Read Southern Kisi Chɛ̄lūīma̍yā 44 Bible Online

Chɛ̄lūīma̍yā 44 - Southern Kisi bible

Chɛ̄lūīma̍yā 44

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ ke᷅ ya̍ yōōŋgōo̍ le̍ Chu̍ūwa̍ a̍ wa̍ o̍ lɛ̄ŋndē I̍chi̍pīle̍ŋ ni᷄ŋ nda̍ kpo̍u̍, a̍ wa̍ Mi̍ki̍dɔ̄ɔ̄ chi̍e̍e̍ wa̍ ni̍, a̍ ha̍ā Tāfa̍nɛ̍sī, a̍ ha̍ā Mɛ̍mfi̍sī, o̍ ko̍ŋ kɔ̍ɔ̍lī, a̍ ha̍ā o̍ lɛ̄ŋndē I̍chi̍pīle̍ŋ bā tōūwo̍.

²Mi̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nɔ̍ kpāāyāa̍ kpo̍u̍ wo̍, I̍sɔ̄lūɛ̍i̍ya̍ Mɛ̄lɛ̄ka̍ ndāa̍, ō dīmī āā, “Wāŋnda̍ I̍sɔ̄lūɛ̄ī, nya̍ pi̍la̍ lā chē mɛ̄ɛ̍ ya̍ tu̍si̍ Chūlu̍sɛ̄lɛ̄m a̍ chi̍o̍o̍ŋ Chu̍dā kpo̍u̍ nyɛ᷅ pālāā bɛ̄ndōo̍ chōo̍, mi̍ chi̍o̍o̍ŋ mu᷅ŋ ŋ̄ lō hāū pɔ᷅mnda̍ŋ, nāa̍ wāna̍ chi̍e̍e̍ o̍ che᷅l bɛ̍ɛ̍ le̍ wa̍.

³Le̍ dɛ̍nɛ̍ wɔ̍ɔ̍ŋ bɛ̄ndū wāŋnda̍ ha̍ā ā tōsa̍, ndu̍yɛ̍ ma̍ tōsā mi̍ ya̍ Mɛ̍lɛ̄ka̍ dūāūnu᷄ŋ tu̍mbe̍ a̍ nda̍ wo̍, le̍la̍ŋ ya̍ I̍ tu̍si̍ nda̍ nyɛ̄ pālāa̍ ho̍ō chōo̍ ni̍. Ma̍ lō o̍ ko̍ŋ, ma̍ mūli̍ŋ nyɛ᷅m chūŋ kɛ̄ndɔ̍ŋ lōmɔ̄ɔ̍ o̍ nyɛ̄m chēle̍ŋndo̍ŋ ndo̍, ndu̍yɛ̍ mā sōōlūū mu̍ŋ māā mɛ̄lɛ̄ka̍a̍ ndā, mɛ̄lɛ̄ka̍a̍ nda̍ a̍a̍ si̍nā bɛ̍ɛ̍ pa̍a̍ndū le̍ wa̍, ā nya̍ bɛ̍ɛ̍ nya̍ a̍a̍ si̍nā bɛ̍ɛ̍ le̍ wa̍, fi̍nyāā nyāa̍ bɛ̍ɛ̍ nda̍ a̍a̍ si̍nā bɛ̍ɛ̍ a̍ nda̍ o̍kɔ̄ɔ̄ le̍.

⁴Le̍ te̍le̍ŋnda̍ fa̍ŋgā fa̍ŋgā I̍ wa̍ bu̍ɛ̍īyāā nīa̍a̍ su̍a̍ā le̍ ya̍ wa̍ vīōmɔ̄ɔ̍ nāa̍ nda̍ chūā ma̍ sīlā nda̍ le̍ mā pɛ̄ŋgi̍ sɔ̄ɔ̍ŋ wɔ̍ɔ̍ŋndo̍ŋ mu᷅ŋ tōsāa̍, sɔ̄ɔ̍ŋ ya̍ Mɛ̍lɛ̄ka̍ tu᷄l yɛ̄le̍ŋ tūl bɛ̄ndōo̍ wo̍ŋ.

