Read Southern Kisi Chɛ̄lūīma̍yā 42 Bible Online

Chɛ̄lūīma̍yā 42 - Southern Kisi bible

Chɛ̄lūīma̍yā 42

¹O̍ ko̍ŋ kɔ̍ɔ̍lī, mi̍ wāŋ bɛ̄ndūāā pūa̍a̍ chɔ̄ūwa̍ kpo̍u̍ lātūlu̍ a̍ Chōha̍nāŋ, po̍ Kālu̍ɛ̍yā wo̍, a̍ Āsālu̍i̍yā, po̍ Hōsi̍a̍yā wo̍, ndu̍yɛ̍ a̍ wāŋnda̍ ā pīli̍a̍a̍ kpo̍u̍, chɔ̍ŋ a̍ wānāā tɔ̍ɔ̍wa̍ mbo̍ kūā a̍ wānāā yɔ̄ŋāa̍, ma̍ hūŋ nāa̍

²ya̍ Chɛ̄lūīma̍yā, wāna̍ su̍a̍ā le̍ Mɛ̄lɛ̄ka̍ wo̍ chūā. Ma̍ dīmūl la̍ āā, “Yāndi̍i̍ nyɛ̄ na̍a̍ ŋ̄ chō nu̍m dīmūllo̍, to̍sa̍l na̍a̍ ndu̍. Pi̍ɛ̍i̍ Mɛ̍lɛ̄ka̍ Ya̍a̍wɛ̄ɛ̄ nu̍mndo̍ le̍ na̍a̍, na̍a̍ tūa̍a̍ lo̍ ha̍ā yōōmū wa̍. Nūm pi̍la̍ si̍nā mɛ̄ɛ̍ na̍a̍ ŋ̄ wa̍ pāāndū ku̍ndā bɛ̄ndōo̍ yɛ̍, kɛ̍ na̍a̍ ko̍ni̍ ŋ̄ chā ni᷅ŋ ha̍ū nu̍a̍ā ku̍ndā pɔ̄mbɔ̄ɔ̍ ho̍ō ni̍.

³Le̍la̍ŋ, nyu̍na̍l na̍a̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nūmndo̍, mbō chɔ᷄m na̍a̍ bā na̍a̍ ŋ̄ kūā wo̍, ndu̍yɛ̍ a̍ nyɛ̄ na̍a̍ ŋ̄ tōsa̍ wo̍.”

⁴Mi̍ di̍mūl nda̍ a̍a̍ “Bālā tīɔ̍ɔ̍ŋ, I̍ tu̍e̍ī nyɛ̄ nya̍ dīmi̍ wo̍. I̍ cho̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ pīɛ̄ī le̍ nya̍ mɛ̄ɛ̍ ya̍ dīmi̍ yɛ̍. Ndu̍yɛ̍ nyɛ̄ o̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l la̍ pɛ̍, I̍ cho̍ nya̍ vīŋ te̍, I̍ cho̍ nya̍ dīmūl kpo̍u̍.”

⁵O̍ ko̍ŋ kɔ̍ɔ̍lī, ma̍ dīmūl la̍ āā, “Nyɛ̄ o̍ nyɛ̄ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nūmndo̍ ō dīmu̍l nu̍m pɛ̍ le̍ mā di̍mu̍l na̍a̍ mī ŋ̄ tōsa̍ ndu̍ le̍, Mɛ̄lɛ̄ka̍ Ya̍a̍wɛ̄ɛ̄ pi̍la̍ o̍ hu̍ŋ wa᷅ se̍īyo̍ le̍ na̍a̍, se̍i̍ cho̍ sa̍kpō ndu̍yɛ̍ mbō dīmī to᷅nya̍a̍ wo̍.

