Read Southern Kisi Chɛ̄lūīma̍yā 45 Bible Online

Chɛ̄lūīma̍yā 45 - Southern Kisi bible

Chɛ̄lūīma̍yā 45

¹Wɔ̄sī Chɛ̄hōwa̍kīm, po̍ Chōōsa̍yā wo̍ ō chīŋa̍ wɔ̄sīla̍ŋ lā hīɔ̍ɔ̍lu̍ o̍ lēmāsā Chu̍dā wo̍, yōōŋgū Mɛ̄lɛ̄ka̍ ndu̍ o̍o̍ ke̍ ya̍ ko̍ŋ le̍ wāŋnda̍ Chu̍dā wo̍, mi̍ Ba̍lu̍kī, po̍ Nɛ̄lu̍a̍yā wo̍ ō pōōnyīāā yōōŋgōo̍ ho̍ō kpo̍u̍ o̍ yāu̍wo̍ chōo̍, mī ya̍ I̍ su̍a̍ā mī ndu̍ po̍o̍nyi̍a̍a̍. Mɛ̄ɛ̍ o̍ chi̍i̍ yōōŋgōo̍ ho̍ō pōōnyi̍a̍a̍, mi̍ Mɛ̄lɛ̄ka̍ kē ya̍ yōōŋgū chēle̍ŋ le̍ ndu̍ Ba̍lu̍kī. Mi̍ di̍mūl ndu̍,

²māā Mɛ̄lɛ̄ka̍ Ya̍a̍wɛ̄ɛ̄ Mɛ̄lɛ̄ka̍ I̍sɔ̄lūɛ̍i̍ya̍ ō dīmi̍ āā, “Ba̍lu̍kī,

³I̍ cho̍ tūēīyɔ̄ɔ̍ ma̍ wā ŋɔ̄ɔ̄cha᷄ŋndo̍ āā, ‘Mbɔ̄ ya̍ nyɛ̄ pālāa̍ ho̍ō ō tīu̍ ya̍ bā fɔ̍! Nyɛ̄ nɛ̄īyāa̍ ho̍ō chō ya̍ chōo̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ chɔ̍ɔ̍lū ya̍ vɛ̄lɛ̄ kɔ̄l tāmbɛ̍i̍ che᷅le̍ŋ kē. I̍ sa̍ŋga̍ ni᷅ŋ a̍ kūŋnda̍ŋ a̍ nyɛ̄ kīndīlāa̍ fɔ̍. Pɛ̄ŋgī o̍ pɛ̄ŋgī I̍ nɔ̍ lɛ̍ ndu̍ o̍ yōōmū nūu̍ ni᷄ŋ te̍?’

⁴“Kɛ̍ ndu̍yɛ̍ ya̍ŋ ndɔ̍ ni᷅la̍ŋ Ba̍lu̍kī, mā tūēī nyɛ̄ ya̍ Mɛ̍lɛ̄ka̍ Ya̍a̍wɛ̄ɛ̄ di̍mi̍ wo̍. Lɛ̄ŋndē ya̍ pi̍la̍, I̍ ta̍ŋgu̍l le᷅ŋ nde̍ŋ, I̍ cho̍ le̍ŋ vɛ̄lɛ̄ tɛ̄ɛ̄mbūū. Nyɛ̄ ya̍ I̍ tɔ᷅l lo̍, I̍ cho̍ ndu̍ vɛ̄lɛ̄ sūŋgɔ̄ɔ̄.

⁵Ba̍lu̍kī, bāā dɛ̍nɛ̍ kɛ̍ndɔ̄ɔ̍ ŋ̄ yēēma̍ te̍le̍ŋndo̍ ho̍ō ni̍? Sa̍ŋga᷄ŋ te̍, fo̍ndōle̍, wānā o̍ wāna̍ cho̍ o̍ lɛ̄ŋnde̍ŋ nde᷅ŋ ni᷄ŋ, I̍ cho̍ nda̍ kpūndɛ̍ bɛ̄ndōo̍ tūsī chōo̍. Kɛ̍ ndu̍yɛ̍ nūm nūm bā o̍ bā ŋ̄ kɔ̍, I̍ cho̍ tōsā mā hɛ̄lu᷄ŋ, mā lo̍ yōōmū. Ya̍ Mɛ̍lɛ̄ka̍ Ya̍a̍wɛ̄ɛ̄ ya̍ sōo̍ ni̍.”