Read Southern Kisi Chɛ̄lūīma̍yā 41 Bible Online

Chɛ̄lūīma̍yā 41 - Southern Kisi bible

Chɛ̄lūīma̍yā 41

¹O̍ pāŋgi̍i̍ ŋɔ̍mmɛ̍ūve̍ ni̍ŋ o̍ wɔ̄sī kōŋ ni᷄ŋ, mi̍ I̍si̍mɛ̄ɛ̄l, po̍ Nɛ̄tāna̍yā wo̍, ndu̍ yɔ̍nūŋ māā po̍ ma̍ma̍ Ɛ̄līsi̍a̍mā wo̍ ni̍, ō chūā pūa̍a̍ ndūa̍a̍ ŋ̄wāŋ tɔ̍ mbo̍ kūā Mi̍si̍pā nāa̍ Kɛ̄dāla̍yā chu̍a̍. Ndu̍yɛ̍ I̍si̍mɛ̄ɛ̄l ko̍ŋ, wāŋ bɛ̄ndūa̍a̍ wa̍ wa̍llo̍ māsāa̍ Chu̍dā o̍ bā bɛ̄ŋgu̍ wa̍, ndu̍ wa̍ wāŋndo̍ ō pīlɛ̍. Ndu̍yɛ̍ vɛ̍lɛ̄ o̍ yu̍ŋgu̍ lēmāsāa̍ chōo̍ I̍si̍mɛ̄ɛ̄l ko̍ŋ ndu̍ o̍o̍ fu̍la̍ ni̍. O̍ ko̍ŋ kɔ̍ɔ̍lī, I̍si̍mɛ̄ɛ̄l ni̍, a̍ pūa̍a̍ ndūāā ŋ̍wa᷅ŋ tu̍a̍a̍ ka̍ŋ, a̍ Kɛ̄dāla̍yā, ma̍ chāl nyɛ̄ dīa̍a̍ dīo̍o̍ nāa̍ pi᷅lɛ̍. Mɛ̄ɛ̍ nda̍ wa̍ nyɛ̄ dīa̍a̍ dīo̍o̍,

²mi̍ I̍si̍mɛ̄ɛ̄l nda̍ pūa̍a̍ ndūāā ŋ̍wa᷅ŋ tɔ̍ wa̍ ā cha᷄ŋ, ma̍ nɛ̄ɛ̄nūū mɔ̄ɔ̄ŋ nda̍ŋ yāu̍ yāū o̍ bōo̍la̍ŋ ni᷄ŋ ma̍ dēl Kɛ̄dāla̍yā chōo̍, po̍ Āhi̍kām ndo̍, wāna̍ māsāa̍ Ba̍bi̍lɔ̄ŋ o̍ kɛ̍si̍ māsāa̍ lɛ̄ŋndē Chu̍dāle̍ŋ ndo̍ ma̍ dīī ndu̍.

³O̍ ko̍ŋ kɔ̍ɔ̍lī, Chu̍ūwāa̍ wa̍ Mi̍si̍pā lo̍ŋ a̍ Kɛ̄dāla̍yā la̍tu̍lu̍ wa̍ ni̍, so̍vɛ̄i̍ya̍a̍ Ba̍bi̍lɔ̄ŋāa̍ wa̍ lo̍ŋ nda̍ ni̍, mi̍ I̍si̍mɛ̄ɛ̄l o̍ di̍ū nda̍ kpo̍u̍.

⁴Mɛ̄ɛ̍ nda̍ dīī Kɛ̄dāla̍yā, dīi̍mā ndɔ̄ɔ̍ pīlɔ̍ɔ̍ lɔ̍ɔ̍ pa̍ mī wānā o̍ wānā si̍na̍ a̍ ndi̍ o̍kɔ̄ɔ̍,