⁶Nyɛ̄ o̍ nyɛ̄ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nāa̍, ō na̍a̍ ŋ̄ dīmu̍l nu̍m māā nyu̍na̍l na̍a̍ ndu̍ dīōm ndo̍ ō dīmu̍l na̍a̍ pɛ̍ le̍ mi̍ ŋ̄ tōsa̍, ō wa̍ su̍ɛ̍i̍ na̍a̍ ŋ̄ hīni̍ kɔ̄l le̍ tōsā, ō wa᷅ sūɛ̍i̍ na̍a̍ ŋ̄ hīni̍ kɔ̄l te̍, tōsāa̍ na̍a̍ ŋ̄ tōsā ndi̍ ni̍, le̍ hāli̍ kpe̍ŋ mī nyɛ̄ o̍ nyɛ̄ ō wa̍ ō kɛ̄ndɛ̄ a̍ na̍a̍.”

⁷Mɛ̄ɛ̍ pālɛ̍i̍ hīōū tɔ̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ mu̍lī ya̍ dīōm, mbo̍ kē ya̍ yōōŋgōo̍ le̍ wāŋnda̍ ha̍ā.

⁸O̍ ko̍ŋ, mi̍ ve̍e̍lū Chōha̍nāŋ, po̍ Kālu̍ɛ̍yā wo̍, a̍ wāŋnda̍ ā pīli̍a̍a̍ kpo̍u̍ a̍ wa̍ a̍ ndu̍ la̍tu̍lu̍ wa̍, wāŋ bɛ̄ndūāā pūa̍a̍ chɔ̄ūwa̍ ā pīli̍a̍a̍ ni̍, ndu̍yɛ̍ a̍ wāŋnda̍ ā pīli̍a̍a̍ kpo̍u̍, chɔ̍ŋ a̍ wānāā tɔ̍ɔ̍wa̍ mbo̍ kūā a̍ wānāā yɔ̄ŋāa̍.

⁹Mi̍ di̍mu̍l nda̍ a̍a̍, “Lā vēm ya̍ māā ya̍ I̍ nyu̍na̍l nya̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍ dīōm, ndu̍yɛ̍ mi̍ nyu̍nā ndu̍. Nyɛ̄ o̍ mu̍li̍ wo̍ cho̍ ho̍ō ni̍. Ō dīmi̍ māā,

¹⁰lā ku̍ā bā o̍ bā le̍, lā cha᷄l o̍ lɛ̄ŋnde̍ŋ nde᷅ŋ ni᷄ŋ. Tē lā cha᷄l na̍nu᷄ŋ pɛ̍, I̍ cho̍ lɛ̄ŋndē nyāle̍ŋ tāŋgūl, ndu̍yɛ̍ I̍ tɛ̍ɛ̍mbūū lɛ̍ le̍ŋ te̍. I̍ cho̍ nya̍ kɛ̄sī o̍ lɛ̄ŋnde̍ŋ nde᷅ŋ ni᷄ŋ mɛ̄ɛ̍ nda̍ tūāl nu̍a̍ā yɔ̄mndo̍ o̍ fo̍ndāa̍ yɛ̍. Nyīɛ̍ɛ̍ye̍ bīī ya̍ le̍ nyɛ̄ pālāā ya̍ I̍ ha̍ndu̍ nya̍ chōo̍ wo̍.

¹¹Lā yɔ᷅ŋ īsīōōŋ le̍ māsāa̍ Ba̍bi̍lɔ̄ŋ, ō sīōōŋnde̍ chō nya̍ ho̍ō le̍ ndu̍ wo̍ le̍. Ya̍ Mɛ̍lɛ̄ka̍ Ya̍a̍wɛ̄ɛ̄, I̍ cho̍ wā a̍ nya̍ lātūlu̍ mī chi̍i̍ndi̍a̍a̍ nya̍, mī so̍li̍ nya̍ ndu̍ o̍ bā.

¹²I̍ cho̍ nya̍ īnyīɛ̍ɛ̍ tūīīnɔ᷄ŋ mī to̍sa̍ mī nyīɛ̍ɛ̍ye̍ bīī māsāa̍ Ba̍bi̍lɔ̄ŋ le̍ nya̍, mbō chɛ᷄l nya̍ mī lā cha᷄l na̍nu᷄ŋ o̍ lɛ̄ŋndē nyāle̍ŋ ni᷄ŋ. Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ cho̍ ko̍ŋ ni̍.

