄ ā nɔ̍lā ni̍ŋ mā sōō ba̍kō le̍.”

¹⁰Mi̍ lo᷅ o̍ ko̍ŋ mi̍ di̍mūl Mɛ̄lɛ̄ka̍ a̍a̍, “O̍o̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ tē ī hu᷄ŋ yɔ̄nu᷄ŋ le̍nde̍ pɛ̍, mɛ̄ɛ̍ a̍ hu̍i̍ wāŋnda̍ Chu̍dā a̍ wāŋnda̍ Chūlu̍sɛ̄lɛ̄m chi̍e̍e̍ fɔ̍. Kāni̍ fu̍u̍le̍ a̍ chu̍e̍l nda̍ būŋgɛ̄i̍ māā ā chō nda̍ kɔ̄l nyūlōo̍ kē kɛ̍ mā dīmī vɛ̍lɛ̄ māā ya̍a̍mɔ̍ɔ̍wa̍ chō nda̍ hūnɔ̄ɔ̄ dēlɔ̄ɔ̄ chōo̍.”

¹¹“Tē te̍le̍ŋ dɛ̍nɛ̍ pa̍lāā kōŋ ō fūūlu̍u̍ pɛ̍, Mɛ̄lɛ̄ka̍ Ya̍a̍wɛ̄ɛ̄ o̍ cho̍ wāŋnda̍ Chu̍dā a̍ wāŋnda̍ Chūlu̍sɛ̄lɛ̄m chi̍e̍e̍ di̍mūl māā, hūēīyīī tūū bɛ̄ndūe̍i̍ ī chɛ᷄ŋ ba᷅ lɛ̄ŋndē po̍lte̍ŋ mi̍ ī kōmāl wānāā nīa̍a̍ a̍ kpāāyā bɛ̍ndōo̍. Kɛ̍ hūēīye̍ he̍ī ndi̍ ndi̍ cho̍ yɛ̍, ī cho̍ māā hūēīyīī yɔ̄ŋɛ̄i̍ he̍ī, i̍ hɔ᷅ŋ he̍ī mī ī kūɛ̄nu᷄ŋ a̍ tɛ̄fɛ̍la̍ŋ yɛ̍ le̍.

¹²“Hūēīyīī dɛ̍nɛ̍ pa̍lɛ̄ī ya̍ Mɛ̍lɛ̄ka̍ Ya̍a̍wɛ̄ɛ̄ pi̍la̍ yɔ̍ŋ mi̍ ī hūŋ a̍ kpāāyā bɛ̍ndōo̍ ve̍ ndi̍ cho̍ he̍ī ni̍. I̍ chi̍i̍ wānāā nīa̍a̍ yāmɛ̍i̍ kīlūl le̍ nda̍ nyɛ̄ pālāa̍ tūsīo̍o̍ chōo̍ le̍ yɔ̄ŋndā ndāla̍ wɔ̍ɔ̍ŋnda̍ŋ.”

¹³Wāŋnda̍ Chu̍dā a̍ wāŋnda̍ Chūlu̍sɛ̄lɛ̄m chi̍e̍e̍, ya̍a̍mɔ̍ɔ̍wa̍ hīŋ le̍ na̍a̍ dēlɔ̄ɔ̍ chōo̍. Ā chō hūnɔ̄ɔ̍ īdīkī dīkīe̍i̍ le̍ na̍a̍ dēlɔ̄ɔ̍ chōo̍ mɛ̄ɛ̍ hūēīyīī pīɔ̄ɔ̄ bɛ̄ndūe̍i̍ ī sūŋgū nu̍a̍ā hɔ̄ŋndo̍ yɛ̍. Tē wānā tu̍e̍ī nyɛ̄lā ndāla̍ chɔ̄ūlā su̍a̍a̍ ā nāŋ nda̍ŋ hūnɔ̄ɔ̍ īdīkī dīkīe̍i̍ pɛ̍, nu̍a̍ wɔ̍ ko̍ mɛ̄ɛ̍ hūēīyīī bɛ̄ndūe̍i̍ ī wā nu̍a̍ā hɔ̄ŋndo̍ īfūkū fūkūe̍i̍ yɛ̍. Su̍a̍ā ndāa̍ chɔ̄ūwa̍ kēlēŋāa̍, to̍fa̍ wɔ̍ kɔ̍ mɛ̄ɛ̍ kōwɔ̍ɔ̍ ō kēlēŋā nu̍a̍ā le̍ nyɔ̄ɔ̍ chūa̍a̍ yɛ̍. Dɛ̍nɛ̍ pa̍lāā bɛ̄ndōo̍ ō kōma̍l na̍a̍ fɔ̍. Kpūndɛ̍ bɛ̄ndōo̍ ō kōma̍l na̍a̍.

