Read Southern Kisi Chɛ̄lūīma̍yā 43 Bible Online

Chɛ̄lūīma̍yā 43 - Southern Kisi bible

Chɛ̄lūīma̍yā 43

¹O̍ ko̍ŋ kɔ̍ɔ̍lī, mi̍ ya̍ Chɛ̄lūīma̍yā di̍mūl wāŋnda̍ ha̍ā nyɛ̄ o̍ nyɛ̄ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ ndāa̍ ō dīmu̍l la̍ māā ya̍ I̍ di̍mu̍l nda̍.

²O̍ ko̍ŋ, Āsālu̍i̍yā, po̍ Hōsi̍a̍yā wo̍ ni̍, a̍ Chōha̍nāŋ, po̍ Kālu̍ɛ̍yā wo̍, a̍ pūa̍a̍ sɔ̄ɔ̄lɛ̄ma̍a̍ ā ti᷄ŋ, ma̍ dīmūl la̍ āā, “Chōōla̍ŋ ŋ̄ chō na̍a̍ dīmūllo̍ ni̍. Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nāa̍ ō dīmu̍l nu̍m māā nūm di̍mu̍l na̍a̍ māā na̍a̍ ŋ̄ ku̍ā I̍chi̍pī le̍ le̍.

³Ŋ̄ sīnā māā Ba̍lu̍kī, po̍ Nɛ̄lu̍a̍yā wo̍, ndu̍ so̍ō nu̍m o̍ lānī le̍ na̍a̍ yōōŋgūlā wāā le̍nde̍ di̍mūllo̍ ni̍, māā le̍ hāli̍kpe̍ŋ tē ŋ̄ cha᷄l na̍nu᷄ŋ pɛ̍, wāŋnda̍ Ba̍bi̍lɔ̄ŋ a̍ hu̍ŋ bi̍ī na̍a̍ ā dīu̍ na̍a̍, tē ko̍ŋ te̍ ā kūɛ̄ a̍ na̍a̍ o̍ chɛ̄le̍ŋ ni᷄ŋ Ba̍bi̍lɔ̄ŋ.”

⁴O̍ ko̍ŋ, Chōha̍nāŋ ni̍, a̍ wāŋ bɛ̄ndūāā pūa̍a̍ chɔ̄ūwa̍ Chu̍dā a̍ pīli̍a̍a̍, o̍ ko̍ŋ kɔ̍ɔ̍lī, a̍ wāŋnda̍ ā pīli̍a̍a̍ kpo̍u̍, ma̍ kɛ̄ɛ̄ nyɛ̄ Mɛ̄lɛ̄ka̍ Ya̍a̍wɛ̄ɛ̍ o̍ di̍mi̍ wo̍, ā chɛ᷄l mā cha᷄l o̍ lɛ̄ŋndē Chu̍dāle̍ŋ ni᷄ŋ te̍.

⁵Wānā o̍ wānā ndu̍ o̍o̍ lo̍ o̍ lɛ̄ŋnde̍ Chu̍dāle̍ŋ ni᷄ŋ, lātūlu̍ a̍ wānāa̍ wa̍ o̍ lɛ̄ŋīī chēle̍ŋnde̍ ni᷄ŋ kɛ̍ mi̍ nda̍ a̍a̍ mi̍i̍ŋgū o̍ lɛ̄ŋndē Chu̍dāle̍ŋ ni᷄ŋ nda̍, mi̍ Chōha̍nāŋ, nda̍ wānāa̍ wa̍ pūa̍a̍ chɔ̄ūwa̍ bōlle̍ŋ nda̍ ā pīli̍a̍a̍ ā chūā na̍a̍ kpo̍u̍, wānā la̍nɔ̍ ni̍, wānā pɔ̍nɔ̍ ni̍, chɛ̄lɛ̄kpɛ̍ ni̍, a̍ māsā bɛ̍ndōo̍ Chu̍dā chūāūwāā ndūāā la̍a̍ndūa̍a̍, lātūlu̍ a̍ Ba̍lu̍kī, a̍ ya̍ Chɛ̄lūīma̍yā, ma̍ kūā a̍ na̍a̍ I̍chi̍pī. Nɛ̄bu̍kānɛ̍ɛ̍sā, bōllē pūa̍a̍ chɔ̄ūwa̍ Ba̍bi̍lɔ̄ŋ, a̍ ma̍ndā ma̍sāa̍ wa̍, wānāā o̍ kɛ̍si̍ Kɛ̄dāla̍yā, po̍ Āhi̍kām ndo̍ māsāa̍ chōo̍ wa̍, ndu̍ yɔ̍nūŋ māā po̍ ma̍ma̍ Si̍a̍fāŋ ndo̍ ni̍, ma̍ chūā nda̍ kpo̍u̍ ma̍ kūā a̍ nda̍.