¹³Kɛ̍ tē lā kɛ̄ɛ̍ nyɛ̄ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō dīmu̍l nya̍ wo̍ pɛ̍ mī lā dīmi̍ māā, ŋ̄ cho̍ i̍cha̍li̍ o̍ lɛ̄ŋnde̍ŋ nde᷅ŋ ni᷄ŋ te̍. Ŋ̄ chō lākɔ̄ o̍ lɛ̄ŋndē I̍chi̍pīle̍ŋ ni᷄ŋ mī ŋ̄ kɔ̍ cha᷅l lo̍ŋ. Lo̍ŋ ndu̍ ŋ̄ cho̍ wā chɔ̄ū chɔ̄ le̍, kɛ̄lɛ̄ŋgāāle̍ mī ŋ̄ wa̍ bu̍lu̍la̍ chɔ̄ū tūēīyɔ̄ɔ̄. Ndu̍yɛ̍ māyī o̍ māyī mā cho̍ na̍a̍ wā lo̍ŋ te̍. Tē lā kɛ̄ɛ̍ ndu̍ dīōm pɛ̍, mī lā dīmi̍ le̍nde̍,

¹⁴

¹⁵lā ya᷄ŋ ndɔ̍ ni᷅la̍ŋ mī lā tūēī nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍, nya̍ wānāā tūa̍a̍ lo̍ ha̍ā Chu̍dā wa̍. Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍, I̍sɔ̄lūɛ̍i̍ya̍ Mɛ̄lɛ̄ka̍ ndāa̍ ō dīmi̍ māā, tē lā ba᷄ŋ pɛ̍ māā lā chō lākɔ̄ I̍chi̍pī,

¹⁶chɔ̄ū pīlɛ̍ nya̍ chō wōo̍ mi̍ lā wā ndu̍ nyāānɔ᷄ŋndo̍ wo̍, ō chō nya̍ wā chōo̍ o̍ lɛ̄ŋndē lēŋ ni᷄ŋ. Yīmā nya̍ chō wōo̍ wa̍ŋ, ma̍ cho̍ nya̍ kōmāl lo̍ŋ nda̍ŋ ma̍ŋ bɛ̍ɛ̍ ma̍ hīāū ni̍ŋ. I̍chi̍pī lo̍ŋ, nya̍ chō lākɔ̄ chūū ni̍.

¹⁷Nya̍ wānā o̍ wāna̍ cho̍ kɔ̄la̍ŋ I̍chi̍pī lo̍ŋ, lā chō lākɔ̄ chūū kpo̍u̍, ā pu᷄m o̍ chɔ̄ūwo̍ ni̍ŋ, ā pu᷄m a̍ yīa̍a̍ŋ, a̍ pu᷄m a̍ nāāla̍ŋ. Dɛ̍nɛ̍ pa̍lāā ya̍ I̍ ha̍ndū ni̍ŋ nya̍ cho̍o̍ o̍ lɛ̄ŋndē lēŋ ni᷄ŋ ndo̍, wānā o̍ wānā o̍ nɔ̍lā ni̍ŋ mbō fūla̍ lēni᷄ŋ mbō lo̍ yōōmū le̍.”