⁵Kɛ̍ wānāā nīa̍a̍ ha̍ā ā ye᷄ŋ ya̍ lānī le̍, kɛ̄lɛ̄ŋgāāle̍, mā tūēī nyɛ̄ ya̍ I̍ di̍mūl nda̍ wo̍, mā pɛ̄ŋgi̍ sɔ̄ɔ̍ŋ wɔ̄ɔ̍ŋ nda̍ wa̍ tōsāa̍ wo̍ŋ tōsāa̍, ndu̍yɛ̍ a̍ nyɛ̄m chūŋ kɛ̄ndɔ̍ŋ lōmɔ̄ɔ̍ ō mɛ̄lɛ̄ka̍a̍ chēle̍ŋnda̍ lo̍.

⁶Le̍ he̍ī, mi̍ ya̍ Mɛ̍lɛ̄ka̍ dūāūnu᷄ŋ tu̍mbe̍ a̍ chi̍o̍o̍ŋ mu᷅ŋ ō kālā ka̍lā. Mi̍ tu̍u̍lū kɔ̄l a̍ mu̍ŋ, mi̍ to̍sā mi̍ dɛ̍nɛ̍ pa̍lāā bɛ̄ndōo̍ ō tūāl o̍ chi̍o̍o̍ŋ Chu̍dā, ndu̍yɛ̍ a̍ o̍ bɛ̍ɛ̄la̍ŋ Chūlu̍sɛ̄lɛ̄m kpo̍u̍. Nyɛ̄ ko̍ŋ to̍sa̍ ni̍ mi̍ chi̍o̍o̍ŋ mu᷅ŋ ŋ̄ pīɔ̄l mi̍ ŋ̄ wā hāū pɔ᷅mnda̍ŋ.

⁷“Le̍la̍ŋ ya̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nɔ̍ kpāāyāa̍ kpo̍u̍ wo̍, nya̍ I̍sɔ̄lūɛ̍i̍ya̍ Mɛ̄lɛ̄ka̍ nyāa̍, nyɛ̄ ya̍ I̍ di̍mi̍ wo̍ cho̍ ho̍ō ni̍. Wāŋnda̍ I̍sɔ̄lūɛ̄ī, vɛ᷅ mi̍ nya̍ pi̍la̍ vēēlū kpu᷅ndɛ̍ wāā nu̍a̍ā chōo̍? Vɛ᷅ mi̍ nya̍ pi̍la̍ wā tōsāa̍ le̍ mī tɛ̍ɛ̍mbu̍u̍ nya̍ mɛ̄ɛ̍ nya̍ chō kpo̍u̍, wānā pɔ̍nɔ̍ ni̍, wānā la̍nɔ̍ ni̍, chūāāmbɔ̄ ni̍, chɛ̄lɛ̄kpɛ̍ le̍nde̍ ni̍, mī chi̍i̍ a̍ nya̍, wānā pi᷅lɛ̍ bɛ̍ɛ̍ ō lo᷅ o̍ lɛ̄ŋnde̍ŋ nde᷅ŋ ni᷄ŋ te̍?

⁸Vɛ᷅ mi̍ lā mūli᷄ŋ nyɛ᷅m nya̍ pi̍la̍ tōōsīāā a̍ bālā nyāla̍ŋ ndo̍ŋ sōōlūūwo̍, mī lā lūām nyɛ᷅m chūŋ kɛ̄ndɔ̍ŋ o̍ mɛ̄lɛ̄ka̍a̍ chēle̍ŋnda̍ lo̍, o̍ lɛ̄ŋnde̍ŋ nde᷅ŋ ni᷄ŋ, lē nya̍ hu᷄ŋ cha᷅l le᷅ŋ ni᷄ŋ nde̍ŋ, mi̍ lā tōsā mi̍ ya̍ Mɛ̍lɛ̄ka̍ dūāūnūŋ tu̍mbe̍ nu̍a̍ā kpɛ̍ a̍ nya̍? I̍ cho̍ nya̍ hūnɔ̄ɔ̄ tɛ̄ɛ̄mbūū ndu̍yɛ̍ mī chi̍i̍ a̍ nya̍. Dɛ̍nɛ̍ pa̍lāa̍ tu̍āl ni̍ŋ nya̍ chōo̍ wo̍, wāŋnda̍ chō nya̍ hūnɔ̄ɔ̄ sīīŋgūū māā tāāmāsi̍ le̍ wāŋnda̍ sēndi̍o̍o̍ hāndɔ̄ɔ̍ chōo̍. Lā chō hūnɔ̄ɔ̄ sīmnɔ᷄ŋ nyɛ᷅ māmāā lɛ̄ŋīi̍ ba̍lu̍ nya̍ ve̍ tɛ̄ɛ̄ŋ.