¹⁴Wāŋnda̍ Chūlu̍sɛ̄lɛ̄m, lā dīndi̍ kɔ̍ltā nyāla̍ŋ mī yɔ̄ŋ wɔ̄ɔ̍ŋndo̍ ō fūla̍ nya̍ o̍ lākɔ̄l. Ko̍ŋ to̍sā ni̍ mī yōōmūlā nyāla̍ŋ lā chīndā. Lā wa᷅ hīōūwɔ̄ɔ̍ lāchī a̍ yīya᷄ŋnda̍ yɔ̄ŋ wɔ̄ɔ̍ŋnda̍ŋ kɛ̄si᷄ŋndo̍ o̍ lākɔ̄l te̍.

¹⁵Ki̍i̍la̍a̍ chɛ᷄ŋ Da᷅ŋ chi̍e̍ē, mi̍ ha̍ā cha᷄ŋ o̍ pēmbūŋ E̍fi̍lūēmndo̍ŋ chōo̍ ma̍ hūŋ a̍ yōōŋgū kpūndɛ̍ bɛ̄ndōo̍.

¹⁶Lā dīmu̍l lɛ̍ŋīi̍ ba̍lu̍ Chūlu̍sɛ̄lɛ̄m nde̍ a̍ yōōŋgū kpūndɔ̍ɔ̍ ho̍ō o̍kɔ̄ɔ̄. Lā yōnda̍ Chūlu̍sɛ̄lɛ̄m chi̍e̍e̍ mī lā dīmu̍l wāŋnda̍ Chūlu̍sɛ̄lɛ̄m māā, wāŋnda̍ Chūlu̍sɛ̄lɛ̄m, ya̍a̍mɔ̍ɔ̍wa̍a̍ cho̍ nya̍ hūnɔ̄ɔ̄ bālɔ̄ɔ̄ mā dɔ̄ū nya̍ o̍ pi̍ŋndo̍ ni᷄ŋ nda̍ ā fūla̍ o̍ lɛ̄ŋndē lēvīlte̍ŋ ni᷄ŋ ma̍ wā hūnɔ̄ɔ̍. Ā chō hūnɔ̄ɔ̍ a̍ dēŋīo̍o̍ kpe̍e̍kpe̍i̍ le̍ hūnɔ̄ɔ̍ chi̍o̍o̍ŋ Chu̍dā dēlɔ̄ɔ̍ chōo̍.

¹⁷Ā chō hūnɔ̄ɔ̄ Chūlu̍sɛ̄lɛ̄m bālɔ̄ɔ̄ mā dɔ̄ū ndu̍ o̍ pi̍ŋndo̍ ni᷄ŋ mɛ̄ɛ̍ wāŋndo̍ ō kūŋgā nu̍a̍ā chīɛ̄ī mbō bɔ̄ŋa̍ ndi̍ kpɔ̍kɔ̍su̍ yɛ̍, fo̍ndōle̍, le̍ mɛ̄ɛ̍ nya̍ wāŋnda̍ Chūlu̍sɛ̄lɛ̄m nya̍ bīī mi̍ lā sīmūl Mɛ̄lɛ̄ka̍ Ya̍a̍wɛ̄ɛ̄ yɛ̍. Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ cho̍ ko̍ŋ ni̍.

¹⁸Wāŋnda̍ Chu̍dā, ka̍ālā nyāla̍ŋ a̍ yɔ̄ŋndā nyāla̍ wɔ̍ɔ̍ŋnda̍ŋ la̍ to̍sa̍ ni̍, mi̍ he̍ī ī kōmāl nya̍. Yɔ̄ŋndā nyāla̍ wɔ̍ɔ̍ŋnda̍ŋ lā chūu̍ nya̍ sāŋgāa̍. Sāŋga̍ lu̍e̍ī ni̍ŋ nya̍ mɔ̍nɛ̍i̍ bɛ̍ndūe̍i̍ o̍ kɔ̄ltā nyāla̍ŋ ni᷄ŋ ndo̍ ō kōma̍l nya̍.