⁵mi̍ pūa̍a̍ ŋ̄wāŋ be̍le̍-ŋɔ̍ma̍a̍ ā fūlā Si̍ɛ̍kɛ̄m chi̍e̍e̍, a̍ Si̍lɔ̄ɔ̄ chi̍e̍e̍, a̍ Sāme̍e̍līāā chi̍e̍e̍ ma̍ hu̍ŋ Mi̍si̍pā. Mɛ̄ɛ̍ nda̍ wa̍ hūnɔ̄ɔ̍, ma̍ sēndī sīɛ̍i̍yo̍ŋ, ndu̍yɛ̍ ma̍ sɛ̄ɛ̄sīa̍ŋ nyɛ᷅la̍ŋ lēkɔ̄ɔ̍, o̍ ko̍ŋ kɔ̍ɔ̍lī, ma̍ tɛ̄ɛ̄ndīāā nda̍ pi̍la̍ le̍ kɔ̄l nda̍ ta̍mbɛ̍i̍yo̍ chɔ̄mndo̍. Ndu̍yɛ̍ pūa̍a̍ ha̍ā nda̍ a̍a̍ hi᷅ŋ a̍ sa̍lālā lātɔ̄lɔ̄ɔ̄la̍ŋ, ndu̍yɛ̍ a̍ nyɛ̄m chūŋ kɛ̄ndɔ̍ŋ le̍ yɔ̄ŋgōo̍ o̍ Mɛ̄lɛ̄ka̍ Ya̍a̍wɛ̄ɛ̄ lo̍, o̍ chīɛ̍i̍ Mɛ̄lɛ̄ka̍a̍ ni᷄ŋ.

⁶Lɔ̍ɔ̍ pa̍ nda̍ fūūlūū Mi̍si̍pā chi̍e̍e̍, mi̍ I̍si̍mɛ̄ɛ̄l o̍ cha̍ŋ Mi̍si̍pā mbo̍ kūā nda̍ lāchī, ō wa̍ kɔ̄la̍ŋ a̍ cha᷄ŋ kɔ̄l chōo̍ wo̍. Mɛ̄ɛ̍ o̍ fu̍u̍lu̍u̍ nāa̍ nda̍ wa̍ wa̍, mbo̍ dīmūl nda̍ āā, “Lā ŋ̄ kɔ̄ŋnu᷅ŋ chi̍e̍e̍ mī lā kɔ̍ chi̍īki̍āŋ a̍ Māsāa̍ Kɛ̄dāla̍yā.”

⁷Mɛ̄ɛ̍ pūa̍a̍ ha̍ā a̍ he᷄l chi̍e̍e̍, mi̍ I̍si̍mɛ̄ɛ̄l nda̍ pūa̍a̍ ndūa̍a̍ ā dēl nda̍ chōo̍ ma̍ dīū nda̍, o̍ ko̍ŋ kɔ̍ɔ̍lī ma̍ chūā wāŋ vīlɛ̍i̍ya̍a̍ ka̍ŋ ma̍ māl nda̍ o̍ so̍o̍ŋ māmɛ̄ŋndo̍ ni᷄ŋ.

⁸Kɛ̍ mɛ̄ɛ̍ nda̍ wa̍ pūa̍a̍ ha̍ā dīūwo̍, mi̍ ŋ̄wāŋ tɔ̍ nda̍ tɛ̄ɛ̄ŋ, a̍ nyɔ̍ɔ̍lū I̍si̍mɛ̄ɛ̄l, ma̍ dīmūl ndu̍ āā, “Yāndi̍i̍ di̍ī na̍a̍ le̍. Ŋ̄ nɔ̄ wi̍tīi̍yo̍ŋ ŋ̄ vīāŋāā o̍ chīɛ̄ī pūm ni᷄ŋ, a̍ ba̍a̍līi̍yo̍ŋ a̍ chūɛ̄īya̍ŋ o̍ ko̍ŋ kɔ̍ɔ̍lī, a̍ līa̍a̍ŋ, ŋ̄ nɔ̄lā mī ŋ̄ ke̍ nu̍m.” O̍ ko̍ŋ, mi̍ I̍si̍mɛ̄ɛ̄l o̍ ma᷅l nda̍, ō dīi̍ nda̍ le̍.