⁹Wāŋnda̍ Chu̍dā, fi̍nyāā nyāā ma̍māa̍ ni̍, māsāā bɛ̍ndūa̍a̍ Chu̍dā a̍ lāāndāā ndāa̍ ni̍, nya̍ ni̍, a̍ lāāndāā nyāa̍, mɛ̄ɛ̍ lā pūɛ̄ɛ̄nu̍ŋ bɛ̍ɛ̍ a̍ yɔ̍ŋndā wɔ̄ɔ̍ŋndā nya̍ tōsa̍ o̍ chi̍o̍o̍ŋ Chu̍dā, ndu̍yɛ̍ a̍ o̍ bɛ̍ɛ̄la̍ŋ Chūlu̍sɛ̄lɛ̄m nda̍ŋ?

¹⁰Ndu̍yɛ̍ a̍ pāa̍le̍ hāūle̍ŋ nde᷅ŋ bɛ̍ɛ̍, lā tūsi̍ŋ ndɔ̍ tōōlō, ndu̍yɛ̍ mī lā ke̍ ya̍ lēbɛ̄ɛ̄ o̍ lēbɛ̄ɛ̄ le̍. Nya̍ ni̍, fi̍nyāā nyāa̍ ni̍, nyɛ̄ o̍ nyɛ̄ sāwāla̍ nīla̍ŋ lā di̍mu̍l nya̍, a̍ nyɛ̄ o̍ nyɛ̄ ya̍ I̍ di̍mu̍l nya̍ le̍ tōsāa̍, lā chɛ᷄l mī lā tōsa̍ ndu̍ le̍.

¹¹“Le̍la̍ŋ ya̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nɔ̍ kpāāyāa̍ kpo̍u̍ wo̍, I̍sɔ̄lūɛ̍i̍ya̍ Mɛ̄lɛ̄ka̍ ndāa̍, nyɛ̄ ya̍ I̍ di̍mi̍ wo̍ cho̍ ho̍ō ni̍. I̍ chi̍i̍ kɛ̄ɛ̄sīāā le̍ nya̍ nyɛ̄ pālāā bɛ̄ndōo̍ tūsīo̍o̍ chōo̍, ndu̍yɛ̍ mī tɛ̍ɛ̍mbu̍u̍ nya̍ wāŋnda̍ Chu̍dā kpo̍u̍.

¹²Nya̍ wānā o̍ wāna̍ lo̍ yōōmū o̍ lɛ̄ŋndē Chu̍dāle̍ŋ ni᷄ŋ, mi̍ lā kɛ̄ɛ̄sīāā le̍ mī lā hīŋ o̍ lɛ̄ŋndē I̍chi̍pīle̍ŋ nde᷅ŋ ni᷄ŋ le̍ cha᷄lle̍, I̍ cho̍ nya̍ nyɛ̄ pālāa̍ hāndɔ̄ɔ̄ chōo̍ mī ba̍su̍ nya̍ tɛ̍ɛ̍, ō pīlɛ̍ bɛ̍ɛ̍ ō lo᷅ le̍. I̍ cho̍ tōsā nya̍ kpo̍u̍ mī lā chūu̍ o̍ lɛ̄ŋnde̍ŋ nde᷅ŋ ni᷄ŋ. Ā bɔ̄ɔ̍ bɔ̍ɔ̍ a̍ cho̍ pīɔ̍mnda̍ŋ sɔ̄lā a̍ mɔ̄ɔ̄ŋ fāŋndo̍ŋ, o̍ ko̍ŋ kɔ̍ɔ̍lī, mī yīa̍a̍ŋ mā chīi̍ ā bɔ̄ɔ̍ bɔ̍ɔ̍. Nya̍ kpo̍u̍, chɔ̍ŋ a̍ wānāā yɔ̄ŋāa̍ mbō kūɛ̄ a̍ wānāā tɔ̍ɔ̍wa̍ lā chō hūnɔ̄ɔ̄ pīɔ̍mndo̍ sɔ̄lā. Ā dīū ni̍ŋ a̍ ti̍ŋ a̍ mɔ̄ɔ̄ŋ fāŋndo̍ŋ, o̍ ko̍ŋ kɔ̍ɔ̍lī, mī yīa̍a̍ŋ mā chīi̍ ā ti᷄ŋ. Nyɛ̄ pālāa̍ tu̍āl ni̍ŋ nya̍ chōo̍ wo̍, wāŋnda̍ hūŋ ni̍ŋ mā hu̍ŋ si̍i̍ŋgūū nya̍ māā tāāmāsi̍ le̍ wāŋnda̍ sēndi̍o̍o̍ hāndɔ̄ɔ̍ chōo̍. Sīōōŋīī bɛ̄ndūe̍i̍ chō hūnɔ̄ɔ̄ wānā o̍ wānā bi̍yɔ̄ɔ̄ a̍ pīɔ̍mnda̍ kpūndɛ̍lā nya̍ sɔ̄lā ni̍ŋ nda̍ŋ. Wāŋnda̍ chō nya̍ hūnɔ̄ɔ̄ pɛ̄ɛ̄sā mā tɛ̄ɛ̄mbu̍u̍ nya̍ lābɛ̄ɛ̄ ndu̍yɛ̍ mā chu̍a̍ nya̍ nyɛ̄ fo̍ndō fu̍u̍.