¹⁹Mi̍ Chɛ̄lūīma̍yā o̍ hi̍a̍ū lāchī a̍ sūɛ̍i̍ āā, “Kpo̍u̍, mɔ̍nɛ̍i̍ cho̍ o̍ kɔ̄l nūu̍ ni᷄ŋ fa̍ŋgā! Mɔ̍nɛ̍i̍ cho̍ ya̍ o̍ kɔ̄l le̍ ī hīōū ya̍ māyōōmū. I̍ nɔ̍lā mī bi̍u̍ŋ ndi̍ le̍. Nyɛ̄ nɛ̄īyāa̍ cho̍ o̍ kɔ̄l nūu̍ ni᷄ŋ le̍ wānāā nīa̍a̍ wo̍ ō chō ō bɔ̄ɔ̍. To̍fa̍ wɔ̍ kɔ᷅l kāla̍ cho̍ ya̍ lɔ̄ɔ̍ īkpū kpūe̍i̍ yo̍ se᷅. I̍ nɔ̍lā mī me̍i̍ a̍ he̍ī le̍. Tūe̍i̍ yɔ̍ bu̍lu̍la̍ chɔ̄ūla̍ŋ sūɛ̍i̍ ya̍ o̍ lānī se᷅. Bɔ̄ɔ̄lūū chɔ̄ūwo̍ tu̍ŋ ya̍ I̍ cho̍ tūēīnɔ᷄ŋndo̍ o̍ lānī ni̍.

²⁰Dɛ̍nɛ̍ pa̍lāā ya̍ I̍ cho̍ chɔ̄ŋnɔ᷄ŋndo̍ o̍ hɔ̄llo̍ kīōlū bɛ̍ɛ̍ o̍ cho̍ kɔ̍ɔ̍lī le̍, ho̍ō chūū pɛ̍ ho̍ō hīŋ. Lɛ̄ŋnde̍ŋ kpo̍u̍ lē pīɔ̍l mi̍ lē lō pɔ̄m. Tɛ̍ndīi̍la̍ nāāla̍ŋ kpo̍u̍, I̍ che᷅ mi̍ ya̍a̍mɔ̍ɔ̍wa̍ tɛ̄ɛ̄mbūū la̍ŋ o̍ lēpīlɛ̍ ni̍ŋ kpe̍. Kōlāla̍ tɛ̍ndɛ̄i̍la̍ ka̍lā la̍ŋ kpo̍u̍ I̍ che᷅ ma̍ chīī la̍ŋ sɛ̄ɛ̄sīāā pɛ̄ŋgɔ̍ŋ.

²¹Vɛ̄ɛ̄ kpɛ̍ɛ̍ ya̍ I̍ hi̍a̍ū yɛ̍ ni̍ŋ la̍chi̍ a̍ chɔ̄ūwo̍ ho̍ō chɔ̄nɔ᷄ŋndo̍ o̍ hɔ̄l īfūkū fūkūe̍i̍ he̍ī? Vɛ̄ɛ̄ kpɛ̍ ya̍ I̍ hi̍a̍ū yɛ̍ ni̍ŋ la̍chi̍ a̍ bu̍lu̍la̍ chɔ̄ūla̍ŋ ndāŋ tūēīnɔ᷄ŋndo̍ ya̍ o̍ lānī īkpūū ve̍.”

²²Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Wānāā nīa̍a̍ ā chō dīɔ̄māā bɛ̄ndū. Ya̍ Mɛ̍lɛ̄ka̍ ya̍ nda̍ kɛ̄ɛ̍ ni̍ māā I̍ cho̍ Mɛ̍lɛ̄ka̍ ndā le̍. Ā chō chūāūwāā īdīɔ̄m bɛ̄ndū. Ā nɔ̍ si̍nā pɛ̄ŋgu̍ o̍ sīnā pɛ̄ŋgu̍ le̍. Tē ō wa̍ le̍ yɔ̄ŋ wɔ̄ɔ̍ŋndo̍ tōsāa̍ pɛ̍, tāāsi̍ kōŋ ndu̍ ā nɔ̄ ndu̍ ō bɔ̄ɔ̍. Kɛ̍ le̍ sūɛ̍i̍ cho̍ sūɛ̍i̍ kɛ̍ndɛ̄i̍ ye̍ tōsāa̍ ndi̍, ā nɔ̍ kɔ̍l kālu̍ ko̍ŋ te̍.”