⁹Ndu̍yɛ̍ so̍o̍ŋ māmɛ̄ŋ I̍si̍mɛ̄ɛ̄l o̍ ma̍l ko̍ŋ pu̍a̍a̍ o̍ di̍u̍ ka̍ŋ nda̍ ni̍ŋ ndo̍, Māsāa̍ A̍sā o̍ wa̍ Chu̍dā wo̍ ndu̍ ndu̍ o̍o̍ to̍ū so̍o̍ŋ ko̍ŋ ni̍. So̍o̍ŋndo̍ ho̍ō yɛ̍, so̍o̍ŋ bɛ̍ndo̍o̍ pīla̍ o̍ wa̍ ni̍. Bōōndi̍i̍ Māsāa̍ Ba̍a̍sīā o̍ wa̍ I̍sɔ̄lūɛ̄ī wo̍ ō hu᷄ŋ chi᷅ŋa̍la᷅ŋ ndu̍ a̍ sɔ̍ŋgɔ̍ɔ̍ mbo̍ wā chīo̍o̍ bɛ̄ɛ̄ndīa̍a̍ ō kālā ka̍lā yɔ̄ŋi̍ ya̍a̍mɔ̍ɔ̍wa̍ ā bīī ndu̍ ve̍, bōōndi̍i̍ ke̍ŋ o̍ to̍ū so̍o̍ŋ ko̍ŋ ni̍. So̍o̍ŋ māmɛ̄ŋ kōŋ, mi̍ I̍si̍mɛ̄ɛ̄l o̍ pe̍ī ndu̍ cha̍ a̍ wāŋ vīlɛ̍i̍ya̍.

¹⁰O̍ ko̍ŋ kɔ̍ɔ̍lī, wānā o̍ wānā wāŋnda̍ Ba̍bi̍lɔ̄ŋ nda̍ a̍a̍ mɛ̍i̍ Mi̍si̍pā chi̍e̍e̍, māsā bɛ̍ndōo̍ Chu̍dā chūāūwāā ndūāā wa᷅ŋ lāāndūa̍a̍ ni̍, a̍ wāŋnda̍ ā pīli̍a̍a̍ kpo̍u̍ a̍ wa̍ Mi̍si̍pā wa̍, ā Nɛ̄bu̍kānɛ̍ɛ̍sā o̍ wa̍ pūa̍a̍ Ba̍bi̍lɔ̄ŋ bōlle̍ŋ ndo̍ ō kɛ̄si̍ Kɛ̄dāla̍yā māsāa̍ chōo̍ wa̍, mi̍ I̍si̍mɛ̄ɛ̄l o̍ bi̍ū nda̍ kpo̍u̍, mbo̍ mūli᷄ŋ kɔ᷅la̍ŋ a̍ nda̍ o̍ lɛ̄ŋndē A̍mɔ̄ŋnde̍ŋ ni᷄ŋ o̍ bīyɔ̄ɔ̍ ni᷄ŋ

¹¹Mɛ̄ɛ̍ Chōha̍nāŋ nda̍ wāŋ bɛ̄ndūa̍a̍ so̍vɛ̄i̍ya̍ ā pīli̍a̍a̍ ā tūēī sɔ̄ɔ̍ŋ wɔ̍ɔ̍ŋ I̍si̍mɛ̄ɛ̄l o̍ to̍sa̍ ki̍nɛ̍i̍yo̍,

¹²ma̍ chūā so̍vɛ̄i̍ya̍a̍ ndāa̍ kpo̍u̍ ma̍ tīsā ndu̍ kɔ̄ɔ̄lī, le̍ ndu̍ chīŋa̍la᷅ŋndo̍. Ndu̍yɛ̍ ma̍ bēndāl ndu̍ o̍ pēe̍ mɛ̄ŋmā ībūŋgāa̍ Ki̍bīɔ̄ŋ.