¹³Nya̍ wānā o̍ wāna̍ hi᷅ŋ o̍ lɛ̄ŋndē I̍chi̍pīle̍ŋ nde᷅ŋ ni᷄ŋ mi̍ lā wā īchāli̍ na̍nu᷄ŋ, I̍ cho̍ nya̍ nyɛ̄ pālāa̍ tūsī chōo̍ a̍ chɔ̄ūwo̍, o̍ ko̍ŋ kɔ̍ɔ̍lī, a̍ yīmā bɛ̄ndūa̍ŋ ndu̍yɛ̍ a̍ nāā wɔ̄ɔ̍ŋndo̍, mɛ̄ɛ̍ ya̍ I̍ to̍sa̍ a̍ wāŋnda̍ Chūlu̍sɛ̄lɛ̄m yɛ̍.

¹⁴Ndu̍yɛ̍ nya̍ wānā o̍ wa᷅na̍ lo̍ yōōmū o̍ lɛ̄ŋndē Chu̍dāle̍ŋ ni᷄ŋ mi̍ lā hu᷄ŋ cha᷅l o̍ lɛ̄ŋndē I̍chi̍pīle̍ŋ nde᷅ŋ ni᷄ŋ, lā nɔ̍lā ni̍ŋ mī lā hɛ̄lu᷄ŋ nyɛ᷅ pālāā kōŋ te̍, kɛ̄lɛ̄ŋgāāle̍, mī nyɛ̄ pālāā kōŋ ō kēēku̍ nya̍ chōo̍ mī lā lo̍ yōōmū. Lɛ̄ŋndē Chu̍dāle̍ŋ, lɛ̄ŋndē nya̍ chō yēēmɛ̍i̍ le̍ mīīŋgōo̍ lo̍ŋ mī lā kɔ̍ cha᷅l lo̍ŋ nde̍ŋ, ō cho̍ nya̍ kpo̍u̍ le̍ a̍ mi̍i̍ŋgū ni̍ŋ lo̍ŋ te̍. Wānāa̍ mi̍i̍ŋgū ni̍ŋ lo̍ŋ nda̍, mɛ̄ɛ̍ le̍ wāŋnda̍ nyɛ̄ pɔ̄mbɔ̄.”

¹⁵Wāŋnda̍ kpo̍u̍ ā wa̍ ā dīīna᷄ŋ ku̍ndā bɛ̄ndōo̍ mi̍ wa᷅ nda̍ dīōmnda̍ŋ ndāŋ dīmūllo̍. Nyɛ̍ o̍ nyɛ̄ Mɛ̄lɛ̄ka̍ dīmu̍l la̍ mi̍ di̍mūl nda̍ kpo̍u̍. O̍ ko̍ŋ, pūa̍a̍ wa̍ lo̍ŋ, ma̍ sīnā māā lāāndāā ndāa̍ ā lūām nyɛ᷅m chūŋ kɛ̄ndɔ̍ŋ o̍ mɛ̄lɛ̄ka̍a̍ chēle̍ŋnda̍ lo̍ wa̍ ki̍nɛ̍i̍, a̍ wāŋ lāāndūa̍a̍ ā pīli̍a̍a̍ kpo̍u̍ a̍ wa̍ īsīsi̍ lo̍ŋ nda̍, a̍ wāŋnda̍ ā pīli̍a̍a̍, a̍ wa̍ īchāli̍ o̍ lɛ̄ŋndē I̍chi̍pīle̍ŋ bā tōūwo̍ wa̍, ma̍ dīmūl la̍ āā,

¹⁶“Ŋ̄ yēēma̍ mī ŋ̄ ya᷄ŋ lānī o̍ yōōŋgū nu̍m ŋ̄ chō ko̍ŋ di̍mīo̍o̍ māā Mɛ̄lɛ̄ka̍ Ya̍a̍wɛ̄ɛ̄ o̍ ke̍ nu̍m ni̍ wo̍ le̍.