¹⁸“Mi̍ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍, I̍sɔ̄lūɛ̍i̍ya̍ Mɛ̄lɛ̄ka̍ ndāa̍ ō hīāū lāchī a̍ sūɛ̍i̍, mbo̍ dīmi̍ āā, ‘Tē lā fūla̍ kɔ̄ɔ̄lī pɛ̍ mī lā kūɛ̄ I̍chi̍pī, mɛ̄ɛ̍ ya̍ I̍ tu̍u̍lū kɔ̄l ndu̍yɛ̍ mi̍ du̍a̍u̍nu᷄ŋ tu̍mbe̍ a̍ wāŋnda̍ Chūlu̍sɛ̄lɛ̄m ō kālā ka̍lā mi̍ tu̍sī nda̍ nyɛ̄ pālāa̍ chōo̍ yɛ̍, le̍nde̍ ya̍ I̍ du̍a̍u̍nūŋ ni̍ŋ tu̍mbe̍ a̍ nya̍ ō kālā ka̍lā ni̍, mī tu̍si̍ nya̍ nyɛ̄ pālāa̍ chōo̍. Nyɛ̄ pālāa̍ tu̍āl ni̍ŋ nya̍ chōo̍ wo̍, wāŋnda̍ chō nya̍ hūnɔ̄ɔ̄ sīīŋgūū māā tāāmāsi̍ le̍ wāŋnda̍ sēndi̍o̍o̍ hāndɔ̄ɔ̍ chōo̍. Sīōōŋnde̍ chō hūnɔ̄ɔ̄ wānā o̍ wānā bi̍yɔ̄ɔ̄ a̍ nyɛ̍ yɔ̍nūŋ ni̍ŋ a̍ nya̍ wo̍. Wāŋnda̍ chō nya̍ hūnɔ̄ɔ̄ pɛ̄ɛ̄sā mā chūa̍ nya̍ nyɛ̄ fo̍ndō fu̍u̍. Ndu̍yɛ̍ lo̍ŋ nya̍ chō lō ni̍ mī lā chūu̍, fɛ̍ɛ̍ŋ a̍ fɛ̍ɛ̍ŋ lā de᷅l lɛ̍ lɛ̄ŋnde̍ŋ nde᷅ŋ hɔ̄lte̍ŋ te̍.’ Nyɛ̄ Mɛ̄lɛ̄ka̍ dīmi̍ wo̍ cho̍ ko̍ŋ ni̍.

¹⁹“Nya̍ wāŋnda̍ Chu̍dā, nya̍ lo̍ ha̍ā yōōmū wa̍, lā ya᷄ŋ ya̍ nīla̍ŋ. Mɛ̄lɛ̄ka̍ Ya̍a̍wɛ̄ɛ̄ o̍ chi̍i̍ nya̍ sīlā māā nya̍ ku̍ā I̍chi̍pī le̍. Mī di̍mu̍l nya̍ kpe̍nde̍ke̍le̍, tē lā fūla̍ nyɛ̄ Mɛ̄lɛ̄ka̍ dīmi̍ ho̍ō wo̍ kɔ̄ɔ̄lī pɛ̍,

²⁰mɛ̄ɛ̍ lā tōsa̍ bīōndɔ᷄ŋ bɛ̍ndū bɛ̍ndū, bīōndɔ᷄ŋ yōōmūlā nyāla̍ŋ lā lō ni̍ŋ le̍ni̍ŋ ndo̍. Kāni̍ lā dīmu̍l la̍ māā ya̍ I̍ nyu̍na̍l nya̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nāa̍ dīōm. Ndu̍yɛ̍ mi̍ lā chūā būŋgɛ̄i̍, māā nyɛ̄ o̍ nyɛ̄ Mɛ̄lɛ̄ka̍ nāa̍ ō dīmu̍l nya̍ pɛ̍ le̍ tōsāa̍, māā lā bɛ̄ɛ̄ndi̍a̍ŋ mī lā tōsa̍ ndu̍.

²¹Nyɛ̄ o̍ nyɛ̄ Mɛ̄lɛ̄ka̍ ō dīmu̍l la̍ māā ya̍ I̍ di̍mu̍l nya̍, I̍ chi̍i̍ nya̍ ndu̍ dīmūl kpo̍u̍ pa̍a̍le̍ hāūle̍ŋ nde᷅ŋ. Kɛ̍ lā yēēma̍ mī lā tūēī Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ dīōm mī lā tōsa̍ nyɛ̄ o̍ di̍mu̍l nya̍ wo̍ le̍.

²²Kɛ̍ tē lā sōli̍ ndu̍ dīōm pɛ̍, lā sīna̍ pɛ̍ŋgu̍ māā lā chō lākɔ̄ pīɔ̍mndo̍ sɔ̄lā o̍ lɛ̄ŋndē nya̍ chō kɔ̄la̍ŋ nde̍ŋ ni᷄ŋ. Ā ti᷄ŋ chō pīɔ̍mndo̍ sɔ̄lā o̍ chɔ̄ūwo̍ ni᷄ŋ, mī yīa̍a̍ŋ mā dīu̍ ā ti᷄ŋ, o̍ ko̍ŋ kɔ̍ɔ̍lī, mī nāāla̍ŋ lā dīu̍ ā ti̍ŋ.”