¹³Mɛ̄ɛ̍ wānāā I̍si̍mɛ̄ɛ̄l o̍ bi̍ī le̍ kɔ̄la̍ŋ a̍ nda̍ o̍ bīyɔ̄ɔ̍ ni᷄ŋ nda̍ ā chē Chōha̍nāŋ, a̍ wāŋ bɛ̄ndūāā so̍vɛ̄i̍ya̍ ā pīli̍a̍a̍, lātūlu̍ a̍ so̍vɛ̄i̍ya̍a̍ ndāa̍, nda̍ kpo̍u̍ ma̍ nāŋ kɔ̄l.

¹⁴Wānā o̍ wānā I̍si̍mɛ̄ɛ̄l o̍ bi̍ī Mi̍si̍pā chi̍e̍e̍ mbo̍ wā kɔ̄la̍ŋ a̍ nda̍, ma̍ mūli᷄ŋ ma̍ nyāānu᷄ŋ nāa̍ Chōha̍nāŋ chu̍a̍.

¹⁵Kɛ̍ mi̍ I̍si̍mɛ̄ɛ̄l pi̍la̍, nda̍ pūa̍a̍ ndūa̍a̍ ā ŋɔ̍ma̍a̍ nda̍ hīālu᷄ŋ Chōha̍nāŋ ma̍ nyāānu᷄ŋ o̍ lɛ̄ŋndē A̍mɔ̄ŋnde̍ŋ ni᷄ŋ.

¹⁶O̍ ko̍ŋ, wānā o̍ wānā I̍si̍mɛ̄ɛ̄l o̍ bi̍ī Mi̍si̍pā chi̍e̍e̍, dīyɔ̄ɔ̄ o̍ di̍ī Kɛ̄dāla̍yā po̍ Āhi̍kām ndo̍ wo̍, pūa̍a̍ chɔ̄ū ni̍, wānā la̍nɔ̍ ni̍, wānā pɔ̍nɔ̍ ni̍, chūāāmbɔ̄ ni̍ wānāa̍ wa̍ wa̍llo̍ o̍ chīɛ̄ī lēmāsāa̍ ni᷄ŋ nda̍ ni̍, mi̍ Chōha̍nāŋ, nda̍ wāŋ bɛ̄ndūāā so̍vɛ̄i̍ya̍ ā pīli̍a̍a̍ ā sōlī nda̍ I̍si̍mɛ̄ɛ̄l o̍ bā kpo̍u̍ ma̍ mīīŋgū a̍ nda̍, chɔ̄nɔ᷄ŋndo̍ Ki̍bīɔ̄ŋ.

¹⁷Chōha̍nāŋ nda̍ wāŋ bɛ̄ndūāā so̍vɛ̄i̍ya̍ ā pīli̍a̍a̍, sīōōŋnde̍ wa̍ nda̍ le̍ wāŋnda̍ Ba̍bi̍lɔ̄ŋ, fo̍ndōle̍ le̍ dīyɔ̄ɔ̄ I̍si̍mɛ̄ɛ̄l o̍ di̍ī Kɛ̄dāla̍yā, wāna̍ māsāa̍ Ba̍bi̍lɔ̄ŋ o̍ kɛ̍si̍ māsa̍ ībūŋgāa̍ lɛ̄ŋnde̍ŋ chōo̍ wo̍ wo̍. Le̍ he̍ī, ma̍ wā nyāānɔ᷄ŋndo̍ le̍ wāŋnda̍ Ba̍bi̍lɔ̄ŋ ma̍ wā kɔ᷄ŋnda̍ŋ I̍chi̍pī, yɔ̄ŋi̍ wāŋnda̍ Ba̍bi̍lɔ̄ŋ nda̍ a̍a̍ yɔ̍ŋ nda̍ nyɛ̍ tē ndā a̍a̍ tu̍e̍ī a̍ nyɛ̍ yɔ̍nu̍ŋ ndo̍ pɛ̍. Mɛ̄ɛ̍ nda̍ fūūlu̍u̍ Chi̍mi̍hām chi̍e̍e̍, Bɛ̍ti̍lɛ̍hɛ̄m i̍kɛ̍i̍, ma̍ sīm ndo̍ŋ.