¹⁷Nyɛ̄ o̍ nyɛ̄ na̍a̍ ŋ̄ yīi̍ mi̍ ŋ̄ chɛ̄la᷅ŋ māā ŋ̄ chō ndu̍ tōsā, ŋ̄ chō hīōūwɔ̄ɔ̄ lāchī a̍ ndu̍ tōsāa̍. Ŋ̄ chō hīōūwɔ̄ɔ̄ lāchī a̍ sa̍lāla̍ŋ sōlīo̍o̍ o̍ mɛ̄lɛ̄ka̍ nāā la̍a̍ndōo̍ lo̍, ndu̍ yɔ̍nūŋ māā māsā wa̍nā la̍nɔ̍ cho̍ chōo̍ cho̍o̍[6] wo̍ ni̍, ndu̍yɛ̍ mī ŋ̄ tāla̍ mūɛ̄īya̍ŋ nāa̍ ndu̍ chu̍a̍ māā lāsa̍lā, mɛ̄ɛ̍ na̍a̍ ŋ̍ to̍sā pa̍a̍ndū o̍ chi̍o̍o̍ŋ Chu̍dā a̍ o̍ bɛ̍ɛ̄la̍ŋ Chūlu̍sɛ̄lɛ̄m yɛ̍, na̍a̍ ni̍, fi̍nyāā nāa̍ ni̍, māsāa̍ nāā bɛ̍ndūa̍a̍ ni̍, a̍ wānāā nāā bɛ̍ndūa̍a̍. A̍ te̍le̍ŋ na̍a̍ ŋ̄ wa̍ sa̍lāla̍ŋ ndāŋ sōlīo̍o̍ o̍ mɛ̄lɛ̄ka̍ nāa̍ ho̍ō lo̍ wo̍, nyɛ̄ dīa̍a̍ ō wānu̍ŋ na̍a̍ o̍ bā ta̍u̍, ndu̍yɛ̍ nyɛ̄ o̍ nyɛ̄ wa̍ ō kɛ̄ndɛ̄ a̍ na̍a̍. Dɛ̍nɛ̍ o̍ dɛ̍nɛ̍ pa̍lāā ndu̍ o̍o̍ ko̍māl na̍a̍ le̍.

¹⁸Kɛ̍ chɔ̍ŋ ni᷅ŋ a̍ te̍le̍ŋ na̍a̍ ŋ̄ pɛ̄ŋgi̍ sa̍lāla̍ŋ ndāŋ sōlīo̍o̍ o̍ māsa̍ nāā la̍a̍ndōo̍ ho̍ō chōo̍ cho̍o̍ lo̍, a̍ mūɛ̄īya̍ŋ tālāa̍ o̍ ndu̍ lo̍ māā lāsa̍lā wo̍, mbo̍ bīī a̍ pāa̍le̍ hāūle᷅ŋ, ŋ̄ sɔ̍lā lɛ̍ nyɛ̄ o̍ nyɛ̄ le̍, ndu̍yɛ̍ chūūwo̍ tu̍ŋ na̍a̍ ŋ̄ chō o̍ chɔ̄ūwo̍ ni᷄ŋ, ndu̍yɛ̍ a̍ yīa̍a̍ŋ ni̍.”

¹⁹Mi̍ wāŋ lāāndūa̍a̍ lō o̍ ko̍ŋ ma̍ dīmūl la̍ āā, “Bōōndi̍i̍ na̍a̍ ŋ̄ wa̍ nyɛ̄m chūŋ kɛ̄ndɔ̍ŋ lōmɔ̄ɔ̍ o̍ māsā na̍a̍ lāāndōo̍ ho̍ō chōo̍ cho̍o̍ wo̍ lo̍ ve̍, mī ŋ̄ tālā mu̍ɛ̍īya̍ŋ o̍ ndu̍ lo̍ māā lāsa̍lā o̍ ko̍ŋ kɔ̍ɔ̍lī, mī ŋ̄ tōōsīāā bēe̍dīi̍yo̍ le̍ ndu̍ māā vēla᷅ŋ ndɔ̄ ve̍, pīāāndūāā nāa̍ bɛ̍ɛ̍ nda̍ a̍a̍ si̍nā a̍ ndi̍ o̍kɔ̄ɔ̄ ndu̍yɛ̍ ma̍ chɛ̄la᷅ŋ a̍ nyɛ̄ na̍a̍ ŋ̄ wa̍ tōsāa̍ wo̍.”