²³O̍ ko̍ŋ kɔ̍ɔ̍lī, o̍ yi̍lāŋndo̍ ni᷄ŋ, mi̍ mɛ̍ɛ̍ndīa̍ŋ o̍ chi̍e̍ēŋndo̍ ni᷄ŋ kpo̍u̍ kɛ̍ I̍ chi̍ nyɛ᷅ o̍ nyɛ̄ o̍ chi̍e̍ēŋndo̍ chōo̍ le̍, chi̍e̍ēŋndo̍ wa̍ ō mūūli̍āŋ mu᷅lu̍kɛ̄lɛ̍ɛ̄ bɛ̄ndū. Mi̍ mɛ̍ɛ̍nda᷄ŋ vɛ̍lɛ̄ ha̍la̍a̍ chōo̍ cho̍o̍ pu̍e̍e̍ŋ bɛ̍ɛ̍ I̍ chi̍ nyɛ᷅ wa̍wo̍ŋndo̍ le̍.

²⁴Mɛ̄ɛ̍ ya̍ I̍ mɛ̍ɛ̍nda̍ŋ lu̍āŋndo̍ŋ, mi̍ cha᷅ mu̍ŋ hīīlɔ᷄ŋndo̍ kpe̍e̍kpe̍i̍, pēmbo᷄ŋ kpo̍u̍ ŋ̄ wa̍ hīŋnɔ᷄ŋndo̍ yo̍kpa᷄ŋ yo̍kpa᷄ŋ bɛ̍ndū.

²⁵Mi̍ mɛ̍ɛ̍nda̍ŋ le̍ wāŋndā chīe̍e̍ya̍, kɛ̍ wāna̍ chi̍o̍o̍ ō pīlɛ̍ bɛ̍ɛ̍ I̍ chi̍ ndu̍ le̍. Yōūwāa̍ ba̍lū o̍ ha̍la̍a̍ ni̍ŋ cho̍o̍ cho̍o̍ wa̍ kpo̍u̍, ō pīlɛ̍ bɛ̍ɛ̍ wānā a̍a̍ chi᷅ le̍, ma̍ kūānu᷄ŋ kpo̍u̍.

²⁶Lɛ̄ŋndē kɛ̄ndɛ̄ kɛ̍ndɛ̄lē tɔ̄lɔ̄ɔ̄la̍ŋ lā nāŋ nde̍ŋ kpo̍u̍ mi̍ lē sīmnu᷄ŋ po̍llo̍. Chi̍o̍o̍ŋ kpo̍u̍ mi̍ ŋ̄ pīɔ̄l, mi̍ ŋ̄ sīmnu᷄ŋ pɔ᷅mnda̍ŋ. Mu᷅ŋ ŋ̄ yɔ̄nu̍ŋ fo̍ndōle̍, ŋ̄ yɔ̄nu̍ŋ le̍ mī Mɛ̄lɛ̄ka̍ Ya̍a̍wɛ̄ɛ̄ o̍ chɔ̍m mɛ̄ɛ̍ o̍ dɔ̍u̍nu᷄ŋ tu̍mbe̍ o̍ ka̍lā ka̍lā a̍ wānāā ndūa̍a̍ yɛ̍.

²⁷Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mī āā, “I̍ cho̍ tōsā mī chi̍e̍ēŋndo̍ kpo̍u̍ o̍ ta̍mbu̍, mi̍ chē bɛ̍ɛ̍ I̍ tɛ̍ɛ̍mbūū ni̍ŋ ndu̍ mī chi̍i̍ a̍ ndu̍ le̍ fɛ̍ɛ̍ŋ a̍ fɛ̍ɛ̍ŋ te̍ ni̍.

²⁸Le̍ he̍ī, chi̍e̍ēŋndo̍ kpo̍u̍ ā chō hūnɔ̄ɔ̄ cha᷄ŋ. Nyūmnda̍ŋ mā chō hūnɔ̄ɔ̄ tōlɔ̄ɔ̄ o̍ ha̍la̍a̍ ni̍ŋ cho̍o̍ cho̍o̍ kpi᷅ŋgbi̍ bɛ̍ndū. Ya̍ Mɛ̍lɛ̄ka̍ Ya̍a̍wɛ̄ɛ̄ ya̍ so̍ō ni̍, ndu̍yɛ̍ I̍ ma̍ŋgālā kɔ᷅l nūu̍ le̍. I̍ chi̍i̍ kɛ̄ɛ̄sīāā le̍ he̍ī tōsāa̍, ndu̍yɛ̍ nyɛ̄ o̍ nyɛ̄ to̍sā mī fa̍ŋa̍ŋ o̍ dīōm nūu̍ chōo̍ le̍.”