⁷Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l nda̍ wo̍, ā ye᷄ŋ ndu̍ lānī le̍. Ma̍ chūā na̍a̍ ma̍ kūā a̍ na̍a̍ o̍ lɛ̄ŋndē I̍chi̍pīle̍ŋ ni᷄ŋ, ma̍ kūā a̍ na̍a̍ pɔ̍ɔ̍li̍, Tāfa̍nɛ̍sī chi̍e̍e̍.

⁸O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā vɛ̄lɛ̄ nāa̍ ya̍ Chɛ̄lūīma̍yā chu̍a̍ Tāfa̍nɛ̍sī chi̍e̍e̍ lo̍ŋ, mbo̍ kē ya̍ yōōŋgōo̍. Mbo̍ dīmūl la̍ āā,

⁹“Kɔ̍ mā kɔ̍ chu̍ā pōūtā bɛ̄ŋnda̍ŋ, mā hu̍ŋ tu̍ū la̍ŋ lɛ̄ŋ, o̍ fo̍ndā nda̍ bɛ̄ɛ̄ndi̍a̍a̍ nyɛ̄ kɛ̄ndɛ̄ kɛ̍ndɛ̄ a̍ kpi̍līki̍o̍ŋ o̍ māsā bɛ̍ndōo̍ lo̍ dīō, Tāfāni̍hɛ̍sī chi̍e̍e̍ na̍nu᷄ŋ ndo̍. Ndu̍yɛ̍ tē a̍ wa̍ ndi̍ tōsāa̍ pɛ̍, to̍sa̍ ndi̍ wāŋnda̍ I̍sɔ̄lūɛ̄ī o̍ hɔ̄l nda̍ kpo̍u̍ mā chē.”

¹⁰O̍ ko̍ŋ kɔ̍ɔ̍lī, mā di̍mu̍l nda̍ māā ya̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nɔ̍ kpāāyāa̍ kpo̍u̍ wo̍, I̍sɔ̄lūɛ̍i̍ya̍ Mɛ̄lɛ̄ka̍ ndāa̍ dīmi̍ āā, “I̍ cho̍ hūnɔ̄ɔ̄ a̍ bu̍ɛ̍ī nūu̍ Nābi̍u̍kānɛ̍ɛ̍sā, māsāa̍ le̍ Ba̍bi̍lɔ̄ŋ, mbō hu᷄ŋ chu̍ā lɛ̄ŋnde̍ŋ nde̍ŋ. Pōūtā nda̍ tūū la᷅ŋ lɛ̄ŋ nda̍ŋ, o̍ pōūtā lāŋ chōo̍ kpe̍e̍kpe̍i̍ o̍ cho̍ hūnɔ̄ɔ̄ kpe̍ŋgbe̍i̍ nɔ̍ lēmāsāa̍ kɛ̄sī ni̍ mbō cha᷄l lēchōo̍. O̍ pōūta̍ŋ ndāŋ chōo̍, yɛ̄kpɛ̍ ndɔ̍ o̍ cha᷅l ni̍ŋ le̍bɛ̍ŋgu̍ wo̍ o̍ cho̍ hūnɔ̄ɔ̄ wā ō tāŋgūlāā ni̍.