²⁰O̍ ko̍ŋ kɔ̍ɔ̍lī, mi̍ ya̍ Chɛ̄lūīma̍yā di̍mūl nda̍ kpo̍u̍, nda̍ wānā o̍ wāna̍ di̍mu̍l la̍ dīōmnda̍ŋ ndāŋ, wānā pɔ̍nɔ̍ ni̍, wānā la̍nɔ̍ ni̍, a̍a̍,

²¹“Nya̍ ni̍, fi̍nyāā nyāa̍ ma̍māa̍ ni̍, māsāa̍ nyāā bɛ̍ndūa̍a̍ ni̍, wānāā nyāā bɛ̍ndūa̍a̍ ni̍, o̍ ko̍ŋ kɔ̍ɔ̍lī, a̍ wānā o̍ wāna̍ wa̍ o̍ lɛ̄ŋndē Chu̍dāle̍ŋ ni᷄ŋ, nyɛ̄m chūŋ kɛ̄ndɛ̄ŋ nya̍ wa̍ lōmɔ̄ɔ̍ o̍ chi̍o̍o̍ŋ Chu̍dā, o̍ ko̍ŋ kɔ̍ɔ̍lī, a̍ o̍ bɛ̍ɛ̄la̍ŋ Chūlu̍sɛ̄lɛ̄m o̍ mɛ̄lɛ̄ka̍a̍ chēle̍ŋnda̍ lo̍ wo̍ŋ bāā nya̍ a̍a̍ nɔ̍ o̍ kɔ̄l māā Mɛ̄lɛ̄ka̍ Ya̍a̍wɛ̄ɛ̄ o̍ si̍na̍ a̍ ndi̍ o̍kɔ̄ɔ̄ le̍? Ɔ̄ɔ̄ bāā yīya᷄ŋndo̍ nya̍ a̍a̍ yi̍ya̍ŋ ni̍ māā ndu̍ o̍o̍ pu̍ɛ̍ɛ̍nu̍ŋ a̍ ndi̍ o̍kɔ̄ɔ̄? Mbo̍ sīnā.

²²Mɛ̄ɛ̍ nya̍ tōsa̍ yɔ̄ŋndā wɔ̄ɔ̍ŋnda̍ŋ, ndu̍yɛ̍ a̍ sɔ̄ɔ̍ŋ lāmāāŋ bɛ̄ndo̍ŋ te̍i̍, Mɛ̄lɛ̄ka̍ Ya̍a̍wɛ̄ɛ̄ ndu̍ o̍o̍ nɔ̍lā lɛ̍ mī ndu̍ o̍o̍ bi̍u̍nu̍ŋ nya̍ le̍. Nyɛ̄ ko̍ŋ to̍sa̍ ni̍, mbo̍ tūsī nya̍ nyɛ̄ pālāā bɛ̄ndōo̍ chōo̍ mi̍ lɛ̄ŋndē nyāle̍ŋ lē sīmnu᷄ŋ ha̍ū māā po̍l, nāa̍ wāna̍ chi̍e̍e̍ o̍ che᷅l te̍ wa̍, ndu̍yɛ̍ mi̍ wāŋnda̍ ā sīīŋgūū nya̍ hāū māā tāāmāsi̍ le̍ wāŋnda̍ sēndi̍o̍o̍ hāndɔ̄ɔ̍ chōo̍.