²⁹Pūa̍a̍ chɔ̄ūwāa̍ sɔ̍ŋgā o̍ su̍a̍a̍ chōo̍ wa̍, a̍ pūa̍a̍ sɔ̍ŋgā a̍ chīɔ̄ūla̍ŋ nda̍ ā chō hūnɔ̄ɔ̍ mi̍ bɔ̄ɔ̄lūū kōŋ ō wā sūɛ̍i̍. I̍ che᷅ mi̍ sīōōŋīī bɛ̄ndūe̍i̍ bīī wāŋnda̍ o̍ chi̍o̍o̍ŋ kpo̍u̍ ma̍ nyāānu᷄ŋ. Ā ti̍ŋ sɔ̄ɔ̄ndi̍a̍ŋ o̍ būndɛ̍la̍ŋ la̍ŋ ni᷄ŋ, mi̍ ā ti᷄ŋ ā kɔ̍ vi̍ŋi᷄ŋ o̍ pōūta̍ŋ tɛ̄ɛ̄ŋ. Chi̍o̍o̍ŋ kpo̍u̍ ŋ̄ sīmnu᷄ŋ pɔ᷅mnda̍ŋ, wānā o̍ wānā cho̍ lɛ̍ lo̍ŋ te̍.

³⁰Wāŋnda̍ Chūlu̍sɛ̄lɛ̄m, nyɛ̄ pālāā bɛ̄ndōo̍ ō kōma̍l nya̍. Lā chō māchūāā mɛ̄ɛ̍ wānā la̍nɔ̍ ti̍a̍māa̍ ō chō nu̍a̍ā yɛ̍. Tē ō bīī pɛ̍, ō dōvi̍ŋ o̍ nyɛ̄lā kɛ̄ndɛ̄ kɛ̍ndɛ̄la̍ŋ ni᷄ŋ, ō bāāyi̍a̍ŋ yɔ̍lɔ̄ŋ a̍ kēlāŋ kɛ̍ndɛ̄ kɛ̍ndɔ̍ŋ, ō tōōsi̍a̍a̍ hɔ̄lāā ndūa̍a̍ nyɛ̄ kɛ̄ndɛ̄ kɛ̍ndɛ̄ le̍ mī pūa̍a̍ ā chē ndu̍ mā kāāla̍ ndu̍, kɛ̍ mɛ̄ɛ̍ mɛ̍ɛ̍ o̍ to̍o̍si̍a̍ŋ, sa̍ma̍a̍ ndūa̍a̍ bɛ̍ɛ̍ ā to̍fā lɛ̍ ndu̍ le̍. Le̍nde̍ i̍ yɔ̍nūŋ a̍ nya̍ ni̍. Wānāā nya̍ wa̍ o̍ nāāŋa᷅ŋndo̍ ni᷄ŋ nda̍ kpo̍u̍ ā kɛ̄ɛ̍ nya̍, ā chō ni᷅ŋ nɛ̄īla̍ŋ nūūvīa̍a̍ le̍ nya̍ hūnɔ̄ɔ̍ dīūwo̍

³¹Wāŋnda̍ Chūlu̍sɛ̄lɛ̄m a̍ cho̍ cha᷄ŋnda̍ŋ kpe̍e̍kpe̍i̍. Mɛ̄ɛ̍ wānā la̍nɔ̍ɔ̍ te̍le̍ŋ ndɔ̄ vi̍a̍lāa̍ ō fūūlūū nu̍a̍ā mbō wa̍ cha᷄ŋndo̍ a̍ pūli̍i̍ nɛ̍i̍yɛ̄i̍ yɛ̍, le̍nde̍ nda̍ chō cha᷄ŋnda̍ŋ ni̍. Mɛ̄ɛ̍ wānā la̍nɔ̍ vi̍lu̍ wɔ̍ ho̍ō le̍ pi᷅lɛ̍ le̍ wo̍ te̍le̍ŋ ndɔ̄ vi̍a̍lāa̍ o̍ fūūlūū nu̍a̍ā mbō wa̍ vīī vīi̍ŋndo̍ a̍ pūli̍i̍ vi̍a̍lɛ̄i̍ yɛ̍, le̍nde̍ nda̍ chō cha᷄ŋnda̍ŋ ni̍, mā sīɛ̄ɛ̄ndūū ba᷅la̍ŋ mā dīmī āā, “Mbɔ̄ na̍a̍ ŋ̄ chūū fɔ̍! Wānāā dīyāa̍ ha̍ā ā hīŋ na̍a̍ chīī fɔ̍!”