¹¹Māsāa̍ Nābi̍u̍kānɛ̍ɛ̍sā o̍ cho̍ hūnɔ̄ɔ̄ lɛ̄ŋndē I̍chi̍pīle̍ŋ dēlɔ̄ɔ̄ chōo̍ mbō tɛ̄ɛ̄mbu̍u̍ le̍ŋ. Wānāā nāāla̍ŋ lā nɔ̄ mī lā dīu̍ wa̍, nāāla̍ŋ lā chō nda̍ hūnɔ̄ɔ̄ dīū, a̍ nɔ̍ mā kūɛ̄ o̍ chɛ̄le̍ŋ ni᷄ŋ nda̍, ā chō lākɔ̄ a̍ nda̍ o̍ chɛ̄le̍ŋ ni̍ŋ, o̍ ko̍ŋ kɔ̍ɔ̍lī, ā nda̍ nɔ̄ mā dīu̍ a̍ mɔ̄ɔ̄ŋ fāŋndo̍ŋ o̍ chɔ̄ūwo̍ ni᷄ŋ nda̍, ā chō nda̍ hūnɔ̄ɔ̄ dīū a̍ mɔ̄ɔ̄ŋ fāŋndo̍ŋ.

¹²Chīɛ̄īlā wāŋnda̍ I̍chi̍pī a̍ so̍o̍lūū mɛ̍lɛ̄ka̍a̍ ndāā lēni᷄ŋ nda̍ŋ kpo̍u̍, I̍ cho̍ tōsā mī Māsāa̍ Nābi̍u̍kānɛ̍ɛ̍sā o̍ hu᷅ŋ lo᷅m nda̍ŋ kpo̍u̍, ndu̍yɛ̍ mɛ̄lɛ̄ka̍a̍ ndāā ka̍ŋ o̍ cho̍ ā ti᷄ŋ hūnɔ̄ɔ̄ lōmɔ̄ɔ̄, o̍ ko̍ŋ kɔ̍ɔ̍lī, mbō kūɛ̄nu᷄ŋ a̍ ā tūa̍a̍ o̍ lɛ̄ŋndē ndɔ̄le̍ŋ ni̍ŋ. Mɛ̄ɛ̍ nyāā kīsīa̍a̍ ā wā nu̍a̍ā o̍ dōma̍ wānā ma̍ndāā lāsāa̍, mī wānā ko̍ŋ ō lo̍ nda̍ fāāŋīa̍a̍ ā pīlɛ̍ŋ pi̍lɛ̍ŋ nda̍ mbō chīi̍ nda̍ fāāŋīāā kpo̍u̍, ō pīlɛ̍ bɛ̍ɛ̍ wānā chi᷅ lɛ̍ lo̍ŋ te̍ yɛ̍, le̍nde̍ Nābi̍u̍kānɛ̍ɛ̍sā o̍ mɛ̍ī ni̍ŋ lɛ᷅ŋndē I̍chi̍pīle̍ŋ lē dīāndāā ni̍. Ndu̍yɛ̍ mɛ̄ɛ̍ o̍ cho̍ hūnɔ̄ɔ̄ yɛ̍, le̍nde̍ o̍ mīīŋgūŋ ni̍ŋ yɛ̍lɛ̍kɛ̍lɛ̍ɛ̍ ni̍, wānā o̍ wānā o̍ nɔ̍lā ni̍ŋ mbō yɔ᷄ŋ ndu̍ nyɛ̄ le̍.

¹³Nyɛ̄ nda̍ tūūla̍ a̍ pōūta̍ŋ māā lēsūŋgbu̍ le̍ ndu̍ sōōlūūwo̍, mbo̍ wā Hɛ̄līo̍o̍po̍līī chi̍e̍e̍, o̍ lɛ̄ŋndē I̍chi̍pīle̍ŋ ni᷄ŋ ndo̍, ō chō ndu̍ hūnɔ̄ɔ̄ tɛ̄ɛ̄mbūū, ndu̍yɛ̍ o̍ ko̍ŋ kɔ̍ɔ̍lī, chīɛ̄īlā wāŋnda̍ I̍chi̍pī a̍ so̍o̍lūū mɛ̍lɛ̄ka̍a̍ ndāa̍ lēni᷄ŋ nda̍ŋ kpo̍u̍ mbō ma᷄l la̍ŋ o̍ yīŋ mī ā ŋūɛ̄.”