²³Le̍ yɔ̄ŋ wɔ̄ɔ̍ŋ nya̍ tōsa̍ a̍ Mɛ̄lɛ̄ka̍ Ya̍a̍wɛ̄ɛ̄, nyɛ̄m chēle̍ŋndo̍ŋ sōōlūūwo̍ mī lā lūām nyɛ᷅m chūŋ kɛ̄ndɔ̍ŋ o̍ mu̍ŋ ndo̍ māā mɛ̄lɛ̄ka̍a̍ nya̍, ndu̍yɛ̍ nyɛ̄ o̍ nyɛ̄ o̍ di̍mu̍l nya̍ mi̍ lā kɛ̄ɛ̄ le̍ ndu̍ tōsāa̍, sāwāla̍ ndɔ̄la̍ŋ bɛ̍ɛ̍ a̍ pɛ̄ɛ̄kūlā ndɔ̄la̍ŋ, lā chɛ᷄l mī lā chu̍a̍ la̍ŋ te̍ yɛ̍, nyɛ̄ kōŋ o̍ tu̍si̍ nya̍ nyɛ̄ pālāā bɛ̄ndu̍ cho̍ nya̍ ho̍ō chōo̍ pāa̍le̍ hāūle̍ŋ nde᷅ŋ ndo̍ ni̍.”

²⁴O̍ ko̍ŋ kɔ̍ɔ̍lī, mi̍ ya̍ Chɛ̄lūīma̍yā di̍mūl wāŋ lāāndūāā kāŋ kpo̍u̍, a̍ wāŋnda̍ ā pīli̍a̍a̍ a̍a̍, “Lā ya᷄ŋ ni᷅la̍ŋ mī lā tūēī nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍, nya̍ wānā o̍ wa᷅na̍ fu̍la̍ Chu̍dā mi̍ lā hūŋ o̍ lɛ̄ŋndē I̍chi̍pīle̍ŋ nde᷅ŋ ni᷄ŋ.

²⁵Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍, I̍sɔ̄lūɛ̍i̍ya̍ Mɛ̄lɛ̄ka̍ ndāa̍ o̍ dīmi̍ māā, wāŋnda̍ Chu̍dā, nya̍ ni̍, lāāndāā nyāa̍ ni̍, lā lo̍ o̍ ko̍ŋ, mi̍ lā chūā būŋgɛ̄i̍ ī kālā ka̍lā le̍ wāa̍ nyɛ̄m chūŋ kɛ̄ndɔ̍ŋ lōmɔ̄ɔ̍ o̍ māsā wa̍nā la̍nɔ̍ cho̍ chōo̍ wo̍ lo̍ ndu̍yɛ̍ mī lā tālā mu̍ɛ̍īya̍ŋ o̍ ndu̍ lo̍ māā sa̍lā. Ndu̍yɛ̍ nyɛ̄ nya̍ dīmi̍ a̍ sōndōlā nyāla̍ŋ ndo̍, ndu̍ ko̍ni̍ nya̍ chō tōsāa̍ ni̍. Le̍la̍ŋ lā hīo̍u̍ la̍chi̍ a̍ nyɛ̄ nya̍ chūa̍ būŋgɛ̄i̍ yo̍ tōsāa̍. Lā hīo̍u̍ la̍chi̍, mī lā lo̍ o̍ dīōmndē nyāle̍ŋ chōo̍.

²⁶Kɛ̍ ndu̍yɛ̍ lā ya᷄ŋ ni᷅la̍ŋ mī lā tūēī nyɛ̄ ya̍ Mɛ̍lɛ̄ka̍ Ya̍a̍wɛ̄ɛ̄ di̍mi̍ wo̍, nya̍ wānā o̍ wāna̍ fu̍la̍ Chu̍dā mi̍ lā wā o̍ lɛ̄ŋndē I̍chi̍pīle̍ŋ nde᷅ŋ ni᷄ŋ. Ya̍ Mɛ̍lɛ̄ka̍ Ya̍a̍wɛ̄ɛ̄ I̍ te̍ŋnu᷄ŋ, nya̍ wānā o̍ wāna̍ fu̍la̍ Chu̍dā mi̍ lā wā o̍ lɛ̄ŋnde̍ŋ nde᷅ŋ ni̍ŋ, I̍ cho̍ tōsā fɛ̍ɛ̍ŋ a̍ fɛ̍ɛ̍ŋ wāŋndo̍ ve᷅m lɛ̍ īsɔ̄ɔ̍ o̍ īsɔ̄ɔ̍ to̍sā mbō vēēlu̍ dīōlā nīla̍ŋ mbō mēna̍ŋ māā, le̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, Mɛ̄lɛ̄ka̍ cho̍ yōōmū le̍ fɛ̍ɛ̍ŋ a̍ fɛ̍ɛ̍ŋ ndo̍ le̍.

²⁷Kāni̍ fo̍ndōle̍, le̍ te̍le̍ŋ o̍ te̍le̍ŋ hɔ̄ltē nīle̍ŋ lē chō nya̍ ni᷅ŋ wā kɔ̄ɔ̄lī, le̍ nya̍ nyɛ̄ pālāa̍ tūsīo̍o̍ chōo̍, ō cho̍ lɛ̍ le̍ nya̍ dɛ̍nɛ̍ o̍ dɛ̍nɛ̍ kɛ̍ndɛ̄ tōsāl te̍. Nya̍ wānā o̍ wāna̍ fu̍la̍ Chu̍dā mi̍ lā hūŋ cha᷄lle̍ o̍ lɛ̄ŋndē I̍chi̍pīle̍ŋ nde᷅ŋ ni᷄ŋ, I̍ cho̍ tōsā mī lā chūu̍ kpo̍u̍. Ā ti᷄ŋ ā sɔ̍lā ni̍ŋ pi̍ɔ̍mndo̍ o̍ chɔ̄ūwo̍ ni̍ŋ, o̍ ko̍ŋ kɔ̍ɔ̍lī, mī ā ti᷄ŋ ā chūu̍ a̍ yīa̍a̍ŋ. Nya̍ kpo̍u̍ lā chō hūnɔ̄ɔ̄ wā ā tɛ̄ɛ̄mbāā.

²⁸Wānāa̍ hi̍a̍lūŋ ni̍ŋ chɔ̍ūwo̍ mā mīīŋgu̍ o̍ lɛ̄ŋndē Chu̍dāle̍ŋ ni᷄ŋ fūlāa̍ o̍ lɛ̄ŋndē I̍chi̍pīle̍ŋ ni᷄ŋ nda̍, ā ve᷅m ni̍ŋ a̍ bɔ̍ɔ̍ le̍. Tē ko̍ŋ o̍ yɔ̍nu̍ŋ pɛ̍, nya̍ wānā o̍ wāna̍ lo̍ yōōmū, mi̍ lā fūlā Chu̍dā mi̍ lā hūŋ o̍ lɛ̄ŋnde̍ŋ nde᷅ŋ ni᷄ŋ, o̍ ko̍ŋ nya̍ chō sīnā ni̍, dīōm nyāa̍ a̍ dīōm nūu̍, o̍ cho̍ tōnya̍ mbo̍ lō lēcho̍ō wo̍.

²⁹Ya̍ Mɛ̍lɛ̄ka̍ Ya̍a̍wɛ̄ɛ̄, I̍ chɔ᷅m ndɔ̍ nya̍ tāāmāsi̍o̍o̍ le̍ mī lā hu᷄ŋ la̍a̍la̍ŋ māā nyɛ̄ ya̍ I̍ di̍mi̍ wo̍ ō chō yɔ̄nɔ᷄ŋ a̍ nya̍, ndu̍yɛ̍ māā o̍ lɛ̄ŋnde̍ŋ nde᷅ŋ ni᷄ŋ na̍nu᷄ŋ kpe̍e̍kpe̍i̍ ya̍ I̍ cho̍ nya̍ nyɛ̄ pālāa̍ tūsī chōo̍ ni̍.

³⁰I̍ cho̍ hūnɔ̄ɔ̄ māsāa̍ Hɔ̍fi̍lūā, māsāa̍ le̍ I̍chi̍pī mālɔ̄ɔ̄ ya̍a̍mɔ̍ɔ̍wa̍a̍ ndūa̍a̍ o̍ bā, a̍ cho̍ kīndīo̍o̍ le̍ ndu̍ dīyɔ̄ɔ̍ wa̍. Sɛ̄dīka̍yā, māsāa̍ le̍ Chu̍dā, ya̍a̍mɔ̍ɔ̍nɔ̍ ndɔ̍ wa̍ kīndīo̍o̍ le̍ ndu̍ dīyɔ̄ɔ̍ wo̍, ndu̍ yɔ̍nūŋ māā Nābi̍u̍kānɛ̍ɛ̍sā, māsāa̍ le̍ Ba̍bi̍lɔ̄ŋ ni̍, mɛ̄ɛ̍ ya̍ I̍ ma̍l Sɛ̄dīka̍ya̍ ndu̍ o̍ bā yɛ̍, le̍nde̍ ya̍ I̍ ma᷅l ni̍ŋ Hɔ̍fi̍lūā ya̍a̍mɔ̍ɔ̍wa̍a̍ ndūa̍a̍ o̍ bā ni̍.”